Lajme

E premte 25 korrik 2003

Përmbajtja:

• Presidenti Rugova dënoi ashpër shpërthimet e mbrëmshme në Mitrovicë

• Nexhat Daci dënoi shpërthimet në Mitrovicë

• KMDLNJ e cilëson akt terrorist sulmin e mbrëmshëm në Mitrovicë

• Ministria e Jashtme e Shqipërisë gjykon serinë e sulmeve të fundit në Kosovë

• Nexhat Daci: "Kosova është vend kyç për stabilizimin e rajonit"

• Skender Hyseni: "Statusi i Kosovës do të vendoset në bazë të vullnetit politik të popullit të Kosovës"

• Nexhat Daci priti përfaqësuesit e AKM-së

• Ministri Zef Morina vizitoi sot Pejën

• Agim Çeku priti Marek Antoni Novickin

• Policia e UNMIK-ut: "Sulmi me granata është akt terrorist kundër Kosovës"

• Faruk Spahia: "Shpërthimet në Mitrovicë synojnë destabilizimin

• Kryesia e LDK-së e dënon fuqishëm sulmin e mbrëmshëm në Mitrovicë

• Xheladin Rama është lëshuar nga spitali

• Alarm i rremë për mjet shpërthyes në Podujevë

• Lutfi Haziri: Bojkoti nuk është interesin e askujt në Gjilan

• Bashkim Rama vizitoi sot Gjilanin

• Gjilani kërkon hapjen e një pike kufitare në Stançiq

• Sot në Gjilan hapet manifestimi kulturor "Gurra popullore 2003"

• AER mbështet një program për përmirësimin e kushteve të banimit në Kosovë

• Sajmon Hajzellok: UNMIK-u do të jetë asnjanës në bisedimet shqiptaro-serbe

• Në dy shpërthimë që ndodhën mbrëmë në Mitrovicë humbi jetën një dhe u plagosën katër kalimtarë rasti

• Çarls Brajshou: "Rezoluta 1244 e lë të hapur statusin e Kosovës"

• Peter Rondorf: "Bashkësia ndërkombëtare nuk ka dështuar në Mitrovicë"

• Në Çikatovë të Vjetër ka filluar zhvarrimi i 117 kufomave

• Përmirësohet situata energjetike në Kosovë - redukimet do të jenë 5 me rrymë dhe 1 pa të

• Erik Mekinli thotë se PTK është pronë e AKM-së

• U largua nga Kosova aeroplani i fundit me eprorë të KFOR-it rus

• Policia e Malit të Zi mori edhe formalisht kontrollin e kufijve me Kosovën

• Kryetari i KK të Preshevës Skënder Destani ka dhënë dorëheqje

• Pauell shpreh mbështetje për reformat në Serbi e Mal të Zi

• Forcat amerikane kanë arrestuar sot 16 persona në Bagdad

• Të paktën 11 civilë janë vrarë në kuartin diplomatik në Monrovia

• Një ushtar izraelit e ka vrarë një fëmijë palestinez pesëvjeçar dhe ka plagosur dy motrat e tij

• Në luftimet e sotme në Nepal është vrarë një kryengritës maoist

• Një bombë ka shpërthyer pranë një gjykate në Spanjë dhe ka plagosur një person

• Një burg palestinez është goditur me granatë - 10 të burgosur janë plagosur

• Një gjykatës argjentinas ka urdhëruar arrestimin e 46 ish-zyrtarëve të lartë ushtarakë

• Bëhen publike fotografitë e kufomave të djemve të Sadamit

• Kongresi amerikan kritikon shërbimet sekrete për shkak të sulmeve të 11 shtatorit

• Shtohet ankthi në Liberi

Presidenti Rugova dënoi ashpër shpërthimet e mbrëmshme në Mitrovicë

 

Prishtinë, 25 korrik 2003 - Presidenti i Kosovës, Ibrahim Rugova, dënoi ashpër shpërthimet e mbrëmshme në Mitrovicë, duke i cilësuar si akte kriminale të drejtuara kundër lirisë dhe pavarësisë së Kosovës.
"I dënojmë ashpër shpërthimet e mbrëmshme në Mitrovicë, afër stacionit të policisë, ku u vra Kadir Rashiti, dhe u lënduan rëndë katër persona.

Këto akte kriminale që po bëhen në Kosovë qe një javë, janë të drejtuara kundër institucioneve demokratike të Kosovës dhe kundër jetës së qytetarëve të Kosovës. Po ashtu, këto akte kriminale janë të drejtuara kundër lirisë dhe pavarësisë së Kosovës, që po e ndërtojmë përditë e më shumë.

Kërkojmë nga policia t'i ndjekë aktorët e krimeve të tilla dhe t'i nxjerr para drejtësisë së Kosovës. Aktorët e veprave të tilla kriminale veprojnë edhe kundër të ardhmes së fëmijve të tyre.

Familjes Rashiti i shprehim ngushëllimet tona të thella dhe të lënduarve u dëshirojmë shërim të shpejtë", thuhet në deklaratën e Presidentit të Kosovës, dr. Ibrahim Rugova.

 

 

Nexhat Daci dënoi shpërthimet në Mitrovicë

 

Prishtinë, 25 korrik 2003 - Kryetari i Kuvendit të Kosovës, Nexhat Daci, e dënoi ashpër sulmin e mbrëmshëm në afërsi të stacionit të policisë në Mitrovicë.

"Të gjithë ne jemi të shokuar me ngjarje të këtilla", deklaroi z. Daci, duke theksuar se ato janë të drejtuara kundër imazhit të mira që e ka fituar Kosova.

