E mërkure 23 korrik 2003


	23.07.2003 - Trepca.net
	Lajme
	E mërkure 23 korrik 2003

	Përmbajtja: KFOR-i dhe UNMIK-u dënuan ashpër sulmet në Prishtinë KFOR-i i ka hedhur poshtë spekulimet serbe rreth djegies së dy shtëpive të serbëve në Prizren Autoritetet serbe ua dorëzuan zyrtarëve të UNMIK-ut 43 kufoma të shqiptarëve PTK nxori në treg kartela mbushëse prej 10 eurosh Eksperti gjerman i të drejtës ndërkombëtare Johan Frowein vizitoi Gjilanin Banorët e Gjilanit ballfaqohen me mungesë të ujit të pijshëm Anan e propozon ish-kryeministrin finlandez Harri Holker për shef të UNMIK-ut Dr. Alush A. Gashi: "Kemi mbështetje të fuqishme për një Kosovë të pavarur e demokratike" Oliver Ivanoviq: "Nuk jemi të gatshëm të heqim dorë nga Kosova Identifikohen edhe 21 kufoma të masakrës së Izbicës në Kosovë Zef Morina priti përfaqësuesit e Federatës së Kryqit të Kuq Ndërkombëtar dhe të Kryqit të Kuq britanik Kryesitë e degëve të FR të LDK-së në Prishtinë angazhonen për aktivitete të përbashkëta KMDLNJ: Shpërthimet e fundit në Prishtinë janë goditje e rëndë kundër sigurisë dhe qetësisë në Kosovë Deklaratat e zyrtarëve serbë për përfshirjen e Kosovës në Kushtetutën e Unionit Serbi - Mali i Zi janë të paarsyeshme Ka filluar aksioni për mbylljen e barnatoreve të palicencuara Kryesia e PS kandidoi për zëvendëskryeministër dhe ministër për integrimin shtetëror Ermelinda Meksin, për ministër të Jashtëm Marko Bellon Presidenti serbo-malazez gjatë takimit në Bruksel me Solanën dhe Prodin ka biseduar edhe për Kosovën Çoviq thotë se Kosova është duke i marrë të gjitha atributet e shtetit Temperaturat e larta shkaktojnë zjarre në pyjet e Shqipërisë Ushtria e re afgane ka filluar operacionet luftarake Një mesazh i incizuar që i atribuohet Sadam Huseinit bën ftesë për rezistencë ndaj trupave amerikane Dy informatorët irakianë që treguan vendndodhjen e djemve të Sadamit do të marrin 30 milionë dollarë shpërblim Në dy sulme të veçanta janë vrarë 2 ushtarë amerikanë dhe janë plagosur të paktën 8 të tjerë Fotoreporterja kanadeze, e cila vdiq nga torturat në një burg të Teheranit, është varrosur në Iran Konfirmohet vrasja e djemve të Sadam Huseinit Presidenti Bush i kënaqur me operacionin kundjër djemve të Sadamit Temperatura të larta, thatësi dhe zjarre në vendet e Evropës Rebelët liberianë shpallën armëpushim 15 të vdekur dhe qindra plagosur në një tërmet në jugperëndim të Kinës Deri në fund të vitit numri i të papunëve në Gjermani mund të jetë mbi 5 milionë

	KFOR-i dhe UNMIK-u dënuan ashpër sulmet në Prishtinë Prishtinë, 23 korrik 2003 - Përfaqësusit e KFOR-it dhe të UNMIK-ut i dënuan ashpër sulmet e fundit në ndërtesën e Gjykatës së Qarkut dhe në Stacionin Policor numër 2 në Prishtinë. "Çdo lloj sulmi kundër institucioneve të drejtësisë dhe të rendit është i drejtuar kundër KFOR-it dhe bashkësisë ndërkombëtare", tha zëdhënësi i KFOR-it, Geri Banister Grin, në konferencën e djeshme për gazetarë. Grin gjithashtu tha se KFOR-i do të punojë së bashku me policinë e UNMIK-ut dhe SHPK-në për të garantuar që elementët ekstremistë të mos kenë sukses. "Kosova ka bërë rrugë të gjatë në katër vjetët e fundit, por ende ka elemente që nuk duan të shohin përparimin, demokracinë dhe drejtësinë", tha zëdhënësi Grin. "Këta elementë jetojnë në të kaluarën dhe e dëmtojnë imazhin dhe të ardhmen e Kosovës. Andaj, KFOR-i është i përkushtuar për të