Podujevë: Qeveria e Kosovës kërkon raport për dëmet e shkaktuara për të shqyrtuar mundësitë për ndihmë

Podujevë, 30 korrik 2003 (TN) -  Delegacioni i Qeverisë së Kosovës i përbërënga sekretari i përhershëm në Ministrinë e Bujqësisë Menderes Ibra, Binak Krasniçi drejtor i departamentit për zhvillim rural, Avdullah Nishori drejtor i deparatamentit për mbrojtjen e bimëve dhe Jusuf Salihu vizituan sot komunën e Podujevës me ç’rast u takuan me zv. Kryetarin e komunës z. Agim Kikaj.

“Jemi të autorizuar nga Qeveria për të vizituar komunën, për të shprehur solidarizimin e Qeverisë me popullatën e Podujevës”, theksoi z. Ibra. Ai tha se qëllimi i vizitës është kërkesa e Qeverisë së Kosovës për përpilimin e një raporti për dëmet e shkaktuara nga breshëri dhe shqyrtimi i mundësisë së ndihmës për të gjithë ata që kanë pësuar nga kjo fatkeqësi.

“Vetë kryeministri dhe Qeveria janë seriozisht të interesuar për tejkalimin e kësaj gjendjeje të krijuar në komunën e Podujevës”, theksoi sekretari permanent Menderes Ibra. Sipas tij edhe Qeveria por edhe Ministria e Bujqësisë do të ofrojnë ndihmë profesionale në vlerësimin e dëmeve.

Zv. Kryetari i komunës së Podujevës Agim Kikaj i njoftoi delegacionin qeveritar për përpjekjet e komunës dhe të Komitetit të krizës për zbutjen dhe tejkalimin e gjendjesdhe shtoi: komuna ka krijuar 6 komisione për vlerësimin e dëmeve dhe ekspertë të Qeverisë e sidomos të Ministrisë së Bujqësisë do të ishin të mirëseardhur për të bashkëpunuar në vlerësimin real të pasojave.

“Komuna ka ndihmuar deri më tani mbi 60 familje me folie plastike për mbulimin e çative të shkatërruara si dhe po bën evidentimin e rasteve që po lajmërohen në Komitetin e krizës”, njoftoi delegacionin qeveritar z. Kikaj.

Deri më sot sipas zv. Kryetarit Kikaj në Komitetin e krizës janë evidentuar mbi 600 raste të dëmeve në objekete banimi, 550 raste të dëmeve në kopshte me perimkultura dhe mbi 300 raste të dëmeve në automjete të ndryshme.

“Mundësitë e komunës janë të vogla për ofrimin e ndihmës, megjithate ne do të rishikojmë pozicionet e ndryshme dhe ti riorientojmë disa mjete në evitimin e pasojave. Në këtë takim u theksua nevoja e ndihmës për familjet me gjendje të rëndë sociale, por edhe për bujqit dhe fermerët që burim të ekzistencës kanë bujqësinë dhe kultivimin e perimkluturës.

Delegacioni qeveritar i Kosovës bashkë me delegacionin e komunës së Podujevës vizituan disa raste më të rënda të dëmeve të shkaktuara; serrën e Xhevat Mulliqit në Peran, kopshtiet e Fazli Blakçorit në Podujevë, disa prona në fshatin Sfeçël, etj. 

Copyright©2000-2003 Trepca.net - Të gjitha të  drejtat e rezervuara.