Lajme

E enjte 18 shtator 2003

Përmbajtja:

• Presidenti Rugova priti anëtarin e Parlamentit Evropian, z. Joost Lagendijk

• Kuvendi i Kosovës diskutoi sot për situatën aktuale në Kosovë

• Alarm i rremë për vendosjen e një mjeti shpërthyes në Prishtinë

• Faruk Spahija vizitoi burgun e Mitrovicës

• Podujevë: Asnjë dokument nuk do të lëshohet nga komuna për qytetarët që nuk kanë paguar tatimin në pronë

• Gjilan: Nga tatimi në pronë janë liruar 314 obligues

• Gjenerali Majers thotë se numri i trupave në Kosovë do të varet nga vlerësimet e NATO-s

• I. Karlovic mohon njoftimet se një draft për bisedimet Prishtinë-Beograd t'i jetë dorëzuar palës serbo-malaziase

• "Fajnenshëll Tajms": Liderët e Kosovës kanë insistuar se vetëm forcat amerikane mund të shërbejnë si arbitër neutral

• D. Server: Nuk është e qartë se kur mund të fillojnë bisedimet Prishtinë-Beograd

• Komuniteti shqiptar në Toronto përmes një proteste kërkoi nga autoritetet kanadeze ekstradimin e kriminelit Demiroviq

• Katër mijë libra dhe pajisje fizioterapeutike arrijnë nga Mançesteri në Podujevë

• Prindërit dhe nxënësit maqedonase protestuan kundër arsimit shqip në Shkup dhe në Manastir

• Zyrtarët ndërkombëtarë dënuan protestat e nxënësve maqedonas kundër hapjes së klasëve në gjuhën shqipe

• BDI: Zyrtarizimi i Universitetit të Tetovës reflekton ndryshimet që po ndodhin në Maqedoni

• Sot në Bruksel fillojnë bisedimet për marrëveshjen e asociim-stabilitetit ndërmjet Shqipërisë dhe Bashkimit Evropian

• Komisioni Evropian i ka dhënë Shqipërisë një ndihmë prej një milion eurosh për përmirësimin e çështjes së imigrimit

• Preshevë: PVD ia merr mandatin kryetarit të gjertanishëm të Kuvendit Komunal

• Forcat izrelite kanë vrarë një militant të Hamasit në Rripin e Gazës

• Një burrë me probleme mentale ka mbajtur peng rreth 9 orë disa studentë, por ka ndërhyrë policia dhe e ka vrarë

• Një gjykatë indoneziane ka dënuar me burg të përjetshëm bombëvënësin në Bali

• Bush hedh poshtë përfshirjen e Sadamit në 11/9

• Uragani Isabel drejt Uashingtonit

• Qeveria gjermane kundër ndryshimeve në Kushtetutën evropiane

• Xhejmi Shia do të kthehet përsëri si zëdhënës i përkohshëm në selinë e NATO-s

• Policia spanjolle ka arrestuar disa të dyshimtë në lidhje me Al Kaidën

• Forcat e koalicionit kanë vrarë në tri ditët e kaluara 11 luftëtarë talibanë në Afganistan

• Trupat indiane kanë vrarë të pakten 12 guerilë muslimanë në disa shkëmbime të veçanta zjarri

Presidenti Rugova priti anëtarin e Parlamentit Evropian, z. Joost Lagendijk

 

Prishtinë, 18 shtator 2003 - Presidenti i Kosovës Ibrahim Rugova ka pritur sot në një takim anëtarin e Parlamentit Evropian, z. Joost Lagendijk.

Në takim u bisedua për gjendjen aktuale në Kosovë, çështjen e raporteve në mes të institucioneve të Kosovës dhe të UNMIK-ut, si dhe perspektivën për të ardhmen e vendit.

Presidenti Rugova theksoi se progresi i arritur në Kosovë në këto katër vjet mund të çohet përpara me njohjen e pavarësisë së Kosovës, e cila do të hapte rrugë për zhvillim të gjithëmbarshëm ekonomik dhe stabilitet politik e të sigurisë në vend dhe në rajon.

Anëtari i Parlamentit Evropian, z. Lagendijk, është përgjegjës për përgatitje të raportit vjetor të këtij Parlamenti për Ballkanin Perëndimor.

 

 

Kuvendi i Kosovës diskutoi sot për situatën aktuale në Kosovë

 

Prishtinë, 18 shtator 2003 - Deputetët e Kuvendit të Kosovës në seancën e sotme po diskutojnë sot për situatën aktuale në Kosovë, për veprimet e fundit të Boegradit, për transferin e kompetecave nga UNMIK-u tek vendorët, si dhe për dialogun për çështje teknike mes Prishtinës e Beogradit.

I pari në seancën e sotme foli shefi i Grupit parlamentar të LDK-së Sabri Hamiti, i cili në fillim konstatoi se situatën politike në Kosovë tash për tash e përcaktojnë një qeverisje dykrenëshe në mes të UNMIK-ut dhe të institucioneve të Kosovës, një ekonomi në mbrapambetje dhe një gjendje sociale që mund të shpërthejë.

Ai tha se kompetencat dhe përgjegjësitë në këtë qeverisje nuk kanë një drejtpeshim nga se UNMIK-u ende pretendon të ruajë apo të rrisë kompetencat, në anën tjetër institucionet e Kosovës mbajnë përgjegjësinë para qytetarëve, duke pretenduar t'i marrin edhe kompetencat. Ky raport i pazgjidhur, sipas tij, sikur ka mbështetje në dokumentet sistemore, në veçanti në rezolutën 1244 dhe në Kornizën Kushtetuese, tha zoti Hamiti.

"Zhvillimet politike dhe shoqërore në Kosovë kanë provuar prej dite në ditë që rezoluta 1244, duke e lënë Kosovën pa status të përcaktuar politik, pandërmjetshëm pengon zhvillimin e saj", tha ai, duke shtuara se "pokështu, Korniza Kushtetuese është tepër restriktive përballë nevojave të qeverisjes dhe të vetëqeverisjes së Kosovës.

 

Këto raporte ndihen edhe në jetën përditshme të qytetarëve, në të gjitha fushat e jetës".

Ai theksoi se "UNMIK-u rezervon për vete kontrollin e fushave më vitale të qeverisjes dhe të zhvillimit të shoqërisë: përfaqësimin politik, financat, drejtësinë e sigurinë.

