Lajme

E mërkure 17 shtator 2003

Përmbajtja:

• Presidenti Rugova priti shefin e Shtatmadhorisë së ushtrisë amerikane, gjeneralin Riçard Majers

• Presidenti Rugova takohet sot me gjeneralin amerikan Riçard Majers

• Kreparlamentari Daci priti drejtorin e Institutit për Marrëdhënie Etnike, Allen Kasof

• Shefi i UNMIK-ut Holkeri takohet sot në Romë me zyrtarë të lartë italian

• H. Holkeri nënshkroi urdhërin ekzekutiv për formimin e komisionit të pavarur për incidentin në burgun e Dubravës

• Një delegacion i Kuvendit të Kosovës do të marrë pjesë në konferencën parlamentare në Sarajevë

• Qeveria kërkon hapësirë që të merret me probleme sociale

• Mbrëmë u nënshkrua kontrata për aviokompaninë e parë të Kosovës

• Programi për Zhvillim i OKB-së në bashkëpunim me UNMIK-un kanë shpallur programin "Armët në këmbim për zhvillim"

• Trend pozitiv i pagesave të tatimit në pronë nga qytetarët e komunës së Prishtinës

• Qendra për Edukim dhe Përparim bëri publik projektin mbarëkombëtar "Gjuha shqipe dhe kompjuteri"

• Në enklavën serbe Gorazhdec të Pejës një minoritar serb ka sulmuar pjesëtarin serb të SHPK-së

• Në Kosovë kanë kanë filluar të protestojnë edhe pensionistët

• Rasti i tentativës për rrëmbimin e një vajze 12-vjeçare serbe

• Fillon konkurrimi për bursat Hubert H. Humphrey për vitin 2004

• Një person është plagosur në Tetovë nga një sulm me armë zjarri

• Në qytetin irakian të Mosulit është plagosur një paqeruajtës nga Shqipëria

• Maqedonia dëshiron të jetë pjesë e sigurisë së NATO-s

• Nxënësit maqedonas dhe VMRO-DPMN kundër arsimimit në gjuhën shqipe

• Majko dhe Mini deklaruan në Tiranë se nuk do të ketë as ndarje, por as kantonizim të Kosovës

• Serbia dhe Mali i Zi do ta zvogëlojnë armatën e tyre për 30 mijë pjesëtarë

• Gjen. Uesli Klark shpall sot kandidaturën për nominim për President të SHBA-ve

• Sadam Husein bën thirrje për rezistencë kundër amerikëve

• Policia e Kashmirit indian ka vrarë një nga pjesëtarët më të lartë të një grupi militant

• Në një shpërthim të një automjeti afër Kopenhagës ka humbur jetën shoferi

• SHBA-të ia kanë paguar Tailandës 10 milonë dollarë për arrestimin e Hambalit

• SHBA përdor veton në një projektrezolutë kundër Izraelit

• Samit evropian për Irakun

• Policia suedeze arrestoi një të dyshuar për vrasjen e Ana Lindit

• Maher ka kritikuar grupet palestineze për vrasjen e civilëve izraelitë në emër të luftës kundër okupimit

Presidenti Rugova priti shefin e Shtatmadhorisë së ushtrisë amerikane, gjeneralin Riçard Majers

 

Prishtinë, 17 shtator 2003 - Presidenti i Kosovës Ibrahim Rugova priti sot në rezidencën e tij shefin e Shtatmadhorisë së ushtrisë amerikane, gjeneralin Riçard Majers, i cili ndodhet për një vizitë të shkurtër në Kosovë. Në këtë takim mori pjesë edhe shefja e Zyrës amerikane në Prishtinë, zonja Mersi Ris. Presidenti Rugova në këtë takim e njohu ushtarakun e lartë amerikan, gjeneralin Majers, me zhvillimet aktuale dhe me progresin e arritur në Kosovën e pasluftës si dhe me zhvillimin ekonomik të vendit.

