Lajme

E mërkure 30 korrik 2003

Përmbajtja:

• Presidenti Rugova priti në vizitë lamtumirëse shefin e deritashëm të zyrës kanadeze në Prishtinë, Shon Barber

• Zyra e SHBA-ve në Prishtinë financon Kampin Veror të Tinejxherëve në Brezovicë

• Harri Holker: "Bisedimet Prishtinë - Beograd nuk do të fillojnë së paku edhe një muaj"

• Çarls Brajshou vizitoi komunën e Pejës

• Në Komogllavë të Ferizajt, policia ndërkombëtare konfiskoi 18 kg. Heroinë

• Këshilli i Evropës ndan 2 milionë euro për çminimin e kufirit Shqipëri-Kosovë  

• Janë arrestuar tre serbë që e kanë kërcënuar një polic ndërkombëtar në Albanik

• Në afërsi të Podgoricës u sulmua një autobus me turistë kosovarë

• SFOR-i zbuloi një bazë të Al-Kaidës në Bosnjë

• NATO dhe BE kanë një strategji të përbashkët për Ballkanin Perëndimor

• Policia malazeze merr nga ushtria kontrollin e kufirit me Serbinë

• Fatos Nano nuk do të ketë emër të ri për postin e ministrit të jashtëm, deri në shtator

• Gëzim Hajdinaga: "Ligji për rregullimin e të drejtave për pakica në Mal të Zi do të jetë i mirëpritur"

• Misioni i parë ushtarak i BE-së "Konkordia" ka dhënë kontribut të rëndësishëm në stabilizimin e Maqedonisë

• Gjashtë muajt e fundit, në Maqedoni janë ndërprerë tetë kanale ndërkombëtare të drogës

• Departamenti i Shtetit paralajmëron përsëri amerikanët

• Silvio Berkulskoni vizitoi dje Moskën

• SHBA nuk pranojnë të publikojnë pjesë të raportit për sulmet e 11 shtatorit

• Bush e Sharon thonë se ndalja e terrorit është çelës për paqen në Lindjen e Mesme

• 5 ushtarë rusë e kanë humbur jetën në një shpërthim në kufi me Çeçeninë

• Dy të vrarë dhe 47 të plagosur në një shpërthim që ka ndodhur në një autobus në Indi

• Ka vdekur Fodaj Sankoh, udhëheqës 10-vjeçar i aksioneve terroriste në Siera Leone

Presidenti Rugova priti në vizitë lamtumirëse shefin e deritashëm të zyrës kanadeze në Prishtinë, Shon Barber

 

Prishtinë, 30 korrik 2003 - Presidenti i Kosovës, Dr Ibrahim Rugova, priti sot shefin e deritashëm të Zyres së Kanadasë në Prishtinë, Shon Barber, dhe shefin e ri i kësaj zyrje, Stivën Moran. Presidenti Rugova bëri të ditur se zhvillimi ekonomik, privatizimi dhe e ardhmja e Kosovës kanë qenë tema të bisedimeve të tij me diplomatët kanadezë. Ai tha se në takim është biseduar edhe për statusin përfundimtar dhe ritheksoi se kërkesën për njohjen e pavarësisë së Kosovës

  

"Unë insistoj vazhdimisht që të njihet sa më parë pavarësia e Kosovës dhe që Kosova të jetë anëtare e Bashkimit Evropian dhe e NATO-s. Kjo do t'i shpejtonte proceset në Kosovë dhe do ta qetësonte rajonin dhe këtë pjesë të botës", u shpreh presidenti Rugova.

Presidenti Rugova e çmoi punën gati katërvjeçare të z. Shon Barber, i cili e përfundon misionin e tij në Kosovë. Ai tha se z. Barber e ka kuptuar shumë mirë Kosovën dhe ka qenë pjesë e progresit të arritur në Kosovë gjatë këtyre viteve që ka shërbyer në Kosovë.

Ndërkaq, shefit të ri të Zyrës së Kanadasë në Prishtinë, z. Stivën Moran, presidenti Rugova i uroi mirëseardhje, duke i premtuar bashkëpunim të mirë.

Me këtë rast, ai e falënderoi edhe qeverinë dhe popullin e Kanadasë për ndihmën që ka dhënë gjatë periudhës së pasluftës në Kosovë.

Shefi i deritashëm i Zyrës së Kanadasë në Prishtinë, Shon Barber, lavdëroi bashkëpunimin me presidentin Rugova.

