Lajme

E premte 15 gusht 2003

Përmbajtja:

• Harri Holkeri tha se do të punojë që Kosova të jetë më afër standardeve ndërkombëtare

• Holkeri angazhohet në fillimin sa më shpejt të dialogut ndërmjet Beogradit e Prishtinës

• Presidenti Rugova ngushëlloi familjet Jovoviq dhe Dakiq në Gorazhdec të Pejës

• Daci, Rexhepi e Fajfer diskutojnë për gjendjen aktuale elektroenergjetike

• Shkrimtarët nga komuna e Prishtinës marrin në shfrytëzim shtëpinë e Hivzi Sylejmanit

• Prapë shpërthime në pjesën veriore të Mitrovicës

• Novicki dhe KMDLNJ dënojnë aktin kriminal në Gorazhdec

• Qytetarë serbë protestuan në disa qytete të Kosovës kundër vrasjeve në Gorazhdec

• Holkeri po qëndron në Beograd, Zhivkoviq thotë se tani nuk është koha për fillimin e biesdimeve

• Presidenca e Bashkimit Evropian ka dënuar vrasjen e dy serbëve në Gorazhdec të Pejës

• Incidentin në Gorazhdec e ka dënuar edhe ministri britanik përgjegjës për Ballkanin Denis Mekshejn

• Ivanoviq kërkon nga Beogradi që të sjellë me dhunë policinë dhe ushtrinë serbe në Kosovë

• Policia e OKB-së ka vazhduar kontrollimin e shtëpive për të gjetur autorët e vrasjes në Gorazhdec të Pejës

• OSBE: Marrëveshja e Ohrit është arritje inkurajuese politike

• Pesë autorë shqiptarë në një antologji poetike në gjermanisht

• Arrijnë ndihma për Liberinë

• Midis SHBA-së dhe Francës rrezikon të hapet një zënkë lidhur me heqjen e sanksioneve kundër Libisë

• Këshilli i Sigurimit miratoi një rezolutë të re të SHBA-së mbi Irakun

• Izraeli ka filluar sot lirimin e 73 të burgosurve palestinezë

• Policia e Indonezisë ka arrestuar një të dyshimtë të sulmit në hotelin "Marriot" në Xhakartë

• Në luftimet e militantëve kundër forcave qeveritare indiane kanë humbur jetën 34 vetë

• Në një pritë të kryengritësve çeçenë janë vrarë pesë ushtarë rusë

• Ndërprerje masive e energjisë elektrike në verilindje të SHBA-së dhe Kanada

• Arrestohet një anëtar i rëndësishëm i AL-Kaidas

Harri Holkeri tha se do të punojë që Kosova të jetë më afër standardeve ndërkombëtare

 

Prishtinë, 15 gusht 2003 - Administratori i ri i Kosovës Harri Holkeri dje pasdite në Prishtinë mbajti konferencën e parë të shtypit. Me këtë rast ai shprehu keqardhjen për incidentin në Gorazhdec dhe premtoi se autorët e vrasjes do të vehen para drejtësisë.

Shefi i ri i UNMIK-uti tha se sundimi i ligjit, kthimi i të zhvendosurve, zhvillimi ekonomik, si dhe inicimi i dialogut Prishtinë - Beograd për çështje teknike do të jenë priroitetet e tij kryesore, por edhe ndërtimi i institucioneve demokratike dhe shumetnike në Kosovë.

 

Holkeri premtoi se do të punojë që Kosova të jetë më afër standardeve ndërkombëtare dhe vuri theksin edhe në fillimin e mundshëm të bisedimeve të drejtpërdrejta ndërmjet Prishtinës dhe Beogradit për zgjidhjen e çështjeve teknike të interesit të ndërsjellë.

Shefi i ri i UNMIK-ut tha se do të jetë transparent dhe do të bashkëpunojë me të gjithë, por nuk do të ndikohet nga agjendat, opinionet dhe kritikat e të tjerëve.

 

Pasi theksoi se është përgjegjës para KS të OKB-së dhe para Sekretarit të Përgjithshëm, ai tha se Rezoluta 1244 e KS e OKB-së do të jetë pika orientuese e tij, pavarësisht nga qëndrimet që vijnë nga anë të tjera dhe premtoi bashkëpunim me zyrtarët e UNMIK-ut dhe me drejtuesit e institucioneve të Kosovës.