mënjanuar", theksoi Grin, duke i bërë thirrje qytetarëve të Kosovës që të ngrihet kundër këtyre keqbërsve ose ata do të sundohen prej tyre. Ndërkaq, zëdhënësi i policisë së OKB-së, Derek Çapell, tha se ende nuk dihet se kush qëndron prapa këtyre sulmeve dhe se deri tash askush nuk e ka marrë përgjegjësinë për këtë. Ai ritheksoi se sulmet e ditëve të fundit mund të kenë lidhje me aktvendimin e Gjykatës së Qarkut në Prishtinë ndaj grupit të Llapit. "Sulmuesit nuk janë asgjë më shumë sesa banditë që përpiqen të pengojnë sistemin e drejtë dhe të hapur të drejtësisë, por nuk do të arrijnë ta bëjnë këtë", u shpreh Çapell. Megjithë incidentet e fundit, zyrtarët e policisë së OKB-së thanë se shkalla e krimit në Kosovë ka shënuar një rënie të vazhdueshme dhe se ajo mund të krahasohet me disa nga vendet më të zhvilluara perëndimore. Duke e krahasuar Kosovën me kryeqytetin e Suedisë, Stokholmin, zyrtarët thanë se shkalla e krimit këtu dëshmon se qytetarët e Kosovës dëshirojnë ndërtimin e një shoqërie të bazuar në sundimin e ligjit. KFOR-i i ka hedhur poshtë spekulimet serbe rreth djegies së dy shtëpive të serbëve në Prizren Prizren, 23 korrik 2003 - Forcat paqeruajtëse të KFOR-it në Prizren i kanë hedhur poshtë raportimet e burimeve serbe të informimit rreth djegies së dy shtëpive të serbëve në Prizren. Zëdhënësi i Brigadës Shumëkombëshe të Jug-perëndimit, Zigfrid Huben, e përgënjeshtroi informatën e plasuar këtë fundjavë nga agjencitë serbe të lajmeve se djegia e dy shtëpive në lagjen Nënkalaja, e cila është braktisur pas luftës nga serbët, ka qenë e qëllimshme dhe politike. "Shkrimet e këtyre agjencive janë vetëm spekulime, sepse ato nuk janë bazuar fare në hetimet e bëra lidhur me këtë rast, të cilat treguan se këto djegie nuk kanë qenë të qëllimshme", tha Huben. Autoritetet serbe ua dorëzuan zyrtarëve të UNMIK-ut 43 kufoma të shqiptarëve Prishtinë, 23 korrik 2003 - Sot, në vendkalimin kufitar midis Kosovës e Serbisë, në Merdar, autoritetet e Serbisë ua dorëzuan zyrtarëve të UNMIK-ut kufomat e 43 shqiptarëve, të cilat janë gjetur në një varrezë masive në Batajnicë, afër Beogradit. Kufomat u dërguan në morgun e Qendrës së Mjekësisë Ligjore në Rahovec, ku do të bëhet identifikimi i tyre. Hoze Pablo Barajber, shef i zyrës së UNMIK-it për persona të zhdukur dhe mjekësi ligjore, bëri të ditur se në Serbi besohet të jenë edhe kufomat e rreth 1.000 shqiptarëve, të zhdukur gjatë luftës në Kosovë. Ai tha se institucionet ndërkombëtare duhet të bëjnë presion më të madh tek autoritetet e Beogradit për dorëzimin sa më të shpejtë të kufomave të zbuluara në Serbi. Dyshohet se shumica e kufomave që iu dorëzuan sot autoriteteve të UNMIK-ut janë të shqiptarëve të vrarë më 27 prill, në Meje të Gjakovës. Në vendkalimin kufitar në Merdar gjendeshin familharë të shumtë të viktimave të masakrës së Mejes dhe të të zhdukurve të tjerë PTK nxori në treg kartela mbushëse prej 10 eurosh Prishtinë, 23 korrik 2003 - Post Telekomi i Kosovës nxorri në treg kartela mbushëse të telefonisë mobile "Vala 900", me vlerë prej 10 eurosh. Zyrtarët e PTK-së thonë se kartelat janë shpërndarë në të gjitha pikat e shitjes. Ata thonë se qytetarët mund të blejnë vetëm deri në dy kartela, me qëllim që të pengohet tregu i zi i kartelave. Furnizimi me kartela mbushëse me vlerë prej 10 dhe 20 eurosh bëhet pas disa javësh mungese. Eksperti gjerman i të drejtës