"Këto 4 vjet, me presidentin Rugova kemi pasur shumë diskutime për të ardhmen e Kosovës dhe popullin e saj. Një gjë që e kam mësuar për presidentin Rugova është optimizmi i tij i paluhatur për Kosovën dhe të ardhmen e saj", u shpreh z. Barber.

"Kosova ka një të ardhme të shkëlqyeshme", tha z. Barber, duke shprehur pikëpamjet e tij për të ardhmen e Kosovës.

"Me njerëz si presidenti Rugova dhe kryeministri Rexhepi, e me ndihmën e bashkësisë ndërkombëtare, Kosova ka një të ardhme të shkëlqyer", theksoi ai.

Shon Barber tha se bashkësia ndërkombëtare e ka ndihmuar shumë Kosovën.

"Është me rëndësi të kuptohet se bashkësia ndërkombëtare i ka ndihmuar Kosovës më shumë se çdo pjese tjetër të botës në situata postkonfiktesh. Ju keni përfituar nga përpjekjet e pabesueshme të bashkësisë ndërkombëtare, duke përfshirë këtu edhe Kanadanë, dhe kjo po jep dhe do të japë fryte", tha z. Barber, duke premtuar vazhdimin e përkrahjes së Kanadasë për Kosovën dhe popullin e saj.

Z. Barber e quajtu privilegj shërbimin e tij në Kosovë.

"Kam pasur privilegjin të shërbej në Kosovë dhe të ndimoj popullin e Kosovës që ta realizojë të ardhmen e vet", u shpreh ai, duke e prezantuar trashëgimtarin e tij, z. Stiv Moran.

Shefi i ri i Zyrës së Kanadasë në Prishtinë, Stivën Moran, deri tash ishte shef i Zyrës së Kanadasë në Tiranë.

 

 

Zyra e SHBA-ve në Prishtinë financon Kampin Veror të Tinejxherëve në Brezovicë

 

Prishtinë, 30 korrik 2003 - Zyra e SHBA-ve dhuron 18.585 dollarë amerikanë për kampin veror për tinejxherët e zhvendosur në Brezovicë, ka bërë të ditur z. Allek Melli, ushtrues i detyrës së shefit të misionit të kësaj zyre.

Në kamp do të marrin pjesë rreth 45 tinejxherë të zhvendosur që tani jetojnë në Kralevë dhe në Nish. Ata do të mësojnë anglishten, punën me kompjutor dhe artet, si edhe për të marrë pjesë në aktivitete sportive së bashku me tinejxherët shqiptarë dhe romë nga Kosova.

Kampi veror i tinejxherëve organizohet nga Departamenti për Çështje Jorezidente i Ministrisë së Kulturës, Rinisë, Sporteve e Çështjeve Jorezidente dhe nga organizata rinore të serbëve të Kosovës "Duga".

 

Mbikqyrjen e aktiviteteve të të rinjve do ta bëjnë 11 mësues nga Kosova dhe 4 nga Serbia.
Për njerëzit e rinj të zhvendosur nga shtëpitë e tyre në Kosovë, ky kamp është një mundësi e rëndësishme për t'u takuar dhe për të vepruar me të rinjtë tjerë që tani jetojnë në Kosovë. Kështu ata do të kenë një ide më të qartë për mundësitë për jetë të përbashkët në një shoqëri shumetnike.

"Ky kamp veror është një demonstrim konkret i përkushtimit të SHBA-ve në ndihmimin e institucioneve qeverisëse të Kosovës që ato t'i plotësojnë standardet lidhur me respektimin e kthimeve", vlerëson ushtruesi i detyrës së shefit të Zyrës së misionit të SHBA-ve në Kosovës, Allek Melli.

 

 

Harri Holker: "Bisedimet Prishtinë - Beograd nuk do të fillojnë së paku edhe një muaj"

 

Helsinki, 30 korrik 2003 - Kryeadministratori i ri i Kosovës, Harri Holkeri, tha se bisedimet Prishtinë - Beograd nuk do të fillojnë së paku edhe një muaj.

"Çështja e fillimit të bisedimeve midis Prishtinës e Beogradit është paksa problematike, sepse në hemisferën veriore janë pushimet e gushtit", u shpreh Holker.

Ai tha se situata në Kosovë është ende të rëndë, ndonëse përmirësimi po vazhdon që prej vendosjes së administratës së përkohshme të OKB-së.

