E mërkure 27 gusht 2003

27.08.2003 - Trepca.net

Lajme

E mërkure 27 gusht 2003

Përmbajtja:

Presidenti Rugova: Nënën Shqiptare, Nëna Tereze e ngriti në nivel të nënës së njerëzimit
Presidenti Rugova priti pjesëmarrësit e Seminarit Ndërkombëtar të Gjuhës, Letërsisë dhe Kulturës Shqiptare
Presidenti Rugova tha se duhet avancuar procesin e integrimit të qytetit të Mitrovicës
Kryeparlamentari Daci në shtator do të ketë një vizitë në Gjermani
Kaming hedh poshtë akuzat e Çoviqit¨
Sipas Dacit, Kosova është e sigurt, madje më shumë se disa vende nga më të zhvilluara në Evropë
Holkeri për fillimin sa më të shpejtë të bisedimeve për ndërmjet Prishtinës dhe Beogradit
Plagoset me armë zjarri një serb në Biçë të Klinës
Në Llaushë të Skënderajt është arrestuar Liman Geci
Miratohet Udhëzimi administrativ mbi autorizimin e përkohshëm për produktet medicinale në Kosovë
Në Gjermani botohet një libër me poezi shqip e gjermanisht i Dashnim Hebibit
Në manifestimet e sotme religjioze në Indi kanë humbur jetën 39 vetë
Marsi është larg Tokës në distancën e saj më të shkurtër
Arafat thotë se ai është i gatshëm të ndërmarrë aksion kundër grupeve militante nëse Izraeli ndalë sulmet
Të pakten 25 vetë janë vrarë një festival religjiioz në Indi
Një zyrtar i lartë i administratës ruse në Kaukaz është vrarë me një shpërthim bome në veturë e tij
Dy policë irakianë dhe dy civilë janë vrarë gjatë një shkëmbim zhjarri me disa hajna në Bagdad
Një ushtar amerikan është plagosur në luftimet me forcat talibane në Afganistan
Të paktën 20 vetë janë vrarë nga një shpërthim në Kinë
Kryeministri Abaz dënon sulmin e djeshëm izraelit me helikopterë
Presidenti Bush mbron vazhdimin e pranisë së Shteteve të Bashkuara në Irak
Lufta kunder bandave kriminale në Irak
Fillojnë në Pekin bisedimet për krizën në Korenë Veriore
Sekretari britanik i Mbrojtjes para komisionit hetues

Presidenti Rugova: Nënën Shqiptare, Nëna Tereze e ngriti në nivel të nënës së njerëzimit

Prishtinë, 27 gusht 2003 - Mbrëmë në Teatrin Kombëtar në Prishtinë filluan solemnisht "Ditët përkujtimore të Nënës Tereze - 2003", manifestim ky tradicional që do të zgjasë një muaj.

Duke folur në hapjen solemne të këtij manifestimi, Presidenti i Kosovës Ibrahim Rugova tha se “Ditët përkujtimore Nëna Tereze tashmë është bërë një manifestim tradicional i gjithë Kosovës dhe i botës shqiptare.

"Me këtë manifestim në mënyrë aktive, përmes takimeve e veprave të ndryshme, ne i realizojmë dhe i bëjmë më të fuqishme mesazhet e Nënës Tereze për dashuri dhe mirësi midis nesh dhe midis njerëzve.

Këto janë mesazhe apo porosi sublime që kishte fuqi t'i bënte vetëm Nëna Tereze, e cila gjithë jetën dhe veprën e saj ia kushtoi kombit të vet dhe gjithë njerëzimit", theksoi presidenti Rugova.

Ndërkaq duke folur për figurën e humanistes së madhe shqiptare ai tha se "Nëna Tereze është një shembull tipik i Nënës Shqiptare, që me virtytet e dashurisë dhe të mirësisë, që e karakterizojnë historikisht nënën tonë, u bë shembull i Nënës së njerëzimit, Nënë universale, e dashur dhe e nderuar nga e gjithë bota.