 

Në të gjitha këto fusha përfaqësuesit vendas nuk e kanë fuqinë e vërtetë të veprimit, përpos retorikës për zhvillimin e shoqërisë përpara. Në anën tjetër, në po këto fusha shihen problemet më të ndieshme që kanë të bëjnë me statusin, me qeverisjen dhe me jetën e qytetarëve të Kosovës".

Por sipas deputetit Hamiti, UNMIK-u nuk e ka shtrirë pushtetin e vet në gjithë territorin e Kosovës, duke lejuar organizime paralele pushtetore në veri të Mitrovicës dhe në enklava. Edhepse në anën tjetër është siguruar një përfaqësim joproporcional i serbëve në institucionet e Kosovës.

"Drejtpërdrejt me këtë situatë lidhet edhe gjendja e sigurisë në tërë Kosovën, e cila është e kushtëzuar nga ndërhyrjet e pakontrolluara nga jashtë dhe nga zhvillimet e tensionet e brendshme. Kjo ka prodhuar edhe llojet e krimeve, të cilat në rastet më të shpeshta janë evidentuar dhe janë dënuar me fjalë, mirëpo nuk janë zbuluar dhe sjellë para drejtësisë autorët e tyre ose rrjeta e tyre", tha ai.

Sabri Hamiti theksoi se kontrollimi joracional i financave përballë nevojave imanente të fushave të ndryshme të jetës në Kosovë po krijon suficitin e buxhetit. Në anën tjetër shtresa të tëra të njerëzve janë në gjendje sociale të padurueshme, madje përpara shpërthimit.

Për këtë arsye ai tha se "kjo situatë kërkon një marrëveshje pa humbur kohë ndërmjet UNMIK-ut dhe Qeverisë për të marrë e dyta kompetencat e domosdoshme për të qeverisur vendin".

 

Ai kërkoi që kjo të bëhet menjëherë e jo të humbet koha, siç ka ndodhur që nga fillimi i vitit e deri tash. "Ky kalim kompetencash është i domosdoshëm dhe duhet të bëhet qoftë në nivelet që lejon Korniza Kushtetuese ose, nëse jo, edhe të ndërmirren hapa institucionalë për ndryshimin e saj, që duhet të bëhet në këtë Kuvend", nënvizoi deputeti Hamiti.

Por sipas tij, statusi i tashëm i papërcaktuar politik i Kosovës është bërë pengesë për zhvillimin dhe për demokratizimin e saj. "Standardet e shpallura nga UNMIK-u si faza që duhet të kalohen para statusit janë bërë gati formulë retorike e pazbërthyeshme në praktikë", tha ai.

 

Ndërkaq, ai tha se çështja është kush i shpall standardet, kush i realizon, dhe kush e vlerëson këtë realizim. "Nëse të gjitha standardet bien në fushën e pushteteve të rezervuara për UNMIK-un, atëherë fuqia e veprimit të institucioneve të vendit për to dhe rreth tyre është shumë e vogël.

 

Në këtë mënyrë, Kosova do të bëhet peng i kërkesave të cilat nuk varen nga kompetencat dhe fuqia e saj", theksoi deputeti Sabri Hamiti. "Ato vetvetiu bëhen jo udhë për të gjetur, por pengesë për të arritur statusin. Duhet qartësi, afat e saktësi për të provuar në jetë në mënyrë operacionale kërkesat e parashtruara", tha ai.

Duke folur për situatën politike në Kosovë, Sabri Hamiti tha se tensionet në Kosovë, në mënyrë permanente i shton ndërhyrja e Serbisë, e cila bëhet në mënyra të ndryshme, por më së shpeshti duke instrumentalizuar politikisht qytetarët serbë në Kosovë, madje dhe në institucionet e vendit, për politikën e tyre dhe në mënyrë të organizuar shtetërore duke aprovuar dokumente kushtetuese për ta bërë aneksimin e Kosovës.

 

"Bashkësia ndërkombëtare deri më tash ka reaguar tepër dobët, për të mos thënë pahetueshëm, kundrejt këtij agresiviteti kushtetues të Unionit SMZ dhe të Serbisë. Është i domosdoshëm një artikulim i qartë i Këshillit të Sigurimit, i SHBA-ve dhe i BE-së për zhvlerësimin juridik të këtyre deklaratave, para se të kërkohet një stabilitet politik në Kosovë dhe në rajon", nënvizoi deputeti Hamiti.

"Nga ana e tij, Kuvendi i Kosovës si organi më i lartë përfaqësues, të gjitha këto i konsideron pa asnjë vlerë për Kosovën, dhe këtë e ka bërë deri më sot me rezolutat për paprekshmërinë e kufijve të Kosovës dhe për pavlerësinë e preambulës së Unionit SMZ. Këtë duhet ta rikonfirmojë në çdo kohë dhe në çdo situatë", tha ai.
Sabri Hamiti theksoi se "Serbia ka bërë një pushtim të Kosovës dhe ka ushtruar gjenocidin mbi popullin shqiptar. Në Kosovë është organizuar rezistenca: nga ajo paqësore e demokratike, duke kaluar në rezistencë të armatosur, deri në luftën për çlirim.

 

Të gjitha këto zhvillime të domosdoshme dhe të detyrueshme që lidhen me ekzistencën e një populli dhe të një vendi, të gjitha këto mësime të historisë më të re, kanë dhënë përfundimet se Kosova e ka të kushtëzuar ekzistencën e vet nga pavarësia e saj dhe demokracia e saj. Pa to është tepër utopik qëllimi për integrime të mëtejshme, qoftë në rajon, qoftë në Evropë".

"Çdo bisedim për një të ardhme, pra, duhet t’i ketë në evidencë e në kujdes këto të dhëna të të tashmes dhe të së kaluarës së afërt të Kosovës. Po nuk u patën parasysh dhe në kujdes këto evidenca, të gjitha bisedimet bëhen të vështira, të pamundshme dhe në intsancën e fundit me përfundime vështirë të realizueshme.

 

Nëse bëhet prova për ardhmërinë, e kjo duhet të bëhet, atëherë duhet një përkufizim shumë i qartë çfarë do të bisedohet, kush është garant i këtyre bisedimeve, dhe kush është garant i zbatimit të rezultatit të tyre, tha ai, duke vazhduar: "Situata politike e shoqërore në Kosovë dëshmon që dialogu me Beogradin nuk ka si të jetë prioriteti i institucioneve të saj.

