E marte 26 gusht 2003

26.08.2003 - Trepca.net

Lajme

E marte 26 gusht 2003

Përmbajtja:

Presidenti Rugova bisedoi me shefin e ri të UNMIK-ut Holkeri
Holkeri: E ardhmja e Kosovës do të vendoset në Këshillin e Sigurimit e jo në Beograd apo në Prishtinë
Kryeparlamentari Daci priti shefen e deritashme dhe atë të renë të Zyrës suedeze
Sot në Prishtinë solemnisht fillon manifestimi tradicional "Ditët përkujtimore të Nënës Tereze 2003"
Filluan stërvitjet e NATO-s "Përgjigjja dinamike 2003"
Plaçkitet Rajfajzen banka në pjesën veriore të Mitrovicës
Kuvendi kërkon nga Qeveria të përgatisë pakon e ligjeve ekonomike për Kosovën
Dje në një mbledhje përkujtimore në Prishtinë u përkujtua Serzho de Melo dhe viktimat e OKB-së në Irak
Xhandarët e Serbisë sërish shkelin territorin e Kosovës
Kuvendi komunal i Prishtinës thotë se nuk kanë filluar punimet e qendrës kulturore sportive "Mbreti Fehad"
Tadiq: As me Rezolutën 1244, as me Marrëveshjen e Kumanovës nuk është parashikuar kthimi i formacioneve ushtarake në Kosovë
Trupat amerikane dhe afgane po gjurmojnë talibanët e ikur nëpër fshatra dhe shpella
Opozita nuk i njeh rezultatet e votimeve në zgjedhjet presidenciale në Ruandë
Në një sulm të një autobusi në Laos janë kanë vrarë 5 udhëtarë dhe janë plagosur mbi 10 të tjerë
Dy ushtarë francezë janë vrarë dhe një tjetër është plagosur në luftimet në Bregun e Fildishtë
Trupat izraelite kanë arrestuar 2 militantë palestinezë derisa po shëroheshin në një spital në Nablus
Kegame pretendon fitoren në zgjedhjet e zhvilluara në Ruandë
Pesë vetë vdiqën nga përplasja e dy helikopterëve ushtarakë rusë
Policia e Indisë mbrëmë ka gjetur nëntë detonatorë në një tunel hekurudhor
Forca amerikane dhe afgane kanë vrarë të paktën 14 luftëtarë talebanë në Kandahar
Ramsfeld hedh poshtë thirrjet për të dërguar më shumë trupa në Irak
India shton masat e sigurimit në qytetet kryesore të vendit

Presidenti Rugova bisedoi me shefin e ri të UNMIK-ut Holkeri


Presidenti Rugova takimin me zotin Holkeri e vlerësoi si mjaft konstruktiv, me të cilin tha se kanë biseduar për shumë çështje aktuale të zhvillimit në Kosovë, si çështjen e sigurisë.
Ka zhvillime pozitive edhe pse ka incidente të ndryshme, por duhet bëhet çmos që ato të ndalohen për të pasur një stabilitet më të madh të sigurisë, që gjithsesi është pozitiv, tha Presidenti, duke u angazhuar për një punë më të madhe në këtë drejtim të policisë së Kosovës, policisë së UNMIK-ut e KFOR-i, për të cilin tha se është gjithkund standard.

Ndër çështjet e tjera që janë biseduar në këtë takim ai përmendi edhe zhvillimet e tjera në Kosovë, dhe më pak për çështjet ekonomike, por për të cilat do të bisedohet më shumë pasi që do të ketë një program të zhvillimeve, tha Presidenti Rugova.

Me këtë rast ai theksoi se në planin ekonomik tashmë ka filluar privatizimi, ndërkaq biznesi privat tash për tash ka në duar 50 të ekonomisë. Ndërkaq, duke folur për integrimin e grupeve etnike dhe të minoriteteve, ai tha se edhe në këtë plan ka një progres, sikur edhe në planin administrativ.

