E shtune 26 korrik 2003

26.07.2003 - Trepca.net

Lajme

E shtune 26 korrik 2003

Përmbajtja:

Harri Holker u emërua kryeadministrator i Kosovës
Presidenca e Kosovës e mirepret emërimin e shrfit të ri të UNMIK-ut
Shi dhe breshër e copa akulli përfshinë komunën e Podujevës
Shpërthim afër hyrjes së Kuvendit komunal të Podujevës
Policia i cilëson si akt kriminal shpërthimet në Mitrovicë
Autoritetet e Dibrës kërkojnë hapjen e një vendkalimi të ri kufitar me Shqipërinë
NATO publikoi raportin për incidentin e vitit 2002 në Krivenik, ku ishin vrarë tre civilë
Xhorxh Bush urdhëron dërgimin e trupave amerikane në bregdetin e Liberisë
U arrestuan 40 ish-oficerë të ushtrisë në Argjentinë
Presidenti Bush dhe kryeministri Abas optimistë për plabib e paqes për Lindjen e Afërt

Harri Holker u emërua kryeadministrator i Kosovës


Presidenca e Kosovës e mirepret emërimin e shrfit të ri të UNMIK-ut

Prishtinë, 26 korrik 2003 - Zyra e Presidentit të Kosovës, Ibrahim Rugova, tha se e mirëpret emërimin e administratorit të ri të Kosovës, Harri Holker, duke shprehur besimin se ai do të vazhdojë procesin e bartjes së kompetencave dhe se do ta avancojë procesin drejt definimit të statusit përfundimtar të Kosovës.
Skender Hyseni, Këshilltar i Lartë Politik i Presidentit të Kosovës, tha se presidenca e mirëpret këtë emërim, duke shpresuar se z. Holker do të përqendrohet në rimëkëmbjen ekonomike të Kosovës, nëpërmjet përshpejtimit të procesit të privatizimit dhe krijimit të kuadrit të nevojshëm ligjor për tërheqjen e investimeve nga jashtë, si dhe bashkëpunimit të mirë me institucionet e Kosovës.
"Presim që përfaqësuesi i ri special të bashkëpunojë ngushtë me institucionet kryesore, sidomos me presidentin, me kryetarin e Parlamentit dhe me kryeministrin, edhe për çështje të tjera të rëndësishme për Kosovën, duke përfshirë edhe çështjen e definimit të statusit përfundimtar të Kosovës", ka deklaruar z. Hyseni.


Shi dhe breshër e copa akulli përfshinë komunën e Podujevës

Podujevë, 26 korrik 2003 - Në Podujevë dhe në disa fshatra të kësaj komune, mbrëmë mbretëroi një mot i lig, me shi të rëmbyeshëm e me erë dhe me breshër të madhësisë edhe sa veja, që shkaktuan dëme të mëdha materiale dhe disa persona të lënduar. Disa familje janë evakuuar nga shtëpitë e tyre për shkak të vërshimeve dhe rrezikut të shembjes së shtëpive.
Njoftimet nga Podujeva thonë se breshëri ka shkaktuar dëme të mëdha në fshatrat veriore të komunës, si: Pollatë, Kërpimeh, Metehi, Dobërdol, Bajçinë, Bradash, Obrançë, Peran e të tjera, pastraj qyteti i Podujevës dhe disa fshatra në jug të Podujevës, prej Sfeçlës e deri në Bellopojë.

Në këto vendbanime u shkaktuan dëme të shumta në rrjetin elektrik, në objekte të banimit dhe në objekte të tjera. Përgjegjësit e KEK-ut në Podujevë premtuan se dëmet në rrjetin elektrik do të evitohen sa më shpejt që është e mundur.
Komiteti i Krizës i përbërë nga drejtuesit e Drejtorisë së Mbrojtjes Civile dhe Emergjencës, SHPK-së, TMK-së dhe Brigadës së Zjarrfikësve u mblodh menjëherë për të bërë vlerësimin e dëmeve dhe planifikimin e masave të nevojshme.

Drejtoria për Mbrojtje Civile dhe Emergjencë i ka angazhuar të gjithë punëtorët që ta përcjellin gjendjen në terren. Rreth 200 qytetarë kanë kërkuar ndihmën e organeve të kuvendit komunal, SHPK-së etj. Një numër i konsiderueshëm qytetarësh kanë kërkuar ndihmën e mjekut në Shtëpinë e Shëndetit në Podujevë.
Kryetari i kuvendit komunal, Agim Veliu, kërkoi nga të gjitha institucionet që të ndërmarrin të gjitha masat e nevojshme për tejkalimin e situatës.


