E marte 16 shtator 2003

16.09.2003 - Trepca.net

Lajme

E marte 16 shtator 2003

Përmbajtja:

Presidenti Rugova priti piktorin e njohur shqiptar Ibrahim Kodra
Të enjten Kuvendi i Kosovës debaton për gjendjen politike në Kosovë dhe shqyrton dy projektligje
Në takimin e Grupit të Kontaktit më 23 shtator do të dihet data e fillimit të dialogut mes Prishtinës e Beogradit
Faruk Spahija dënon aktin ilegal provokativ të vënies së gurëthemelit të kishës ortodokse serbe në Mitrovicë
Solana dhe Roberston i japin mbështetje nismës për fillimin e bisedimeve ndërmjet Prishtinës dhe Beogradit
Përfaqësusit e Luginës së Preshevës kërkojnë të marrin pjesë në bisedimet mes Prishtinës dhe Beogradit
Mbrëmë në Ferizaj persona të panjohur kanë vrarë një person dhe kanë plagosur disa të tjerë
Përfaqësues të KMDLNJ-së vizituan Qendrën Korrektues për të Mitur në Lipjan
Përfaqësuesit serbë dhe peshkopi Artemije vunë gurthemelin për ndërtimit e një kishe serbe në veri të Mitrovicës
U formua këshilli nismëtar për themelimin e Sindikatës së Pavarur të Aktorëve të Kosovës
Njoftim për media: U hap faqja zyrtare e LDK-së në internet!
Moisiu kërkoi që njerëzit me uniforma të mos bëhen pjesë e procesit të votimit
Nebojsha Çoviq shef i delegacionit të Beogradit në bisedimet me Prishtinën
BDI thotë se situata e sigurisë në Maqedoni po stabilizohet
Trofta e Ohrit përballet me zhdukje për shkak të ndotjes dhe peshkimit të tepërt
Qeveria e Maqedonisë miratoi propozimligjin për zyrtarizimin e Universitetit të Tetovës
Ambasadori i NATO-s në Shkup thotë se në Maqedoni nuk ka guerilë që luftojnë për Shqipërinë e madhe
Tre vetë kanë humbur jetën e 34 të tjerë janë plagosur në një shpërthim të sotëm në Japoni
Në luftimet 6-ditëshe në Kolumbi janë vrarë 17 guerilë marksistë
Britania, Franca dhe Gjermani në samit për Irakun
Gjenerali Xhons premton prezencë ushtarake më të fortë në Gjermani dhe Kosovë
Të paktën 67 të burgosur kanë humbur jetën nga zjarri në një burg të Riadit
Gjykata amerikane ka dënuar Iranin t'u paguajë mbi 420 milionë dollarë 12 viktimave amerikane
Të paktën 43 pasagjerë kanë humbur jetën në një aksident në Nepal
Në një pritë në rrugë është vrarë shefi i policisë së qytetit Kaldija
Izraelitët kanë vrarë afër Hebronit një palestinez
Gjurmë të ADN-së mund të çojnë drejt vrasësit të Ana Lindit
Këshilli i Sigurimit të OKB-së shqyrton rezolutën për Izraelin
Fyerje gjatë debatit në Këshillin e Sigurimit
Irani nuk pranon të respektojë afatin e 31 tetorit
Gjykata ndalon një votim të rëndësishëm
Franca kërkon kalim të pushtetit

Presidenti Rugova priti piktorin e njohur shqiptar Ibrahim Kodra


Me këtë rast Presidenti i shprehu mirënjohje piktorit Kodra për të gjitha që ka bërë për njohjen e Kosovës dhe për njohjen e popullit shqiptar. "Zoti Kodra miërsevini në Kosovën e lirë dhe së shpejti edhe të pavarur", i tha Presidenti Rugova Ibrahim Kodrës.
Ibrahim Kodra pasi përkujtoi kohën kur për herë të parë kishte vizituar Kosovën, tha se sot Kosova duket si një shtet evropian dhe po hapet dera e Kosovës në botë, tha Kodra, i cili shprehu përshtypjet e tij edhe për disa qytete të Kosovës që i kishte vizituar.
Predidenti Rugova ia dhuroi Kodrës një medaljon me portretin e Nënës Tereze. Ndërkaq, Kodra ia fali Rugovës një pikturë të veten.


