E marte 22 korrik 2003

22.07.2003 - Trepca.net

Lajme

E marte 22 korrik 2003

Përmbajtja:

Presidenti Rugova priti ekspertin gjerman të së drejtës ndërkombëtare, Dr Johan Frowein
Johan Frowein: "Çështja e Kosovës duhet të zgjidhet në bazë të parimit të vetëvendosjes dhe vullnetit politik të popullit"
Zyra e SHBA-ve përshëndet miratimin e "Fshatit ndërkombëtar" në Prishtinë”
Ministrat e jashtëm të BE-së ofrojnë ndihmë për dialogun mes Prishtinës e Beogradit
Solana ka biseduar me Kofi Anan për emërimin e shefit të ri të UNMIK-ut
Policia thotë se trupi i pajetë i gjetur në Graboc nuk ka të bëjë me krimet e luftës
Po bëhen përgatitjet për festivalin e parë ndërkombëtar të filmit në Kosovë
Presidenti Moisiu refuzoi kërkesën e opozitës për krijimin e qeverisë teknike
Marko Bello dhe Ermelinda Meksi propozohen anëtarë të qeverisë së Shqipërisë
Ali Ahmeti takon Solanën nesër në Bruksel, për Marrëveshjen e Ohrit
Kryesia e Partisë Socialiste diskuton për zëvendësimin e Metës dhe Nakos
Autoritetet e Shkupit refuzojnë sugjerimet e ndërkombëtarëve për shtyrjen e grumbullimit të armëve
Sot në Bagdad është varë një ushtar amerikan dhe një tjetër është plagosur
Bush: Siria dhe Irani strehojnë terroristë
SHBA kërkojnë nga luftëtarët kurdë të lëshojnë veriun e Irakut
Në bazë ushtarke në Kashimir janë vrarë 7 ushtarë indianë
Në luftimet e deritashme në Liberi janë vrarë mbi 700 njerëz
Në dy shpërthime bombash në pushimoret spanjole janë plagosur të paktën 8 persona
Në malet e Andeve janë zhdukur rreth 18 alpinistë
Në luftimet e deritashme në Liberi kanë humbur jetën mbi 90 njerëz
Anan është për një rol më të fuqishëm të OKB-së në Irak
Në Çeçeni vriten gjashtë ushtarë rusë dhe tre rebelë çeçenë


"Biseduam për progesin e arritur në Kosovë, në të gjitha fushat e jetës, si edhe për sigurinë, e cila është gjithnjë e më e madhe në Kosovë", deklaroi presidenti Rugova.
"E njoftova profesorin me objektivat e qeverisë e të instituciobneve të Kosovës për zhvillimin ekonomik, investimet, privatizimin, hapjen e vendeve të reja të punës, si edhe për integrimin e grupeve etnike në shoqërinë kosovare", shtoi presidenti Rugova, duke theksuar objektivin për integrimin e Kosovës në Bashkimin Evropina dhe në NATO.
Presidenti Rugova ritheksoi se njohja sa më e shpejtë formale e pavarësisë së Kosovës do të shpejtonte proceset ekomonike, demokratike në Kosovë dhe do të qetësonte rajonin.
Ai e falënderoi profesorin Frowein për vizitën në Kosovë dhe shprehu bindjen se ai do ta ndihmojë Kosovën dhe zhvillimin e saj të ardhshme, në planin juridik.
Profesori Johan Frowein, nga ana e tij, shprehu kënaqësinë për ftesën e presidentit Rugova që ta vizitojë Kosovën.
"Jam i nderuar që jam i ftuar i presidentit Rugova", tha profesor Frowein.
"Biseduam për të drejtat e njeriut, për të drejtat e minoriteteve dhe për të drejtën e vetëvendosjes", tha ai.
"Populli i Kosovës ka të drejtë të vendosë vetë për të ardhmen e vet. Tash për tash, kjo e drejtë është e kufizuar, për shkak se Kosova administrohet sipas Rezolutës 1244 të KS të OKB-së", theksoi profesor Frowein.
Ai shprehu bindjen se bashkësia ndërkombëtare do ta njohë të drejtën e popullit të Kosovës dhe shhfaqi shpresën se kjo do të arrihet në një të ardhme të afërt.
Dr Johan Frowein mbajti sot një ligjëratë në Akademinë e Shkencave dhe të Arteve të Kosovës.