Holkeri gjithashtu tha se ekziston një shpresë e përgjithshme se misioni mund të përmbushet sa më shpejt që është e mundur dhe theksoi se do të punojë me përkushtim në këtë drejtim.

Harri Holkeri është takua mbrëmë në një takim të veçantë me shefat e zyrave të vendeve me ndikim në Kosovë.

 

 

Holkeri angazhohet në fillimin sa më shpejt të dialogut ndërmjet Beogradit e Prishtinës

 

Beograd, 15 gusht 2003 - Kryeadministratori i ri i Kosovës Hari Holkeri ka deklaruar sot në Beograd se do të bëjë çmos që është në mundësinë e tij që autorët e sulmit ndaj fëmijëve në fshatin Gorazhdec të Pejës të vehen para drejtësisë. Poashtu Holkeri ka thënë se në punën e tij theksin do ta vërë në fillimin sa më të shpejtë të dialogut ndërmjet Beogradit e Prishtinës.

Holkeri pas bisedimeve që pati me ministrin e jashtëm të Serbisë e Malit të Zi Goran Svillanoviq u tha gazetarëve se ngjarja në Gorazhdec e ka forcuar vendosmërinë e tij që të bëjë çmos që gjërat e tilla të mos ndodhin më.

 

 

Presidenti Rugova ngushëlloi familjet Jovoviq dhe Dakiq në Gorazhdec të Pejës

 

Prishtinë, 15 gusht 2003 - Presidenti i Kosovës Ibrahim Rugova ka ngushëlluar sot familjet serbe Jovoviq dhe Dakiq, me rastin e vdekjes tragjike të dy anëtarëve të familjeve të tyre në Zahaq të Pejës ditën e mërkurë.

Në tekstin e telegramit të ngushëllimit të Presidentit Rugova thuhet:

"Më lejoni që në emër të popullit të Kosovës t'ju shpreh ngushëllime të sinqerta me rastin e vdekjes tragjike të më të dashurve tuaj, Ivan Jovoviqit dhe Pantelije Dakiqit.

Ne e kemi dënuar fuqishëm vrasjen e më të dashurve tuaj.

Ju lutem të jeni të sigurt se do të bëjmë gjithëçka që është në dorën tonë për të gjetur dhe sjellë para drejtësisë ata që janë përgjegjës për vrasjet", thuhet në ngushëllimet e Presidentit Rugova dërguar familjeve Jovoviq dhe Dakiq në Gorazhdec të Pejës.

 

 

Daci, Rexhepi e Fajfer diskutojnë për gjendjen aktuale elektroenergjetike

 

Prishtinë, 15 gusht 2003 - Kryetari i Kuvendit të Kosovës Nexhat Daci, kryeministri Bajram Rexhepi dhe shefi i USAID-it Dell Fajfer janë takuar sot në zyrën e kryeparlamentarit dhe kanë biseduar për gjendjen aktuale elektroenergjetike dhe për kërkesat e vazhdueshme të institucioneve vendore për të pasur më shumë kompetenca në KEK.

Kryeparlamentari Daci e vlerësoi këtë takim si një qasje të re ndaj KEK-ut, duke saktësuar se në këtë koorporatë duhet ketë një numër të kufizuar të ndërkombëtarëve, ndërkaq qeveria duhet të ushtrojë fuqinë e vet vendimmarrëse që të dihet se ku shpenzohen mjetet e Kosovës të investuara në KEK.

"Qeveria jonë është është e përgjegjshme dhe përgjegjësinë numër një e ka ndaj parlamentit dhe Kosovës dhe jo ndaj tjetërkujt. Ne shpresojmë që bashkarisht do t'ia dalim me ndryshime rrënjësore, në strukturën menaxhuese të KEK-ut, me rritjen e kapacteteve vendimmarëse të qeverisë", tha Daci.

Ndërkaq, kryeministri Rexhepi, i inkuarujuar nga ky takim, kërkoi që qeveria të ketë qasje të plotë në menaxhimin dhe veprimtairinë e KEK-ut.

"Ne duhet ta kemi qasjen e plotë dhe çdo cent nga buxheti i Kosovës që harxhohet duhet t'i kemi të dhënat e plota dhe bashkarisht do ta gjejmë formën optimale në menaxhimin e KEK-ut në fazat e ardhshme", tha Kryeministri i Kosovës.