"Cili prej nesh ka menduar që katër vjetësh në liri nuk do të jetë i sigurtë as në korzo, as në vendbanim, as në vendin e punës?", shtroi pyetjen z. Daci.

Ai kërkoi një bashkëpunim më të fmirë midis qytetarëve dhe Shërbimit Policor të Kosovës dhe një profesionalizëm më të lartë të shërbimeve të sigurisë.

 

 

KMDLNJ e cilëson akt terrorist sulmin e mbrëmshëm në Mitrovicë

 

Prishtinë, 25 korrik 2003 - Këshilli për Mbrojtjen e të Drejtave dhe Lirive të Njeriut në Prishtinë, nëpërmjet një deklarate për shtyp, e dënon ashpër sulin e mbrëmshëm në Mitrovicë.

"Ditëve të fundit në Kosovë janë shpeshtuar sulmet ndaj stacioneve policore dhe objekteve të institucioneve të tjera. Sulmi i mbrëmshëm në Mitrovicë është vetëm njëri prej këtyre sulmeve. Ky sulm pati pasoja më të rënda - një qytetar i vdekur dhe së paku 6 të tjerë të lënduar (sipas njoftimeve të Qendrës Rajonale të KMDLNJ-së në Mitrovicë).

Sikurse në shumicën e rasteve të sulmeve të këtilla apo të ngjashme autori apo autorët e sulmeve dhe motivet për këtë mbeten të panjohura.

 

Por, një gjë është më se e qartë - kushdo qofshin autorët e këtyre sulmeve, pasojat e tyre po bëhen gjithnjë e më të rënda dhe më serioze: plagosja dhe humbja e jetëve të njerëzve si dhe dëmet materiale, pa i anashkaluar edhe dëmet dhe pasojat e tjera, pra rrënjosja e frikës dhe e pasigurisë te qytetarët dhe tendenca për destabilizimin dhe krijimin e kaosit në Kosovë.

KMDLNJ e vlerëson këtë akt të tmerrshëm si akt terrorist të drejtuar kundër jetës dhe sigurisë së qytetarëve dhe përpjekje për destabilizimin e Kosovës, pikërisht tash në kohën kur Kosova po veçohej si një vend me ngritje të nivelit të sigurisë dhe të përparimit të demokracisë.

Është koha e fundit që të parandalohen këto dhe akte të tjera të ngjashme. Policia duhet të angazhohet shumë më tepër dhe më seriozisht për ndriçimin e akteve të tilla dhe zënien e autorëve të tyre. Në këtë aspekt edhe qytetarët duhet të bashkëpunojnë më shumë me policinë.

 

Ndriçimi i këtyre akteve dhe vënia e autorëve të tyre para organeve të drejtësisë është në interes të të gjithë qytetarëve të Kosovës", thuhet në deklaratën e KMDLNJ.

 

 

Ministria e Jashtme e Shqipërisë gjykon serinë e sulmeve të fundit në Kosovë

 

Tiranë, 25 korrik 2003 - Ministria e Punëve të Jashtme shpreh keqardhjen për serinë e sulmeve që kanë ndodhur gjatë kësaj jave në qytete të ndryshme të Kosovës, të cilat janë pritur me indinjatë nga qytetarët e saj.

"Shpërthimet e fundit që kanë ndodhur në Prishtinë, e më pas në Mitrovicë, ku humbi jetën edhe një banor i këtij qyteti, janë akte të patolerueshme, dhe si të tilla janë maksimalisht të dënueshme nga çdo individ apo shoqëri demokratike.

Veprime të tilla kriminale të cilat synojnë prishjen e ekuilibrave të brendshëm si dhe ngrirjen e procesit të kthimit dhe integrimit të të gjitha komuniteteve në Kosovë, nuk do të mund të zbehin arritjet pozitive të deritashme që janë shënuar në drejtim të stabilitetit dhe sigurisë atje.

Shprehim bindjen se UNMIK-u, institucionet vetëqeverisëse dhe populli i Kosovës do të përballojnë denjësisht çdo provokacion që cenon sigurinë dhe nxit destabilitetin në Kosovë, duke bashkëpunuar ngushtë për të nxjerrë përpara drejtësisë autorët e këtyre akteve të shëmtuara", thuhet në deklaratën e Ministrisë së Punëve të Jashtme të Shqipërisë.

 

 

Nexhat Daci: "Kosova është vend kyç për stabilizimin e rajonit"

 

Prishtinë, 25 korrik 2003 - Kryetari i Kuvendit të Kosovës, Nexhat Daci, priti sot shefin e Zyrës së Holandës në Kosovë, Peter Bas Baker, i cili u interesua lidhur me fillimin e bisedimeve midis Prishtinës e Beogradit.

Pas takimit, z. Daci deklaroi se Qeveria e Kosovës e gëzon përkrahjen e plotë të kuvendit për fillimin e këtyre bisedimeve. Ai tha se zgjidhja sa më e shpejtë e problemit të Kosovës është me interes të shumanshëm, jo vetëm për qytetartët e saj.

"Kosova është vend kyç për stabilizimin e rajonit", thekdsoi z. Daci.

Ai tha se 13 nga 14 partitë parlamentare janë për pavarësi, të cilën e vështrojnë si zgjidhjen më fatlume për Kosovën, dhe shtoi se institucionet dhe qytetarët e Kosovës janë për hapësirë të lirë qarkullimi, pra për kufij të hapur, ashtu si të shteteve të Bashkimit Evropian.