 

Në një deklaratë për media, Presidenti Rugova, duke i uruar mirëseardhje gjeneralit Majers, shprehu kënaqësinë për takimin që pati me gjeneralin Majers, të cilin, siç tha, populli i Kosovës e don dhe e respekton.

Presidenti Rugova tha më tutje se mysafirin e lartë e ka njohur për bashkëpunimin e mirë të institucioneve të Kosovës me administratën ndërkombëtare. Me këtë rast, Presidenti tha se insiston për njohjen e pavarësisë së Kosovës, e cila do t'i përshpejtonte proceset e brendshme, do të qetësonte rajonin dhe do të hapte perspektivë për Kosovën në të ardhmen.

 

Pra, një Kosovë e integruar në strukturat veriatlantike, në Bashkimin Evropian dhe në miqësi të përhershme me SHBA-të, nënvizoi Rugova.

Presidenti Rugova edhe me këtë rast falenderoi SHBA-të për gjithë atë që kanë bërë për Kosovën, duke shtuar se nga gjenerali Majers ka kërkuar ndihmën ushtarake për Kosovën. Njëherit ai përshendeti Presidentin Bush, i cili, siç u shpreh, ka bërë shumë në zgjerimin e lirisë për të gjitha kombet e botës.

Gjenerali Majers, siç mësohet, pas takimit me Presidentin Rugova vizitoi paqeruajtësit amerikanë në kampin "Bondstill" afër Ferizajit.

 

 

Presidenti Rugova takohet sot me gjeneralin amerikan Riçard Majers

 

Prishtinë, 17 shtator 2003 - Predidenti i Kosovës Ibrahim Rugova sot në mesditë do ta presë në një takim gjeneralin amerikan Riçard Majers, kryeshef i Shtabit të Përbashkët. Majers është edhe këshilltar kryesor ushtarak i Presidentit, Sekretarit të Mbrojtjes dhe Këhsillit për Siguri Kombëtare të SHBA-ve.

Gjenerali Majers ka qenë komandant i forcave aleate në luftën e Irakut.

 

 

Kreparlamentari Daci priti drejtorin e Institutit për Marrëdhënie Etnike, Allen Kasof

 

Prishtinë, 17 shtator 2003 - Kryetari i Kuvendit të Kosovës, Nexhat Daci priti sot drejtorin e Institutit për Marrëdhënie Etnike, Allen Kasof dhe bisedoi me të për ecurinë e dialogut Prishtinë-Beograd.

Daci është shprehur se institucionet e Kosovës dhe qytetarët e saj i kanë thënë po dialogut, porse personalisht nuk pret shumë nga dialogu i paralajmëruar, bazuar në sjelljen e lidershipit serb.

 

Tekefundit, bisedimet do të jenë për çështje teknike dhe në nivel ekspertësh, prandaj nuk e shoh të nevojshme të shpenzojmë shumë energji për dialogun, ka theksuar kryeparlamentari Daci.

Allen Kasof është shprehur se dialogu me Beogradin është në interes të Kosovës dhe ka paralajmëruar se nga shkurti do të organizohet në Zvicër një konferencë e ngjashme me atë të vitit të kaluar "Shqiptarët dhe fqinjët e tyre", thuhet në një njoftim nga ky takim.

 

 

Shefi i UNMIK-ut Holkeri takohet sot në Romë me zyrtarë të lartë italian

 

Romë, 17 shtator 2003 - Kryadministratori i Kosovës Hari Holkeri pritet të takohet sot në Romë me zyrtarë të lartë të Ministrisë së Jashtme italiane. Holkeri do të takohet me ministrin e jashtëm italian Franko Fratini dhe me zëvendëkryeministrin Roberto Antonionin.

 

Zëdhënësi i UNMIK-ut në Prishtinë nuk pranoi të jepte hollësi të tjera nëse z. Holkeri do të bisedojë me zyrtarët e lartë italianë në lidhje me dialogun e mundur midis Kosovës dhe Serbisë e Malit të Zi për çështje teknike me rëndësi për qytetarët.