"Gjithsesi duhet të bëjmë më shumë në planin e komunikimit mes shumicës dhe vullnetit të minoriteteve që të integrohen, dhe vullnetit të shumicës që t'i pranojë ato", theksoi Presidenti Rugova për temat që ishin diskutuar në këtë takim, duke shtuar se do të bashkëpunojë ngushtë me administratorin e ri të Kosovës.
Në fund të deklaratës së tij Presidenti Rugova ritheksoi se Kosova sa më parë duhet të jetë vend i pavarur, demokratik, paqësor dhe e integruar në NAT0, në Bashkimin Evropian dhe në miqësi të përhershme me SHBA-të.
Në një pyetje të një gazetari nëse në këtë takim i ka shprehur shqetësimet e tij lidhur me deklaratën e Beogradit për Kosovën, Presidenti tha se nuk dëshiron ta bëjë këtë temë të ditës.
"Ne Beogradin e njohim. Për fat të keq ata vazhdojnë politikën e vjetër", tha ai, duke shtuar se gjithsesi ajo deklaratë do të ndikojë edhe në atë që mendohet se do të bisedohet me Beogradin, pra për çështjet praktike që ka qenë një sinjal nga Takimi i Selanikut.

Por këto gjëra vërtet e vështirësojnë dhe pamundësojnë fillimin e bisedimeve për çështjet praktike, të cilat do të ishin me rëndësi për rajonin dhe Evropës Juglindore dhe BE-në, theksoi Presidenti Rugova.


Holkeri: E ardhmja e Kosovës do të vendoset në Këshillin e Sigurimit e jo në Beograd apo në Prishtinë

Prishtinë, 26 gusht 2003 - Shefi i ri i UNMIK-ut Hari Holkeri tha sot se diskutimet që po zhvillohen në Beograd për Kosovën nuk do të kenë asnjë ndikim në punën dhe aktivitetet e tij. Sipas Holkerit vetëm Këshilli i Sigurimit të OKB-së mund të vendosë për të ardhmen e Kosovës.
"E ardhmja e Kosovës, statusi i saj përfundimtar do të vendoset në Këshillin e Sigurimit, e jo në Beograd ose në Prishtinë. Diskutimet që po bëhen kohëve të fundit në Beograd nuk mund të ndikojnë në punën time dhe të kolegëve të mi. Vetëm Këshilli i Sigurimit është i autorizuar që të vendosë për një gjë të tillë", tha Holkeri.
Shefi i ri i UNMIK-ut tha se angazhehet për fillimin sa më të shpejtë të bisedimeve për çështjet praktike ndërmjet Prishtinës dhe Beogradit. "Nga unë është kërkuar që t'i ul të dy palët pranë tryezës së bidedimeve. Në ato bisedime unë do të jemë në rolin e ndërmjetësit", tha Holkeri.

Ai nënvizoi se, pavarësisht se ndodhet në postin e shefit të UNMIK-ut, duhet të jetë neutral. Por ai bëri të ditur nuk mund t'i lejojë askujt që të bashkëqeverisë me të, tha Holkeri.
Disa nga këto çështje Holkeri i ka diskutuar edhe me presidentin Rugova, me kryeparlamentarin Daci dhe me kryeministrin Rexhepi. në takimet që pati gjatë ditës së sotme.


Kryeparlamentari Daci priti shefen e deritashme dhe atë të renë të Zyrës suedeze

Prishtinë, 26 gusht 2003 - Kryetari i Kuvendit të Kosovës, Nexhat Daci, priti sot në takim të përbashkët shefen e deritashme të Zyres Suedeze në Prishtinë znj. Signe Burgstaller dhe shefen e sapoemëruar të kësaj zyreje, znj. Karin Hernmarek.
Pofesor Daci i ka njoftuar diplomatet suedeze me punën e Kuvendit, sidomos për sa i përket miratimit të legjislacionit të vendit, që mëtohet të jetë kompatibil me legjislacionin e vendeve evroperëndimore, si dhe për punën e institucioneve të Kosovës për stabilizimin e gjendjes dhe përparimin gjithpërfëshirës të vendit. Ai ka shprehur besimin e tij se bashkëpunimi ndërmjet Kuvendit të Kosovës dhe Parlamentit të Suedisë do të vazhdojë të thellohet.
Zonja Burgstaller duke e falenderuar kryeparlamentarin Daci për vullnetin e tij për marrëdhënie të mira me Suedinë, që u kurorëzua me vizitën ditë më parë të një delegacioni shumëpartiak të parlamentit Suedez në Prishtinë dhe me pjesëmarrjen në nëntor të dy deputetëve kosovarë në një seminar në Stokholm, ka shprehur besimin e thellë se pasuesja e saj në krye të Zyres Suedeze këtu, Karin Hernmarek, do ta kryejë me sukse detyrën e saj dhe do të kontribuojë në afrimin e të dy vendeve tona, thuhet në një njoftim nga ky takim.


