Lajme

E hëne 18 gusht 2003

Përmbajtja:

• Presidenti Rugova dënon shpërthimet në qytetin e Mitrovicës

• Kryeparlamentari i Kosovës bisedoi me shefen e re të Zyrës amerikane në Prishtinë

• Kryeparlamentari Daci dhe ministrja Mumxhiu vizitaun Novickin

• Këshilltarët e Presidentit Rugova vizituan Ombudspersonin e Kosovës

• M.Hamiti: Është joproduktive që për një temë kaq delikate të bisedohet në Këshillin e Sigurimit pa pjesëmarrjen e Kosovës

• KMDLNJ: Sulmet, rrahjet dhe shpërthimet nuk shpiejnë askund

• P.Mur: Qasje cinike e Beogradit për t'i dhënë shpresa të rreme serbëve që banojnë në Kosovë

• Sot në Prishtinë i filloi punimet Seminari XXII për Gjuhën, Letërsinë dhe Kulturën Shqiptare

• Sot i fillon punimet Seminari XXII për Gjuhën, Letërsinë dhe Kulturën Shqiptare

• Këshilli i Sigurimit diskuton sot për Kosovën

• Ombudspersoni i Kosovës për shkak të porblemit në zemër është shtrirë në spitalin e Prishtinës

• Serbët rrahin brutalisht udhëtarët shqiptarë në Graçanicë

• Një ekip specialistësh mjeko-ligjorë nga SHBA-të hulumton në Shqipëri ushtarët e rënë amerikanë gjatë LDB-së

• Në dy sulme në stacione policore në Afganistan, 22 vetë të vrarë dhe 4 policë janë marrë peng

• Koreja e Veriut ve kushte për ndalimin e programit bërthamor

• Shpresë për marrëveshje të re

• Bisedimet pa marrëveshje

• Forcat amerikane kanë pranuar se ushtarët e tyre gabimisht kanë vrarë kameramanin e agjencisë Rojters

• Amerikanët pranojnë vrasjen e kameramanit

• Bisedimet palestinezo-izraelite kanë marrë fund pa një marrëveshje përfundimtare

• Vriten gjashtë të burgosur irakianë

• Gjatë protestave në Iran janë vrarë 8 vetë, kurse janë plagosur rreth 150 të tjerë

• Vritet një ushtar danez

• Bremer: Sabotazhi po godet rimëkëmbjen e ekonomisë

• Në një shpërthim bombe në Tel Aviv, ka humbur jetën një grua izraelite

• Afërsisht një në çdo 37 të rritur amerikanë janë burgosur apo janë arrestuar ndonjëherë

• Arrestime të reja në Indonezi

Presidenti Rugova dënon shpërthimet në qytetin e Mitrovicës

 

Prishtinë, 18 gusht 2003 - Presidenti i Kosovës, Dr. Ibrahim Rugova, ka dënuar sot shpërthimet e fundjavës në qytetin e Mitrovicës, ku veprojnë ekstremistët.

Poashtu, Presidenti dënon incidentet në Graçanicë, ku pësuan keqtrajtime e rrahje të rënda qytetarë të Kosovës që ishin në kalim nëpër këtë vendbanim gjatë fundjavës.

Presidenti Rugova kërkon nga autoritetet për zbatim të ligjit që të hetohen këto incidente dhe kryesit e këtyre akteve të nxirren para drejtësisë.

Njëherësh, Presidenti Rugova u bën thirrje qytetarëve që mund të kenë informacion për këto dhe incidente të tjera që të bashkëpunojnë me organet e hetuesisë dhe të sigurisë të Kosovës.

 

 

Kryeparlamentari i Kosovës bisedoi me shefen e re të Zyrës amerikane në Prishtinë

 

Prishtinë, 18 gusht 2003 - "Këshilli i Sigurimit të OKB-së është institucion serioz dhe nuk do të merret me presione, as të Kosovës dhe aq më pak të Serbisë. Kjo është një lëshim i madh i institucioneve tona dhe i UNMIK-ut pse nuk jemi bashkarisht në Nju Jork", tha sot Nexhat Daci, kryetar i Kuvendit të Kosovës pas takimit me shefen e re të Zyrës amerikane në Prishtinë Mersi Ris, duke komentuar mbledhjen e Këshillit të Sigurimit të caktuar për sot.