 

Zhvillimi ekonomik dhe gjendja sociale janë prioritete në rrafshin praktik të jetës për qytetarët e Kosovës. Zhvillimi i institucioneve dhe i demokracisë, si dhe përfaqësimi i plotë në raporte ndërkombëtare, janë prioritete politike për qytetarët e Kosovës".

Por Sabri Hamiti konsideron se konteksti politik dhe shoqëror i Kosovës së sotme dhe i rrethinës së saj tregon që është vështirë të bëhen bisedime konkrete e praktike me Serbinë rreth nevojave të qytetarëve pa prekur ngjyrimin politik.

 

Prandaj, thotë ai, nëse është e domosdoshme të nisin bisedimet, atëherë duhet të përcaktohet saktë niveli i barabartë i përfaqësimit të të dy palëve, ndërmjetësuesit e besueshëm (SHBA-të dhe BE) dhe regjistri i saktë i problemeve që do të shqyrtohen.

Ai me këtë rast theksoi që UNMIK-u, apo Përfaqësuesi Special i Sekretarrit të Përgjithshëm, në bisedimet eventuale Prishtinë-Beograd nuk mund të shërbejë si ndërmjetës, sepse përnga funksioni është pushtet dhe përfaqësues i Kosovës i nivelit ndërkombëtar.

Ai thotë që Kuvendi i Kosovës si dhe institucionet e tjera duhet të marrin hapa të domosdoshëm institucionalë që ta krijojnë statusin e saj me veprime, qoftë në jetën e brendshme shoqërore, politike e konstitucionale, qoftë në zhvillimet diplomatike.

 

Duhet të shpërthehet situata e çuditshme e një izolimi që i bëhet Kosovës në vitet e fundit, tha deputeti Hamiti. Sipas tij, ka kaq shumë pushtet dhe përfaqësim ndërkombëtar në Kosovë dhe ka kaq pak përfaqësim të Kosovës dhe të institucioneve të saj në botën e jashtme. Është koha që varianta e gjendjes së Kosovës, që del nga institucionet e saj, të shkojë drejtpërdrejt në Këshillin e Sigurimit të OKB-së, në SHBA, dhe në Bashkimin Evropian.

Sabri Hamiti tha në fund të diskutimit të tij se Lidhja Demokratike e Kosovës, duke i qëndruar besnike zbatimit të programit të saj nacional, politik e qytetar, e pranon dialogun si metodë të zgjidhjes së problemeve shoqërore dhe politike; e mirëpret bashkëpunimin ndërkombëtar për zgjidhjen e të gjitha çështjeve që dalin në udhën e krijimit të Kosovës së pavarur dhe demokratike. Veprimet politike që në çfarëdo mënyre pengojnë këto qëllime nuk mund të kenë përkrahjen tonë.

Deputeti Arsim Bajrami nga PDK kërkoi që Kuvendi të marrë qëndrim para sfidave që po kalon Kosova dhe të arrihet një koncensus për të pasur pozicione shumë të qarta në situatën nëpër të cilën po kalon Koosva. Në këtë kontekst, tha ai, për të arritur një koncensus, ka qenë e domdoshsme që në kët seancë të jetë Kryeministri dhe Presidenti i Kosovës.

 

Ai në emër të Grupit parlamentar të PDK-së propozoi që presidenti dhe kryeministri të frohen në Kuvend për të marrë pjesë në diskutimet për situatën politike, ashtu siç qe rasti me komesionerin Kris Paten.

Deputeti Bajram kërkoi gjithashtu që Kuvendi sot të deklarohet nëse është pro apo kundër bisedimeve me Beogradin. Për shkak të sulmeve që po bëhen ndaj institucioneve të Kosovës, ai kërkoi që të ketë një koncensus institucional, për të ndërtuar një bazë të fortë për institucionet e Kosovës.

Ai shtoi se ka kohë që Kosova po atakohet sidomos nga qeveria e Beogradit, e cila synon destabilizimin e situatës në Kosovë për ta ndalë rrugën e progresit të proceseve demokratike dhe për të kompromituar misionin e KB në Kosovë. Për këto qëllim, tha Bajrami, Serbia ka zgjedhur rrugën e provokimeve dhe agresioneve kushtetuese, duke u përpjekur ta prejudikojë statusin final të Kosovës.

Oliver Ivanoviq në emër të koalicionit serb "Kthimi", duke i bërë një vështrim punës një vjet e gjysmë të parlamentitit, tha se më shumë është folur për dofarë idesh euforike dhe për idetë që janë romantike dhe nacionale, të cilat, sipas tij, nuk çojnë përpara. Ai në vazhdim foli për dhunën e ushtruar mbi serbët gjatë muajve të fundit, e cila, siç tha, nuk është dënuar me vendosmëri nga të gjithë.

Duke folur për dialogun me Beogradin Ivanoviq tha se këto biseda si duket nuk mund të ecin pa ndërmjetësues. Ivanoviq tha se angazhohet për heqjen e kufijve e jo për krijimin e kufijve të rinj.

Ramush Haradinaj në emër të AAK-së tha se situata politike në Kosovë është stabile, përveç veriut të Kosovës, duke shtuar se mekanizmat ndërkombëtare në Kosovë kanë arritur rezultete të qëndrueshme. Por, ai shtoi se situatën e sotme e karekterizon sutuatae vështirë ekonomike, një infrastrukturë e vjetruar, një papunësi e madhe dhe si rezultat i kësaj gjendja e vështirë sociale. Ai shprehu shqetësimin në ngecjen e ndërtimit të institucioneve të Kosovës, në kompletimin e qeverisë dhe në avancimin e bazës kushtetuese.

 

Sipas tij për këtë arsye populli i Kosovës po e zbeh besimin e vet në qendrat e vendosjes dhe në njerëzit e zgjedhur të Kosovës. Për të ndryshuar këtë gjendja Haradinaj mendon se është ndërtimi i vullnetit politik të popullit të Kosovës.

 

AAK, tha ai, ka propozuar shpalljen e Kosovës shtet sovran dhe të pavarur nga parlamenti i Kosovës. Haradinaj u bëri thirrje partive politike që të shpallet Kosova shtet sovran e i pavarur, në bazë të vullnetit të popullit të Kosovës, i cili vullnet është shprehur edhe përpara.

