Lajme

E enjte 24 korrik 2003

Përmbajtja:

• Zyra e kryeparlamentarit dhe ajo e kryeministrit kanë qëndrime të ndryshme lidhur me platformën eventuale të bisedimeve me Beogradin

• Administrata e OKB-së në Kosovë e ka njoftuar Tribunalin e Hagës se nuk mund të garantojë që Limaj nuk do të ikte

• Jakup Krasniqi e cilëson të papranueshme letrën e Departamentit të Drejtësisë së UNMIK-ut drejtuar Tribunalit të Hagës

• Gjenerali Daniel Kif tha se KFOR-i nuk do të lejojë veprimet e ekstremistëve në Kosovë

• Gjenerali Bertuçi thotë se nuk ka prova për prani të AKSH-së në rajonin e Mitrovicës

• BSPK-së planifikon rikualifikimin e punëtorëve që do të mbeten pa punë, pas privatizimit të ndërmarrjeve

• Reduktime të mëdha të energjisë elektrike - 2 orë me energji, 4 orë pa energji

• Podujevë: Zjarret nga pakujdesia djegin fushat me të lashta dhe pyjet

• U larguan nga Kosova paqeruajtësit e fundit rusë

• Në komunën e Dardanës janë djegur më shumë se 60 hektarë pyje

• Shqipëria nënshkroi tri marrëveshje më Bankën Botërore

• Presidenti Moisiu dekretoi dy ministrat e rinj të Qeverisë së Shqipërisë

• Ali Ahmeti tha se Marrëveshja e Ohrit ishte një kompromis ku secila palë fitoi dhe humbi diçka

• Kryetari i BDI-së, Ali Ahmeti, është takuar mbrëmë edhe me sekretarin e përgjithshëm të NATO-s, Lordin Xhorxh Robertson.

• Tajfuni ka shkaktuar vdekjen e 10 njerëzve dhe ka shkatërruar të lashtat në Filipine

• Një ligjvënës i Nju Jorkut është qëlluar për vdekje nga rivali i tij politik

• Një burrë nga Teksasi ka vrarë dy kolege dhe ka plagosur një tjetër e pastaj ka bërë vetëvrasje

• Xhorxh Bush: "Ish-regjimi irakian ka marrë fund"

• Pauell: "Të forcohet pozita politike e kryeministrit Abas"

• Tre ushtarë amerikanë janë vrarë sot në veri të Irakut

• Hetime ndaj prokurorëve italianë

Zyra e kryeparlamentarit dhe ajo e kryeministrit kanë qëndrime të ndryshme lidhur me platformën eventuale të bisedimeve me Beogradin

 

Prishtinë, 24 korrik 2003 - Zyra e Kryeministrit të Kosovës konsideron se Kuvendi i Kosovës duhet të miratojë një platformë pata fillimit të bisedimeve midis Prishtinës e Beogradit për çështje praktike.

Sipas Rexhep Hotit, këshilltar i kryeministrit Bajram Rexhepi, miratimi i platformës është i nevojshëm për shkak se pas çështjeve praktike do të bisedohet për çështje të tjera, duke përfshirë edhe çështjen e statusit përfundimtar të Kosovës.

Por, zyra e kryetarit të Kuvendit të Kosovës thotë se një platformë të tillë nuk ka nevojë të miratohet në kuvend, por mund ta bëjë këtë në qoftë se partitë politike e kërkojnë këtë.

Ramush Tahiri, këshilltar i kryetarit të kuvendit, vlerëson se miratimi në kuvend i platformës së bisedimeve nuk është i domosdoshëm, sepse Kuvendi duhet të miratojë marrëveshjet që do të dalin nga bisedimet.

 

 

Administrata e OKB-së në Kosovë e ka njoftuar Tribunalin e Hagës se nuk mund të garantojë që Limaj nuk do të ikte

 

Prishtinë, 24 korrik 2003 - Administrata ndërkombëtare në Kosovë nuk mund të japë garanca për lirimin nga baraburgimi të Fatmir Limajt.

