Lajme

E hëne 25 gusht 2003

Përmbajtja:

• Agim Çeku ka suspenduar 7 oficerë të TMK-së

• Ministrja e Shëndetësisë së Kosovës viziton Turqinë

• Spahia kritikon politikën e UNMIK-ut në Mitrovicë

• Hari Holkeri mbërriti sot në Prishtinë

• Kryeadministratori Holkeri sot edhe zyrtarisht në krye të Kosovës

• NATO fillon javën e ardhshme një stërvitje njëmujore në Kosovë

• Preshevë: Dy të plagsour nga shpërthimi i tri granatave

• Beograd: Deklarata për Kosovën, mbjellje e re e iluzioneve

• Trupi i De Melos në Gjenevë

• Në një aksident në shtetin Oregon të SHBA-ve, kanë humbur jetën 8 vetë

• Në një seri shpërthimesh në Indi kanë humbur jetën 6 vetë dhe janë plagosur edhe 10 të tjerë

• Nga shpërthimi i një bombe në Kolumbi janë vrarë shtatë vetë

• Në një aksident ajror në Haiti kanë vdekur 21 pasagjerë

• Në një sulm me bombë në qytetin Naxhaf është plagosur kleriku shit, Ajatollah Muhamed Said al-Hakim

• Izraelitët vranë katër palestinezë në Gaza

• Në një seri sulmesh me bomba në stacionet e autobusave në Rusi, janë vrarë 3 persona

• Në dy shpërthime bombash në Bombei janë vrarë të pakten 41 njerëz

• Mbahen zgjedhjet presidenciale në Ruandë

• Shkelet armëpushimi në Liberi

• Rreth 1000 njerëz janë vrarë dhe shumë fshatrave u është vënë flaka në krahinën Nimba të Liberisë

• Aksident automobilistik në Vajzenfels

Agim Çeku ka suspenduar 7 oficerë të TMK-së

 

Prishtinë, 25 gusht 2003 - Komandanti i Trupave Mbrojtëse të Kosovës, gjeneral Agim Çeku ka përjashtuar nga radhët e saja 7 oficerë, ndërkaq 8 të tjerëve u ka dhënë vërejtje me shkrim, në mesin e tyre dhe disa oficerë të lartë.

 

Siç shkruan në numrin e sotëm gazeta "Zëri", duke u mbështetur në burimet e afërta me TMK-në, të 15 oficerët janë gjetur të përfshirë në hetimet që kanë të bëjnë me incidentin tek ura e Llozicës afër Zveçanit, ku një pjesëtar i TMK-së kishte qenë i përfshirë në vendosjen e minës.

Fillimisht hetimet janë zhvilluar kundër 60 oficerëve të TMK-së, por më vonë lista është ngushtuar në 16 pjesëtarë. Sipas gazetës "Zëri", nëse hetimet vërtetojnë pafajsinë, atëherë ata mund të kthehen në radhët e TMK-së.

E njëjta gazetë shkruan se prej muajit prill e deri më tash në TMK janë marrë masa ndaj 109 pjesëtarëve, ndërkaq nga radhët e saj janë përjashtuar 42 vetë, 12 janë suspenduar, në procedurë për parapërjashtim janë përfshirë 34, ndërkaq janë iniciuar procedura të reja edhe ndaj 26 pjesëtarëve të saj.

 

 

Ministrja e Shëndetësisë së Kosovës viziton Turqinë

 

Prishtinë, 25 gusht 2003 - Me ftesë të ministrit turk të Shëndetësisë Dr. Rexhep Akdaj, ministrja e Shëndetësisë së Kosovës Dr. Resmije Mumxhi, me bashkëpunëtorët, prej 25 deri më 29 gusht zyrtarisht do të vizitojë Turqinë.

 

Kjo vizitë do të ketë karakter pune ku parashihen takime zyrtare me Ministrin e Shëndetësisë dhe udhëheqësit e institucioneve të ndryshme shëndetësore turke.

 

Do të bisedohet për bashkëpunimin e ndërsjellë dhe ndihma që mund t'i ofrojë Turqia shëndetësinë së Kosovës.