Kryetari i Kuvendit, Nexhat Daci, tha se institucionet e Kosovës angazhohen për kthimin e serbëve dhe të zhvendosurve tjerë, duke vlerësuar se ky proces është një prej faktorëve për procese të tjera të stabilizimit të gjendjes në Kosovë.

 

 

Skender Hyseni: "Statusi i Kosovës do të vendoset në bazë të vullnetit politik të popullit të Kosovës"

 

Prishtinë, 25 korrik 2003 - Skender Hyseni, Këshilltar i Lartë Politik i Presidentit të Kosovës, vlerëson se statusi i Kosovës do të vendoset në bazë të vullnetit politik të popullit të Kosovës.

 

Në deklaratën e z. Hyseni thuhet:

"Statusi i Kosovës do të vendoset në bazë të vullnetit politik të popullit të Kosovës dhe me miqtë e Kosovës, e kjo është pavarësia e Kosovës, e shpallur më 1991 dhe e verifikuar me referendum në të njëjtin vit.

Deklaratat irituese dhe krejtësisht të papranueshme të Beogradit, të transmetuara përmes Çoviqit, kanë për qëllim destabilizimin e Kosovës dhe rajonit në përgjithësi.

Kjo fushatë e Beogradit bëhet në kohën kur Kosova, me përkrahjen e bashkësisë ndërkombëtare, po e shton progresin në të gjitha fushat e jetës e në të mirë të të gjithë qytetarëve të saj", thuhet në deklaratën e z. Hyseni.”

 

 

Nexhat Daci priti përfaqësuesit e AKM-së

 

Prishtinë, 25 korrik 2003 - Kryetari i Kuvendit të Kosovës, Nexhat Daci, priti sot zëvendësdrejtorin e Agjencisë Kosovare të Mirëbesimit (AKM), Ahmet Shalën, dhe kryesuesin e procesit të privatizimit në AKM, Johanes Johanson. Në takim u bisedua për procesin e privatizimit dhe për bashkëpunimin midis e AKM-së dhe Kuvendit të Kosovës.

Pas takimit, z. Daci shprehu mbështetje për punën e AKM-së lidhur me procesin e privatizimit në Kosovë, duke e vlerësuar atë si faktor të përshpejtimit të zhvillimit ekonomik të Kosovës. Me këtë rast, ai u bëri apel biznismenëve kosovarë që të bashkojnë mjetet dhe t'i blejnë ndërmarrjet shoqërore.

Z. Daci i cilësoi të dëmshme grevën e përgjithshem, të paralajmëruar nga Bashkimi i Sindikatave të Pavarura të Kosovës, për datën 3 shtator. Ai tha se ky do të ishte një hap që do të shkaktonte paralizimin e ekonomisë dhe do të ishte një hap prapa në proceset zhvillimore.

Z. Johanson nga ana e tij shpreh i kënaqur me qasjen e Kuvendit të Kosovës ndaj procesin e privatizimit. Ai tha se takimi i sotëm është edhe një dëshmi e transparencës së punës së AKM-së rreth privatizimit.

Ndërekaq, z. Shala theksoi se privatizimi është sfida kryesore për të gjitha shoqëritë në tranzicion. Ai theksoi se AKM-ja është e gatshme të bashkëpunojë me institucionet e Kosovës, me qëllim të avancimit të procesit të zhvillimit ekonomik të Kosovës.

 

 

Ministri Zef Morina vizitoi sot Pejën

 

Prishtinë, 25 korrik 2003 - Ministri i Transportit e Postë Telekomunikacionit të Kosovës, Zef Morina, vizitoi sot Pejën, ku u takua me drejtues të pushtetit lokal lidhur me infrastrukturën rrugore. Në këtë takim u bisedua edhe për mundësitë e ndërtimit të rrugës Pejë - Rugova dhe përpërfundimin e disa segmenteve të rrugës që lidh me fshatrat e Lugut të Baranit.

Ministri Morina deklaroi se rruga Pejë - Rugova ka rëndësi të veçantë jo vetëm për Pejën, por për mbarë Kosovën. Ai shprehu bindjen se Ministria dhe Kuvendi Komunal i Pejës do të gjejnë mundësi për realizimin e këtyre dy projekteve.

 

 

Agim Çeku priti Marek Antoni Novickin

 

Prishtinë, 25 korrik 2003 - Komandanti i Shtabit të Përgjithshëm të Trupave Mbrojtëse të Kosovës (TMK), gjeneral-lejtnant Agim Çeku, priti sot ombudspersonin e Kosovës, Marek Antoni Novickin. Në takim u bisedua për respektimin e të drejtave të pjesëtarëve të TMK-së.

Në njoftim thuhet se gjeneral Çeku ka shprehur shqetësimin e tij lidhur me masat disiplinore ndaj pjesëtarëve të TMK-së. Ai ka thënë se pezullimi apo largimi i pjesëtarëve të TMK-së duhet të jetë i bazuar në ligj, të jetë transparent dhe i mbështetur në fakte.

Me këtë rast, ai kërkoi nga institucioni i ombudspersonit mbështetje për mbrojtjen e të drejtave të pjesëtarëve të TMK-së.

  

  

Policia e UNMIK-ut: "Sulmi me granata është akt terrorist kundër Kosovës"

 

Prishtinë, 25 korrik 2003 - Policia e UNMIK-ut e ka cilësuar si sulm terrorist i drejtuar kundër saj dhe Kosovës në tërësi sulmin e mbrëmshëm në Mitrovicë.

Komandati i policisë rajonale në Mitrovicë, Berri Polin, ka bërë të ditur se disa persona janë marrë në pyetje, dy prej të cilëve dyshohet të kenë qenë të përshirë në sulm.

