Lajme

E enjte 28 gusht 2003

Përmbajtja:

• Presidenti Rugova i dorëzoi sot Medaljen e Artë të Lidhjes së Prizrenit, albanologut të njohur Robert Elsi

• Holkeri në Mitrovicë: Të gjitha problemet dhe mospajtimet duhet zgjidhur me dialog

• Hajdaraga thotë se e ardhmja Kosovës do të vendoset nga banorët e saj

• M.Hamiti: Deklarata që ka miratuar Parlamenti i Serbisë është e pavlefshme për ne

• F.Biber: Deklarata e Kuvendit të Serbisë për Kosovën është publicitet për qëndrimet e qeverisë

• Eshtë hapur ekspozita e katër piktorëve kosovarë, të inspiruar me veprimtarinë e Nënës Tereze

• Shpërthim i minës në linjën hekurudhore Tabanoc-Shkup

• Moisiu: Ne kemi detyrimin ligjor e moral që të veprojmë në mbrojtje të drejtave të bashkëkombasve tanë

• Shpërthim i fuqishëm në qendër të Preshevës

• Kuvendi i Serbisë ka miratuar mbrëmë një deklaratë për Kosovën

• Policia maqedonase ka liruar dy policët e rrëmbyer

• Administrata e Bushit është e hapur për formimin e një force shumëkombëshe nga OKB-ja

• Nga një zjarr në Krime të Detit të Zi vdesin 6 vetë

• Të pakten 40 mijë njerëz kanë vdekur ose janë zhdukur në luftën civile në Peru

• Një punëtor ka vrarë me armë zjarri 6 punëtorë në një depo të pjesëve të makinave në Çikago

• Një ushtar britanik është vrarë, kurse një tjetër është plagosur në Irak

• Trupat indiane kanë vrarë dy militantë në një hotel në kryeqytetin e Kashmirit

• Një oficer i armatës së Nepalit, i plagosur nga kryengritësit maoistë, ka vdekur në spital

• Shtëpia e Bardhë nuk e përfilli thirrjen e Arafatit për ndërprerjen e sulmeve

• Bisedimet 6 palëshe rreth programit bërthamor të Koresë së Veriut rifillojnë sot në Pekin

• Programi berthamor i Iranit

• Vidhet nje pikturë e Da Vinçit

Presidenti Rugova i dorëzoi sot Medaljen e Artë të Lidhjes së Prizrenit, albanologut të njohur Robert Elsi

 

Prishtinë, 28 gusht 2003 - Presidenti i Kosovës Ibrahim Rugova, në një ceremoni rasti në rezidencën e tij, i dorëzoi sot Medaljen e Artë të Lidhjes së Prizrenit, albanologut të njohur Robert Elsi, të cilin e ka dekoruar më 10 qershor të këtij viti me rastin e 125-vjetorit të Lidhjes Shqiptare të Prizrenit. Në arsyetimin e Presidentit Rugova për ta dekoruar zotin Elsi thuhet: "Nga Presidenti i Kosovës dekorohet me Medaljen e Artë të Lidhjes së Prizrenit profesor Robert Elsi, për kontributin e dhënë për afirmimin e letërsisë, të historisë dhe të kulturës shqiptare në botë, për përkthimet e thesarit letrar shqiptar në anglisht, si dhe për afirmimin e Lëvizjes demokratike të Kosovës për liri e pavarësi në vitet '90".

 

Robert duke u falenderuar për dekoratën që mori tha se ky është një nder i madh për të dhe shprehu kënaqësinë për takimin me Presidentin Rugova.

Robert Elsi tha se po punon parreshtur në afirmimin e kulturës dhe të letërsisë shqiptare në botë dhe bëri të ditur se shpejti do të botojë një antologji të tregimeve bashkëkohore shqiptare.

 

Poashtu ai tha se ka në duar një libër të leksikut historik për Shqipërinë, i cili do të botohet në Amerikë, disa vëllime poetike të letërsisë shqipe të Kosovës etj.

Robert Elsi ia dhuroi Presidentit Rugova një leksikon të posabotuar të mitologjisë dhe kulturës shqiptare.

