E marte 29 korrik 2003

29.07.2003 - Trepca.net

Lajme

E marte 29 korrik 2003

Përmbajtja:

Presidenti Rugova shpreh mbështeje për procesin e privatizimit në Kosovë
Presidenti Rugova priti drejtues të Institutit të Historisë të Kosovës
Hari Holker: "Detyra ime kryesore do të jetë ndërtimi i besimit në Kosovë"
S. Hajzellok: UNMIK-u nuk mund të garantojë mbrojtjen në liri të Fatmir Limajt
ASHAK mbështet zhvillimin e TMK-së
S.Narula: Punët për hartimin e planit operacional për standardet do të fillojnë pas pushimeve
Peter Rondorf përshëndet emërimin Holkerit për kryeadministrator të Kosovës
Zef Morina priti një delegacion të Paktit të Stabilitetit
KFOR-i francez ka filluar një regjistim të paparalajmëruar të popullatës shqiptare në pjesën veriore të Mitrovicës
Ministria e Jashtme e Shqipërisë përshëndet zgjedhjen e kryeadministratorit të ri të Kosovës Harri Holker
Zhivkoviq: "E ardhmja e Kosovës do të zgjidhet me negociata midis Beogradit, Prishtinës, Brukselit dhe Uashingtonit"
Kuvendi i Shqipërisë miratoi kandidaturën e Ermelinda Meksit ndërsa refuzoi atë të Marko Bellos
Sali Berisha kërkon dorëheqjen e qeverisë së Fatos Nanos
Berluskoni i shprehu Nanos vlerësimet e presidentit amerikan Xhorxh Bush lidhur me progresin në Shqipëri
Kofi Anan propozon shkarkimin e Karla del Pontes nga posti kryeprokurores së Tribunalit në Ruandë
SHBA harton listën e vendeve që duan të marrin pjesë në misionet në Irak
Forcat amerikane e kanë kapur një truproje të lartë të Sadamit
Në ambasadën irakiane në Moskë janë plaçkitur 3 milionë dollarë
Kryengritësit liberianë kanë marrë nën kontroll portin Buchanan
Policia i ka arrestuar në Londër 19 persona të dyshuar për vrasjen e një djaloshi
Flamuri amerikan të ulet në gjysëm shtize për nder të komedianit legjendar Bob Hope
Në një shkëmbim zjarri në Arabinë Saudite u vranë 8 vetë
Irak: sulm i ri ndaj trupave amerikane
Presidenti Bush takohet sot me kryeministrin izraelit Sharon
Ministri i jashtëm saudit takohet sot me presidentin Bush
Një organizatë ekstremiste kërkcënohet për hakmarrje ndaj SHBA-ve
Një shpërthim në një fabrikë fishekzjarresh në Kinë ka shkaktuar vdekjen e 29 vetave
Tre persona e kanë humbur jetën në zjarret që kanë shpërthyer në malet e rivierës franceze

Presidenti Rugova shpreh mbështeje për procesin e privatizimit në Kosovë

Prishtinë, 29 korrik 2003 - Presidenti i Kosovës, Dr Ibrahim Rugova, priti sot drejtorin ekzekutiv të Agjencisë Kosovare të Mirëbesimit (AKM), Jyrgen Mendricki, i cili shoqërohej nga Ahmet Shala, zëvendës-drejtor, dhe Johan Johanson, kryesues i procesit të privatizimit në AKM.

Pas takimit, Presidenti Rugova shprehu mbështetje të plotë për procesin e privatizimit në Kosovë.

"Ju e dini se gjithmonë e kam përkrahur procesin e privatizimit, sepse ky proces do të shpejtojë zhvillimin ekonomik të Kosovës, do të tërheqë investitorë të huaj në Kosovë dhe do të krijojë mundësi hapjen e vendeve të reja të punës. Kjo do të ndikojë edhe në përshpejtimin e procesit të njohjes formale të pavarësisë së Kosovës", theksoi Presidenti Rugova.

Duke shprehur mbështetje për punën e AKM-së, Presidenti Rugova tha se institucionet e Kosovës dhe shoqëria civile duhet t'ia shpjegojnë qytetarëve rëndësinë e procesit të privatizimit.