 

 

H. Holkeri nënshkroi urdhërin ekzekutiv për formimin e komisionit të pavarur për incidentin në burgun e Dubravës

 

Prishtinë, 17 shtator 2003 - Administrata ndërkombëtare në Kosovë bëri të ditur se kryeadministratori Hari Holkeri ka nënshkruar një urdhër ekzekutiv në lidhje me formimin e një komisioni të pavarur për incidentin e 4 shtatorit në burgun e Dubravës.

 

Burimet e UNMIK-ut kanë bërë të ditur se janë emëruar anëtarët e Komisionit të pavarur që do të hetojë ngjarjet që ndodhën në burgun e Dubravës, ku me 4 shtator humbën jetën pesë të burgosur dhe u plagosën 15 të tjerë.

 

Komisioni do të jetë i pavarur dhe nuk do të paragjykojë hetimet e autoriteteve që janë në vazhdim e sipër për këtë çështje. Zëdhënësi bëri të ditur se ky komision do të dalë me një raport ku do të përfshihen hetimet që ka bërë dhe rekomandimet për kushtet në burg dhe parandalimin e incidenteve të tilla në të ardhmen.

 

 

Një delegacion i Kuvendit të Kosovës do të marrë pjesë në konferencën parlamentare në Sarajevë

 

Prishtinë, 17 shtator 2003 - Prej 2 deri më 4 tetor një delegacion i Kuvendit të Kosovës, i udhëhequr nga kryetari, Nexhat Daci, do të marrë pjesë në konferencën parlamentare me temën: "Roli i parlamenteve në zhvillimin shoqëror dhe ekonomik në Evropën Juglindore...", e cila mbahet në Sarajevë.

Në këtë delegacion deputetët Bajrush Xhemajli, Haki Shatri, Zylfie Hundozi, Dragisha Krstoviq, Mahir Jagxhillar dhe Hasan Meta, gjatë qëndrimit në kryeqytetin e Bosnjë- Hercegovinës, do të njihen me përvojat e avancuara për përgatitjen e legjislacionit, monitorimin e përpilimit të politikave ekonomike, për mbrojtjen e grupeve më të cenueshme të shoqërisë etj.

 

 

Qeveria kërkon hapësirë që të merret me probleme sociale

 

Prishtinë, 17 shtator 2003 - Duke folur në takimin e sotëm të Këshillit Trepalësh Këshilldhënës, kryeministri Brajram Rexhepi tha se qeveria nuk duhet të luajë rolin e zjarrfikësit duke bërë zgjedhje të përkohshme aty ku ka probleme, por si të evitohen grevat apo protestat me karakter social.

 

Rexhepi tha se angazhohet për krijimin e një lloj pakti ndërmjet qeverisë, punëtorëve, sindikatave e Odës Ekonomike për t'i dhënë një hapësirë qeverisë që të merret me probleme reale, si të punëtorëve, e poashtu edhe të kategorive të tjera sociale.

Kjo ide nuk është risi, tha Rexhepi, meqë një gjë e tillë është praktikuar edhe në Irlandë e në shumë shtete të tjera, ndërkohë që kërkoi korrektësi dhe përgjegjësi.

Në mbledhjen e sotme të Këshillit Trepalësh Këshilldhënës u shqyrtuan edhe çështje të tjera si hartimi i projektligjit themelor të punës, ai për promovim të punësimit dhe kujdesi ndaj të papunëve.

 

 

Mbrëmë u nënshkrua kontrata për aviokompaninë e parë të Kosovës

 

Prishtinë, 17 shtator 2003 - Në Ndërtesën e Kuvendit të Kosovës është nënshkruar mbrëmë kontrata ndërmjet Ministrisë së Transportit dhe Postelekomunikacionit, Shtyllës së Katërt të UNMIK-ut dhe fituesit të tenderit për themelimin e aviokompanisë së parë të Kosovës "Hamburg Internshënel".

 

Kjo aviokompani do të veprojë në emër të Kosovës dhe do të paguajë të ardhurat për buxhetin e Kosovës. Kjo kontratë do të jetë trivjeçare me mundësi të vazhdimit edhe për dy vite.