 

 

Holkeri në Mitrovicë: Të gjitha problemet dhe mospajtimet duhet zgjidhur me dialog

 

Mitrovicë, 28 gusht 2003 - Kryeadministratori i ri i Kosovës, Hari Holkeri, gjatë vizitës të sotëm në Mitrovicë deklaroi se të gjitha problemet dhe mospajtimet duhet zgjidhur me dialog. Në këtë aspekt edhe problemi i Mitrovicës mund të zgjidhet vetëm nëse njerëzit e këtueshëm komunikojnë me njëri tjetrin, tha ai.

 

Kjo është vizita e parë që Holkeri e bën jashtë Prishtinës dhe si duket qyteti i ndarë i Mitrovicës do të jetë një ndër prioritetet e politikës së tij.

Holker theksoi se dhuna sjell vetëm dhunë, duke u bërë thirrje të gjithë qytetarëve të Mitrovicës që të heqin dorë nga aktet e dhunshme, të clat e shkatërrojnë të ardhmen e tyre. "Dialogu dhe pajtimi janë çelsi kryesor me të cilin ne duhet të punojmë në mënyrë që ecim përpara dhe që Mitrovica të jetë një qytet stabil e normal evropian", nënvizoi Holkeri.

 

Ai shtoi se administrata e UNMIK-ut po punon me të dyja komunitetet, shqiptare dhe serbe, që në Mitrovicë të krijohet një mjedis i qetë, duke u bërë thirrje edhe njeherë qytetarëve të dyja komuniteteve që të mos provokojnë njëri tjetrin, në mënyrë që siguria të mos jetë e bazuar vetëm me praninë e policisë dhe ushtrisë. Siguria, tha ai, mund të arrihet me ndihmesën e çdo qytetari të Mitrovicës.

 

 

Hajdaraga thotë se e ardhmja Kosovës do të vendoset nga banorët e saj

 

Tiranë, 28 gusht 2003 - Zv/ministri i Punëve të Jashtme, Luan Hajdaraga, deklaroi se "e ardhmja Kosovës do të vendoset nga banorët e Kosovës dhe bashkësia ndërkombëtare, në momentin e duhur". Çështja e Kosovës ka hyrë në një fazë të re dhe me zhvillime progresive, tha ai.

"Ne kemi ndjekur me shqetësim problematikën e krijuar nga debate mbi kornizën kushtetuese të shtetit Serbi dhe Mal i Zi dhe kemi shprehur qëndrimin tonë se kjo çështje nuk duhet kthyer në një handikap për marrëdhëniet mes Prishtinës dhe Beogradit.

 

Statusi i ardhshëm i Kosovës nuk është pjesë e debatit të momentit, por e së ardhmes", tha Hajdaraga në takimin e djeshëm me titullarët e përfaqësive diplomatike dhe konsullore të Shqipërisë në botë.

 

 

M.Hamiti: Deklarata që ka miratuar Parlamenti i Serbisë është e pavlefshme për ne

 

Prishtinë, 28 gusht 2003 - Pas miratimit të së ashtuquajturës "Deklaratë për Kosovën..." në Kuvendin e Serbisë, zëdhënësi i presidentit Rugova, Muhamet Hamiti, ka bërë një deklaratë zyrtare lidhur me këtë akt të politikës serbe.

"Kjo që po ndodh në Beograd është politikë e njohur, politikë e vjetër serbe. Deklarata që ka miratuar të mërkurën Parlamenti i Serbisë është e pavlefshme për ne. Ajo nuk mund të prek në rendin juridik-kushtetues të Kosovës", thotë Hamiti.

Populli i Kosovës, thotë më tej ai, e ka përcaktimin e palëkundur për pavarësi. "Institucionet e vendit tonë janë duke punuar për ta realizuar këtë vullnet. Institucionet e Kosovës do të reagojnë në momentin e duhur ndaj pretendimeve të Beogradit, të cilat tashti po marrin formë zyrtare", tha ai.

"Në rrethanat aktuale lëvizjet serbe në Beograd do t'i vështirësojnë, ndoshta do t'i bëjnë edhe të pamundshme çfarëdo bisedash me Beogradin". zëdhënësi i Presidentit të Kosovës, Muhamet Hamiti, duke komentuar deklaratën e Beogradit për Kosovën.

 

 

F.Biber: Deklarata e Kuvendit të Serbisë për Kosovën është publicitet për qëndrimet e qeverisë

 

Pragë, 28 gusht 2003 - Florian Biber, ekspert pranë Qendrës Evropiane për Pakicat, thotë se deklarata e Kuvendit të Serbisë për Kosovën është publicitet për qëndrimet e qeverisë. "Nuk ka dicka të re lidhur me përmbajtjen e saj.