Sot në Prishtinë solemnisht fillon manifestimi tradicional "Ditët përkujtimore të Nënës Tereze 2003"

Prishtinë, 26 gusht 2003 - Sot në Prishtinë solemnisht fillon manifestimi tradicional "Ditët përkujtimore të Nënës Tereze 2003", i cili sivjet mbahet në patronazhin e Presidentit të Kosovës Ibrahim Rugova.
Fiilimisht, sonte në orën 18.00 në Teatrin Kombëtar në Prishtinë bëhet hapja solemne e këtij manifestimi, ku do të flasë Presidenti Ibrahim Rugova.
Gjatë ditëve të ardhshme aktivitetet e tjera pastaj vazhdojnë me programe të ndryshme kulturore si në Prishtinë ashtu edhe në disa qendra të tjera të Kosovës, që sivjet zhvillohen në prag të shenjtërimit të Nënës Tereze që do të bëhet në muajin tetor në Romë.


Filluan stërvitjet e NATO-s "Përgjigjja dinamike 2003"

Prizren, 26 gusht 2003 - Në Kosovë sot filluan stërvitjet ushtarake të NATO-s të koduara si "Përgjigjja dinamike 2003" që do të zgjasin një muaj, të cilat njëkohësisht do të mbahen edhe në Bosnjë e Hercegovinë. Këto stërvitje kanë si synim kontrollin e aftësive për ndërhyrje të shpejtë të trupave rezerve të Aleancës.
Përndryshe forcat e NATO-s janë të përbëra nga njësitet multinacionale të këmbësorisë, të blinduara, ajrore, amfibike dhe artilerike, të ngarkuara për reagime të shpejta në vatrat e konflikteve, kanë thënë zyrtarë të NAT0-s.
Për këtë qëllim sot ka ardhur në Kosovë edhe komandanti i krahut jugor të NATO-s admirali Gregori Xhonson.


Plaçkitet Rajfajzen banka në pjesën veriore të Mitrovicës

Mitrovicë, 26 gusht 2003 - Dy persona të armatosur kanë plaçkitur sot në pikë të ditës Rajfajzen bankën në pjesën veriore të Mitrovicës, duke plaçkitur një pjesë të parave të pensionistëve.

Bëhet e ditur se sulmuesit rreth orës 11.00 kanë hyrë në lokalet e bankës dhe pasi kanë sulmuar në kokë punëtorin e sigurimit, nëpër sportele kanë mbledhur një sasi të parave dhe kanë ikur.

Me t'u njoftuar për plaçkitjen pjesëtarët e policisë së UNMIK-ut dhe të SHPK-së kanë bllokuar atë pjesë të qytetit rreth bankës dhe janë vënë në ndjekje të plaçkitësve.
Ndryshe kjo pjesë e qytetit të Mitrovivës është banuar me serbë.