Nënën Shqiptare, Nëna Tereze e ngriti në nivel të nënës së njerëzimit – të nënës universale që është shërbimi më i madh që i ka bërë kombit tonë dhe botës mbarë".

Në vazhdim të fjalësë tij Presidenti tha se "Nëna Tereze e ngriti në nivel universal kulturën e dashurisë, kulturën e mirësisë, kulturën e kujdesit për njeriun, kulturën e solidaritetit përmes ndihmës, që janë burim i filozofisë së saj humaniste. Si të gjithë njerëzit e mëdhenj, Nëna Tereze e bëri këtë me përcaktim të qartë të filozofisë së përkushtimit dhe sidomos me punë e veprime praktike me njerëzit".

"Manifestimi ynë, sivjet bëhet edhe më i fuqishëm dhe më i ndritur, sepse po mbahet në prag të shenjtërimit të Nënës Tereze, që do të bëhet nga Ati i Shenjtë Papa Gjon Pali II.

Kështu kombi ynë dhe njerëzimi do të ketë një Nënë të Shenjtë, pra Të Shënjtën Nënë Tereze. Ky akt i shenjtërimit do të jetë përjetësim i jetës dhe i veprës së Nënës Tereze.

Do të jetë përjetësimi i dashurisë, i mirësisë dhe i paqes, që përbëjnë filozofinë e veprimit të Nënës Tereze", nënvizoi në fund të fjalës së tij, Presidenti Rugova, duke shpallur të hapur manifestimin “Ditët përkujtimore Nëna Tereze” me fjalët:
"Zoti e bekoftë Nënën Tereze, siç e ka bekuar përgjithmonë.

Zoti e bekoftë popullin shqiptar! Zoti e bekoftë Kosovën".

Ndërkaq duke folur në këtë manifestimin, biografi më i mirë i Nënës Tereze dom Lush Gjergji tha se "nëna jonë gjeti një pikë të palëvizshme në Zotin, dashurinë dhe vëllain – njeri. Mu në kohën kur mbizotëronte urrejtja, lufta, ndarjet dhe përçarjet në botë mes të pasurve pakicë dhe të varfërve shumicë", tha ai.

Dom Lushi tha se Nëna Tereze veproi me dashuri dhe për dashuri dëshmoi bindshëm, duke shërbyer në Indi dhe vende të tjera të botës, për të ndihmuar të varfërit.

Ministri i Kulturës, Behxhet Brajshori, bëri të ditur, ndërkaq, se manifestimi përkujtimor “Nëna Tereze 2003” mbahet edhe në Mal të Zi dhe në Maqedoni.

"Nuk kemi se si të mos lumturohemi me ndjenjën që ajo i solli popullit shqiptar. Nuk kemi se si të mos mbajmë mend se Nëna Tereze simbolizon dashurinë dhe përkushtimin në shkallë botërore, duke personifikuar vuajtjen e adhurimit, të vdekjes dhe të dhembjes dhe frymëzimin për njerëzimin", tha ministri Brajshori.

Në këtë manifestim i pranishëm ishte dhe kryetari i Kuvendit të Kosovës, Nexhat Daci dhe shumë personalitete të tjera.
Manifestimi “Ditët përkujtimore Nëna Tereze 2003” mbahet nën patronatin e presidentit të Kosovës, Ibrahim Rugova dhe do të zgjasë deri më 5 shtator 2003.


Presidenti Rugova priti pjesëmarrësit e Seminarit Ndërkombëtar të Gjuhës, Letërsisë dhe Kulturës Shqiptare


Presidenti Rugova u foli shkurtimisht seminaristëve edhe për gjendjen në Kosovë, për zhvillimet ekonmike, integrimin e grupeve etnike në shoqërinë e Kosovës dhe për bashkëpunimin e institucioneve të Kosovës me UNMIK-un dhe KFOR-in.
Presedenti Rugova tha se seminaristëve do t'u sigurohen kushte sa më të mira që kultura dhe historia e popullit shqiptar të jetë sa më afër tyre, dhe i përgëzoi ata për kontributin që kanë dhënë në studimin e kulturës dhe historisë shqiptare.


