Edhe një botim me rëndësi në diasporë

VRUNDUJ KUJTIMESH TË HAMZA HALABAKUT

19 shtaor 2003 / Shkruan: Çerkin BYTYÇI   Ditë më parë, doli nga shtypi monografia kushtuar  zhvillimit të Shkollës Shqipe në disa mjedise të Bavarisë Veriore të Gjermanisë, hartuar nga shkrimtari dhe punëtori i palodhshëm i arsimit Hamza Halabaku. Është ky botim i rëndësishtëm që ngërthen historikun  shumëvjeçar dhe traditën e punës intensive me nxënësit mërgimtarë në këtë pjesë të Gjermanisë, ku me përkushtim mësohet dhe kultivohet gjuha shqipe.

 

Nga bankat  e Shkollës Shqipe në Bavarinë Veriore deri më tash dolën qindra nxënës shqiptarë të cilët duke mësuar  për gjuhën dhe letërsinë shqipe, për historinë kombëtare, gjeografinë e vendit, kulturën muzikore e artin figurativ, thelluan dhe forcuan edhe më shumë ndjenjën e atdhedashurisë, mirkuptimin dhe tolerancën në këtë mjedis të Gjermanisë mike.

 

Ndërkaq, në këtë libër që ka vlerë të përhershme për historikun e shkollës shqipe në diasporë, në hollësi dhe me kujdes të veçantë, autori flet për rëndësinë e mësimit plotësues për fëmijët e mërgimtarëve tanë dhe faktin se  arsimimi dhe edukimi kombëtar janë një nga çështjet më madhore të kombit.  Janë për tu çmuar  lart përpjekjet e mëdha, sfidat e pareshtura, sakrificat e vetmohimet e atyre bashkatdhetarëve tanë për formimin e shkollës, e cila tashmë ka një traditë të mirë dhe mbi rrënjët e forta e të thella të saj mund të priten suksese edhe më të mëdha.

 

Është për tu çmuar edhe kontributi i subjekteve arsimore të shteteve përkatëse dhënë shkollës me mësim  plotësues në gjuhën shqipe, që krijuan parakushte të volitshme duke ofruar lokalin shkollor, mjetet mësimore etj., për  nxënësit shqiptarë. Të gjitha këto, autori i këtij libri Hamza Halabaku sikundër edhe aktivitetet e gjithmbarshme të nxënësve shqiptarë në Bavarinë Veriore, i prezenton në mënyrë të detajizuar. Duke u rrëfyer në vetën e parë, në monografinë „Vrunduj kujtimesh“ pasqyrohen edhe vështërsitë e shumta rreth hapjes së shkollave shqipe në diasporë, kontributin e madh të individëve dhe subjekteve gjermane për të mbështetur këtë aktivitet të rëndësishëm shqiptar dhe në përgjithësi për vullnetin e pathyeshëm të nxënësve për  të mësuar në gjuhën shqipe.

 

- Mësimi plotësues në gjuhën shqipe për mërgimtarët tanë është i nevojshëm aq sa edhe buka që e hanë dhe uji që e pijnë. Pa këtë mësim fëmijët e tyre nuk mund të kenë të ardhme të ndritshme. Sepse, nuk mjafton që fëmijët e tyre vetëm të dijnë se janë shqiptarë, por ata duhet edhe të marrin dituri nga gjuha amtare, nga historia e gjeografia kombëtare, arti, kultura dhe tradita jonë e begatshme. Ata nëpërmjet këtij mësimi frymëzohen me atdhedashurinë e pajisen me njohuri që lehtësojnë rrugën e zotimit të tyre për çështjen e mirëfilltë kombëtare, shkruan  në këtë monografi H. Halabaku.

 

Ky libër i posabotuar është i ndarë në disa kaptina që pasqyrojnë rrugën e zhvillimit të shkollës shqipe. Ndërkaq, i ilustruar me  mëse tetëdhjetë fotografi, paraqet një material të çmueshëm fotodokumentar që mund të shfletohet dhe lexohet shpesh dhe kudo, për të rikujtuar gjithë punën e madhe të bërë në arsimimin e  fëmijëve shqiptarë në diasporë përkatësisht në Bavarinë Veriore të Gjermanisë. Vend me rëndësi zë kontributi i arsimdashësve dhe miqve  gjerman të cilët në çdo kohë mbështetën shkollën shqipe.

 

Njëri nga rezenzentët e këtij libri, Gani Bajrami, në parathënien e shkruar konstaton se autori hamza Halabaku, në këtë libër ka arritur të sjell informacione dhe dëshmi për realitetin e një kohe dhe materiale fotografike që librit i japin peshë dhe vlerë të veçantë. Ndaj, ly libër nuk mund të merret  shkurt vetëm si  një kronikë e kohës së caktuar, por është një plotësi dokumentare që len gjurmë për ekzistimin dhe funksionimin e Shkollës Shqipe në Bavarinë veriore.

 

Me këtë botim, autori Hamza Halabaku, kryen njëkohësisht një obligim morqalo-qytetar në ndriçimin e kësaj pjese të historisë sonë reale, duke pasqyruar kontributin e bashkatdhetarëve tanë si prindër dhe përpjekjet dhe sfidat e tyre të pareshtura për formimin e shkollës shqipe.

 

Libri ka 90 faqe dhe është  një botim luksoz, i tëri në teknikën kolor. Sëbashku me monografitë tjera të botuara deri më tash si ajo kushtuar shkollës shqipe në Gjermani, Shkollës  Shqipe në Wupertal, Düsseldorf, Gelserkirchen, Neuss, Nürnberg,  Rottweil, Tuttlingen etj., paraqet një thesar të çmueshëm për të mbështtur studimet lidhur me diasporën shqiptare dhe aktiviteetet e saj arsimore e kulturore.

Copyright©2000-2003 Trepca.net - Të gjitha të  drejtat e rezervuara.