 

Daci më tutje tha se ka premtimet e të gjitha vendeve që janë të përfaqësuara në Kosovë se nuk do të ndodhë ndonjë akt që do ta turpërojë bashkësinë ndërkombëtare në Kosovë dhe institucionet e Kosovës, sepse nuk është në interes të stabilitetit në rajon dhe të proceseve demokratrike.

Ndryshe në takim është dënuar edhe njëherë vrasje a dy të rinjve serbë në Gorazhdec të Pejës dhe u tha se e ardhmja e Kosovës nuk duhet të vritet nga vrasjet e fëmijëve kosovarë.

Zonja Ris tha se në takim është diskutuar edhe rreth shqetësimeve të shkaktuara nga aktet e fundit të dhunës në Kosovë. Ajo tha se këto akte duhet të marrin fund. Zonja Ris theksoi se SHBA-të kanë nddhmuar zhvillimin e jetës së gjertanishme parlamentare në Kosovë, duke premtuar përkrahjen e mëtejshme amerikane për institucionet e Kosovës.

 

 

Kryeparlamentari Daci dhe ministrja Mumxhiu vizitaun Novickin

 

Prishtinë, 18 gusht 2003 - Kryetari i Kuvendit të Kosovës Nexhat Daci vizitoi obdudspersonin e Kosovës Marek Antoni Novicki, i cili ndodhet i shtrirë në Klinikën interne të Qendrës Klinike Universitare të Prishtinës dhe i uroi shërim të shpejtë.

Por, zoti Daci në bazë të asaj që pa në këtë klinë ishte i tmerruar me kushtet nën të cilat punon jo vetëm ajo por edhe mbarë Qendra Klinike Universitare. "Është koha që ne të bëjmë më tepër për vete dhe të ndihmojmë.

 

Si mund të shërohet një pacient në gjendje parainfrakti ose infrakti kur temperatura në dhomë është mbi 30 gradë celsius", pyeti kryeparlamentari Daci.

Ndryshe për gjendjen shëndetësore të z.Novicki, kardiologu Masar Gashi thotë se është e mirë e stabile dhe nuk pret ndonjë keqësim.

Obudspersonin e Kosovës Novicki sot e ka vizituar edhe ministrja e Shëndetësisë Resmie Mumxhiu, e cila i dëshiroi shërim të shpejtë dhe që ai sa më parë t'i kthehet punëve të përditshme.

 

 

Këshilltarët e Presidentit Rugova vizituan Ombudspersonin e Kosovës

 

Prishtinë, 18 gusht 2003 - Këshilltarët e Presidentit të Kosovës Ibrahim Rugova, z.Skender Hyseni, Muhamet Hamiti dhe Berim Ramosaj, vizituan sot Ombudspersonin e Kosovës, z. Mark Antoni Novickin, i cili është shtrirë në spitalin e Prishtinës pas shqetësimesh kardiake në fundjavë.

Këshilltarët i përcollën zotit Novicki urimet e Presidentit Rugova për shërim të shpejtë.

 

 

M.Hamiti: Është joproduktive që për një temë kaq delikate të bisedohet në Këshillin e Sigurimit pa pjesëmarrjen e Kosovës

 

Prishtinë, 18 gusht 2003 - "Mbledhjen e paralajmëruar për sot (e hënë) në Këshillin e Sigurimit, të thirrur me kërkesë të Beogradit, autoritetet e Kosovës e konsiderojnë të ngutshme dhe joproduktive", tha Muhamet Hamiti, zëdhënësi i Presidentit të Kosovës, Ibrahim Rugova.

"Nuk ka qenë e nevojshme që Këshilli i Sigurimit të OKB-së të mblidhet me kaq nguti në sesion të veçantë për gjendjen e sigurisë në Kosovë, e aq më pak me kërkesë të Beogradit, i cili, me veprime të kohëve të fundit, po gjeneron situata krize në Kosovë, me rrezik të destabilizmit edhe të rajonit", deklaroi sot për QIK-un z. Muhamet Hamiti.

Zoti Hamiti nënvizoi se është joproduktive që për një temë kaq delikate, siç është siguria në Kosovë, të bisedohet në Këshillin e Sigurimit pa pjesëmarrjen e Kosovës.