"Ne jemi duke intervistuar një numër dëshmitarësh lidhur me këtë rast. Në veçanti jemi të interesuar për dy persona që janë marrë në pyetje dhe janë paraburgosur", ka thënë Polin.

Ai ka bërë të ditur se ata janë banorë të Mitrovicës, por nuk ka njoftuar identitetin e tyre.

Sipas policisë, motivet e sulmeve ndaj organeve policore dhe atyre të drejtësisë, mund të jenë të lidhura me vendimin e trupit gjykyes ndërkombëtar të Gjykatës së Qarkut në Prishtinë për dënimin e katër eprorëve të ish-Ushtrisë Çlirimtare të Kosovës, të njohur si grupi të Llapit.

 

 

Faruk Spahia: "Shpërthimet në Mitrovicë synojnë destabilizimin

 

Prishtinë, 25 korrik 2003 - Kryetari i komunës së Mitrovicës, Faruk Spahia, ka dënuar fuqishëm ulmet e mbrëmshme me bomba në Mitrovicë, të cilat lanë një të vdekur dhe 4 të plagosur.

"Mendoj se është një akt shumë i shëmtuar, të cilin e dënojnë besoj të gjithë qytetarët e Mitrovicës, pa marrë parasysh motivet," ka thënë Spahia.

"Kujtoj se ku akt i është drejtuar destabilizimit të Mitrovicës dhe është një ngarkesë shtesë për Mitrovicën, e cila po ballafaqohet me probleme të shumta", ka shtuar ai.

Faruk Spahia ka thënë se kishte shpresuar se Mitrovica do të kursehej nga sulmet e tilla.

 

 

Kryesia e LDK-së e dënon fuqishëm sulmin e mbrëmshëm në Mitrovicë

 

Prishtinë, 25 korrik 2003 - Kryesia e LDK-së vlerëson se sulmi i mbrëmshëm në Mitrovicë është sulm kundër të ardhmes së Kosovës dhe pavarësisë së saj.

"Lajmi për aktin e mbrëmshëm kriminal- terrorist në Mitrovicë, ku humbi jetën një qytetar dhe u plagosën katër të tjerë, ishte tejet i rëndë dhe shqetësues.

Ky akt, si edhe aktet tjera të ditëve të fundit, është dëshmi e qartë dhe argument i fuqishëm se në Kosovë, përkundër progresit dhe zhvillimeve gjatë viteve të pasluftës, ka individë dhe grupe që janë të interesuar dhe punojnë kundër stabilitetit politik, kundër rendit demokratik, kundër të ardhmes së Kosovës dhe pavarësisë së saj.

Padyshim, njerëzit e tillë kanë për qëllim dhe synim që në Kosovë të krijojnë pasiguri dhe, në këtë mënyrë, të zbehin imazhin e Kosovës para botës demokratike.

LDK-ja i dënon ashpër aktet e tilla dhe kërkon nga policia e UNMIK-ut, SHPK-ja, KFOR-i dhe organet e hetuesisë që kryesit e veprave të tilla të nxirren sa më parë para organeve të drejtësisë.

LDK-ja u bën apelo të gjithë qytetarëve të Kosovës që të kenë kujdes dhe të jenë vigjilentë, në mënyrë që të ruhet trendi i përmirësimit të gjendjes së sigurisë në Kosovë.

Familjes së të ndjerit i shprehim ngushëllimet më të thella, ndërsa të lënduarve urojmë shërim sa më të shpejtë", thuhet në reagimin e Kryesisë së LDK-së.

 

 

Xheladin Rama është lëshuar nga spitali

 

Prishtinë, 25 korrik 2003 - Nga Qendra Emergjente e Prishtinës njoftohet se Xheladin Rama, i cili ishte plagosur në sulmin e mbrëmshëm me bomba në Mitrovicë, është në gjendje të mirë shëndetësore, prandaj ai është lëshuar në shtëpi.

Ndërkaq, Burim Tahiri, është transferuar për shërim të mëtejmë në Klinikën Ortopedike të Qendrës Klinike Universitare të Kosovës. Personali i kësaj klinike njofton se gjendja shëndetësore e tij është stabile dhe jashtë rrezikut për jetë.

 

 

Alarm i rremë për mjet shpërthyes në Podujevë

 

Podujevë, 24 korrik 2003 - Zëvendës-komandanti i Batalionit të Tretë çeko-sllovak të KFOR-it, majori Vojtech Mojzes, dhe zëdhënësi Michal Prejzek, njoftuan sot për një njoftim të rremë për vendosjen e një mjeti shpërthyes në rrugën "Zahir Pajaziti", afër stacionit të autobusëve në Podujevë.

"Sot në orën 3:00 të mëngjesit, nga policia e UNMIK-ut, e kemi marrë një informatë për vendosjen e një jeti shpërthyes, që konstatua se ishte alarm i rrejshëm", tha majori Mojzes.

Ai tha se ekipi i specializuar për mjete shpërthyese, policia e UNMIK-ut dhe KFOR-i kanë dalë menjëherë në vendin e ngjarjes, e kanë siguruar vendin ku dyshohej se kishte mjet shpërthyes dhe e kanë evakuuar popullatën. Oparacioni ka zgjatur deri rreth orës 7:30.

Mojzes dhe Prejzek u bënë apel qytetarëve që të mos dezinformojnë dhe të alarmojnë në mënyrë të rrejshme, sepse kjo vështirëson përpjekjet e KFOR-it dhe policisë për sigurinë e qytetarëve.