Të enjten Kuvendi i Kosovës debaton për gjendjen politike në Kosovë dhe shqyrton dy projektligje

Prishtinë, 16 shtator 2003 - Kryesia e Kuvendit të Kosovës, në mbledhjen e saj të drejtuar nga Nexhat Daci, kryetar, ka përcaktuar rendin e ditës për seancën e 18 shtatorit dhe atë për seancën vijuese.
Këtë të enjte deputetët e Kuvendit të Kosovës do të debatojnë për gjendjen politike në Kosovë dhe do të shqyrtojnë dy projektligje: atë për produktet dhe pajisjet medicinale dhe Projektligjin për inspektoratin sanitar.
Në seancën vijuese, ndërkaq, do të nxirret për shqyrtim të dytë projektligji për siguri në punë, mbrojtje të shëndetit dhe të mjedisit të punës, ndërsa për shqyrtim të parë Projektligjin për ndryshimin dhe plotësimin e Ligjit për menaxhimin e financave publike.
Kryesia e Kuvendit ka shqyrtuar edhe përgjigjen e Qeverisë lidhur me kërkesën e Kryesisë për përgatitjen e legjislacionit bazik dhe për standardizimin e teknikës së hartimit të ligjeve. Është shyrtuar edhe rekomandimi i Komisionit për tregëti dhe industri për radhitje në rend dite në ndonjërën nga seancat e ardhshme të Kuvendit çështja e kombinatit “Trepça” dhe pozita e minatorëve.
Po në këtë mbledhje janë shqyrtuar edhe kërkesa të partive për ndarjen e mjeteve për financimin e partive politike, me përfundim që kjo çështje duhet të rregullohet me ligj.

Është prekur ndërkaq edhe çështja e funksionimit jo të mirë të pushtetit lokal dhe megjithë kompetencën e kufizuar të Kuvendit të Kosovës për të mbikëqyrur dhe rregulluar pushtetin lokal, Kryesia ka konkluduar se çështja duhet të debatohet në njërën nga seancat e ardhshme.


Në takimin e Grupit të Kontaktit më 23 shtator do të dihet data e fillimit të dialogut mes Prishtinës e Beogradit

Bruksel, 16 shtator 2003 - Bashkësia ndërkombëtare po i jep fund e përgatitjeve për fillimin e dialogut mes Prishtinës e Beogradit, ndërkaq data e nisjes së dialogut është shumë e afërt, thonë krerët e Bashkimit Evropian në Bruksel.
Sipas burimeve të mirinformuara nga Brukseli, javën e fundit të shtatorit do të bëhen të ditura data, vendi dhe modaliteti i bisedimeve.

Ndërkaq, 23 shtatori, dita kur në Nju Jork do të mblidhen përfaqësuesit e Grupit të Kontaktit, thuhet se do të jetë data e fundit e përgatitjeve dhe e këshillimeve që kancelaritë perendimore kanë ndërmarrë për të përcaktuar detajet dhe kohën më të përshtatshme për nisjen e dialogut mes Prishtinës edhe Beogradit.


Faruk Spahija dënon aktin ilegal provokativ të vënies së gurëthemelit të kishës ortodokse serbe në Mitrovicë

Mitrovicë, 16 shtator 2003 - Kryetari i Kuvendit të Komunës Faruk Spahija dënon ashpër aktin ilegal provokativ të vënies së gurëthemelit të kishës ortodokse serbe në pjesën veriore të qytetit, të cilin ekstremistët serbë e bënë të dielen më 14 shtator.
Zoti Spahija vlerëson se ndërtimi i kishës ortodokse serbe në pjesën e qytetit të administruar nga UNMIK-u, përkatësisht në lagjen e banuar me shumicën shqiptare ka prapavijë politike dhe bëhet me qëllim të tensionimit të gjendjes dhe krijimit të hapësirës etnikisht të pastër serbe.
Duke patur parasysh faktin se ndërtimi i kishës bëhet pa lejen e organeve kompetente të komunës dhe në hapësirën e kontestueshme, kryetari Spahija kërkon sqarim nga administratorja komunale Jarvenpaa lidhur me këtë veprim ilegal të ekstremistëve serbë dhe marrjen e masave të menjëhershme ligjore për ndërprerjen e ndërtimit.
Poashtu, Spahija vlerëson se përcjellja e organizuar e priftërinjëve serbë për të marrë pjesë në një akt të ndërtmit ilegal nga ana e policisë së UNMIK-ut, është veprim që nuk do të duhej të ndodhte dhe që njëkohësisht inkurajon ekstremistët serbë për të injoruar ligjet në fuqi dhe përpjekjet për integrimin e qytetit.
Kryetari i Kuvendit të Komunës, duke mos qenë kundër ndërtimit të kishës ortodokse serbe në ndonjë hapësirë tjetër që nuk është problematike dhe duke respektuar thellë ndjenjat e besimtarëve ortodoks të minoritetit serb, konsideron se me përpjekje të përbashkëta të të gjithë faktorëve relevantë në komunë, ka mundësi që ata t'i kryejnë shërbimet e tyre fetare në kishën e cila gjendet në pjesën jugore dhe me këtë njëkohësisht do ti kontribohej edhe integrimit më të përshpejtuar të qytetit.