Presidenti Rugova tha se duhet avancuar procesin e integrimit të qytetit të Mitrovicës

Prishtinë, 27 gusht 2003 - Presidenti i Kosovës Ibrahim Rugova priti sot në një takim kryetarin e komunës së Mitrovicës, Faruk Spahija, i cili e njoftoi Presidentin me situatën aktuale në Mitrovicë. Por integrimi i qytetit të Mitrovicës dhe kthimi i të shpërngulurve në këtë qytet ishin temat për të cilat u bisedua më së shumti në këtë takim.
Në një deklaratë për media Presidenti Rugova vlerësoi se në Mitrovicë është bërë një progres, por ka edhe shumë punë për t'u bërë. "Këtë punë duhet ta bëjmë së bashku me UNMIK-un që të avancojmë procesin e integrimit të qytetit të Mitrovicës, qarkullimin e lirë, pra një integrim administrativ, por duhet duhet bërë përpjekje edhe në planin e integrimit ekonomik të qytetit", tha Presidenti Rugova pasi që kishte dëgjuar brengat e kryetarit të Mitrovicës, të cilat janë reale.

Dëshira të kryetarit të qytetit dhe të udhëheqjes së Mitrovicës janë që të avancohet procesi i integrimit të Mitrovicës që është në të mirë të të gjithë qytetarëve të saj. Presidenti me këtë rast u bëri apel qytetarëve që të bashkëpunojnë me institucionet e qytetit dhe me ato e Kosovës.
Faruk Spahija tha se e kishte informuar Presidentin për shqetësimet e qytetarëve të Mitrovicës me theks të veçantë për problemin e të zhvendosurve.
"Kujtoj që do të jemi njëzëri që edhe me zotin Holkeri këtë çështje ta ngrisim në nivelin çfarë e meriton, sepse është absurde që pas pesë viteve të kemi të zhvendosur brenda Kosovës dhe jo vetëm shqiptarë, por edhe pjesëtarë të minoriteteve". Zoti Spahija u shpreh se është e mundur një dinamikë optimale që kjo çështje të shtrohet në një afat sa më të shkurtër për t'u zgjidhur hallet e atyre njerëzve.


Kryeparlamentari Daci në shtator do të ketë një vizitë në Gjermani

Prishtinë, 27 gusht 2003 - Përgatitjet për fillimin e dialogut Prishinë – Beograd ishin temë qendrore e takimit të sotëm të kryeparlamentarit Nexhat Daci, me shefin e Zyrës Gjermane në Prishtinë, z. Peter Rondorf. Zoti Rondorf theksoi në këtë takim se bisedimet e para do të fillojnë në Bruksel, kurse faktor kryesor do të jetë Solana.
Duke i bërë një vështrim ngjarjeve të fundit në Serbi, kryeparlamentari Daci tha se "ato na kanë mbështetur për muri dhe do të na detyrojnë të reagojmë, kuptohet jo me forcë, por në mënyrë demoktratike". Reagimet serbe, tha Daci, nuk po ndryshojnë nga ato të regjimit të Milosheviqit.

