Lajme

E shtune 16 gusht 2003

Përmbajtja:

• Mbrëmë ka ndodhur edhe një shpërthim në Mitrovicë

• Pas katër vjetësh është identifikuar kufoma e veprimtarit të LDK-së nga Klina, Hamit Krasniqit

• Podujevë: Mbi 15 milionë euro vlerësohet dëmi nga breshëri

• Kombet e Bashkuara hedhin poshtë kritikat e Beogradit zyrtar se Misioni i tyre në Kosovë ka dështuar

• Departamenti amerikan i Shtetit dënoi vrasjen e dy të rinjve serbë në Gorazhdec të Pejës

• Në Gorazhdec të Pejës dje u bë varrimi i të dy të rinjve serbë

• Harri Holkeri ka angazhuar një prokuror special ndërkombëtar për zbulimin e vrasësve të dy serbëve në Gorazhdec

• U lëshua në përdorim një vendkalim i ri kufitar midis Kosovës dhe Maqedonisë

• Formacioni ekstrem serb "Rojat e urës" është duke u rigrupuar në veri të Mitrovicës për të vazhduar dhunën ndaj shqiptarëve

• Në Fabrikën e Vajit në Ferizaj ka shpërthyer një zjarr i madh

• Gjykata për kundërvajtje e Kurshumlisë Pajazit Podvoricës i ka caktuar paraburgimin prej 51 ditësh

• Administrata e Bushit do të vazhdojë të mbajë sanksionet kundër Libisë

• Libia pranon fajin për Lokerbi

• Hetime rreth ndërprerjes eletrike në Amerikën Veriore

• Vdes diktatori Idi Amin

• Aspirina, rrezik gjatë shtatëzanisë

• Metroja e Nju Jorkut ka filluar shërbimin sot heret pas 36 orë ndërprerje

• Vriten pesë ushtarë rusë në Çeçeni

Mbrëmë ka ndodhur edhe një shpërthim në Mitrovicë

Mitrovicë, 16 gusht 2003 - Mbrëmë në pjesën veriore të Mitrovicës përsëri ka ndodhur një shpërthim. Sipas zëdhënësit të SHPK-së në Mitrovicë Besim Hoti, që citohet nga radiot lokale, shpërthimi ka ndodhur afër shtëpisë së një shqiptari, por nuk ka të lënduar, përveç dëmeve materiale.

Kjo është nata e tretë me radhë që ndodhin shpërthime në pjesën veriore të Mitrovicës ku banojnë shqiptarët.

  

Pas katër vjetësh është identifikuar kufoma e veprimtarit të LDK-së nga Klina, Hamit Krasniqit

 

Klinë, 16 gusht 2003 - Katër vjet pas zhdukjes, në morgun e Rahovecit është identifikuar kufoma e Hamit Krasniqit, veprimtar i dalluar i LDK-së dhe kryetar i Komisionit për informim i kësaj partie në degën e Klinës.

 

Familjarët e tij thanë se kufoma e tij është gjetur në shtator të vitit të kaluar në varrezat e Rahovecit, por meqë nuk ka mundur të bëhet identifikimi, është varrosur në varrezat e Therandës (Suharekës).

 

Mirëpo, ditë më parë kufoma e tij është zhvarrosur për t'u bërë analizat e ADN-së dhe përfundimisht është konstatuar se ajo është e Hamit Krasniqit të zhdukur para katër vjetëve.

Sipas kryetarit të komunës së Klinës, Ramë Manajt, Hamit Krasniqi është ndaluar nga forcat serbe në periferi të Klinës më 28 mars 1999 dhe që nga ajo ditë nuk dihej më për të.

Hamit Krasniqi do të rivarroset javën e arddhshme.

 

 

Podujevë: Mbi 15 milionë euro vlerësohet dëmi nga breshëri

 

Podujevë, 15 gusht 2003 - Komisioni qendror i formuar nga Komiteti i Krizës për vlerësimin e dëmeve nga fatkeqësia elementare (stuhia dhe breshëri) e datës 25 korrik, e cila ndodhi në rajonin e Llapit, vlerësoi se dëmi i shkaktuar kalon shumën prej 15 milionë eurosh.