Zyra e SHBA-ve përshëndet miratimin e "Fshatit ndërkombëtar" në Prishtinë”

Prishtinë, 22 korrik 2003 – A. Allek Melli, ushtrues i detyrës së shefit të misionit të Zyrës së SHBA-ve në Prishtinë, përshëndeti vendimin e së premtes të kuvendit komunal të Prishtinës për miratimin e ndërtimit të "Fshatit ndërkombëtar", duke e cilësuar këtë vendim si një hap të rëndësishëm drejt tërheqjes së investimeve në Kosovë.
"Më këtë veprim, kuvendi komunal shfaq vullnetin për të punuar me investuesit ndërkombëtarë për prurjen në Prishtinë të projekteve që do të krijojnë vende pune dhe kushte më të mira jetese.

Ne e urojmë pushtetin komunal për vendimin që e ka marrë dhe presim që të punojmë me të për ta përfunduar këtë projekt dhe për të tërhjekur edhe më shumë investime në Kosovë.

Thjeshtësimi i procedurave rregullatore për ndihmimin e investuesve potencialë është një komponentë kryesore në përmbushjen e standardeve të bashkësisë ndërkombëtare për ekonominë, dhe ky veprim i kuvendit komunal është një hap i mirë në atë drejtim". tha z. Melli.
Ai theksoi po ashtu se "Fshati ndërkombëtar" është një investim privat dhe se nuk përfshin kurrfarë financimi nga ana e Qeverisë së Shteteve të Bashkuara.
"Sidoqoftë, Zyra e SHBA-ve i përkrahë përpjekjet për prurjen e investimeve amerikane në Kosovë si pjesë e misionit të saj në Kosovë, prandaj edhe e ka përcjellur aktivisht këtë përpjekje.

Ish shefi i misionit Rino Harnish ka punuar në këtë çështje deri në ditën e fundit të qëndrimit të tij në Kosovë duke theksuar se mbetet shumë e rëndësishme që të tërhiqen investuesit privatë nga SHBA-të.

Ky vendim është shumë i rëndësishëm si një precedent për investuesit e ardhshëm nga SHBA-të dhe gjetiu", tha Allek Melli, ushtrues i detyrës së shefit të misionit të Zyrës së SHBA-ve në Prishtinë.


Ministrat e jashtëm të BE-së ofrojnë ndihmë për dialogun mes Prishtinës e Beogradit

Bruksel, 22 korrik 2003 - Ministrat e jashtëm të BE-së, të cilët u takuan dje në Bruksel, për herë të parë prej marrjesë së kryesisë së radhës nga Italia. Përveç tjerash, ata diskutuan edhe për situatën në Ballkan, duke përfshirë edhe Kosovën.
Ministrat e Jashtëm të BE-së janë pajtuar parimisht për hartimin e një liste të re kandidatësh për postin e kryeadministratorit të UNMIK-ut në Kosovë. Në këtë listë është edhe ish-kryeministri finlandez Hari Holker, i cili konsiderohet favorit.
Megjithatë, në listën e BE-së ende mbeten si kandidatë potencialë për këtë post edhe diplomati suedez Ralf Ekhaus, norvegjezi Kai Ajde dhe diplomati portugez, Hoze Kutiliero. Emërimin e kryeadministratorit të Kosovës do ta bëjë sekretari i përgjithshëm i OKB-së, Kofi Anan, pasi të këshillohet me Shtetet e Bashkuara të Amerikës.
Ministrat e jashtëm të BE-së përsëritën edhe një herë domosdoshmërinë e fillimit të dialogut ndërmjet Prishtinës dhe Beogradit për çështje praktike, me interes të dyanshëm. Çështja e dialogut është përfshirë edhe në konkluzat e takimit. Në to shprehet mbështetje për fillimin sa më të shpejt të dialogu dhe ofrohet mbështeje e BE-së, në cilësinë e sponzoruesit të dialogut.
Këshilli i ministrave të BE-së përshëndeti letrën e udhëheqësve të Kosovës drejtuar të zhvendosurve dhe kërkuan që ky hap të ndiqet edhe me veprime praktike.