"Ndërmarrjet shoqërore aktualisht janë gjysmë të bankrotuara, prandaj ato duhet të shpëtohen. Prandaj, duhet të jemi të guximshëm dhe të mos lejojmë shkatërrimin e kësaj pjese të ekonomisë", theksoi presidenti Rugova.

I pyetur rreth fatit të punëtorëve dhe reagimeve të sindikatës, presidenti Rugova tha se institucionet e Kosovës, si edhe AKM-ja, do të kenë kujdes edhe për punëtorët e ndërmarrjeve që do të privatizohen.

"Ka kritika e vërejtje të ndryshme, por ne duhet të ecim përpara, duke pasur kujdes për punëtorët", u shpreh ai.

Presidenti Rugova vlerësoi se tash është më me rëndësi që të privatizohen ndërmarrjet, për të qenë më produktive dhe për të ndikuar në shpejtimin zhvillimit ekonomik e të rritjes së shkallës së punësimit.

Ndërkaq, drejtori ekzekutiv i AKM-së, Jyrgen Mendricki, shprehu kënaqësinë për mbështetjen e Presidentit Rugova për punën e AKM-së dhe për procesin e privatizimit.

"Ne në AKM jemi shumë të kënaqur që e kemi përkrahjen e presidentit për punën tonë", tha Mendricki.
Ai theksoi se në Kosovë duhet të krijohet klimë e përshtatshme për joshjen e investitorëve të huaj.

"Të interesuarve nga jashtë duhet t'u bëhet e qartë se Kosova është një vend në të cilin mund të investojnë", theksoi ai.

Drejtori ekzekutiv i AKM-së, Jyrgen Mendricki, shfaqi shpresëm se në të ardhmen AKM-ja do të ketë më shumë suksese edhe në ndërmarrjet publike në Kosovë.


Presidenti Rugova priti drejtues të Institutit të Historisë të Kosovës

Prishtinë, 29 korrik 2003 - Presidenti i Kosovës, Dr. Ibrahim Rugova, priti sot në një takim Dr. Jusuf Bajraktarin, drejtor, dhe dr. Muhamet Shatrin, sekretar shkencor, i Institutit të Historisë të Kosovës.

Zotërinjtë Bajraktari e Shatri e njoftuan Presidentin Rugova për punën e institutit dhe për synimet e projekteve që ka ai, si edhe për problemet me të cilat po ballafaqohet ky institucion.

Drejtuesit e Institutit të Historisë shtruan edhe nevojat urgjente që ka ky institucion për zgjerim të hapësirës së punës, e cila, siç thanë ata, është e mundshme të bëhet në lokalet ekzistuese në godinën e Arkivit të Kosovës.

Në këtë rrafsh, ata kërkuan përkrahjen e institucioneve të Kosovës, në radhë të parë të Ministrisë së Kulturës, si institucion përgjegjës për administrimin e Arkivit të Kosovës.

Presidenti Rugova shprehu përkrahje për punën e Institutit të Historisë, duke njohur edhe nevojën për zgjerim të hapësirës së punës.


S. Hajzellok: UNMIK-u nuk mund të garantojë mbrojtjen në liri të Fatmir Limajt

Prishtinë, 29 korrik 2003 - Zëdhënësi i UNMIK-ut, Sajmon Hajzellok, deklaroi sot se administrata e përkohshme e Kombeve të Bashkuara në Kosovë nuk mund të garantojë mbrojtjen në liri të Fatmir Limajt.
"UNMIK-u nuk mund të garantojë për askend në Kosovë", tha Hajzellok, duke komentuar kërkesën e mbrojtjes që z. Limaj të mbrohet në liri.
"Mendoj se nuk mund të garantojmë për dikë, në çdo kohë, në çdo vend e në çdo rrethanë. Ne kurrë nuk do të themi se mund të garantojmë për gjithçka", u shpreh Hajzellok në konferencën e sotme për gazetarë.
I pyetur se a nuk mund të garantonin trupat e KFOR-it për një person siç është deputeti Limaj, Hazellok, u shpreh:
"Jam i sigurtë se as z. Limaj nuk do të dëshironte që të merrej me një gjë të tillë, kur dihet fare mirë se këto 10 mijë trupa merren me 10 mijë probleme të tjera dhe jo vetëm me një".
Zëdhënësi i UNMIK-ut, Sajmon Hazellok tha se në bazë të Rezolutës 1244 çështja e statusit përfundimtar të Kosovës mbetet e hapur dhe do të mbetet e hapur derisa të vendoset në Kombet e Bashkuara.


