OPINIONE

Salih Kabashi: "Xhemal Mustafa dhe Enver Maloku ishin në radhë të parë e para së gjithash intelektualë të Kosovës"

18 shtator 2003 / Salih KABASHI

 

Në kuadër të polemikës midis zotërinjve Demaj dhe Berisha, desha, nëse më lejohet, të sqaroj diçka: Enver Malokun dhe sidomos Xhemal Mustafën nuk ke si t'i lidhësh aq shumë me gazetën "Bota Sot" nga arsye e thjeshtë se që të dyja figurat e rëndësishme të publicistikës dhe të literaturës ishin institucione më vete. Për botën shqiptare në Kosovë ata qëndronin mbi gazeta, pra edhe mbi "Botën Sot".

 

Xhemal Mustafa, bie fjala, ishte politikan, esejist, shkrimtar dhe gazetar. Por ai, siç kanë bërë figurat e mëdha nacionale në kthesa të forta të historisë, ka ditur të mbajë distancën e duhur për të mos rënë viktimë e çfarëdo ideologjie, klani politik e sidomos mafioz. Vrasja e tij nuk ishte vrasje e një (bashkë)punëtori të një gazete. Vrasja e tij ishte vrasje e një intelektuali të madh nga i cili priteshin krijime e vepra me peshë e me vlerë kombëtare e universale.

 

Nga ana tjetër diçka dihet ditur në lidhje me vrasjen udhëheqësit të Qendrës Informative të Kosovës: Enver Maloku u vra sepse QIK-u të cilin ai e drejtonte zu të njohë dhe të lartësojë lëvizjen e armatosur të shqiptarëve kundër pushtueses Serbi.

 

Përndryshe Enver Maloku dhe « Bota Sot » kishin raporte partneriteti. E fundit përmes të parit blente lajmet nga QIK-u. Dhe këtu s’ka asgjë të keqe. QIK-u i dërgonte lajmet së pari në « Bota SoT », sepse kjo paguante më mirë dhe, dikur vonë, në mbrëmje, rivales « Rilindja » në Zofingen. Këto janë gjëra të ditura dhe as këtu nuk do të duhej të shihej diçka e keqe.

 

"Bota Sot", ndërkaq mund të jetë krenare se ka pasur bashkëpunëtorë të saj Xhemal Mustafën dhe Enver Malokun. Ajo këtë bashkëpunim, gjë që është normale, e ka fituar duke paguar me marka gjermane artikujt dhe lajmet. Pra, nuk ka aq shumë vend vend për krekosje. Përndryshe « Zëri i Popullit », ish-organ i PPSH-së do të mund të krenohej dhe të siguronte merita që nëfakt nuk i takojnë, pse sot kemi Ismail Kadarenë dhe gjithë çfarë ka vlerë në korpusin intelektual shqiptar.

 

Gjërat sidoqoftë janë pak më të koklavitura se sa shihen nga njerëz që nuk duan të futen në thellinat e historisë së re a të asaj pak më të vjetër.

Copyright©2000-2003 Trepca.net - Të gjitha të  drejtat e rezervuara.