Kuvendi kërkon nga Qeveria të përgatisë pakon e ligjeve ekonomike për Kosovën

Prishtinë, 26 gusht 2003 - Kryesia e Kuvendit të Kosovës, nën drejtimin e kryetarit, Nexhat Daci, shqyrtoi rendin e ditës për seancën e parë të Kuvendit, pas pauzës së verës, që do të mbahet më 4 shtator (në godinën e Kuvendit Komunal të Prishtinës, për shkak të renovimit të Sallës së seancave në Kuvendin e Kosovës).
Kryesia ka vendosur që në këtë seancë t’i nxjerrë për shqyrtim të parë Projektligjin për siguri në punë, mbrojtje të shëndetit dhe mjedisit të punës dhe Projektligjin për ndryshimin dhe plotësimin e Ligjit për Inspektoratin e Punës.
Për seancën e 11 shtatorit para deputetëve do të nxirret për shqyrtim të dytë Projektligji për prokurimin publik, ndërsa për shqyrtim të parë nxirret Projektligji për pension të aftësisë së kufizuar.
Duke ditur rëndësinë tepër të madhe që ka për vendin miratimi i legjislacionit bazik, kryesia ka vendosur të kërkojë nga Qeveria e Kosovës pëgatitjen e pakove të ligjeve ekonomike.
Kryesia po sot ka shqyrtuar përgjigjen e Qeverisë së Kosovës lidhur me kundërshtimin e Koalicionit “Kthimi” në Ligjin për qasje në dokumente zyrtare dhe është pajtuar me qëndrimin e Qeverisë se ky ligj nuk cenon të drejtat e asnjë komuniteti në Kosovë. Kryesia ka vendosur që edhe kundërshtimin e këtij koalicionii në Ligjin për regjistriin e popullsisë, ekonomive familjare dhe banesave t’ia kalojë Qeverisë, si sponsorizues i ligjit.


Dje në një mbledhje përkujtimore në Prishtinë u përkujtua Serzho de Melo dhe viktimat e OKB-së në Irak


"Kjo do të thotë për të gjithë ne, se duhet të bëjmë punën tonë: të vendosim rendin dhe ligjin në Kosovë, të respektojmë të gjitha të drejtat e personave të zhvendosur që të rikthehen në shtëpitë e tyre, ta mposhtim pesimizimin dhe të punojmë për të ndërtuar një zhvillim ekonomik dhe për të ndërtuar marrdhëniet midis komuniteteve", - tha shefi i ri i UNMIK-ut, duke shtuar se kjo është e vetmja zgjidhje që Kosova të ecë në rrugën drejt Evropës.

Gjithashtu Holkeri kërkoi një angazhim edhe nga udhëheqësit e Kosovës.
Presidenti i Kosovës Ibrahim Rugova, duke përkujtuar administratorin e parë të Kosovës, Serzho de Melon dhe punëtorët e tjerë të UNMIK-ut, tha se "De Melo ishte një burrë i urtë dhe i guximshëm që punoi me sukses për 30 vjet në vatra të ndryshme të konflikteve.

Ishte në shërbim të mirëkuptimit e të paqes për kombet dhe vendet e ndryshme. Ishte në shërbim të njerëzimit". Me këtë rast ai përkujtoi edhe tre punëtorët e tjerë të UNMIK-ut, që u vranë në Bagdad, Nadia Junis, Zhan Selim Kanan dhe Fiona Uotson, të cilët punuan me përkushtim në Kosovë dhe i kontribuan progresit të Kosovës.
"Edhe një herë i shprehim ngushëlllime Sekretarit të Përgjithshëm të OKB-së, z. Kofi Anan, për humbjen e misionarëve të paqes.
Populli i Kosovës i kujton me dhembje ata që humbën jetën. Populli i Kosovës i kujton me krenari, sepse ata punuan për Kosovën. Nuk do t'i harrojmë kurrë", tha Presidenti Rugova.
Presidenti i Kosovës bëri të ditur se ka vendosur që Serzho de Melon ta dekorojë me Medaljen për Shërbim Civil në Kosovë, të cilën e ka themeluar më 12 qershor të këtij viti.
Poashtu edhe disa të pranishëm evokuan kujtimet për të ndjerët.


Xhandarët e Serbisë sërish shkelin territorin e Kosovës

Gjilan, 26 gusht 2003 - Sipas pohimeve të banorëve të fshatit kufitar Muçibabë, të hënën xhandarët e armatosur serb sërish kanë hyrë në territorin e Kosovës në një thellësi 300 metrash.