ASHAK mbështet zhvillimin e TMK-së

Prishtinë, 29 korrik 2003 - Kryetari i Akademinë e Shkencave dhe të Arteve të Kosovës (ASHAK), Rexhep Ismajli, priti sot Komandantin e Shtabit të Përgjithshëm të Trupave Mbrojtëse të Kosovës (TMK), gjeneral-lejnant Agim Çekun.
Pas takimit, akademik Ismajli deklaroi se ASHAK do ta japë ndihmën e saj shkencore e profesionale që TMK të marrë rolin që i takon në shoqërinë e Kosovës.
"Do ta ndihmojmë TMK-në e cila synon të rritet në përmasat e nevojave të shoqërisë sonë", deklaroi akademik Ismajli.
Ndërkaq, gjeneral Çeku tha se ka marrë mbështetjen e akademisë për avancimin e rolit të TMK-së. "Na gëzon shumë fakti që hasëm në një disponim shumë të mirë që të mbështetet TMK-ja si institucion", u shpreh gjeneral Çeku.
Gjatë vizitës në ASHAK, komandanti i TMK-së u njoh edhe me punën e institucionit më të lartë shkencor e kulturor të Kosovës.


S.Narula: Punët për hartimin e planit operacional për standardet do të fillojnë pas pushimeve

Prishtinë, 29 korrik 2003 - Zëdhënësi i UNMIK-ut, Sunil Narula, ka deklaruar se plani operacional i një grupi të përbashkët të Qeverisë së Kosovës dhe UNMIK-ut pritet të bëhet pas përfundimit të pushimeve verore.
Narula ka bërë të ditur se zyrtarët e UNMIK-ut dhe ata të Qeverisë së Kosovës kanë pasur bisedime paraprake lidhur me këtë çështje dhe se përgjigja e Qeverisë së Kosovës ka qenë e favorshme.
"Kontaktet aktualisht janë në nivelin punues dhe këto kontakte po vazhdojnë, ndërkaq çështja do të adresohet në nivelin politik, në nivel më të lartë, pas përfundimit të pushimeve", ka thënë ai.
Këto bisedime kanë filluar pas thirrjeve të përfaqësuesve të Shteteve të Bashkuara, Britanisë së Madhe, Gjermanisë, Francës dhe Ialisë drejtuar Misionit të OKB-së dhe institucioneve të Kosovës që të përshpejtojnë procesin e përmbushtjes së standardeve para fillimit të bisedimeve për statusin përfundimtar të Kosovës.


Peter Rondorf përshëndet emërimin Holkerit për kryeadministrator të Kosovës

Prishtinë, 29 korrik 2003 - Shefi i Zyrës gjermane në Prishtinë, Peter Rondorf, ka përshëndetur emërimin e ish-kryeministrit finlandez Harri Holker për kryeadministrator të Kosovës. Ai ka thënë se përvoja e larmishme e Holkerit ka qenë dominante që ai ta marrë këtë post.
Rondorf ka thënë se ndikimi i Holkerit nuk do të kufizohet në asnjë mënyrë për faktin se ai vjen nga një vend i vogël.
"Pikërisht të ashtuquajturat vendet e vogla kanë kontribuar shumë në diplomacinë dhe në integrimin evropian", ka thënë ai.
Peter Rondorf ka thënë se Gjermania do të bashkëpunojë me mirëbesim me Holkerin, duke shtuar se marrëdhëniet ndërmjet Finlandës dhe Gjermanisë kanë qenë gjithmonë të shkëlqyeshme.


Zef Morina priti një delegacion të Paktit të Stabilitetit

Prishtinë, 29 korrik 2003 - Një delegacion i tryezës punuese të Paktit të Stabilitetit u takua dje me ministrin e Transportit e Postë Telekomunikacionit të Kosovës, Zef Morinën. Zyrtarët e Paktit të Stabilitetit u njohën me planin dhe projektet e kësaj ministrie.