Ministrja e Kosovës do të vizitojë edhe qendrat klinike dhe spitalet turke ku u trajtuan qytetarët tanë gjatë dhe pas luftës pa kompensim, thuhet në një njoftim të Ministrisë së Shëndetësisë.

 

 

Spahia kritikon politikën e UNMIK-ut në Mitrovicë

 

Prishtinë, 25 gusht 2003 - Faruk Spahija, kryetar i komunës së Mitrovicës zhvilloi sot takime me kryeparlamentarin Nexhat Daci dhe kryeministrin Bajram Rexhepi për të marrë përkrahjen e tyre në përpjekjet që po bëhen për bashkimin e qytetit të ndarë të Mitrovicës.

 

Me këtë rast zoti Sahija kritikoi administratën ndërkombëtare në Mitrovicë për prezentim jo të drejtë të gjendjes në këtë qytet, duke kërkuar që të ndryshohet kjo politikë.

"Ne kemi mundësi që të prezentojmë realitetin në Mitrovicë dhe besoj se edhe profesor Daci dhe kryeministri Rexhepi do të bashkohen në përpjekjet për të ndryshuar politikën e UNMIK-ut në Mitrovicë dhe për të treguar një gatishmëri më të madhe", tha Spahia.

 

 

Hari Holkeri mbërriti sot në Prishtinë

 

Prishtinë, 25 gusht 2003 - Kryeadministratori i ri i Kosovës Hari Holkeri mbërriti sot në Prishtinë. Me të arritur në aeroportin e Prishtinës, ku e pritën zyrtarët të lartë të adminiustratës ndërkombëtare në Kosovë, Holkeri nuk bëri asnjë deklaratë për media, por menjeherë u drejtua për në selinë e UNMIK-ut.

Holkeri sot do të marrë pjesë në një tubim përkujtimor kushtuar viktimave të sulmit të paradokohshëm në Bagdad mbi misionin e OKB-së në Irak.

Ndryshe gjatë ditës së nesërme, siç është parlajamëruar Holkeri do të ketë një axhendë të ngjeshur takimesh me përfaqësuesit më të lartë të Kosovës.

 

 

Kryeadministratori Holkeri sot edhe zyrtarisht në krye të Kosovës

 

Prishtinë, 25 gusht 2003 - Kryeadministratori i ri i Kosovës Hari Holkeri sot edhe zyrtarisht nis punën në detyrën e re. Ndërkaq nesër ai do të takojë veç e veç udhëheqësit më të lartë të Kosovës, presidentin Ibrahim Rugova, kryeparlamentarin Nexhat Daci dhe kryeministrin Bajram Rexhepi.

 

 

NATO fillon javën e ardhshme një stërvitje njëmujore në Kosovë

 

Prishtinë, 25 gusht 2003 - Duke filluar nga dita e martë, për një muaj me radhë, mijëra trupa të NATO-s dhe partnerëve të saj, do të përfshihen në një stërvitje të përbashkët në Kosovë, me emrin e koduar "Përgjigja Dinamike 2003", stërvitje kjo që do të zgjerohet edhe në territorin e Bosnjës.

Zëdhënësi i forcave paqëruajtëse në Kosovë, Kris Thomson, tha se kjo stërvitje dëshmon gatishmërinë e NATO-s për vendosjen e shpejtë të forcave ë periudha të shkurtëra kohore, në rajonet ku një gjë e tillë do të mund të ishte e nevojshme.

"Kjo stërvitje vërteton dhe demonstron përkushtimin e vazhdueshëm të bashkësisë ndërkombëtare ndaj paqes, qëndrueshmërisë dhe sigurisë në Kosovë, për qytetarët e saj dhe rajonin në tërësi", tha ai.

Stërvitjet kanë për qëllim verifikimin e trupave rezervë dhe është paraparë të marrin pjesë rreth 6 mijë e 500 pjestarë të forcave të NATO-s dhe disa vendeve partnere të saj, ndërsa operacionet do të udhëhiqen nga komanda e NATO-s për Evropën Jugore.