Solana ka biseduar me Kofi Anan për emërimin e shefit të ri të UNMIK-ut

Bruksel, 22 korrik 2003 - Përfaqësuesi për Politikë të Jashtme dhe Siguri i Bashkimit Evropian, Havier Solana, ka thënë dje në Bruksel se në fund të javës që ka kaluar, ka biseduar gjatë me sekretarin e përgjithshëm të OKB-së, Kofi Anan, lidhur me emërimin e shefit të ri të UNMIK-ut në Kosovë.
"Sa më parë që të ndodhë kjo, sa më parë që të kemi një përfaqësues të lartë të sekretarit të OKB-së për Kosovën aq më shpejt do të mund të fillojë dialogu Prishtinë - Beograd", citohet të ketë thënë Solana.


Policia thotë se trupi i pajetë i gjetur në Graboc nuk ka të bëjë me krimet e luftës

Mitrovicë, 22 korrik 2003 - Trupi i pajetë i gjetur në Graboc, në veri të Kosovës, nuk ka të bëjë me krimet e luftës, kanë thënë zyrtarët e policisë në rajonin e Mitrovicës. Policia është duke hetuar një trup të gjetur në një varr, disa ditë më parë.

Trupi është dërguar në Rahovec, ku është bërë autopsia, e cila ka zbuluar se trupi i pajetë është i një mashkulli të panjohur, që kishte pësuar plagë nga arma. Policia po e trajton këtë si rast që nuk ka të bëjë me krimet lufte, ka thënë zëdhënësi rajonal i policisë Kevin Grill.


Po bëhen përgatitjet për festivalin e parë ndërkombëtar të filmit në Kosovë

Prishtinë, 22 korrik 2003 - Shtëpi filmike nga Spanja, Austria, India, Gjermania, Bosnja e Hercegovina dhe Hungaria e kanë konfirmuar tashmë pjesëmarrjen e tyre në Festivalin e parë Ndërkombëtar të Filmit që do të mbahet në Kosovë. Këtë e konfirmoi sot Ministri i Kulturës, Rinisë, Sporteve e Çështjeve Jorezidente, Behxhet Brajshori.
Z. Brajshori tha se së shpejti pritet që pjesëmarrjen në këtë festival ta konfirmojë edhe Shqipëria. Ministria e Kulturës, Rinisë, Sporteve e Çështjeve Jorezidente ka themeluar Këshillin Organizativ të Festivalit. Filmat që do të gjenden në programin e festivalit do të shfaqen në Prishtinë dhe në disa qendra të tjera të Kosovës.


Presidenti Moisiu refuzoi kërkesën e opozitës për krijimin e qeverisë teknike

Tiranë, 22 korrik 2003 - Presidenti i Shqipërisë Alfred Moisiu e refuzoi kërkesën e opozitës për zgjidhjen e krizës qeveritare me anë të rrëzimit të qeverisë socialiste dhe ngritjen e një qeverie teknike me bazë të gjerë. Presidenti Moisiu tha se është shumë shpejt për një zgjidhje radikale dhe se ai do të ushtrojë kompetencat e tij kushtetuese në një mënyrë tjetër.
Nënkryetarja e Partisë Demokratike, Jozefina Topalli, i ka bërë thirrje presidentit që të mbështesë një zgjidhje të tillë, pasi, sipas saj, qeveria socialiste e kryeministrit Nano është e dështuar.
Ndërkaq, nga kampi socialist dje pasdite u njoftua se Ermelinda Meksi e ka pranuar detyrën e ministres për Integrimin Shtetëror, ndërsa Pandeli Majko, ministër i Mbrojtjes, nuk e ka pranuar propozimin që të kalojë në detyrën e ministrit të jashtëm.
Sekretari i përgjithshëm i Partisë Socialiste, Gramos Ruçi, tha se brenda 24 orëve do të paraqitet një nga variantet e qeverisë së re, e cila pritet të shpallet gjatë ditës së sotme.
Ndërkohë, Ilir Meta ka dhënë dje dorëheqje edhe nga kryesia e Partisë Socialiste, duke shqiptuar kritika të ashpra në adresë të Fatos Nanos.


