Lajme

E mërkure 6 gusht 2003

Përmbajtja:

• Presidenti Rugova ngushëlloi komesionerin e policisë së UNMIK-ut dhe Qeverinë e Indisë për policin e vrarë ndërkombëtar

• Mbledhje komemorative në selinë e UNMIK-ut në Prishtinë për vrasjen e policit indian Satish Menon

• Janë liruar dy nga tre personat e arrestuar dje në fshatin Cerajë të Albanikut

• AAK: Pavarësia është e panegociueshme dhe statusi final duhet të jetë vetëm implementim i vullnetit të popullit të Kosoves

• Një ushtar francez i KFOR-it ka bërë vetëvrasje

• "Indipendent" për vrasjen e policit të UNMIK-ut

• Qeveria dhe KFOR-i suedez ndihmojnë me pajisje SHPK-në

• UNMIK-u mohon njoftimet e Beogradit se gjatë katër viteve të fundit në Kosovë janë vrarë dhe zhdukur disa mijëra serbë

• Posttelekomi i Kosovës ka shtuar numrin e kabinave telefonike në tërë territorin e Kosovës

• Policia e UNMIK-ut dhe KFOR-i kanë ndërmarrë një operacion në fshatrat ku ditë më parë është vrarë polici ndërkombëtar

• Policia e UNMIK-ut ka arrestuar tre shqiptarë në fshatin Cerajë të Albanikut

• Është formuar një ekip i përbërë nga policë ndërkombëtarë dhe vendor për ndriçimin e vrasjes së policit ndërkombëtar

• Diogardi thotë se kongresisti Tom Lantosh është i shqetësuar me gjendjen e shqiptarëve në Mal të Zi

• Në një atentat në Durrës, plagoset shefi i Komisariatit të Krujës dhe vritet shoferi i tij

• Alfred Moisiu organizon në Tiranë "takimin e parë ballkanik të miqësisë"

• Zhivkoviq ka ofruar 1.000 ushtarë për përbërjen e forcave stabilizuese në Irak?

• Policia maqedonase ka arrestuar një të dyshuar që ka planifikuar atentat ndaj presidentit Trajkovski

• Qytetarët që nuk e kanë kryer obligimin ushtarak, duhet të paraqiten në njësitë rajonale të Armatës maqedonse

• Turqia po shqyrton mundësinë e dërgimit të trupave ushtarake në Irak

• Izraeli ka liruar sot grupin e parë prej 300 palstinezësh nga lista e paraparë për lirim

• Liga Arabe nuk e njeh Këshillin kalimtar të Irakut

• Organizata islamike "Xhema islamia" ka marrë përgjegjësinë për sulmin në Xhakartë

• Nga shpërthimi i një kamioni në Bagdad, besohet të kenë humbur jetën 4 vetë

• Një kontraktues amerikan ka humbur jetën kur kamioni i tij ka rënë në minë

• 14 të vdekur dhe 149 të plagosur nga një shpërthim në Xhakartë

• Nga zjarret kanë vdekur 11 persona

• Policia irakiane ka arrestuar vëllain e një nga truprojeve të Sadamit

• Bhuto fajtore për korruspion

Presidenti Rugova ngushëlloi komesionerin e policisë së UNMIK-ut dhe Qeverinë e Indisë për policin e vrarë ndërkombëtar

 

Prishtinë, 6 gusht 2003 - Presidenti i Kosovës, Dr. Ibrahim Rugova, i ka dërguar një letër komisionerit të policisë së UNMIK-ut, z. Shtefan Feler, përmes së cilës ngushëllon policinë e UNMIK-ut, Qeverinë e Indisë, si dhe familjen e policit të vrarë, majorit Satish Menon. Në letër thuhet:

"Me pikëllim të thellë mora lajmin për vrasjen e tmerrshme natën e të dielës të një polici të OKB-së, majorit Satish Menon, në një pritë në veri të Kosovës.

