Lajme

E enjte 14 gusht 2003

Përmbajtja:

• Rugova, Daci e Rexhepi u takuan me shefin e ri të UNMIK-ut, Holkeri

• Deklaratë e përbashkët e tre udhëheqësve më të lartë të Kosovës për politikën aktuale të Beogradit ndaj Kosovës

• Mbrëmë kanë ndodhur dy shpërthime në Prizren dhe në Mitrovicë

• Qeveria dhe Kuvendi i Kosovës dënojnë fuqishëm sulmin e djeshëm në komunën e Pejës

• Administratori i ri i Pejës tha se nuk duhet nxituar me prejudikimin e ngjarjes në Gorazhdec

• Për LDK-në përfshirja e Kosovës në kushtetutën e SMZ është provokim i rëndë kushtetues

• Kryesia e LDK-së dënon ashpër aktin kriminal në Gorazhdec të Pejës

• Zyra e SHBA-ve në Prishtinë dënon vrasjen e dy serbëve në Gorazhdec

• Solana:"Kosova-prioritet kryesor i BE-së"

• Tirana dënon ashpër aktin kriminal në Gorazhdec të Pejës

• Është vrarë një udhëheqës lokal i lëvizjes radikale Xhihadi islamik

• Në një shpërthim të fuqishëm në qytetin spanjoll në Sevile, tre vetë kanë humbur jetën

• Nga shpërthimi i një autobusi në Indi kanë humbur jetën 6 udhëtarë

• Persona të armatosur kanë vrarë 2 punëtorë ndihmës dhe kanë plagosur 3 të tjerë në jë sulm në Afganistan

• Rreth 3.000 veta kanë vdekur në mbarë Francën si rrjedhojë e temperaturave abnormalisht të larta

• Mbi 60 persona kanë humbur jetën gjatë 24 orëve të gjakderdhjes në Afganistan

• Ushtarët amerikanë vrasin gjatë protestave në Bagdad një irakian

• Në Çeçeni vriten pesë dhe plagosen tre ushtarë rusë

Rugova, Daci e Rexhepi u takuan me shefin e ri të UNMIK-ut, Holkeri

 

Prishtinë, 14 gusht 2003 - Kryeadministratori i ri i Kosovës Hari Holkeri është takuar sot me tre udhëheqësit më të lartë të Kosovës - Presidentin Ibrahim Rugova, Kryeparlamentarin Nexhat Daci dhe Kryeministrin Bajram Rexhepi.

I pari nga udhëheqësit e Kosovës me shefin e ri të UNMIK-ut u takua Presidenti Rugova, i cili pas takimit tha se Holkerin e kishte njoftuar me progresin e arritur në Kosovë gjatë katër viteve të kaluara të pasluftës dhe me objektivat e institucioneve të Kosovës, siç është zhvillimi ekonomik, privatizimi që tashmë ka filluar, integrimi i grupeve etnike etj.

Duke e vlerësuar gjendjen e sigurisë në përgjithësi se është më e mirë, Presidenti Rugova dënoi ashpër vrasjen e dy serbëve afër Pejës dhe kërkoi që autorët e sulmeve të tilla, që janë kundër Kosovës e kundër imazhit të saj, të dalin para drejtësië dhe të dënohen.

Ndërkaq kryetari i Kuvendit të Kosovës Nexhat Daci, pas takimit me zotin Holkeri u shpreh se është optimist dhe ishte i impresionuar me premtimet e Holkerit.

"Unë jam i impresionuar me premtimet që zoti Holkeri i tha se në të nuk do të të ndikojë diçka jashtë obligimit të tij dhe se do të ketë gjumë të qetë sepse do ta ndiejë veten si qytetar i Prishtinës dhe unë i dëshirova atë me kënaqësi të veçantë", tha zoti Daci.

Pas takimit me Holkerin, Kryeministri Rexhepi u bëri thirrje qytetarëve të Kosovës që të bashkëpunojnë me organet e ndjekjes në mënyrë që aktorët e dhunës në Kosovë të sillen para drejtësië dhe që të krijohet një ambient e sigurt për jetë, sepse vetëm ajo krijon një perspektivë për Kosovën.

