Lajme

E shtune 30 gusht 2003

Përmbajtja:

• Holkeri e quan të parëndësishme për të ardhmen e Kosovës deklaratën e parlamentit serb

• Sipas një hulumtimi të Index-Kosova, 47,2 për qind e qytetarëve shqiptarë do të votonin për LDK-në

• E ardhmja e Kosovës do të përcaktohet nga vetë qytetarët e saj, ka thënë Moisiu në bisedë me Maroviqin

• Moisiu është takuar me Holkerin

• Nano: "Mund të kthehen serbët në Kosovë, por Kosova nuk mund të kthehet nën Serbi"

• Maroviq: Dialogu mënyra e vetme për zgjidhjen e problemeve në Kosovë

• AKSH merr përgjegjësinë për tri sulmet e 28 gushtit në Shkup

• Një komision i Beogradit dhe i KFOR-it kanë vizituar kufirin Kosovë-Serbi

• Forcat afgane dhe amerikane kanë rrethuar një grup luftëtarësh talibanë

• Anan bën thirrje për përmbajtje

• Irani ka shpallur tre ditë zie

• Xhorxh Bushi po jeton prej 7 javësh në kryeqytetin irakian

• Një adoleshent akuzohet për virusin Blaster

• Alister Kempbell jep dorëheqjen

Holkeri e quan të parëndësishme për të ardhmen e Kosovës deklaratën e parlamentit serb

 

Ohër, 30 gusht 2003 - Shefi i UNMIK-ut Hari Holkeri, i cili ndodhet në Ohër ku po merr pjesë në forumin "Dialogu i civilizimeve", ka deklaruar sot para gazetarëve se është e parëndësishme për të ardhmen e Kosovës deklarata e parlamentit serb. Holkeri saktësoi se e ardhmja e Kosovës do të vendoset nga këshilli i Sigurimit dhe nga askush tjetër.

I pyetur se kur do të fillojë dialogu mes Prishtinës dhe Beogradit, ai tha se nuk e di, meqë tash është duke biseduar me palën serbe dhe shqiptarët e Kosovës. Holkeri shtoi se javën e ardhshme do të fillojë një turne për të bërë konsultime, fillimisht në Moskë ku do të takohet me anëtarët e Grupit të Kontaktit dhe pastaj edhe në Bruksel.

Vetëm pas këtyre kontakteve, tha Holkri, mund të flasë se kur mund të fillojnë bisedimet mes Prishtinës dhe Beogradit.

Gjithashtu Holkeri paralajmëroi se do të kontaktojë me autoritetet maqedonase për të gjetur zgjidhje praktike për problemet e banorëve që jetojnë në zonën kufitare. Por ai tha se askush nuk do t'ia imponojë popullatës lokale që t'i shfrytëzojë vendkalimet kufitare. Holkeri theksoi se Kombet e Bashkuara dhe UNMIK-u

 

 

Sipas një hulumtimi të Index-Kosova, 47,2 për qind e qytetarëve shqiptarë do të votonin për LDK-në

 

Prishtinë, 30 gusht 2003 - Sipas një hulumtimi që ka bërë Index-Kosova, po qe se nesër do të mbaheshin zgjedhjet parlamentare në Kosovë, 47,2 për qind e qytetarëve shqiptarë të Kosovës do të votonin për LDK-në, gjë që ka shënuar ngritje për 8,9 për qind në krahasim me një anketë të realizuar në muajin mars.

 

Për PDK-në do të votonin 21,4%, ndërkaq për AAK-në 6.2%. Këto dy parti kanë shënuar rënie për 4,6% përkatësisht 1,5%.

 

 

E ardhmja e Kosovës do të përcaktohet nga vetë qytetarët e saj, ka thënë Moisiu në bisedë me Maroviqin

 

Ohër, 30 gusht 2003 - Presidenti shqiptar Alfred Moisiu shtrengoi doren dje gjatë Forumit në Ohër është takuar me Presidentin serb-malazez Svetozar Marovic.

"Rezoluta e Parlamentit serb për Kosovën është një tregues i ecjes nga e kaluara dhe destabilizues per rajonin", ka thënë Presidenti Moisiu gjatë takimti me homologun e tij Maroviq.

Moisiu ka vlerësuar rëndësinë e nisjes së dialogut mes Prishtinës dhe Beogradit, por edhe ka dënuar qëndrimet ekstremiste, të cilat sipas tij, "jane të demshme sidomos kur vijnë nga njerëz me pushtet", gjë që ul shanset e mirëkuptimit.

"Parlamenti serb mori kompetencat e Këshillit të Sigurimit të OKB-së. E ardhmja e Kosovës do të përcaktohet nga vetë qytetaret e Kosovës, në bashkëpunim e harmoni me faktorin ndërkombëtar", ka thënë Presidenti shqiptar.

Nga ana e tij, Presidenti i Serbise dhe Malit te Zi, Maroviq ka shprehur vullnetin e tij për dialog dhe bashkëpunim, duke shprehut shqetësimin për rritjen e nivelit të retorikës radikale.