Siç e kam thënë në një deklaratë të hënën, duket se ky ka qenë akt kriminal i kryer nga ekstremistët që nuk e duan progresin e Kosovës.

Në emrin tim dhe të popullit të Kosovës, u shpreh ngushëllimet e thella policisë së UNMIK-ut, kontigjentit policor indian në Kosovë, qeverisë së Indisë, si dhe familjes së policit të vrarë, majorit Satish Menon.

Majori Menon ka qenë në shërbim të vyer të popullit të Kosovës. Ai ka vdekur në detyrë. Këtë do ta çmojmë përherë në vendin tim", përfundon letra e Presidentit të Kosovës, Dr. Ibrahim Rugova.

 

 

Mbledhje komemorative në selinë e UNMIK-ut në Prishtinë për vrasjen e policit indian Satish Menon

 

Prishtinë, 6 gusht 2003 - Në mbledhje komemorative të mbajtur sot në selinë e UNMIK-ut në Prishtinë, me rastin e vrasjes së pjesëtarit të policisë ndërkombëtare, majorit indian Satish Menon, u tha se ai kishte ardhur në Kosovë të kontribuojë për paqen, kishte jetuar për paqen dhe ka vdekur për të, kurse shpirti i tij do të jetojë në paqe.

Duke folur në këtë komemoracion në emër të Qeverisë së Kosovës Kryeministri Bajram Rexhepi shprehu dhembjen e thellë për majorin Menon, duke thënë se ky akt kriminal është i drejtuar kundër demokracisë, kundër funksionimit të ligjit, kundër komunitetit ndërkombëtar dhe kundër popupllt të Kosovës.

 

Por askush nuk mund të ndalë procesin e demokracisë në Kosovë, tha Rexhepi dhe shtoi se pas këtij akti mizor pjesëtarët e policisë së UNMIK-ut do të jenë më të fortë dhe më të kujdesshëm për të luftuar të gjitha llojet e krimit në Kosovë. Ai me këtë rast i shprehu ngushëllime familjes së majorit të ndjerë Menon.

Pas zhvillimit të ceremonisë përkujtimore, trupi i pajetë i Satish Menonit është përcjellë për në vendlindjen e tij, në Indi.

 

 

Janë liruar dy nga tre personat e arrestuar dje në fshatin Cerajë të Albanikut

 

Mitrovicë, 6 gusht 2003 - Dy nga tre personat e arrestuar dje në fshatin Cerajë të Albanikut (Leposaviq), Fatmir Abdyli dhe Lulzim Azemi janë liruar nga arresti, ndërkaq personi i tretë Azir Aliu po mbahet në arrest nën akuzën për armëmbajtje pa leje, ka bërë të ditur policia e UNMIK-ut në Mitrovicë.

 

Ndërkohë zëdhënësja e policisë tha se operacioni për kërkimin e të dyshuarve për vrasjen e policit Satish Menon është duke vazhduar rreth vendit ku ka ndodhur krimi, Por deri më tash nuk ka të arrestuar lidhur me rastin.

 

 

AAK: Pavarësia është e panegociueshme dhe statusi final duhet të jetë vetëm implementim i vullnetit të popullit të Kosoves

 

Prishtinë, 6 gusht 2003 - Pavarësia e Kosovës është e panegociueshme, ndërkaq statusi final i Kosovës zgjidhet duke implementuar vullnetin e popullit të Kosovës për Kosovën shtet të pavarur.

 

Bisedat e nevojshme për zgjidhjen dhe harmonizimin e implikimeve që dalin gjatë implementimit të statusit final jemi të hapur t'i bisedojmë me partnerët tanë, por vetëm me ndihmën e Qeverisë së SHBA-ve me rol udhëheqës për bashkësinë ndërkombëtare, në këto bisedime, - thuhet në një kumtesë të AAK-së.