Në letrën e kryesuesit të Departamentit të Drejtësisë të UNMIK-ut, Poll Kofi, dërguar Tribunalit të Hagës, thuhet se UNMIK-u nuk mund të parandalojë arratisjen e z. Limaj apo kërcënimin e dëshmitarëve të mundshëm, në rast se ai kthehet në Kosovë.

"UNMIK-u është i paaftë të japë garanaca se Limaj do të jetë në dispozicion për pjesëmarrje në seanca tjera gjyqësore në Hagë, nëse lirohet përkohësisht", thuhet në letër.

Sipas kryesuesit të Departamentit të Drejtësisë të UNMIK-ut, rreziku për arratisjen e z. Limaj nga Kosova është shumë i madh, për shkak se UNMIK-u ka mundësi të kufizuara për mbikëqyrjen e territorit të Kosovës, edhe për shkak se z. Limaj ka mbështetje të konsiderueshme tek banorët.

 

 

Jakup Krasniqi e cilëson të papranueshme letrën e Departamentit të Drejtësisë së UNMIK-ut drejtuar Tribunalit të Hagës

 

Prishtinë, 24 korrik 2003 - Ushtruesi i detyrës së Kryeministrit të Kosovës, Jakup Krasniqi, e cilësoi të papranueshme letrën e Departamentit të Drejtësisë së UNMIK-ut drejtuar Tribunalit të Hagës lidhur me ratin e Fatmnir Limajt.

 

Ai deklaroi se ky departament duhet të kishte parasysh rrethanat në të cilat ishin arrestuar Fatmnir Limaj dhe të akuzuarit tjerë.

"Fatmir Limaj dhe të akuzuarit tjerë, po të njoftoheshin me kohë, vullnetarisht do të dorëzoheshin në Tribunalin e Hagës", deklaroi z. Krasniqi.

Sipas tij, letra e Deprtamentit të Drejtësisë të UNMIK-ut mund të ketë pasoja në raportet midis UNMIK-ut dhe Qeverisë së Kosovës.

 

 

Gjenerali Daniel Kif tha se KFOR-i nuk do të lejojë veprimet e ekstremistëve në Kosovë

 

Bonstill, Ferizaj, 24 korrik 2003 - Komandanti i deritashëm i Brigadës Shumëkombëshe të Lindjes, gjenerali Daniel Kif, ka deklaruar se forcat paqeruajtëse dhe SHPK-ja nuk do të lejojnë veprimin e ekstremistëve në Kosovë.

Gjenerali Kif tha se që nga vendosja e forcave ndërkombëtare në Kosovë është shënuar një përparim i madh, ndërkaq KFOR-i vazhdon të punojë për krijimin e një mjedis të sigurtë që u mundëson institucioneve demokratike të Kosovës të marrin gjërat në duart e tyre. Por, ai tha se disa kriminelë dhe ekstremistë po punojnë për të kundërtën.

Gjenerali Kif dënoi ashpër sulmet dhe shpërthimet e ditëve të fundit në Kosovë, duke vlerësuar se ato cenojnë paqen e sigurinë dhe tentojnë ta shkatërrojnë progresin e arritur në Kosovë.

"Aktet ekstremiste, si ato të javës së kaluar, dhe sulmet kundër ndërtesës së Misionit të UNMIK-ut janë veprimtari që kërcënojnë sigurinë dhe dëmtojnë përparimin. Këto grupe të dhunshme mendojnë se mund t'i arrijnë qëllimet e tyre nëpërmjet frikësimit me dhunë", tha gjenerali Kif.

Ai theksoi se KFOR-i është i gatshëm të përballet me çdo kërcënim të mundshëm për paqen dhe qëndrueshmërinë në Kosovë, ndërsa qytetarëve të Kosovës u bëri thirrje që ta lënë dhunën e urrejtjen dhe të punojnë me forcat paqeruajtëse dhe me komunitetin ndërkombëtar.