 

 

Programi për Zhvillim i OKB-së në bashkëpunim me UNMIK-un kanë shpallur programin "Armët në këmbim për zhvillim"

 

Prishtinë, 17 shtator 2003 - Programi për Zhvillim Ndërkombëtar i OKB-së në bashkëpunim me UNMIK-un në përkrahje të amnistisë për armëmbajtësit pa leje kanë shpallur programin: "Armët në këmbim për zhvillim", i cili do të zgjasë deri në fund të këtij muaji. Lidhur me këtë ka folur dje në një konferencë me gazetarë në Prishtinë, shefi i këtij programi Robert Fajfer.

Zyrtarët e kësaj organizate thonë se programi për dorëzimin vullnetar të armëve po vazhdon dhe se Kosova kishte nevojë për një projekt të tillë. Paqeruajtësit ndërkombëtarë në Kosovë theksojnë se edhe konfiskimi i armëve që mbahen pa leje po vazhdon.

 

Zëdhënësi i KFOR-it në Prishtinë, Kris Tompson tha se paqeruajtësit kishin konfiskuar këtë javë 14 pushkë, 7 pistoleta, 459 fishek dhe një numër pajisjesh të tjera ushtarake, si granata dhe predha.

 

 

Trend pozitiv i pagesave të tatimit në pronë nga qytetarët e komunës së Prishtinës

 

Prishtinë, 17 shtator 2003 - Drejtorati për Financa dhe Pronë i Kuvendit komunal të Prishtinës ka përfunduar shpërndarjen e vendimeve për tatimin në pronë 15 ditë para afatit të përcaktuar nga Ministria për Ekonomi dhe Financa e Qeverisë së Kosovës.

 

Duke u mbështetur në llogaritë e Kuvendit komunal të Prishtinës vërehet një trend pozitiv i pagesave të tatimit në pronë nga qytetarët e Komunës së Prishtinës. Drejtorati ua përkujton qytetarëve të Prishtinës që t'i kryejnë obligimet e tyre qytetare dhe i siguron ata se këto mjete do t'u kthehen atyre në të gjitha fushat e jetës e sidomos në infrastrukturë.

 

 

Qendra për Edukim dhe Përparim bëri publik projektin mbarëkombëtar "Gjuha shqipe dhe kompjuteri"

 

Prishtinë, 17 shtator 2003 - Qendra për Edukim dhe Përparim bëri publik projektin mbarëkombëtar "Gjuha shqipe dhe kompjuteri", duke përmbyllur variantin më të ri të programit drejtshkrimor.

 

Fjalori elektronik shpjegues përmban 70 mijë fjalë të gjuhës së sotme shqipe. Ky program i është dorëzuar Qeverisë së Kosovës, dhe do t'u ofrohet për instalim falas të gjitha grupeve dhe institucioneve, përfshirë këtu edhe mediat e Kosovës.

Drejtori i kësaj qendre Lulzim Shishani sqaroi se çfarë përmban ky program. Sipas tij, programi drejtshkrimor përbëhet prej 1 milon fjalësh, pastaj korrekturën automatike. Ndërkaq programi për përvetësimin e gjuhës shqipe do të ketë këto komponente: gramatika e gjuhës shqipe, programi për lakimin e emrave dhe mbiemrave etj.

 

 

Në enklavën serbe Gorazhdec të Pejës një minoritar serb ka sulmuar pjesëtarin serb të SHPK-së

 

Pejë, 17 shtator 2003 - Në enklavën serbe Gorazhdec të Pejës një minoritar serb ka sulmuar pjesëtarin e Shërbimit Policor të Kosovës, Millo Gjakiq, i cili punon në Stacionin policor të Gorazhdecit. Sipas informatave nga policia rajonale e UNMIK-ut në Pejë, polici Gjakiq është sulmuar nga një bashkëkombas i tij serb, banor i Gorazhdecit ku ka pësuar lëndime të rënda trupore.

