Podujevë: Rritet raportimi i dëmeve nga moti i lig, komuna do të kërkojë ndihmë nga institucionet e Kosovës

“Do të njoftohen institucionet e Kosovës për dëmet e shkaktuara, Presidenca, Qeveria dhe Kuvendi si dhe do të kërkohet ndihmë”, tha z. Veliu duke shtuar se dëmet më të mëdha janë në bujqësi. Sipas kryetarit Veliu komuna do të kërkojë ndihmë konkrete nga Qeveria e Kosovës dhe Fondi për raste emergjente por edhe nga Ministritë përkatëse.

 

Ekzekutori i përkohshëm i komunës së Podujevës Rasim Fejza njoftoi se në kuadër të Qeverisë komunale janë formuar 9 komisione për vlerësimin e dëmeve të cilat prej të shtunës po punojnë në terren.

 

Në Drejtorinë për Mbrojtje Civile dhe Emergjencë u njoftuam se deri më tash janë evidentuar 388 qytetarë të cilëve u janë dëmtuar automjetet dhe mbi 275 raste të dëmeve në objekte banimi. “Për 30 familje me kulme të shkatërruara komuna ka siguruar folie plastike, por mundësitë për ndihmë janë të vogla”, tha ud. i drejtorit të DMCE Bajram Gashi.

 

Dëme të mëdha janë shkaktuar në arat dhe kopshtiet – perimkulturë, e shumë familjeve llapjane mirëpo vargu i gjatë i atyre që presin për ti paraqitur rastet është aq i madh sa zyrtarët komunalë nuk patën mundësi të japin ndonjë shifër.

 

Të premtën e javës së kaluar për afro 2 orë në një pjesë të fshatrave dhe në vet qytetin e Podujevës ra shi dhe breshër e copa akulli.

Copyright©2000-2003 Trepca.net - Të gjitha të  drejtat e rezervuara.