Gjenerali Kif vlerësoi se, me gjithë problemet që janë paraqitur, situara në kufijt e Kosovës me Serbinë dhe me Maqedoninë është e qetë. Ai mohoi të ketë pasur lëvizje të forcave serbe të sigurisë brenda kufirit të Kosovës. Ai tha se forcat amerikane e kontrollojnë nga afër vijën kufitare.

Komandanri i deritashëm i Brigadës Shumëkombëshe të Lindjes, gjenerali Daniel Kif, tha se UNMIK-u po bën punë të mirë për të siguruar lëvizjen e lirë të banorëve të fshatit Debëllde, pronat e të cilëve kanë mbetur në pjesën tjetër të kufirit, pas marrëveshjes ndërmjet Beogradit dhe Shkupit për vijën kufitare që përfshin edhe kufirin ndërmjet Kosovës e Maqedonisë.

 

 

Gjenerali Bertuçi thotë se nuk ka prova për prani të AKSH-së në rajonin e Mitrovicës

 

Mitrovicë, 24 korrik 2003 - Komandanti i Brigadës Shumkombëshe Verilindje, gjenerali francez Mark Bertuçi, ka deklaruar se nuk ka prova që në Rajonin e Mitrovicës është e pranishme Armata Kombëtare Shqiptare apo ndonjë organizatë tjetër terroriste.

Në një intervistë për Radion "Blu skye", gjenerali Bertuçi ka thënë se Mitrovica mbetet e ndarë më shumë në mendjen e njerëzve sesa në terren. Sipas tij, kjo ndodh nga frika e bashkëjetesës, e cila është e pranishme te të dyja etnitetet.

 

Duke folur për shqetësimet e fundit të opinionit lidhur me dukurinë e blerjes së pronave të shqiptarëve në pjesën veriore të Mitrovicës nga Qeveria e Serbisë, gjenerali Bartuçi i ka cilësuar si çështje politike që nuk do të reflektohen në çështjen e sigurisë.

 

 

BSPK-së planifikon rikualifikimin e punëtorëve që do të mbeten pa punë, pas privatizimit të ndërmarrjeve

 

Gjilan, 24 korrik 2003 - Kryetari i Bashkimit të Sindikatave të Pavarura të Kosovës (BSPK), Bahri Shabani, me bashkëpunëtorë vizitoi sot komunën e Gjilanit, për të kërkuar përkrahjen e pushtetit lokal për koordinimin e aktiviteteve lidhur me procesin e privatizimit të ndërmarrjeve shoqërore.

Gjatë takimit me kryetarin Lutfi Haziri dhe me përfaqësues të tjerë të komunës së Gjilanit, z. Shabani tha se BSPK ka planifikuar që, në bashkëpunim me zyrat rajonale të punësimit, të organizojë edhe kurse për riaftësimin e punëtorëve që do të mbeten pa punë pas privatizimit të ndërmarrjeve.

 

Ai u shpreh i pakënaqur me çmimin e shitjes së 6 ndërmarrjeve të para dhe vlerësoi se Kosova do të pësojë shumë, nëse edhe ndërmarrjet tjera do të shiten me çmime kaq të ulëta.

Kryetari i komunës së Gjilanit, Lutfi Haziri, tha se pushteti komunal në Kosovë ka vërejtje në punën e Agjencisë Kosovare të Mirëbesimit dhe në qëndrimin e saj ndaj pronave komunale.

Të dy palët u pajtuan se zhvillimi i ekonomisë së Kosovës dhe hapja e vendeve të reja të punës është qëllim i privatizimit të ndërmarrjeve shoqërore në Kosovë, por kërkuan që procesi i privatizimit të jetë plotësisht transparent.

 

 

Reduktime të mëdha të energjisë elektrike - 2 orë me energji, 4 orë pa energji

 

Prishtinë, 24 korrik 2003 - Sot në Kosovë po mbretëron situatë e rëndë energjetike. Reduktimet e energjisë po bëhen sipas orarit: 2 orë me energji, 4 orë pa energji.

Dispeçeri kujdestar i KEK-ut bëri të ditur se furnizimi me energji pritet të përmirësohet me riaktivizimin e Termocentrali "Kosova B". Riaktivizimi i këtij termocentrali pritet të behet gjatë ditës.