Kryetari i komisionit Rasim Fejza tha se në bazë të mbledhjes, grumbullimit dhe analizës së të dhënave e informacioneve, pas vizitave në fshatra dhe qytetin e Podujevës, komisionet konstatuan se vlerësimi përfundimtar përfshinë 37 lokalitete të vizituara, 32 prej të cilave janë të goditura, nga shiu dhe breshëri.

 

Ai pohoi se Komisioni Qendror i Komitetit të Krizës ka konstatuar se dëmet më të mëdha janë shkaktuar në bujqësi, ndërtimtari, ekonomi dhe biznese, institucione shkollore e shëndetësore por edhe në autovetura të qytetarëve.

Në raportin e publikuar të këtij komisioni rezulton se në bujqësi dëmet kapin shumën prej 14.012.301 eurosh, në ndërtimtari 887.869 dhe biznese të ndryshme e institucione shkollore e shëndetësore 196.900, që do të thotë se shuma e përgjithëshme e dëmeve është 15.097.070 euro.

 

Mirëpo, sipas komisionit komunal për vlerësimin e dëmeve në shumën e përllogaritur nuk hyn dëmi i shkaktuar në automjete sepse pronarët e tyre ato i kanë lajmëruar në SHPK, Drejtorinë për Mbrojtje Civile dhe Emergjencë (DMCE) dhe Agjensionet e sigurimeve.

Fejza tha se Komisioni Qendror për verifikimin e dëmeve (KQVD) të gjitha të dhënat për dëmet i ka të evidentuara dhe të llogaritura veç e veç për secilin fshat dhe vet qytetin e Podujevës. KQVD njofton se nga 69 familje dhe qytetarë që kanë kërkuar ndihmë emergjente në folie për mbulimin e pullazeve të dëmtuara, 54 prej tyre e kanë realizuar ndihmën.

Kryetari i Komitetit të krizës dhe kryetari i komunës së Podujevës Agim Veliu ka apeluar institucionet e Kosovës dhe ato ndërkombëtare, që ta ndihmojnë popullatën e cila ka pësuar dëme të mëdha.

 

 

Kombet e Bashkuara hedhin poshtë kritikat e Beogradit zyrtar se Misioni i tyre në Kosovë ka dështuar

 

Nju-Jork, 16 gusht 2003 - "Kombet e Bashkuara hedhin poshtë akuzat e Beogradit zyrtar se Misioni i tyre në Kosovë ka dështuar, proces të cilin ne edhe më tutje e inkurajojmë, e ai është standardet para statusit përfundimtar të Kosovës", tha për radion "Evropa e lirë", Faran Hak zëdhënës i OKB-së.

 

Ai ka shtuar se "ky është dështim i palëve në terren që të jetojnë së bashku dhe ne po përpiqemi që t'i ofrojmë bashkësitë në mënyrë që të kemi një Kosovë të bashkuar". "Padyshim se kjo lloj dhune dëshmon se ne nuk e kemi arritur ende këtë synim dhe se kemi shumë për të bërë", tha zëdhënësi i OKB-së Hak.

 

Ai shtoi se anëtarët e KS të OKB-së kërkojnë që të bëhen të gjitha përpjekjet për të arrestuar autorët e vrasjes së dy serbëve në Gorazhdec dhe ata të dalin përpara drejtësisë. Hak theksoi se institucionet vetëqeverisëse të Kosovës janë të angazhuara për pajtimin ndëretnik.

Në vazhdim ai ka veçuar edhe arritjet që Misioni i OKB-së ka bërë në Kosovë. "Ne kemi kuvendin, kryeministrin, kemi më shumë përparime në përmirësimin e punës së policisë së Kosovës si dhe në jetën e përditshme nga administratat e komunave deri tek shkollat.

 

Kjo tregon se ka një numër gjërash që e bëjnë popullin e Kosovës ta ndjejë se ka kontrollë në një shkallë të caktuar mbi jetën e vetë", tha zëdhënësi i OKB-së.

 

 

Departamenti amerikan i Shtetit dënoi vrasjen e dy të rinjve serbë në Gorazhdec të Pejës

 

Uashington, 16 gusht 2003 - Departamenti amerikan i Shtetit dënoi vrasjen para dy ditësh të dy të rinjve serbë dhe plagosjen e katër të tjerëve në Gorazhdec të Pejës. Në një deklaratë zëdhënësi thotë se ata që kanë kryer këtë krim kundër të rinjve të pafajshëm janë armiq të paqes në Kosovë dhe kërcënim ndaj asaj që Shtetet e Bashkuara të Amerikës dhe komuniteti ndërkombëtar po përpiqen të arrijnë në Kosovë.