Solana dhe Roberston i japin mbështetje nismës për fillimin e bisedimeve ndërmjet Prishtinës dhe Beogradit

Bruksel, 16 shtator 2003 - Zyrtarët e lartë të BE-së dhe të NATO-s, Havier Solana dhe Xhorxh Roberston në një konferencë për gazetarë i kanë dhënë mbështetje nismës për fillimin sa më të shpejtë të bisedimeve për çështje teknike ndërmjet Prishtinës dhe Beogradit.

Ndonëse janë të vetëdijshëm për statusin e pazgjidhur të Kosovës, ata thanë se çështja e statusit të Kosovës duhet të zgjidhet sipas kornizave që i cakton Rezoluta 1244 e KS të OKB-së.
Solana ka theksuar se ende nuk ka ardhur koha për caktimin e statusit final të Kosovës, por përkujton se standardet para statusit mbeten ende në fuqi si formulë që do të ndiqet sa i përket statusit final të Kosovës, dhe kur të plotësohen këto standarde, atëherë mund të bisedohet edhe për statusin, thotë ai.
Ndërkaq, Robertson në emër të NATO-s ka thënë vetëm se pajtohet me këtë politikë, ndërsa ai më parë kishte thënë se edhepse çështja e statusit final të Kosovës është në kokat e politikanëve në Ballkan ajo ende nuk është në agjendën e OKB-së.
"Ka rëndësi absolute edhe nisja e dialogut ndërmjet Prishtinës dhe Beogradit", ka thënë në Bruksel, Havier Solana. Ai ka theksuar se tash jemi shumë më afër në takimin e agjendës të dialogut Prishtinë - Beograd, fillimi i së cilit ka rëndësi të madhe.
Robertson dhe Solana me këtë rast kanë dënuar dhunën e grupeve ekstremiste shqiptare si në Maqedoni, ashtu edhe në Kosovë.
Xhorxh Robertson ka thënë se ata që prodhojnë ekstremizmin dhe dhunën për qëllime politike sabotojnë të ardhmen e popullit të Kosovës. Ai kërkon të izolohen të gjithë ata që ende predikojnë terrorizmin, dhunën dhe ekstremizmin në Kosovë.
Ndërkaq, për incidentet e fundit në Maqedoni, lordi Robertson, ka theksuar se ka disa njerëz që përpiqen të mbulojnë veprimet e tyre kriminale me propagandë çlirimtare, ose me krijimin e organizatave ushtarake. Por, ata janë thjesht elementë kriminal që përpiqen të fshehin veprimet e tyre kinse me solidaritetin etnik.
Pas dy javësh, tha lordi Robertson, Këshilli i Atlantikut Verior do të vizitojë Shkupin, ku do t'u përcjellë autoriteteve vendëse mesazhin se çështjet e mbetura pezull në vënien në jetë të Marrëveshjes së Ohrit, duhet trajtuar me urgjencë.


Përfaqësusit e Luginës së Preshevës kërkojnë të marrin pjesë në bisedimet mes Prishtinës dhe Beogradit

Prishtinë, 16 shtator 2003 - Përfaqësuesit politikë shqiptarë të Luginës së Preshevës, pas takimeve të djeshme me udhëheqësit më të lartë të Kosovës shfaqën besimin e tyre se do të jenë pjesë e delegacionit të Serbisë në dialogun ndërmjet Prishtinës dhe Beogradit.

Kryetari i Komunës së Preshevës, Riza Halimi, i cili bisedoi për këto çështje me autoritetet e Kosovës, tha se përfaqësuesit politikë të Luginës së Preshevës, duhet të marrin pjesë në delegacionin e Serbisë në bisedimet e mundshme për çështje teknike mes Prishtinës dhe Beogradit, ashtu siç serbët e Kosovës duhet të marrin pjesë në delegacionin e Kosovës.
Këtë konstatim e mbështet edhe anëtari serb i Kryesisë së Kuvendit të Kosovës Oliver Ivanoviq.


Mbrëmë në Ferizaj persona të panjohur kanë vrarë një person dhe kanë plagosur disa të tjerë

Ferizaj, 16 shtator 2003 - Mbrëmë në qendër të Ferizajt persona të panjohur kanë shtënë me armë zjarri duke vrarë një person dhe duke plagosur të paktën disa të tjerë. Jozyrtarisht thuhet se i vrari është Vehbi Bytyçi (1959) nga Dobraja e Madhe e Lipjanit.
Zyrtarët e policisë kanë njoftuar se ky incident ka ndodhur mbrëmë rreth orës 19.00, por rrethanat dhe autorët mbetën të panjohura për momentin.