 

Mendoj se më së shumti kjo ka të bëjë me përpjekjet e qeverisë për të fituar sa më shumë mbështetje brenda vetë Serbisë për politikën e qeverisë; të fitojë ndoshta deri diku dhe një mbështetje nga partitë e tjera politike, pse jo dhe nga ato të opozitës", tha Biber radion "Evropa e lirë", duke shtuar se nuk sheh ndonjë ndryshim krahasuar me politikat e mëparshme të qeverisë.

"Thelbi është se kjo deklaratë apo ky qëndrim i qeverisë është me vlera vetëm për shfrytëzim të brendshëm, për përkrahje më të madhe brenda dhe duket sikur pasqyron shqetësimet e bashkësisë serbe në Kosovë, ndaj nga kjo pikëpamje është shumë kundërshtuese dhe brenda vetë segmenteve të politikës apo parlamentit në Serbi", thotë Biber.

 

 

Eshtë hapur ekspozita e katër piktorëve kosovarë, të inspiruar me veprimtarinë e Nënës Tereze

 

Prishtinë, 28 gusht 2003 - Në kuadër të "Ditëve përkujtimore – Nëna Tereze 2003", në Galerinë e Arteve të Kosovës është hapur ekspozita e katër piktorëve kosovarë, të inspiruar me veprimtarinë e Nënës Tereze, dhe është emërtuar "Ikona e përjetësisë".

Ekspozitën e krijuesve Gjelosh Gjokaj, Eshref Qahili, Veli Blakqorri dhe Ismet Fazliu, e cila u organizua në kuadër të “Ditëve përkujtimore – Nëna Tereze 2003”, që do të mahen deri më 5 shtator, e hapi don Lush Gjergji.

Në katalogun e ekspozitës, drejtori i Galerisë së Arteve, Luan Mulliqi, ndër të tjera, shkruan: “Në historinë e njerëzimit kanë hyrë shumë personalitete për kontributet e tyre konkrete dhe të prekshme në fushën e shkencës, artit, politikës...

 

Nëna Tereze është i vetmi personalitet që u shndërrua në ikonë të kohës me diçka që nuk preket as nuk shihet, me diçka të veçantë, e cila është në brendinë e secilit njeri”.

Ekspozita “Ikona e përjetësisë”, në Galerinë e Arteve, do të qëndrojë e hapur për dy javë.

 

 

Shpërthim i minës në linjën hekurudhore Tabanoc-Shkup

 

Kumanovë, 28 gusht 2003 - Treni i pasagjerëve që qarkullon në relacionin Tabanoc-Shkup, mbrëmë afër fshatit Reçicë shkeli në minë të vendosur, ka bërë të ditur Ministria maqedonase e Punëve të Brendshme në Shkup. Gjatë shërthimit është dëmtuar vetëm shina hekurudhore. Trafiku ishte ndërprerë deri në orët e mëngjesit.

 

 

Moisiu: Ne kemi detyrimin ligjor e moral që të veprojmë në mbrojtje të drejtave të bashkëkombasve tanë

 

Tiranë, 28 gusht 2003 - Presidenti i Shqipërisë Alfred Moisiu thotë se Shqipëria dhe faktori shqiptar vazhdojnë të luajnë një rol aktiv në ndërtimin e një klime të re mirëkuptimi dialogu dhe bashkëpunimit mes vendeve të rajonit.

"Shteti shqiptar përkrah çdo nismë që i shërben ndërtimit të paqes dhe stabilitetit në rajon", tha presidenti Moisiu. "Ne kemi qenë iniciatorë të disa nismave të rëndësishme rajonale, si ajo e bashkëpunimit shqiptar-kroat e maqedon në kundër të NATO-s, e nismës së vendeve të Korridorit 8, etj.

 

Njëkohësisht, ne nuk jemi pajtuar dhe nuk do të ndryshojmë qëndrim ndaj të gjithë përpjekjeve nacionaliste që kërkojnë ta mbajnë peng të sotmen dhe të ardhmen e rajonit", nënvizoi ai. "Ne kemi qenë e jemi për miqësi e bashkëpunim të gjithanshëm me të gjitha vendet rajonale, përfshirë edhe Serbinë e Malin e Zi", shtoi më tej Moisiu.

