Ahmeti dhe Hoxha në "dyluftim"?

21.08.2003 - Trepca.net

"Rasti" nga TV Siteli

Ahmeti dhe Hoxha në "dyluftim"?


Televizoni maqedonas "Sitel" lajmëroi se janë acaruar relacionet mes drejtuesit të Bashkimit Demokratik për Integrim (BDI), Ali Ahmeti dhe deputetit të pavarur dhe të vetëm të PDK-së, Xhezair Shaqiri. Nga kjo media maqedonase është thënë se kjo vijë mosdurimi vjen gjatë rastit ku në "Çairçane" dëshmor u bë Ridvan Neziri, ish-komandant i parë i Ushtrisë Çlirimtare Kombëtare (UÇK), ku për vrasjen e Ridvanit, Xhezair Shaqiri- Hoxha e akuzoi Ali Ahmetin, duke thënë se "ai qëndron pas këtij akti". Pas publikimit të kësaj akuze, Hoxha, thuhet në "Sitel", ka kaluar në Kumanovë dhe se situata mes të dyve është tejet e tendosur.
Pas një zhvillimi të këtillë të raporteve mes Ahmetit dhe Hoxhës, veçmas në këtë shtëpi informative u plasuan informata se i tërë ky element do të rezultojë me fillimin e një fushate atentatesh "për mbijetim të njërit apo tjetrit".

Pas këtyre liferimeve dhe mosmarrëveshjeve mes kryetarit të BDI-së, Ali Ahmeti dhe deputetit të PDK-së, Xhezair Shaqiri, nuk ka shpëtuar për të mos u informuar edhe faktori ndërkombëtar. Nga ndërkombëtarët bëhet e ditur se nuk do të intervenojë si ndërmjetësues në "rastin" Ahmeti dhe Hoxha, duke komentuar se kryetari i BDI-së, për ta gjoja veç më është i harxhuar dhe zgjidhje ata do të kërkojnë tek ish-kryetari i Komunës së Gostivarit, Rufi Osmani, si lider i ri i ardhshëm i shqiptarëve në Maqedoni. Qarkullojnë informacione se dita-ditës ish-kryetari i Gostivarit do të dalë me një parti të re politike që gëzon përkrahje të madhe te shumica e popullatës, po edhe te ndërkombëtarët.


"Fakti" paralajmëron se do të ndërmjetësojë Haradinaj

Sipas gazetës ditore shqipe "Fakti", kryetari i Aleancës për Ardhmërinë e Kosovës (AAK), Ramush Haradinaj, njëherit edhe ish-strukturë e lartë e Ushtrisë Çlirimtare të Kosovës (UÇK), do të ndërmjetësojë në kapërcimin e mosmarëveshjeve mes kryetarit të BDI-së dhe deputetit të pavarur të PDK-së. Burime partiake në BDI thonë se Ramush Haradinaj gëzon autoritet të madh tek Ali Ahmeti dhe e njëjta vlen edhe për Hoxhën, i cili njihet mirë me Haradinajn. Paradoks i kohës mbetet që ai së shpejti të ftojë liderin e BDI-së dhe deputetin e PDK-së. Po ashtu burime të "Faktit" pohojnë se që të dyve Haradinaj do t'u transmetojë mesazhin se përplasjet personale mes ish-strukturave të Ushtrisë Çlirimtare Kombëtare (UÇK) në masë të madhe dëmtojnë çështjen e shqiptarëve në Maqedoni dhe se ato, në qoftë se nuk ndërpriten deri në shtator, mund të paraqesin uvertyrë në një "vjeshtë kaotike" në skenën politike shqiptare në Maqedoni.

Në qoftë se nuk arrin që "urrejtjen" mes Ahmetit dhe Hoxhës ta shuajë gjatë qëndrimit të tyre në Kosovë, këto burime nuk përjashtojnë mundësinë që Haradinaj, i përforcuar me politikanë të tjerë autoritativ nga Kosova, por ndoshta edhe nga Shqipëria, të vijë edhe në Maqedoni për t'i dhënë fund mosdurimit të shkaktuar mes Ali Ahmetit dhe Xhezair Shaqirit. E tërë kjo, sipas gazetës "Fakti", do të bëhej në funksion të unifikimit sa më të madh të ish-faktorit ushtarak, por edhe atij politik shqiptar që sa më të përgatitur të presin realizimin e projektve që i presin shqiptarët në vend. Deputeti i PDK-së, edhe pse nuk është i njoftuar me ndonjë iniciativë për ndërmjetësim të kryetarit të AAK-së, pranon se megjithate ai gëzon autoritet të madh tek ai, ashtu edhe te lideri i BDI-së.

Bëhet e ditur se mosmarrëveshjet mes Ali Ahmetit dhe Xhezair Shaqirit-Hoxha datojnë që nga viti i kaluar, kur Shaqiri e pati akuzuar Ahmetin se i mban pas vetes autorët e atentatit ndaj tij, të kryer në fund të vitit 2001. Kulminacionin kjo e arriti pas dy javësh kur deputeti i PDK-së, kryetarin e BDI-së, Ali Ahmeti në mënyrë të drejtpëdrejtë e akuzoi se qëndron prapa likudimit nga jeta të Ridvan Nezirit në Shkup, te "Çairçania". Hoxha pati deklaruar se ai dëshiron që edhe ta likuidojë nga skena politike në Maqedoni. Burime të "Faktit" megjithatë thonë se i tërë ky kontest tendencioz do të përfundojë me kyçjen e Haradinajt që t'i qetësojë pasionet në të dyja anët.