Ai kritikoi ngecjet që janë bërë në ndërtimin e institucioneve të mëtejshme të Kosovës.

Pas dy orë debati kryetari i Kuvendit Nexhat Daci kërkoi nga deputetët që me anë të një votimi të vendosin nëse do të vazhdojë debati apo të ndërpritet. Me 14 vota kundër, Daci e mbylli debatin për pikën e parë të rendit të ditës. Konkluzionet për këtë pikë të diskutimeve do të aprovohen në një mbledhje tjetër tha Daci.

 

 

Alarm i rremë për vendosjen e një mjeti shpërthyes në Prishtinë

 

Prishtinë, 18 shtator 2003 - Për pesë ka qenë sot e bllokuar rruga para Gjyqit të Qarkut në Prishtinë, pas një alarmi të rremë për vendosjen e një mjeti shpërthyes në ndërtesën e këtij gjyqi.

 

Menjëherë pas paralajmërimit, policia kishte izoluar e evakuuar tërë personelin e Gjykatës dhe kishte thirrë në ndihmë njësitin e deminimit të KFOR-it. Pas disa orë kërkimi nuk është gjetur mjeti shpërthyes, meqë alarmi ishte i rremë. Policia i ka rënë në gjurmë personit i cili ka bërë telefonatën e rrejshme.

 

 

Faruk Spahija vizitoi burgun e Mitrovicës

 

Mitrovicë, 18 shtator 2003 - Kryetari i komunës së Mitrovicës Faruk Spahija vizitoi Burgun e qarkut në pjesën veriore të qytetit ku me drejtuesit e këtij institucioni bisedoi për mundësinë e kthimit në punë të ish punëtorëve shqiptarë në këtë burg.

 

Spahija kërkoi nga udhëheqja e burgut që të bëjë ndonjë zgjidhje të mundshme për ish punëtorët e këtij institucioni të cilët aktualisht nuk punojnë, dhe për ata që punonjnë nëpër burgjet tjera të Kosovës njohtoi zyra për informim e kuvendit koumnal.

Spahija shprehu pakënaqësi për strukturën e tanishmë të të punsuarve në këtë institucion si në stafin adminsitrativ ashtu edhe për stafin tjetër.

 

 

Podujevë: Asnjë dokument nuk do të lëshohet nga komuna për qytetarët që nuk kanë paguar tatimin në pronë

 

Podujevë, 18 shtator 2003 - Në mbledhjen e some të Qeverisë komunale të Podujevës të cilën e kryesoi Ekzekutivi i përkohshëm Rasim Fejza e ku mori pjesë edhe kryetari i komunës Agim Veliu dhe përfaqësuesi i UNMIK-ut Shahzad Khan Bangash u vendos që asnjë qytetari i cili nuk ka paguar tatimin në pronë të mos i lëshohet kurrfarë dokumenti nga komuna.

Fejza pas mbledhjes së Këshillit të drejtorëve tha se është diskutuar për shkallën e inkasimit të të hyrave vetanake, me theks të veçantë për inkasimine e tatimit në pronë, vështirësitë dhe propozimet për tejkalimin e kësaj gjendjeje, duke shtuar se u diskutua edhe për probleme tjera si dhe u raportua puna e drejtorive.

Nga raportet e drejtorëve të drejtorive u njoftua se deri në muajin gusht janë inkasuar vetëm 321.717 euro ose 33,28% nga 966.666 euro sa ishin planifikuar, tha Rasim Fejza.

Sipas përgjegjësit të zyrës Sherif Halilit për vitin e kaluar është vetëm 10% ose 48 mijë euro, kurse aktualisht është filluar me shpërndarjen e faturave për vitin vijues.

Qeveria komunale nga mbledhja e sotme mori vendim që asnjë qytetari që nuk e ka paguar tatimin në pronë të mos i lëshohet kurrfarë dokumenti nga komuna dhe ky vendim hyn në fuqi nga 1 tetori, pohoi ekzekutivi i përkohshëm i komunës së Podujevës Rasim Fejza.

 

 

Gjilan: Nga tatimi në pronë janë liruar 314 obligues

 

Gjilan, 18 shtator 2003 - Bordi i për shqyrtimin e ankesave të obliguesve të tatimit në pronë në komunën e Gjilanit i ka proceduar deri tani 664 lëndë të cilat qytetarët i kanë adresuar në Drejtorinë përkatëse dhe ka vendosur që 314 raste t`i lirojë nga ky obligim.

Si arsye për të cilat do të duhej të liroheshin nga ky detyrim, obliguesit kanë theksuar gjendjen e rëndë sociale dhe pasojat nga tërmeti i 24 prillit 2002, përderisa një numër i tyre kanë kërkuar matjen e sërishme të hapësirës së objekteve që i posedojnë ose që i zotërojnë përkohësisht.

Musa Kamberi, kryetar i këtij Bordi thotë se nga 150 kërkesat e shqyrtuara deri tani për lirim nga tatimi, të cilat i kanë takuar kategorisë së rasteve sociale, vetëm një është refuzuar, ndërsa të gjitha të tjerat janë vendosur në dobi të palëve.

Gjatë ditëve të ardhshme, Bordi do t`i shqyrtojë edhe ankesat tjera të qytetarëve që kanë kërkuar të lirohen nga tatimi në pronë, thotë Musa Kamberi.

Përndryshe në Gjilan është mirëpritur aplikimi i kësaj takse, e cila do të administrohet plotësisht nga komuna dhe do të shfrytëzohet për realizimin e projekteve që, së bashku me qytetarët do të vlerësohen si prioritet.

 

 

Gjenerali Majers thotë se numri i trupave në Kosovë do të varet nga vlerësimet e NATO-s

 

Bonstill, 18 shtator 2003 - Shefi i Shtatmadhorisë së Shteteve të Bashkuara të Amerikës, gjenerali Riçard Majers tha dje pasdite në kampin ushtarak amerikan në "Bondstill" se numri i trupave që do të vazhdojnë të qëndrojnë në Kosovë do të varet nga vlerësimet që do t'i bëjë NATO-ja gjendjes së sigurisë dhe aftësisë së forcave civile për t'u përballur me sfidat e këtushme.