Tash për tash, funksionojnë vetëm dy blloqe të Termocentralit "Kosova A", A1 dhe A4, të cilat prodhojnë nga 120 megavatë orë.

 

 

Podujevë: Zjarret nga pakujdesia djegin fushat me të lashta dhe pyjet

 

Podujevë, 24 korrik 2003 (QIK) – Drejtoria për Mbrojtje Civile dhe Emergjencë e komunës së Podujevës njoftoi sot se zjarre të shumta i kanë përfshirë sipërfaqet pyjore dhe me të lashta, nga pakujdesia e njerëzve dhe nga vapa e madhe që po mbretëron këto ditë.

Ushtrusëi i detyrës së drejtorit të kësaj drejtorie, Bajram Gashi, bëri të ditur se 20 hektarë sipërfaqe janë dëmtuar nga zjarri në fshatin Bradash. Ai tha se ekipi i zjarrfikësve ka intervenuar dje për fikjen e zjarrit në pyjet e fshatit Dumnicë, në brezin kufitar Kosovë-Serbi.

Z. Gashi njoftoi se ekipi i zjarrfikësve, në bashkëpunim me Zyrën për alarmim të kësaj drejtorie dhe me SHPK-në, po koordinojnë aktivitetet për lokalizimin e zjarreve, të cilat po rrezikojnë edhe shtëpitë.

Drejtoria për Mbrojtje Civile dhe Emergjencë e komunës së Podujevës u bën apel të gjithë qytetarët që të kenë kujdes, sepse mundësia e përhapjes së zjarreve këto ditë të nxehta është shumë e madhe.

 

 

U larguan nga Kosova paqeruajtësit e fundit rusë

 

Prishtinë, 24 korrik 2003 - Dje u largua nga Kosova grupi i fundit i pjesëtarëve rusë të KFOR-it. Ushtarët, bashkë me pajisjet e tyre, u larguan me tren në drejtim të Moskës. Një zyrtar rus ka thënë se sot do të kthehen edhe aeroplanët ushtarakë rusë që ndodheshin në Kosovë.

Rusia ka vendosur të tërheqë ushtarët e vet nga forca paqeruajtëse ndërkombëre në Kosovë për shkak të shpenzimeve të mëdha.

 

 

Në komunën e Dardanës janë djegur më shumë se 60 hektarë pyje

 

Dardanë, 24 korrik 2003 - Mbi 60 hektarë pyje janë djegur në komunën e Dardanës, në zjarrin që i ka përfshirë sipërfaqet pyjore prej periferisë së qytetit deri në fshatin Kololleq, ka njoftuar drejtori i Drejtorisë për Mbrojtje Civile dhe Gatishmëri Emergjente në Dardanë, Xhevat Leci.

Sipas tij, pas një aksioni të Bridagës së Zjarrfikësve, i cili ka zgjatur më shumë se tetë orë, është arritur që zjarri të lokalizohet në tërësi.

 

 

Shqipëria nënshkroi tri marrëveshje më Bankën Botërore

 

Tiranë, 24 korrik 2003 - Qeveria e Shqipërisë nënshkroi sot tri marrëveshje me Bankën Botërore. Marrëveshjet u nënshkruan nga kryeministri, Fatos Nano, e disa ministra dhe nga përfaqësuesi i Bankës Botërore, Skantije.

Këto marrëveshje përfshijnë një ndihmë prej 46 milionë dollarësh, për realizimin e projekte për përmirësimin e infrastrukturës, për punët publike dhe për reduktimin e varfërisë, të cilat janë miratuar muajin e kaluar nga bordi i drejtorëve të Bankës Botërore.

Kryeministri Nano deklaroi me rastin e nënshkrimit se këto marrëveshje dëshmojnë se marrëdhëniet e Shqipërisë me Bankën Botërore janë konsoliduar.

