Mitrovicë: Komiteti për Politikë dhe Financa i Kuvendit të Komunës vlerëson se ende nuk janë plotësuar kushtet për fillimin e çfarëdo bisedimeve me Beogradin

Mitrovicë, 17 shtator 2003 / Nga: Hysni  SYLA ( Zyrtar për informim i KK )

 

Komiteti për Politikë dhe Financa i Kuvendit të Komunës, në mbledhjen e kryesuar nga kryetari Faruk Spahija, ndër të tjera ka shqyrtuar edhe gjendjen aktuale në pjesën veriore të qytetit, përkatësisht zhvillimet më të reja negative atje.

 

Anëtarët e komitetit kanë konstatuar se gjatë këtij viti janë shënuar ecuri pozitive në drejtim të integrimit të qytetit, sikur janë dinamizimi i procesit për kthimin e të zhvendosurve, proceset e integrimit administrativ, duke përfshi këtu shtrirjen e pushtetit të UNMIK-ut (edhepse jo në masë të plotë) dhe proceset civile.

 

Poashtu, anëtarët e Komitetit kanë vlerësuar se në këtë periodë situata e sugirisë ka shënuar trende të vazhdueshme pozitive, që mund të shihet nga rënja e numrit të incidenteve, pastaj relaksimi i lëvizjes së qytetarëve, relaksimi i regjimit të kalimit mbi urën kryesore të Ibrit, heqja e telave gjemborë përreth saj etj, por që të gjitha këto janë ende larg normales.

 

Megjithkëte, anëtarët e KPF kanë konstatuar se ende nuk janë bërë hapat vendimtar dhe të duhur për integrimin e plotë të qytetit, para së gjithash për shkak të mosangazhimit, jokonsekuencës dhe jovendosmëisë së  UNMIK-ut për të implementuar ligjin në tërë territorin administrativ të komunës.

 

Vlerësimin e këtillë anëtarët e KPF-së e kanë bazuar në faktin se në pjesën veriore të UNMIK-ut ende veprojnë strukturat paralele, si mbeturina të regjimit srebë (shëndetësi, arsim, administratë, rrjeti i telefonisë serbe etj.) dhe grupe të ndryshme të organizuara paramilitare që kontrollohen drejtpërsëdrejti nga Qevria e Bepgradit.

 

KPF konstaton se me mosveprimin e vet energjik, me efektet minore të  arritura dhe  shtyerjen e ngadalshme të procesit të integrimit të qytetit përpara, UNMIK-u ka keqpërdor  mirëkuptimin dhe besimin e qytetarëve të Mitrovicës.

 

Anëtarët e KPF-së kërkojnë  nga institucionet e UNMIK-ut dhe ato më të larta të vendit që të ndihmojnë pushtetin lokal për implementimin e ligjit në tërë territorin e komunës dhe implementimin e vullnetit për bashkëpunim midis komuniteteve që jetojnë në komunë, gjë që do të ndikonte njëkohësisht edhe në integrimin e përshpejtuar të qytetit.

 

Në fund, duke i patur parasysh të gjitha këto që u thanë më lartë, Komiteti për Politikë dhe Financa i Kuvendit të Komunës vlerëson se ende nuk janë plotësuar kushtet për fillimin e çfarëdo bisedimeve me Beogradin, bisedime këto që do të duhej të fillonin vetëm pas shtrirjes së administratës legjitime komunale apo asaj të mirëfilltë të UNMIK-ut në tërë territorin e komunës, të paranuar me Rregulloren e UNMIK-ut 2000/45, përkatësisht eliminimin e çfarëdo strukture paralele dhe formacioneve ekstremiste që veprojnë atje.

Copyright©2000-2003 Trepca.net - Të gjitha të  drejtat e rezervuara.