Deri në fund të vitit duhet pasur një vizion të qartë për Kosovën, sepse në të kundërtën qytetarët do të humbin besimin në institucione, ndaj zgjedhjet e ardhshme mund të dështojnë, sepse qytetarët nuk do të votojnë nëse nuk shohin progres evident, nëse nuk kanë vizion të qartë të ecjes përpara.
Profesor Daci theksoi se unë nuk është kundër Evropës, por sa herë që përtërihet memorja shihet se nuk ka pasur zgjidhje të problemeve në rastet kur nuk ka ekzistuar përkrahja e kontributi amerikan, meqë Evropa nuk ka pasur referenca të duhura për zgjidhjen e problemeve të mëdha.
Z. Rondorf nga ana e tj vuri theksin në domosdoshmërinë e forcimit të marrëdhënieve me fqinjët, në këtë vështrim edhe me Serbinë, sepse një ditë do të jemi së bashku në Bruksel, tha ai.
Rondorf pas këtij takimi theksoi se u bisedua për prioritetet gjatë muajve të ardhshëm. Ai paralajmëroi se kryeparlamentari Daci në shtator do të shkojë në vizitë në Gjermani dhe do të diskutojë për këto çështje. Ndërkaq, duke folur rreth disa zhvillimeve aktuale në Serbi, z. Rondorf theksoi se qëndrimi i Qeverisë së Gjermanisë dhe i Bashkësisë Evropiane është i qartë.

"Ne gjithnjë e kemi theksuar se ajo që ndodh në Beograd nuk ka efekt, apo pasoja për Kosovën. Qeveria gjermane e di si reagon Beogradi për këto gjëra", tha Rondorf, duke shtuar se Serbia shihet në Evropë me sy tjetër, ndryshe nga ajo që është parë para katër vjetëve. "Nëse njërëzit këtu thonë se Serbia nuk ka ndryshuar, ne nuk e kemi këtë mendim", pohoi z. Rondorf pas takimit me Dacin.


Kaming hedh poshtë akuzat e Çoviqit¨

Vjenë, 27 gusht 2003 - Gjenerali Endrju Kaming, i cili në kuadër të UNMIK-ut është i ngarkuar për mbikqyrjen e Trupave Mbrojtëse të Kosovës, ka hedhur poshtë akuzat e nënkryetarit të qeverisë serbe Nebojsha Çoviq se TMK ka organizuar fshehjen e ish-lufëtarëve të UÇK-së dhe AKSH-së.

Kaming i ka deklaruar agjencisë austriake të lajmeve APA se deri më tash nuk prova për involvimin e anëtarëve të TMK-së në sulmet që kanë ndodhur gjatë javëve të kaluara. Ai ka thënë se UNMIK-u ka filluar hetimet kundër shtatë eprorëve të lartë të TMK-së, por jo se ata i takojnë AKSH-së.


Sipas Dacit, Kosova është e sigurt, madje më shumë se disa vende nga më të zhvilluara në Evropë

Prishtinë, 27 gusht 2003 - Çështja e sigurisë në Kosovë, kthimi i të zhvendosurve, çështja e të zhdukurve, përgatitjet për fillimin e bisedimeve me Beogradin, si dhe zhvillimi ekonomik i Kosovës, ishin tema qendrore të takimit të sotëm të kryeparlamentarit të Kosovës Nexhat Daci me shefin e ri të UNMIK- ut, Harri Holkerin. Në këtë vështrim u konstatua se është e nevojshme që në të gjitha këto procese të inkuadrohen më shumë vendasit.
Kryeparlamentari Nexhat Daci theksoi me këtë rast se Kosova është e sigurt, madje më shumë se disa vende nga më të zhvilluarat në Evropë, gjithsesi falë punës së UNMIK-ut. Mirëpo, rezultatet do të ishin dukshëm më të mëdha, po të angazhoheshin në këto procese edhe më shumë kosovarët.

Na duhet një vizion shumë i qartë për të ardhmen e Kosovës, sepse çështjet që thuhen edhe në Rezolutën 1244 po përsëriten qe më shumë së katër vjet. Kosovës i duhet ligji, i cili duhet të mbizotërojë në tërë Kosovën, theksoi profesor Daci.
Duke shestuar çështjen e të zhvendosurve, u theksua se duhet të pasojë një angazhim edhe më i madh për kthimin e tyre, sidomos kur është fjala për ata brenda territorit të Kosovës, duke siguruar lëvizje të lirë e të përhershme të qytetarëve.
Për të gjitha këto zhvillime u fol hapur , ndërsa bashkëbiseduesit premtuan bashkëpunim të ndërsjellë. U përkrah fillimi sa më i shpejtë i dialogut Prishtinë- Beograd, sepse bisedimet janë në interes të të dy palëve. "Le të fillojmë me atë që kemi të përbashkët dhe ne kemi mjaft gjëra të përbashkëta në kuptimin evropian e ndërkombëtar.