ndërkombëtare Johan Frowein vizitoi Gjilanin Gjilan, 23 korrik 2003 - Eksperti i të drejtës ndërkombëtare nga Instituti Max-Plank në Hajdenberg, Johan Abraham Frowein, vizitoi sot Gjilanin. Kryetari i kucendit komunal, Lutfi Haziri, dhe kryeshefi ekzekutiv Enver Muja, e njoftuan profesorin Frowein me përpjekjet e pushtetit lokal për krijimin e institucioneve dhe të shoqërisë demokratike, në të cilën do të jenë të barabartë të gjitha grupet etnike. Ata njoftuan se komuniteti serb, i cili përbën rreth 13 për qind të numrit të përgjithshëm të poullatës në këtë komunë, përfaqësohet në asamblenë komunale me 3 këshilltarë të zgjedhur, ndërsa në admninistratën e komunës janë punësuar 46 pjesëtarë të këtij komuniteti. Lufti Haziri shpjegoi se serbët i kanë përfaqësuesit e tyre edhe në komitetet e kuvendit komunal, ku mbrohen interesat e të gjithë qytetarëve, pa marrë parasysh përkatësinë etnike. Profesori Frowein, i shoqëruar nga kyeshefi ekzekutiv i komunës, Enver Muja, dhe nga koordinatori i Kolegjiumit të Degëve të LDK-së në diasporë, Hafiz Gagica, vizitoi edhe disa pjesë të qytetit që ishin dëmtuar më shumë nga tërmeti i vitit 2002 dhe lagjet ku jetojnë komunitetet. Banorët e Gjilanit ballfaqohen me mungesë të ujit të pijshëm Gjilan, 23 korrik 2003- Qyteti i Gjilanit vazhdon të përballet edhe më tutje me mungesën e ujit të pijshëm. Gjendje më e vështirë mbretëron në lagjet periferike. Banorët e lagjes "Kodra e dëshmorëve", nëpërmjet një shkrese drejtuar Komitetit për Shërbime Publike të Kuvendit Komunal kanë kërkuar zgjidhje urgjente të këtij problemi. Në shkresë thuhet se banorët e kësaj pjese të qytetit janë të gatshëm të ndihmojnë materialisht zgjidhjen e problemit të ujit të pijshëm, pasi janë të vetëdijshëm se janë të kufizuara mundësitë e komunës për të realizuar ndonjë projekt që ofron zgjidhje afatgjate të këtij problemit të ujit të pijshëm. Sipas banorëve të kësaj lagjeje, një zgjidhje e përkohshme do të ishte kyçja në rrjetin e ujësjellësit të fshatit Livoç i Epërm, i cili ka një kapacitet të mjaftueshëm të ujit, ose në rrjetin e ujësjellësit të spitalit rajonal, qoftë edhe për orë të caktuara. Komiteti për Shërbime Publike diskutoi sot rreth këtij problemi dhe i rekomandoi ndërmarrjes komunale "Hidroteknika" që të gjejë mundësi për të zbutur mungesën e ujit të pijshëm në këtë lagje, duke bërë reduktime në pjesët tjera të qytetit. Anan e propozon ish-kryeministrin finlandez Harri Holker për shef të UNMIK-ut Bruksel, 23 korrik 2003 - Sekretari i përgjithshëm i OKB-së, Kofi Anan, e ka propozuar ish-kryeministrin finlandez, Harri Holker, si kandidat për vendin e kryeadministratorit të Kosovës. Sipas disa burimeve nga Brukseli, ministrat europianë po përsëritin thirrjet për përshpejtimin e fillimit të bisedimeve midis Prishtinës e Beogradit për çështjet praktike me interes të përbashkët. Shefat e diplomacisë së vendeve të BE-së u bënë thirrje autoriteteve serbe dhe kosovare që të përmbushin obligimet e caktuara në samitin e Selanikut. Dr. Alush A. Gashi: "Kemi mbështetje të fuqishme për një Kosovë të pavarur e demokratike" Prishtinë, 23 korrik 2003 - Dr. Alush A. Gashi, sekretar për marrëdhënie me jashtë i LDK-së dhe deputet në Kuvendin e Kosovës, thotë se faktori ndërkombëtar e mbështet pavarësinë e Kosovës. "Kemi përkrahje të fuqishme ndërkombëtare për Kosovë të pavarur e demokratike, ku të gjithë qytetarët