Përfaqësues të KMDLNJ-së vizituan Qendrën Korrektues për të Mitur në Lipjan

Lipjan, 16 shtator 2003 - Përfaqësues të KMDLNJ-së vizituan Qendrën Korrektues për të Mitur në Lipjan ku u takuan me drejtuesit e këtij burgu. Një nga arsyet për vizitë në këtë qendër korrektuese ishte letra e 24 të burgosurve të mitur në Qendrën Korrektuese në Lipjan drejtuar KMDLNJ-së, nëpërmjet të së cilës ata shprehnin pakënaqësinë e tyre me kushte jo të mira në Qendër.
Përfaqësuesit e KMDLNJ-së biseduan me të burgosurit e mitur, të cilët u ankuan për mungesë të kushteve specifike dhe për disa aspekte të trajtimit të tyre.
Përfaqësuesit e KMDLNJ-së, vizituan edhe lokalet e këaj qendre, e pastaj ata edhe një herë biseduan me zyrtarët e Qendrës Korrektuese, me ç’rast i paraqitën vrojtimet e tyre si dhe ankesat dhe kërkesat e të burgosurve. Përkitazi me këtë, zyrtarët e burgut theksuan se janë të vetëdijshëm për disa mungesa, por për mënjanimin e tyre duhen mjete të theksuara materiale, e të cilat tash për tash mungojnë. Ata kërkuan ndihmë nga KMDLNJ në gjetjen e donacioneve.
KMDLNJ konstaton se kushtet në Qendrën Korrektuese për të Mitur në Lipjan janë relativisht të mira dhe vlerëson se disa nga ankesat dhe kërkesat e të burgosurve janë të arsyeshme.
Duke u bazuar në këtë KMDLNJ i rekomandon autoriteteve të Qendrës Korrektuese për të Mitur në Lipjan, ndërmarrjen e disa masave në përmirësimin e kushteve higjienike dhe të tjera të të burgosurve, thuhet në një raport të gjatë të KMDLNJ-së.


Përfaqësuesit serbë dhe peshkopi Artemije vunë gurthemelin për ndërtimit e një kishe serbe në veri të Mitrovicës

Mitrovicë, 16 shtator 2003 - Përfaqësuesit e pakicës serbe dhe peshkopi i kishës orthodokse serbe Artemije vunë pa lejën e UNMIK-ut gurthemelin për ndërtimit e një kishe të shenjtit Dmitroviq në kodrën, e cila ndodhet në Mitrovicën veriore.

Spekulohet se kinse sipas legjendës serbe ky i shenjtë i ka dhënë emrin qytetit të Mitrovicës. Njoftohet se UNMIK-u nuk ka dhënë leje për ndërtimin e kësaj kishe serbe në kodrën e Mitrovicës, duke sqaruar dhe argumentuar se kërkesa është e pamotivuar dhe se nuk ka pse të japë leje për këtë.

Gjatë hedhjes së gurthemelit nuk ka pasur incidente, ndonëse vendi ishte rrethuar nga një numër i madh policësh të UNMIK-ut.


U formua këshilli nismëtar për themelimin e Sindikatës së Pavarur të Aktorëve të Kosovës

Prishtinë, 16 shtator 2003 - Në Prishtinë me inciativën e një grupi aktorësh kosovarë, u formua këshilli nismëtar për themelimin e Sindikatës së Pavarur të Aktorëve të Kosovës.

Qëllimi i formimit të kësaj sindikate, është që të krijohet baza normative dhe organizative e sindikatës për mbrojtjen e të drejtave të aktorëve kosovarë në raport me institucionet, ku ata punojnë dhe veprojnë në harmoni me ligjet dhe rregulloret përkatëse të aplikueshme në Kosovë, por edhe në harmoni me normat ndërkombëtare, që mund të aplikohen në Kosovë.


Njoftim për media: U hap faqja zyrtare e LDK-së në internet!

Njoftojmë opinionin e gjerë se nga dita e djeshme, me datë 15.9.2003 ka hyrë në funksion web site-i zyrtar i LDK-së, në adresen www.ldk-kosova.org.
Qytetarët e Kosovës, simpatizantët e LDK-së, dhe opinioni i gjërë do të kenë mundësi që edhe përmes internetit të njoftohet më për së afërmi me infrastrukturën politike të Lidhjës Demokratike të Kosovës dhe aktivitetin e saj.
Po ashtu, në www.ldk-kosova.org vizitorët do të kenë rastin të përcjellin edhe më të rejat nga kultura, arti, shkenca dhe bota e informacionit.
Na vizitoni, ne jemi në shërbimin tuaj!