Përfaqësuesit e këtij delegacioni thanë se kjo vizitë në Kosovë ka për qëllim informimin me gjendjen e përgjithshme të Paktit të Stabilitetit për Evropën Juglindore, Erhard Busek.
Delegacioni e falënderoi ministrin Morina për informacionet për rrugët, trafikun ajror dhe telekomunikacionin të cilat do t'ia përcjellin z. Busek.
Ministri Zef Morina tha se në takim u bisedua kryesisht rreth mundësisë që Pakti i Stabilitetit të ndihmojë përmirësimin e infrastrukturës rrugore në Kosovë.
Vizita e delegacionit të Paktit të Stabilitetit i paraprin vizitës së z. Erhard Busek në Kosovë që do të realizohet në muajin shtator.


KFOR-i francez ka filluar një regjistim të paparalajmëruar të popullatës shqiptare në pjesën veriore të Mitrovicës

Mitrovicë, 29 korrik 2003 - Kthimi i disa familjeve shqiptare në lagjen "Kodra e Minatorëve" në pjesën veriore të Mitrovicës, gjatë javës së kaluar, ishte hap inkurajues për të gjithë të zhvendosurit me dhunë nga kjo pjesë e qytetit si edhe për banorët që jetojnë atje.

Kthimin e këtyre familjeve, të cilat janë vendosur nëpër tenda derisa t'i rindërtojnë shtëpitë e tyre të shkatërruara gjatë luftës, u përkrah pa rezervë nga të gjitha institurcionet e pushtetit lokal dhe nga qytetarët e komunës.
Mirëpo shqiptarët që banojnë në Lagjen "Kodra e Minatorëve" dje janë shqetësuar për shkak të një regjistrimi të paparalajmëruar të familjeve joserbe në këtë lagje nga ana e KFOR-it francez.

Përfaqësuesi i familjeve shqiptare në këtë lagje, Zeqir Rushiti, ka deklaruar se pjesëtarët e Brigadës Shumëkombëshe Verilindje, më 27 korrik, ka bërë regjistrimin e të gjitha familjeve joserbe në këtë lagje, duke kërkuar të dhëna mbi numrin e anëtarëve të familjeve, të pronave të tyre të paluajtshme e të luajtshme etj. Ai ka thënë se banorëve nuk u janë shpjeguar aresyet e këtij regjistrimi, prandaj shqiptarët janë shqetësuar.
Faruk Korenica, anëtar i Bordit këshilldhënës të UNMIK-ut në veri të Mitrovicës, ka thënë se një regjistrim i tillë nuk mund të bëhet derisa bashkësia ndërkombëtare e përkrah kthimin e qytetarëve joserbë në çdo pjesë të Kosovës.
Përfaqësuesit e KFOR-it francez kanë thënë se në këtë regjistrim përfshihen të gjithë banorët e Mitrovicës që kanë munguar gjatë regjistrimeve të mëparshme, duke përfshirë edhe serbët, boshnjakët e të tjerët.


Ministria e Jashtme e Shqipërisë përshëndet zgjedhjen e kryeadministratorit të ri të Kosovës Harri Holker

Tiranë, 29 korrik 2003 - Ministria e Punëve të Jashtme të Shqipërisë përshëndet zgjedhjen e ish-kryeministrit finlandez, Harri Holker, për shef të administratës së përkohshme të Kombeve të Bashkuara në Kosovë.
"Përfaqësuesi i ri i Posaçëm i Sekretarit të Përgjithshëm të OKB-së vjen në Kosovë në një kohë kur, përveç sifdave të shumta që paraqet e ardhmja, janë ndërtuar institucionet e përkohshme vetëqeverisëse, janë hedhur hapat e parë për konsolidimin e shoqërisë multietnike, dhe është institucionalizuar e ardhmja europiane e Kosovës, si hallkë e pandarë e zinxhirit të vendeve të Ballkanit Perëndimor.
Shprehim bindjen se kreu i ri i Misionit të Kombeve të Bashkuara në Kosovë do të mirëpritet nga i gjithë populli i Kosovës, duke gjetur edhe përkrahjen dhe mbështetje të plotë nga përfaqësuesit e institucioneve të përkohshme vetëqeverisëse dhe forcave të ndryshme politike të Kosovës, si dhe një vullnet për bashkëpunim reciprok e të frytshëm nga të gjitha vendet e rajonit tonë.
Shqipëria mbetet konsekuente në synimet e saj për ndërtimin e marrëdhënieve trasparente, të qëndrueshme dhe efektive me Kosovën, në përputhje me Rezolutën 1244 të KS të OKB-së, me besimin se do të gjejë të njëjtin vullnet dhe mirëkuptim tek Kryeadministratori Holker", thuhet në deklaratën e Ministrisë së Punëve të Jashtme të Shqipërisë.


