Nga seminari rajonal “Të ndërtojmë miqësinë”

  

Dje paradite në një nga sallat e Hotel “Adriatik” në Plazhin e Durrësit u zhvillua seanca e Takimit të parë ballkanik “Të ndërtojmë miqësinë”.   Në këtë veprimtari merrnin pjesë Presidenti i Republikës, zoti Alfred Moisiu, Kryetari i Kuvendit Popullor, Servet Pëllumbi, ministra, deputetë, përfaqësues të partive politike si dhe të ftuar politikanë të vendeve ballkanike e europiane, Presidenti maqedonas Trajkovski, Kryeministri i Kosovës Bajram Rexhepi, zv/presidenti i Bundestagut gjerman Norbert Lambert, kongresmenë amerikanë, etj.   Në fjalën e tij përshëndetëse Presidenti Moisiu e ka cilësuar aktivitetin një nismë pozitive dhe në përputhje të plotë me vullnetin politik të shtetit e të shoqërisë shqiptare për zgjerimin e lidhjeve miqësore me të gjithë popujt e shtetet e rajonit.

    

Në fjalën e tij Presidenti vuri në dukje se ka akoma shumë rrugë dhe punë për të bërë në Ballkan, nisur nga shqetësimet e reminishencave të së kaluarës, që ende shfaqen në disa politikanë e shtetarë ballkanas, të cilët për të fituar mbështetjen e ekstremistëve nuk shkëputen nga ato mentalitete e praktika që e kanë penguar orientimin euro-atlantik të rajonit tonë. “Dimensioni human i politikës dhe politikanëve, besimi te zoti e drejtësia, janë ato vlera që mundësojnë ushtrimin e pushtetit me vëmendje e dhembshuri për njerëzit e thjeshtë. Kjo do të sillte një kthesë të ndjeshme në jetën politike dhe atë shoqërore të rajonit tonë, gjithë vendeve tona”, përfundoi fjalën etij në këtë takim Presidenti Moisiu.

 

 

Takimet e Moisiut

 

Presidenti Moisiu u takua me Presidentin maqedon Trajkovski, kongresmenë amerikanë dhe me nënkryetarin e parlamentit gjerman Lammert.   Në bisedime me homologun maqedonas, Presidenti Moisiu vlerësoi rëndësinë e mbajtjes së këtij Takimi në Tiranë si një shprehje tjetër e vullnetit dhe kontributit të vendit tonë në rritjen e paqes, miqësisë dhe stabilitetit rajonal. Dy Presidentët ndanë pikëpamje të përbashkëta për nivelin e shkëlqyer të marrëdhënieve, si edhe angazhimin për të vijuar punën në thellimin e mëtejshëm të tyre.   Gjatë bashkëbisedimit me kongresmenët amerikanë, Presidenti Moisiu theksoi rëndësinë e takimit të sotëm i cili sipas tij, “synon të shërojë plagët e të kaluarës” duke mbledhur në të njëjtën tavolinë përfaques të lartë shqiptarë, serbë, malazezë, maqedon, etj.

  

Presidenti vlerësoi lart ndihmën dhe mbështetjen amerikane duke nënvizuar faktin se SHBA i u ndodh në krah Shqipërisë dhe shqiptarëve në momentet më të vështira.

 

Ai evidentoi faktin se, shqiptarët në tërësi kanë konsideratë të veçantë për SHBA-në dhe janë të angazhuar për të vijuar punën në rrugën e zhvillimit, paqes dhe stabilitetit rajonal. Nga ana e tyre, kongresmenët në emër të qeverisë së SHBA shprehën falenderimet dhe mirënjohjen për mbështetjen që Shqipëria i ka dhënë SHBA-së në luftën kundër terrorizmit ndërkombëtar, duke dërguar edhe njësi ushtarake në Irak.

