Deklaratë e Partisë së Re të Kosovës

Prishtinë, 20 gusht 2003 / Nga zyra për informim e PeRK-ut

  

Me rastin e vrasjes së kryeadministratorit të parë të Kosovës, Sergio Vierra de Mello gjatë misionit të tij në Irak, Partia e Re e Kosovës e dënon këtë akt terrorist kundër paqes në Irak. Kosova ka çmuar kontributin e të ndjerit de Mello që ai dha për vendin tonë në ditët e rënda pas luftës. Me këtë rast u shprehim ngushëllimet tona familjes dhe kolegëve të tij në Nju Jork dhe në Prishtinë.

 

Në të njejtën kohë, Partia e Re e Kosovës shpreh lehtësimin e saj që më në fund, policia e UNMIK-ut arrestoi një serb, për të cilin dyshohet se është përgjegjës për vrasjen e policit indian që i shërbente Kosovës . Kjo është hera e parë pas katër vitesh UNMIK-u arreston  një serb, të pandehur për vepër të rëndë kundër tij dhe bashkësisë ndërkombëtare.

 

Partia e Re e Kosovës bën të qartë pozicionin e saj se është energjikisht kundër konfrontimit me bashkësinë ndërkombëtare dhe armiqësimit me të, meqë qytetarët e Kosovës dhe UNMIK-u janë partner në ndërtimit e Kosovës së re. Me këtë rast të arrestimit ajo i shpreh UNMIK-ut mirënjohjen për punën e mirë që bëri.

 

Partia e Re e Kosovës dënon dhe kundërshton me të njejtin vrull dhunën që ushtrohet ndaj qytetarëve në Kosovë. Këtë kundërshtim ajo e bën pa dilemë dhe po aq energjikisht kërkon nga UNMIK-u që sa më shpejt dhe duke mos kursyer asnjë masë, t’i zbulojë edhe krimet e tjera që ndodhën në Kosovë, dhe përgjegjësit ti sjellë para organeve të drejtësisë. Kjo sidomos vlen për vrasjen e fëmijëve në Pejë dhe për vrasjen e fundit qyqare në fshatin Gorozhdec. Vrasjet e fëmijëve dëshmojnë se dhuna në Kosovë ka arritur kulmin e saj dhe se ato paraqesin pikën më të ulët të jetës politike në Kosovë.

 

Prandaj, Partia e Re e Kosovës pret masa dhe punë edhe më të efektshme të policisë, organeve hetimore dhe gjyqësore. Është e pakuptueshme, që përkundër prezencës numerikisht aq masive të forcave policore dhe të KFOR-it në Kosovë, shumica e rasteve po mbesin të pazbuluara. As shoqëria jonë nuk mund ti mbyllë syt para krimit as ti anashkalojë tendencat e anarkisë dhe mbjelljes së frikës tek qytetarët e saj. Si shoqëri, Kosova ende nuk i ka thënë stop dhunës !

 

Partia e Re e Kosovës do të përpiqet që bashkësisë ndërkombëtare t’ia bartë mesazhin e shumicës absolute të qytetarëve të Kosovës se ata nuk janë vrasës të fëmijëve. Shqiptarët e Kosovës vetë kanë përvoja të hidhura me vrasjen e fëmijëve të tyre nga regjimi kriminel serb dhe ato plagë ende i kanë të freskëta.

 

Partia e Re e Kosovës konstaton me pezm faktin që, për të satën herë, sidomos në zhvillimet e fundit, klasa politike e Kosovës dhe institucionet e saj të brishta treguan dështim dhe trullosje të plotë politike. Në defanzivë të pakuptimtë, ata ia hapën dyert kryeministrit serb dhe zëvëndësit të tij zjarrëvënës, që të kalërojnë nëpër Kosovë, duke i lënë shqiptarët të fyer dhe të mllefosur. Ata me të drejtë pyesin: kush është kryeministër i Kosovës dhe a paska ajo institucione? Për Partinë e Re të Kosovës është e qartë se udhëheqja e Kosovës politikën e ka kuptuar vetëm si çështje të pushtetit e jo edhe si obligim dhe përgjegjësi për tu përballë me probleme të rënda. Udhëheqja e Kosovës, çdo ditë e më tepër po e humb besueshmërinë dhe legjitimitetin e saj para qytetarëve.

 

Në fund, Partia e Re e Kosovës konkludon që përfundimisht nuk ka rrugë tjetër pos që bashkësia ndërkombëtare sa më shpejt të fillojë ta organizojë pavarësinë e Kosovës, nën  kontrollin dhe kujdestarinë e OKB-së, SHBA-ve dhe BE. Në Kosovë nuk ka këthim të shtetit serb. Çdo tentativë të tillë shqiptarët do ta kundërshtonin. Nuk është në interesin e bashkësisë ndërkombëtare që gjithçka të rifillojë nga zeroja.

Copyright©2000-2003 Trepca.net - Të gjitha të  drejtat e rezervuara.