Ahmeti nuk është politikan i atentateve

"Të gjitha të dhënat që i plasoi Televizioni Sitel janë spekulime dhe lansimet e tezave të tilla nuk kërkojnë komente të mëtutjeshme. Ali Ahmeti në asnjë moment nuk ka adresuar tentime për likudimin nga jeta të Ridvan Nezirit, për shkak se ai ka qenë ushtar i tij. Këto janë akuza serioze dhe të rënda", thonë për "Lobin" burime partiake në BDI. Sipas po këtyre burimeve, Komandant Hoxha çdoherë ka pasur qëndrim indiferent dhe iritues ndaj kësaj partie dhe deklaratat e tij ndaj BDI-së janë kryekëput në adresë të gabuar, thonë këto burime partiake.

Po nga këto burime merret vesh se ish-Komandant Hoxha ndoshta është i hidhëruar për ate se "ai nuk ka mundur të sigurojë një pozicion të mirë në këtë parti". Në BDI thonë se ata asnjëherë nuk e kanë akuzuar Hoxhën, por ai gjithmonë ka drejtuar akuza në adresë të tyre.

"Ali Ahmeti është lider i një partie në pushtet dhe ai nuk është politikan i atentateve apo vrasës që dalin nga kafiteritë. Ai ka vizion që të reformojë këtë shtet duke avancuar pozitën e shqiptarëve në të. Nuk është kohë që të merremi me çështje të atentateve, për shkak se nuk ka arsye të tilla", thonë burime nga BDI.

Kjo parti nuk është e njoftuar me ndërmjetësimin eventual të kryetarit të AAK-së në "pajtimin e dy ish-prijësve të UÇK-së". "Me Haradinajn jemi miq nga lufta, dhe njihemi mirë dhe ai na çmon dhe e çmojmë, por nuk kemi njohuri se do ndërmjetësojë rreth kësaj çështjeje", thonë burime anonime nga partia në pushtet BDI.


Hoxha: "Me Ahmetin nuk kam kurrfarë problemi"

Xhezair Shaqiri, ish-Komandant Hoxha, thotë se për Televizionin Sitel nuk ka deklaruar se relacionet mes Ahmetit dhe tij janë të acaruara. Sipas tij, kjo ishte një dezinformatë nga kjo media.

Ai thotë se nuk ka kurrfarë problemi me kryetarin e BDI-së, Ali Ahmeti, aq sa paralajmërohet. "Unë lirisht lëviz nëpër qytetin e Tetovës dhe gjetiu dhe nuk jam i mbyllur në zonën e Kumanovës, ashtu siç flitet", thotë Hoxha. Ai shton se Ahmetin nuk e ka akuzuar në mënyrë direkte se ka qenë i përzier në rastin e vrasjes që ndodhi para disa javësh në "Çairçane", por thotë se "i kam akuzuar njerëzit e tij përreth, organizatorët, që e kanë kryer atentatin ndaj meje", thotë Xhezair Shaqiri. Sa për urdhrin për vrasjen te "Çairçania", Hoxha thotë se ajo i takon Ali Ahmetit, ndërsa ekzekutivi i njerëzve të tij përreth dhe ai duhet ta rregullojnë këtë çështje. Sipas tij, BDI gabimisht ia mvesh këtë rast atij. kështu që ndodh më e keqja-që ky koalicion qeveritar në ballë me LSDM-në të ngrejë 6 fletëpëraqitje penale ndaj bashkëluftëtarëve të mi, thotë ai. "Personat të cilët e ka kryer vrasjen në Çairçane kanë qenë persona të maskuar me shtat të madh, ndërsa bashkëluftëtarët e mi atë ditë nuk kanë qenë në atë lagje. Tri ditë i jam lajmëruar Hazbi Likës që të tërheq fletëparaqitjet penale, për shkak se bashkëluftëtarët e mi janë të pafajshëm", thotë Hoxha. Ai qysh në fillim të formimit BDI-së ka deklaruar se kjo parti do të dështojë dhe, siç thotë ai, "Ahmeti bëri përçarje në popull".

"I thashë Kastriot Haxhirexhës dhe Xhevat Ademit që të mos e gabojnë shkrirjen e PDK-së në BDI. Si është e mundur që Ahmeti të thotë se e njeh mirë familjen time që nga viti 1998, kur për çështjen e shkrirjes së PDK-së ai nuk është konsultuar me mua dhe ashiqare është ajo se ai këtë skenar ma ka bërë pas shpine", thotë Hoxha, duke shtuar se "me këtë ai dëshiroi të më likuidojë nga skena politike". Ahmeti, thotë deputeti i PDK-së, deri tash nuk e ka çuar drejt çështjen kombëtare dhe nëse punët do të lëviznin në drejtim të mirë, atëherë unë do t'i dhuroja imunitetin e deputetit dhe do të tërhiqesha nga skena politike, thotë Hoxha. Ai nuk është i informuar se Ramush Haradinaj do të jetë i kyçur në "pajtimin" e tij me Ahmetin.