Zhivkoviq: "E ardhmja e Kosovës do të zgjidhet me negociata midis Beogradit, Prishtinës, Brukselit dhe Uashingtonit"

Uashington, 29 korrik 2003 - "E ardhmja e Kosovës do të zgjidhet me negociata midis Beogradit, Prishtinës, Brukselit dhe Uashingtonit, pra një marrëveshje e cila do të siguronte një zgjidhje të qëndrueshme për rajonin", ka deklaruar në Uashington kryeministri i Serbisë Zoran Zhivkoviq.
Duke folur lidhur me statusin përfundimtar të Kosovës, ai ka thënë se "zgjidhja më e mirë do të ishte një zgjidhje që do të garantonte që atje të mos ketë kurrë më destabilizim".
Kryemninistri i Serbisë ka thënë se, sipas Rezolutës 1244 të KS të OKB-së, Kosova është pjesë e vendit të tij dhe ka shtuar se kjo rezolutë shtron disa obligime për Serbinë e Malin e Zi, nga njëra anë, dhe për komunitetin ndërkombëtar, nga ana tjetër.
"Obligimet tona janë përmbushur dhe presim që edhe komuniteti ndërkomëtar të përmbushë obligimet e tij", ka thë Zhivkoviq.


Kuvendi i Shqipërisë miratoi kandidaturën e Ermelinda Meksit ndërsa refuzoi atë të Marko Bellos

Tiranë, 29 korrik 2003 - Kuvendi i Shqipërisë nuk e miratoi mbrëmë kandidaturën e Marko Bellos për ministër të jashtëm, në vend të Ilir Metës, i cili dha dorëheqje për shkak të mospajtimeve me kryeministrin Fatos Nano.

Kundër kandidaturës së Marko Bellos votuan deputetët e opozitës, por edhe disa deputetë socialistë, të cilët nuk pajtohen me politikën e kryeministrit Nano.
Ndërkaq kandidatura e Ermelinda Meksit për ministre yë Shtetit për Integrim dhe zëvendëskryeministre u miratua me shumicë votash.


Sali Berisha kërkon dorëheqjen e qeverisë së Fatos Nanos

Tiranë, 29 korrik 2003 - Kryetari i Partisë Demokratike të Shqipërisë, Sali Berisha, u takua sot në selinë e tij me ambasadorin amerikan në Tiranë Xhejms Xhefri.

Pas përfundimit të takimit, Berisha bëri të ditur se bisedimet ishin përqendruar në krizën që ka përfshirë qeverisjen, pas bllokimit në parlament të dekretit të presidentit Moisiu për emërimin e Marko Bellos në postin e ministrit të Jashtëm, në vend të Ilir Metës.
Berisha kërkoi edhe me këtë rast dorëheqjen e kreyministrit Fatos Nano, duke shtuar se qeveria e Nanos kontestohet jo vetëm nga opozita, por edhe nga kundërshtarët brenda Partisë Socialiste.

Por, ai theksoi se, në rast të ndonjë mocioni mosbesimi ndaj qeverisë, opozita nuk do të krijojë asnjë aleancë fluide me Ilir Metën dhe pasuesit e tij në Partinë Socialiste.
Ambasadori amerikan në Shqipëri, Xhejms Xhefri, nuk u prononcua pas takimit.