Unë jam i lumtur të konstatoj se elementet për të krijuar diçka të përbashkët këtu janë të dukshme, ekzistojnë", tha Holkeri, njofton Zyra për Marrëdhënie me Media e Kuvendit të Kosovës.


Holkeri për fillimin sa më të shpejtë të bisedimeve për ndërmjet Prishtinës dhe Beogradit

Prishtinë, 27 gusht 2003 - Shefi i UNMIK-ut Harri Holkeri ritheksoi qëndrimin se duhet zbatuar rekomandimet e samitit të Selankut dhe të OKB-së për fillimin sa më të shpejtë të bisedimeve për çështje praktike ndërmjet Prishtinës dhe Beogradit. Me gjithë se ka disa pengesa, Holkeri shfaqi shpresën se deri ka gjysma e muajit shtator do të bëjë gati propozimet konkrete rreth dialogut Prishtinë-Beograd.
Këto komente Holkeri i bëri pas disa takimeve që pati sot në Prishtinë.


Plagoset me armë zjarri një serb në Biçë të Klinës

Klinë, 27 gusht 2003 - Mbrëmë në Biçë të Klinës nga sulmues të panjohur është plagosur me armë zjarri Zoran Donçiq. Duke komentuar këtë incident, zëdhënësi i policisë së UNMIK-ut, Beri Fleçer, i deklaroi radios Blue Sky, se persona tash për tash të panjohur, kanë sulmuar me armë zjarri tre serbë, prej të cilëve njëri është qëlluar.

Fleçer ka sqaruar se Donçiq, i cili u plagos në pjesën e stomakut, është operuar në spitalin e KFOR-it spanjoll, në Istog dhe jeta e tij është jashtë rrezikut.
Sipas zëdhënësi Fleçer, është ende herët të thuhet nëse ky rast ka të bëjë me incidentet e mëhershme, të cilat gjatë disa javëve të shkuara janë shënuar në rajonin e Pejës.
Njoftohet se Zoran Donçiqin e plagosur, sot e ka vizituar kryeministri i Kosovës Bajram Rexhepi.


Në Llaushë të Skënderajt është arrestuar Liman Geci

Skënderaj, 27 gusht 2003 - Sot, në orën katër të mëngjesit, në Skënderaj është bastisur banesa e Limon Gecit, ish pjesëtar i UÇK-së dhe TMK-së, i cili më pas edhe është arrestuar nga pjesëtarët e KFOR-it. Arsyeja e arrestimit nuk dihet, njofton Radio Kosova.
Ndrëkaq në Skënderaj është bastisur shtëpia e Musli Gecit, nënkolonel në Zonën e Parë të TMK-së, dhe dy vëllezërve të tij, të cilët ndodhen me punë të përkohshme në Zvicër.

Musliu për një kohë është mbajtur i lidhur nga forcat e KFOR-it, ndërkohë që dyert e shtëpive të vëllezërve të tij janë hapur në mënyrë të dhunshme dhe pastaj janë bastisur shtëpitë.