e Kosovës do të jenë të barabartë. Kosova e tillë do të jetë faktor stabiliteti për mbarë rajonin", i deklaroi z. Gashi QIK-ut. Ai thekson se në Prishtinë ekziston koncenzusi i shumicës që bisedimet për çështje praktike të jenë në funksion të implementimit të pavarësisë. "Ekziston koncesusi i shumicës se duhet biseduar për çështje teknike, të cilat janë në funksion të implementimit të pavarësisë së Kosovës", theksoi z. Gashi.” Oliver Ivanoviq: "Nuk jemi të gatshëm të heqim dorë nga Kosova Prishtinë, 23 korrik 2003 - Deputeti i koalicionit serb "Kthimi" në Kuvendin e Kosovës, Oliver Ivanoviq, ka deklaruar se në Serbi nuk ekziston vullneti për të hequr dorë nga Kosova. "Nuk do të thosha se dikush në mënyrë eksplicite ka pranuar diçka të tillë, por fjala është për një qëndrim jo mjaft energjik për mbrojtjen e të drejtave tona në Kosovë, që mund të interpretohet si gatishmëri për ta pranuar një zgjidhje të tillë", ka thënë Ivanoviqi. "Në qarqe të bashkësisë ndërkombëtare po fitohet përshtypja se disa përfaqësues të pushtetit aktual dhe të opozitës janë të gatshëm të pranojnë pavarësinë e Kosovës", ka sjtuar ai. "Mendoj se përshtypja nuk është e saktë, sepse kjo bazohet në bisedat joformale të përfaqësuesve të bashkësisë ndërkombëtare me disa njerëz të pushtetit dhe të opozitës në Serbi", ka thënë Ivanoviqi. Identifikohen edhe 21 kufoma të masakrës së Izbicës në Kosovë Prishtinë, 23 korrik 2003 - Zyra për personat e rrëmbyer e të zhdukur në Skënderaj ka njoftuar se në morgun e Rahovecit janë identifikuar edhe 21 kufoma të masakrës në Izbicë, më 28 mars të vitit 1999, të cilat janë gjetur në varrezat masive në Serbi. Në njoftim thuhet se varrimi i këtyre kufomave do të bëhet më 25 korrik, në Izbicë. Zef Morina priti përfaqësuesit e Federatës së Kryqit të Kuq Ndërkombëtar dhe të Kryqit të Kuq britanik Prishtinë, 23 korrik 2003 - Ministri i Transportit dhe Postë-Telekomunikacionit të Kosovës, Zef Morina, priti përfaqësuesit e Federatës së Kryqit të Kuq Ndërkombëtar dhe të Kryqit të Kuq britanik, Nikolas Jang dhe Dejvid Ebi. Z. Morina i njoftoi mysafirët për punën dhe angazhimin e ministrisë në sfera të ndryshme, sidomos në fushën e ndihmës së parë. Ai tha se ministria që ai e drejton se Kryqi i Kuq i Kosovës kanë nënshkruar një marrëveshje për aftësimin e kandidatëve për shoferë nga ndihma e parë dhe theksoi se ky aftësim është i obligueshëm për marrjen e dokumentit të patentshoferit. Z. Morina tha se kjo formë e bashkëpunimit me Kryqin e Kuq të Kosovës do të vazhdojë edhe më tutje, pasi ka dhënë rezultate të caktuara të kosnsiderueshme në rënien e pasoja të aksidenteve të trafikut. Nikolas Jang e përgëzoi ministrin Zef Morina për punën e deritashme të Ministrisë së Transportit dhe Postë-Telekomunikacionit. Ai vlerësoi se kjo formë e aftësimit nga ndihma e parë është me interes të veçantë. Kryesitë e degëve të FR të LDK-së në Prishtinë angazhonen për aktivitete të përbashkëta Prishtinë, 23 korrik 2003 - Mbrëmë në Prishtinë u mbajt një takim i përbashkët i kryesve të pesë degëve të Forumit Rinor të LDK-së në Prishtinë. Në këtë takim u diskutua për mundësitë e bashkëpunimit më të ngushtë të degëve të Forumit Rinor në kryqytet dhe për organizimin e aktiviteteve të përbashkëta. Ky takim u mbajt pas përfundimit me sukses të procesit zgjedhor të Forumit Rinor të LDK-së dhe zgjedhjes së kryesisë së re. Në takim