OPINIONE

CILI ËSHTË ROLI I KLERIKUT ORTODOKS PAVLE NË POLITIKËN SERBE?

PATRIARKU  PAVLE, KY NACIONALIST SERB MBAN PËRGJEGJËSI PËR DEGRADIMIN E PLOTË TË MIRËKUPTIMIT NDËRETNIK NË KOSOVË !

Roli i paskrupullt i Pavles në mbështetje intensive të politikës gjenocidiale të kriminelit Milosheviq dhe të bashkëpuntorëve të tij, roli i tij në formimin e enklavave serbe në Kosovë, në stopimin e proceseve demokratike dhe të pavarësimit të Kosovës ka qenë dhe vazhdon të jetë i pashmangshëm, derisa në anën tjetër i njëjti po arrin të përfitojë përkrahjen e disa qarqeve brenda faktorit politik shqiptar si dhe të faktorit ndërkombëtar, që janë treguar të gatshëm për kompromise në dëm të vullnetit të lirë politik të shqiptarëve të Kosovës!? Për këtë dëshmojnë edhe takimet sekrete të disa krerëve politik të Kosovës me këtë individ nacionalist thellësisht antishqiptar në SHBA si dhe në vende tjera akoma të panjohura për opinionin publik. 8 gusht 2003 / Shkruan : Besim KRASNIQI

   

Edhe pse i veshur nën petkun e një religjioni të caktuar (sllavo-ortodoks), patriarku serb Pavle shumë më pak i kushton kohë " punëve të Zotit " dhe të shpërndarjes së njohurive fetare të ortodoksizmit tek pakica serbe në Kosovë, ndërsa që kohën më të madhe ia kushton politikës antishqiptare duke bredhur kancelarive të perëndimit si i dërguari i Beogradit, duke keqpërdorur keqas  edhe pozitën e tij prej klerikut ortodoks.

Me petkun e tij prej kleriku dhe me propagandën e tij të bazuar në parimin serbosllav antishqiptar shumë të propaganduar në dhjetëvjetshin e fundit si " Kosova, djep i Serbisë ", Pavle ka arritur që të afrojë afër vetes të gjithë serbët me pikëpamje " patriotike " dhe me nivel të ulët të vetëdijes, të cilët janë të pakënaqur me gjendjen e krijuar në Kosovë pas luftës e këndej. Kjo nënkupton se kleriku politikan ka ndikim tek një pjesë bukur e madhe e serbëve të Kosovës, të cilët me një fanatizëm abnormal i shkojnë pas dhe i vihen në shërbim sa herë që e kërkon kleriku-politikan, i specializuar për futjen e frymës së intolerancës ndëretnike në Kosovë.

Përgjatë karrierës së tij politike, patriarku Pavle është vënë në shërbim të politikës ekspansioniste serbosllave dhe në dëm të popullit shqiptar të Kosovës dhe vullnetit të tij politik. Roli i paskrupullt i Pavles në mbështetje intensive të politikës gjenocidiale të kriminelit Milosheviq dhe të bashkëpuntorëve të tij, roli i tij në formimin e enklavave serbe në Kosovë, në stopimin e proceseve demokratike dhe të pavarësimit të Kosovës ka qenë dhe vazhdon të jetë i pashmangshëm, derisa në anën tjetër i njëjti po arrin të përfitojë përkrahjen e disa qarqeve brenda faktorit politik shqiptar si dhe të faktorit ndërkombëtar, që janë treguar të gatshëm për kompromise në dëm të vullnetit të lirë politik të shqiptarëve të Kosovës!? Për këtë dëshmojnë edhe takimet sekrete të disa krerëve politik të Kosovës me këtë individ nacionalist thellësisht antishqiptar në SHBA si dhe në vende tjera akoma të panjohura për opinionin publik menjëherë pas ndërhyrjes së NATO-s në Kosovë.

Deklarata e fundit publike e patriarkut nacionalist Pavle rreth statusit të ardhshëm politik të Kosovës kur deklarohet " për ruajtjen e sovranitetit të Serbisë në Kosovë ", gjë që nënkupton se është kundër pavarësisë së Kosovës, na jep një pasqyrë edhe më reale rreth figurës më pak religjioze e më tepër politike të agjentit politik të Serbisë, i cili synon me vendosmëri t'i qojë deri në fund planet kriminale të padronit të tij, i cili tashmë " mrizon " prapa grilave të drejtësisë në Den Haag.

Deklaratat e tilla kundër pavarësisë së Kosovës si dhe veprimet konkrete kundër politikës së bashkësisë ndërkombëtare, duke mos i njohur institucionet legjitime të Kosovës, pushtetin e UNMIK-ut,KFOR-it, SHPK-së etj., e me këtë duke inkurajuar veprimet ekstremiste kundër policëve të UNMIK-ut dhe SHPK-së (sikurse vrasja e fundit e policit të UNMIK-ut në Albanik) jo vetëm që duhet dënuar publikisht nga ana e UNMIK-ut dhe institucioneve të Kosovës, por do të duhej edhe të ndërmeren masa ligjore, duke ia ndaluar me vendim të menjëhershëm gjyqësor klerikut shovenist serb aktivitetin e tij propagandistiko - politik, pasojat e të cilës propagandë po i përjetojmë aktualisht.

Andaj, në qoftë se nga liderët shqiptarë kërkohet që të bëjnë politikë që inicon tolerancë etnike dhe fetare si dhe në qoftë se nga shqiptarët në përgjithësi kërkohet vazhdimisht të bashkëjetojnë me pakicën serbe në harmoni etnike, atëherë është më se e domosdoshme dhe e patjetërsueshme që bartësve të nostalgjisë millosheviqjane, agjentëve të tillë të Serbisë siç është patriarku Pavle dhe bashkëpuntorëve të tij t'u ndalohet aktiviteti politiko-propagandistiko-dirigjues kundër shqiptarëve dhe aleatëve tradicionalë të shqiptarëve. Indiferentizmi ndaj aktivitetit të personave të tillë do të thotë më shumë vrasje të shqiptarëve, të policëve të UNMIK-ut dhe SHPK-së, më shumë destabilizim, më tepër urrejtje ndërnacionale si dhe më shumë pasiguri për mbarë shoqërinë e Kosovës.

Copyright©2000-2003 Trepca.net - Të gjitha të  drejtat e rezervuara.