Moisiu kërkoi që njerëzit me uniforma të mos bëhen pjesë e procesit të votimit

Tiranë, 16 shtator 2003 - Në një takim me drejtuesit më të lartë të rendit, në prani edhe të prokurorit të përgjithshëm, presidenti i Shqipërisë, Alfred Moisiu kërkoi me ngulm që njerëzit me uniforma të mos bëhen pjesë e procesit të votimit duke marrë anën e partive politike.
Bindjen e tyre, oficerët, nënoficerët apo policët e thjeshtë duhet ta tregojnë vetëm në kutinë e votimit, është shprehur presidenti Moisiu, duke saktësuar se ata nuk kanë aspak të drejtë që gjatë zbatimit të detyrës të manifestojnë qoftë edhe shenjën më të vogël të bindjeve të tyre.
Kreu i shtetit u ka kërkuar drejtuesve të rendit që ky mesazh tu përcillet të gjithë punonjësve të policisë. "Ata duhet të bëhen të ndërgjegjshëm për misionin që do të kryejnë, për përgjegjësinë që do të kenë dhe të kuptojnë se policia e shtetit shqiptar nuk do të lejojë përsëritjen e veprimeve të së kaluarës", është shprehur presidenti Moisiu.


Nebojsha Çoviq shef i delegacionit të Beogradit në bisedimet me Prishtinën

Beograd, 16 shtator 2003 - Qeveria serbe ka emëruar nënkryetarin e saj Nebojsha Çoviq shef të delegacionit të Beogradit në bisedimet me Prishtinën, njoftojnë mediat serbe. Në këtë delegacioni thuhet se do të jetë edhe ministri i jashtëm i Serbisë dhe Malit të Zi Goran Svillanoviq, apo ndonjëri nga bashkëpunëtorët e tij të ngushtë.

Sipas mediave serbe zgjedhja e Çoviqit në krye të delegacionit serb nuk ka qenë "punë e lehtë". Për Çoviqin nuk ka qenë të interesuar disa nga krerët i Bashkimit Evropian, sidomos shefi i diplomacisë Havier Solana. Por, thuhet se ka dominuar raporti i forcave në Beograd dhe rrethanaa se Uashingtoni nuk ka pasur kurrfarë rezerva, theksojnë mediat serbe.


BDI thotë se situata e sigurisë në Maqedoni po stabilizohet

Shkup, 16 shtator 2003 - Bashkimi Demokratik për Integrim (BDI) konsideron se situata e sigurisë në Maqedoni po stabilizohet si rezultat i përpjekjeve që ka bërë kjo parti dhe i faktorit ndërkombëtar.

Kështu është shprehur nënkryetari i BDI-së Agron Buxhaku i cili e ka shoqëruar liderin e kësaj partie Ali Ahmeti, në takimin e mbrëmshëm me përfaqësuesit e BE-së, NATO-s dhe SHBA-ve në Maqedoni, në të cilin janë diskutuar mundësitë e përshpejtimit të zbatimit të Marrëveshjes së Ohrit.

Përfaqësuesit e bashkësië ndërkomëbatre i kanë vlerësuar bisedimet si të dobishme dhe se ato hapin mundësitë për një progres në periudhën e ardhshme.


Trofta e Ohrit përballet me zhdukje për shkak të ndotjes dhe peshkimit të tepërt

Uashington, 16 shtator 2003 – Trofta e Ohrit, një peshk antik që jeton në një nga liqenet më të vjetra evropiane, po përballet me zhdukje për shkak të ndotjes së liqenit dhe peshkimit të tepërt, bën të ditur në një studim revista e njohur shkencore amerikane "National Geographic" (Nejshënell xhiografik).

Ky paralajmërim, thuhet mëtej në studim, vjen nga shkencëtarët ballkanas, të cilët thonë se edhe një ndalesë e propozuar pesëvjeçare për peshkim komercial nuk do të jetë e mjaftueshme për të shpëtuar këtë lloj peshku.
Liqeni i Ohrit, që shtrihet ndërmjet Shqipërisë dhe Maqedonisë, është formuar rreth tre milionë vjet më parë.

Së bashku me liqenin Baikal në Rusinë juglindore dhe atë të Tanganjikës në Afrikën lindore, është një nga liqenet më të vjetra në botë. Liqeni i Ohrit arrin një thellësi prej 290 metrash dhe është i njohur si "muze i fosileve". Si i tillë është edhe thesar botëror trashëgimie i Kombeve të Bashkuara.


Qeveria e Maqedonisë miratoi propozimligjin për zyrtarizimin e Universitetit të Tetovës

Shkup, 16 shtator 2003 - Qeveria e Maqedonisë ka miratuar në mbledhjen e mbrëmshme vendimin, përkatësisht projektligjin për zyrtarizimin e Universitetit të Tetovës, i cili do të shyrtohet në seancën e parë të Parlamentit të Maqedonisë. Burime nga Bashkimi Demokratik për Integrim, që është anëtare e koalicionit qeveritar, thonë se bëhet fjalë për procesin e zyrtarizimit të Universitetit të Tetovës.
Ministri i Arsimit të Maqedonisë Aziz Pollozhani tha se Qeveria e Maqedonisë aprovoi tekstin e propozimligjit për themelimin e institucionit të tretë shtetëror në Maqedoni, pra të arsimit të lartë dhe të aprovojë programet e propozuara nga Ministria e Arsimit për përmbajtjen, principet, parimet dhe mbështetjen ligjore të këtij projekti.