morën pjesë edhe pesë anëtarë të kryesisë qendrore të FR të LDK-së. KMDLNJ: Shpërthimet e fundit në Prishtinë janë goditje e rëndë kundër sigurisë dhe qetësisë në Kosovë Prishtinë, 23 korrik 2003 - Shpërthimet e fundit në Prishtinë janë goditje e rëndë kundër sigurisë dhe qetësisë në Kosovë, e posaçërisht në Prishtinë, vlerëson Këshilli për Mbrojtjen e të Drejtave dhe Lirive të Njeriut, me seli në Prishtinë. "Këto akte të dhunshme jo vetëm që rrezikojnë qytetarët e saj, duke ndjellur frikë dhe pasiguri, por paraqesin edhe përpjekje për të dëmtuar stabilitetin në Kosovë", thuhet në deklaratën e këtij këshilli. KMDLNJ i dënon fuqishëm këto akte të shëmtuara dhe u bën thirrje qyetarëve që, në interes të jetës, sigurisë dhe qetësisë së qytetarëve të Kosovës, ta ndihmojnë policinë për ndriçimin e akteve të tilla. Deklaratat e zyrtarëve serbë për përfshirjen e Kosovës në Kushtetutën e Unionit Serbi - Mali i Zi janë të paarsyeshme Gjilan, 23 korrik 2003 - Deklaratat e zyrtarëve serbë për përfshirjen e Kosovës në Kushtetutën e Unionit Serbi - Mali i Zi janë të paarsyeshme, kanë thënë oficerët e kampit ushtarak amerikan "Monteith" në Gjilan. Ata kanë thënë gjithashtu se zona kufitare në Muqibabë nuk ka ndryshuar dhe kjo nuk diskutohet. Kapiteni Fojd nga kampi "Monteith", në takimin e Komitetit për Siguri dhe Emergjencë të Kuvendit komunal të Gjilanit, tha se paqeruajtësit janë atje ku duhet të jenë edhe atëherë kur nuk shihen. "Ne nuk duam që forcën tonë ta demonstrojmë përpara qytetarëve të Kosovës, por forcat serbe janë të vetëdijshme se ne jemi në kufij", ka thënë oficeri i KFOR-it. Ka filluar aksioni për mbylljen e barnatoreve të palicencuara Prishtinë, 23 korrik 2003 - Me urdhërin e Ministrisë së Shëndetësisë së Kosovës dje ka filluar aksioni për mbylljen e barnatoreve të palicencuara. Aksioni filloi me mbylljen dhe me konfiskimin e barërave në disa barnatore që gjendeshin në hyrje të Qendrës Klinike Universitare të Kosovës. Mbyllja e tyre u bë me urdhër të Agjencisë Farmaceutike të Kosovës. Bekim Gjota, inspektor i kësaj agjencie, tha se këto barnatore nuk kishin licenca për punë dhe nuk kishin farmacistë, prandaj u ndalohet puna e mëtutjeshme. Pronarët e barnatoreve e cilësojnë të paligjshëm këtë veprim të ministrisë, pasi, sipas tyre, ligji që rregullon këtë çështje nuk është miratuar ende në Kuvendin e Kosovës. Kryesia e PS kandidoi për zëvendëskryeministër dhe ministër për integrimin shtetëror Ermelinda Meksin, për ministër të Jashtëm Marko Bellon Tiranë, 23 korrik 2003 - Grupi parlamentar i Partisë Socialiste (PS) të Shqipërisë, pas një debati të ashpër mes krahut të kryeministrit Fatos Nano dhe ish-ministrit të jashtëm Ilir Meta, miratoi kandidaturat e propozuara nga Kryesia e kësaj partie për vendet bosh në qeveri. Deputetët miratuan kandidaturën e Ermelinda Meksit për postin e zëvendëskryeministres dhe ministres Shtetërore të Integrimit dhe të Marko Bellos, për postin e ministrit të jashtëm. Këto propozime do të shkojnë edhe te presidenti Alfred Moisiu, i cili duhet t'i dekretojë anëtarët e rinjë të Qeverisë Nano. Vlerësohet se ka shumë pak gjasa që presidenti Moisiu të mos i pranojë emrat e ri të qeverisë. Presidenti serbo-malazez gjatë takimit në Bruksel me Solanën dhe Prodin ka biseduar edhe për Kosovën Bruksel, 23 korrik 2003 - Presidenti i Unionit Serbi- Mali i Zi, Svetozar Maroviq, gjatë