 

 

Moisiu është takuar me Holkerin

 

Ohër, 30 gusht 2003 - Presidenti shqiptar Alfred Moisiu ka takuar në Ohër edhe kryeadministratorin e Kosovës, Hari Holkeri. Moisiu ka dënuar veprimet ekstremiste dhe të dhunshme të koheve te fundit, duke shtuar se "kjo nuk duhet të pengojë nisjen e shpejtë të dialogut mes Prishtinës dhe Beogradit".

"Puna për statusin dhe standardet duhet të ecin paralel, pasi çdo vonesë në përcaktimin e tij do të krijonte probleme të paparashikuara", është shprehur Moisiu në takimin e tij te parë me Holkerin.

Nga ana e tij, admnistratori Holkeri, ka vlerësuar ndihmën dhe përkrahjen e Tiranës si dhe rëndësinë e bashkëpunimit me të.

Kryeadminitratori i Kosoves ka kritikuar deklaratat e koheve të fundit dhe ka vlerësuar rëndësinë që palët të ulen në tryezën e bisedimeve, pasi statusi i Kosoves do të vijë pas arritjes së standardeve.

 

 

Nano: "Mund të kthehen serbët në Kosovë, por Kosova nuk mund të kthehet nën Serbi"

 

Tiranë, 30 gusht 2003 - Kryeministri i Shqipërisë Fatos Nano ka deklaruar në një takim me shërbimin diplomatik të vendit se zëvendëskryeministri serb Nebojsha Coviq nuk mund të fitojë elektorat me veprime të tilla ndaj Kosovës pasi rruga e saj në kontekstin e zhvillimeve aktuale rajonale dhe evropiane është tashmë e pakthyeshme.

"Mund të kthehen serbët në Kosovë, por Kosova nuk mund të kthehet nën Serbi", ka thënë Nano. Ai i ka quajtur të rëndësishme marrëdhëniet e trekëndëshit Tiranë-Prishtinë-Beograd dhe i ka parë ato të vendosura në shina të padevijueshme të integrimit euroatlantik.

Qëndrimi i Kryeministrit të Shqipërisë vjen pas kritikave në shtypin e Tiranës sipas të cilave qëndrimi diplomacisë shqiptare ndaj deklaratës për Kosovën të miratuar nga kuvendi i Serbisë ka qenë i paqartë, i vonuar dhe inferior ndaj Beogradit.

 

 

Maroviq: Dialogu mënyra e vetme për zgjidhjen e problemeve në Kosovë

 

Ohër, 30 gusht 2003 - Presidenti i Serbisë dhe i Malit të i Svetozar Maroviq ka deklaruar në Ohër se dialogu është mënyra e vetme për zgjidhjen e problemeve në Kosovë dhe se në këtë moment nuk duhet pritur hapjen e temave të mëdha, por mundësimin e jetës së qetë.

Dialogu pikësëpari i takon jetës së njerëzve në Kosovë dhe zgjidhjes së problemeve të tyre konkrete dhe duhet filluar pikërisht nga ato gjëra, ka thënë Mroviq në Ohër ku po mbahet forumi "Dialogu i civilizimeve".

 

Sipas Maroviqit, njerëzit e rinj të Kombeve të Bshkuara në Kosovë kanë një mision të vështirë për të siguruar kushte për siguri dhe kthimin e të gjihëve që janë detyruar të braktisin shtëpitë.

 

 

AKSH merr përgjegjësinë për tri sulmet e 28 gushtit në Shkup

 

Prishtinë, 30 gusht 2003 - Armata Kombëtare Shqiptare përmes një komunikate të shpërndarë përmes internetit ka marrë për sipër tri sulmet e kryera më 28 gusht në Shkup.

"Njësia speciale 'Komando' që drejtohet prej kolonel Gent Kumanovës, ka kryer tre aksione politiko-strategjiko-ushtarake kundër tre objekteve me rëndësi të pushtetit okupator dhe kolonizator sllavomaqedon, Gjykates themelore të Shkupit, bazës teknike të Qeverise antishqiptare të IRJM dhe kazermës ushtarake te "Ilindenit", thuhet në këtë komunikatë.

 

 

Një komision i Beogradit dhe i KFOR-it kanë vizituar kufirin Kosovë-Serbi

 

Beograd, 30 gusht 2003 - Një komision i përbashkët i Ministrisë së Mbrojtjes së Serbisë e Malit të Zi dhe e KFOR-it për zbatimin e marrëveshjes ushtarake teknike dhe të rezolutës së Këshillit të Sigurimit 1244 kanë bërë dje një vëzhgim të zonës tokësore dhe ajrore të sigurisë buzë kufirit Kosovë- Serbi.

 

Sipas një njoftimi nga Beogradi, vëzhgimi është bërë nga ajri, ndërkohë që janë vizituar edhe pikat dhe bazat policore.