Ministri Pollozhani theksoi se ky institucion i lartë i arsimi shqip në Maqedoni do të ketë pesë fakultete, prej të cilave katër janë fakultete në shkallë të plotë dhe me mundësi ligjore që të organizojë çdo lloj aktiviteti shkencor dhe arsimor dhe një qendër politeknike, e cila në vete do të ngërthejë në fillim një-dy dhe më vonë edhe më shumë programe studimore në funksion të zhvillimit ekonomik dhe të përshtatjes edhe ekonomike të shqiptarëve në rrjedhat aktuale, pra zhvillimore në Maqedoni.

Pra Universiteti i Tetovës do të ketë Fakultetin e Shkencave Matematiko-Natyrore, Fakultetin e Shkencave Humanitare dhe Artet, Fakultetin Ekonomik, Fakultetin Juridik dhe Qendra për Studime Politeknike, tha ndër të tjera ministri i Arsimit të Maqedonisë.


Ambasadori i NATO-s në Shkup thotë se në Maqedoni nuk ka guerilë që luftojnë për Shqipërinë e madhe

Shkup, 16 shtator 2003 - Zyrtarët më të lartë maqedonas dhe diplomatët perëndimorë në këtë vend e përshkruajnë gjendjen e sigurisë si të qëndrueshme, pavarësisht nga tensionet e fundit të krijuara pas aksioneve të policisë, siç thuhet kundër ekstremistëve në rajonet me popullsi shqiptare.

Zhvillimet në terren nuk kanë motive politike dhe këtu nuk ka guerilë që luftojnë për Shqipërinë e madhe, ka thënë ambasadori i NATO-s në Shkup Nikolas Bigman.


Tre vetë kanë humbur jetën e 34 të tjerë janë plagosur në një shpërthim të sotëm në Japoni

Nagoja, Japoni, 16 shtator 2003 – Tre vetë kanë humbur jetën, kurse 34 të tjerë janë plagosur në një shpërthim të sotëm (e martë) në qytetin Nagoja të Japonisë, 17 mila nga Tokio, njofton Rojter. Shpërthimi ka ndodhur pasi sulmuesi duke vringlluar thikën kishte marrë disa pengje në një ndërtesë të një kompanie distributive, të cilës pastaj ia kishte dhënë flakën. Ndër të lënduar janë disa policë dhe zjarrfikës.

Policia ka thënë se personi, që duket të jetë në të 40-tat apo në të 50-tat, i ka marrë pengjet dhe është barrikaduar në një zyre më parë heret ditën. Ai ka kërkuar t’i paguhen të ardhurat tremujore. Shtatë nga pengjet janë liruar para shpërthimit të palënduar.


Në luftimet 6-ditëshe në Kolumbi janë vrarë 17 guerilë marksistë

Bogota, 16 shtator 2003 – Armata kolumbiane ka njoftuar se gjatë luftimeve në gjashtë ditët e kaluara me kryengriitësit marksistë, që kanë qenë më të ashprat në këtë vit, ka vrarë 17 guerilë, kurse ka arrestuar 114 të tjerë, njofton Rojter. Në këtë njoftim thuhet gjithashtu se asnjë ushtar nuk është vrarë dhe as nuk është lënduar.


Britania, Franca dhe Gjermani në samit për Irakun

Berlin, 16 shtator 2003 - Britania, Franca dhe Gjermania do të mbajnë një samit të paparashikuar në Berlin të shtunën për të diskutuar situatën në Irak.
Do të jetë takimi i parë zyrtar midis kryeministrit britanik, Toni Bler, presidentit Shirak të Francës dhe kancelarit gjerman, Gerhard Shrëder që nga marrja e vendimit për luftë në Irak.
Qeveria gjermane thotë se tre udhëheqësit do të përpiqen të gjejnë pozitat e përbashkëta të politikës së jashtme pas mosmarrëveshjeve që filluan në atë kohë.
Megjithatë, një zëdhënës për zotin Bler tha se nuk do të ketë përpjekje specifike për të arritur ndonjë konsensus për një rezolutë të re mbi Irakun.


Gjenerali Xhons premton prezencë ushtarake më të fortë në Gjermani dhe Kosovë

Uashington, 16 shtator 2003 - Shtetet e Bashkuara të Amerikës do të mbajnë në Evropë një ushtri të fortë, duke ruajtur dhe forcuar kështu prezencën amerikane në ato vende, ku ushtria amerikane është e dislokuar, ka thënë komandati i forcave ushtarake amerikane në Evropë, gjenerali Xhems Xhons.