 

Motivet e këtij sulmi ende nuk janë të njohura, por zëdhënësi i policisë rajonale i UNMIK-ut në Pejë ka thënë se polici serb është sulmuar në kohën kur ai nuk gjendej në detyrë dhe se sulmuesi është i njohur për policinë, por ende nuk është arrestuar.

 

 

Në Kosovë kanë kanë filluar të protestojnë edhe pensionistët

 

Prizren, 17 shtator 2003 - Prej dje në Kosovë kanë kanë filluar protestat e pensionistëve, të cilët kërkojnë nga qeveria dhënien e pensioneve të tyre. Qindra pensionistë kanë protestuar dje para selisë së UNMIK-ut në Prizren, duke kërkuar pensionet e tyre që nga viti 1999.

Kthimi i 30 milionë urove që u ka borxh Serbia, si dhënia e parave për secilin pensionist për punën që ka kryer gjatë 40 vjetëve janë kërkesa të Lidhjes së Pensionistëve të Kosovës, të cilët që dje kanë filluar organizimin e protestave në shtatë qendra komunale të Kosovës.

Protestat do të vazhdojnë deri më 24 shtator, kur është parashikuar që ato të mbahen pastaj vetëm në Prishtinë para Kuvendit të Kosovës dhe selisë së UNMIK-ut. Protesta e Lidhjes së Pensionistëve të Kosovës ishte paralajmëruar kohë.

 

 

Rasti i tentativës për rrëmbimin e një vajze 12-vjeçare serbe

 

Prishtinë, 17 shtator 2003 - Policia e UNMIK-ut thotë se rasti i tentativës për rrëmbimin e një vajze 12-vjeçare serbe në fshatin Dobratin të Lipjanit, është i inskenuar, mu sikur edhe disa raste të tjera gjatë muajve të kaluar.

 

Përfaqësuesi për shtyp i policisë rajonale të Prishtinës Malkolm Eshbi ka deklaruar se në bazë të hetimeve të kryera nuk janë zbuluar prova se është tentuar rrëmbimi i vajzës 12-vjeçare serbe.

 

Ndërkaq, shefi i policisë rajonale të Prishtinës Zhan Leru thotë se rasti i vajzës 12-vjeçare serbe nuk ka ekzistuar, por kjo vajzë e vogël vetëm është frikësuar nga një veturë që ishte duke kaluar, shkruan "K.ditore".

Muajve të fundit janë përsëritur inskenimet e incidenteve ndaj serbëve në Kosovë nga mediat dhe zyrtarët e Serbisë për të krijuar një pasqyrë tejet negative për situatën në Kosovë.

Pas inskenimit të këtij rasti, serbët e Dobratinit kishin bllokuar aksin rrugor që kalon afër fshatit të tyre dhe kishin sulmuar me gurë veturat e shqiptarëve.

 

 

Fillon konkurrimi për bursat Hubert H. Humphrey për vitin 2004

 

Prishtinë, 17 shtator 2003 - Zyra e SHBA-ve në Prishtinë shpall fillimin e procesit konkurrues për programin e bursave Huvert H. Humphrey për vitin 2004.

Programi kërkon profesionistë nga vendet në zhvillim, që të udhëtojnë në Shtetet e Bashkuara të Amerikës për një vit studimi (pas së cilit nuk fitohet diplomë) dhe përvojash praktike profesionale.

 

Konkurruesit duhet të shkruajnë dhe flasin rrjedhshëm gjuhën angleze, të kenë përvojë pesëvjeçare domethënëse profesionale dhe të demonstrojnë kualitetet e udhëheqjes dhe përvojës në shërbim publik. Inkurajim I posaqëm për konkurim u ipet femrave.

Afati i fundit për dorëzimin e formularëve të plotësuar, në Zyrën Amerikane është 24 tetor 2003, njofton Zyra amerikane në Prishtinë.