 

Gjithashtu, vlerësime të larta ata bënë dhe për punën dhe angazhimin e Presidentit të Republikës në krijimin e një realiteti të ri në Shqipëri, si edhe për rolin e tij aktiv në rritjen e miqësisë e bashkëpunimit rajonal. Kongresmenët shprehën vullentin dhe interesimin direkt të tyre për thellimin e marrëdhënieve dypalëshe në të gjitha fushat. Vlerësime pozitive për Takimin u bënë edhe në bisedën me zvkryetarin e parlamentit gjerman Lammert. Vullneti i përbashkët për zgjerimin e marrëdhënieve dypalëshe, dhe veçanërisht në ato drejtime që lidhen me përpjekjet e Shqipërisë për integrimin europian u shpreh në bashkëbisedimin të Presidentit Moisiu me personalitetet gjermane

  

 

Në Ballkan na duhet që të falim

 

Alfred Moisiu

  

Është kënaqësi për mua që të flas në Takimin e parë ballkanik “Të ndërtojmë miqësinë”. Jam i lumtur që të pranishëm janë Presidenti Trajkovski, ministra, kongresmenë e miq të nderuar nga SHBA si dhe politikanë të vendeve ballkanike e europiane.  Kjo është një nismë pozitive dhe në përputhje të plotë me vullnetin politik të shtetit e të shoqërisë shqiptare për zgjerimin e lidhjeve miqësore me të gjithë popujt e shtetet e rajonit. Marëdhënia e njerut në raport me zotin, nuk është e re. Dëmi më i madh gjatë 45 vjetëve të diktaturës së ashpër komuniste është shkatërrimi i njeriut. Gjithashtu, kjo është një formë tjetër e shprehjes së qartë të frymës së re të mirëkuptimit dhe të bashkëpunimit që po zë vend përditë e më tepër në rajonin tonë. Në këto takime ne njihemi më mirë me njëri-tjetrin, zemë miq të rinj. Populli ynë thotë më mirë një mik se sa një çiflik. 

 

Asnjë brez tjetër qytetarësh dhe politikanësh nuk i ka përjetuar konfliktet e luftën si pasojë e ndarjeve etnike më shumë se sa brezi i sotëm i qytetarëve dhe politikanëve të Ballkanit Perëndimor. Katër luftrat e dekadës së fundit me humbjet dhe dhimbjet e jashtëzakonshme njerëzore e materiale, janë ende të freskëta në kujtesën tonë. Ato nuk mund të mos na vlejnë për të kuptuar qartë se sa i lartë është çmimi i ndarjes etnike, dhunës dhe projekteve nacionaliste. Brezi i ynë mund të jetë i pafat që i takoi të përjetonte luftën, por ne mund të kemi fat që na jepet rasti për të ndërtuar paqen. Këtë mundësi ne duhet ta shfrytëzojmë dhe nuk duhet ta lejojmë që të shpërdorohet.

 

Është rasti të gëzohemi kur shohim tendenca e zhvillime në tërësi demokratike në të gjitha vendet e rajonit, që udhëheqësit e vendeve tona të takohen vazhdimisht me njëri tjetrin si dhe që barrierat ndarëse të së kaluarës po zëvendësohen nga nisma të dobishme bashkëpunimi politik, ekonomik dhe kulturor. Samiti i Ohrit i pesë vendeve të Marrëveshjes së Asociim - Stabilizimit, Samiti i përbashkët i Selanikut midis BE-së dhe Ballkanit Perëndimor, Samiti trepalësh në Tiranë, Karta “Adriatik 3” si dhe samitet dy ose shumëpalëshe në kuadër të projekteve ekonomike e politike, përbëjnë një bazë të mirë për rritjen dhe forcimin e paqes dhe të stabilitetit në rajonit tonë të shumëvuajtur. Mund të themi me modesti se shqiptarët kanë trashëguar brez pas brezi faljen. Shqiptarët dinë të falin dhe ftoj popujt e Ballkanit të falin. 

 

Shteti shqiptar është i vendosur për realizimin e synimit tonë të përbashkët: forcimin e miqësisë, bashkëpunimit, paqes dhe zhvillimit të qëndrueshëm në këtë pjesë të Europës. Themeli i këtij ndryshimi historik është vullneti dhe dëshira e vetë banorëve të vendeve tonë që të jetojnë në paqe e harmoni me njëri tjetrin. 