 

Gjenerali Majers tha se mësimet e nxjerra në Kosovë, ku ushtarët amerikanë kanë fituar besimin e qytetarëve, janë zbatuar edhe në Afganistan dhe në Irak.

Ai theksoi se çështjet e sigurisë në Kosovë duhet të kalojnë ngadalë në duart e autoriteteve vendore dhe ka vlerësuar lart përparimet që janë arritur në Kosovë pas hyrjes së forcave paqerujtëse megjithë incidentet e kohëve të fundit.

Majers tha se ka ende mjaft sfida në Kosovë, ndërkaq ushtarakët shpresojnë që forcat civile të marrin përsipër më shumë punë mbi vete siç janë forcat e policisë, sistemi i drejtësisë etj.

 

Në një periudhë kohore, tha ai, pasi nuk do të jenë të nevojshme kaq trupa sa ka aktualisht në Kosovë, duke tërhequr vërejtjen se kjo është në duart e NATO-s, e cila do të bëjë vlerësimet rreth gjendjes së sigurisë.

 

Ai theksoi se forcat e NATO-s janë në Kosovë për të krijuar një mjedis të sigurtë dhe për të mundësuar në qeverisje të mirë.

 

 

I. Karlovic mohon njoftimet se një draft për bisedimet Prishtinë-Beograd t'i jetë dorëzuar palës serbo-malaziase

 

Prishtinë, 18 shtator 2003 - Zëdhënësja e UNMIK-ut Izabela Karlovic ka pranuar dje se shefi i UNMIK-ut Hari Holkeri është autor i proozimit në fjalë për dialogun Prishtinë - Beograd, por ajo ka theksuar se propozimi është vetëm një draft punues, ndërkaq ai përfundimtar, sipas saj, do të përgatitet pas një varg konsultimesh të shefit të UNMIK-ut me të gjitha palët e përfshira në dialog.

Kjo letër i është paraqitur Grupit të Kontaktit dhe të kihet parasysh se kjo është e tepërt për t'u diskutuar, thotë ajo. Kryeadministratori Holkeri nuk ka përfunduar procesin e konsultimeve dhe ai do të takojë këtë të premte liderët kosovarë, do të takojë shefat e zyrave të Kuintit në Kosovë dhe me Grupin e Kontaktit në javën e ardhshme në Nju-Jork.

 

Vetëm pasi konsultimet të përfundojnë, Holkeri do të prezentojë planin përfundimtar para dy palëve, ka thënë zëdhënësja Karlovic.

Ajo ka përgënjeshtuar njoftimet se ky draft siç e quan ajo për bisedimet Prishtinë - Beograd t'i jetë dorëzuar vetëm palës së Serbisë dhe Malit të Zi.

 

 

"Fajnenshëll Tajms": Liderët e Kosovës kanë insistuar se vetëm forcat amerikane mund të shërbejnë si arbitër neutral

 

Londër, 18 shtator 2003 - Në një shkrim me titull: "Pentagoni dëshiron tërheqjen e trupave nga Ballkani" të botuar në të përditshmen londineze "Fajnenshëll tajms", veç tjerash shkruan: "Oficerë të lartë amerikanë kërkojnë këtë tërheqje për shkak të operacioneve të tejngarkuara në Irak".

 

Më tej në këtë shkrim theksohet se tërheqja e forcave të Shteteve të Bashkuara mund të jetë veçanërisht problematike në Kosovë, ku liderët e Kosovës kanë insistuar se vetëm forcat amerikane mund të shërbejnë si arbitër neutral.

 

 

D. Server: Nuk është e qartë se kur mund të fillojnë bisedimet Prishtinë-Beograd

 

Uashington, 18 shtator 2003 - Daniel Server, drejtor i Nismës ballkanike pranë Institutit Amerikan të Paqes thotë se bisedimet për çështje teknike ndërmjet Prishtinës dhe Beogradit kërkojnë ende shumë përgatitje nga të dyja palët. Z. Server sapo është kthyer në SHBA nga një vizitë në Kosovë tha se komuniteti ndërkombëtare ka nevojë për më shumë kohë për të përcaktuar kornizën e bisedimeve dhe çështje të tjera.

 

Ai theksoi se këto bisedime nuk mund të shmangen, pavarësisht se cila do të ishte zgjidhja për statusin përfundimtar, pasi Kosova dhe Serbia do të jenë fqinj të përjetshëm. Analisti Server i bëri këto komente në një intervistë dhënë "Zërit të Amerikës".

Ai shtoi se nuk është e qartë se kur mund të fillojnë bisedimet. Duket se ende ka nevojë për disa përgatitje, nuk është e qartë se cili do të jetë lehtësuesi, kush do të jetë nga njëra e ana e tryezës dhe kush në tjetrën. Gjithashtu nuk është e qartë se cili do të jetë rendi i ditës, thotë z. Server.

I pyetur nëse SHBA-të mund të luajnë rolin e ndërmjetësit në këto bisedime, ai tha se në Ballkan nuk mund të ketë sukses në rast se Shtetet e Bashkuara dhe BE nuk do të bëhen së bashku dhe nuk e mbështesin fuqimisht njëri tjetrin dhe këtë nuk e kam parë deri më tash, ngase një gjë e tillë është lënë në duart e UNMIK-ut.

 

 

Komuniteti shqiptar në Toronto përmes një proteste kërkoi nga autoritetet kanadeze ekstradimin e kriminelit Demiroviq

 

Toronto, 18 shtator 2003 - Shoqata "Kosova" dhe Qendra Informative organizuan një protestë para Zyrës se emigracionit në Toronto të Kanadasë, ku morën pjesë qindra bashkadhetarë tanë në këtë vend. Kjo protestë u organizua kundër dhënies së azilit në këtë vend kriminelit serb Dejan Demiroviq, i akuzuar për vrasjen e 19 civilëve shqiptarë në Podujevë në mars të vitit 1999. Protestuesit kërkuan nga autoritetet kanadeze ekstradimin e Demiroviqit.

Në këtë protestë ishte prezente edhe Saranda Bogujevci, e cila e mbijetoi masakrën, e shoqëruar nga znj. Pam Dawes, përfaqësuese e shoqatës "Manchester Aid to Kosovo". Saranda vizitoi edhe Qendren Simon Visental (Simon Wiesenthal Centre) për hulumtimin e holokaustit dhe kërkoi mbështetje për procedurën legale për kthimin e Demiroviqit në Beograd për t'u gjykuar.