 

"Ky përcaktim nuk na pengon të jemi po kaq të vendosur kundër projekteve destabilizuese dhe provokuese të disa politikanëve me reminishenca të së kaluarës. Ne kemi detyrimin ligjor e moral që të veprojmë në mbrojtje të drejtave të bashkëkombasve tanë, në përputhje edhe me konventat ndërkombëtare", - tha presidenti Moisiu.

 

 

Shpërthim i fuqishëm në qendër të Preshevës

 

Preshevë, 28 gusht 2003 - Mbrëmë pas mesnatës në qendër të Preshevës, vetëm njëqind metra përballë Kuvendit komunal, u dëgjua një shpërthim i fuqishëm. Sipas njoftimeve, të lënduar nuk ka, por shpërthimi ka shqetësuar qytetarët e Preshevës.

Ky është shpërthimi i dytë brenda një jave në Preshevë.

 

 

Kuvendi i Serbisë ka miratuar mbrëmë një deklaratë për Kosovën

 

Beograd, 28 gusht 2003 - Kuvendi i Serbisë, me mbështetjen e partive në pushtet dhe në opozitë, ka miratuar mbrëmë një deklaratë në të cilën thuhet se Kosova është "pjesë e pandashme e Serbisë" dhe se "sovraniteti shtetëror dhe integriteti territorial i Serbisë shtrihet edhe në Kosovë pa marrë parasysh adminsitrimin e përkohëshëm ndërkombëtar".

Gjatë debatit, kryeministri Zoran Zhivkoviq, një nga hartuesit e kësaj deklarate, ka thënë se Serbia nuk mund të bëjë vetë zgjidhje të përhershme për Kosovën dhe se çfarëdo zgjidhje duhet ta mbështesë bashkësia ndërkombëtare, para së gjithash Bashkimi Evropian dhe Shtetet e Bashkuara.

 

 

Policia maqedonase ka liruar dy policët e rrëmbyer

 

Shkup, 28 gusht 2003 - Forcat policore të Maqedonisë kanë arritur të lirojnë dy policët e zënë dje peng afër Likovës nga Avdyl Jakupi i njohur me pseudonimin "Çakalla". Gjatë aksionit thuhet se nuk ka pasur viktima as të lënduar.

Forcat e ministrisë së Brendshme kishin ndërmarrë një operacion të gjerë në fshtrat rreth Tanushës për lirimin e policëve të rrëmbyer. Avdyl Jakupi kishte kërkuar më parë nga autoritetet e Maqedonisë që të lironin dy persona, Ali Ajetin dhe Sulejman Sulejmanin, të arrestuar më herët lidhur me një sulm me bomba në Kumanovë, që ai të lironte dy policët.

 

 

Administrata e Bushit është e hapur për formimin e një force shumëkombëshe nga OKB-ja

 

Uashington, 28 gusht 2003 – Administrata e Bushit tash është e hapur për formimin e mundshëm të një force shumëkombëshe të mbështetur nga Kombet e Bashkuara nëse do të jetë e udhëhequr nga një komandant amerikan, ka thënë një zyrtar i lartë i Departmentit të Shtetit, njofton AP.

 

Ndihmëssekretari i Shtetit, Riçard Armitixh, ka bërë të ditur se kjo ide është nga shumë sosh që janë shqyrtuar nga administrata në përpjekje për të zgjidhur çështjen e dhunës së vazhdueshme në Irak që kur presidenti Bush i ka shpallur të përfunduara operacionet e mëdha luftarake në Irak.

 

Armitixh i ka bërë këto komente dje në një intervistë me një gazetë rajonale amerikane, kurse sot (e enjte) teksti është vënë në dispozicion nga Departmenti i Shtetit.

 

 

Nga një zjarr në Krime të Detit të Zi vdesin 6 vetë

 

Krime, 28 gusht 2003 - Të paktën gjashtë persona kanë humbur jetën dhe 16 të tjerë janë lënduar nga zjarri që ka shërthyer sot në pushimoren e njohurn ukraianase të Detit të Zi, në Krime. Zjarri ka shpërthyer sot herët në mëngjes në një hotel në vendin e quajtur Morske Sadaka, në të cilin në atë moment ndodheshin 50 mysafirë. Në mesin e të vdekurve ndodhen edhe dy fëmijë, njofton AP.