 

Duke vënë në shënjestër të rinjtë dhe aftësitë e tyre për të ndërtuar një Kosovë më të mirë pa dhunën e së kaluarës, ata sulmuan vetë të ardhmen e Kosovës, thuhet në deklaratë.

Qeveria e SHBA-ve, thotë zëdhënësi i Departamentit të Shtetit, u shpreh simpati më të thellë familjeve të viktimave dhe komuniteteve të tyre, ku mbajnë zi për humbjen e tyre.

 

 

Në Gorazhdec të Pejës dje u bë varrimi i të dy të rinjve serbë

 

Pejë, 16 gusht 2003 - Dje pasdite në fshatin Gorazhdec të komunës së Pejës u bë ceremonia e varrimit të dy të rinjve serbë të vrarë dy ditë më parë. Në këtë ceremoni varrimi morën pjesë edhe kryeministri i Serbisë Zoran Zhivkoviq dhe zëvendësi i tij Nebojsha Çoviq.

 

Policia ndërkombëtare në Kosovë nuk ka lejuar gazetarët e përkatësive joserbe të përcjellin ceremoninë e varrimit dhe kjo është bërë, siç thonë zyrtarët e policisë, për shkaqe sigurie.

Zhivkoviq ka thënë në këtë varrim se kërkesat për kthimin e ushtraisë dhe policisë serbe në Kosovë do të paraqesin vetëm një krekosje të panevojshme meqë po të ktheheshin ato do të përballeshin, siç është shprehur ai, me "terroristët e armatosur shqiptarë".

 

 

Harri Holkeri ka angazhuar një prokuror special ndërkombëtar për zbulimin e vrasësve të dy serbëve në Gorazhdec

 

Prishtinë, 16 gusht 2003 - Kryeadministratori ndërkombëtar për Kosovën Harri Holkeri ka angazhuar një prokuror special ndërkombëtar për të udhëhequr ekipin hetues për zbulimin e autorëve të sulmit ndaj dy serbëve të vrarë në Gorazhdec të Pejës, njoftuan burimet e administratës ndërkombëtare në Kosovë.

 

 

U lëshua në përdorim një vendkalim i ri kufitar midis Kosovës dhe Maqedonisë

 

Shkup, 16 gusht 2003 - Nga dy vendkalimet kufitare që do të hapen midis Maqedonisë dhe Kosovës, dje u lëshua në përdorim vendkalimi kuifitar i përkohshëm Trezimir - Restelicë. Autoritetet maqedonase dhe të UNMIK-t në Kosovë vlerësuan se ky vendkalim para se gjithash do t'u shërbejë fshatrave pranë këtij vendkalimi për të kryer pa probleme punët bujqësore.

Ministria e Brendshme e Maqedonisë thotë se ky vendkalim kufitar do të funksionojë në periudhën prej 1 prillit deri më 1 nëntor në orar pune prej 7:00 të mëngjesit deri në 19:00 në mbrëmje.

 

 

Formacioni ekstrem serb "Rojat e urës" është duke u rigrupuar në veri të Mitrovicës për të vazhduar dhunën ndaj shqiptarëve

 

Mitrovicë, 16 gusht 2003 - Një burim ndërkombëtar në Mitrovicë ka deklaruar se formacioni ekstrem serb "Rojat e urës" është duke u rigrupuar në pjesën veriore të Mitrovicës, për të vazhduar, siç thuhet, dhunën ndaj shqiptarëve që jetojnë në atë pjesë të qytetit, njoftojnë mediat lokale.

 

Ky burim ndërkombëtar nuk ka përjashtuar mundësinë që një valë e re e dhunës ta përfshijë pjesën veriore të Mitrovicës, ngase siç thuhet, serbët në pjesën veriore të Mitrovicës janë shumë të zemëruar për atë që ka ndodhë dy ditë më parë në fshatin Gorazhdec të Pejës.

 

 

Në Fabrikën e Vajit në Ferizaj ka shpërthyer një zjarr i madh

 

Ferizaj, 16 gusht 2003 - Në orët e vona të pasditës së djeshme në oborrin e Fabrikës së Vajit në Ferizaj ka shpërthyer një zjarr i madh. Mirëpo, falë intervenimit të shërbimit të zjarrfikësve dhe pjesëtarëve të TMK-së është evituar më e keqja, sepse zjarri ka mundur të përhapej edhe në objektet përcjellëse të fabrikës.