AAK e konsideron jetike për zhvillimin e gjithëmbarshëm të Kosovës zbatimin e këtyre prioriteteve: kompletimi i Qeverisë me të gjitha ministritë e nevojshme; avancimi i bazës kushtetuese dhe i infrastrukturës ligjore të nevojshme; kujdes i shtuar në rendin publik, me qëllim të shtimit të sigurisë për jetën dhe pronën e njerëzve, - thuhet në një kumtesë të AAK-së.

 

 

Një ushtar francez i KFOR-it ka bërë vetëvrasje

 

Albanik, 6 gusht 2003 - Një ushtar francez i KFOR-it ka bërë vetëvrasje, dje pasdite, në afërsi të Albanikut (ish-Leposaviqit) në veri të Kosovës, njofton AFP, duke iu referuar një zyrtari të NATO-s.

Në njoftim thuhet se ushtari, identiteti i të cilit nuk është njoftuar, ka bërë vetëvrasje gjatë kohës që njësia e tij po kryente një operacion për kërkimin e armëve ilegale.

Zëdhënësi i kontigjentit francez të KFOR-it ka deklaruar se ushtari, i cili kishte qenë vetëm në momentin që e kishte vrarë veten me armë personale, e kishte lënë një letër.

 

 

"Indipendent" për vrasjen e policit të UNMIK-ut

 

Londër, 6 gusht 2003 - Në lidhje me vrasjen e pjesëtarit të policisë së UNMIK-ut, majorit indian Satish Menon, gazeta britanike "Indipendent" shkruan për frikën se kjo vrasje është e lidhur me sulmet e paradokohshme që pasuan pas dënimet të ish-anëtarëve të UÇK-së.

Gazeta përkujton se më 20 korrik është sulmuar me një granatë ndërtesa e Gjykatës së Qarkut në Prishtinë e pastaj pasoi edhe shpërthimi para një stacioni të policisë.

Sipas gezetës, ndërsa disa të këtë dhunë e lidhin me dënimin e katër shqiptarëve, të tjerët edhe më tutje mendojnë se fjala është për veprimet e bandave të zakonshme, shkruan "Indipendent".

 

 

Qeveria dhe KFOR-i suedez ndihmojnë me pajisje SHPK-në

 

Prishtinë, 6 gusht 2003 - Në stacionin policor të SHPK-së në lagjen Dardania të Prishtinës, sot, organizohet një ceromoni me rastin e dorëzimit të pajisjeve për nevoja të këtij stacioni. Pajisjet janë dhuratë e Qeverisë së Suedisë dhe të kontigjentit suedez të KFOR-it.

Në ceremoninë e dorëzimit të pajimeve, përveç zyrtatarëve të policisë së UNMIK-ut e të SHPK-së, do të marin pjesë edhe Kryetari i komunës së Prishtinës Ismet Beqiri dhe Kryeshefi i ekzekutivit, Sami Hamiti.

 

 

UNMIK-u mohon njoftimet e Beogradit se gjatë katër viteve të fundit në Kosovë janë vrarë dhe zhdukur disa mijëra serbë

 

Prishtinë, 6 gusht 2003 - Zyrtarë të UNMIK-ut mohuan njoftimet e zyrtarëve serbë në Beograd, sipas të cilëve prej vitit 1999 në Kosovë kanë humbur jetën mbi 1500 pjesëtarë të komunitetit serb dhe janë zhdukur mbi 1300 të tjerë.

 

Zëdhënësja e UNMIK-ut Izabela Karlovic tha se këto janë statitika joreale dhe sipas saj gjatë vitit 1999 në Kosovë janë vrarë 150 serbë, një vit më vonë 75, në vitin 2001 30, ndërkaq vitin e kaluar kanë humbur jetën vetëm 6 serbë. Gjatë këtij vitin ndërkaq 5 pjesëtarë të këtij komuniteti kanë pësuar në Kosovë.