 

 

Presidenti Moisiu dekretoi dy ministrat e rinj të Qeverisë së Shqipërisë

 

Tiranë, 24 korrik 2003 - Presidenti i Shqipërisë, Alfred Moisiu, i ka dekretuar sot dy ministrat e rinj të kabinetit qeveritar të Fatos Nanos - Marko Bellon, ministër i Jashtëm, dhe Ermelinda Meksin, zëvendëskryeministre dhe ministre e Shtetit për Integrim.

Dekreti i presidentit Moisiu duhet të miratohet në Kuvendin e Shqipërisë. Deri më tash është bërë i njohur qëndrimi i të gjitha palëve në kuvend, me përjashtim të përkrahësve të Ilir Metës.

 

 

Ali Ahmeti tha se Marrëveshja e Ohrit ishte një kompromis ku secila palë fitoi dhe humbi diçka

 

Bruksel, 24 korrik 2003 - Kryetari i Bashkimit Demokratik për Integrim (BDI), Ali Ahmeti, është takuar dje pasdite në Bruksel me shefin e diplomacisë të BE-së, Havier Solana. Nga Brukseli njoftohet se Marrëveshja e Ohrit dhe përfshirja e shqiptarëve në administratën shtetërore dhe në strukturat ushtarake e të policisë kanë qenë në qendër të bisedimeve.

Z. Solana i ka shprehur z. Ahmeti mirënjohje për përpjekjet e tij që të jetohet Marrëveshja e Ohrit dhe për integrimin e shqiptarëve në shoqërinë maqedonase. Zëdhënësja e tij, Kristina Galak, tha se z. Solana e ka cilësuar Ali Ahmetin si figurë pragmatike që po punon për integrimin e shoqërisë shqiptare në jetën e shtetit maqedonas.

 

Ajo bëri të ditur se z. Solana i ka premtuar z. Ahmeti përkrahjen e vazhdueshme të BE-së për implementimin e plotë të Marrëveshjes së Ohrit, duke ndihmuar edhe aftësimin e ekspertëve të fushave të ndryshme, si edhe në reformimin e ushtrisë, aparatit shtetëror dhe decentralizimin e pushtetit komunal.

Kryetari i BDI-së, Ali Ahmeti, është takuar mbrëmë edhe me sekretarin e përgjithshëm të NATO-s, Lordin Xhorxh Robertson.

 

 

Tajfuni ka shkaktuar vdekjen e 10 njerëzve dhe ka shkatërruar të lashtat në Filipine

 

Hong Kong, 24 korrik 2003 – Një nga tajfunët më të fuqishëm, Imbo, ka përfshirë bregdetin e provincës Guangdong, në Kinën jugore, dhe Vietnamin. Ky tajfun ka goditur javën e kaluar Filipinet dhe Hong Kongun. Në Filipene kanë vdekur 10 njerëz dhe janë shkaktuar dëme në vlerë prej miliona dollarësh. Hong Kongu ka shpëtuar më lehtë, me vetëm 11 të lënduar.

 

 

Një ligjvënës i Nju Jorkut është qëlluar për vdekje nga rivali i tij politik

 

Nju Jork, 24 korrik 2003 – Një ligjvënës i Nju Jorkut është qëlluar për vdekje me armë zjarri nga rivali i tij politik, kurse dorasi është vrarë nga policia. Vrasja ka ndodhur dje, gjatë një takimi në Bashkinë e qytetit, njofton Rojter.

 

Njoftohet se vrasësi Otiniel Askju e ka nxjerrë revolen në ballkon të katit të dytë të Dhomës së Bashkisë, e cila është një nga ndërtesat më të ruajtura në qytet, dhe e ka vrarë këshilltarin Xhejms Dejvis, 41-vjeçar, i cili, gjithashtu, gjendej në ballkon.

Policia ka thënë se Askju, 31-vjeçar, kishte hyrë në Bashkinë e Qytetit si musafir i Dejvisit, andaj nuk ka qenë i detyruar të kalojë nëpër detektorin e metaleve.