Gjenerali Xhons theksoi se Amerika aktualisht në Evropë ka 116,000 trupa aktive, të cilat më së shumti janë të dislokuara në Gjermani në bazën ajrore Ramstajn dhe në Kosovë ën kampin Bondstill, dy pikat më strategjike, për SHBA-s, në Europë.
"Baza ajrore Ramstajn në Gjermani, sipas gjeneralit Xhons, si dhe baza e njohur për operacionet, si kampi Bondstill në Kosovë, akoma ngelin të kenë gjurmë të forta dhe të rëndësishme në këtë pjesë të botës, në Evropë", thotë gjenerali Xhons, i cili aktualishtë edhe mban rolin e komondantit suprem për forcat amerikane në Evropë, në kuadrin e Aleancës Veri Atlantike - NATO.
Xhons ka kërkuar që baza për operacione, si kampi Bondstill në Kosovë, të ketë një pozicion tjetër për operacione që mund të jetë ngritja e një aeroporti dhe kazerme ushtarake, afër një zone luftarake.


Të paktën 67 të burgosur kanë humbur jetën nga zjarri në një burg të Riadit

Riad, 16 shtator 2003 - Të paktën 67 të burgosur kanë humbur jetën e 23 të tjerë janë lënduar nga zjarri i cili shpretheu të hënën në një burg të kryeqytetit të Arabisë Saudite, në Riad.
Zjarri kishte shpërthyer në mesditë, por nuk dihet se është vënë me qëllim apo për shkaqe të tjera. Zjarrfikësit e shuan zjarrin pas tri orëve.


Gjykata amerikane ka dënuar Iranin t'u paguajë mbi 420 milionë dollarë 12 viktimave amerikane

Uashington, 16 shtator 2003 – Një gjykatë amerikane ka marrë vendim që Irani t'u paguajë mbi 420 milionë dollarë 12 viktimave amerikane të një shpërthimi bombe më 1997 në Jerusalem, të kryer nga grupi militant palestinez i Hamasit, i mbështetur nga Irani, njofton AFP.

Gjykata ka caktuar t'u paguajë paditësve 123.34 milionë dollarë për dëme fizike dhe emocionale, katër nga të cilët s’kanë qenë të pranishëm në vendin e shpërthimit, por duke qenë të afërm të viktimave kanë pësuar afekt. Ndërkaq, qeveria iraniane është ndëshkuar edhe me 300 milionë dollarë për dëmet e shkaktuara.


Të paktën 43 pasagjerë kanë humbur jetën në një aksident në Nepal

Katmandu, 16 shtator 2003 - Të paktën 43 pasagjerë kanë humbur jetën, ndërkaq 19 të tjerë janë lënduar kur autobusi me të cilin udhëtonin u rrokullis në lumin Beri në perëndim të Nepalit, njofton DPA.
Aksidenti ndodhi sot në vendin Baluva Sangrai në provincën Saljan, 350 km në perëndim të Katmandus. Në momentin e aksidentit në autobus ndodheshin 82 vetë.


Në një pritë në rrugë është vrarë shefi i policisë së qytetit Kaldija

Falluxha, Irak, 16 shtator 2003 – Shefi i policisë në qytetin e rrezikshëm sunit Kaldija është vrarë në një pritë në rrugë derisa ai po kthehej në shtëpinë e tij në Falluxha, vend ky ku është bërë arenë e ngritjes së dhunës kriminale dhe të rezistencës kundër forcave amerikane në Irak, bën të ditur në një njoftim të sotëm AP. Vrasja e kol.

Khedeir Mekhalef Ali ka ndodhur vetëm tri ditë pas vrasjes gabimisht të 8 policëve irakianë nga ana e forcave amerikane. Truproja e shefit të vrarë të policisë njoftohet gjithashtu të jetë plagosur në krah dhe në shpinë dhe është duke u trajtuar në spitalin, që ndodhet pak mëtej nga vendi i pritës.


Izraelitët kanë vrarë afër Hebronit një palestinez

Hebron, 16 shtator 2003 - Njësitë speciale të ushtrisë izraelite kanë vrarë sot në fshatin Dura afër Hebronit një palestinez, bëhet e ditur nga burimet ushtarake izraelite.
Izraelitët pohojnë se bëhet fjalë për një operativist të lartë të organizatës Xhihadi islamik.
Ushtarët izraelitë në atë rajon gjurmonin aktivistët e Hamasit dhe të lëvizjeve të tjera të cilat qëndrojnë pas sulmeve vetëvrasëse në Izrael.