 

Sipas Rexhepit në këtë takim bashkëbiseduesit kanë rënë dakord që edhe gjyqi edhe policia ta rrisin efikastitetin e vet, por edhe subjektet politike të ndihmojnë për krijimin e një ambienti më të sigurt për jetë në Kosovë, tha ai.

Kryeministri u shpreh se me shefin e ri të UNMIK_ut do të bashkëpunojë shumë ngushtë, sepse ai ka qenë kryemnistër i Finlandës dhe do t'i kuptojë më mirë problemet reale të Kosovës.

Shefi i ri i UNMIK-ut për këto takime do të flasë para gazetarëve në orët e pasdite.

 

 

Deklaratë e përbashkët e tre udhëheqësve më të lartë të Kosovës për politikën aktuale të Beogradit ndaj Kosovës

 

Prishtinë, 14 gusht 2003 - Udhëheqësit e institucioneve të Kosovës – Presidenti, Kryeministri dhe Kryetari i Kuvendit – raifirmojnë përcaktimin e institucioneve dhe të popullit të Kosovës për të vazhduar me intensitet të shtuar progresin e Kosovës, në bashkëpunim të ngushtë me faktorët relevantë në bashkësinë ndërkombëtare, thuhet në një deklatratë të përbashkët të lëshuar dje pasdite.

Udhëheqësit poashtu rikonfirmojnë përcaktimin për një Kosovë të pavarur dhe demokratike, në paqe me të gjithë fqinjtë, në përputhje me vullnetin e popullit të Kosovës.

 

Askush nuk duhet të ketë dyshim se institucionet e Kosovës janë të vendosura që të krijojnë një shtet, që do ta mbështesë të ardhmen e vet mbi vlerat më të larta të demokracisë, duke respektuar plotësisht të drejtat e të gjitha grupeve etnike dhe vlerat universale të njeriut.

"Me indinjatë dhe neveri po e përcjellim fushatën e egër të Beogradit, e cila ditëve të fundit ka arritur kulmin me bërjen publike të një politike në thelb provokuese dhe destabilizuese për Kosovën dhe për gjithë rajonin”, theksojnë Presidenti Ibrahim Rugova, Kryeministri Bajram Rexhepi dhe Kryetari i Kuvendit, Nexhat Daci.

Udhëheqësit e Kosovës i bëjnë thirrje bashkësisë ndërkombëtare, në rend të parë Unionit Evropian dhe Shteteve të Bashkuara të Amerikës, që të ndërmarrin hapa të nevojshëm për të ndërprerë këtë fushatë të Beogradit, e cila bie ndesh me të gjitha përpjekjet për stabilitet në rajonin e Evropës Juglindore.

 

Kjo fushatë bie ndesh edhe me angazhimin e bashkësisë ndërkombëtare për të krijuar paqe të qëndrueshme në Kosovë dhe në rajon, përfundon deklarata e përbahskët e tre udhëheqësve më të lartë të Kosovës.

 

 

Mbrëmë kanë ndodhur dy shpërthime në Prizren dhe në Mitrovicë

 

Prizren/Mitrovicë, 14 gusht 2003 - Pak pas orës 2:00, mbrëmë ka shpërthyer një bombë e hedhur në komandën rajonale të policisë në Prizren. Zëdhënsi i UNMIK-ut, Andrea Anjeli tha se shpërthimi nuk ka shkaktuar viktima, por dy vetura janë dëmtuar lehtë.

Ndërkaq një shpërthim tjetër ka ndodhur para mesnatës në periferi të Mitrovicës. Mekanizmi me eksploziv ka shpërthyer në një shtëpi në ndërtim e sipër në lagjen "Bosnja e vogël", e cili më parë ka qenë e banuar nga boshnjakë dhe shqiptarë. As ky shpërthim nuk ka patur viktima as të lënduar.

 

 

Qeveria dhe Kuvendi i Kosovës dënojnë fuqishëm sulmin e djeshëm në komunën e Pejës

 

Prishtinë, 14 gusht 2003 - Qeveria dhe Kuvendi i Kosovës kanë dënuar ashpër vrasjen e djeshme të të dy serbëve dhe plagosjen e disa të tjerëve në Gorazhdec afër Pejës.