 

Drejtori i Qendres z. Leo Adler premtoi ndihmën e kësaj organizate me renome botërore. Kurse sot Saranda udhëtoi për në Otavë ku do të takohet me policinë federale, (Royal Canadian Mounted Police) e cila është duke i zhvilluar hetimet rreth rastit Demiroviq.

 

 

Katër mijë libra dhe pajisje fizioterapeutike arrijnë nga Mançesteri në Podujevë

 

Podujevë, 17 shtator - Nexhmi Balaj, Drejtor i Qendrës së Kulturës në Podujevë tha sot se 4 mijë librat nga Mançesteri i Anglisë arritën në Podujevë dhe do të vendosen në Bibliotekën e qytetit. Kjo është një dhuratë e papërshkrueshme që vjen nga Anglia për nxënësit, studentët, të rinjtë dhe në veçanti për lexuesit e librit, tha Balaj.

Udhëheqësi i Komitetit për ndihmë Kosovës (Manchester Aid Committee – MAK) Toni Kollinson pohoi se vlera e librave është përafërsisht 20 mijë funta sa është edhe vlera e dhomës fizioterapeutike që i dhurohet shtëpisë së shëndetit.

Në mesin e librave ka të fushës akademike në gjuhën angleze dhe gjermane. Librat e i takojnë fushave të ndryshme, letërsisë, mjeksisë, historisë, novela bashkëkohore, libra për fëmijë, etj, i ka dhuruar rektori i Universitetit të Mançesterit dhe një e vejë e një avokati që e ka dashur literaturën angleze, pohon një anëtar i MAK, kordinatori për marrëdhënie me publikun i komunës i cili bashkë me Kryetarin e komunës Agim Veliun vizituan Mançesterin vitin e kaluar.

 

 

Prindërit dhe nxënësit maqedonase protestuan kundër arsimit shqip në Shkup dhe në Manastir

 

Shkup, Manastir, 18 shtator 2003 - Prindërit maqedonas kanë protestuar edhe dje në Shkup kundër një vendimi të Ministrisë së Arsimit për të hapur një klasë më mësim në gjuhën shqipe në shkollën ekonomike të Shkupit, ku më parë kanë mësuar vetëm nxënës maqedonas.

 

Ata e bllokuan rrugën kryesore që çon drejt Qeverisë maqedonase. Protestuesit kërkuan që në këtë shkollë të gjitha paralelet t'u takojnë nxënësve maqedonas!

 

Gjatë protestave janë rrahur dy nxënës shqiptarë Nexhat Murtezani dhe Abdyl Emërllahu, të cilët janë dërguar për shërim në Klinikën universitare, por sipas mjekëve jeta e tyre nuk është në rrezik.

Protesta ka pasur edhe në qytetin e Manastirit, ku disa mijëra nxënës dhe prindër të nacionalitetit maqedonas kanë protestuar rrugëve të Manastirit kundër hapjes të një paralele më mësim në gjuhën shqipe.

 

Gjatë protestave janë thyer pothuajse të gjitha dritaret e ndërtesës ku është mbajtur Kongresi i Alfabetit Shqip në Manastir. Në këtë objekt ishin të vendosur nxënësit shqiptarë, pasi ata nuk u lejuan të mësojnë në gjimnazin e qytetit, apo në ndonjë shkollë tjetër në Manastir.

Nxënësit maqedonas kanë thënë do ta bojkotojnë mësimin dhe do të protestojnë deri atëherë, kur ministri i Arsimit Aziz Pollozhani do ta tërheq vendimin e tij për hapjen e paralelës shqipe në Manastir.

 

 

Zyrtarët ndërkombëtarë dënuan protestat e nxënësve maqedonas kundër hapjes së klasëve në gjuhën shqipe

 

Shkup, 18 shtator 2003 - Zyrtarët ndërkombëtarë dënuan protestat e nxënësve maqedonas dhe të prindërve të tyre në Manastir dhe Shkup të cilët po protestojnë kundër hapjes së klasëve me mësim në gjuhën shqipe.

Zëdhënësja e OSBE-së në Shkup, Izabel Dery duke folur për mediat e Shkupit, e quajti të palogjikshme protestën e maqedonasve në Manastir dhe në Shkup. Ajo nënvizoi se është dëshprues fakti se një pjesë e qytetarëve maqedonas demonstruan hapur kundër organizimit të procesit të rregullt edukativo-arsimor për nxënësit shqiptarë.

Zëdhënësja e OSBE-së në Shkup po ashtu theksoi se komuniteti ndërkombëtar vlerëson se në kërkesat e nxënësve shqiptarë nuk ka asgjë të jashtëligjshme dhe se nuk janë shkelur standardet ndërkombëtare për arsimim.

 

 

BDI: Zyrtarizimi i Universitetit të Tetovës reflekton ndryshimet që po ndodhin në Maqedoni

 

Shkup, 18 shtator 2003 - BDI në pushtet thotë se zyrtarizimi i Universitetit të Tetovës reflekton ndryshimet që po ndodhin në Maqedoni. Për rastin e Manastirit, kjo parti thotë se ka vullnet politik nga partneri i koalicionit për të hapur klasën e shkollës së mesme në gjuhën shqipe, por do të pritet për kushte më të mira.

Ndërkohë, në Tetovë Partia Demokratike Shqiptare e vlerësoi si të pjesëshëm vendimin për legalizimin e Universitetit të Tetovës. Kjo parti thotë se nuk është e pranueshme që 4.4 për qind e buxhetit të Qeverisë së Maqedonisë për arsimin e lartë të ndahen për UT-në.

 

PDSH mendon se me dy milionë euro nuk mund të funksionojë një universitet dhe me aq para nuk mund të mbulohen as pagat mujore për gjithë kuadrim mësimdhënës, e jo më për pajimin me mjete teknologjike e laboratorë.

 

 

Sot në Bruksel fillojnë bisedimet për marrëveshjen e asociim-stabilitetit ndërmjet Shqipërisë dhe Bashkimit Evropian

 

Bruksel, 18 shtator 2003 - Sot në Bruksel fillon punimet rauandi i katërt i bisedimeve për Marrëveshjen e asociim-stabilitetit ndërmjet Shqipërisë dhe Bashkimit Evropian. Delegacionin nga Shqipëria kryesohet nga zëvendëskryeministri dhe ministrja e integrimit Ermelinda Meksi. Në prag të fillimit të bisedimeve zëdhënësja e Komisionit Evropian ka deklaruar se Komisioni pret dhe kërkon që marrëveshjet e nënshkruara në letër të zbatohen edhe në praktikë.