 

 

Shkrimtarët nga komuna e Prishtinës marrin në shfrytëzim shtëpinë e Hivzi Sylejmanit

 

Prishtinë, 15 gusht 2003 - Kryetari i Kuvendit të komunës së Prishtinës Ismet Beqiri, në një ceremoni rasti, ia dorëzoi çelsat dhe vendimin për shfrytëzimin e shtëpisë së shkrimtarit, Hivzi Sylejmani, kryetarit të Lidhjes së Shkrimtarëve të Kosovës Adem Gashit.

 

Prej sot kjo shtëpi e shkrimtarit tonë të njohur do t'i jipet në shfrytëzim LSHK, tha Beqiri, duke uruar që ky asociacion i shkrimtarëve ta shfrytëzojë këtë shtëpi ashtu siç e meritojnë ata.

Kryetari i LSHK Adem Gashi falenderoi kryetarin e komunës së Prishtinës, duke vlerësuar si ndihmesë të madhe për shkrimtarët e Kosovës në mbarëvajtjen e punës së LSHK.

Më herët kjo shtëpi është renovuar nga një shoqatë e studentëve gjermanë.

 

 

Prapë shpërthime në pjesën veriore të Mitrovicës

 

Mitrovicë, 15 gusht 2003 - Mbrëmë rreth orës 22.00 në pjesën veriore të Mitrovicës në vendin rreth tre soliterërve, ku banojnë shqiptarët, nga persona të panjohur janë hedhur dy granata dore.

 

Zëdhënësi i SHPK-së Besim Hoti citohet të ketë deklaruar se shpërthimet nuk kanë shkaktuar viktima, por vetëm kanë tensionuar situatën, pasi në vendin e ngjarjes menjeherë janë tubuar grupe të shqiptarëve dhe serbëve.

 

Vetëm pas ndërhyrjes së trupave të KFOR-it është qetësuar situata. Për momentin nuk ka të arrestuar, ndërkohë që policia është në kërkim të autorëve të këtyre sulmeve.

Banorët shqiptarë thonë se granatat i kanë hedhur serbët.

Një natë më parë po në pjesën veriore të Mitrovicës ka ndodhur një shpërthim në shtëpinë e një shqiptari.

 

 

Novicki dhe KMDLNJ dënojnë aktin kriminal në Gorazhdec

 

Prishtinë, 15 gusht 2003 - Ombudspersoni i Kosovës Marek Antoni Nowicki, pas lajmit tragjike në Gorazhdec, me zëvendësin e tij z. Lubinko Todoroviq, vizituan familjet e viktimave, të këtij akti barbar ndaj fëmijëve të pafajshëm.

Z. Nowicki thekson se pret një hetim efektiv për t'i sjellë kriminelët e këtij akti para drejtësisë, por jo vetëm në këtë rast por edhe të rasteve tjera të krimit ndëretnik.

"Ata që kryejnë akte të tilla, duhet ta kuptojnë se këto akte janë kundër kosovës kundër interesave e këtij populli. Në kosovë nuk do të ketë ardhmëri pa vëndosjen eë rendit dhe ligjit, në se fëmijtë afër lumit e nën rrezet e dielit mund të janë shenjstër e "kallashnikut", tha Novicki.

Edhe KMDLNJ dënon aktin kriminal në Gorazhdec dhe njëheri kërkon angazhim maksimal të policisë për ndriçimin e tyre dhe për vënien e autorëve të tyre para organeve të drejtësisë.

 

Pohimet se sulmi është bërë me armë zjarri (siç pohon policia), apo ndoshta me mjete shpërthyese (siç pohojnë mjekët) mbesin nën hijen e faktit se për pasojë janë vrarë dy të rinj dhe janë plagosur katër të rinj të tjerë, thotë në një prononcim KMDLNJ, duke theksuar se aktet e tilla kriminale shkojnë në dëm të Kosovës dhe përpjekjeve gjithnjë e më të shprehura të institucioneve të saj për ndërtimin e një shoqërie demokratike, tolerante dhe prosperuese.

 

 

Qytetarë serbë protestuan në disa qytete të Kosovës kundër vrasjeve në Gorazhdec

 

Prishtinë, 15 gusht 2003 - Qytetarë serbë dje kanë protestuar në pjesën veriore të Mitrovicës, në Zveçan, Zubin Potok, në Leposaviq si dhe në Graçanicë. Ata kanë dënuar vrasjen e pardjeshme të dy të rinjve në Gorazhdec të Pejës, duke i quajtur, siç kanë thënë, "vepër të ekstremistëve shqiptarë".