 

 

Preshevë: Dy të plagsour nga shpërthimi i tri granatave

 

Preshevë, 25 gusht 2003 – Greta Duraku (1988) nga Presheva dhe Tefik Tahiri (1988) nga Kumanova janë plagosur nga shpërthimi i dy granatave të shtunën në mbrëmje në oborrin e Shtëpisë së Kulturës në Preshevë, ndërkaq granata e tretë ka rënë mbi shtëpinë e një serbi. Këto granata janë shkrehur nga një minahedhës dore.

Përfaqësuesit e partive politike të shqiptarëve në Preshevë kanë dënuar këtë incident dhe kanë kërkuar kapjen e autorëve të këtij sulmi.

 

 

Beograd: Deklarata për Kosovën, mbjellje e re e iluzioneve

 

Beograd, 25 gusht 2003 - Gazeta e Beogradit "Politika" në një koment të saj të sotëm pyet se a do të shndërrohet deklarata e paralajmëruar për Kosovën në mbjelljen e re të iluzioneve.

 

Kur deklarata, e cila mund të jetë një dokument politik joobligativ, të shndërrohet në norma kushtetuese, shkruan gazeta, "vetëm atëherë lind problemi i vërtetë: mos vallë Serbia vetvetes do t'ia lidhë duart kur të vijë koha për bisedime".

"Me aprovimin e deklaratës së tillë, pa përgjegje paraprake në shumë dilema", shkruan "Politika", "rrezikohet shumëçka: që pushteti me injorimin e vetëdijshëm të rrethaneve të posakrijuara shpejt të harxhojë kredinë që e kishte fituar pas Millosheviqit".

Sipas kësaj gazete, me përmbajtjen e tillë, deklarata do të ishte vetëm edhe një dokument, i cili me faktin se injoron realitetin, krijon hapësirë për manipulime të ndryshme, dhe për mbjelljen e iluzioneve.

 

 

Trupi i De Melos në Gjenevë

 

Gjenevë, 25 gusht 2003 - Trupi i të dërguarit special të Kombeve të Bashkuara në Irak, Serzho de Melo, ka lënë Rio de Zhaneiron në udhëtimin e fundit drejt Gjenevës, ku edhe do të varroset.

Trupi i De Melos, që humbi jetën në sulmin vetëvrasës me bomba në selinë e OKB-së në Irak, u vendos në Rio gjatë fundjavës për homazhe dyditore nga familja dhe miqtë e tij.

Serzh de Melo është larguar nga vendlindja e tij për herë të fundit, në udhëtimin final drejt vendit ku do prehet, në Gjenevë.

 

Një aeroplan i forcës ajrore ushtarake braziliane e dërgoi trupin pa jetë të diplomatit të OKB-së në Rio de Zhaneiro të shtunën, me kërkesë të nënës së tij plakë që nuk mund të udhëtonte deri në Zvicër për funeralin.

De Melo e kaloi pjesën më të madhe të karrierës së tij 33 vjeçare me OKB-në jashtë Brazilit dhe e veja e tij, bashkë me fëmijët, kanë jetuar në Francë.

 

 

Në një aksident në shtetin Oregon të SHBA-ve, kanë humbur jetën 8 vetë

 

Vejl, Oregon, 25 gusht 2003 – Një kombibus përplot zjarrfikës, është ndeshur me një kamion dhe kështu kanë humbur jetën 8 vetë, kurse janë lënduar edhe dy të tjerë, njofton AP.

 

Zjarrfikësit, të gjithë nën moshën 23-vjeçare, po ktheheshin j nga një vend i përfshirë nga zjarri në shtetin Oregon të SHBA-ve, ku kishin marrë pjesë në shuarjen e tij.

 

 

Në një seri shpërthimesh në Indi kanë humbur jetën 6 vetë dhe janë plagosur edhe 10 të tjerë

 

Nju Delhi, 25 gusht 2003 – Tri shpërthime të njëpasnjëshme bombash e kanë tronditur sot (e hënë) Bombejin, kryeqytet financiar i Indisë, ku kanë humbur jetën 6 persona dhe janë plagosur edhe 10 të tjerë, ka bërë të ditur Televizioni i Nju Delhit, njofton AP.