Reformat në sistemin gjyqësor, në administratë, krijimi i një shteti funksional i aftë në sigurimin e rendit dhe të qetësisë, respektimi i ligjeve, nxitja e prodhimit dhe grumbullimi i taksave, duke i shtuar këtyre edhe luftën kundër korrupsionit, trafiqeve dhe kontrabandës, janë kërkesat bazë të BE-së që Shqipria të mundet të nënshkruajë marrëveshjen e asociim-stabiliteti me BE-në.

 

 

Komisioni Evropian i ka dhënë Shqipërisë një ndihmë prej një milion eurosh për përmirësimin e çështjes së imigrimit

 

Bruksel, 18 shtator 2003 - Komisioni Evropian në kuadër të ndihmave për vendet e varfëra të Ballkanit me qëllim të përmirësimit të çështjes së migracionit, i ka dhënë Shqipërisë një ndihmë prej një milion eurosh.

 

Shqipëria shfrytëzohet si venkalim i njerëzve që ilegalisht shkojnë për në vendet e Evropës Perëndimore. Shqipëria do t'i shfrytëzojë këto mjete për zhvillimin e një strategjie të përbashkët me Organizatën Botërore për Migrim.

 

 

Preshevë: PVD ia merr mandatin kryetarit të gjertanishëm të Kuvendit Komunal

 

Preshevë, 18 shtator 2003 - Kryesia e PVD-së ka shqyrtuar problemet që paraqiten në procedurën e konstituimit të Këshillit Nacional të Shqiptarëve. PVD ka përsëritur kërkesat ndaj Koalicionit qeveritar serb DOS që ta ndërprejë bllokadën e gjertanishme në harmonizimin e statutit të Komunës së Medvegjës në mënyrë që edhe gjuha shqipe të jetë në përdorim zyrtar, kusht ky i domosdoshëm që të fillojë përdorimi i gjuhës dhe shkrimit shqip në institucionet komunale.

Kryesia e PVD-së vlerëson se kanë filluar të bëhen hapat e parë pozitiv me kyçjen e ekspertëve shqiptarë në përpilimin e programeve për lëndën e gjuhës shqipe për klasën e parë fillore si dhe me masat që i ndërmori Ministria në planin e ndërprerjes së monopolit të drejtorëve të zgjedhur nga qeveritë e Millosheviqit, të cilat në masë të madhe i degraduan shkollat shqipe.

Me gjithë faktin se ende në strukturat qeveritare mund të hasen logjika dhe elemente të regjimit të vjetër, megjithatë Kryesia e PVD-së është e prirur të besojë se me ndihmën e OSBE-së dhe të strukturave tjera relevante ndërkombëtare qeveria aktuale do të gjejë forcë për ta zgjidhur problemin e teksteve mësimore si dhe problemet tjera të ndieshme në arsim dhe fusha tjera të jetës.

Kryesia e PVD-së, duke e analizuar punën e Kuvendeve Komunale në Preshevë dhe Bujanovc, konstatoi se në kohë të fundit po paraqiten pengesa serioze të cilat kanë synim bllokimin e punës së organeve të vetadministrimit lokal të dala nga zgjedhjet e vitit të kaluar.

Kkryetari i Kuvendit Komunal të Preshevës, i zgjedhur si këshilltar në listën e PVD-së dhe si kryetar i Kuvendit kryesisht nga votat e këshilltarëve të PVD-së, në seancat e fundit nuk i pranon qëndrimet e Grupit të këshilltarëve të PVD-së.

 

Me qëllim të eliminimit të konfuzionit të krijuar dhe rritjes së efikasitetit të punës së Kuvendit Komunal, Kryesia e PVD-së vendosi që t'i merret mandati i këshilltarit kryetarit të gjertanishëm të Kuvendit Komunal, Skender Destani.

Kryetari i komunës do t'i fillojë bisedat me subjektet e tjera politike për zgjedhjen e kryetarit të ri të Kuvendit Komunal të Preshevës, thuhet në një komunikatë të PVD-së.

 

 

Forcat izrelite kanë vrarë një militant të Hamasit në Rripin e Gazës

 

Ramallah, 18 shtator 2003 – Forcat izrelite kanë vrarë sot heret në mëngjes (e enjte) një militant të Hamasit gjatë një shkëmbimi zjarri në Rripin e Gazës, njofton Rojter. Incidenti ka ndodhur vetëm disa orë pasi presidenti Arafat ka thënë se ai do të jetë i gatshëm të luftojë deri në vdekje nëse Izraeli përpiqet ta dëbojë ose ta vrasë atë.

 

Ushtarët izraelitë e kanë vrarë Abu Suerahun, 34-vjeçar, një aktivist i vjetër i krahut të armatosur të Hamasit, gjatë përpjekjes për ta arrestuar në shtëpinë e tij në Gaza, kanë thënë burimet ushtarake.

 

 

Një burrë me probleme mentale ka mbajtur peng rreth 9 orë disa studentë, por ka ndërhyrë policia dhe e ka vrarë

 

Diersburg, SHBA, 18 shtator 2003 – Një burrë 26-vjeçar me probleme mentale ka ndaluar dhjetëra kolegë të tij studentë nën kërcënimin me armë dhe i ka mbajtur peng rreth 9 orë, por pastaj ka ndërhyrë policia dhe e ka vrarë të dyshimtin gjatë sulmit, njofton AP.

 

Autoritetet kanë thënë se i armatosuri, Harold Kilpatrik, kishte lënë një letër në shtëpinë e motrës së tij, në të cilën kishte thënë se dëshironte të vriste disa njerëz dhe pastaj të vdiste sot. Dy nga pengjet ishin plagosur, por nuk është e qartë nëse ata janë plagosur nga policia apo Kikpatriku. Të plagosurit janë dërguar në spital me helikopter.