Nëpër protesta ata kanë kërkuar madje edhe kthimin e ushtrisë dhe të policisë serbe në Kosovë. "Pas sulmit në Gorazhdec qëndron Armata Kombëtare Shqiptare së bashku me institucionet e Kosovës", ka thënë në Mitrovicë lideri ekstremist serb Milan Ivanoviq, i cili dyshohet nga drejtësia për pjesëmarrje në sulmin me bombë kundër policëve të UNMIK-ut që kishte ndodhur me 8 prill të vitit të kaluar.

 

Ai madje ka spekuluar se në Kosovë ekzistojnë shumë kriminelë shqiptarë të cilët duhet të arrestohen dhe të dërgohen në Tribunalin e Hagës.

Ndonëse këto protesta kanë kaluar pa incidente, merret vesh se gjatë protestës në pjesën veriore të Mitrovicës, pjesëtarë të forcave paqeruajtëse janë detyruar të largojnë disa gazetarë shqiptarë, pasi që siç bëhet e ditur, ata janë sulmuar me gurë dhe gjësende të tjera nga serbët e atjeshëm.

Në Gorazhdec janë shpallur tri ditë zie, ndërkaq për sot liderët lokalë serbë kanë paralajmëruar shpalljen e ditës së zisë edhe për vise të tjera ku komuniteti serb jeton si shumicë në Kosovë.

 

 

Holkeri po qëndron në Beograd, Zhivkoviq thotë se tani nuk është koha për fillimin e biesdimeve

 

Beograd, 15 gusht 2003 - Shefi i ri i UNMIK-ut Harri Holkeri po qëndron sot në Beograd, ku është takuar me kryeministrin serb Zoran Zhivkoviq dhe zëvendësin e tij Nebojsha Çoviq.

Pas takimit Zhivkoviq citohet të ketë thënë se pas vrasjes së dy serbëve afër Pejës, tani nuk është koha për fillimin e dialogut ndërmjet Beogradit e Prishtinës.

Ndonëse, sipas Zhvikoviqit, Beogradi është i gatshëm për fillimin e bisedimeve që nga dhjetori i vitit 2002. dhe se me javë mund të matet data që nga dita e sotme kur ato bisedime mund të fillojnë.

Kryeministri serb ka bërë të ditur se Beogradi e Prishtina do të bisedojnë për temat të cilat, sipas tij, janë harmonizuar me Brukselin dhe Uashingtonin, e këto janë kthimi, siguria, decentralizimi, energjetika dhe trafiku.

 

 

Presidenca e Bashkimit Evropian ka dënuar vrasjen e dy serbëve në Gorazhdec të Pejës

 

Bruksel, 15 gusht 2003 - Presidenca e Bashkimit Evropian nëpërmjet një komunikate për opinion ka dënuar dje fuqishëm vrasjen e dy fëmijëve të pakicës serbe dhe plagosjen e disa të tjerëve në Gorazhdec të Pejës, duke u shpreh ngushëllimet e saja më të thella familjeve të viktimave.

 

"Një incident i tillë i turpshëm tregon edhe sa shumë ka mbetur për ndërtimin e stabilitetit të një shoqërie shumetnike dhe të demokracisë në Kosovë. Ky incident vetëm sa do të forcojë vendosmërinë tonë për të përforcuar rregullat dhe ligjin", thuhet në këtë komunikatë të Presidencës së Bashkimit Evropian.

Bashkimi Evropian gjithashtu i ka dhënë përkrahjen e saj të plotë përfaqësuesit të ri të sekretarit të përgjithshëm Harri Holkerit në misionin e tij sfidues, duke besuar se secili në Kosovë do të kuptojë se koha e dhunës ka kaluar dhe se incidentët e tilla vetëm mund të prishin imazhin e Kosovës në Evropë dhe te komuniteti ndërkombëtar.

 

 

Incidentin në Gorazhdec e ka dënuar edhe ministri britanik përgjegjës për Ballkanin Denis Mekshejn

 

Londër, 15 gusht 2003 - Incidentin në Gorazhdec të Pejës e ka dënuar edhe ministri britanik përgjegjës për Ballkanin Denis Mekshejn. Ai tha se ky sulm tradhton popullin e Kosovës, duke minuar përpjekjet e tyre së bashku me bashkësinë ndërkombëtare për të sjellë paqen dhe sigurinë në rajon.