 

 

Nga shpërthimi i një bombe në Kolumbi janë vrarë shtatë vetë

 

Bogotë, 25 gusht 2003 - Nga shpërthimi i një bombe janë vrarë shtatë vetë dhe 38 janë plagosur, në vendin e quajtur Puerto Riko, në Kolumbi. Përfaqësuesi qeveritar për këtë atentat me bombë ka akuzuar Forcat e Armatosura Revolucionere të Kolumbisë.

 

Bomba ka shpërthyer në momentin kur udhëtarët po zbrisnin nga një anije, kurse bombën po e barte një grua e cila udhëtonte me të njëjtën anije.

 

 

Në një aksident ajror në Haiti kanë vdekur 21 pasagjerë

 

Haiti, 25 gusht 2003 - Në një aksident ajror që ka ndodhur mbrëmë në Haiti, kanë vdekur 21 pasagjerë. Shkaqet e aksidentit nuk janë njoftuar.

 

 

Në një sulm me bombë në qytetin Naxhaf është plagosur kleriku shit, Ajatollah Muhamed Said al-Hakim

 

Bagdad, 25 gusht 2003 – Një klerik musliman shit irakian është plagosur dhe tri roje të tij të sigurimit janë vrarë në një sulm me bombë në qytetin e shenjtë shit Naxhaf, njofton Rojter.

 

Njoftohet se Ajatollah Muhamed Said al-Hakim ka pësuar lëndim të lehtë në qafë gjatë bombardimit të zyrës së tij afër xhamisë së Imam Aliut, kalif dhe kushëri i profetit Muhamed. Po kështu, janë plagosur edhe 10 persona të tjerë.

Ky sulm, thuhet në vazhdim të njoftimit, ka vënë në shënjestër ithtarët e bashkëpunimit me administratën e udhëhequr nga amerikanët në Bagdad.

 

Hakim është dajë i liderit Ajatollah Muhamed Baqir al-Hakim, grupimi i të cilit është përfaqësuar në Këshillin qeveritar irakian të mbështetur nga Uashingtoni.

 

 

Izraelitët vranë katër palestinezë në Gaza

 

Gaza, 25 gusht 2003 - Katër pjesëtarë të grupit militant Hamas u vranë gjatë një sulmi izraelit me helikopterë nga ajri në qytetin e Gazës. Vrasjet, afër një plazhi në qytetin e Gazës, ndodhën vetëm pak ditë pasi një nga udhëheqësit kryesorë të Hamasit u vra gjatë një sulmi tjetër izraelit. Sulmi ka provokuar dënim të pritshëm nga ana palestineze.

Katër persona, që kishin qenë buzë detit në qytetin e Gazës, u vranë nga predhat që ranë prej helikopterëve izraelitë.

Banorë lokalë, palestinezë, konfirmuan se të vrarët ishin pjesëtarë të grupit militant Hamas.

Një zëdhënës i ushtrisë izraelite tha se objektiv i sulmit ishte Ahmed Ashtaw, një komandant i lartë ushtarak i Hamas-it në Gaza dhe përgjegjës për kryerjen e disa vrasjeve.

 

 

Në një seri sulmesh me bomba në stacionet e autobusave në Rusi, janë vrarë 3 persona

 

Moskë, 25 gusht 2003 – Në një seri sulmesh me bomba në stacionet e autobusëve në qytetin e Rusisë Jugore, Krasnodar, janë vrarë tre persona, kurse janë plagosur të pakten 17 të tjerë, njofton BBCnews.

 

Sipas këtij njoftimi, shpërthimet janë akte të kryengritësve çeçenë. Shpërthimet kanë ndodhur në qendra të banuara me një distancë të vogël kohore ndërmjet tyre.