Zëdhënësja Karlovic tha se që nga përfundimi i konfliktit në Kosovë janë vrarë gjithësej 266 pjesëtarë të komunitetit serb. Ndërkaq gjatë të njëjtës periudhë janë regjistrua 982 serbë të zhdukur, Ajo tha se që nga përfundimi i luftës në Kosovë janë vrarë gjithësej 920 persona të të gjitha përkatësive etnike.

Një përllogaritje e thjeshtë matematikore, tha ajo përgënjeshtëron në tërësi pohimet e zyrtarëve të Beogradit, të cilët sipas saj duhet të bëjnë dallimin ndërmjet personave të vrarë dhe atyre që ende lllogariten si të zhdukur.

 

 

Posttelekomi i Kosovës ka shtuar numrin e kabinave telefonike në tërë territorin e Kosovës

 

Prishtinë, 6 gusht 2003 - Posta dhe Telekomunikacioni i Kosovës ka shtuar numrin e kabinave telefonik Pej-fon në tërë territorin e Kosovës. Kjo mënyrë do t'u mundësojë qytetarët të komunikojnë edhe nëpërmjet këtij shërbimi që është më i lirë në krahasim me shërbimet e tjera postare.

 

Këto kabina telefonike janë vendosur edhe në disa lokacione ku më parë nuk ka ekzistuar rrjeti telefonik dhe është mirëpritur nga banorët, tha Blerim Bala zyrtar për marrëdhënie me publikun në PTK.

 

Por në anën tjetër këto kabina do t'i sjellin një fitim vetë PTK-së. Sipas zyrtarëve të PTK-së, përdorimi Pej-fon është mjaft i madh dhe të ardhurat nga ato janë mesatarisht 400 euro për një kabinë.

Deri me tash në gjithë Kosovën janë vendosur 600 Pej-fon kabina.

 

 

Policia e UNMIK-ut dhe KFOR-i kanë ndërmarrë një operacion në fshatrat ku ditë më parë është vrarë polici ndërkombëtar

 

Mitrovicë, 6 gusht 2003 - Policia e UNMIK-ut në bashkëpunim me pjesëtarë e KFOR-it kanë ndërmarrë një operacion për kontrollimin e fshatrave përreth ku ditë më parë është vrarë polici ndërkombëtar. Njësia rajonale e hetimeve ka ndërmarrë një operacion me kërkim të armëve dhe lokalizimin e të dyshuarëve, ku ka ndodhur vrasja. Njoftohet se operacionet e tilla do të vazhdojnë.

Ndërkaq, burimet e KFOR-it kanë bërë të ditur se që nga orët e hershme të mëngjesit të ditës së marte policia e UNMIK-ut dhe paqeruajtësit e BSH Verilindje kanë ndërmarrë një operacion në kërkim të njerëzve dhe çdo gjëje që ka të bëjë me terrorizëm.

 

 

Policia e UNMIK-ut ka arrestuar tre shqiptarë në fshatin Cerajë të Albanikut

 

Mitrovicë, 6 gusht 2003 - Tre shqiptarë janë arrestuar dje nga policia e UNMIK-ut në fshatin Cerajë të Albanikut, ka njoftuar KMDLNJ-së, qendra rajonale në Mitrovicë. Janë arrestuar: Hazir Aliu 50-vjeçar, Fatmir Abdyli 36-vjeçar dhe Lulzim Azemi 22-vjeçar.

 

Por sipas KMDLNJ-së nuk dihen shkaqet e këtyre arrestimeve. Këto arrestime janë bërë vetëm një ditë pas vrasjes së një polici ndërkombëtar në këtë rajon. Arrestimet e djeshme nuk janë konfirmuar ende nga zyrtarët e policisë së UNMIK-ut në Mitrovicë.