 

Z. Mekshejn thotë se rruga për në Evropë nuk mund të ndërtohet me intolerancë dhe ekstremizëm.

 

 

Ivanoviq kërkon nga Beogradi që të sjellë me dhunë policinë dhe ushtrinë serbe në Kosovë

 

Mitrovicë, 15 gusht 2003 - Ekstremisti serb Millovan Ivanoviq, kryetar i "këshillit nacional" serb, ka thënë se pas kësaj që ndodhi në Gorazhdec, bashkësia ndërkombëtare duhet të tërhiqet nga misioni i saj në Kosovë, sepse sipas tij ajo ka pësuar mossukses total.

 

Ai ka spekuluar se kjo është është edhe një dëshmi se "me shqiptarët nuk ka bashkëjetesë". Ivanoviq ka ftuar qeverinë serbe që në Kosovë me dhunë të sjellë policinë dhe ushtrinë serbe në mënyrë që shqiptarët, siç tha ai, të "paguajnë tërë atë që u kanë bërë serbëve me shekuj"!

 

 

Policia e OKB-së ka vazhduar kontrollimin e shtëpive për të gjetur autorët e vrasjes në Gorazhdec të Pejës

 

Prishtinë, 15 gusht 2003 - Policia e OKB-së edhe dje ka vazhduar kontrollimin e shtëpive në veriperëndim të Kosovës për të gjetur autorët e vrasjes së pardjeshme të dy të rinjve serbë dhe plagosjes së katër të tjerëve në Gorazhdec të ka bërë të ditur një zyrtar i OKB-së.

Zëdhënësi i policisë së OKB-së, Derek Çapell njoftoi se policët e OKB-së kishin rrethuar vendin e sulmit pranë fshati Zahaq dhe gjatë gjithë natës së mërkurë afro 300 policë kanë kontrolluar detajisht çdo shtëpi, si dhe po përpiqen që të gjejnë dëshmitarë të rastit.

 

Deri tash, tha Çapell, policia nuk ka arritur që të gjejë asnjë provë që të shpallë diçka në ndriçimin e rastit, ndërkaq ai përjashtoi edhe mundësinë që organet e rendit në Kosovë të dijnë se këtë krim e kanë kryer grupe të caktuara njerëzish, apo të dinë më tepër se ky krim mund të kualifikohet si krim me motive etnike.

"Ne nuk e dimë se kush e bëri këtë, porse ne po i bëjmë të gjitha përpjekjet e mundshme për ndriçimin e këtij rasti", ka thënë Çapell.

 

 

OSBE: Marrëveshja e Ohrit është arritje inkurajuese politike

 

Shkup, 15 gusht 2003 - Marrëveshja e Ohrit ishte dhe mbetet arritje monumentale dhe inkurajuese politike, që do të sigurojë unitet e bashkim më të mirë për të gjithë.

 

Kjo ishte nxitje për negociata, por paraqet edhe nxitje për zbatim, vlerëson OSBE me rastin e dyvjetorit të nënshkrimit të Marrëveshjes së Ohrit. OSBE-ja konsideron se tashmë në të gjitha bashkësitë ka përkshtim të tërësishëm drejt procesit politik, të sundimit të së drejtës si dhe shtetit unitar dhe shumetnik.

 

Shteti dukshëm është më i sigurt dhe Marrëveshja e Ohrit është proces i cili do të kërkojë edhe detyrim, përkushtim dhe besim të ndërsjellt.

 

Kjo është nxitje, por gjithashtu edhe mundësi që në Maqedoni të ndërtohet një shtet më i fuqishëm, unitar dhe me prosperitet, thuhet një një komunikatë të OSBE-së.

 

 

Pesë autorë shqiptarë në një antologji poetike në gjermanisht

 

Shvajkhajm/Gjermani, 15 gusht 2003 - "Gjurmë kohe" ("Spuren der Zeit") titullohet antologjia poetike e sapopublikuar nga shtëpia botuese "Aktuell-Verlag" në Schwaikheim (Shvajkhajm) të Gjermanisë. Siç e dëshmon edhe vetë titulli, ky botim që realizohet në vazhdime, orvatet të jetë gjurmë e kohës së vet.

 

Vëllimi i sapo vënë në qarkullim është i njëmbëdhjeti. Në të janë përfshirë krijime poetike nga 45 autorë bashkëkohorë, prej të cilëve dikush është rishtar e sapo ka botuar librin e parë poetik, ndërkohë që dikush tjetër është autor i një sërë librave.