"Aktet e tilla të dhunës vrasin edhe të ardhmen e Kosovës", thuhet në një komunikatë të Qeverisë së Kosovës, e cila dënon ashpë sulmin mbi të rinjtë serbë.

Gjithashtu edhe Kuvendi i Kosovës pëmes një komunikate, ka dënuar aktin e vrasjes dhe plagosjes së disa fëmijëve të nacionalitetit serb në afërsi të fshatit Gorazhdec.

Ndërkaq edhe në një deklaratë të KFOR-i është dënuar akti brutal në Gorazhdec të Pejës.

 

 

Administratori i ri i Pejës tha se nuk duhet nxituar me prejudikimin e ngjarjes në Gorazhdec

 

Pejë, 14 gusht 2003 - Administratori i ri ndërkombëtar i Pejës Entoni Tomson, pasi dënoi vrasjen e djeshme në Gorazhdec të Pejës, tha se nuk duhet nxituar me prejudikimin e ngjarjes, por duhet zbuluar aktorët e kësaj ngjarjeje tragjike, duke kërkuar njëherit angazhimin e të gjithëve për zbardhjen e rastit dhe krijimin e klimës që minoritetet të ndiehen të sigurt në Kosovë.

 

Ai tha se kjo ngjarje ka reflektim negativ jo vetëm për komunën e Pejës, por edhe për tërë Kosovën dhe besimin që ky të jetë rasti i fundit.

Edhe kryetari i komunës së Pejës Ali Lajçi dënoi çdo dhunë dhe faktorët që shkaktojnë atë, duke përfshirë këtu edhe propagandën e qeverisë serbe e cila me veprimet e saja po tenton ta destabilizojë Kosovën. Lajçi kërkoi përgjegjësi dhe efikasitet më të madh nga të gjithë për zbulimin e autorëve të krimeve.

Ndërkaq, zëdhënësi i policisë së UNMIK-ut në Pejë Deni Lem tha se në bazë të hetimeve të para të policisë është konstatuar se zjarri kundër një grupi të rinjsh serbë është hapur nga një pyll nga persona të panjohur.

 

Me atë rast dy vetë janë vrarë dhe katër janë plagosur. Dy nga të plagosurit rëndë me një helikopter të KFOR-it janë transferuar në një spital jashtë Pejës dhe gjendja e tyre është stabile.

 

 

Për LDK-në përfshirja e Kosovës në kushtetutën e SMZ është provokim i rëndë kushtetues

 

Prishtinë, 14 gusht 2003 - Përfshirja e Kosovës në kushtetutën e Serbisë dhe Malit të Zi, është provokim i rëndë kushtetues dhe atakt i drejtpërdrejtë kundër institucioneve të Kosovës dhe atyre ndërkombëtare.
Për LDK-në, një veprim i tillë është tejet tendencioz dhe me pasoja të rënda për stabilitetin në vend dhe rajon, tha Lulzim Zeneli, zëdhënës i LDK-së.

Sipas zotit Zeneli, këto veprime kanë për qëllim të minojnë progresin e arritur në vend dhe zhvillimin e proceseve në Kosove dhe më gjerë.

"Një akt i tillë do të thotë kthim në të kaluaren. Në të njëjtën kohë, kërkojmë nga Bashkimi Evropian, OKB-ja dhe SHBA që të ndërmarrin masa energjike në parandalimin e këtyre provokimeve, që fatkeqësisht po riciklohen varësisht prej kohës dhe rrethanave", thotë Zeneli.

"Opinioni vendas dhe ndërkombëtar përditë e më shumë e ka të qartë se Kosova tashmë ka hyrë në një proces të pandalshëm dhe të pakthyeshëm të pavarësimit dhe të integrimit të saj në Bashkimin Evropian dhe strukturat tjera evro-atlantike.