 

 

Është formuar një ekip i përbërë nga policë ndërkombëtarë dhe vendor për ndriçimin e vrasjes së policit ndërkombëtar

 

Prishtinë, 6 gusht 2003 - Komesioneri i policisë ndërkombëtare Stefan Feller ka bërë të ditur se është formuar një ekip i përbërë nga policë ndërkombëtarë dhe vendorë për zbulimin e policit ndërkombëtar i cili u vra ditë më parë në afërsi të Albanikut.

KFOR-i konsideron se çdo sulm i drejtuar kundër UNMIK-ut, policisë apo sistemit gjyqësor është sulm edhe ndaj KFOR-it, tha zëdhënësi i KFOR-it Geri Benistergrin.

 

 

Diogardi thotë se kongresisti Tom Lantosh është i shqetësuar me gjendjen e shqiptarëve në Mal të Zi

 

Prishtinë, 6 gusht 2003 - Kongresisti dhe mbrojtësi i madh i çështjes shqiptare në Ballkan Tom Lantosh pas vizitës së që i bëri Malit të Zi gjatë javës së shkuar në krye të një delegacioni shqiptaro-amerikan është shprehur i shqetësuar me gjendjen e shqiptarëve në këtë vend. Kështu ka deklaruar në Prishtinë, udhëheqësi i Ligës Shqiptaro-amerikane, Xhozef Diogardi.

"Zëri i lobit shqiptaro-amerikan ka filluar punën për zgjidhjen e çështjes shqiptare që nga viti 1989. Deri më sot ishte zëri më i fuqishëm dhe në këtë drejtim dha kontribut shumë të madh", është shprehur dje para gazetarëve, Xhozef Diogardi, i cili së bashku me kongresistin Toma Lantosh gjatë javës së shkuar bëri një vizitë nëpër trevat ku jetojnë shqiptarët në Mal të Zi.

 

 

Në një atentat në Durrës, plagoset shefi i Komisariatit të Krujës dhe vritet shoferi i tij

 

Durrës 6 gusht 2003 - Në një atentat që ka ndodhur sot në Durrës, persona të panjohur kanë plagosur shefin e Komisariatit të policisë së Krujës, Gani Malushin dhe kanë vrarë shoferin e tij Gjovalin Ndreu.

 

Shefi i komisariatit ndodhet në gjendje të rëndë shëndetësore në spitalin e Durrësit. Dëshmitarë kanë deklaruar se Malushi dhe Ndreu kanë qenë brenda makinës së tyre të parkuar pranë spitalit, ndërkohë nga një makinë kanë dalë disa persona, që kanë shkrehur një breshëri plumbash ndaj makinës së policisë.

Sipas njoftimeve nga Tirana polixia tashmë ka identifikuar atentatorin, por për shkaqe "sigurie dhe hetimore" nuk është bërë i ditur emri i tij.

 

 

Alfred Moisiu organizon në Tiranë "takimin e parë ballkanik të miqësisë"

 

Tiranë, 6 gusht 2003 - Presidenti i Shqipërisë Alfred Moisiu më 22 e 23 gusht organizon në Tiranë "takimin e parë ballkanik të miqësisë", i cili do të jetë në formë të lutjes së mëngjesit, e në të cilin do të ftohen zyrtarët e vendeve të Ballkanit.

 

Sipas mediave të Beogradit në këtë takim është ftuar shefi i diplomacisë së Bosnjës e Hercegovinës Mlladen Ivaniq, ministri i Serbisë dhe i Malit të Zi për të drejtat e njeriut dhe minoriteteve Rasim Lajiq, kryetari i Partisë Demokratike të Serbisë Vojisllav Koshtunica, zëvendëskryeministri i Kroacisë Mate Graniq, presidenti maqedonas Boris Trajkovski dhe shefi i diplomaacisë rumune Mirçea Xhoana.

Thuhet se qëllimi i Presidentit Moisiu është që këto takime të bëhen tradicionale, por që çdo vit takimi do të organizohej në një vend tjetër të Ballkanit.

 

 

Zhivkoviq ka ofruar 1.000 ushtarë për përbërjen e forcave stabilizuese në Irak?