 

 

Një person është plagosur në Tetovë nga një sulm me armë zjarri

 

Tetovë, 17 shtator 2003 - Një person është plagosur gjatë një sulmi me armë zjarri afër Shtëpisë së kulturës në qendër të Tetovës. Persona të panjohur sot në mëngjes nga një veturë në lëvizje kanë hapur zjarr ndaj klubit që ndodhet në Shtëpinë e kulturës. Sipas burimeve jozyrtare bëhet fjalë për një veturë pa targa.

 

 

Në qytetin irakian të Mosulit është plagosur një paqeruajtës nga Shqipëria

 

Irak - Tiranë, 17 shtator 2003 - Në qytetin irakian të Mosulit është plagosur një ushtar shqiptar i Shqipërisë me granata nga vendësit. Shefi i Shtabit të Përgjithshëm të Ushtrisë Pëllumb Qazimi konfirmoi lajmin për plagosjen e një paqeruajtësi nga Shqipëria në qytetin irakien të Mosulit, por përgënjeshtëroi lajmin e agjencive ndërkombëtare për tre ushtarë shqiptarë të plagosur gjatë një goditje me një granatë dore nga irakianët.

"Është e vërtetë se është plagosur një paqeruajtës nga Shqipëria, por jeta e tij është jashtë rrezikut për jetën, ngase ai ka pësuar vetëm një gërvishje të vogël në dorë", ka thënë z. Qazimi. Ai pranoi se misioni i trupave paqeruajtëse në Irak nuk është i lehtë dhe as jashtë rrezikut.

 

 

Maqedonia dëshiron të jetë pjesë e sigurisë së NATO-s

 

Shkup, 17 shtator 2003 - Ministri maqedonas i Mbrojtjes Vllado Buçkovski tha se Maqedonia si vend i vogël duhet të dëshirojë me sinqeritet të jetë pjesë e sistemit të sigurisë së NATO-s, sepse siç tha, në Ballkan ende do të ketë shumë skenare.

"Të jesh nën ombrelën e NATO-s, të kesh aleatë të fortë, do të thotë se ke zgjidhur një problem të madh në Balkan", tha ministri maqedonas i Mbrotjes.

 

Disa nga planet për reforma ai përmendi shtimin e numrit të bashkësive etnike në ushtri, shtimin e bashkëpunimit dhe bashkërenditjet midis Ministrisë së Mbrojtjes dhe të Rendit në lidhje me çështjet e sigurisë së brendshme, si dhe planifikimin midis dy ministrive për dorëzimin e përgjegjësive për sigurinë e kufirit.

 

 

Nxënësit maqedonas dhe VMRO-DPMN kundër arsimimit në gjuhën shqipe

 

Manastir, 17 shtator 2003 - Qindra nxënës maqedonas përsëri protestuan dje në qytetin e Manastirit, duke shprehur pakënaqësinë ndaj vendimit të Ministrisë maqedonase të Arsimit për hapjen e një klase të shkollës së mesme me mësim në gjuhën shqipe në këtë qytet.

 

Nxënësit maqedonas të shkollave të mesme kërkojnë që Ministria e Arsimit ta tërheqë vendimin dhe klasa shqipe edhepse përbëhet nga nxënësit e Manastirit të kthehet në Kërçovë, ku ishte hapur fillimisht. Në këtë kontekst edhe partia maqedonse opozitare VMRO-DPMN tha se do të votojë kundër vendimit të Qeverisë maqedonase për njohjen e Unviversitetit të Tetovës.

 

 

Majko dhe Mini deklaruan në Tiranë se nuk do të ketë as ndarje, por as kantonizim të Kosovës

 

Tiranë, 17 shtator 2003 - Nuk do të ketë as ndarje, por as kantonizim të Kosovës, kanë thënë në një takim të përbashkët në Tiranë, ministri i Mbrojtjes së Shqipërisë, Pandeli Majko dhe komandanti i KFOR-it, Fabio Mini. Ndërkaq, Mini ka ripërsëritur deklaratën e bërë më parë se në Kosovë nuk do të kthehen trupat serbe as simbolikisht. Gjeneral Mini tha se këtë qëndrim ia kishte përcjellë edhe Beogradit.