"Unë do të rri sa më shkurt që është e mundur në Kosovë. Kosovarët duhet që të marrin në duar kompetencat e tyre sa më shpejt që është e mundur dhe këtë ta bëjnë plotësisht dhe një qind për qind", ka thënë Holker.

 

 

Çarls Brajshou vizitoi komunën e Pejës

 

Pejë, 30 korrik 2003 - Ushtruesi i detyrës së kryeadministratorit të Kosovës, Çarlls Brajshou, ka deklaruar se Kosova duhet të përmbushë standardet para statusit përfundimtar të saj.

Këtë deklaratë Brajshou e dha dje gjatë vizitës në Pejë. Ai pati takime me përfaqësues të administratës rajonale ndërkombëtare dhe të pushtetit lokal.

Çarlls Brajshou vizitoi edhe enklavën serbe në Gorozhdec dhe komunitetin boshnjak në Vitomiricë të Pejës.

 

 

Në Komogllavë të Ferizajt, policia ndërkombëtare konfiskoi 18 kg. Heroinë

 

Prishtinë, 30 korrik 2003 - Policia ndërkombëtare ka konfiskuar 18 kilogramë heroinë, me vlerë prej 800 mijë eurosh, gjatë një aksioni në fshatin Komogllavë të komunës së Ferizajt. Me këtë rast janë arrestuar 3 persona: një femër 29-vjeçe dhe dy meshkuj, njëri i moshës 24 dhe tjetri 21-vjeçe.

 

Policia është në kërkim të të dyshuarit të katërt, i cili kishte ikur nga vendi i ngjarjes, kur policia kishte hyrë në fshat, ka bërë të ditur zëdhënësi i policisë së UNMIK-ut, Beri Fleçër.

Ai ka bërë të ditur se gjatë kontrollit janë gjetur dhe janë konfiskuar edhe dy armë ilegale me municion.

Fleçër ka thënë se kjo është sasia më e madhe e drogës e kapur deri më tash në Kosovë dhe ka shtuar se kjo sasi e drogës besohet se ishte destinuar për tregun e Evropës Perëndimore.

 

 

Këshilli i Evropës ndan 2 milionë euro për çminimin e kufirit Shqipëri-Kosovë

 

Tiranë, 30 korrik 2003 - Komisioni Evropian dhe PNUD-i e kanë nënshkruar dje marrëveshjen për një fond për realizimin e programit për çminimin në Shqipëri. Shuma që i jepet në formë granti PNUD-it nga Komisioni Evropian për këtë projekt arrin në 2 milionë euro.

 

Këto mjete do të përdoren për caktimin e saktë të të gjitha zonave të minuara në kufirin midis Shqipërisë e Kosovës, gjatë luftës në Kosovë.

Ky program ka nisur në vitin 1999, menjëherë pas përfundimit të luftës në Kosovë, dhe pritet të përfundojë deri në fund të vitit 2005.

Prej vitit 1999, në zonat e minuara në kufirin midis Shqipërisë e Kosovës janë vrarë ose janë plagosur 250 njerëz, përfshirë edhe shumë fëmijë dhe ushtarakë që patrullonin përgjatë kufirit.

 

Projekti për çminimin i këtyre zonave do të menaxhohet në mënyrë të përbashkët nga Komisioni Evropian dhe PNUD-i. 

  

  

Janë arrestuar tre serbë që e kanë kërcënuar një polic ndërkombëtar në Albanik

 

Mitrovicë, 30 korrik 2003 - Tre serbë janë arrestar dje në komunën e Albanikut, të cilët dyshohet se e kanë kërcënuar një polic ndërkombëtar, njoftoi zëdhënsi i SHPK-së në Mitrovicë, Besim Hoti.

Ai bëri të ditur se një polic ndërkombëtar ishte kërcënuar me sëpatë nga të arrestuarit, të cilët ishin ndaluar me një kamion të ngarkuar me dru në fshatin Joshanicë. Polici ndërkombëtar ishte duke e kryer detyrën e tij në këtë fshat.

Policia e UNMIK-ut është duke bërë hetimet lidhur me këtë kërcënim.

 

 

Në afërsi të Podgoricës u sulmua një autobus me turistë kosovarë

 

Prishtinë, 30 korrik 2003 - Dje pasdite, në Gollubovci afër Podgoricës, një grup qytetarësh malazezë kanë sulmuar me gurë një autobus me turistë kosovarë, të cilët ishin nisur të shkonin për pushime verore në Ulqin. Ata kanë thyer xhamat e autobusit, por të lënduar nuk ka pasur.