 

 

Një gjykatë indoneziane ka dënuar me burg të përjetshëm bombëvënësin në Bali

 

Bali, Indonezi, 18 shtator 2003 – Një gjykatë indoneziane i ka shqiptuar sot (e enjte) dënimin me burg të përjetshëm bombëvënësit në Bali të Indonezisë, Ali Imron, i cili ishte penduar thellë për ndihmën që kishte dhënë në organizimin dhe kryerjen e shpërthimeve vdekjeprurëse me bombë në Bali në vitin e kaluar kur qenë vrarë 202 njerëz, njofton Rojter.

 

Dënimi është më i lartë se 20 vjet burg sa kishin kërkuar prokurorët. Gjykata nuk kishte marrë parasysh as pendimin dhe as bashkëpunimin e tij me policinë.

 

 

Bush hedh poshtë përfshirjen e Sadamit në 11/9

 

Uashington, 18 shtator 2003 - Presidenti amerikan Xhorxh Bush ka thënë se nuk ka dëshmi se Sadam Huseini ka qenë i përfshirë në sulmet e 11 shtatorit. Komentet e tij erdhën pasi një sondazh tregoi se afro 70% e atyre që u intervistuan besonin se udhëheqësi irakian ishte përfshirë personalisht në sulmet.

Presidenti amerikan përsëriti mendimin e tij se ish udhëheqësi irakian kishte patur lidhje me Al- Kaidan- grupi që konsiderohet si përgjegjës për sulmet në Nju Jork dhe Uashington.

Kritikë të luftës në Irak e kanë akuzuar administratën amerikane se me qëllim po inkurajon konfuzion publik për të siguruar më shumë përkrahje për veprimin e tyre ushtarak.

 

 

Uragani Isabel drejt Uashingtonit

 

Uashington, 18 shtator 2003 - Në Uashington është shpallur gjendje gatishmërie ndërkohë që uragani Isabel arrin sot më vonë në qytet.

 

Për herë të parë në historinë e qytetit, e tërë metroja dhe rrjeti i autobuzëve nuk punon.

Të gjitha shkollat janë mbyllur dhe punonjësit e ndërmarrjeve shtetërore që nuk janë përfshirë në shërbime të emergjencës po rrinë në shtëpi.

Kongresi pa pezullar punën, presidenti është nisur më herët për në rezidencën e tij të fundjavës në Kamp David në Mariland.

Dy avionë presidencialë janë larguar drejt një bazë ajrore në Xhorxhia.

Të gjitha këto masa janë përshkruar si parandaluese, por është e qartë se Uragani Isabel ka aftësinë të shkaktojë dëme të shumta, pëmbytje dhe ndoshta edhe humbje jete ndërsa po lëviz drejt bregdetit lindor.

 

 

Qeveria gjermane kundër ndryshimeve në Kushtetutën evropiane

 

Berlin, 18 shtator 2003 - Qeveria Federale gjermane vazhdon të refuzojë propozimet e Komisionit Evropian për ndryshime në projektkushtetutën evropiane. Pas presionit nga qeveritë e shumë vendeve të vogla anëtare Presidenti i Komisionit Romano Prodi mbështet kërkesat e tyre për egzistencën e një komisari për çdo shtet.

 

 

Xhejmi Shia do të kthehet përsëri si zëdhënës i përkohshëm në selinë e NATO-s

 

Bruksel, 18 shtator 2003 - NATO-ja ka bërë të ditur se ish-zëdhënësi i saj gjatë fushatës ajrore kundër Serbisë në vitin 1999 britaniku Xhejmi Shia do të kthehet përsëri si zëdhënës i përkohshëm në selinë e NATO-s. Xhejmi Shia e merr postin e zëdhënësit kanadez Iv Broder, i cili është kthyer të punojë për Qeverinë e tij në muajin e kaluar.

 

 

Policia spanjolle ka arrestuar disa të dyshimtë në lidhje me Al Kaidën

 

Madrid, 18 shtator 2003 – Policia spanjolle ka arrestuar sot (e enjte) disa të dyshimtë në lidhje me Al Kaidën, ndër të cilët disa të lidhur me një gazetar të një televizioni arab, i cili tashmë është i akuzuar se i përket një grupi, që ndodhet nën hetime, njofton Rojter.

 

Arrestimet, për të cilat burimi ka numruar “rreth pesë”, që mund të jetë edhe numër më i madh, janë bërë pasi një gjykatës spanjoll ka akuzuar formalisht për lidhje me Osama bin Ladenin gazetarin Tajsir Alouni, që punon për rrjetin televiziv Al Xhazira dhe 33 të tjerë, që i përkasin një grupi militant.

 

 

Forcat e koalicionit kanë vrarë në tri ditët e kaluara 11 luftëtarë talibanë në Afganistan

 

Bagram, Afganistan, 18 shtator 2003 – Ushtria amerikane ka thënë sot (e enjte) se forcat e koalicionit kanë vrarë në tri ditët e kaluara 11 luftëtarë talibanë në Afganistan, ndërkaq zyrtarët vendorë kanë thënë se trupat kanë rrethuar një grup të kryengritësve, njofton Rojter.

 

Zëdhënësi ushtarak amerikan, majori Ralf Marino, ka thënë në një konferencë shtypi se aeroplanët e luftës kanë vrarë 11 luftëtarët tlibanë gjatë 72 orëve të kaluara në provincat jugore të Kandaharit dhe Zbulit. Nga forcat e koalicionit thuhet se s’ka viktima dhe dëme materiale.

 

 

Trupat indiane kanë vrarë të pakten 12 guerilë muslimanë në disa shkëmbime të veçanta zjarri

 

Srinagar, Indi, 18 shtator 2003 – India ka thënë sot (e enjte) se ka vrarë të pakten 12 guerilë muslimanë të dyshimtë në disa shkëmbime zjarri të veçanta derisa po orvateshin të depërtonin nga Pakistani në Kashmirin ndërluftues, njofton Rohjter.

 

Një grup i armatosur është mposhtur në luftimet gjashtorëshe në zonën Raxhouri, ku pastaj janë zbuluar tetë trupa të pajetë të këtij grupi në vijën kufitare, që ndan Kashmirin ndërmjet Indisë dhe Pakistanit.

 

Ndërkaq, në një shkëmbim zjarri të mëhershëm në distriktin Kupuara, në veriperendim të Srinagarit, trupat kanë vrarë duke hyrë në Kashmirin indian edhe katër kryengritës të tjerë seperatistë, ka thënë policia vendore.

Copyright©2000-2003 Trepca.net - Të gjitha të  drejtat e rezervuara.