Në takimin e përbashkët Majko - Mini u bisedua për gjendjen e sigurisë në Kosovë dhe në rajon, ku janë ndërtuar hapa të sigurisë denoncuar aktet e shëmtuara. Po ashtu është vlerësuar edhe roli i Shqipërisë si dhe i autoriteteve të Kosovës për të vendosur rregull dhe siguri.

 

 

Serbia dhe Mali i Zi do ta zvogëlojnë armatën e tyre për 30 mijë pjesëtarë

 

Podgoricë, 17 shtator 2003 - Serbia dhe Mali i Zi do ta zvogëlojnë armatën e tyre për 30 mijë pjesëtarë si pjesë e përpjekjeve për reformimin e ushtrisë dhe vendosjen e lidhjeve më të përafërta me NATO-n, tha ministri i Mbrojtjes së Unionit serbo-malazez, Boris Tadiq.

 

Ai theksoi se ky vend nuk mund të ketë më shumë se 50 mijë njerëz në armatë, duke shtuar se reduktimet nevojiten për bashkangjitjen eventuale të Serbisë dhe Malit të Zi në Partneritetin për Paqe.

 

 

Gjen. Uesli Klark shpall sot kandidaturën për nominim për President të SHBA-ve

 

Arkanzas, 17 shtator 2003 – Gjenerali amerikan në pension, Uesli Klark, ish-komandant i NATO-s, iu ka bashkuar 9 demokratëve të tjerë në garën e zgjedhjeve më 2004 për Shtëpinë e Bardhë, njofton Rojter.

 

Ish-planifikuesi i lartë i planeve të luftërave në Pentagon, i cili udhëhoqi fushatën e bombardimeve më 1999 në Kosovë, Uesli Klark planifikon të shpallë kandidaturën për nominim sot në mesditë (e merkurë) në klubin e djemëve dhe të vajzave në qytetin e vet të lindjes, në Litëll Rok, Arkanzas, kanë thënë zyrtarët partiakë të Arkanzasit.

 

 

Sadam Husein bën thirrje për rezistencë kundër amerikëve

 

Bagdad, 17 shtator 2003 - Përmes një audishiriti të emituar sot në televizion arab "Al Arabaia", diktatori i përmbysur irakian Sadam Huesin u është drejtuar "burrave dhe grave të Irakut të luftojnë kundër okupit amerikan".

Huseini u është drejtuar muxhahedinëve të shtojnë sulmet ndaj armiqve. Por, zëri nuk është verifikuar nga burime të pavarura nëse është i Huseinit. Zëri në këtë shirit poashtu u bën thirrje irakianëve për protesta në rrugë kundër okupimit dhe të japin para për rezistencën.

 

 

Policia e Kashmirit indian ka vrarë një nga pjesëtarët më të lartë të një grupi militant

 

Srinagar, 17 shtator 2003 – Policia e Kashmirit indian ka thënë sot (e merkurë) se ka vrarë një nga pjesëtarët më të lartë të grupit militant Xheish-i-Muhamed, njofton BBCnews. Njoftimi për vrasjen e Nasir Mehmud Ahuan, alias Ansar, në Srinagar, vjen më pak se tri javë pas vrasjes së liderit të tij Gazi Baba, i cili qe vrarë nga forcat e sigurimit indian.

 

Shefi i policisë së Kashmirit indian, Gopal Sharma, ka thënë se Ansar ka qenë zëvendëslider i grupit të lartpërmendur që ka vepruar në Kashmir. Ai tha se Ansar ishte shtetas pakistanez dhe është vrarë gjatë natës në një sulm në shtëpinë e tij në Srinagar.

 

 

Në një shpërthim të një automjeti afër Kopenhagës ka humbur jetën shoferi

 

Kopenhagë, 17 shtator 2003 – Një automjet ka shpërthyer sot në mëngjes (e merkurë) pranë një spitali rreth 9 kilometra afër Kopenhagës dhe kështu ka shkaktuar vdekjen e një personi, bëjnë të ditur mediat, njofton Rojter. Sipas televizionit danez në këtë shpërthim ka vdekur shoferi i automjetit. Njoftohet se pothuaj asgjë s'ka mbetur nga automjeti.