Njoftohet se policia malazeze i ka arrestuar pesë persona, të cilët kishin marrë pjesë në sulm. Ata i janë dorëzuar Gjykatës së Qarkut në Podgoricë.

 

 

SFOR-i zbuloi një bazë të Al-Kaidës në Bosnjë

 

Romë, 30 korrik 2003 - Pjesëtarët italianë të SFOR-it në Bosnjë kanë zbuluar një bazë të fshehtë të rrjetit terrorist Al-Kaida, 100 kilometra larg Sarajevës, njoftoi sot Ministria e Mbrojtjes e Italisë.

Në këtë kamp janë gjetur vetëm armë, lëndë shpërthyese dhe dokumente personale në gjuhën arabe.

 

Terroristët ishin larguar nga baza para se të arrinin atje ushtarët italianë. Organet e zbulimit ushtarak italian supozojnë se kampi është shfrytëzuar për stërvitjen e terroristëve, të cilët më pas janë dëguar në vende të tjera.

Në njoftim thuhet se i tërë kampi ishte i minuar.

 

 

NATO dhe BE kanë një strategji të përbashkët për Ballkanin Perëndimor

 

Bruksel, 30 korrik 2003 - NATO-ja dhe Bashkimi Evropian kanë rikonfirmuar vendosmërinë e tyre që të çojnë deri në fund përgjegjësitë e marra në rajonin e Ballkanit.

"NATO-ja dhe BE-ja janë pajtuar për një stretegji të përbashkët për sigurinë dhe stabilitetin e Ballkanit Perëndimor", thuhet në dukumentin e publikuar në Bruksel.

"Partneriteti midis BE-së dhe NATO-s ka qenë moment kyç për t'i dhënë fund konfliktit dhe për të stabilizuar rajonin. Ky dokument paraqet qasjen tonë strategjike, paraqet vendosmërinë tonë të përbashkët", thuhet në dokument.

 

 

Policia malazeze merr nga ushtria kontrollin e kufirit me Serbinë

 

Podgoricë, 30 korrik 2003 - Kryeministri i Malit të Zi, Milo Gjukanoviq, dhe Ministri i Mbrojtjes i Unionit Serbi-Mal i Zi, Boris Tadiq, kanë nënshkruar një marrëveshje, sipas të cilës, policia malazeze do ta marrë kontrollin e kufirit malazez nga ushtria e unionit Serbi-Mali i Zi.

Pas nënshkrimit të marrëveshjes, Gjukanoviq ka thënë se Mali i Zi do t'i mbrojë vetë kufijtë, për herë të parë në 100 vjetët e fundit. Ai ka vlerësuar se kjo është sinjal për "kthimin e sovranitetit të Malit të Zi".

Tadiq ka thënë se pret që edhe në Serbi të merret së shpejti vendimi që ushtrisa t'ia dorëzojë policisë kontrollin e kufirit.

   

    

Fatos Nano nuk do të ketë emër të ri për postin e ministrit të jashtëm, deri në shtator

 

Tiranë, 30 korrik 2003 - Kryeministri i Shqipërisë, Fatos Nano, deklaroi dje se nuk do të ketë emër të ri për postin e ministrit të jashtëm deri në shtator, kur do të hapet seanca e re plenare e parlamentit.

Nano e dha këtë deklaratë menjëherë pasi zëvendëskryeministrja e ministrja e re e Integrimit, Ermelinda Meksi, dha betimin para Presidentit Alfred Moisiu.

Nano u deklaroi gazetarëve se detyrën e ministrit të Jashtëm do ta kryejë zëvendësministri aktual, Luan Hajdaraga.

"Politika e jashtme e Shqipërisë as nuk do të cenohet, as nuk do kufizohet dhe as nuk do të ndryshojë gjatë kësaj kohe", tha kryeministri Nano.

Ai tha gjithashtu se nuk do të ketë ndryshime në qeveri, siç kanë kërkuar kundërshtarët e tij brenda Partisë Socialiste.

 

 

Gëzim Hajdinaga: "Ligji për rregullimin e të drejtave për pakica në Mal të Zi do të jetë i mirëpritur"

 

Podgoricë, 30 korrik 2003 - Qeveria e Malit të Zi është në hartim e sipër të një projekt-ligji për të drejtat pakicave në këtë republikë. Sipas zyrtarëve të qeverisë ky ligj do të përmbaj të gjitha standardet ndërkombëtare.