 

Me këtë rast LDK-ja i bën thirrje faktorit ndërkombëtar për përshpejtimin e procesit të njohjes formale të procesit të pavarësisë së Kosovës, zgjidhje e vetme dhe kusht për paqe, stabilitet dhe zhvillim normal të proceseve integruese në këtë pjesë të Evropës dhe botës", u shpreh Lulzim Zeneli, zëdhënës i LDK-së.

 

 

Kryesia e LDK-së dënon ashpër aktin kriminal në Gorazhdec të Pejës

 

Prishtinë, 14 gusht 2003 - Kryesia e LDK-së nëprëmjet një komunikate dënon ashpër aktin e djeshëm kriminal në Gorazhdec të Pejës, ku humbën jetën dy të rinj dhe u plagosën katër të tjerë. Padyshim se aktet e tilla janë të drejtuar kundër qytetarëvë të Kosovës, kundër Kosovës dhe të ardhmes së saj, kundër progresit dhe stabilitetit në Kosovë, thuhet në këtë komunikatë.

"Me këtë rast kërkojmë nga organet kompetente, organet e hetuesisë, nga SHPK-ja, Policia e UNMIK-ut etj. që të marrin masa adekuate në zbardhjen sa më të shpejtë të rastit", thuhet në komunikatën e Kryesisë së LDK-së.

 

 

Zyra e SHBA-ve në Prishtinë dënon vrasjen e dy serbëve në Gorazhdec

 

Prishtinë, 14 gusht 2003 – "Nuk ka fjalë që mund ta shpreh neverinë që e ndiejmë për sulmin dhe vrasjet e sotme të të rinjve të pafajshëm në Gorazhdec", është shprehur zonja Marsi Ris, shefe e misionit të Zyrës së SHBA-ve në Prishtinë.

 

"Është e pabesueshme që dikush ka mundur të gjuajë qëllimshëm mbi një grup të të rinjve që po laheshin në afërsi të shtëpive të tyre në një ditë me vapë. Asgjë, absolutisht asgjë dhe në asnjë mënyrë nuk mund të arsyetojë vrasjet dhe tentimvrasjet e të të rinjve të pafajshëm", deklaroi zonja Ris duke folur nga Zyra e SHBA-ve në Prishtinë.

"Çdokush që ka çfarëdo njohuri lidhur me këto krime i ka borxh popullit të Kosovës që t'i ndihmojë policisë për ta prurë këtë kriminel apo këta kriminelë para drejtësisë. Ne bashkëndjejmë dhimbjen me familjet dhe të dashurit e këtyre të rinjve, viktima të pafajshme.

 

Çdo njeri, e sidomos çdo prind në Kosovë e ndien dhembjen e prindëve të këtyre të rinjve", përfundon deklataratëne saj zonja Ris.

 

 

Solana:"Kosova-prioritet kryesor i BE-së"

 

Bruksel, 14 gusht 2003 - Shefi i diplomacisë së Bashkimit Evropian për Politikë të Jashtme dhe Siguri Havier Solana ka bërë thirrje për bashkëpunim me shefin e ri të UNMIK-ut Hari Holkerin, duke theksuar rëndësinë e rezolutës 1244 për statusin e ardhshëm të Kosovës.

"Zbatimi i plotë i rezolutës 1244 të Kombeve të Bashkuara mbetet gurthemel në angazhimin e bashkësisë ndërkombëtare në Kosovë", thuhet në komunikatën nga zyra e Solanës me rastin e ardhjes së Holkerit në Kosovë.

"U bëj thirrje të gjitha palëve të interesuara për bashkëpunim konstruktiv me të dërguarin e ri për zbatimin e plotë të rezolutës 1244", thotë Solana, duke shtuar se Kosova mbetet prioriteti kryesor i Bashkimit Evropian dhe "pjesë integrale e perspektivës së Ballkanit Perëndimor".

 

Solana gjithashtu u bën thirrje të gjitha palëve në Kosovë dhe rajon të përmbahen nga hapat e njëanshëm, që do ta rrezikonin qëllimin, i cili është ndërtimi i Kosovës stabile, shumë etnike dhe demokratike.