 

Uashington, 6 gusht 2003 - Rrjeti televiziv amerikan CNN njoftoi se kryeministri i Serbisë, Zoran Zhivkoviq, gjatë vizitës së tij në Uashington, ka ofruar 1.000 ushtarë të Serbisë e Malit të Zi për përbërjen e forcave stabilizuese në Irak.

 

Në njoftim thuhet se Zhivkoviqi ka thënë se ushtarët e Serbisë e Malit të Zi mund t'u bashkohen ushtarëve amerikanë edhe në vende të tjera, kudo që SHBA-të e konsiderojnë të nevojshme.

Në Beograd nuk janë dhënë ende njoftime zyrtare lidhur me këtë ofertë të Zhivkoviqit në Uashington. Ministria e Mbrojtjes nuk ka dashur ta komentojë këtë çështje, para se Zhivkoviqi të njoftojë zyrtarisht lidhur me ofertën eventuale.

Ministri i Punëve të Jashtme të Unionit Serbi-Mal i Zi, Goran Svilanoviq, ka deklaruar se vendimin përfundimtar për dërgimin eventual të ushtarëve në misione jashtë vendit mund ta marrin vetëm organet e unionit - parlamenti dhe Shtabi i Përgjithshëm i ushtrisë.

 

 

Policia maqedonase ka arrestuar një të dyshuar që ka planifikuar atentat ndaj presidentit Trajkovski

 

Shkup, 6 gusht 2003 - Policia e Maqedonisë gjatë festës së Ilindenit në Krushevë ka arrestuar Mirko Hristovin, i cili ka pasur ndërmend të bëjë atentat ndaj presidentit të Maqedonisë Boris Trajkovski, njoftuan mediat maqedonase.

 

Tek ky lider i Lëvizjes Popullore Maqedonase të paregjistruar policia ka gjetur një granatë dore dhe një pistoletë dhe ka thënë se tentativa për atentat ndaj Trajkovskit është penguar para fjalimit të tij.

Mirko Hristov një kundërshtar i Marrëveshjes së Ohrit kishte thënë në një intervistë të mëhershme se ai personalisht do t'i jepte fund qeverisjes së Trajkovskit dhe u kishte bërë thirrje të gjithë maqeonasve që t'i bashkohen një qeverie kalimtare revolucionare.

 

 

Qytetarët që nuk e kanë kryer obligimin ushtarak, duhet të paraqiten në njësitë rajonale të Armatës maqedonse

 

Shkup, 6 gusht 2003 - Qytetarët e Maqedonisë, të cilët nuk e kanë kryer obligimin ushtarak, e që janë amnestuar sipas ligjit, në gjashtë muajt e ardhshëm duhet të paraqiten në njësitet rajonale të Ministrisë maqedonase të Mbrojtjes që të hyjnë në përbërjen rezervë të kësaj armate.

 

Ky është edhe versioni përfundimtar i Ligjit për amnisti, i cili është miratuar nga Parlamenti maqedonas kah mesi i muajit korrik.

 

Në këtë ligj është lënë mundësia që të amnistuarit prej moshës 27-30 vjeç me ftesë të njësive rajonale të Ministrisë së Mbrojtjes të paraqiten në vendin ku jetojnë dhe të deklarohen se a do të kryejnë obligimin ushtarak, apo do të kalojnë në pjesën rezervë të Armatës maqedonase.

 

 

Turqia po shqyrton mundësinë e dërgimit të trupave ushtarake në Irak

 

Ankara, 6 gusht 2003 - Zyrtarët më të lartë të Turqisë janë takuar dje për të shqyrtuar kërkesën e Shtetetve të Bashkuara për të kontribuar me trupa në forcën shumëkombëshe stabilizuese në Irak.