Ministri i pakicave në Qeverinë e Malit të Zi, Gëzim Hajdinaga, ka deklaruar se disa anëtarë të komisionit për hartimin e këtij ligji do të qëndrojnë në Hagë, ku do të definohet teksti përfundimtar i projekt-ligjit, në bashkëpunim me ekspertë të kësaj fushe.

Ai ka shprehur bindjen se ky ligj do të jetë i mirëpritur nga të gjitha pakicat në Mal të Zi.

Vlerësohet se mbrojtja e të drejtave të pakicave është një çështje specifike dhe mjaft e rëndësishme për stabilitetin e Malit të Zi dhe të rajonit.

 

 

Misioni i parë ushtarak i BE-së "Konkordia" ka dhënë kontribut të rëndësishëm në stabilizimin e Maqedonisë

 

Shkup, 30 korrik 2003 - Misioni i parë ushtarak i Bashkimit Evropian ka dhënë kontribut të rëndësishëm në stabilizimin e Maqedonisë, kanë thënë dje në Shkup zyrtarë të misionit dhe të Ministrisë së Mbrojtjes së Maqedonisë.

Zëvendëskomandanti i Forcës së përbashkët Evropiane, Rejner Fis, dhe ministri i Mbrojtjes i Maqedonisë, Vllado Buçkovski, çmuan suksesin e misionit të BE-së në këtë vend. Ata thanë se suksesi i këtij operacioni do të thotë se nuk ka më nevojë që ky mision të qëndrojë në këtë vend edhe pas 15 dhejtorit të këtij viti.

Ndërkohë, në një deklaratë të përbashkët të BE-së dhe NATO-s thuhet se të dyja organizatat kanë të njëtin vizion për Ballkanin Perëndimor, duke theksuar se vendet e rajonit duhet të punojnë shumë për të plotësuar kushtet për anëtarësim në BE dhe në NATO.

 

 

Gjashtë muajt e fundit, në Maqedoni janë ndërprerë tetë kanale ndërkombëtare të drogës

 

Shkup, 30 korrik 2003 - Zyrtarët e punëve të brendshme të Maqedonisë kanë thënë se në gjashtë muajt e fundit janë ndërprerë tetë kanale ndërkombëtare të qarkullimit të drogës dhe janë arrestuar nëntë shtetas të huaj.

Por, Ministria e Punëve të Brendshme vlerëson se në Maqedoni është përhapur edhe më shumë norkomania. Ajo thotë se ky fakt mbështetet në sasi të mëdha të konfiskuara të llojeve të ndryshme të drogës dhe në numrin e personave të involvuar në vepra kriminale.

Një ekspert i policisë thotë se lufta kundër drogës duhet të jetë më energjike.

 

 

Departamenti i Shtetit paralajmëron përsëri amerikanët

 

Uashington, 30 korrik 2003 - Shtetet e Bashkuara publikuan të martën një paralajmërim të ri për amerikanët që ndodhen në vende të tjera të botës.

Në paralajmërimin e Departamentit të Shtetit thuhet se terroristët mund të kryejnë operacione vetëvrasëse, rrëmbime aeroplanësh, shpërthime ose rrëmbime.

 

Departamenti thotë se këto informacione të paqarta janë mblodhur gjatë intervistave të zhvilluara kohët e fundit me të paktën një të burgosur, pjesëtar i Al-Kaidës, të cilat janë konfirmuar edhe në mënyra të tjera.

 

 

Silvio Berkulskoni vizitoi dje Moskën

 

Moskë, 30 korrik 2003 - Marrëdhëniet midis Rusisë e BE-në kanë qenë në qendër të takimit të djeshëm të kryeministrit italian Silvio Berluskoni dhe presidentit rus Vladimir Putin, në Moskë.

 

Berluskoni tha se Italia, e cila është kryesuese e radhës e BE-së, do të angazhohet për heqjen e vizave për rusët në gjithë Evropën dhe anëtarësimi i Rusisë në BE.

Temë tjetër e bisedës kanë qenë tensionet midis kishës katolike dhe kishës ortodokse ruse. Berluskoni ka deklaruar se të dy palët do të angazhohen për përmirësimin e marrëdhënieve mes dy kishave.