Berluskoni i shprehu Nanos vlerësimet e presidentit amerikan Xhorxh Bush lidhur me progresin në Shqipëri

Romë, 29 korrik 2003 - Kryeministri italian Silvio Berluskoni ia shprehu kryeministrit të Shqipërisë Fatos Nano vlerësimet e presidentit amerikan Xhorxh Bush lidhur me progresin në Shqipëri dhe angazhimin e tyre të përbashkët për të asistuar procesin e reformave dhe transformimeve në Shqipëri.

Këtë mesazh kryeministri Nano e mori gjatë një bisede telefonike me homologun e tij Berluskoni.
Njoftimet nga Tirana thonë se Berluskoni shprehu edhe një herë angazhimin e qeverisë italiane për përfundimin e negociatave midis Shqipërisë e Bashkimit Evropian për marrëveshjen e stabilizim asociimit, gjatë periudhës që Italia do të jetë kryesuese e radhës e Bashkimit Evropian.


Kofi Anan propozon shkarkimin e Karla del Pontes nga posti kryeprokurores së Tribunalit në Ruandë

Nju Jork, 29 korrik 2003 - Sekretari i përgjithëshëm i OKB-së, Kofi Anan, ka vendosur të propozojë shkarkimin e Karla del Pontes nga posti kryeprokurores së Tribunalit në Ruandë. Pritet që sot gjatë ditës Anan t'ia dërgojë propozimin zyrtar edhe Këshillit të Sigurimit të OKB-së, i cili duhet ta miratojë këtë vendim.
Mirëpo, burimet diplomatike pohojnë se Anan ka kontaktuar me ambasadorët e pesë vendeve anëtare të përhershme të KS: SHBA-së, Rusisë, Kinës, Francës dhe Britanisë së Madhe - dhe asnjë prej tyre nuk është shprehur kundër shkarkimit të Del Pontes nga posti i saj në Ruandë.
Në këtë mënyrë, zonja Del Ponte do të mbetet vetëm kryeadminstratore e Trubunalit të Hagës për krimet e luftës në hapësirat e ish-Jugosllavisë.
Këtij vendimi të Kofi Ananit i ka paraprirë takimi i tij i djeshëm me del Ponten, i zhvilluar me kërkesën e saj në Nju Jork.


SHBA harton listën e vendeve që duan të marrin pjesë në misionet në Irak

Uashington, 29 korrik 2003 - Shtetet e Bashkuara të Amerikës kanë paraqitur listën e 30 shteteve që duan të marrin pjesë në misionet ushtarake ose policore në Irak.
Kundërshtuesit e Luftës së Irakut - Franca, Gjermania dhe Rusia - nuk janë në këtë listë, sepse e kushtëzojnë një mision eventual me miratimin e një rezolute të re të Kombeve të Bashkuara.


Forcat amerikane e kanë kapur një truproje të lartë të Sadamit

Bagdad, 29 korrik 2003 – Forcat amerikane, duke gjurmuar Sadam Hyseinin, e kanë kapur një truproje të lartë, i cili punonte për diktatorin e përmbysur dhe ishte i afërm me Sadamin, ka bërë të ditur sot (e martë) zëdhënësi ushtarak amerikan, njofton Rojter.
"Jemi shumë afër kapjes së Sadamit", ka thënë ai, duke shtuar se, pas vrasjes së dy djemve të Sadamit dhe pas dhënies së shpërblimit prej 30 milionë dollarëve për informatorët, shumë irakianë po informojnë për vendndodhjet e vetë Sadamit.
SHBA-të kanë ofruar 25 milionë dollarë shpërblim për informacionet që shpiejnë në kapjen e Sadamit ose që vërtetojnë vdekjen e tij.


Në ambasadën irakiane në Moskë janë plaçkitur 3 milionë dollarë

Moskë, 29 korrik 2003 - Disa persona të armatosur kanë hyrë gjatë natës së kaluar në ambasadën e Irakut në Moskë, ku kanë marrë 3 milionë dollarë, njofton agjencia e lajmeve Interfaks, duke iu referuar burimeve policore ruse.
Sipas këtyre burimeve, vjedha e të hollave, të cilat gjendeshin në një kuti, është njoftuar sot në mëngjes nga një bashkëpunëtor i ambasadës.

