Lajme

E shtune 23 gusht 2003

Përmbajtja:

• Server: Rastet me dhunë të kohëve të fundit në Kosovë e kanë dëmtuar paqen e brishtë

• NATO organzion një stërvitje ushtarake në Kosovë dhe në Bosnjë

• Studentët e UP kanë formuar edhe një organizatë studentore

• Vriten tre ushtarë britanikë në Irak

• Dy ushtarë afganë dhe 4 guerilë talibanë janë vrarë gjatë një shkëmbimi zjarri në Afganistan

• Në një shkëmbim zjarri në Kashnmirin indian, janë vrarë 6 militantë islamikë dhe dy ushtarë indianë

• Zyrtarët tajlandez kanë arrestuar 6 muslimanë të dyshimtë se i përkasin një grupi radikal

• Shpërthen gjatë provave një raketë hapësinore braziliane - vdesin 19 vetë

• Bush parashikon më shumë forca ndërkombëtare në Irak

• Për në Brazil u përcoll trupi i pajetë i Serzho de Melos

• Anan: Shumë vende anëtare do të dëshironin zgjerimin e rolit të OKB-së në Irak

• Rreth 500 ushtarë të Bullgarisë arritën dje në Irak

• Turqia mund të dërgojë paqeruajtës në Irak

• Bush bllokon fondet e 6 liderëve të grupit militant palestinez Hamas

Server: Rastet me dhunë të kohëve të fundit në Kosovë e kanë dëmtuar paqen e brishtë

 

Uashington, 23 gusht 2003 - Rastet me dhunë të kohëve të fundit në Kosovë e kanë dëmtuar paqen e brishtë dhe gjendjen e sigurisë, tha Daniel Server, drejtor i Nismës Ballkanike pranë Institutit Amerikan të Paqes. Në një intervistë që i dha "Zërit të Amerikës", Server tha se krimet ndëretnike sjellin implikime politike dhe e bëjnë shumë të vështirë përparimin qoftë në Kosovë edhe në Serbi.

I pyetur për se cili do të jetë roli i Institutit të Paqes në bisedimet që pritet të zhvillohen midis Prishtinës dhe Beogradit, Server tha se do të ketë një rol, por jo direkt në bisedime. Server paralajmëroi që gjatë javëve të ardhshme të organizojë një trajnim në Prishtinë me pjesëmarrësit në bisedime, për përgatitjen e tyre.

"Ne vetëm se u mësojmë njerëzve teknikat e bisedimeve, ne i kemi mësuar këto teknika në të kaluarën në Kosovë, ne i mësojmë këto teknika edhe në Serbi dhe shpresojmë se ato janë të vlefshme për të gjitha palët dhe fakti që njëra palë t'i dijë teknikat e tjetrit, është diçka e mirë për bisedimet", tha Server, due shtuar se "të dyja palët e kanë pranuar faktin që ne përpiqemi t’i ndihmojmë".

 

 

NATO organzion një stërvitje ushtarake në Kosovë dhe në Bosnjë

 

Prishtinë, 23 gusht 2003 - Që nga 26 gushti e deri më 24 shtator, rreth 6500 pjesëtarë të NATO-s dhe partnerëve të saj do të marrin pjesë në stërvitjen ushtarake të quajtur "Përgjigjja dinamike 2003", kanë bërë të ditur zyrtarët e KFOR-it.

 

Trupat e rezerviste të NATO-s që do të marrin pjesë në këtë stërvitje do të jenë shumëkombëshe. Kjo stërvitje ka për qëllim verifikimin e aftësisë së trupave rezerviste të NAT0-s për angazhimin e shpejtë të tyre në rast nevojë, por nuk ka të bëjë me Bllkanin.

 

Këto stërvitje do të organizohen në Kosovë dhe në Bosnjë e Hercegovinë.

 

 

Studentët e UP kanë formuar edhe një organizatë studentore

 

Prishtinë, 23 gusht 2003 - Studentët e Universitetit të Prishtinë kanë formuar dhe tashmë licencuar edhe një organizatë studentore të quajtur Organizata e Re Studentore.

 

Përfaqësuesit e kësaj organizate thanë se ajo nuk është formuar që të përçajë studentët porse ajo do të merret me organizimin e jetës kulturore, sportive si dhe mbrojtjen e të drejtave të studentëve pa marë parasysh nacionalitetin, përkatësinë fetare apo bindjet e ndryshme të tyre.

Skënder Fetahu, kryetar i Organizatës së Re Studentore thotë se ka organizata e re si synim ka të ngrisë cilësinë në UP në bashkëpunim me mësimdhënsit, rektoratin dhe ministrinë si institucion më i lartë arsimor.

