Presidenti Rugova i uroi mirëseardhje në Kosovë shefes së misionit të Zyrës amerikane në Prishtinë, Marsi Ris

Presidenti Rugova i uroi mirëseardhje në Kosovë shefes së misionit të Zyrës amerikane në Prishtinë, Marsi Ris

Prishtinë, 1 gusht 2003 / TN/ QIK - Presidenti i Kosovës, Dr Ibrahim Rugova, priti sot, në një takim mirëserdhjeje, shefen e re të misionit të Zyrës amerikane në Prishtinë, Zonjën Marsi Ris.

Duke i uruar zonjës Ris mirëseardhje në Kosovë, Presidenti Rugova shprehu gatishmërinë për vazhdimin e bashkëpunimit të mirë me palën amerikane.

"Do të kemi bashkëpunim të ngushtë, ashtu siç kemi pasur edhe deri më tash, me Shtetet e Bashkuara të Amerikës", u shpreh ai.

Presidenti Rugova bëri të ditur se në takimin e parë me zonjën Ris është biseduar për situatën dhe zhvillimet aktuale në Kosovë.

"Zonjën Ris e njoftova për progesin që kemi bërë në Kosovë gjatë këtyre katër vjetëve, sidomos gjatë vitit të fundit", tha presidenti Rugova.

"E njoftova edhe për objektivat qeverisë e të institucioneve tona, për zhvillimin ekonomik, për fillimin e procesit të privatizimit dhe për integrimin e grupeve etnike në shoqërinë kosovare", shtoi z. Rugova.

Ai ritheksoi qëndrimin e tij për njohjen sa më të shpejtë të pavarësisë së Kosovës dhe për integrimin e Kosovës në NATO e në strukturat tjera veriatlantike si edhe në Bashkimin Evropian, në miqësi të përhershme me Shtetet e Bashkuara të Amerikës.

Presidenti Rugova shfrytëzoi edhe këtë rast që qeverinë e Shteteve të Bashkuara dhe presidentin Bush të falënderojë për gjithë atë që kanë bërë për Kosovën.

Shefja e misionit të Zyrës Amerikane në Prishtinë, Marsi Ris, shprehu gjithashtu kënaqësinë që gjendet në Kosovë.

"Pata kënaqësinë të takoj presidentin Rugova. Ky është takimi im i parë zyrtar në Kosovë. Siç e dini, midis popullit amerikan dhe popullit të Kosovës ekziston një miqësi e ngrohtë, prandaj unë jamë shumë e lumtur që gjendem këtu", deklaroi zonja Ris.

"Presidenti dhe unë diskutuam se si të punojmë së bashku për ndërtimin e një shoqërie paqësore, demokratike e multietnike në Kosovë", tha ajo.

Zonja Ris tha se do të bëjë një udhëtim rreth Kosovës dhe do të takohet me shumë qytetarë të Kosovës.

Marsi Marsi Ris e zëvendëson shefin e deritashëm të misionit të Zyrës amerikane në Prishtinë, Reno Harnish, i cili është emëruar ambasador i Shteteve të Bashkuara të Amerikës në Azerbejxhan.