Ai ka thënë se plaçkitësit kanë kaluar pranë shtëpizës së policisë që gjendet para ambasadës, por polici që ishte kujdestar para ndërtesës ka deklaruar se ai nuk ka vënë re asgjë të jashtëzakonshme.
Pas rënies të regjimit të Sadam Huseinit në Irak, ambasada irakiane në Moskë është drejtuar nga nivele më të ulëta.


Kryengritësit liberianë kanë marrë nën kontroll portin Buchanan

Monrovia, 26 korrik - Qeveria liberiane ka konfirmuar se qyteti i dytë përnga madhësia i vendit, porti Buchanan, gjendet nën kontrollin e kryengritësve. Por, një zëdhënës i qeverisë ka thënë se ushtria liberiane mbetet ende në periferi të qytetit dhe planifikon të organizojë një kundërsulm ndaj kryengritësve.
Mijëra liberianë kanë shkuar javët e fundit në këtë qytet, për t'u shpëtuar luftimeve në kryeqytetin e vendit, Monrovia.


Policia i ka arrestuar në Londër 19 persona të dyshuar për vrasjen e një djaloshi

Londër, 29 korrik 2003 – Gjatë hetimit të rastit të vrasjes së një djaloshi, torzoja (trupi pa gjymtyrë) e të cilit është gjetur në lumin Temza, policia britanike i ka arrestuar në Londër 19 persona, njofton BBCWorld.
Viktima, e quajtur Adam nga zyrtarët policorë, është gjetur në lumë afër Tauer Brixhit, në shtator të vitit 2001. Policia dyshon se ai kishte qenë viktimë e një rituali të vrasjes, pasi ishte sjellë nga Nigeria.


Flamuri amerikan të ulet në gjysëm shtize për nder të komedianit legjendar Bob Hope

Uashington, 29 korrik 2003 - Presidenti amerikan Xhorxh Bush dha urdhër që flamuri amerikan të ulet në gjysmështize, për nder të komedianit legjendar Bob Hope, i cili vdiq të dielën në Kaliforni, në moshën 100 vjeçare. Flamurët do të ulen në gjysmështize në Shtëpinë e Bardhë, në ndërtesat publike dhe në qendrat ushtarake amerikane në gjithë botën.
Varrimi i komedianit Bob Hope do të zhvillohet brenda disa ditësh dhe ai do të jetë privat. Bob Hope ka interpretuar në një shfaqje televizive dhe në gati 60 filma. Ai mbahet mend për punën e tij të palodhshme si humorist për zbavitjen e trupave amerikane, kudo në botë.


Në një shkëmbim zjarri në Arabinë Saudite u vranë 8 vetë

Riad, 29 korrik 2003 - Në një shkëmbim zjarri midis policëve dhe ekstremistëve eventualë islamikë, në Arabinë Saudite u vranë tetë vetë.

Një zëdhnënës i ministrisë së brendshme deklaroi se autoritetet e kishin marrë një njoftim se në një ndërtesë në veri të Riadit ndodheshin persona që kërkoheshin nga policia.

Ai tha se policët vranë gjashtë të dyshimtë dhe i arrestuan katër të tjerë. Gjatë shkëmbimit të zjarrit u vranë edhe dy policë, thuhet në njoiftimin e ministrisë.


Irak: sulm i ri ndaj trupave amerikane

Bagdad, 29 korrik 2003 - Një ushtar amerikan u vra dhe 3 të tjerë u plagosën në Bagdat, kur disa persona hodhën një mjet shpërthyes nga një urë mbi një autokolonë ushtarake amerikane që po kalonte poshtë saj.
Komanda Qendrore amerikane bëri të ditur se sulmi ndodhi dje në mesditë, në lagjen Al-Rashid të Bagdatit.
Një ushtar tjetër amerikan u vra në një aksident automobilistik afër Nasirijas. Rreth aksidentit kanë filluar hetimet.