 

"Duke i marrë parasysh parregullësitë, keqpërdorimet dhe neglizhencën në UP lindi kjo organizatë e cila do të ngrisë zërin ndaj këtyre dukurive dhe në bashkëpunim me organet kompetente do t’i eliminojmë të gjitha dukuritë që shkojnë në dëm të studentëve të UP-së", thotë Fetahu.

Këtë ide e përkrahën me nënshkrimet e tyre rreth 2000 studentë.

 

Kjo organizatë si hap të parë do të ketë bashkëpunimin me organizatat e tjera studentore shqiptare dhe ndërkombëtare me synim të integrimit në familjen evropiane.

 

 

Vriten tre ushtarë britanikë në Irak

 

Basra, 23 gusht 2003 - Tre ushtarë britanikë janë vrarë në një sulm ndaj automjetit të tyre në Basra në jug të Irakut.
Një zëdhënës ushtarak britanik në atë qytet konfirmojë vdekjet, duke shtuar se një tjetër ushtarë është plagosur rëndë në këtë sulm.

Sipas korrespondentit të BBC nga Iraku, automjeti i ushtarëve britanikë u qëllua me armë zjarri dhe granatë nga një makinë që kalojë pranë.

Njoftime të tjera thonë se disa civilë irakianë janë plagosur gjatë këtij sulmi.

Dhuna ka shënuar rritje në javët e fundit në Irakun e jugut të kontrolluar nga britanikët.

 

 

Dy ushtarë afganë dhe 4 guerilë talibanë janë vrarë gjatë një shkëmbimi zjarri në Afganistan

 

Kandahar, 23 gusht 2003 – Dy ushtarë afganë dhe 4 guerilë talibanë janë vrarë gjatë një shkëmbimi zjarri në provincën Uruzgan të Afganistanit, njofton Rojter. Guvernatori i Uruzganit ka thënë se një grup prej 250-300 luftëtarësh talibanë kanë luftuar dje pasdite me forcat qeveritare rreth tri orë dhe pastaj kanë ikur.

 

Pos që janë vrarë katrër guerilë, edhe 9 syresh janë kapur, të cilëve, siç thuhet në njoftim, u janë zënë “dokumente të rëndësishme”, pushkë automatike, lanmcues raketorë dhe municion.

 

 

Në një shkëmbim zjarri në Kashnmirin indian, janë vrarë 6 militantë islamikë dhe dy ushtarë indianë

 

Xhamu, Indi, 23 gusht 2003 – Në një shkëmbim zjarri, duke u përpjekur të hyjnë në Kashmirin indian, janë vrarë 6 militantë islamikë dhe dy ushtarë indianë, ka bërë të ditur sot (e shtunë) një zëdhënës indian i Mbrojtjes, njofton AFP.

 

Ky incident ka ndodhur përkundër përpjekjeve të Indisë dhe të Pakistanit për të përmirësuar marrëdhëniet, të cilat kanë qenë në krizë që nga sulmi i militantëve islamikë në parlamentin indian në dhjetor të vitit 2001.

 

 

Zyrtarët tajlandez kanë arrestuar 6 muslimanë të dyshimtë se i përkasin një grupi radikal

 

Bankog, 23 gusht 2003 – Zyrtarët tajlandez kanë arrestuar në veri të vendit 6 muslimanë, ndër të cilët 5 të jashtëm, të cilët dyshohet të jenë pjesëtarë të një grupi radikal, ka deklaruar sot (e shtunë) kryeministri Thaksin Shinavatra, njofton Rojter.

 

Fillimisht ata janë ndaluar nën akuzën e shkeljes se të drejtës së imigracionit, por dyshohet të kenë lidhje me një grup terrorist.

 

 

Shpërthen gjatë provave një raketë hapësinore braziliane - vdesin 19 vetë

 

Brazilia, 23 gusht 2003 - Një rakete braziliane ka shpërthyer në momentin e lëshimit gjatë provave paraprake, duke vrarë të paktën 19 persona. Shpërthimi ishte aq i fuqishëm, saqë shkatëroi raketën dhe vëndin e lëshimit.

Ministri brazilian i mbrojtjes tha se shpërthimi ndodhi kur një nga katër motorat e raketës morri zjarr.
Ai tha se shumë nga viktimat u dogjën deri në atë masë, saqë nuk njiheshin më dhe se numri i viktimave mund të ishte më i madh.

Besohet se të vdekurit ishin në radhët e teknikëve civilë dhe shkencëtarëve.

Raketa pritej të nisej në hapsirë ditën e hënë nga baza e Alkantaras në Oqeanin Atlanatik.