"Të dielën rreth orës 14.00, shtatë pjesëtarë të xhandarmëria serbe, nga të cilët gjashtë me automatikë dhe një me snajper, janë futur 300 metra në brendi të territorit të Kosovës, në fshatin kufitar Muçibabë", ka pohuar Vehid Ibrahimi nga Muçibaba.
Banorët e këtë fshati të shqetësuar nga xhandërët serbë kanë barktisur fshatin. Ata kanë njoftuar pjesëtarët e KFOR-it, policinë e UNMIK-ut dhe të SHPK-së, por askush nuk i ka vizituar.


Kuvendi komunal i Prishtinës thotë se nuk kanë filluar punimet e qendrës kulturore sportive "Mbreti Fehad"

Prishtinë, 26 gusht 2003 - Në të përditshmen "Koha ditore të datës 25 gusht, në faqen e marketingut është botuar një njoftim kinse lidhur me fillimin e punimeve për ndërtimin e qendrës kulturore sportive "Mbreti Fehad" në lagjen "Arbëria III" në Prishtinë.
Lidhur me këtë njoftim, për të mos krijuar huti dhe paqartësi tek opinioni i gjerë, e njoftojmë atë se nuk bëhet fjalë për kurrëfarë fillimi të punimeve ndërtimore të kësaj qendre, sepse lokacioni, përkatësisht sipërfaqja ku është menduar të ngritet kjo Qendër është kontestuese për shkak të problemeve të shumta pronësore-juridike.

Përderisa mos të zgjidhet ky kontest dhe përfundimisht të definohet çështja e pronësisë s`mund të fillojnë kurrfarë punimesh ndërtimore. Prandaj, çdo veprim konkret nga ana e kryesit të punimeve apo edhe të investitorit, pa i dhënë zgjidhje kontestit ne fjalë, do të kundërshtohet ashpër nga administrata e Kuvendit Komunal të Prishtinës, thuhet në një për media.


Tadiq: As me Rezolutën 1244, as me Marrëveshjen e Kumanovës nuk është parashikuar kthimi i formacioneve ushtarake në Kosovë

Beograd, 26 gusht 2003 - Ministri i Mbrojtjes së Serbisë dhe Malit të Zi, Boris Tadiq ka deklaruar se vetëm komandanti i KFOR-it mund të vendosë për kthimin e ushtrisë në Kosovë. Ai ka përkujtuar se me Rezolutën 1244 dhe me Marrëveshjen ushtarako-teknike të Kumanovës, "fare nuk është parashikuar kthimi i formacioneve ushtarake, të cilat do ta mbronin hapësirën dhe enklavat në të cilat jeton popullsia serbe".
Tadiq ka thënë se me Marrëveshjen e Komunavës dhe me Rezolutën 1244 është parashikuar vetëm kthimi i mundshëm i zyrtarëve dhe i pjesëtarëve të ushtrisë dhe policisë serbe vetëm në katër funksione: pjesëmarrja në shërbime kufitare dhe ndërkufitare midis Shqipërisë dhe Kosovës, mbrojtja e objekteve fetare, kontaktet me përfaqësuesit e KFOR-it dhe për çminimin e fushave.

I pyetur nëse ekziston mundësia e kthimit të ushtrisë dhe policisë serbe në Kosovë në kuadër të trupave paqeruajtëse ndërkombëtare, Tadiq ka thënë: "Me këtë do ta pranonim se Kosova është pjesë e territorit të huaj, sepse pjesëmarrja në forcat ndërkombëtare bëhet në territorin e huaj e jo në territorin e vendit".


Trupat amerikane dhe afgane po gjurmojnë talibanët e ikur nëpër fshatra dhe shpella

Kabul, 26 gusht 2003 – Trupat amerikane dhe afgane po gjurmojnë sot (e martë) talibanët e ikur nëpër fshatra dhe shpella në provincën jugore Zabul pasi gjatë një ndjekjeje, ku morën pjesë edhe aeroplanët amerikanë, u vranë deri në 50 luftëtarë talibanë, njofton Rojter.

Forca të vogla të trupave speciale amerikane dhe 450 trupa afgane kanë filluar një operacion të përbashkët në ndjekje të rreth 600 talibanëve, që fshihen në zonën e lartpërmendur, ku sot ka pasur granatime sporadike.