Miratohet Udhëzimi administrativ mbi autorizimin e përkohshëm për produktet medicinale në Kosovë

Prishtinë, 27 gusht 2003 - Ministrja e Shëndetësisë Dr.Resmije Mumxhi ka miratuar Udhëzimin Administrativ 2003/09 mbi Autorizimin e përkohshëm të marketingut për produktet medicinale të plasuara në Kosovë.
Me këtë udhëzim synohet që të vihet rregull në plasimin e produkteve medicinale në Kosovë dhe nënkupton kërkesën për të siguruar provën e dokumentuar dhe provën fizike që cilësia, siguria dhe efikasiteti i produktit medicinal i plasuar në Kosovë - i plotëson standardet e caktuara rregullative me qëllim të mbrojtjes së shëndetit publik.
Ky Udhëzim administrativ hyn në fuqi më 5 shtator të këtij viti dhe të gjitha kompanitë distrubuese, prodhuese apo përfaqësitë e prodhuesve farmaceutikë i kanë në dispozicion tre muaj që të aplikojnë për regjistrimin e përkohëshëm dhe të pajisen me Certifikatën e autorizimit të marketingut nga Agjensioni Kosovar për Produktet Medicinale.
Kompanive që nuk aplikojnë brenda afatit tremujor nga data e hyrjes në fuqi të Urdhëresës administrative, do t'u ndalohet importimi i të gjitha atyre produkteve medicinale.


Në Gjermani botohet një libër me poezi shqip e gjermanisht i Dashnim Hebibit

Cyrih, 27 gusht 2003 - Ditë më parë shtëpia botuese "Doruntina" në Gjermani botoi librin me poezi "Dialog me gurin-Dialog mit dem Stein" të poetit preshevar Dashnim Hebibi, i cili jeton në Zvicër.
Ky libër me poezi është në dy gjuhë - shqip e gjermanisht. Poezitë gjermanisht i ka përkthyer Afërdita Halimi. Deri më tash autori ka botuar pesë libra letrare.


Në manifestimet e sotme religjioze në Indi kanë humbur jetën 39 vetë

Bombei, 27 gusht 2003 – Sipas njoftimeve më të reja të AP-së, në manifestimet e sotme religjioze në Indi kanë humbur jetën 39 vetë, kurse janë lënduar mbi 125 të tjerë. Dy nga të lënduarit janë oficerë policorë. Të lënduarit janë dërguar me autoambulanca, vetura dhe automjete policore në spitalet e qytetit Nashik.


Marsi është larg Tokës në distancën e saj më të shkurtër

Romë, 27 gusht 2003 - Për herë të parë pas 60 mijë vjetësh planeti Mars është larg Tokës në distancën e saj më të shkurtër.
Kjo distancë është rreth 55 milionë kilometra, kaq afër sa mund të dallosh me teleskop të thjeshtë detajet në sipërfaqen e saj.
Marsit i duhen 2 vjet tokësor që të rrotulloeht rreth Diellit dhe për këtë arsye të dy planetet shpesh herë e gjejnë veten në të njëjtën anë të Diellit dhe pranë njëri-tjetrit.
Hera e parë që dy planetet ishin shumë pranë qe në 1877.
Astronomi italian Xhovani Skiapareli njoftoi se kishte parë mbi sipërfaqen e Marsit gropa dhe kanale, nga fjala kanali që ai përdori italisht.
Kështu ata që do të vëzhgojnë sipërfaqen e Marsit kësaj radhe natyrsisht që do të shohin kanalet. Nëse në Mars ka jetë, ajo është mikroskopike dhe kanalet janë padyshim natyrore.
Ata që jetojnë në hemisferën jugore do të kenë mundësi të shohin një pamje më të mirë të Marsit.


Arafat thotë se ai është i gatshëm të ndërmarrë aksion kundër grupeve militante nëse Izraeli ndalë sulmet

Ramallah, 27 gusht 2003 – Presidenti palestinez, Jaser Arafat, ka deklaruar sot (e mërkurë) në selinë e tij të shkatërruar në Ramallah se ai është i gatshëm të ndërmarrë aksion kundër grupeve militante nëse Izraeli ndal goditjet me predha dhe sulmet e tjera, që kanë për qëllim vrasjen e tyre, njofton Rojter.