 

 

Forcat afgane dhe amerikane kanë rrethuar një grup luftëtarësh talibanë

 

Kabul, 30 gusht 2003 – Forcat afgane dhe amerikane kanë rrethuar një grup luftëtarësh talibanë në provincën jugor Zabul pas një bombardimi ngulmues dyditor të pozicioneve të kryengritësve, ka bërë të ditur sot (e shtunë) një zyrtar i lartë, njofton Rojter.

Operacioni i gjurmimit të qindra guerilëve të ish-regjimit të përmbysur islamik ka hyrë në ditën e gjashtë dhe të pakten 12 kryengritës janë vrarë në aksionin e së premtes, kurse 8 të tjerë janë kapur, ka thënë shefi provincial i zbulimit.

 

Zyrtarët afganë thonë se mbi 100 talibanë janë zhdukur gjatë javës, shumë syresh janë vrarë nga ushtarët, aeroplanët dhe helikopterët amerikanë. Ushtria amerikane ka konfirmuar vetëm 14 raste të vrasjeve të kryengritësve.

 

 

Anan bën thirrje për përmbajtje

 

Nju Jork, 30 gusht 2003 - Sekretari i përgjithshëm i KB, Kofi Anan i ka bërë thirrje grupeve fetare dhe politike në Irak të tregojnë përmbajtje dhe të mos hakmerren pas sulmit të së premtes jashtë një xhamie në qytetin e Naxhafit ku më shumë se 80 persona humbën jetën, midis tyre edhe një nga figurat e larta politike, kleriku Ajatollah Mohamed Baqer al Hakim.

Bomba shpërtheu ndërsa ajatollahu po dilte nga Varri i Aliut pas lutjeve të së premtes duke shkatërruar fasadën e varrit dhe duke dëmtuar edhe ndërtesat përreth.

Ajatollahu Baker al Hakim u kthye në Irak pas mërgimit në Iran. Ai më pas vendosi të bashkëpunonte me autoritetet amerikane si rruga e përparimit në Irak.

Familja e tij ka fajësuar përkrahës të ish regjimit të Sadam Huseinit.

 

 

Irani ka shpallur tre ditë zie

 

Teheran, 30 gusht 2003 - Irani ka shpallur tre ditë zie për figurën klerike Ajatollahun Hakim. Duke reaguar ndaj lajmit të vrasjes së tij, zyra e Ajatollah Khameneit në Iran tha se kjo ishte prove tjetër se situata në Irak ishte e paqëndrusheme.

 

 

Xhorxh Bushi po jeton prej 7 javësh në kryeqytetin irakian

 

Bagdad, 30 gusht 2003 - Lajmet nga Bagdadi bëjnë të ditur Xhorxh Bushi po jeton prej 7 javësh në kryeqytetin irakian. Mos mendoni se presidenti Bush ka blerë ndonjë fermë në Irak. Fjala është për një tjetër Xhorxh Bush, një djalë i lindur në Bagdad më 11 korrik nga prindër të cilët thonë se falenderojnë presidentin Bush për përmbysjen e Sadam Huseinit.

 

Çifti u tha gazetarëve se të gjithë irakianët e urrejnë Sadam Huseinin dhe pa presidentin Bush ata kurrë nuk do ishin çliruar. Emri i plotë i fëmijës së tyre është Geroge Bush Abdul Faris Abed El Husein. Çifti thotë se në se do të kishin fëmijë binjakë, emri i fëmijës tjetër do të kishte qënë Toni Blair, për nder të kryeministrit britanik.

 

 

Një adoleshent akuzohet për virusin Blaster

 

Uashington, 30 gusht 2003 - FBI ka arrestuar një adoleshent në lidhje me krimbin Blaster të internetit që ka prekur qindra mijëra kompiutera në gjithë botën.

Krimbi i internetit hyn në Microsoft windows duke përdorur një defekt të software-it. Ai ka shkaktuar ndërprerje të konsiderueshme të bizneseve, organizatave dhe individëve.Xhefri Parson nuk akuzohet me shpikjen e Blasterit, por me krijimin e një varianti tjetër shkatërrues.

 

Prokurori Xhon Mekej në një konferencë për shtyp tha: "Departamanti i drejtësisë i merr këto krime seriozisht. Ne do t'i dedikojmë të gjitha burimet tona në gjetjen e atyre njerëzve që sulmojnë infrastrukturën tonë tekonlogjike."

 

 

Alister Kempbell jep dorëheqjen

 

Londër, 30 gusht 2003 - Alaster Kempbell ka dhënë dorëheqjen si Drejtor për Komunikimin dhe Strategjinë në qeverinë e kryeministrit Toni Bler. Deri tani nuk është njoftuar se kush mund ta zëvendësojë atë, ndërkohë që nuk është dhënë asnjë datë se kur mendohet që zoti Campbell të largohet.

Ai tha se ishte "një privilegj të punonte në opozitë dhe në qeveri pranë një njeriu, të cilin historia do ta kujtojë si një kryeministër të ndryshimeve të mëdha".

Copyright©2000-2003 Trepca.net - Të gjitha të  drejtat e rezervuara.