Zyrtarët e KFOR-it në Podujevës vlerësuan se, pavarësisht prej incidenteve që ndodhën ditët e fundit, situata e sigurisë në këtë komunë është e qetë.

 

 

Lutfi Haziri: Bojkoti nuk është interesin e askujt në Gjilan

 

Gjilan, 25 korrik - Kryetari i Kuvendit të Komunës së Gjilanit Lutfi Haziri është optimist se gjendja aktuale do të tejkalohet. Ai shprehu bindjen se këshilltarët e PDK-së do t'i japin fund bojkotit të punës së kuvendit dhe se mosmarrëveshje ndërmjet këshilltarëve të LDK-së do të tejkalohen.

"Bojkoti nuk është interes i askujt", theksoi Lutfi Haziri, duke u bërë apel këshilltarëve komunalë që luftën politike ta bëjnë brenda kuvendit dhe jo jashtë tij.

Ai theksoi se nuk do të lejojë që Kuvendi Komunal të bëhet vënd akuzash kundër njerëzve.

"Me ata që i kanë abuzuar ose i kanë tejkaluar autorizimet e veta le të merren organet e drejtësisë", theksoi Haziri.

 

 

Bashkim Rama vizitoi sot Gjilanin

 

Gjilan, 25 korrik 2003 - Shefi i Zyrës së Shqipërisë në Prishtinë, Bashkim Rama, vizitoi sot Gjilanin, ku u prit nga kryetari i kuvendit të komunës, Lufti Haziri.

Pas takimit, z. Rama deklaroi se Gjilani është një nga shembujt më të mirë për përparimin e bënë në Kosovë. Ai i vlerësoi arritjet e deritashme në Kosovë dhe shtoi se Kosova ka nevojë edhe më tutje për ndihmën e faktorit ndërkombëtar.

Z. Rama u angazhua për avancimin e procesit të kthimit të të zhvendosurve, pavarësisht nga përkatësia e tyre etnike, por theksoi se kthimi duhet të bëhet në mënyrë vullnetare.

"Askush nuk duhet të detyrohet për t'u kthyer, sepse detyrimi është shkelje e të drejtave të njeriut. Por, detyra juaj është që të krijoni kushtet e duhura për të gjithë ata që dëshironë të jetojnë në Kosovë", theksoi shefi i Zyrës së Shqipërisë në Prishtinë, Bashkim Rama.

Gjatë qëndrimit në Gjilan, z. Rama u njoh nga kryetari i kuvendit të komunës Lutfi Haziri me përparimet që janë bërë në këtë komunë.

Z. Haziri shprehu edhe interesimin për avancimin e bashkëpunimit të komunës së Gjilanit me qytetet e Shqipërisë.

 

 

Gjilani kërkon hapjen e një pike kufitare në Stançiq

 

Gjilan, 25 korrik 2003 - Gjilani do t'ia dërgojë së shpejti Qeverisë së Kosovës kërkesën për hapjen e një vendkalimi kufitar midis Kosovës e Maqedonisë, në fshatin Stançiq, bëri sot të ditur kryetari i kuvendit të komunës, Lutfi Haziri.

Ai tha është optimist që edhe Qeveria e Maqedonisë do ta përkrahë hapjen e portave të reja kufitare midis dy vendeve, sepse ato krijojnë më shumë mundësi për qarkullimin e njerëzve dhe të mallrave në rajon.

Z. Haziri tha se një vendkalim tjetër kufitar mund të hapet edhe në Myçibabë, ku pas vendosjes së policisë doganore do të mund të qarkullonin edhe mallrat. Tash për tash ruga Gjilan-Preshevë shfrytëzohet për transportin e udhëtarëve dhe biznes për paligjshëm, ka thënë Haziri.

Ai tha se procesi i bashkëpunimit rajonal inkurajohet edhe nga Pakti i Stabilitetit dhe Instituti për Bashkëpunim Lindje-Përendim. Përfaqësuesja e këtij instituti ka ardhur në këtë rajon për të bërë identifikimin e projekteve me interes të përbashkët për Gjilanin, Kumanovën dhe Preshevë.

 

 

Sot në Gjilan hapet manifestimi kulturor "Gurra popullore 2003"

 

Gjilan, 25 korrik 2003 - Manifestimi kulturor "Gurra popullore", i cili mbahet për herë të dytë në Gjilan, do fillojë sot me një parakalim nëpër qytet të shoqërive pjesëmarrëse.

Organizatori i manifestimit ka paralajmëruar pjesëmarrjen e shoqërive nga të gjitha trevat shqiptare. Për tri netë rresht, publiku i Gjilanit do të ketë mundësi të njihet me folklorin burimor të zonave të ndryshme shqiptare.

Pjesëmarrësve më të pëlqyer të këtij manifestimi triditësh do t'u ndahen shpëblime dhe mirënjohje.

 

 

AER mbështet një program për përmirësimin e kushteve të banimit në Kosovë

 

Prishtinë, 25 korrik 2003 - Agjencia Evropiane për Rindërtim (AER) do tëmbështesë realizimin e një programi për përmirësimin e kushteve të banimit në Kosovë, nëpërmjet kredive për qytetarë. Ndarja e kredive do të bëhet nepërmjet dy bankave komerciale kosovare: Kasabankës dhe Bankës Provate të Biznisit.

 

Secilës prej këtyre bankave u janë dhënë nga 1 milionë euro nga Fondi Evropian për Kosovën. Këto banka do të ndajnë edhe mjete nga fondet vetanake si shtesë për realizimin e këtij programi.

Vlera e kredive që do të ndahen në kuadrin e këtij programi do të jetë mësatarisht 4 mijë euro, ndërsa afati i kthimit do të jetë deri 5 vjet.