Përndryshe, ka thënë ai, do të rrezikonte të shkaktonte luftë civile. Por, Arafat s'ka thënë se çfarë hapash do të ndërmerrte konkretisht në një rast të tillë.
Kjo deklaratë e Arafatit është bërë pas goditjes së tretë ushtarake kundër militantëve të Hamasit në Rripin e Gazës pas sulmit vetëvrasës me bombë në Jerusalem, kur humbën jetën 21 njerëz dhe armëpushimit të brishtë, që u prish pas shtatë javësh.


Të pakten 25 vetë janë vrarë një festival religjiioz në Indi

Bombei, 27 gusht 2003 – Të pakten 25 vetë janë vrarë sot (e merkurë), kurse mbi 30 të tjerë janë plagosur gjatë një rrëmuje në një festival të madh religjioz hindus në Indinë perendimore, njofton AFP. Zyrtarët kanë thënë se rrëmuja është shkaktuar nga një pelegrinazh masiv në qytetin Nashik, kur adhuruesit vraponin në rrugët e ngushta në drejtinm të një breglumi, ku do të kryenin ritin fetar. Vlerësohet se në këtë festival merrnin pjesë 6 milionë njerëz.


Një zyrtar i lartë i administratës ruse në Kaukaz është vrarë me një shpërthim bome në veturë e tij

Moskë, 27 gusht 2003 – Një zyrtar i lartë i administratës ruse në rajonin e trazuar të Kaukazit, afër Çeçenisë kryengritëse, është vrarë sot (mërkurë) me një shpërthim bombe në veturë sapo ishte nisur nga shtëpia e tij, njofton Rojter.

Magomedsalih Gusajev, i cili është ministër rajonal i policisë në Dagestan, ka vdekur nga shpërthimi i bombës, që ishte vënë në kulmin e aveturës së tij, kurse shoferi i tij është plagosur rëndë, ka thënë policia.

Sipas dëshmitarëve dy vetë e kanë vënë mjetin shpërthyes në veturë. Supozohet se Gusajev është vrarë nga grupet radikale, pjesëtarët e të cilave janë arrestuar kohë më parë.


Dy policë irakianë dhe dy civilë janë vrarë gjatë një shkëmbim zhjarri me disa hajna në Bagdad

Bagdad, 27 gusht 2003 – Dy policë irakianë dhe dy civilë janë vrarë sot (e mërkurë) gjatë një shkëmbim zhjarri me disa hajna, të cilët janë përpjekur të plaçkisin një kambist parash në qendër të Bagdadit, kanë thënë dëshmitarët, njofton Rojter.

Shkëmbimi i zjarrit ka shpërthyer afër hoteleve Shareton dhe Palestina, ku qëndrojnë shumë biznismenë dhe dhe organizata mediale.


Një ushtar amerikan është plagosur në luftimet me forcat talibane në Afganistan

Kabul, 28 gusht – Një ushtar amerikan është plagosur në luftimet me forcat talibane në Afganistanin jugor, ku forcat speciale amerikane së bashku me ato të milicisë së koalicionit afgan po gjurmojnë qindra guerilë, kanë bërë të ditur sot (e merkurë) zyrtarët, njofton Rojter.

Zyrtari i ministrisë së Mbrojtjes në Kabul, i cili nuk deshi të identifikohet, nuk mundi të thotë se kur saktësisht është plagosur ushtari amerikan, por ka thënë se ka ndodhur brenda 24 orëve gjatë luftimeve me luftëtarët talibanë në provincën Zabul. Përleshjet kanë vazhduar në një rajon malor edhe sot pas një qetësie gjatë natës.


Të paktën 20 vetë janë vrarë nga një shpërthim në Kinë

Pekin, 27 gusht 2003 - Të paktën 20 vetë janë vrarë, ndërkaq mbi 40 janë lënduar në një shpërthim të mjeteve piroteknike në juglindje të Kinës, njofton Sinhua.
Shpërthimi ka ndodhur të martën në mbrëmje, në një fshat të provincës Fuxhian. Për momentin nuk dihet se çka e ka shkaktuar këtë tragjedi, ndërkohë që ekipet e shpëtimit po vazhdojnë gjurmimin për viktima të tjera.