Luftimet e drejtpërdrejta kanë përfunduar, por trupat e koalicionit po kontrollojnë dhe bastisin shtëpi për shtëpi, fshat për fshat dhe shpellë për shpellë. Dhjetëra talibanë janë arrestuar dhe një sasi e kosiderueshme armësh është konfiskuar.


Opozita nuk i njeh rezultatet e votimeve në zgjedhjet presidenciale në Ruandë

Kigali, Ruandë, 26 gusht 2003 – Kandidati kryesor i opozitës në Ruandë në zgjedhjet presidenciale, Faustin Tvagiramungu, nuk i ka pranuar rezultatet e votimeve, të cilat nxorën fitues presidentin Paul Kagasme dhe ka bërë thirrje për zgjedhje të reja, ka deklaruar një ndihmës i kandidatit opozitar, njofton AP.
"Këto zgjedhje s'kanë qenë të lira. Ka pasur plot falsifikime. Shumë njerëz janë detyruar të votojnë për Kagasme dhëe s’ka pasur asgjë transparente gjatë procedurës", ka thënë ai dhe ka kërkuar të mos i përmendet emri.


Në një sulm të një autobusi në Laos janë kanë vrarë 5 udhëtarë dhe janë plagosur mbi 10 të tjerë

Bankog, 26 gusht 2003 – Persona të panjour të armatosur kanë sulmuar një autobus në Laosin verior dhe kështu kanë vrarë 5 udhëtarë dhe kanë plagosur mbi 10 të tjerë, ka bërë të ditur sot (e martë) radioja shtetërore, njofton Rojter.

I njëjti burim thotë se policia ka vrarë gjithashtu të pesë sulmuesit e armatosur të autobusit. Sulmuesit e tjerë pastaj kanë ikur në xhungël. Policia ka thënë se sulmi është i motivuar për shkaqe biznesi, ndërkaq një burim tjetër i ka thënë Rojterit se sulmuesit mund të jenë kultivues të narkotikëve.


Dy ushtarë francezë janë vrarë dhe një tjetër është plagosur në luftimet në Bregun e Fildishtë

Paris, 26 gusht 2003 – Dy ushtarë francezë janë vrarë dhe një tjetër është plagosur në luftimet me ish-kryengritësit në Bregun e Fildishtë, njofton Rojter. Ky është incidenti i parë që kur trupat e Parisit janë vendosur në këtë shtet të Afrikës Perëndimore, kanë thënë sot (e martë) zyrtarët ushtarakë.

Ndërkaq, nga ana e kryengritësve supozohet se është vrarë një syresh, kurse janë plagosur disa të tjërë. Shkëmbimi i zjarrit ka filluar pas një zënke ndërmjet 25 ushtarëve francezë, të cilët po bisedonin me disa peshkatarë dhe një grupi prej 15-20 ish-kryengritësve, që si duket kanë qenë të dehur.


Trupat izraelite kanë arrestuar 2 militantë palestinezë derisa po shëroheshin në një spital në Nablus

Nablus, Bregu Perendimor, 26 gusht 2003 – Trupat izraelite të zbulimit kanë arrestuar sot (e martë) dy militantë palestinezë derisa po shëroheshin në një spital të qytetit Nablus të Bregut Perendimor, kanë bërë të ditur burimet palestineze, njofton BBCWorld.

Të dy të arrrestuarit janë shtruar në pital të premten e kaluar për të shëruar plagët e marra gjatë përleshjeve me forcat izraelite. Njëri nga të arrestuarit akuzohet se është përgjegjës për disa sulme, në ta cilat kanë humbur jetën të pakten 10 vetë, ka shkruar një gazetë izraelite. Të dy të arrestuarit njoftohet se janë anëtarë të Brigadave të Martirëve Al Aksa, që ka lidhje me Al Fatahun e liderit palestinez, Jaser Arafat.