Sipas tij, baza për ardhmërinë e statusit të Kosovës është rezoluta 1244, ndërsa "aktet e njëanshme nuk kanë rëndësi".

"Gjithashtu dëshiroj t'u bëj thirrje të gjitha palëve të përqëndrohen në zbatimin e politikës standardet para statusit, dhe të përkujtohen për rëndësinë që ia kushtojmë fillimit sa më të shpejtë të dialogut të drejtpërdrejtë ndërmjet Prishtinës dhe Beogradit mbi çështjet praktike të interesit të ndërsjellë", thuhet në këtë komunikatë të Havier Solanës.

 

 

Tirana dënon ashpër aktin kriminal në Gorazhdec të Pejës

 

Tiranë, 14 gusht 2003 - Ministria e Punëve të Jashtme përmes një komunikate dënon ashpër aktin kriminal të ndodhur dje në afërsi të Gorazhdecit (Pejë), në Kosovë, ku, si pasojë e të shtënave me armë zjarri nga persona të paidentifikuar, gjetën vdekjen dy të rinj serbë dhe u plagosën pesë të tjerë.

Në këtë komunikatë thuhet se ky është një krim monstruoz dhe veprim i dhunshëm i kryer nga individë të caktuar apo grupe kriminale, të cilët synonjnë të minojnë procesin e vështirë të vendosjes së sigurisë dhe stabilitetit, si dhe krijimin e klimës së besimit mes të gjitha etnive që jetojnë në Kosovë.

"Ne mbështesim organet kompetente të UNMIK-ut, si dhe autoritetet vendore për zbulimin dhe dënimin e autorëve të këtij akti kriminal", thekson Ministria e Punëve të Jashtme të Shqipërsië.

 

 

 

Është vrarë një udhëheqës lokal i lëvizjes radikale Xhihadi islamik

 

Xhenin, 14 gusht 2003 - Udhëheqësi lokal i lëvizjes radikale Xhihadi islamik Mohamed Sider është vrarë në një sulm të ushtrisë izraelite në një ndërtesë në Hebron në Bregun Perëndimor.

Përfaqësuesi i Xhihadit islamik në Bregun Perëndimor ka konfirmuar vrasjen e Siderit dhe ka paralajmëruar Izraelin se me jetën e ushtarëve të vet dhe të kolonistëve çifutë do të paguajë çmimin këtë për këtë vrasje.

 

 

Në një shpërthim të fuqishëm në qytetin spanjoll në Sevile, tre vetë kanë humbur jetën

 

Madrid, 14 gusht 2003 - Në një shpërthim të fuqishëm i cili shkatërroi një ndërtesë katërkatëshe në qytetin spanjoll në Sevile, tre vetë kanë humbur jetën, ndërkaq mbi 20 të tjerë janë lënduar, kanë konfirmuar autoritetet lokale.

 

Shpërthimi ka ndodhur në agim dhe me qëllim është shkaktuar, i ka thënë Rojterit përfaqësuesi i qeverisë rajonale. Tanë për tani nuk ka hollësi për personin, i cili duke shfrytëzuar gazin dhe benzinën ka shkaktuar shpërthimin, dhe cilët janë motivet e tij.

 

 

Nga shpërthimi i një autobusi në Indi kanë humbur jetën 6 udhëtarë

 

Guajati, Indi, 14 gusht 2003 - Kryengritës të dyshimtë seperatistë e kanë hedhur në erë një autobus në një autostradë kryesore në verilindje të Indisë dhe kështu kanë vrarë 6 udhëtarë, kurse janë plagosur edhe 15 të tjerë, njofton AP. Hetuesit kanë thënë se sulmuesit kanë planifikuar shpërthimin e bombës mbi një urë në shtetin Manipur.

 

Shpërthimi ka ndodhur vetëm një ditë para kremtes së pavarësisë së Indisë. Për këtë shpërdhim, ende s’e ka marrë përgjegjësinë asnjë grup, por zyrtatarët vendorë kanë thënë se ky është akt i kryengritësve seperatistë.