 

Bashkautorë të saj janë edhe pesë zëra shqiptarë: Arif Bozaxhi, i cili përfaqësohet me shtatë krijime, Ferdinand Laholli, me tre krijime, Ragip Ramaj, me tre krijime, Isuf Sherifi, me shtatë krijime, dhe Mustafë Xhemaili, i cili përfaqësohet me pesë krijime. Krijimet e autorëve shqiptarë janë përkthyer në gjermanisht nga Ferdinand Laholli.

 

 

Arrijnë ndihma për Liberinë

 

Manrovia, 15 gusht 2003 - Pas sigurimit të portit dhe të aeroportit nga trupa afrikanoperëndimore ECOMIL si dhe nga ushtarë amerikanë mund të rifillohet me livrimet e ndihmave për kryeqytetin e Liberisë. Programi botëror për ushqimin paralajmëroi se një anije me ushqime të posaçme dhe me pajisje logjistike do të mbërrijë së shpejti.

 

Sipas tij edhe fluturimet me ndihma nga Guinea, Bregu i Fildishtë dhe Sierra Leone mund të vazhdojnë. Vetëm në Monrovia kanë nevojë urgjente për ushqime një gjysmë milioni njerëz.

 

 

Midis SHBA-së dhe Francës rrezikon të hapet një zënkë lidhur me heqjen e sanksioneve kundër Libisë

 

Uashington, 15 gusht 2003 - Midis SHBA-së dhe Francës rrezikon të hapet një zënkë lidhur me heqjen e sanksioneve kundër Libisë. Zyrtarë të Ministrisë së Jashtme të SHBA-ës kanë thënë se Ministri Kolin Pauell e ka paralajmëruar homologun francez Dominik dë Vilpen në rast vënieje të vetos dhe bllokimi të heqjes së mundshme të sanksioneve.

 

Shkak për këtë është bërë pranimi nga Libia që t'u paguajë familjeve të viktimave të atentatit të Lockerbie-së në vitin 1988 dëmshpërblime me një vlerë prej 2,7 miliardë dollarësh.

 

Qeveria në Tripoli shpreson që sanksionet e OKB-së, të vendosura pas atentatit me 270 të vdekur, të hiqen që javën e ardhshme. Franca kërkon nga Libia një dëmshpërblim më të madh sesa 33 milionë dollarët e paguar deri tani për rrëzimin e një avioni francez mbi Niger në vitin 1989 me 170 viktima.

 

 

Këshilli i Sigurimit miratoi një rezolutë të re të SHBA-së mbi Irakun

 

Nju Jork, 15 gusht 2003 - Këshilli i Sigurimit miratoi një rezolutë të re të SHBA-së mbi Irakun duke e njohur si udhëheqje paraprake të vendit të ashtuquajturin këshill qeverisës në Bagadad. Rezoluta u pranua me 14 vota dhe me abstenimin e Sirisë dhe u jep Kombeve të Bashkuara për dymbëdhjetë muaj mandatin e ndjekjes së rindërtimit në Irak.

 

Në të drejtat ekskluzive të fuqive pushtuese SHBA-ës dhe Britanisë së Madhe nuk do të ndryshojë gjë. Kancelari gjerman Gerhard Schröder e përshëndeti miratimin e rezolutës së re. Ai tha se nuk ka ardhur ende koha për të vendosur për kontributin ushtarak të Gjermanisë në Irak.

 

 

Izraeli ka filluar sot lirimin e 73 të burgosurve palestinezë

 

Baza Salem, Bregu Perendimor, 15 gusht 2003 – Izraeli ka filluar sot (e premte) lirimin e 73 të burgosurve palestinezë, në shenjë të vullnetit të mirë për planin amerikan të paqes, ndërkohë që kërcënimet kundër armëpushimit po shtojnë tensionet dhe Izraeli po vazhdon gjurmimet e militantëve, njofton Rojter.

 

Kështu, njoftohet se dy minifurgonë kanë dalë nga burgu Damon afër qytetit verior izraelit Haifa dhe i ka transportuar të burgosurit në pikat e kontrollit në Bregun Perendimor dhe Rripin e Gazës, ku ata janë liruar pas një shtyrjeje triditore, të shkaktuar nga dy bombardimet vetëvrasëse palestineze.