 

 

Të pakten 40 mijë njerëz kanë vdekur ose janë zhdukur në luftën civile në Peru

 

Lima, 28 gusht 2003 – Të pakten 40 mijë njerëz kanë vdekur ose janë zhdukur në Peru ndërmjet viteve 1980 dhe 2000, thuhet në një raport të publikuar nga një Komision i mirëbesimit dhe pajtimit të Perusë, njofton BBCworld.

 

Hulumtimet dyvjeçare për dhunën gjatë sulmeve shtetërore në kryengritësit e krahut të majtë do t'i dorëzohen presidentit Toledo në Limë. Raporti thotë se shumica e viktimave në luftën civile të Perusë besohet të jenë nga komunitetet indigjene, që ishin pre e luftimeve ndërmjet trupave qeveritare dhe forcave kryengritëse.

 

 

Një punëtor ka vrarë me armë zjarri 6 punëtorë në një depo të pjesëve të makinave në Çikago

 

Çikago, 28 gusht 2003 – Një punëtor ka vrarë me armë zjarri 6 punëtorë të tjerë në një depo të pjesëve të makinave në Çikago dhe pastaj ka refuzuar të dorëzohet, kështu që policia është detyruar ta vrasë, njofton Rojter. Vrasësi është identifikuar të jetë Salvador Tapia, 36-vjeçar, i cili ishte larguar nga puna 6 muaj më parë për punë të dobët. Ai në kohë të fundit iu kishte kërcënuar nëpërmjet telefonit njërit naga pronarët e depos.

 

 

Një ushtar britanik është vrarë, kurse një tjetër është plagosur në Irak

 

Bagdad, 28 gusht 2003 – Një ushtar britanik është vrarë sot (e enjte), kurse një tjetër është plagosur në një sulm të një turme të irakianëve të armatosur, të cilët kanë hapur zjarr me granata raketore dhe armë të vogla në një patrullë, ka bërë të ditur ushtria britanike, njofton Rohjter.

 

Ushtarët, që kishin dalë nga automjeti i tyre, janë konfrontuar me një turmë prej rreth 30 irakianësh, ndërsa një turmë tjetër po u afroheshin prapa atyre.

 

Zëdhënësi i ushtrisë ka thënë se në këtë incident janë arrestuar 10 irakianë, kurse patrulla ushtarake është kthyer në bazë nën mbrojtjen e eskortës ajrore. Ky sulm sjell në 11 numrin e ushtarëve të vrarë britanikë në luftime që kur Uashingtoni e ka deklaruar të përfunduar luftën në Irak.

 

 

Trupat indiane kanë vrarë dy militantë në një hotel në kryeqytetin e Kashmirit

 

Srinagar, 28 gusht 2003 – Trupat indiane kanë vrarë sot (e enjte) dy militantë në një hotel në kryeqytetin e Kashmirit, Srinagar, njofton Rojter. Ata janë vrarë pas një lufte të gjatë natën, që koincidoi me arritjen e kryeministrit Atal Behari Vaxhpaji.

 

Po kështu, njoftohet se tre persona të tjerë, ndër të cilët edhe një ish-ligjvënës shteti, janë vrarë në një shkëmbim zjarri rreth tri mila nga ndërtesa, ku Vaxhpaji dhe ministrat kryesorë të shtetit po mbanin një miting, në të cilin zotoheshin për rikthimin e normalitetit në Kashmirin indian.

 

Policia ka thënë se trupi i njërit militant është gjetur i vdekur në hotel, kurse trupin e tjetrit militant po e kërkojnë ende, ngase dihet se gjatë natës kanë qenë dy militantë.

 

Njoftohet se përkundër incidenteve në Kashmir dhe në Bombej, ekspertët indianë dhe pakistanezë po vazhdojnë qe dy ditë bisedimet në Islamabad përkitazi me rivënien e lidhjeve ajrore, të cilat qenë ndërprerë që nga viti 2001.

 

 

Një oficer i armatës së Nepalit, i plagosur nga kryengritësit maoistë, ka vdekur në spital

 

Katmandu, 28 gusht 2003 – Një oficer i armatës së Nepalit ka vdekur sot (e enjte) në spital pasi ishte qëlluar nga kryengritësit maoistë një ditë pasi ishin tërhequr nga bisedimet paqësore dhe kishin thënë se ata do t’i jepnin fund armëpushimit 7-mujor, njofton Rojter. Oficeri ishte qëlluar me armë zjarri në shtëpinë e tij në zonën banuese mbi tregun të kryeqyutetit Katmundu.