Pas takimit, kryeministri Abdullah Gul ka thënë se vendimi që të kërkohet autorizimi i parlamentit për dërgimin e ushtarëve turq në Irak do të merret pas vlerësimit të situatës së sigurisë në Irak nga Shtatmadhoria e Armatës.

 

 

Izraeli ka liruar sot grupin e parë prej 300 palstinezësh nga lista e paraparë për lirim

 

Jerusalem, 6 gusht 2003 – Izraeli ka liruar sot (e merkurë) grupin e parë prej 300 palstinezësh nga lista e paraparë për lirim, të cilët janë përshëndetur nga të afërmit e tyre me valim flamujsh dhe brohoritjet: “Mirësevini” dhe “Zoti është i madh”, njofton AP.

 

Grupi i parë i të burgosurve është transportuar me autotaksi palestineze nga pikëkontrolli izraelit Erez në Rripin e Gazës. Një burrë ka dalë nga autotaksi dhe e ka puthur tokën.

 

Një minutë më vonë, disa të burgosur janë liruar në udhëkryqin Bejtunja, afër Ramallahut. Pastaj disa autobusë përplot të burgosur kanë arritur në pikëkontrollin te Tarkumia në Breguin Perendimor. Izraeli është pajtuar të lirojë 440 të burgosur si gjest i vullnetit të mirë ndaj palestinezëve.

 

 

Liga Arabe nuk e njeh Këshillin kalimtar të Irakut

 

Kairo, 6 gusht 2003 - Liga Arabe nuk do ta njohë Këshillin kalimtar irakian, të caktuar nga Shtetet e Bashkuara, ka deklaruar sekretari i përgjithshëm i saj, Amer Musa, pas mbledhjes së djeshme në Kairo.

 

"Këshilli kalimtar qeveritar irakian konsiderohet si hap përpara apo si fillim që duhet ta hapë rrugën për vendosjen e qeverisë legjitime kombëtare irakiane", ka deklaruar Amer Musa.

Kjo do të thotë se vendi i Irakut në Ligën Arabe do të mbetet i zbrazët, derisa në këtë vend të formohet një qeveri e re.

 

 

Organizata islamike "Xhema islamia" ka marrë përgjegjësinë për sulmin në Xhakartë

 

Xhakartë, 6 gusht 2003 - Organizata islamike "Xhema islamia" ka marrë përgjegjësinë për sulmin e së martës me një automobil bombë para hotelit "Mariot" në Xhakartë. Eksplozivi dhe metodat që janë shfrytëzuar në sulmin terrorist ndaj hotelit janë të ngjashme me ato që janë përdorur më herët në sulmin terrorist në Bali, ka bërë të ditur policia indoneziane.

 

 

Nga shpërthimi i një kamioni në Bagdad, besohet të kenë humbur jetën 4 vetë

 

Bagdad, 6 gusht 2003 – Një kamion i parkuar afër një shitoreje të lëndëve kimike ka shpërthyer sot (e merkurë) në Bagdad, ku ka humbur jetën një irakian, kurse shitoren e ka marrë flaka, njofton Rojter. Ndërkaq, vendorët kanë thënë se edhe tre persona të tjerë kanë vdekur brenda shitores së djegur.

 

Ata kanë thënë gjithashtu se disa nga lëndët kimike, që shiteshin në shitore, mund të përdoreshin për prodhimin e eksploziveve. Besohet se shpërthimi ka qenë aksidental. Trupat amerikane kanë rrethuar vendin, por kanë thënë se s'kanë informacione për incidentin.

 

 

Një kontraktues amerikan ka humbur jetën kur kamioni i tij ka rënë në minë

 

Tikrit, 6 gusht 2003 – Një civil amerikan, që punonmte me kontratë për ushtrinë amerikane, është vrarë dje në Irak kur kamioni i tij ka rënë në një minë tokësore kundërtanke, e cila ka shpërthyer dhe ka hedhur në erë kamionin e tij, njofton Rojter. Incidenti ka ndodhur në rrethinë të Tikritit, qytet i njohur si vendlindje e Sadamit.