Marrëveshja kornizë për realizimin e këtij programi u nënshkrua mbrëmë në Prishtinë, nga përfaqësuesit e Agjencisë Evropiane për Rindërtim, Bankës Gjermane për Zhvillim (KFW), Kasabankës dhe Bankës Private të Biznisit.

Drejtori i Kasabankës, Milazim Abazi, deklaroi se kjo marëveshje ka rëndësi të veçantë, jo vetëm për përmirësimin e kushteve të jetesës së qytetarëve të Kosovës, por edhe për shkak se ajo shënon fillimin e bashkëpunimit të institucioneve ndërkombëtare financiare me sistemin bankar të Kosovës.

Ndërkaq, drejtori i Bankës Private të Biznisit, Islam Zeka, shprehu bindjen se kjo marrëveshje shënon fillimin e realizimit të projekteve të tjera për përkarahjen e zhvillimit ekonomik të Kosovës.

 

 

Sajmon Hajzellok: UNMIK-u do të jetë asnjanës në bisedimet shqiptaro-serbe

 

Prishtinë, 25 korrik 2003 - Drejtori për informim i UNMIK-ut, Sajmon Hajzellok, ka deklaruar se administrata e Kombave të Bashkuara do të jetë e paanshme në bisedimet midis Prishtinës e Beogradit.

"Në bisedat e ardhshme shqiptaro-serbe UNMIK-u nuk do të mbështesë asnjërën anë dhe, nëse bisedat për çështjet praktike nisen në drejtim të mirë do të mund të vazhdonin për statusin përfundimtar të Kosovës", ka thënë Hajzellok në një intervistë për TV "Most" të Zveçanit.

Sipas Hajzellokut, zgjidhja përfundimtare e statusit të Kosovës, pa i marrë parasysh platformat dhe dëshirën e të dyja palëve, do të jetë rezultat i kompromisit.

Sajmor Hajzellok ka thënë se gjatë gjashtë muajve të parë të këtij viti në Kosovë janë kthyer rreth 1.200 serbë. Ai ka vlerësuar se pohimet e Beogradit zyrtar për gjendjen e keqe të sigurisë në Kosovë po e dëmtojnë procesin e kthimit të të zhvendosurve.

 

 

Në dy shpërthimë që ndodhën mbrëmë në Mitrovicë humbi jetën një dhe u plagosën katër kalimtarë rasti

 

Mitrovicë, 25 korrik 2003 - Mbrëmë, në qendër të Mitrovicës, shpërthyen dy bomba dore, të cilat shkaktuan lënduan rëndë e lehtë pesë kalimtarë të rastit, njëri prej të cilëve, Kadir Rashiti 32-vjeçar, ndërroi jetë në spitalin maroken në Mitrovicë.

Kevin Krill, zëdhënës i policisë së UNMIK-ut në Mitrovicë, dhe Besim Hoti zëdhënës i Sërbimit Policor të Kosovës, konfirmuan se shpërthimi i bombave ndodhën rreth orës 21:20, afër shtabit rajonal të policisë.

Kirurgu kujdestar në Qendrën Mjekësore në Mitrovicë konfirmoi se rreth orës 21:30 në këtë qendër spitalore u dërguan pesë persona me lëndime të rënda e të të lehta trupore.

 

Gani Rashiti, 32-vjeçar, vdiq në këtë qendër spitalore nga plagët e marra, ndërsa Burim Tahiri, i lindur më 1981, dhe Xheladin Rama, i lindur më 1956, të cilët morën plagë më të lehta, u dërguan për shërim në Qendrën Emergjente në Prishtinë.

 

Ahmet Shatrolli, i lindur më 1980, dhe Feride Rama, e lindur 1966, të cilët kishin marrë lëndime të lehta trupore u lëshuan në shtëpi, pas trajtimit në këtë qendër spitalore.

Shpërthimi i bombave shkaktoi edhe dëmtimin e 4 automjeteve të policisë dhe dëme të tjera materiale.

Vendi ku ndodhën shpërthime dhe zona përreth u mbajtën për një kohë të gjatë të rrethuara nga forca të mëdha të policisë dhe të KFOR-it.

 

Tash për tash nuk dihen as motivet dhe as autorët e këtyre shpërthimeve. Dy persona të dyshuar lidhur me këto shpërthime po mbahen në arrest. Hetimet po vazhdojnë.

 

 

Çarls Brajshou: "Rezoluta 1244 e lë të hapur statusin e Kosovës"

 

Prishtinë, 25 korrik 2003 - Ushtruesi i detyrës së kryeadministratorit të Kosovës, Çarls Brajshou, ka reaguar ndaj një deklaratës së Nebojsha Çoviqit se Kosova duhet të mbetet pjesë e Serbisë.

Në një deklaratë të veçantë lidhur me këtë çështje, z. Brajshou ka theksuar se Rezoluta 1244 e KS të OKB-së e lë të hapur çështjen e statusit të Kosovës. Ai ka nënvizuar se vendimin për këtë do ta marrë KS i OKB-së në një kohë të përshtatshme.

"Statusi përfundimtar i Kosovës nuk do të vendoset as në Prishtinë e as në Beograd", thuhet në reagimin e z. Brajshou.

Në reagim thuhet se Kosova administrohet nga UNMIK-u, ndërsa për statusin përfundimtar të saj do të vendoset në Këshillin e Sigurimit të Organizatës së Kombeve të Bashkuara.