 

 

KMDLNJ: Sulmet, rrahjet dhe shpërthimet nuk shpiejnë askund

 

Prishtinë, 18 gusht 2003 - Ditëve të fundit, pas vrasjes nga autorë të panjohur dy të rinjve serbë në Gorazhdec të Pejës (më 13 gusht), pos protestave dhe bllokimeve të rrugës në enklavat serbe në pjesë të ndryshme të Kosovës, serbët kanë shpeshtuar sulmet ndaj shqiptarëve, si në veri të Mitrovicës, ashtu edhe gjatë kalimit të shqiptarëve nëpër enklavat serbe.

 

Në shtëpitë dhe banesat e shqiptarëve në veri të Mitrovicës (në Lagjen e boshnjakëve, përkatësisht te Tre rrokaqiejt) janë hudhur bomba dhe granata dore.

 

Janë sulmuar edhe udhëtarët shqiptarë që me automjetet e tyre po kalonin nëpër fshatrat e banuara me serbë (rasti i rrahjes deri në alivanosje i pesë shqiptarëve (në mesin e tyre ishin dy fëmijë) në Graçanicë të Prishtinës; rasti i sulmeve ndaj automjeteve të shqiptarëve në Ranillug të Dardanës etj.), thuhet në një prononcim të KMDLNJ.

Është plotësisht e qartë, thuhet në këtë pronocim të KMDLNJ, se këto sulme janë pasojë e akuzave apriori dhe kuturu të qarqeve politike të Beogradit dhe të serbëve të Kosovës, të cilët faktikisht janë nxitës të këtyre sulmeve.

Këshilli për Mbrojtjen e të Drejtave e të Lirive të Njeriut (KMDLNJ) dënon ashpër sulmet e ditëve të fundit ndaj qytetarëve shqiptarë në pjesë të ndryshme të Kosovës. Bllokimet e rrugëve dhe sulmet ndaj qytetarëve aspak nuk i kontribuojnë shtensionimit të situatës, përkundrazi ato janë hedhje e vajit në zjarr.

KMDLNJ kërkon nga organet e sigurisë në Kosovë (KFOR-i, policia e UNMIK-ut dhe SHPK) që t'i përforcojnë masat e sigurisë në veriun e Mitrovicës dhe në enklavat serbe dhe të veprojnë energjikisht në debllokimin e rrugëve dhe kthimin e sigurisë në këto pjesë të Kosovës, thuhet në fund të këtij prononcimi të KMDLNJ.

 

 

P.Mur: Qasje cinike e Beogradit për t'i dhënë shpresa të rreme serbëve që banojnë në Kosovë

 

Pragë, 18 gusht 2003 - Duke komentuar deklaratën e qeverisë serbe për Kosovën, analisiti i radios "Evropa e lirë" Patrik Mur thotë se "ky është një provokim vërtet i rrezikshëm. Është si të luash me zjarrin".

 

Sipas këtij analisti, një dokument i tillë nuk ka asnjë qëllim konstruktiv, por do të shërbejë vetëm për t'i rritur tensionet. Ndërkaq, duke folur arsyet e Beogradit për të hartuar atë dokument, analisti Mur thotë se e para është politika.

"E dimë që zgjedhjet e përgjithshme do të mbahen brenda një viti në Serbi dhe të gjithë politikanët po ndajnë territoret politike, po përpiqen të kristalizojnë qasjet e tyre paraelektorale, me shpresën se do të fitojnë numrin më të madh të votave. E shohim zotin Çoviç, për shembull, që po i dëgjohet shumë zëri.

 

Pse? Sepse në fillim Gjingjiçi dhe tani Zhivkoviçi e kanë margjinalizuar shumë dhe tash ai po përpiqet ta zgjerojë profilin e tij duke folur sa më shumë që mundet për Kosovën", thotë analisti i "Evropës së lirë" dhe shton se politikanët serbë "mund të flasin pa pushim për Kosovën pa qenë nevoja të premtojnë ndonjë gjë".

 

"Por kjo qasje është shumë cinike pasi po u jepen shpresa të rreme serbëve që banojnë në Kosovë, se do të rikthehen forcat serbe të sigurisë, gjë që nuk do ndodhë kurrë dhe kjo nxit pasionin e tyre", thekson Mur, duke nënvizuar se "kjo është një lojë cinike e llojit më primitiv dhe mendoj se paraqitja e Zhivkoviçit me formulën për Kosovën duhet kuptuar në kontekstin e zgjedhjeve të përgjithshme në Serbi, që po afrohen", thotë mes tjerash analisit i radios "Evropa e lirë".