Gjurmë të ADN-së mund të çojnë drejt vrasësit të Ana Lindit

Stokholm, 16 shtator 2003 - Gjurmë të ADN-së janë marrë nga një kapele bejzbolli veshur nga vrasësi i Ministres së jashtme, Ana Lindh, thotë policia. Njoftimi erdhi pesë ditë pasi Lind u godit me thikë në një dyqan në Stokholm.
ADN-ja nuk përputhet me ndonjë ADN tjetër që mbahet nga policia.
Arma e vrasjes, së bashku me kapelen e bejzbollit që ka dhënë ADN kryesore u lanë pas kur autori i krimit u largua.
Policia thotë se ata ende po përpiqen të arrijnë në përfundimin nëse personi i kapur në kamera është i dyshuari apo një dëshmitar.


Këshilli i Sigurimit të OKB-së shqyrton rezolutën për Izraelin

Nju Jork, 16 shtator 2003 - I dërguari i lartë i Kombeve të Bashkuara për Lindjen e Mesme, Terje Roed-Larsen, tha se procesi i paqes mes Izraelit dhe palestinezëve ndodhet në një udhëkryq dhe ai ka frikë se në të ardhmen do të ketë gjakderdhje më e rëndë.
Roed-Larsen i tha dje Këshillit të Sigurimit të OKB-së se procesi i zbatimit të planit të paqes, i njohur edhe si Harta Rrugore, duhet të intensifikohet si pasojë e shtimit të ndjeshëm kohët e fundit të dhunës izraelito-palestineze.

Ai tha se mund të duhet të merren masa konkrete lidhur me sigurimin dhe vend-banimet hebraike në Bregun Perëndimor dhe në Rripin e Gazës.


Fyerje gjatë debatit në Këshillin e Sigurimit

Nju Jork, 16 shtator 2003 - Diplomatë izraelitë dhe palestinezë në Kombet e Bashkuara kanë shkëmbyer fyerje në debatin e Këshillit të Sigurimit mbi Lindjen e Mesme.
Ambasadori izraelit në KB, Dan Gillerman akuzoi udhëheqësin palestinez Jaser Arafat se ishte pas sulmeve terroriste që tha ai e çuan të tërë rajonin pranë katastrofës.
Në kundërpërgjigje vëzhguesi palestinez në KB, Naser al Kidwa i përshkroi fjalët e zotit Gillerman si plehëra.
Shkëmbimi i fjalëve pasoi komentet e bëra më herët nga i dërguari i posaçëm i KB në Lindjen e Mesme, Terje Roed Larsen i cili e përshkroi zotin Arafat si përfaqësim i aspiratave dhe identitetit palestinez.
Debati u thirr në kundërpërgjigje të një kërcënimi izraelit për të dëbuar zotin Arafat nga territori palestinez.


Irani nuk pranon të respektojë afatin e 31 tetorit

Teheran, 16 shtator 2003 - Nënpresidenti i Iranit, Gholamreza Agazadeh, i cili shërben edhe si shefi i energjisë bërthamore, tha se qeveria e Teheranit mbetet e angazhuar të respektojë Traktatin për Mospërhapjen e Armëve Bërthamore, por kundërshton afatin e caktuar javën e kaluar që ajo të provojë se nuk po zhvillon armë të tilla.
Agazadeh tha se Teherani do t'i vazhdojë bisedimet me Agjencinë Ndërkombëtare të Energjisë Atomike për të lejuar inspektimin pa paralajmërim të objekteve të tij bërthamore.


Gjykata ndalon një votim të rëndësishëm

Uashington, 16 shtator 2003 - Udhëheqësit republikanë kanë reaguar plot zemërim pas një vendimi të gjykatës për të shtyrë një votim të planifikuar mbi të ardhmen e guvernatorit demokrat, Grej Dejvis.
Gjykata ka thënë se votimi ishte planifikuar për muajin tjetër pas kritikave ndaj mënyrës se si zoti Davis ka trajtuar ekonominë e vendit.
Oponenti i tij kryesor është aktori, Arnold Shvarzeneger. Unioni për liritë civile amerikane tha se përdorimi i makinave të vjetra do të thotë se votat e shumë zezakëve dhe latino-amerikanëve nuk do të mund të numërohen.
Vetë Shvarzeneger tha se vendimi ka qenë i motivuar politikisht. Ai kërkoi mundësinë e një ankese të menjëhershme ndërkohë që republikanët e tjerë ishin edhe më të ashpër.


Franca kërkon kalim të pushtetit

Paris, 16 shtator 2003 - Ndërsa vazhdojnë përpjekjet ndërkombëtare për arritjen e një marrëveshjeje mbi një rezolutë të re të KB mbi të ardhmen e Irakut, Franca ka bërë të ditur se së pari duhet të ketë një që ajo e quajti transferim simbolik i sovranitetit mbi këshillin qeverisës ekzistues në Bagdad.
Një transferim i përgjegjësive tek ministrat do të pasojë sapo ata të jenë gati për të marrë përsipër detyrat. Pozita franceze u bë e ditur nga ambasadori francez në Uashington, Zhan David Levit në një intervistë televizive.