Marko Bello dhe Ermelinda Meksi propozohen anëtarë të qeverisë së Shqipërisë

Tiranë, 22 korrik 2003 - Kryesia e Partisë Socialiste zgjodhi sot dy kandidatët që do të zëvendësojnë ish-ministrat Ilir Meta e Sokol Nako në qeveri.
Sekretari i përgjithshëm i PS-së, Gramoz Ruçi, bëri të ditur se kryesia e pranoi propozimin e kryeministrit Nano që për postin e ministrit të Jashtëm të kandidohet Marko Bello, ndërsa për postën e zëvendëskryeministres dhe të ministres së Shtetit për Integrim të kandidohet deputetja Ermelinda Meksi.

Emrat e këtyre dy kandidatëve, të cilët do t'i paraqiten edhe grupit parlamentar të Pastisë Socialiste, janë zgjedhur me votën e shumicës.


Ali Ahmeti takon Solanën nesër në Bruksel, për Marrëveshjen e Ohrit

Shkup, 22 korrik 2003 - Kryetari i Bashkimit Demokratik për Integrim, Ali Ahmeti do të qëndrojë në Bruksel, nesër dhe pasnesër, me ftesë të përfaqësuesit të lartë të Bashkimit Evropian për Politikë të Jashtme dhe Siguri, Havier Solana.
Zëdhënësja e BDI-së, Ermira Mehmeti, ka thënë se në takim me z. Solana do të bisedohet për çështjet aktuale në Maqedoni, zbatimin e Marrëveshjes së Ohrit dhe çështjet e sigurisë.
Gjatë qëndrimit në Bruksel, z. Ahmeti do të takohet edhe me sekretarin e përgjithshëm të NATO-s, lordin Xhorxh Robertson, me parlamentarë dhe me zyrtarë të tjerë belgë. Në njoftim thuhet se z. Ahmeti do të bisedojë me Lordin Robertson për reformat në ushtrinë e Maqedonisë dhe për përfshirjen e shqiptarëve në të, konform Marrëveshjes së Ohrit.


Kryesia e Partisë Socialiste diskuton për zëvendësimin e Metës dhe Nakos

Tiranë, 22 korrik 2003 - Në Tiranë ka filluar mbledhja e kryesisë së Partisë Socialiste, në të cilën po diskutohen emrat e mundshëm që pritet të zëvendësojnë dy anëtarët e qeverisë që dhanë dorëheqje, Ilir Metën dhe Sokol Nakon. Burime të pakonfirmuara nga kjo parti thanë se parimisht është rënën dakort për emrat e ministrave të rinj të kabinetit Nano dhe sot pritet zyrtarizimi i tyre.
Sipas këtuyre burimeve, deputeti i Partisë Socialiste, Marko Bello, është favorit kryesor për postin e ministrit të Punëve të Jashtme. Kryeministri Fatos Nano ka konfirmuar edhe emrat tjerë që mund të zënë vend në qeveri, përkrah tij. Ata janë Namik Dokle dhe Ermelinda Meksi.


Autoritetet e Shkupit refuzojnë sugjerimet e ndërkombëtarëve për shtyrjen e grumbullimit të armëve

Shkup, 22 korrik 2003 - Ministrat e Mbrojtjes dhe Punëve të Brendshme të Maqedonisë nuk pajtohen me sugjerimet e zyrtarëve ndërkombëtarë në Shkup që fushata për grumbullimin e armëve të shtyhet për pranverën e ardhshme. Hari Kostov dhe Vllado Buçkovski thonë se janë të vendosur që kjo fushatë të realizohet brenda afatit të planifikuar, prej 1 tetorit deri më 15 nëntor të këtij viti.


Sot në Bagdad është varë një ushtar amerikan dhe një tjetër është plagosur

Bagdad, 22 korrik 2003 – Një ushtar amerikan është vrarë sot (martë) dhe një tjetër është plagosur, kur autokolona e tyre është goditur në pritë me një granatë raketore dhe me armë të vogla, në veriperëndim të Bagdadit, njofton Rojter. Sulmi ka ndodhur në një zonë të popullzuar me shumicë sunite.
Ky sulm ngriti në 39 numrin e amerikanëve të vrarë në Irak prej 1 majit, kur presidenti Bush e deklaroi të përfunduar luftën në Irak.