 

 

Sot në Prishtinë i filloi punimet Seminari XXII për Gjuhën, Letërsinë dhe Kulturën Shqiptare

 

Prishtinë, 18 gusht 2003 - Sot në Prishtinë i filloi punimet Seminari XXII për Gjuhën, Letërsinë dhe Kulturën Shqiptare, i cili do të zgjasë deri më 31 gusht.

Në hapje të seminarit, drejtori i tij, prof. Fadil Raka, tha se Seminari që nga fillimi ka përcjellë mesazhe bashkëpunimi e respekti jo vetëm për botën shqiptare, por edhe për të gjithë ata që i çmojnë vlerat njerëzore. Raka tha se shqiptarët janë të vendosur të shkojnë, jo vetëm drejt integrimeve mbarëshqiptare, por edhe drejt integrimeve rajonale e evropiane.

Duke përshëndetur hapjen e Seminarit, minsitri i Arsimir, Shkencës dhe Teknologjisë Rexhep Osmani tha se ministria që ai detjton do të mbështesë punën dhe veprimtarinë e Seminarit. Ai tha veprimtarinë e Seminarit e sheh si një kontribut të rëndësishëm të shkrimtarëve shqiptarë në Kosovë, në Shqipëri dhe të viset e tjera.

Ndryshe gjatë punës 15 ditëshe të Seminarit do të zhvillohen leksione për gjuhën e letërsinë shqipe, si dhe do të zhvillohen edhe dy sesione shkencore kushtuar shkrimtarit të madh arbëresh Jeronim de Rada dhe gjuhës së arbëreshëve të Italisë. Poashtu do të mbahen disa ligjërata, si për gjuhëtarin e madh shqiptar, Eqrem Çabej, Lidhjen e Prizrenin etj.

 

 

Sot i fillon punimet Seminari XXII për Gjuhën, Letërsinë dhe Kulturën Shqiptare

 

Prishtinë, 18 gusht 2003 - Në Prishtinë sot i fillon punimet Seminari XXII për Gjuhën, Letërsinë dhe Kulturën Shqiptare, ku pritet pjesëmarrja e 110 seminaristëve nga disa vende të jashtme.

 

Drejtori i seminarit prof. Fadil Raka thotë se janë bërë të gjitha përgatitjet e duhura për mbarëvajtjen e punës ssë seminarit.

Në kuadër të seminarit mbahen edhe dy sesione shkencore, njëri kushtuar krijimtarisë së Jeronim de Radës dhe tjetri për të folmen arbëreshe.

Seminiari do të zgjasë deri më 31 gusht.

 

 

Këshilli i Sigurimit diskuton sot për Kosovën

 

Kombet e Bashkuara, 18 gusht 2003 - Sot në selinë e Kombeve të Bashkuara në Nju Jork do të mbahet mbledhja e Këshillit të Sigurimit të OKB-së, në të cilën do të diskutohet për situatën në Kosovë. Kjo mbledhje është caktuar me kërkesë të Beogradit, pas vrasjes së dy serbëve në Gorazhdec të Pejës nga sulmues deri më tash të panjohur.

 

 

Ombudspersoni i Kosovës për shkak të porblemit në zemër është shtrirë në spitalin e Prishtinës

 

Prishtinë, 18 gusht 2003 - Ombudspersoni i Kosovës Marek Antoni Nowicki, dje pasdite për shkak të porblemit në zemër është shtrirë në spitalin e Prishtinës.

Ombudspersoni i Kosovës është nën kujdesën e mjekëve të Qendrës Klinike Universitare në Prishtinë.

 

 

Serbët rrahin brutalisht udhëtarët shqiptarë në Graçanicë

 

Prishtinë, 18 gusht 2003 - Të dielën në mesditë, ndërsa po udhëtonin me veturë pesë shqiptarë janë ndaluar nga një turmë e serbëve të Graçanicës dhe janë rrahur brutalisht deri në alivanosje. Në mesin e të rrahurve janë edhe dy fëmijë.

Turma e serbëve fillimisht ka bllokuar rrugën kryesore dhe më pas ka ndaluar veturën, ka thyer xhamat e saj dhe ka nxjerrë jashtë pesë udhëtarët.

Udhëtarët kanë humbur vetëdijen nga rrahja dhe pasi janë transferuar në Spitalin e Prishtinës e kanë kuptuar se ka ndërhyrë policia dhe i ka shpëtuar nga më e keqja, thotë njëri prej të rrahurve, Riza Salihu.