 

 

Bush parashikon më shumë forca ndërkombëtare në Irak

 

Uashington, 23 gusht 2003 -Presidenti Bush ka parashikuar se më shumë trupa nga vende të tjera do tu bashkangjiten forcave amerikane në Irak, ndërkohë që vazhdojnë bisedimet në Kombet e Bashkuara për zgjerimin e pranisë ndërkombëtare atje. Ai tha se administrata e tij po punonte me OKB-në për të kërkuar një përhapje të gjerë.

Por, ai nuk përmendi kërkesën e bërë nga disa vende pjestare të OKB-së, për një hapsirë më të madhe në proçesin e vendim-marrjes në Irak.

 

 

Për në Brazil u përcoll trupi i pajetë i Serzho de Melos

 

Bagdad, 23 gusht 2003 - Me një ceremoni rasti për në Brazil u përcoll trupi i pajetë i Serzho de Melos, ish i dërguari i Kombeve të Bashkuara në Irak. De Melo u vra para tri ditësh, nga pasojat e shpërthimit të fuqishëm që goditën zyrat e organizatës botërore në Bagdad.

 

Në mesin e zyrtarëve të lartë që morën pjesë në këtë ceremoni ishin edhe administratori amerikan civil i Irakut, Pol Bremer, anëtarët e Këshillit qeverisës të Irakut, gjenerali amerikan Rikardo Sançez dhe Romero Lopes da Silva, udhëheqës i misioneve humanitare në Irak.

 

 

Anan: Shumë vende anëtare do të dëshironin zgjerimin e rolit të OKB-së në Irak

 

Nju Jork, 23 gusht 2003 - Sekretari i përgjithshëm, Kofi Anan tha sot se "shumë vende anëtare do të dëshironin ta shihnin zgjerimin e rolit të Kombeve të Bashkuara në Irak. Kofi Anani shpjegoi edhe për veprimet e mundshme të Këshillit të Sigurimit lidhur me Irakun.

 

"Nuk përjashtohet që Këshilli i Sigurimit do të mund të vendoste për transformimin e operacionit në Irak në një mandat të Kombeve të Bashkuara për një forcë shumëkombëshe" – tha sekretari i përgjithshëm Kofi Anan, pas takimit që pati me ministrin e punëve të jashtme të Britanisë, Xhek Stro.

Zoti Stro tha se "nga kolegët e tij në Këshillin e Sigurimit kishte kërkuar arritjen e një konsensusi, e jo që të përcaktojnë normative. "Ajo që ne diskutuam, para se gjithash, ishte se cila do të jetë etapa e ardhshme në Irak.

 

Pra, si mund të bashkohet Këshilli i Sigurimit për ta forcuar mandatin e Kombeve të Bashkuara" – tha me këtë rast, ministri i jashtëm britanik, Xhek Stro.

 

 

Rreth 500 ushtarë të Bullgarisë arritën dje në Irak

 

Sofje, 23 gusht 2003 - Rreth 500 ushtarë të Bullgarisë arritën dje në Irak për të marrë pjesë në misionin paqeruajtës, ka kumtuar ministria e mbrojtjes. Ushtarët bullgarë do t'i bashkohen forcës prej 9 mijë trupash që kryesohet nga Polonia dhe që mbikqyret nga marina e Shteteve të Bashkuara. Në këtë forcë marin pjesë ushtarët e 22 vendeve.

 

 

Turqia mund të dërgojë paqeruajtës në Irak

 

Stamboll, 23 gusht 2003 - Ministri i jashtëm turk, Abdullah Gul, deklaroi se Turqia mund të dërgojë paqeruajtës në Irak. Gul ka thënë për një gazetë vendase se ushtarët turkë do të shkojnë në Irak për ta ndihmuar rindërtimin e tij dhe jo si pushtues.

 

Udhëheqësit më të lartë politikë dhe ushtarakë turkë e kanë diskutuar sot kërkesën e Shteteve të Bashkuara për dërgimin e 1mijë ushtarëve turkë në Irak, mirëpo kjo kërkesë pritet të miratohet nga parlamenti.

 

 

Bush bllokon fondet e 6 liderëve të grupit militant palestinez Hamas

 

Uashington, 23 gusht 2003 - Presidenti amerikan, Xhorxh Bush sot ka shpallur bllokimin e fondeve të 6 liderëve të grupit militant palestinez Hamas dhe të pesë organizatave, që akuzohen se financiarisht e mbështesin këtë grup.

Presidenti Bush ka bërë të ditur se ky veprim është bërë për shkak të sulmit të fundit vetë-vrasës në Jerusalem, në të cilin u vranë 20 persona.

Copyright©2000-2003 Trepca.net - Të gjitha të  drejtat e rezervuara.