 

 

SHBA-të ia kanë paguar Tailandës 10 milonë dollarë për arrestimin e Hambalit

 

Bankog, 17 shtator 2003 – Shtetet e Bashkuara ia kanë paguar Tailandës 10 milonë dollarë për arrestimin e terroristit të dyshimtë Hambali, njofton BBCWorld. Kryeministri tailandez, Thaksin Shinauatra ka thënë se paratë kanë arritur dhe ai do të vendosë se cilët policë do të ndajnë shpërplimin.

 

Hambali qe arrestuar në gusht në kryeqytetin tailandez Bankog dhe po merret në pyetje nga amerikanët. Ai mendohet të jetë figurë kryesore në grupin aziatik Xhemah Islamiah dhe për lidhje me Al Kaidën e Osama bin Ladenit.

 

 

SHBA përdor veton në një projektrezolutë kundër Izraelit

 

Nju Jork, 17 shtator 2003 - SHBA ka përdorur veton në një projekt rezolutë të Këshillit të Sigurimit të KB që demaskonte vendimin e Izraelit "për të dëbuar" udhëheqësin palestinez, Jaser Arafat.

Ambasadori amerikan në KB, Xhon Negroponte tha se rezoluta "ishte e mangët", sepse nuk përfshinte "dënimin e akteve të terrorizmit".

Projektrezoluta, e përkrahur nga shtete arabe, kërkonte që Izraeli "t'i jepte fund çdo akti deportimi dhe kërcënimi ndaj sigurisë së presidentit të zgjedhur të Autoritetit Palestinez".

 

 

Samit evropian për Irakun

 

Berlin, 17 shtator 2003 - Britania, Franca dhe Gjermania do të kërkojnë "terren të përbashkët" mbi Irakun kur udhëheqësit e të tre vendeve të takohen në fundjavë, bëri të ditur qeveria gjermane.

Kryeministri britanik, Toni Bler do të shkojë në Berlin për bisedime me kancelarin gjerman, Gerhard Shroder dhe presidentin Zhak Shirak.

"Takimi do të shërbejë për arritjen e një terreni të përbashkët në politikën e jashtme pas pikëpamjeve të ndryshme që u krijuan para luftës në irak", thuhej në deklaratën gjermane.

 

 

Policia suedeze arrestoi një të dyshuar për vrasjen e Ana Lindit

 

Stokholm, 17 shtator 2003 - Policia suedeze thotë se ata kanë ndaluar një person që kërkohet në lidhje me vrasjen e ministres së jashtme, Ana Lind. Personi i cili nuk është identifikuar u arrestua në një restorant në periferi të kryeqytetit, Stokholm.

Ai është duke u marrë në pyetje, tha zëdhënësja e policisë Stina Wessling. Personi i arrestuar është i njëjti person për të cilin policia më herët gjatë ditës nxori një urdhër arresti.

Policia ka refuzuar të thotë nëse personi i arrestuar është ai që dukej në një video kasetë në një dyqan në Stokholm ku zonja Lindh u godit me thikë për vdekje.

 

 

Maher ka kritikuar grupet palestineze për vrasjen e civilëve izraelitë në emër të luftës kundër okupimit

 

Dubai, 17 shtator 2003 – Ministri i Jashtëm egjiptian, Ahmed Maher, ka kritikuar grupet militante palestineze për vrasjen e civilëve izraelitë në emër të luftës kundër okupimit izraelit, njofton Rojter.

 

Por, Maher, vendi i të cilit, së bashku me dy shtete të tjera arabe, ka lidhje diplomatike me Izraelin , gjithashtu ka dënuar armatën izraelite për, siç i ka quajtur ai, sulme brutale në kryengritjen palestineze për pavarësi, e cila shpërtheu më 2000.

Copyright©2000-2003 Trepca.net - Të gjitha të  drejtat e rezervuara.