 

 

Një ekip specialistësh mjeko-ligjorë nga SHBA-të hulumton në Shqipëri ushtarët e rënë amerikanë gjatë LDB-së

 

Uashington, 18 gusht 2003 – Një ekip 10-anëtarësh specialistësh mjeko-ligjorë nga SHBA-të ka filluar javën e kaluar një mision në Belgjikë dhe në Shqipëri, që ka për qëllim identifikimin e ushtarëve të panjohur amerikanë, që kanë humbur jetën gjatë Luftës së Dytë Botërore, bën të ditur Laboratoriumi qendror i Armatës amerikane.

 

Pas kryerjes së këtij misioni në Belgjikë, ekipi do të shkojë në Sheper të Shqipërisë, ku do të hulumtojë disa vendvarrime, ku supozohet të jetë varrosur ekipazhi i zhdukur i aeroplanit C47A, i cili është rrëzuar atje në verë të vitit 1944.

 

Aeroplani dhe ekuipazhi i tij, i përbërë nga pesë ushtarë amerikanë dhe një ushtar britanik, kanë rënë në një vend malor.

 

Njoftimet bëjnë të ditur se pak kohë pas përplasjes, janë gjetur mbeturinat e aeroplanit, kurse ushtarët janë varrosur me nderim në një oborr kishe. Ky ekip specialistësh, pas kryerjes së këtij misioni, do të bëjë identifikimin e ushtarëve të zhdukur në laboratorium.

 

 

Në dy sulme në stacione policore në Afganistan, 22 vetë të vrarë dhe 4 policë janë marrë peng

 

Kabul, 18 gusht 2003 – Vetëm disa orë pas një sulmi të përgjakshëm në një stacion policor, kur u vranë 22 vetë, talibanët e dyshimtë kanë sulmuar edhe një stacion tjetër policor në juglindje të Afganistanit, të cilit ia kanë vënë flakën dhe kanë marrë peng katër policë, kanë bërë të ditur sot (e hënë ) zyrtarët, njofton AP.

 

Sulmi i fundit ka ndodhur mbrëmë në fshatin Taruej në provincën Paktia, disa kilometra nga kfiri pakistanez. Në sulm kanë marrë pjesë disa qindra kryengritës talibanë. Policët tjerë kanë ikur dhe ende nuk kanë vënë kontakt me autoritetet. Një polic ka thënë se në këtë zonë janë gjetur edhe tre trupa të pajetë, por nuk dihet kush janë dhe si kanë humbur jetën.

 

 

Koreja e Veriut ve kushte për ndalimin e programit bërthamor

 

Phenian, 18 gusht 2003 - Koreja e Veriut thotë se nuk do t'i japë fund programit të vet të armëve bërthamore, deri sa Shtetet e Bashkuara ta ndryshojnë politikën ndaj Phenianit.

 

Sipas Agjencisë Zyrtare të Lajmeve të Koresë së Veriut, Pheniani do të arrijë në përfundimin se politika e Shteteve të Bashkuara ka ndryshuar, vetëm në se Uashingtoni nënshkruan një pakt jo-agresioni dhe vendos marrëdhënie diplomatike me shtetin komunist.

 

Koreanoveriorët thonë se Shtetet e Bashkuara gjithashtu duhet ta bëjnë të qartë se nuk do të pengojnë tregëtinë e jashtme të Pheninait.

Në se Uashingtoni nuk le të kuptohet qartë se politika e tij do të ndryshojë, thotë agjencia koreanoveriore e lajmeve, Pheniani do të deklarojë në bisedimet 6-palëshe që do të zhvillohen në fund të këtij muaji në Pekin, se do ta vazhdojë programin e vet të armëve bërthamore.

Sipas planit, diplomatë nga Shtetet e Bashkuara, Koreja e Veriut, Koreja e Jugut, Rusia dhe Kina, do të takohen në Pekin për një takim tri ditor, i cili fillon më 27 gusht.

 

 

Shpresë për marrëveshje të re

 

Monrovia, 18 gusht 2003 - Përfaqësuesi i Kombeve të Bashkuara në Liberi, Jacques Klein, tha se shpreson që fraksionet pjesëmarrëse në bisedimet paqesore në Ganë, do të nënshkruajnë sot marrëveshjen për të krijuar një qeveri të përkohshme.