Kegame pretendon fitoren në zgjedhjet e zhvilluara në Ruandë

Kigali, 26 gusht 2003 - Sipas komisionit elektoral në Ruanda deri tani gjysma e votave të numëruara e tregojnë zotin Kegame si fitues me 94%. Por megjithatë ka patur pretendime nga anëtarë të opozitës se mbështetësit e tyre nuk janë lejuar të kryejnë lirisht aktivitetet e tyre.
Ruandezët në mënyrë të qetë qëndruan në radhat e gjata në pritje për të hedhur votën e tyre.
Janë zgjedhjet e para presidenciale në Ruanda ku kandidati i opozitës është i shkruar si një mundësi zgjedhjeje në krah të presidentit aktual të vendit.


Pesë vetë vdiqën nga përplasja e dy helikopterëve ushtarakë rusë

Moskë, 26 gusht 2003 - Nga përplasja e dy helikopterëve ushtarakë në Lindjen e Largët të Rusisë jetën e kanë humbur pesë vetë, ndërkaq një tjetër është lënduar. Ky është aksidenti i dytë i helikopterëve në atë rajon për vetëm një javë, njoftojnë mediat ruse.


Policia e Indisë mbrëmë ka gjetur nëntë detonatorë në një tunel hekurudhor

Bombei, 26 gusht 2003 - Policia e Indisë mbrëmë ka gjetur nëntë detonatorë në një tunel hekurudhor 125 km në veri të Bombeit, disa orë pas shpërthimeve në të cilat u vranë 47 evtë, ndërkaq 143 u plagosën seriozisht, ka njoftuar agjencia shtetërore e lajmeve. Në Indi sot janë shtuar masat e sigurimit pas sulmeve të djeshme.


Forca amerikane dhe afgane kanë vrarë të paktën 14 luftëtarë talebanë në Kandahar

Kandahar, 26 gusht 2003 - Zyrtarë amerikanë thonë se forca amerikane dhe afgane kanë vrarë të paktën 14 luftëtarë talebanë në kuadër të një operacioni të përbashkët në Afganistanin jugor.
Zyrtarë ushtarakë amerikanë thanë se luftëtarët u vranë në krahinën e Kandaharit. Por zyrtarë afganë thanë se deri në 50 luftëtarë talebanë u vranë gjatë një operacioni të përbashkët me trupat amerikane në krahinën e Zabulit. Nuk ka pasur komente nga asnjëra palë rreth njoftimeve kontradiktore.
Në një operacion tjetër, në krahinën e Paktias, forcat amerikane dhe afgane kapën të paktën 40 persona të dyshuar si luftëtarë talebanë.


Ramsfeld hedh poshtë thirrjet për të dërguar më shumë trupa në Irak

Uashington, 26 gusht 2003 - Sekretari amerikan i Mbrojtjes Donald Ramsfeld thotë se në se komandantët amerikanë në Irak kanë nevojë për më shumë trupa, administrata do të dislokojë më shumë trupa.

Por duke folur në shtetin jugor të Teksasit, në një mbledhje të Organizatës së Veteranëve të Luftërave Jashtë Amerikës, zoti Ramsfeld tha se për momentin, personeli ushtarak amerikan në Irak prej gati 140 mijë forcash është i mjaftueshëm.
Komentet e zotit Ramsfeld u bënë një ditë pasi disa senatorë të njohur amerikanë bënë thirje të dërgohen trupa amerikane shtesë në Irak.


India shton masat e sigurimit në qytetet kryesore të vendit

Nju Delhi, 26 gusht 2003 - India ka shtuar masat e sigurimit në qytetet kryesore të vendit, pas dy shpërthimeve të djeshme me makinë bombë në kryeqytetin financiar të vendit Bombei, i njohur edhe si Mumbai, nga të cilët u vranë 46 veta dhe u plagosën mbi 100 të tjerë.

Forca të tjera policore u dislokuan në Bombei, në kryeqytetin New Delhi dhe në qytete të tjerë në mbarë Indinë.
Të dy shpërthimet ndodhën brënda disa minutash. Deri tani asnjeri nuk ka marrë përgjegjësinë për shpërthimet.
Shtetet e Bashkuara, Britania dhe Kina u bashkuan me Paskistanin për të dënuar shpërthimet. Zëvëndës-kryeministri i Indisë, Lal Krishna Advani, ka në plan të vizitojë sot vendet e shpërthimeve.