 

 

Persona të armatosur kanë vrarë 2 punëtorë ndihmës dhe kanë plagosur 3 të tjerë në jë sulm në Afganistan

 

Kabul, 14 gusht 2003 – Dy punëtorë afganë ndihmës janë vrarë sdhe tre të tjerë janë plagosur kur persona të panjohur të armatosur e kanë sulmuar autokolonën e tyre në Afganistanin jugperendimor, kanë bërë të ditur sot (e enjte) zyrtarët vendorë, njofton AP.

 

Sulmi mbi punëtorët e Gjysmëhënës afgane të islamit është pjesë e valës së djeshme të dhunës, që ishte ndër ditët më të përgjakshme në Afganistan që kur është përmbysur regjimi taliban.

 

 

Rreth 3.000 veta kanë vdekur në mbarë Francën si rrjedhojë e temperaturave abnormalisht të larta

 

Paris, 14 gusht 2003 – Rreth tremijë veta kanë vdekur në mbarë Francën si rrjedhojë e drejtëpërdrejtë apo e tërthortë e temperaturave abnormalisht të larta, që po mbretërojnë tash dy javë në mbarë vendin, ka deklaruar sot (e enjte) ministria franceze e shëndetësisë, njofton AP.

 

Ky është vlerësimi i parë zyrtar francez lidhur me vdekjet nga të nxehtit e madh, që po merr tash sa kohë.

 

 

Mbi 60 persona kanë humbur jetën gjatë 24 orëve të gjakderdhjes në Afganistan

 

Kabul, 14 gusht 2003 - Mbi 60 persona kanë humbur jetën gjatë 24 orëve të gjakderdhjes në Afganistan, që ndryshe është numri më i madh i të vdekurve në atë vend në një ditë pas një kohe të gjatë.

15 njerëz janë vrarë në shpërthimin e bombës në një kamionetë në provincën jugore në Helmandë.
21 luftëtarë, me siguri talibanë, si dhe ushtarët e qeverisë në Kabul janë vrarë në përleshjet në povincën Host në lindje të vendit.

 

Zyrtarët njoftojnë se të paktën 25 persona janë vrarë në luftimet ndërmjet fraksineve në krahinën Uruzgan në pjesën qendrore të Afganistanit.

 

Sipas BBC-së, në Kabul theksohet se shumnica e vrasjeve u mvishen rigrupimit të talibanëve në jug dhe në lindje të vendit, ndërkaq një pjesë e dhunës shpjegohet me rivalitetin e fraksioneve të ndryshme në momentin kur presidenti Hamid Karzai po përpiqet që autoritetetin e tij t'ua imponojë sundimtarëve të luftës.

 

 

Ushtarët amerikanë vrasin gjatë protestave në Bagdad një irakian

 

Bagdad, 14 gusht 2003 - Në kryeqytetin irakian ushtarët amerikanë vranë një dhe plagosën katër protestuesë tjerë. Siç njoftoi një zëdhënës i ushtrisë rasti ka ndodhur kur nga një grup prej rreth 3000 demonstruesish irakian u hodh një granatë dore në drejtim të ushtarëve amerikanë.

 

Dëshmitarë okularë nga ana tjetër njoftojnë se në vendin e ngjarjes janë zhvilluar përleshje të dhunshme kur ushtarët amerikanë nga një helikopter larguan një flamur të shiitëve prej një kulle telekomunikative.

 

Ndërkohë ushtarët amerikanët ishin sërish në shënjestër të sulmeve në Irak. Si pasojë e sulmeve në afërsi të Bagdatit dhe Tikritit dje u vranë dy ushtarë amerikanë.

 

 

Në Çeçeni vriten pesë dhe plagosen tre ushtarë rusë

 

Moskë, 14 gusht 2003 - Si pasojë e një shpërthimi në një kamion ushtarak në Çeçeni jetën kanë humbur të paktën pesë dhe janë plagosur tre ushtarë rus.

 

Shpërthimi ka ndodhur në rajonin kodrinor Vedeno, në juglindje të kryeqytetit Grozni, njofton agjencia ruse e lajmeve Interfaks e cila thirret në burime të ushtrisë

Copyright©2000-2003 Trepca.net - Të gjitha të  drejtat e rezervuara.