Zoti Klein i tha BBC-së se marrëveshja e paqes për Liberinë ishte shumë afër, por vetëm një grup po e refuzon atë duke luftuar më shumë për pozita personale se sa për diçka thelbësore.

 

 

Bisedimet pa marrëveshje

 

Jerusalem, 18 gusht 2003 - Bisedimet palestinezo-izraelite për të finalizuar dorëzimin tek palestinezët, të disa qyteteve të tjera në Bregun Perëndimor, kanë përfunduar pa ndonjë marrëveshje, për kalendarin e veprimeve.

Më parë ishte njoftuar se ishte arritur një marrëveshje për dorëzimin e katër qyteteve në javët e ardhshme.

Pas një jave që ishte dëshmitare e dy bombave vetvrasëse palestineze dhe vrasjes së një militanti nga forcat izraelite, të dy palët kanë premtuar të ecin përpara me planin ndërkombëtar të paqes.

 

 

Forcat amerikane kanë pranuar se ushtarët e tyre gabimisht kanë vrarë kameramanin e agjencisë Rojters

 

Bagdad, 18 gusht 2003 - Forcat amerikane në Irak kanë pranuar se ushtarët e tyre të dielën gabimisht kanë vrarë kameramanin e agjencisë Rojters, Mazen Dan.

Ushtarët, sipas të gjitha gjasava, kanë menduar se kamera e tij është raketahedhës dore, andaj kanë hapur zjarr.

Ndryshe çdo gjë ka ndodhur në Bagdad ndërsa kamaremani i Rojterit po xhironte burgun Abu Graib, një nga objektet e tilla më të mëdha në Lindjen e Mesme. Me atë rast janë vrarë gjashtë e janë plagosur rreth 60 të burgosur.

 

 

Amerikanët pranojnë vrasjen e kameramanit

 

Uashington, 18 gusht 2003 - Pentagoni ka konfirmuar se trupat amerikane kanë qëlluar dhe vrarë një kameraman që punonte për agjencinë e lajmeve Reuters.

Incidenti ndodhi pranë një burgu në perëndim të Bagdadit.

Personi i vrarë quhej Mazen Dana, një palestinez i përshkruar nga agjencia e lajmeve Reuters si një prej kameramanëve më të mirë të saj. Ai kishte shkuar për të filmuar tek një burg në perëndim të Bagdadit.

 

 

Bisedimet palestinezo-izraelite kanë marrë fund pa një marrëveshje përfundimtare

 

Ramallah, 18 gusht 2003 - Zyrtarët palestinezë dhe izraelitë kanë njoftuar se bisedimet e mbrëmshme rreth kthimit të qyteteve në Bregun Perëndimor nën kontrollin palestinez kanë marrë fund pa një marrëveshje përfundimtare të dy palëve.

Paralajmërohet se gjatë kësaj jave Izraeli po përgatitet të tërhiqet nga Jerehoni dhe Kalkilia dhe diçka më vonë nga Tulkaremi dhe Ramllahu.

Zyrtarët e të dy palëve kanë njoftuar se bisedimet do të vazhdojnë edhe ditëve të ardhshme.

 

 

Vriten gjashtë të burgosur irakianë

 

Bagdad, 18 gusht 2003 - Zyrtarë ushtarak të Shteteve të Bashkuara në Irak, thonë se gjashtë të burgosur irakianë janë vrarë pas një sulmi me mortaja mbi një burg në Bagdad. Pesëdhjetë e nëntë të tjerë u plagosën. Sulmi besohet të jetë kryer të shtunën mbrëma.

Incidenti ndodhi në burgun Abu Garib, në paralagje të qytetit.

Tre të burgosur vdiqën në vendngjarje, ndërkaq tre të tjerë vdiqën më vonë si pasojë e plagëve të marra. Autoritetet ushtarake amerikane po i zhvillojnë hetimet rreth sulmit.

 

 

Gjatë protestave në Iran janë vrarë 8 vetë, kurse janë plagosur rreth 150 të tjerë

 

Teheran, 18 gusht 2003 – Gjatë protestave në Iranin Qendror, që ndodhën pas propozimeeve për ripërkufizimin e kufijve lokalë, janë vrarë 8 persona, kurse rreth 150 të tjerë janë plagosur, kanë bërë të ditur sot (e hënë) mediat shtetërore, njofton BBCnews.