 

Unë mund t’ju them se vetëm gjatë vitit të fundit zoti Trajkovski dhe unë kemi zhvilluar takime e bisedime numerikisht më shumë sesa të gjitha takimet e bisedat e bëra nga presidentët e dy vendeve marrë së bashku në dekadën e fundit. Po kështu të shpeshta dhe tepër të frutshme kanë qenë takimet që unë kam patur gjatë vitit të fundit me Presidentin e Kroacisë, zotin Mesiç. Me të dy presidentët kemi ndërtuar raporte që shkojnë përtej atyre zyrtare, raporte njerëzore. Nuk mund të lë pa përmendur takimin edhe tonë të fundit për “Korridorin 8” me zotin Parvanov dhe zotin Trajkovski. Ai dha një mesazh të qartë se aq sa janë të rëndësishme komunikimet tona përmes projekteve si ky i transportit, po aq në mos më tepër i rëndësishëm është komunikimi njerëzor midis politikanëve. Unë po ashtu i kam gjetur me vlerë edhe të dobishme takimet e këtyre muajve të fundit me Presidentin e Serbi – Mali i Zi, zotin Maroviç. Këto takime janë pasuar nga takime të kryeministrave, të ministrave dhe të parlamenteve të vendeve tona.

 

Nga ana tjetër nuk mund të mos na shqetësojnë reminishencat e së kaluarës që ende shfaqen në disa politikanë e shtetarë ballkanas, të cilët për të fituar mbështetjen e ekstremistëve nuk shkëputen nga ato mentalitete e praktika që e kanë penguar orientimin euro-atlantik të rajonit tonë. Kjo dëshmon se kemi akoma rrugë dhe shumë punë për të bërë në Ballkan. Sfidat e reja kërkojnë që të gjithë politikanët e Ballkanit të mësohen të shikojnë përpara dhe jo prapa. Kjo është shumë e rëndësishme.

 

Ballkani paraqet një mozaik të pasur vendesh, popujsh, grupesh etnike, besimesh fetare dhe kulturash. Në një mjedis të tillë nuk është e vështirë të nxitësh tensione dhe konflikte. Por ne kemi një fjalë të urtë që thotë se “nuk ka lajm më të mirë sesa të shkosh mirë me fqinjin”. Për njerëzit e vendeve tona, një takim si ky i sotmi, padyshim që është një lajm i mirë. Nuk e gjej të tepërt të them një shprehje shqiptare se mikun dhe shokun mund ta zgjedhësh, por fqinjin ta jep Zoti. Pra Zoti këtë zgjedhje ka bërë ; prandaj të ndërtojmë marrëdhënie të mira.

 

Ne në Shqipëri kemi një shembull mjaft pozitiv të tolerancës dhe harmonisë midis njerëzve me përkatësi besimesh të ndryshme. Gjykoj se, popujt tanë në përgjithësi kanë dëshmuar tolerancë fetare, ndaj është e rëndësishme që politikanët ta rrokin këtë vlerë të popujve dhe ta promovojnë atë më tej. Para Zotit të gjithë jemi të barabartë. Është për t’u përmendur dhe në këtë rast toleranca shqiptare. Unë mund të përmend shembullin e familjes sime me lidhje martesore me besime të ndryshme që bashkëjetojnë në harmoni dhe shembull si ky ka në këtë sallë dhe janë të shumtë në në vendin tonë. 

 

Jam i bindur se takime të tilla ndihmojnë në krijimin e një mjedisi të ngrohtë e produktiv, që kontribuon në rritjen e sigurisë, zhvillimin ekonomik, lëvizjen e lirë të njerëzve dhe hapjen e një prespektive reale paqjeje e mirëkuptimi midis vendeve tona. Mbi të gjitha, besoj se dimensioni human i politikës dhe politikanëve, besimi te zoti e drejtësia, janë ato vlera që mundësojnë ushtrimin e pushtetit me vëmendje e dhembshuri për njerëzit e thjeshtë. Kjo do të sillte një kthesë të ndjeshme në jetën politike dhe atë shoqërore të rajonit tonë, gjithë vendeve tona.. 

 

Ky është mesazhi që marrim dhe zhvillojmë në takimin e sotëm, kjo është sfida e jonë e përbashkët në shekullin e ri. Jam i bindur se përmbushja me sukses e saj do të sjellë ndryshime të mëdha, në dobi të zhvillimit, paqes dhe harmonisë për të gjithë rajonin. 

Copyright©2000-2003 Trepca.net - Të gjitha të  drejtat e rezervuara.