 

 

Në dy shpërthime bombash në Bombei janë vrarë të pakten 41 njerëz

 

Bombei, 25 gusht 2003 – Të paktën 41 vetë janë vrarë në dy shpërthime bombash në Bombei, që është qendër komerciale e Indisë, bën të ditur rrjeti televiziv duke cituar policinë, njofton AFP.

 

Sipas këtyre informacioneve, viktimat janë shpallur të vdekur në tri spitale të veçanta të Bombeit. Ndërkaq, AP njofton edhe për 25 të lënduar në këto shpërthime.

 

 

Mbahen zgjedhjet presidenciale në Ruandë

 

Kigali, Ruandë, 25 gusht 2003 - Në Ruandë sot fillon votimi për zgjedhjet presidenciale, për herë të parë që nga përfundimi i gjenocidit në vitin 1994, kur më shumë se një milion pjesëtarë të komuniteteve Tutsi dhe Hutu qenë vrarë.

Kryetari i përkohshëm, Paul Kagame, është kandidati më serioz për të fituar.

Zoti Kagame, i cili vetë është me origjinë Tutsi, mori kontrollin në vend pas genocidit dhe është përgëzuar për promovimin e pajtimit me komunitetin shumicë Hutu si dhe për përmirësimin e gjendjes së sigurisë.

 

 

Shkelet armëpushimi në Liberi

 

Monravia, 25 gusht 2003 - Rebelët dhe forcat qeveritare në Liberi po akuzojnë njëri-tjetrin për shkelje të armëpushimit në vend.

Radioja shtetërore thotë se gjatë shkeljes së fundit të armëpushimit, janë vrarë shumë vetë dhe u është vënë zjarri fshatrave. Radioja thotë se forcat rebele janë përgjegjëse për sulmet në rajonet përreth Bahnit, në afërsi të kufirit me Bregun e Fildishtë.

Zëvendësshefi i armatës së Liberisë, gjenerali Benjamin Yeaten, i tha agjencisë franceze të lajmeve, AFP, se të dyja grupet e mëdha rebele, LURD dhe MODEL, kanë kryer sulmet në rajon në ditët e fundit.

 

 

Rreth 1000 njerëz janë vrarë dhe shumë fshatrave u është vënë flaka në krahinën Nimba të Liberisë

 

Monrovia, 25 gusht 2003 – Shumë njerëz janë vrarë dhe shumë fshatrave u është vënë flaka në krahinën Nimba, që gjendet në pjesën verilindore të Liberisë, njofton BBCWorld. "Informacionet e mia flasin për masakra, por ne nuk jemi krejt të sigurt se sa njerëz janë vrarë, mund të jenë 100, por mund të jenë edhe njëmij", ka thënë një oficer i lartë ushtark i armatës qeveritare.

 

Andaj, marrëveshja e nënshkruar në Gana javën e kaluar, e cila ngjalli shpresat për përfundimin e luftës 14-vjeçare, mund të marrë fund. Krahina Nimba, ishte një nga zonat e fundit që hyri nën kontrollin e qeverisë dhe ishte një nga bastionet e ish-presidentit Çarls Tejlor në luftën civile të vitit 1990.

Një burim i agjencisë së lajmeve të Liberisë ka thënë gjithashtu se rreth 1.000 njerëz janë vrarë edhe në sulmet në Ban, por s'ka pasur konfirmim të pavarur dhe as se kur kanë ndodhur këto vrasje. Kështu, ndonëse forcat paqeruajtëse gjatë këtyre tri javëve kanë ndihmuar ndaljen e luftimeve në kryeqytetin e Liberisë, Monrovia, përleshjet po vazhdojnë nëpër fshatra gjithandej.

 

 

Aksident automobilistik në Vajzenfels

 

Magdeburg, 25 gusht 2003 - Pesë persona kanë vdekur dhe 17 të tjerë janë plagosur si pasojë e një aksidenti automobilistik në afërsi të Vajzenfelsit në landin Zaksen Anhalt. Personat e aksidentuar po udhëtonin me një autobuz. Sipas Policisë ende nuk janë sqaruar shkaqet e aksidentit.

Copyright©2000-2003 Trepca.net - Të gjitha të  drejtat e rezervuara.