takimit në Bruksel me shefin për Politikë të Jashtme dhe Siguri të BE-së, Havier Solanën, dhe me kryetar i Komisionit Evropian, Romano Prodin, ka biseduar edhe për Kosovën. Maroviq i bëri thirrje BE-së që në procesin e evropianizimit të Serbisë dhe Malit të Zi të përfshihet edhe Kosova. Njoftohet se ai ka bërë thirrje për fillimin sa më të shpejtë të dialogut shqiptaro-serb, në fillim për çështje praktike e më pas edhe për probleme tjera më të rëndësishme. Çoviq thotë se Kosova është duke i marrë të gjitha atributet e shtetit Beograd, 23 korrik 2003 - Nënkryetari i qeverisë së Serbisë, Nebojsha Çoviq, ka deklaruar se disa subjekte ndërkombëtare dëshirojnë ta shkëpusin Kosovën nga Serbia, duke i ofruar Serbisë investime të mëdha dhe përfshirje të shpejtë në strukturat evro-atlantike. Çoviq ka thënë po ashtu se Kosova është duke marrë të gjitha atributet e nevojshme shtetërore, ndërkohë që ka edhe përpjekje që opinioni dhe qeveria serbe të përgatiten për të hequr dorë nga Kosova. Çoviq ka paraqitur edhe parimet mbi të cilat, sipas tij, Serbia do të tentojë ta zgjidhë çështjen e Kosovës. Ai ka apostrofuar ndalimin e "heqjes dorë" nga Kosova, këmbënguljen e fuqishme për respektimin e Rezolutës 1244, mosnjohjen e së drejtës për shkëputje dhe për ndryshimin e kufijve. Temperaturat e larta shkaktojnë zjarre në pyjet e Shqipërisë Tiranë, 23 korrik 2003 - Temperaturat e larta, mbi 35 gradë, në Shqipëri kanë shkaktuar zjarre në sipërfaqet pyjore. Në fund të javës, zjarri ka përfshirë edhe Kopshtin Botanik në Tiranë. Disa burime thonë se janë djegur rreth shtatë hektarë sipërfaqe ku kultivohen dhe rriten bimët e këtij kopshti. Sipas qendrës operacionale të Ministrisë së Pushtetit Vendor, vetëm gjatë muajit korrik, në Shqipëri janë djegur rreth 650 hektarë pyje. Specialistët e pyjeve janë të shqetësuar pasi sezoni i nxehtë dhe rreziku i zjarreve pritet të zgjasin edhe gjatë muajit gusht. Ushtria e re afgane ka filluar operacionet luftarake Kabul, 23 korrik 2003 - Ushtria e re e Afganistanit, e cila përbëhet prej 5.000 ushtarësh të stërvitur, ka filluar operacionet luftarake kundër mbeturinave të talebanëve dhe të rrjetit Al-Kaida në rajonin Zormat, në krahinën jugore Paktija, ka deklaruar sot zëdhënësi i forcave të koalicionit, koloneli Rodni Dejvis. Ai ka thënë se 6 aradha të ushtrisë kombëtare afgane, me rreth 1 mijë vetë kanë arritur, para dy ditësh, në luginën Zormat, 30 kilometra në jug-perëndim të kryeqytetit të Paktisë, Gardez. Një mesazh i incizuar që i atribuohet Sadam Huseinit bën ftesë për rezistencë ndaj trupave amerikane Bagdad, 23 korrik 2003 - Qendra televizive "Al Arabija" në Dubai ka transmetuar sot një mesazh të incizuar, i cili besohet të jetë zëri i ish-presidentit të Irakut, Sadam Husein. Në mesazh, të transmetuar një ditë pas vrasjes së djemve të Sadamit, Udait e Kusait, ftohet forcat speciale dhe të gardës së presidentit irakian që të bëjnë rezistencë dhe të shtojnë sulmet ndaj trupave amerikane në Irak. Dy informatorët irakianë që treguan vendndodhjen e djemve të Sadamit do të marrin 30 milionë dollarë shpërblim Mosul, 23 korrik 2003 – Dy informatorë irakianë, të cilët i kanë njoftuar forcat amerikane për vendndodhjen e dy djemve të Sadam Hyseinit, do të marrin 30 milionë dollarë shpërblim, ka bërë të ditur një zyrtar i lartë ushtarak amerikan, njofton CNN. Zyrtari ushtarak, i cili ka marrë