Shpërthim afër hyrjes së Kuvendit komunal të Podujevës

Podujevë, 26 korrik 2003 - Mbrëmë, rreth 40 minuta pas mesnate, në qendër të qytetit, afër Kuvendit të Komunës në Podujevë, ka ndodhur një shpërthim i fuqishëm, i cili i ka tronditur banorët e qytetit.
Komandanti i stacionit policor në Podujevë, Wallace Scullion, ka deklaruar se para hyrjes së kuvendit të komunës duken qartë gjurmët e shpërthimit. Ai ka thënë se pjesëtarët e KFR-it çek dhe sllovak kanë bërë hetimet e para lidhur me shpërthimin, kurse sot në mëngjes në vendin e ngjarjes kanë dalë edhe pjesëtarët e policisë së UNMIK-ut dhe të Shqërbimit Policor të Kosovës.
Një banor i ndërtesës afër Kuvendit të Komunës ka deklaruar se pas shpërthimit janë dëgjuar edhe të shtëna armësh të lehta.


Policia i cilëson si akt kriminal shpërthimet në Mitrovicë

Mitrovicë, 26 korrik 2003 - Zyrtarët e policisë në Mitrovicë vlerësojnë se shpërthimet e të enjtes në Mitrovicë ishin akt kriminal dhe jo sulm i organizuar terrorist. Këtë vlerësim ata e bënë pas rezultateve të para të hetimee të zhvilluara pas shpërthimeve.
Komandanti i policisë rajonale Beri Pollin ka përjashtuar mundësinë që stacioni i policisë të kishte qenë cak i sulmit me bomba.
"Ky ishte një akt kriminal dhe jo një sulm i organizuar terrorist" tha Pollin, i cili la të hapur mundësinë që shpërthimet të jenë pasojë e ndonjë qërimi hesapesh", tha z. Polin.
Ai tha se shpërthimet e të enjtes në Mitrovicë nuk duket të kenë lidhje me shpërthimet e mëhershme, si ai para stacionit të policisë në Podujevë dhe shpërthimet para Gjykatës së Qarkut dhe në stacionin e policisë numër 2 në Prishtinë.
Polin bëri të ditur se 12 persona janë marrë në pyetje lidhur me shpërthimet, ndërsa dy prej tyre vazhdojnë të mbahen në arrest. Identiteti i të arrestuarve nuk është njoftua.


Autoritetet e Dibrës kërkojnë hapjen e një vendkalimi të ri kufitar me Shqipërinë

Dibër, 26 korrik 2003 - Kryeministri i Maqedonisë, Branko Cërvenkovski, dhe kryetari i Bashkimit Demokratik për Integrim (BDI), Ali Ahmeti, qëndruan dje së bashku në qytetin e Dibrës, për t'u njohur së afërmi me problemet e pushtetit vendor dhe me gjendjen ekonomike.
Me përfaqësuesit e pushtetit lokal ata biseduan edhe lidhur me funksionimin e pushtetit vendor, raportet ndëretnike, investimet, ndarjen e re territoriale, krijimin e komunave të reja e të tjera.
Bëhet e ditur se autoritetet e Dibrës kërkuan hapjen e vendkalimi të ri kufitar me Shqipërinë, në këtë zonë. Vlerësohet se në këtë mënyrë do të pengoheshin kalimet të paligjshme të kufirit dhe incidentet e shpeshta kufitare.


NATO publikoi raportin për incidentin e vitit 2002 në Krivenik, ku ishin vrarë tre civilë

Bruksel, 26 korrik 2003 - Dje, pas më shumë se dy vjet hetimesh, Aleanca Veriatlantike, bëri publik raportin lidhur me incidentin e vitit 2001 në fshatin Krivenik, afër kufirit me Maqedoninë, ku kishin humbur jetën tre civilë, në mesin e të cilëve ishte edhe gazetari i agjencisë Asoishted Press, britaniku Kerim Luton.
Në raport, megjithatë, nuk sqarohen të gjitha rrethanat e atij incidenti. Në të thuhet se në atë kohë ka pasur një konflikt në mes të forcave të ushtrisë maqedonase dhe pjesëtarëve të UÇK-së, se ushtria maqedonase kishte ndërmarrë një ofensivë në atë zonë kufitare, kurse Ushtria Çlirimtare Kombëtare tërhiqej nga territori i Maqedonisë në drejtim të fshatit Krivenik.