Bush: Siria dhe Irani strehojnë terroristë

Uashington, 22 korrik 2003 - Presidenti amerikan, Xhorxh Bush, paralajmëroi Iranin dhe Sirinë që të mos ndihmojnë ekstremistët, të cilët kërkojnë të shkatërrojnë procesin e paqes.
"Sot, Siria dhe Irani vazhdojnë të strehojnë dhe të ndihmojnë terroristët. Kjo sjellje është krejtësisht e papranueshme. Shtetet që përkrahin terrorin, do të mbajnë përgjegjësi", tha Presidenti Bush, në konferencën e përbashkët të shtypit me kryeministrin italian, Silvio Berlusconi, në fermën e tij në Texas.
Ai e hapi konferencën me fjalë të mira për kryeministrin palestinez, Mahmud Abaz, dhe për Kryeminsitrin izraelit, Ariel Sharon. Por, ai kishte fjalë të ashpra për vendet-fqinje, për të cilat ai tha se janë të lidhura me terrorizmin.
Presidenti Bush foli edhe për rajone të nxehta në Afrikë e në Azi.
"Ne vazhdojmë të vëzhgojmë gjendjen me shumë vëmendje. Po punojmë me Kombet e Bashkaura për të zbatuar politikën e domosdoshme për të vënë përsëri në fuqi armëpushimin në terren.

Po punojmë me Komunitetin Ekonomik të Shteteve të Afrikës Perëndimore për të vendosur se kur do të jenë të përgatitura vendet anëtare të dërgojnë trupa paqeruajtëse, për të cilat jam shprehur se Amerika do të jetë e gatshme t'i ndihmojë", tha Presidenti Bush.
Por, në krye të çështjeve që u diskutuan në takimin e Presidentit Bush me kryeministrin italian, Sivio Berlusconi, ishte Iraku dhe marrëdhëniet transatlantike.
Kryeministri italian tha se është kohë që të bashkohemi për të rigjallëruar, siç u shpreh, fuqinë e madhe të shkrirjes ndërmjet Evropës dhe Amerikës. Ai tha se ky është mesazhi që do ti dërgojë Evropës.


SHBA kërkojnë nga luftëtarët kurdë të lëshojnë veriun e Irakut

Ankara, 22 korrik 2003 - Shtetet e Bashkuara të Amerikës kërkuan nga luftëtarët e Partisë së ndaluar punëtore kurde "PKK" që të largohen nga veriu i Irakut.
Ambasadori amerikan në Turqi, Robert Pearson, tha se nëse luftëtarët e PKK-së nuk tregohen të gatshëm për dorëzim atëherë mund të përdoret edhe dhuna ushtarake.
"Shtetet e Bashkuara të Amerikës nuk do të durojnë kurrfarë kërcënimi për Turqinë nga territori irakian", theksoi Pearson.


Në bazë ushtarke në Kashimir janë vrarë 7 ushtarë indianë

Nju Delhi, 22 korrik 2003 - Në një sulm të militantëve kundër një baze ushtarke të armatës indiane në Kashimirin e administruar nga India janë vrarë 7 ushtarë të saj, kanë bërë të ditur sot (e martë) zyrtarë të kasaj armate, njofton BBCËorld.
Sulmi ka ndodhur një ditë pas vrasjes së 7 pelegrinëve indianë në këtë shtet trazirash. Këto sulme janë akte të atyre që përpiqen për dështimin e proceseve paqësore ndërmjet Indisë dhe Pakistanit, kanë thënë zyrtarë shtetërorë të Indisë.