Nga fuqia e shpërthimit është krijuar një krater i thellë dy metra dhe rreth 20 metra i gjerë, ndërkaq janë shkatërruar edhe pesë shtëpi përreth.


Kryeministri Abaz dënon sulmin e djeshëm izraelit me helikopterë

Gaza, 27 gusht 2003 - Kryeministri palestinez, Mahmud Abaz, dënoi sulmin e djeshëm izraelit me helikopterë, nga i cili u vra një civil në Gaza dhe u plagosën 20 të tjerë.
Kryeministri Abaz tha se për konfliktin izraelito-palestinez nuk ka zgjidhje ushtarake dhe se politika e Izraelit për vrasjen e ekstremistëve vetëm do të shkallëzojë dhunën. Izraeli ka thënë se çdo ekstremist i grupit palestinez Hamas është objektiv i mundshëm i asaj që ai e quan “eliminim”.
Dëshmitarët thonë se objektivi i sulmit të djeshëm ishte një udhëheqës i grupit Hamas, i cili i shpëtoi sulmit.


Presidenti Bush mbron vazhdimin e pranisë së Shteteve të Bashkuara në Irak

Uashington, 27 gusht 2003 - Presidenti amerikan Bush thotë se lufta kundër terrorizmit nuk do të ndalet. Kjo do të thotë që të vazhdojë ofensiva kundër atyre që vazhdojnë të sulmojnë trupat amerikane në Irak.

"Tërheqja përballë terrorit do të pasohej me sulme të tjera të paturpshme. Prandaj nuk do të ketë tërheqje".
Duke folur dje para grupit më të madh të veteranëve të botës në qytetin Seint Luis, presidenti Bush tha se ai nderon kujtimin e ushtarëve të vrarë në luftën kundër terrorizmit.


Lufta kunder bandave kriminale në Irak

Bagdad, 27 gusht 2003 - Zyrtarët ushtarakë amerikanë thonë se forcat amerikane kryen një sulm ndaj disa shtëpive në qytetin Khalis, 100 kilometra në veri të Bagdadit, si pjesë e një operacioni që synonte asgjësimin e bandave lokale, të cilat thuhet se janë autorët e krimeve dhe veprimeve terroriste gjatë muajve të fundit.
Udhëheqësi i bandës, Lateef Hamad al-Kubaishat, ka qenë dënuar disa herë me burgim të përjetshëm por ai u lirua tetorin e kaluar, pas një amnistie të përgjithshme, për të cilën dha urdhër presidenti i atëhershëm, Sadam Hussein.


Fillojnë në Pekin bisedimet për krizën në Korenë Veriore

Pekin, 27 gusht 2003 - Bisedimet që synojnë të zgjidhin krizën mbi ambiciet nukleare të Koresë së Veriut janë duke u zhvilluar në kryeqytetin e Kinës, Pekin. Gjashtë vende janë pjesëmarrëse në negociatat treditore; Koreja e Veriut, ajo e Jugut, SHBA-ja, Kina, Rusia dhe Japonia.
Delegatët e delegacionet e SHBA dhe Koresë së Veriut janë ulur pranë njeri-tjetrit në mënyrë që të nxisin kontaktet jo-formale.


Sekretari britanik i Mbrojtjes para komisionit hetues

Londër, 27 gusht 2003 - Sekretari britanik i mbrojtjes, Xhef Hun, jep të mërkurën dëshminë e tij në hetimin zyrtar që është hapur mbi atë që duket si vetëvrasja e ekspertit qeveritar të armëve, Doktor Dejvid Kelli.
Zoti Hun do të pyetet se si u bë publik emri i shkencëtarit që punonte për qeverinë, David Kelly.
Drejtuesi i shërbimit civil në Ministrinë e Mbrojtjes kishte kërkuar që emri i Doktor Kellit të mos bëhej publik përpara se të hapej hetimi parlamentar, por zoti Hun kishte këmbëngulur për të kundërtën.