KFOR-i që e ka bërë vëzhgimin e terrenit nga helikopteri ka parë lëvizje të ushtarëve, por askush nuk ka parë asgjë në momentin kur kanë rënë predhat.

Raporti thotë se predhat kanë mundur të bien nga të dy anët, nga territori i Kosovës ose nga tërritori i Maqedonisë, por nuk mund të konkludohet se cila palë i ka shkrehur ato. Sipas numrave serikë të predhave të gjetura, mund të konkludohet se ato kanë qenë të prodhimit të Sllovenisë. Predha të tilla kanë pasur edhe UÇK-ja edhe Ushtria e Maqedonisë.


Xhorxh Bush urdhëron dërgimin e trupave amerikane në bregdetin e Liberisë

Uashingron, 26 korrik 2003 - Presidenti amerikan, Xhorxh Bush, ka urdhëruar dërgimin e një numri të kufizuar të trupave amerikane në ujrat territoriale të Liberisë.
Z. Bush ka thënë se qëllimi i këtij misioni është që të ndihmojë shërbimet humanitare që në kthehen në Liberi, ku dje janë vrarë të paktën 26 vetë.
Trupat, të cilat do të shkojnë në drejtim të Liberisë janë nga kontigjenti i helikopterë-mbajtëses USS Iwojima, por ndoshta edhe nga anije të tjera, me 2000 marinsa në bord.

Deri më tash, Pentagoni nuk ka dhënë hollësi lidhur me misionin e këtyre trupave, duke thënë se ende nuk është marrë ndonjë vendim përfundimtar për përfshirjen direkte të amerikanëve në këtë vend të përfshirë nga lufta qytetare.
Sekretari i përgjithshëm i Kombeve të Bashkuara, Kofi Anan, e ka përshëndetur vendimin e presidentit Bush.


U arrestuan 40 ish-oficerë të ushtrisë në Argjentinë

Buenos Aires, 26 korrik 2003 - Rreth 40 ish-oficerë të ushtrisë argjentinase janë arrestuar dhe pritet të ekstradohen në Spanjë, për t'u gjykuar për akte kriminale dhe për shkeljen e të drejtave të njeriut.

Më i kërkuari prej tyre është ish-kapiteni i marinës argjentinase, Alfredo Astiz, i njohur me nofkën "Engjulli i Vdekjes', i cili tani ndodhet në burg. Ai mund të gjykohet në Spanjë, pasi qeveria argjentinase anuloi dje një dekret që e ndalonte ekstradimin e shtetasve të vetë të dyshuar për torturë dhe për vrasje gjatë të ashtuquajturës "Luftë e ndyrë".
Të gjithë të arrestuarit kërkohen nga gjykatësi Balthazar Garzon, i cili njihet për përpjekjet që ta gjykojë ish-diktatorin kilean Augusto Pinoçet.


Presidenti Bush dhe kryeministri Abas optimistë për plabib e paqes për Lindjen e Afërt

Uashington, 26 korrik 2003 - Presidenti i Shteteve të Bashkuara, Xhorxh Bush, dhe kryeministri palestinez, Mahmud Abas, e kanë cilësuar të frytshëm takimin e tyre në Shtëpinë e Bardhë, në Uashington.
"Kryeministri Abas dhe unë kemi një qëllim të përbashkët - vendjen e paqes në Tokën e Shenjtë, midis dy shteteve të lira dhe të sigurta, Palastinës dhe Izraelit. Arritja e këtij qëllimi do të kërkojë nga të gjitha palët që të përmbushin përgjegjësitë e veta", ka deklaruar z. Bush, duke e kritikuar edhe ndërtimin e murit të sigurisë përgjatë dhe brenda kufijve të Bregut perëndimorë nga ana e Izraelit.
Kryeministri Mahmud Abas e ka falënderuar presidentin Bush për ndihmën financiare dhënë palestinezëve, duke i cilësuar ato si përpjekje të pakursyera amerikane për mbështetjen e planit të paqes. Ai ka thënë se është arritur progres në zbatimin e planit të paqes, por ka shtruar edhe disa kërkesa.
"Është arritur një progres, por duhet bërë hapa në drejtim të lirimit të të burgosurve, heqjes së bllokadës ndaj presidentit Arafat, tërheqies së Izraelit nga rajonet palestineze dhe lehtësimit të lirisë së qarkullimit të palestinezëve", ka thënë kryeministri Abas.