Në luftimet e deritashme në Liberi janë vrarë mbi 700 njerëz

Monrovia, 22 korrik 2003 – Sipas njoftimeve të sotme (e martë) të agjencive botërore të lajmeve, numri i të vrarëve në luftimet e këtoditshme në kryeqytetin e Liberisë, Monrovia, është dukshëm më i lartë se ai që e kemi dhënë në edicionet e mëparshme.
Njoftimet e fundit thonë se deri më tash në këto luftime e kanë humbur jetën mbi 600 persona, ndërsa agjencia AFP thotë se në këto luftime janë vrarë mbi 700 njerëz.


Në dy shpërthime bombash në pushimoret spanjole janë plagosur të paktën 8 persona

Madrid, 22 korrik 2003 – Dy bomba kanë shpërthyer sot (e martë) në pushimoret spanjole Alikante dhe Benidorm, ku janë plagosur të paktën 8 persona, njofton BBCWorld. Bëhet e ditur se mjetet kanë shpërthyer në hotelin "Residencia Bahia" në Alikante dhe në hotelin "Nadal" në Benidorm.
Ndër të plagosur besohet të jenë katër zyrtarë policie dhe katër civilë. Shpërthimet kanë ndodhur pasi policia kishte marrë paralajmërimin nga grupi seperatist bask ETA se bombat ishin vënë në këto hotele. Mysafirët ishin evakuar nga hotelet.


Në malet e Andeve janë zhdukur rreth 18 alpinistë

Lima, 22 korrik 2003 – Rreth 18 alpinistë, kryesisht gjermanë, izraelitë, argjentinezë e venezuaelanë, janë zhdukur dhe disa syresh do të jenë plagosur në malet e Andeve, pasi një ortek apo mur akulli është shembur mbi ta, kanë bërë të ditur mbrëmë vonë zyrtarët e shpëtim-kërkimit, njofton Rojter.
Aksidenti ka ndodhur në malin Alpamajo, në lartësi mbidetare 9,030 këmbë, 300 mila në verilindje të Limës. Ende nuk dihet nëse ka pasur të vdekur. Helikopterët nuk kanë mundur të fluturojnë mbi vendin e ngjarjes, për shkak të erërave të fuqishme, ndërsa ekipeve shpëtimtare u nevojiten rreth 20 orë për të arritur atje.


Në luftimet e deritashme në Liberi kanë humbur jetën mbi 90 njerëz

Monrovia, 22 korrik 2003 – Në luftimet e deritashme shumë të përgjakshme në kryeqytetin e Liberisë, Monrovia, e kanë humbur jetën mbi 90 njerëz, ndërsa marinsat amerikanë në kompleksin e ambasadës amerikane i kanë evakuar me helikopterë punëtorët e huaj të ndihmave dhe gazetarët.
Presidenti Çarls Tejlor e ka përsëritur apelin për dërgimin sa më të shpejtë të forcave paqësore në këtë vend. Ai ka theksuar se mënyra më e mirë për të siguruar stabilitetin është me anë të trupave amerikane tokësore, që do t'i shtoheshin marinsave që e po ruajnë ambasadën.


Anan është për një rol më të fuqishëm të OKB-së në Irak

Nju Jork, 22 korrik 2003 - Sekretari i përgjithshëm i OKB-së, Kofi Anan, kërkon një plan të qartë kohor për tërheqjen graduale të trupave amerikane dhe britanike nga Iraku.
Duke paraqitur raportin për gjendjen në Irak në Këshillin e Sigurimit, Anan u shpreh sërish për një rol më të fuqishëm të OKB-së në Irak.
Ndërkohë në Irak u mbajtën protesta të reja kundër pushtimit amerikan. Në Nadshaf rreth 10 mijë njerëz protestuan kundër pushtimit të shtëpisë së një udhëheqësi fetar. Demonstruesit kanë gjuajtur me gurë ushtarët amerikanë.


Në Çeçeni vriten gjashtë ushtarë rusë dhe tre rebelë çeçenë

Moskë, 22 korrik 2003 - Në një përleshje luftarake në Republikën kaukaziane të Çeçenisë u vranë gjashtë ushtarë rus dhe tre kryengritës çeçenë, njoftoi agjensia ruse e lajmeve Interfaks, e cila thirret në burime të ushtrisë ruse.
Në Çeçeni kohëve të fundit ndodhin pothuaj çdo ditë përleshje të armatosura në mes të ushtarëve dhe rebelëve.