 

Dy nga të vrarët gjatë përleshjeve në qytetin Samirom, në provincën Isfahan, kanë qenë oficerë policorë, kanë thënë zyrtarët. Pamjet televizive nga Samiromi, 530 km në jug të kryeqytetit Teheran, paraqesin shtëpi të shkatërruara, automjete të ndezura, rrugë përplot me gurë dhe xhama të thyer.

 

 

Vritet një ushtar danez

 

Bagdad, 18 gusht 2003 - Një ushtar danez, që po shërbente me forcat britanike në jug të Irakut, është vrarë pas një përleshjeje, gjatë natës, më irakianë të armatësor në afërsi të qytetit Basra. Dy irakianë u vranë gjithashtu.

Përleshja ndodhi pasi një kamion irakian u ndalua - dhe një zëdhënës britanik thotë se ata kishin vjedhur kablo elektrike.

Është kjo vrasja e parë e një ushtari danez nga kontigjenti prej katërqind ushtarësh, që nga dislokimi i tyre në korrik.

 

 

Bremer: Sabotazhi po godet rimëkëmbjen e ekonomisë

 

Bagdad, 18 gusht 2003 - Administratori amerikan në Irak, Pol Bremer, tha se sulmet e vazhdueshme të sabotazhit po e godasin rimëkëmbjen e ekonomisë irakiane.

Ai tha se sulmi me bomba mbi një tubacion kyç të naftës ditën e premte ka shkaktuar humbje prej shtatë milionë dollarësh në ditë. Aktet e sabotazhit thuhet se kanë shkaktuar dëmtim të ujësjellësit në Bagdad, që la pjesë të qytetit pa ujë dhe shkaktoi vërshima në rrugët e qytetit.

 

 

Në një shpërthim bombe në Tel Aviv, ka humbur jetën një grua izraelite

 

Jerusalem, 18 gusht 2003 – Një grua ka humbur jetën dhe të pakten tre persona janë plagosur në një shpërthim bombe afër hyrjes së një restorani të popullarizuar në qendër të Tel Avivit, kanë bërë të ditur sot (e hënë) shërbimi policor dhe ai i zjarrfikësve, njofton AFP. Gruaja ka vdekur në spital, kurse në momentin e shpërthimit është gjendur ose në ashensor ose në pullaz.

Në një njoftim të mëhershëm, ekipet e shpëtimit kanë thënë se në këtë incident janë plagosur katër persona dhe se shkaku i shpërthimit mund të ketë qenë shpërthimi i një bombole gazi. Por, më vonë, shërbimi i zjarrfikësve ka gjetur në vendngjarje lëndë shpërthyese.

 

Policia s'e ka komentuar shkakun e shpërthimit dhe s'e ka përjashtuar mundësinë e aksidentit. S'ka indikacione se shpërthimi ka lidhje me konfliktin izraelito-palestinez, thuhet në fund të këtij njoftimi.

 

 

Afërsisht një në çdo 37 të rritur amerikanë janë burgosur apo janë arrestuar ndonjëherë

 

Uashington, 18 gusht 2003 – Sipas një analize në fund të vitit 2001, afërsisht një në çdo 37 të rritur amerikanë janë burgosur apo janë arrestuar ndonjëherë, ka bërë të ditur qeveria amerikane, njofton AP.

 

Në këtë analizë thuhet gjithashtu se 5.6 milionë njerëz me "përvojë burgu" përbëjnë rreth 2.7 për qind të popullatës së rritur prej 210 milionësh, sa është konstatuar se kanë qenë ajo në dhjetor të vitit 2001.

 

Ky studim i Departmentit amerikan të Drejtësisë bën fjalë për njerëzit që kanë vuajtur dënimet për krime në burg federal apo shtetëror dhe jo për ata që janë ndaluar përkohësisht në burg.

 

 

Arrestime të reja në Indonezi

 

Xhakartë, 18 gusht 2003 - Policia në Indonezi thotë se ka arrestuar 10 veta në lidhje me bombardimin e një hoteli luksoz në Xhakarta më herët këtë muaj.

Dymbëdhjetë persona u vranë nga shpërthimi në hotelin marriot dhe deri në 150 u plagosën.

Lajmi i arrestimeve, thotë një korrespondente e BBC-së në rajon, erdhi në mes masave në rritje të sigurisë ndërsa Indonezia feston pavarësinë nga regjimi kolonial hollandez.

Copyright©2000-2003 Trepca.net - Të gjitha të  drejtat e rezervuara.