 

Komandanti i Shërbimit të Zjarrfikësve në Ferizaj Adil Osmani deklaroi se zjarri është vënë nën kontroll dhe se njësitet e zjarrfikësve janë në gjendje gadishmërie.

 

 

Gjykata për kundërvajtje e Kurshumlisë Pajazit Podvoricës i ka caktuar paraburgimin prej 51 ditësh

 

Prokuple, 16 gusht 2003 - Patrulla e ushtrisë serbe ka arrestuar më 12 gusht Pajazit Podvoricën nga Podujeva dhe ia ka dorëzuar policisë në rajonin e Merdarit, pasi siç thuhet, kishte hyrë në zonën tokësore të sigurisë në vendkalim të palejueshëm, ka thënë gjykatësi për kundërvajtje i Kurshumlisë.

 

Gjykatësi i ka caktuar Pajazit Podvoricës paraburgimin prej 51 ditësh. Gjatë arrestimit tek ai nuk janë gjetur kurrfarë armësh, kurse organet e hetuesisë do të përcaktojnë qëllimin e kalimit të tij në territorin e Serbisë tek komuna e Korshumlisë, thuhet në një njoftim.

 

 

Administrata e Bushit do të vazhdojë të mbajë sanksionet kundër Libisë

 

Uashington, 16 gusht 2003 – Administrata e Bushit do të mbajë sanksionet kundër Libisë përkundër pranimit të saj të përgjegjësisë për bombardimin e aeroplanit panamerikan më 1988, njofton AP.

 

Sekretari amerikan i Shtetit, Kolin Pauell, ka thënë gjithashtu se Libia do të mbetet në listën amerikane të shteteve sponsore të terrorizmit, që bart mbi vete ndëshkime ekonomike shtesë.

 

Por, duke njohur meritën e Libisë për pranimin e përgjegjësisë dhe kompesimin e familjeve të 270 viktimave të bombardimit të aeroplanit në fjalë mbi Skotlandë dhe dorëzimin e dy libianëve të dyshimtë, Shtetet e Bashkuara nuk do të kundërshtojnë heqjen formale të sanksioneve kundër Libisë nga ana e Kombeve të Bashkuara, ka thënë Pauell.

 

 

Libia pranon fajin për Lokerbi

 

Tripoli, 16 gusht 2003 - Libia ka pranuar edhe zyrtarisht përgjegjësinë për vendosjen e bombës që shpërtheu mbi qytetin skocez, Lokerbi, në vitin 1988 në të cilin humbën jetën 270 vetë. Ky hap mund të mundësojë heqjen e sanksioneve të Kombeve të Bashkuara si dhe mund të hapë rrugë për kompensimin prej 2.7 milirada dollarë për familjet e viktimave.

Por Shtetet e Bashkuara kanë thënë se do të mbajnë sanksione bilaterale mbi Libinë.

Deklarata e Shtëpisë së Bardhë në vazhdim thotë se Uashingtoni ende është i shqetësuar sa i përket synimit nga Libia të armëve të shkatërrimit masiv, shkeljen e të drejtave të njeriut dhe mungesës së institucioneve demokratike.

 

 

Hetime rreth ndërprerjes eletrike në Amerikën Veriore

 

Uashington, 16 gusht 2003 - Shtetet e Bashkuara dhe Kanada do të vendosin një komision i cili do të përpiqet të gjejë se çfarë e shkaktoi ndërprerjen më të madhe në historinë e Amerikës Veriore duke i sjellur disa nga qytetet më të mëdha te këtij rajoni në gjendje të palëvishme.

Rrjetet e energjisë elektrike për prodhimin e rrymës të dy vendeve janë të ndërlidhura dhe secila palë ka fajësuar njëra tjetrën për këtë krizë.

Rryma elektrike në shumë pjesë është rivendosur gradualisht, por ende ka shumë probleme. Në Nju Jork ka shumë vetë të bllokuar për shkak të mosfunksionimit të rrjetit nëntokësor të trenave.

Shumë vetë kanë filluar të humbin durimin duke pyetur se si është e mundur që të ndodhë një ndërprerje në këtë nivel i rrymës elektrike si dhe çfarë do të bëhet për të mos ndodhur kjo përsëri.