pjesë në operacionin e djeshëm, ka thënë se forcat amerikane e kishin marrë informacionin 24 orë para se të sulmonin vendstrehimin e bijve të Sadamit. Ai ka thënë se djem e Sadamit janë vrarë gjatë shkëmbimit gjashtë orësh të zjarrit me trupat amerikane. Në dy sulme të veçanta janë vrarë 2 ushtarë amerikanë dhe janë plagosur të paktën 8 të tjerë Mosul, 23 korrik 2003 – Dy ushtarë amerikanë janë vrarë dhe të paktën 8 të tjerë janë plagosur sot (e mërkure), në dy sulme të veçanta ndaj forcave amerikane, njofton Rojter. Sulmet kanë ndodhur pas vrasjes së dy djemve të Sadam Hyseinit, në një shkëmbim zjarri, në veri të Irakut. Një ushtar amerikan dhe 6 të tjerë janë plagosur, kur automjeti i tyre është goditur me një mjetëshpërthyes në qytetin Mosul, në veri të Irakut, ku janë vrarë mbrëmë djemtë e Sadamit, Udai dhe Kusai. Ndërkaq, në një sulm tjetër në qytetin Ramadi, në perëndim të Bagdadit, është vrarë një ushtar amerikan dhe janë plagosur dy të tjerë, kur konvoji i tyre është goditur me një mjet shpërthyes të improvizuar. Këto sulme kanë ngritur në 41 numrin e ushtarëve të vrarë amerikanë, që kur presidenti Bush e ka shpallur të përfunduar luftën në Irak. Fotoreporterja kanadeze, e cila vdiq nga torturat në një burg të Teheranit, është varrosur në Iran Teheran, 23 korrik 2003 – Fotoreporterja kanadeze me preardhje iraniane, Zahra Kazemi, e cila vdiç nga torturat në një burg të Iranit, është varrosur në Iran, përkundër kërkesave që trupi i saj të dërgohet në Kanada, njofton BBCWorld. Bëhet e ditur se ajo është varrosur sot (e merkurë), heret në mëngjes, në qytetin jugperëndimor Shiraz. Qeveria kanadeze ka shprehur me kohë shqetësimin lidhur me mungesën e vullnetit të Iranit që trupi i saj të kthehet në Kanada, përkundër dëshirës së të afërmëve të saj në Iran dhe në Kanada. Zahra Kazemi vdiq nga pasojat e një goditjeje të fuqishme në kokë, pasi ishte arrestuar në Teheran. Konfirmohet vrasja e djemve të Sadam Huseinit Bagdad, 23 korrik 2003 - Komandanti i forcave të koalicionit në Irak tha dje se djemtë e Sadam Huseinit, Udai dhe Kusai, janë vrarë. Mbrëmë vonë, në rrugët e Bagdatit, kishte të shtëna armësh, me sa duket në reagim të vrasjes së djemve të Sadam Huseinit, Udat dhe Kusait, u njoftua nga një gjeneral i lartë amerikan. Gjeneral-lejtnanti Rikardo Sançez tha se dy djemtë e Sadamit ishin në mesin e 4 personave që u vranë në një betejë të ashpër, e cila zgjati 6 orë, në qytetin Mosul të Irakut verior. Ai tha se trupat e dy djemve të Sadam Huseinit ishin në gjendje për t'u identifikuar edhe para se të bëhen analizat e ADN-së, të cilat tashmë kanë filluar. "Ne kemi përdorur burime të ndryshme për të identifikuar individët e vrarë. Ata kundërshtuan përpjekjet e forcave të koalicionit që t'i arrestonin dhe u vranë nga të shtënat që pasuan dhe gjatë sulmeve në banesë", tha gjenerali Sançez. Ai tha se trupat amerikane të divizonit të 101 të Forcave Amerikane, pasi e morën informatën e një irakiani, përdorën raketa dhe armë për të hyrë në një vilë ku mendohej se po takoheshin zyrtarë të lartë të partisë Baath. Ai tha gjithashtu se operacionet për kërkimin e Sadam Huseinit po vazhdojnë. "Ne vazhdojmë të mbetemi të përqëndruar në gjetjen, vrasjen ose kapjen e të gjithë anëtarëve me rëndësi në listën e të kërkuarve", tha Sançez. Presidenti Bush i kënaqur me operacionin kundjër djemve të Sadamit Uashington, 23 