 

 

Një burrë nga Teksasi ka vrarë dy kolege dhe ka plagosur një tjetër e pastaj ka bërë vetëvrasje

 

San Antonio, 24 korrik 2003 – Një burrë nga Teksasi dje ka hapur zjarr në tri kolege të tij, dy prej të cilave janë vrarë, kurse e treta është plagosur, e pastaj e ka vrarë edhe veten, gjatë ndjekjes nga policia, njofton Rojter.

Gratë ishin duke qëndruar në zyren e tyre, kur dorasi ka hyrë dhe ka filluar të shtijë me revole. Motivi ende nuk dihet.

 

 

Xhorxh Bush: "Ish-regjimi irakian ka marrë fund"

 

Uashington, 24 korrik 2003 - Presidenti amerikan Xhorxh Bush tha se vrasja e dy djemve të Sadam Huseinit është shenjë e qartë se regjimi i mëparshëm irakian ka marrë fund përgjithmonë.

Presidenti Bush tha se djemtë e Sadamit, Udai dhe Kusai, mbanin përgjegjësinë për torturimin dhe vrasjen e një numri të madh irakianësh.

I shoqëruar nga sekretari i mbrojtjes, Donald Ramsfeld, dhe nga kryeadministratori amerikan në Irak, Paul Bremer, Presidenti Bush tha se ata pak anëtarë të ish-regjimit të Sadam Huseinit që ndodhen ende në Irak, do të ndiqen dhe do të mposhten.

Zoti Bremer tha se vrasja e Udait dhe Kusait përbën një hap pozitiv në rrugën e Irakut drejt demokracisë.

Ndërkaq, zoti Ramsfeld tha se Shtetet e Bashkuara do të publikojnë së shpejti fotografitë e trupave të Udait dhe Kusait, për të dëshmuar se ata janë vrarë.

 

 

Pauell: "Të forcohet pozita politike e kryeministrit Abas"

 

Uashington, 24 korrik 2003 - Sekretari amerikan i Shtetit, Kolin Pauell, u bëri dje thirrje izraelitëve dhe palestinezëve që të bëjnë më shumë për të çuar përpara planin e paqes për Lindjen e Mesme dhe për të forcuar pozitën politike të kryeministrit palestinez, Mahmud Abas.

Sekretari Pauell, pas takimit me ministrin e jashtëm izraelit, Silvan Shalom, shprehu kënaqësinë për hapat e ndërmarrë nga të dyja palët për zbatimin e planit të paqes.

 

Mirëpo, ai tha se duhet të bëhet shumë më tepër, përfshirë edhe lirimin e një numri më të madh të burgosurish palestinezë nga burgjet izraelite, gjë që duhet të forcojë pozitën e kryeministrit palestinez Mahmud Abas "Objektivi ynë është forcimi i pozitës së tij (Abasit)", theksoi Pauell.

Ndërkaq, zoti Shalom tha se është koha që udhëheqja palestineze të marrë vendimin strategjik për shkatërrimin e infrastrukturës terroriste dhe të mos i lejojë ato të përfitojnë nga armëpushimi.

 

 

Tre ushtarë amerikanë janë vrarë sot në veri të Irakut

 

Bagdad, 24 korrik 2003 - Një zëdhënës i trupave amerikane tha se tre ushtarë amerikanë janë vrarë sot (e enjte), në një sulm në veri të Irakut.

Prej të martes, kur u vranë djemtë e Sadam Huseinit, Udai dhe Kusai, në Irak janë vrarë pesë ushtarë amerikanë.

 

 

Hetime ndaj prokurorëve italianë

 

Milano, 24 korrik 2003 - Pas procesit të dështuar kundër kryeministrit Silvio Berlusconi, i cili akuzohej për korrupsion, drejtësia italiane po bën hetime për shpërdorim detyre ndaj prokurorëve.

Dy dhomat e parlamentit italian miratuan dy ligje, të cilat bëjnë të mundur që kryeministri Berlusconi të mbajë tri qendra televizive kombëtare. Opozita kundërshtoi miratimin e këtyre ligjeve.

Copyright©2000-2003 Trepca.net - Të gjitha të  drejtat e rezervuara.