 

 

SHBA nuk pranojnë të publikojnë pjesë të raportit për sulmet e 11 shtatorit

 

Uashington, 30 korrik 2003 - SHBA nuk pranojnë t'i përgjigjen kërkesës së Arabisë Saudite për publikimin e pjesëve të një raporti për sulmet terroriste të 11 shtatorit.

Presidenti Xhorxh Bush tha se SHBA po zhvillojnë një luftë kundër Al Kaidës dhe terroristëve, prandaj publikimi i një pjese të raportit do të rrezikonte hetimet.

Në raport mbahen të feshta pjesët në të cilat flitet për mundësinë e mbështetjes së atentatorëve të 11 shtatorit nga Arabia Saudite. Qeveria e Arabisë Saudite vazhdon të kërkojë publikimin e raportit për të pasur mundësi t'u përgjigjet akuzave.

 

 

Bush e Sharon thonë se ndalja e terrorit është çelës për paqen në Lindjen e Mesme

 

Uashington, 30 korrik 2003 - Presidenti amerikan, Xhorxh Bush, dhe kryeministri izraelit, Ariel Sharon, u pajtuan se dhënia fund e terrorit është çelës për arritjen e paqes së qëndrueshme midis Izraelit dhe palestinezëve.

Pas takimit me kryeministrin Sharon, Presidenti Bush tha se qeveriale e kryeministrit palestinez Mahmud Abaz është e angazhuar për t'i dhënë fund terrorit dhe për t'iu kundërvënë atyre që përpiqen të minojnë përpjekjet e paqes. Ai i bëri thirrje kryeministrit Sharon që të heqë kufizimet ndaj palestinezëve.

Ndërkaq, Sharon tha se ai është i angazhuar për realizimin e procesit politik të paqes, por vetëm pasi të kenë përfunduar pltësisht sulmet terroriste dhe dhuna kundër Izraelit.

Lidhur me çështjen e murit të sigurimit që po e ndërton Izraeli, kryeminsitri Sharon tha se ndërtimi i tij do të vazhdojë, por Izraeli do të marrë masa që ai të mos pengojë lëvizjen e palestinezëve.

 

 

5 ushtarë rusë e kanë humbur jetën në një shpërthim në kufi me Çeçeninë

 

Nazaran, 30 korrik 2003 – Një bombë e ka goditur konvojin e trupave ruse në Çeçeni, duke lënë të vrarë pesë ushtarë, kanë bërë të ditur sot (e mërkurë) zyrtarët vendorë, njofton Rojter.

Katër nga ushtarët janë vrarë në vend, kurse i katërti ka vdekur sot (të merkurën) në spital nga plagët e marra.

Shpërthimi ka ndodhur mbrëmë vonë në Ingushetia, rajon rus në kufi me Çeçeninë.

 

 

Dy të vrarë dhe 47 të plagosur në një shpërthim që ka ndodhur në një autobus në Indi

 

Bombej, 30 korrik 2003 – Sot (e merkurë) në periferinë verilindore të Bombejit, në Indi, një bombë e ka goditur një autobus. Shpërthimi ka shkaktuar vdekjen e dy personave dhe plagossjen e 47 të tjerëve, njofton Rojter. Shpërthimi ka shkaktuar paralizimin e qendrës tregtare dhe të trafikut publik në Bombei.

Policia e ka fajësuar grupin militant të jashtëligjshëm "Lashkar-e-Taiba" për këtë shpërthim.

 

 

Ka vdekur Fodaj Sankoh, udhëheqës 10-vjeçar i aksioneve terroriste në Siera Leone

 

Fritaun, Siera Leone, 30 korrik 2003 – Fodaj Sankoh, lider 10-vjeçar i aksioneve terroriste në Siera Leone, ka vdekur duke pritur gjykimin për krime lufte. BBCWorld njofton se Sankoh, 70 vjeçar, ka vdekur në një spital në Fritaun, nga pasojat e komplikimeve të një infarkti të vitit të kaluar.

Sankoh ishte themelues i Frontit të Bashkuar Revolucionar (RUF), i cili u bë i njohur për dhunën masovike dhe për prerjen e duarve, këmbëve, veshëve dhe hundëve të mijëra civilëve, gjatë luftës qytetare 10-vjeçare, e cila përfundoi vitin e kaluar.

 

Ai ishte arrestuar para tri vjetësh dhe duhet të gjykohej nga një trup gjykues që mbështetet nga Organizata e Kombeve të Bashkuara.

Copyright©2000-2003 Trepca.net - Të gjitha të  drejtat e rezervuara.