 

 

Peter Rondorf: "Bashkësia ndërkombëtare nuk ka dështuar në Mitrovicë"

 

Mitrovicë, 25 korrik 2003 - Në Mitrovicë janë bërë përparime të mëdha, gjatë muajve të fundit, dhe për këtë kanë merita institucionet vendore dhe ato ndërkombëtare.

 

Në veri të qytetit është vendosur administrata ndërkombëtare, është shënuar kthimi gradual i shqiptarëve në shtëpitë e tyre dhe ka liri më të madhe të lëvizjes. Këto komente i bëri shefi i Zyrës gjermane në Kosovë, Peter Rondorf, pas një takimi me Faruk Spahinë, kryetarin e Asamblesë komunale të Mitrovicës.

Në kontekst të përparimeve që janë arritur në Mitrovicë, Rondorf përmendi largimin e "rojave të urës" dhe patrullimin e SHPK-së në veri të qytetit, që sipas tij, janë momente inkurajuese për integrimin e komuniteteve në këtë qytet.

Rondorf tha se nuk duhet të ketë kushte për fillimin e bisedimeve mes Prishtinës dhe Beogradit, por ato duhet të fillojnë sa më shpejt, në mënyrë që të zgjidhen shumë çështje praktike.

Ndërkaq, kryetari i Asamblesë komunale Faruk Spahia ka ngritur shqetësimin për shitjen e pronave të shqiptarëve në pjesën veriore të Mitrovicës, të cilat ka dyshime se po blehen nga një fond i posaçëm i Qeverisë së Serbisë.

Ndërkaq, Peter Rondorf tha se nëse konstatohet se kjo gjë ndodh në mënyrë sistematike, për këtë çështje duhet të bisedohet me Beogradin.

 

 

Në Çikatovë të Vjetër ka filluar zhvarrimi i 117 kufomave

 

Drenas, 25 korrik 2003 - Në fshatin Çikatovë e Vjetër të komunës së Drenasit ka filluar zhvarrimi i 117 kufomave, me qëllim të riidentifikimit.

Shefi i Zyrës së UNMIK-ut për Persona të Zhdukur dhe Mjekësi Ligjore, Hoze Pablo Barajbar, ka njoftuar se deri më tash janë zhvarrosur 52 kufoma. Sipas tij të gjithë trupat do të dërgohen në morgun e Rahovecit ku do të bëhet identifikimi i tyre, nëpërmjet analizës së ADN-së.

Familjarët kanë shpehur dyshime në identifikimin e kufomave, të kryer gjatë vitit 1999 nga patologët belgë dhe të Tribunalit të Hagës.

 

 

Përmirësohet situata energjetike në Kosovë - redukimet do të jenë 5 me rrymë dhe 1 pa të

 

Prishtinë, 25 korrik 2003 - Dje pasdite është riaktivizuar Blloku i Dytë i Termocentralit "Kosova B", kështuqë situata energjetike në Kosovë është përmirësuar.

 

Megjithkëtë, pas kolapsit të sistemit energjetik të Kosovës, prodhimi i energjisë në Kosovë nuk përmbush plotësisht nevojat e konsumatorëve, prandaj furnizimi me energji do të bëhet me reduktime. Tash për tash, reduktimet bëhen sipas orarit: 5 orë me energji, 1 orë pa të.

Zëdhënësja e KEK-it, Beti Davson, ka bërë të ditur se shkaktar i kolapsit të sistemit energjetik të Kosovës dhe të vendeve të rajonit ishte një defekt në një largpërçues prej 400 kilovoltësh në Maqedoni.

 

 

Erik Mekinli thotë se PTK është pronë e AKM-së

 

Prishtinë, 25 korrik 2003 - Ushtruesi i detyrës së drejtorit të përgjithshëm të Post-Telekomit të Kosovës, Erik Mekinli, deklaroi se kjo kompani administrohet nga Agjencia Kosovare e Mirëbesimit. Ai tha se kjo kompani nuk i përgjigjet Ministrisë së Transportit e Postë Telekomunikacionit apo Qeverisë së Kosovës, por vetëm Agjencisë Kosovare të Mirëbesimit.

Z. Mekinli premtoi më shumë transparencë për punën e kësaj ndërmarrje publike dhe përmirësimin e imazhit të saj. Ai tha se gjendja me kartela mbushëse do të përmirësohet, pasi që është arritur marrëveshja me një kompani të madhe perëndimore për këtë çështje.

 

 

U largua nga Kosova aeroplani i fundit me eprorë të KFOR-it rus

 

Prishtinë, 25 korrik 2003 - Paqeruajtësit e fundit rusë në Kosovë u larguan dje me aeroplan në drejtim të Moskës. Me këtë aeroplan udhëtuan komandanti dhe 50 oficerë e nëpunës të shtabit të KFOR-it rus. Largimi i tyre shënon përfundimin e misionit të paqeruajtësve rusë në Kosovë dhe në Ballkan.

 

 

Policia e Malit të Zi mori edhe formalisht kontrollin e kufijve me Kosovën

 

Podgoricë, 25 korrik 2003 - Policia malazeze e ka marrë edhe formalisht kontrollin e kufijve të Malit të Zi me Kosovën. Kjo shënon fundin e patrullimit të ushtrisë serbo-malazeze. Ky hap është pjesë e marrëveshjes për krijimin e Unionit Serbi - Mal i Zi, të arritur me ndërmjetësimin e Bashkimit Evropian.

Autoritetet malazeze kanë thënë se kontrolli i kufirmit të Malit të Zi me Kosovën do të bëhet në koordinim me autoritetet ndërkombëtare në Kosovë.