 

 

14 të vdekur dhe 149 të plagosur nga një shpërthim në Xhakartë

 

Xhakartë, 6 gusht 2003 - Indonezia pritet të njoftojë sot masa më të ashpra sigurimi në përgjigje të shpërthimit të një makine bombë pranë një hoteli luksoz në Xhakarta.

Dje, të paktën 14 veta humbën jetën dhe 149 të tjerë u plagosën nga një shpërthim i fuqishëm përjashta hotelit Marriot, i administruar nga amerikanët, në kryeqytetin indonezian.

Presidenti indoneziane, Megavati Sukarnoputri, bëri një vizitë të shkurtër në vendin e shpërthimit, por u largua pa bërë ndonjë deklaratë. Guvernatori i Xhakartës, Sutiyoso, tha se kishte shumë të ngjarë që shpërthimi të ishte kryer nga një vetëvrasës.

Në hotelin 33 katësh shpesh shkojnë personelet e ambasadave aty pranë. Hoteli është i njohur gjithashtu se frekuentohet nga të huajt. Policia ka konfirmuar se një prej viktimave është një qytetar holandez.

 

 

Nga zjarret kanë vdekur 11 persona

 

Bruksel, 6 gusht 2003 - Evropa është goditur nga një valë e re nxehtësie, ndërkohë që njerëzit nuk janë të përgatitur.

Portugalia ka shpallur gjendjen e emergjencës ndërsa që vazhdon puna për të shuar zjarret e pyjeve, në valën e të nxehtit që ka përfshirë një pjesë të mirë të Evropës. Nga zjarret kanë vdekur 11 persona dhe janë shkatërruar dhjetra shtëpi si dhe mijëra hektarë pyje gjatë dy javëve të kaluara.

 

Ekspertët thonë se të nxehtit ende nuk ka rritur kulmin. Zyrtarët portugezë ka bërë thirrje për ndihmë ndërkombëtare në përpjekjet për të shuar zjarret e pyjeve.

 

Një zëdhënës i Ministrisë së Jashtme tha se Portugalia i ka kërkuar Natos të dërgojë 6 avionë kanadezë për hedhjen e ujit, së bashku me tre helikopterë dhe ekipet përkatëse, për të ndihmuar në luftën kundër zjarreve.

 

 

Policia irakiane ka arrestuar vëllain e një nga truprojeve të Sadamit

 

Tikrit, Irak, 6 gusht 2003 – Policia irakiane ka arrestuar vëllain e një nga truprojeve më të larta të Sadam Hyseinit dhe ia ka dorëzuar forcave amerikane, i cili ka qenë person i kërkuar, ngase ka organizuar sulmet guerile kundër ushtarëve amerikanë, ka bërë të ditur sot (e merkurë) zëdhënësi ushtarak amerikan, njofton AP.

 

Ai gjithashtu ka thënë se nuk mund të identifikojë të arrestuarin, por ka thënë se është vëllau i Adnan Abdullah Abid al-Muslit, truproje e lartë e Sadamit, i cili është arrestuar më 29 korrik në Tikrit.

 

 

Bhuto fajtore për korruspion

 

Gjenevë, 6 gusht 2003 - Një gjykatë në Zvicër ka shpallur fajtore ish kryeministren pakistaneze, Benazir Bhutto për përfshirje në korrupsion. Gjykata shpalli fajtor edhe bashkëshortin e saj, Asif Zardari. Të dy u dënuan me nga gjashtë muaj burg të pezulluar dhe me gjobë prej 50 mijë dollarësh.

Çifti si dhe avokati i tyre zviceran u gjetën fajtorë për spastrim të komisioneve financiare të jashtëligjshme nga kontrata shtetërore që Pakistani kishte ndërmarrë me kompani zvicerane.

Copyright©2000-2003 Trepca.net - Të gjitha të  drejtat e rezervuara.