Marsi Ris: "Më vjen shumë mirë që jam në Kosovë"

Prishtinë, 2 gusht 2003 - Zyra e SHBA-ve në Prishtinë njofton se zonja Marsi Ris (Marcie Ries), zyrtare e lartë e Shërbimit të Jashtëm të Departamentit të Shtetit të SHBA-ve, ka arritur në Prishtinë më 30 korrik, për të marrë detyrën e re si shefe e misionit të Zyrës së SHBA-ve në Prishtinë. Gjatë punës 25-vjeçare në Shërbimin e Jashtëm, zonja Ris është përqendruar kryesisht në Evropë dhe në çështjet politiko-ushtarake, duke përfshirë këtu edhe 8 vjet pune rreth politikës së SHBA-ve për Ballkanin.   Ajo i njeh çështjet bilaterale dhe rajonale dhe ka kryer detyra lidhur me institucionet kryesore evropiane, duke përfshirë edhe OSBE-në, NATO-n dhe BE-në. Me të arritur në Zyrën e SHBA-ve në Prishtinë, zonja Ris tha: "Më vjen shumë mirë që jam në Kosovë dhe pres të punoj ngushtë me PSSP-në Holkeri, presidentin Rugova, kryeministrin Rexhepi dhe me përfaqësuesit tjerë të institucioneve qeverisëse të Kosovës.

 

Në javët që vijnë kemi shumë për të bërë, që të vazhdojmë punën e mirë që është bërë deri tani në përparimin e standardve të vendosura nga bashkësia ndërkombëtare dhe për t'u përgatitur për bisedimet teknike mes Prishtinës dhe Beogradit.

Mes popullit amerikan dhe atij të Kosovës ekziston një ngrohtësi e veçantë, prandaj unë jam e bindur se koha para nesh do të jetë periudhë e përparimit dhe produktivitetit, ndërsa vazhdojmë ta lëvizim Kosovën përpara drejt përmbushjes së Rezolutës 1244" përfundoi zonja Ris.

Deri më 6 qershor të këtij viti, zonja Ris ka qenë drejtor i Zyrës së Departamentit të Shtetit për Çështjet Politike të Kombeve të Bashkuara. Ajo, po ashtu, ka pasur pozita në Byronë për Çështje Evropiane në Uashington, në Byronë për Çështje Politiko-Ushtarake dhe në Stafin për Planifikim Politik.

 

Si bursiste e Pirson-it (Pearson), në vitin 1991, ajo ka punuar për udhëheqësin e Komitetit për Marrëdhënie Ndërkombëtare të Dhomës së Përfaqësuesve.

Gjatë punës së saj nëpër misionet diplomatike amerikane jashtë vendit, zonja Ris ka punuar në ambasadat e SHBA-ve në Londër, në Ankara, në Santo Domingo, si dhe në misionin e SHBA-ve pranë Bashkimit Evropian në Bruksel.

Zonja Ris ka diplomuar në kolexhin Oberlin, në Oberlin të shtetit Ohajo, si dhe në Shkollën Xhon Hopkins për Studime të Larta Ndërkombëtare, në Uashington, D.C.

Është e martuar me një diplomat amerikan, me të cilin ka një djalë dhe një vajzë.

Copyright©2000-2003 Trepca.net - Të gjitha të  drejtat e rezervuara.