 

 

Kryetari i KK të Preshevës Skënder Destani ka dhënë dorëheqje

 

Preshevë, 25 korrik 2003 - Kryetari i Kuvendit komunal të Preshevës, Skënder Destani, ka dhënë dje dorëheqje nga ky post, për shkak të mospajtimeve me prefektin Riza Halimin.

Dorëheqja e z. Destani u bë në mbledhjen e djeshme të Kuvendit Komunal, e cila u ndërpre, pas polemikave dhe akuzave të ndërsjella midis tij e z. Halimi.

 

 

Pauell shpreh mbështetje për reformat në Serbi e Mal të Zi

 

Uashington, 25 korrik 2003 - Sekretari amerikan i Shtetit, Kolin Pauell, u takua të enjten në Uashington me ministrin e Jashtëm të Unionit Serbi-Mal i Zi, Goran Svillonoviq, dhe me Kryeministrin e Serbisë Zoran Zhivkoviq.

Pas takimit, në një konferencë të përbashkët shtypi, zoti Pauell shprehu mbështetje për zbatimin e reformave politike e ekonomike në Serni e Mal të Zi dhe për përfshirjen e këtij vendi në institucionet evro-atlantike.

"Unë urova kryeministrin dhe ministrin e jashtëm për punën që kanë bërë në zbatimin e reformave të themelta dhe për mbështetjen që kanë arritur të sigurojnë nga populli i tyre. Ne i falenderojmë ata për bashkëpunimin e Serbisë në luftë kundër terrorizmit dhe në çështje të tjera me interes të përbashkët", tha z. Pauell.

Dy zyrtarët e Beogradit u takuan edhe me zyrtarin e Departamentit të Shtetit për çështjet e krimeve të luftës, ambasadorin Pier -Riçard Prosper, ku u bisedua mbi ndjekjen e personave të akuzuar për krime lufte nga Gjykata e Hagës.

 

 

Forcat amerikane kanë arrestuar sot 16 persona në Bagdad

 

Bagdad, 25 korrik 2003 – Forcat amerikane në Irak i kanë arrestuar sot (e premte), para agimit, 16 persona në veri të Bagdadit. Dy prej tyre janë të dyshimtë për vrasjen në pritë me bomba dhe me armë të vogla të një ushtari amerikan dhe të përkthyesit irakian në autostradën e kryeqytetit, të hënën e kaluar.

Rojter njofton se në këtë operacion kanë marrë pjesë mbi 100 trupa, të cilat e kishin rrethuar kompleksin e shtëpive ku ata flenin të arrestuarit.

 

 

Të paktën 11 civilë janë vrarë në kuartin diplomatik në Monrovia

 

Monrovia, 25 korrik 2003 – Të paktën 11 civilë janë vrarë sot (e premte) në një sulm në një kuart diplomatik në kryeqytetin liberian, Monrovia, ku ndodhet edhe ambasada amerikane, njofton AFP. Njoftohet se të paktën një duzinë predhash është hedhur në këtë lokacion, ku gjenden edhe ambasadat britanike dhe franceze.

 

 

Një ushtar izraelit e ka vrarë një fëmijë palestinez pesëvjeçar dhe ka plagosur dy motrat e tij

 

Xhenin, 25 korrik 2003 – Një ushtar izraelit ka vrarë sot (e premte) një fëmijë pesëvjeçar palestinez dhe ka plagosur dy motrat e tij, kur ka hapur zjarr në automjetin ku gjendeshin viktimat, në një pikë kontrolli në fshatin Barta, në jugperëndim të qytetit Xhenin, në Bregun Perëndimor, njofton BBCnews.

Zëdhënësi ushtarak izraelit ka thënë se ushtari ka hapur zjarr në automjet gabimisht. Ai ka shtuar se hetimet për këtë incident kanë filluar.

 

 

Në luftimet e sotme në Nepal është vrarë një kryengritës maoist

 

Katmandu, 25 korrik 2003 - Në luftimet e sotme (e premte) me forcat e sigurimit të Nepalit është vrarë një kryengritës maoist, ndërsa në radhët e forcave qeveritare nuk ka pasur viktima, njofton BBCnews.

 

Luftimet kanë ndodhur në një kohë kur po shtohen dyshimet për rifillimin e bisedimeve të ndërprera paqësore, për t'i dhënë fund kryengritjes së përgjakshme shtëtëvjeçare, gjatë të cilës humbën jetën 7 miijë njerëz. Maoistët ende nuk e kanë komentuar incidentin.

 

 

Një bombë ka shpërthyer pranë një gjykate në Spanjë dhe ka plagosur një person

 

Madrid, 25 korrik 2003 – Një bombë ka shpërthyer sot (e premte) pranë një gjykate në Spanjën veriore dhe ka plagosur një person që po kalonte andej pari me kombi, njofton Rojter.

Policia ka thënë se shpërthimi ka ndodhur vetëm pak kohë pas një paralajmërimi me telefon, të bërë në emër të grupit seperatist ETA.

Bomba ishte vendosur tek portat e gjykatës në Estella Navare, provincës për të cilën ETA thotë se i përket shtetit të tyre bask.

 

 

Një burg palestinez është goditur me granatë - 10 të burgosur janë plagosur

 

Gaza, 25 korrik 2003 – Një granatë është shkrehur sot (e premte) në zyrën e kushëririt të presidentit palestinez, Jaser Arafat, por ajo e ka dështuar cakun dhe e ka qëlluar burgun që gjendet në afërsi.

 

Me këtë rast janë plagosur 10 të burgosur, njofton Rojter, duke iu referuar një burimi të sigurimit palestinez.