korrik 2003 - Shtëpia e Bardhë njoftoi se presidenti Bush ka shprehur kënaqësinë për operacionin e suksesshëm ushtarak kundër dy djemve të Sadam Huseinit. Reagimi fillestar i Shtëpisë së Bardhë nuk ishte i bujshëm dhe u bë në formën e një deklarate të shkurtër me shkrim. Zëdhënësi i Shtëpisë së Bardhë, Skot MekKllellën, tha se dy vëllezërit Husein ishin përgjegjës për krime të pafunda të kryera kundër popullit irakian dhe nuk mund të lënë më një hije urrejtjeje mbi Irak, siç u shpreh ai. Presidenti Bush dhe ndihmësit e tij vendosën t'ia lënë Pentagonit gjithë meritën për këtë operacion të sukshëm dhe njoftimin e hollësive rreth ngjarjeve të fundit në Irak. Temperatura të larta, thatësi dhe zjarre në vendet e Evropës Londër, 23 korrik 2003 - Zjarrefikësit në mbarë Evropën po luftojnë me zjarret e shkaktuara nga vala e të nxehtit që ka përfshirë pyjet e shumë vendeve, prej Mesdheut e deri në Skandinavi. Pjesë të mëdha pyjesh kanë marrë flakë pranë qytetit kroat Dubrovnik dhe në rrethinat e kryeqytetit spanjol Madrid. Thatësia që po mbretëron në Austri ka ulur nivelin e ujërave dhe prodhimin e energjisë. Transporti ujor në rrjedhën e lumit Danub është ndërprerë. Bujqit evropianë paralajmërojnë se mund të humbasin të mbjellat. Shoqata gjermane e bujqëve thotë se mund t'u prishet deri në 80 për qind e prodhimit, nëse nuk bie shi së shpejti. Në Finlandë temperaturat kanë kaluar mbi 30 gradë celsius. Në lumenjt e liqenet e këtij vendi që zakonisht është i freskët, sivjet është shtuar numri i njerëzve që po përpiqen të freskohen. Rebelët liberianë shpallën armëpushim Monrovi, 23 korrik 2003 - Pas luftimeve të ashpra mes rebelëve dhe trupave qeveritare në kryeqytetin e Liberisë, Monrovi, rebelët shpallën armëpushim. Gjetë luftimeve të dy ditëve të fundit duhet të kenë vdekur rreth 600 vetë. Agjencitë e OKB-së për çështjet e refugjatëve tërhoqën vëmendjen për rrezikun e një katastrofe humanitare. Në kryeqytetin e vendit kanë gjetur strehë me tepër se 250.000 refugjatë gjendja e të cilëve është jashtëzakonisht e rëndë. Presidenti Çarls Tejlor deklaroi se do të largohet nga vendi, pasi të hyjnë trupat ndërkombëtare të paqes. SHBA-të këmbëngulin që ndërhyrja e trupës ndërkombëtare të bëhet vetëm pas dorëheqjes së presidentit. 15 të vdekur dhe qindra plagosur në një tërmet në jugperëndim të Kinës Pekin, 23 korrik 2003 - Një tërmet i rëndë që ka ndodhur në jugperëndim të Kinës ka shkaktuar vdekjen e 15 vetëve dhe plagosjen e disa qindra të tjerëve. Në provincën Ju Nan janë shembur mbi 5.000 shtëpi dhe janë dëmtuar rreth 190.000 ndërtesa. Dëmtime ka pësuar edhe një termocentral. Tërmeti i shkallës 6,2 ballë sipas shkallës Rihter, u ndje deri në 180 km prej epiqendrës së tij. Deri në fund të vitit numri i të papunëve në Gjermani mund të jetë mbi 5 milionë Berlin, 23 korrik 2003 - Kryetari i Entit federal të punësimit në Gjermani, Florian Gerster, ka deklaruar se deri në fund të këtij viti numri i të papunëve në këtë vend mund të arrijë në mbi 5 milionë. "Në rast se dimri do të jetë i ashpër dhe shpresat për përmirësimin e konjukturës nuk përmbushen, kjo shifër bëhet gjithnjë e më e mundshme", ka thënë Gerster. Sipas të dhënave të drejtorit të financave të këtij enti, deficiti i tij në gjysmën e parë të vitit 2003 kapte shifrën prej 5,2 miliardë eurosh.

	Copyright©2000-2003 Trepca.net - Të gjitha të drejtat e rezervuara.