 

Në anën tjetër, Izraeli gjatë natës ka arrestuar shumë militantë të dyshimtë palestinezë, ndaj lirimin e të burgosurve, grupet palestineze e kanë quajtur thjesht mashtrim.

 

 

Policia e Indonezisë ka arrestuar një të dyshimtë të sulmit në hotelin "Marriot" në Xhakartë

 

Xhakartë, 15 gusht 2003 – Policia e Indonezisë ka bërë të ditur sot (e premte) se disa ditë më parë ka arrestuar një të dyshimtë të sulmit të paradokohshëm në hotelin "Marriot" në Xhakartë, ku qenë vrarë 12 vetë, kur se qenë plagosur edhe rreth 150 të tjerë, njofton AP.

 

Zëdhënësi i policisë nuk e ka dhënë identitetit e të arrestuarit, por ka shtuar se edhe më parë kanë arrestuar disa persona në lidhje më shpërthimin e 5 gushtit në hotelin e Xhakartës, por ende s'kanë siguruar prova të mjaftueshme.

 

 

Në luftimet e militantëve kundër forcave qeveritare indiane kanë humbur jetën 34 vetë

 

Nju Delhi, 15 gusht 2003 – Në luftimet e militantëve kundër forcave qeveritare indiane në prag të festës së Ditës së Pavarësisë së Indisë kanë humbur jetën 34 vetë, kanë bërë të ditur zyrtarët vëendorë, njofton Rojter. Viktimat kanë pësuar qoftë në shpërthime bombash, qoftë nga armë të vogla zjarri.

 

 

Në një pritë të kryengritësve çeçenë janë vrarë pesë ushtarë rusë

 

Moskë, 15 gusht 2003 - Në një pritë të kryengritësve çeçenë janë vrarë pesë ushtarë rusë, prej tyre tre oficerë, njofton agjencia ruse e lajmeve Interfaks. Konflikti ka ndodhur pas një shpërthimi të minës gjatë kalimit të autoblindave dhe një xhipi rus dhe pastaj kanë filluar të shtënat nga të dyja palët.

 

 

Ndërprerje masive e energjisë elektrike në verilindje të SHBA-së dhe Kanada

 

Uashington, 15 gusht 2003 - Ndërprerja e energjisë elektrike preku zonat më të populluara të Shteteve të Bashkuara në një ditë të nxehtë gushti. Si rezultat është ndërprerë funksionimi i uzinave energjetike bërthamore nga Nju Jorku deri në Miçigan dhe udhëtarët mbetën të bllokuar nëpër linjat e metrove dhe të tjerë nëpër ashensorë.

 

Punonjësit e Nju Jorkut dolën nga ndërtesat në rrugë, dhe shumë prej tyre u detyruan të shkojnë në shtëpi në këmbë megjithë të nxehtin e madh të verës.

 

Dritat e trafikut po ashtu nuk funksiononin në të gjithë rajonin, pikërisht në fillim të orëve me trafik më të dendur, duke krijuar dyndje trafiku në rrugë dhe duke i detyruar policët të shpërndaheshin në shumë rajone për të drejtuar trafikun.

Edhe trafiku ajror u ngadalësua, meqë autoritetet amerikane të aviacionit pezulluan përkohësisht fluturimet në aeroportet e Nju Jorkut, Klivelandit, Otavës dhe Torontos. Ndërkohë më shumë se gjysma e 19 milionë banorëve të Nju Jorkut mbetën pa drita, guvernatori i shtetit, Xhorxhe Pataki, shpalli gjendjen e jashtëzakonëshme.

 

 

Arrestohet një anëtar i rëndësishëm i AL-Kaidas

 

Uashington, 15 gusht 2003 - Shtëpia e Bardhë ka bërë të ditur arrestimin e një personi të përshkruar si kryepërfaqësuesi i al Kaidas dhe planifikuesi operativ në Azinë juglindore, Riduan bin Isomuddin i njohur ndryshe edhe si Hamabali.

"Një fitore e rëndësishme në luftën kundër terrorizmit dhe një goditje e madhe dhënë armikut", kështu e përshkroi zëdhënësi i Shtëpisë së Bardhë, Scot McClellan lajmin se Riduan bin Isomuddin ishte arrestuar.

Disa momente pas këtij njoftimi, vetë Presidenti e përmendi atë gjatë një fjalimi në Kaliforni.

Copyright©2000-2003 Trepca.net - Të gjitha të  drejtat e rezervuara.