Ministria e kulturës, rinisë e sporteve e Kosovës jep 100 mijë euro për ndërtimin e një salle sportive në Podujevë

Podujevë, 29 korrik 2003 (TN)  -  Kryetari i komunës së Podujevës z. Agim Veliu priti sot Ministrin e kulturës, rinisë, sporteve e çështjeve jorezidente z. Behxhet Brajshorin të shoqëruar me një delegacion nga kjo minsitri e Qeverisë së Kosovë.

 

Ministri Brajshori pasi u solidarizua me qytetarët e Podujevës të cilët pësuan nga moti i lig ditë më parë u interesua për veprimtaritë kulturore e sportive dhe aktivitetet rinore në Llap si dhe i komunikoi kryetarit Veliu vendimin e Ministrisë që ai drejton për ndarjen e 100 mijë euro për ndërtimin e një salle sportive.

 

“Komuna e Podujevës është përfituese e projektit për ndërtimin e një salle sportive për çka Ministria ka nda 100 mijë euro” tha z. Brajshori duke kërkuar që bashkë me komunën të fillojnë këtë projekt gjatë këtij viti.

 

Kryetari Agim Veliu falënderoi ministrin Brjashori dhe tha se megjithë që komuna tashmë do të orientohet në evitimin e pasojave të shkaktuara nga moti i lig, përpjkejet për angazhimin e përbashkët për fillimin e projektit nuk do të mungojnë.

 

Lidhur me veprimtaritë kulturore, sportive dhe rinore në komunën e Podujevës, ministrin Brajshori e njoftuan u.d i drejtorit të DRKS Isuf Deda, ish drejtori Nexhmi Balaj dhe përgjegjësi për veprimtari teatrore Agron Gërguri.

 

Ministri Behxhet Brajshori përgëzoi përfaqësuesit e DRKS-së për rezultatet e arritura dhe premtoi përkrahje për projektet dhe vlerat e mirëfillta në kulturë, teatër e sport si dhe kërkoi një angazhim më të madh për të rinjtë.

Copyright©2000-2003 Trepca.net - Të gjitha të  drejtat e rezervuara.