Presidenti Bush takohet sot me kryeministrin izraelit Sharon

Uashington, 29 korrik 2003 - Presidenti amerikan, Xhorxh Bush, takohet sot në Shtëpinë e Bardhë me kryeministrin izraelit, Ariel Sharon, për të diskutuar mënyrat për avancimin e procesit të paqes në Lindjen e Mesme.
Kryeministri izraelit pritet të japë hollësi lidhur me hapa të tjerë të qeverisë së tij, përfshirë edhe lirimin e të burgosurve palerstinezë.
Zëdhënësi i Shtëpisë së Bardhë, Skot Mek Kllelën, tha se lirimi i të burgosurve palestinezë do të përmirësojë marrëdhëniet midis izraelitëve dhe Autoritetit Palestinez dhe do të ndikojë në përparimet drejt vendosjes së paqes.
Në takimin Bush-Sharon pritet të diskutohet edhe rreth planeve të Izraelit për ndërtimin e një muri sigurie midis shtetit hebraik dhe Bregut Perëndimor. Presidenti Bush e ka kritikuar ashpër idenë për ngritjen e këtij muri.

Për shkat të qëndrimit të presidentit Bush, Izraeli e anuloi ceremoninë e përurimit të fazës së parë të ndërtimit të murit. Megjithatë, kryeministri izraelit ngul këmbë se ky mur do mbrojë shtetin izralit nsa sulmet eventuale.


Ministri i jashtëm saudit takohet sot me presidentin Bush

Uashington, 29 korrik 2003 - Zyrtarë amerikanë thanë se ministri i jashtëm i Arabisë Saudite, Suad Aj Feisal, do të takohet sot me presidentin Xhorxh Bush për të dikutuar lidhur me shqetësimet e vendit të tij rreth një raporti të kongresit amerikan mbi sulmet terroriste të 11 shtatorit 2001.
Zyrtarët thanë setakimi bëhet me kërkesë të princit Saud al-Feisal, Ai pritet t'i bëjë thirrje presidentit Bush që të publikojë pjesë të raportit, ku thuhet se i referohet një vendi të huaj, për të cilin disa mjete amerikane informimi kanë sugjeruar se është Arabia Saudite.
Ambasadori i mbretërisë së Arabisë Saudite në Shtetet e Bashkuara tha se vendi i tij nuk ka asgjë për të fshehur. Ai shtoi se vendi i tij nuk mund t'i përgjigjet raportit derisa ai të bëhet publik.


Një organizatë ekstremiste kërkcënohet për hakmarrje ndaj SHBA-ve

Dubai, 29 korrik 2003 - Në një videokasetë të transmetuar në televizionin "Al-Arabija" në Dubai, paraqiten pamje të një grupi që thotë se është i angazhuar në "një luftë të shenjtë" kundër Shteteve të Bashkuara.
Një person i maskuar, i cili flet në video-kasetë, thotë se organizata mban emrin "Xhihadi Salafist" dhe qëllimi i saj është të hakmerret për arrestimet e personaliteteve dhe aktivistëve islamikë në vende të ndryshme të botës.


Një shpërthim në një fabrikë fishekzjarresh në Kinë ka shkaktuar vdekjen e 29 vetave

Pekin, 29 korrik 2003 – Një shpërthim i fuqishëm në një fabrikë fishekzjarresh në Kinën veriore ka shkaktuar vdekjen e 29 vetave dhe plagosjen e mbi 100 të tjerëve, njofton BBCWorld.
Fabrika dhe ndërtesat e afërme janë shkatërruar tërësisht. Shkaku i shpërthimit nuk dihet ende. Nuk është i njohur as numri i punëtorëve që ndodheshin në fabrikë në kohën e shpërthimit.


Tre persona e kanë humbur jetën në zjarret që kanë shpërthyer në malet e rivierës franceze

Paris, 29 korrik 2003 – Tre persona e kanë humbur jetën në zjarret që kanë shpërthyer në malet afër rivierës franceze, njofton BBCWorld.
Dy nga viktimat, të cilat janë gjetur të vdekur në një fshat jashtë maleve të një fshati, besohet se ishin çift bashkëshortor dhe se ata janë britanikë. Viktima e tretë është një grua franceze.
Këto janë rastet e para të vdekjes nga zjarret shkretëruese verore në Francë. Presideniti Zhak Shirak ka kërkuar dënime të ashpra për ata që i shkaktojnë zjarret.