 

Ai ishte oficeri më i lartë i armatës i vrarë që kur ka filluar më 1996 kryengritja e maoistëve. Po kështu, njoftohet se edhe një tjetër oficer i plagosur nga maoistët po shëtrohet në spital. Deri tash askush s’e ka marrë përgjegjësinë për këtë incident.

 

 

Shtëpia e Bardhë nuk e përfilli thirrjen e Arafatit për ndërprerjen e sulmeve

 

Uashington, 28 gusht 2003 - Zëdhënësja e Shtëpisë së Bardhë, Kler Bukan tha se është shumë më e rëndësishme që palestinezët të shkatërrojnë grupet terroriste dhe rrjetin e tyre. Ajo shtoi se zoti Arafat nuk ishte pjesë e procesit të paqes.

 

Një hap kyç për zbatimin e planit të paqes është që forcat palestineze të sigurimit të vihen nën kontrollin e kryeministrit Mahmud Abaz. Në thirrjen e tij ndaj grupeve të armatosura, zoti Arafat u kërkoi atyre t'i japin planit ndërkombëtar të paqes një rast duke rivendosur armëpushimin.

 

 

Bisedimet 6 palëshe rreth programit bërthamor të Koresë së Veriut rifillojnë sot në Pekin

 

Pekin, 28 gusht 2003 - Bisedimet 6 palëshe mbi mosmarrëveshjen rreth programit bërthamor të Koresë së Veriut rifillojnë sot në Pekin pas një seance fillestare gjatë së cilës nuk u bë ndonjë përparim diplomatik. Shtetet e Bashkuara thanë dje se bisedimet me të dy Koretë, Rusinë, Japoninë dhe Kinën shënojnë fillimin e procesit.

 

Një zëdhënës i departamentit të Shtetit gjithashtu konfirmoi se delegacionet e Shteteve të Bashkuara dhe Koresë së Veriut u takuan drejtpërdrejt për shkëmbime jozyrtare siç u shpreh ai. Zëdhënësi shtoi se bisedime të tjera të ngjashme mund të zhvillohen gjatë periudhës tre ditëshe të bisedimeve.

 

Shtëpia e Bardhë nuk i kushtoi rëndësi këtij takimi duke thënë se administrat e presidentit Bush është e angazhuar për të diskutuar mbi këtë çështje në një plan të shumëanshëm.

 

 

Programi berthamor i Iranit

 

Teheran, 28 gusht 2003 - Irani thotë se gjurmët e uraniumit të pasuruar të gjetura nga inspektorët ndërkombëtarë në centralin bërthamor në Natanz janë si rezultat i pajisjeve të ndotura të cilat janë blerë në Pakistan.

 

Më parë Irani kishte këmbëngulur se centrali bërthamor ishte ndërtuar pa ndihmën e huaj. Pakistani ka mohuar se e ka furnizuar Iranin me teknologji bërthamore. Ndërkohë Shtetet e Bashkuara paraqitën përsëri kundërshtimet e tyre para zyrtarëve rusë lidhur me ndihmën e Moskës për programin bërthamor të Iranit.

 

 

Vidhet nje pikturë e Da Vinçit

 

Edinburg, 28 gusht 2003 - Policia skoceze thotë se persona që u paraqitën si vizitorë në një kështjellë në Skocinë jugore kanë vjedhur një pikturë të tepër të çmueshme të Leonardo da Vinçit.

 

Autoritetet thonë se hajnat hynë dje si vizitorë në kështjellën Drumlanrig duke marrë pikturën nga një sallë e hapur për publikun. Policia thotë se po kërkojnë për katër persona që ishin parë duke ngarë një makinë të bardhë për rreth kështjellës në kohën që ndodhi vjedhja.

 

Ekspertët besojnë se Da Vinçi e përfundoi këtë pikturë midis vittit 1500 dhe 1510. Vlera e pikturës në të cilën paraqitet Shën Maria, llogaritet të ketë një vlerë prej rreth 47 milionë dollarësh. Në kështjellën Drumlanrig në Skocinë jugore ruhen edhe kryevepra të piktorëve të tjerë të njohur si Rembrand dhe Holbein.

Copyright©2000-2003 Trepca.net - Të gjitha të  drejtat e rezervuara.