Kjo do të hetohet nga kompanitë energjetike, nga qeveria rajonale dhe vetë Kongresi.

Shpenzimet e mëdha që kanë kushtuar për shkak të kësaj ndërprerjeje ende s'kanë filluar të llogariten, por që tani shumë artikuj ushqimorë janë duke u hedhur nga supermarkatet e Njujorkut, të gjitha për shkak të prishjes së shkaktuar nga mungesa e rrymës.

 

 

Vdes diktatori Idi Amin

 

Riad, 16 gusht 2003 - Ish diktatori i Ugandës Idi Amin ka vdekur sipas njoftimeve të një spitali në Arabinë Saudite.
Amin ka qenë në koma në spitalin e specializuar të Mbretit Faisal në portin e detit të kuq , Jeddah që nga 18 korriku.

Autoritetet e spitalit thanë se ai vuante nga mosfunksionimi i veshkëve.

Amin ka jetuar në Arabinë Saudite për më shumë se dhjetë vjet , pasi u detyrua nga forcat e Tanzanisë dhe mërgimtarët ugandian që të lë Ugandën në vitin 1979.

Ai fillimisht u vendos në Libi, pastaj Irak dhe më në fund u vendos në Arabinë Saudite, ku ai u lejua që të qëndrojë me kusht që të mos përzihet në politikë.

Regjimi i Aminit në Ugandë, nga 1971 deri 1979 ka një ndër më të përgjakshmit në historinë e Afrikës.
Grupe ndërkombëtare për mbrojtjen e të drejtave të njeriut thonë gjatë kësaj periudhe janë vrarë rreth 400 mijë vetë.

 

 

Aspirina, rrezik gjatë shtatëzanisë

 

Londër, 16 gusht 2003 - Studiuesit kanë paralajmëruar se gratë që përdorin aspirinë apo qetësues të tjerë dhimbjesh kur janë me barrë kanë më shumë mundësi për abort.

Një anketë me rreth një mijë gra në Kaliforni arriti në përfundimin se ato gra që përdornin aspirinë, ibuprofen dhe medikamente të tjera anti-inflamatore jo-stereoide kishin një rrezik prej 80 përqind më të lartë.

Rreziku ishte më i madh në gratë që i merrnin këto medikamente gjatë kohës që ngelen shtatzënë.
Studiuesit thanë se një tjetër medikament kundër dhimbjeve, paracetamoli, nuk e rriste rrezikun e shtatëzanisë.

  

  

Metroja e Nju Jorkut ka filluar shërbimin sot heret pas 36 orë ndërprerje

 

Nju Jork, 16 gusht 2003 – Metroja e Nju Jorkut ka filluar shërbimin sot heret (e shtunë), po thuaj 36 orë pasi ndërprerja më e madhe e energjisë elektrike në historinë e Amerikës Veriore shkaktoi edhe ndaljen e qarkullimit të trenave, njofton Rojter. Energjia elektrike mbrëmë është kthyer plotësisht.

 

Por, për fillimin e qarkullimit të trenave nevojiten disa orë për të kryer edhe testimin e nevojshëm pas ndaljes së trafikut hekurudhor.

 

Metroja dhe sistemi i autobusëve transportojnë rreth 7 milionë udhëtarë në një ditë jave normale, që është rekord në vend dhe zë vendin e pestë në botë.

 

  

Vriten pesë ushtarë rusë në Çeçeni

 

Rostov mbi Don, 16 gusht 2003 - Sot në mëngjes në Çeçeni janë vrarë pesë ushtarë rusë e pesë të tjerë janë plagosur pas aktivizimit të një mekanizmi shpërthyes me teledirigjim, ka bërë të ditur Ministria ruse e Punëve të Brendshme.

  

Mjeti shpërthyes është aktivizuar në një rajon në jug të Çeçenisë, në momentin kur një autoblindë ushtarake në të cilën ndodheshin ushtarët ndeshi në mekanizmin shpërthyes. Ushtarët janë vrarë aty për aty, thuhet në një komunikatë.

  

Poashtu bëhet e ditur se në kryeqytetin çeçen Grozni është hedhur në ajër një automobil dhe me atë rast janë plagosur katër vetë.

Copyright©2000-2003 Trepca.net - Të gjitha të  drejtat e rezervuara.