OPINIONE

KOMENT

DAULLJA E SHQYER E NJË POLITIKANI TË DËSHTUAR

Për më tepër habit fakti, se edhe pas të gjitha katrahurave që i përjetoi Kosova dhe populli shqiptar i Kosovës dhe pas katër vitesh lirie të merituar, Qosja nuk gjen forcë morale apo intelektuale që për gabimet e veta të mëdha në sferën e politikës kombëtare t'i kërkojë falje publike popullit shqiptar dhe para së gjithash presidentit të Kosovës dr.Ibrahim Rugovës, të cilit i ka borgj të madh moral, kur kihet parasysh e gjithë propaganda demagogjike e dhjetë viteve të fundit në adresë të dr.Rugovës.

22 korrik 2003 / Shkruan: Besim KRASNIQI

Inatet personale të Rexhep Qosjes, politikanit tashmë të dështuar politikisht në Kosovë ndaj dr.Ibrahim Rugovës si lider politik i shqiptarëve dhe si kryetar i LDK-së, partisë më të madhe shqiptare në Kosovë, janë të njohura që nga viti 1989 për mbarë opinionin tonë, andaj edhe nuk është ndonjë çudi e madhe kur edhe sot e kësaj dite, në intervistat shumë të rralla të këtij narcisoidi të hasim kritika të tipit qosist respektivisht të tipit marksist - leninist, thjesht pa argumente faktike dhe me përmbajtje krejtësisht inatçore dhe xhelozie.

Ajo që na shtyri të shkruajmë këtë koment, është intervista e Qosjes (e datës 5 korrik 2003) dhënë një gazete majtiste në Shqipëri, ku ky politikan i dështuar përveq që flet për çështjen politike të Kosovës, për marëdhëniet e partive politike të Kosovës, për politikën e bashkësisë ndërkombëtare ndaj çështjes së Kosovës, në pyetjen e fundit se "Cilat janë marrëdhëniet tuaja (të Rexhep Qosjes - v.i. B.K.) me presidentin e Kosovës, Ibrahim Rugovën", Qosja është përgjigjur kështu: "Nuk kam asnjë kontakt me të. Gabimet e tij janë aq të mëdha, saqë nuk kam mirëkuptim në asnjë mënyrë për pozitën, në të cilën ai gjendet".

Sa mirë që Qosja përmendi gabimet e mëdha, ku do të ndalemi për disa çaste, për t'i parë gabimet e vetë ish-politikanit Qosjes, i cili nuk paska mirëkuptim për pozitën në të cilën gjendet dr.Rugova, pra në pozitën e Presidentit të Kosovës, ku është zgjedhur me votën e lirë të shumicës së qytetarëve të Kosovës.

Nuk ishte gabim i madh i akademik Qosjes kur ky nuk pranoi të kyçet në proceset politike të Kosovës të filluara në vitet e 90-ta, me themelimin e LDK-së, kur atij iu ofrua edhe posti i kryetarit të LDK-së, derisa në anën tjetër shumica e akademikëve dhe intelektualëve tjerë iu bashkangjitën kësaj lëvizjeje gjithëpopullore?

Nuk ishte gabim i madh i Qosjes kur ky u deklarua atëbotë si "intelektual i pavarur", dhe atë mu në kohën kur Kosova kishte nevojë më së tepërmi për shtresën intelektuale të saj dhe kur ajo duhej drejtuar drejt një zgjidhjeje të mbarë politike?

Nuk ishte gabim i madh i tij, kur kritikonte dr.Rugovën, akademik Fehmi Agani, akademik Mark Krasniqin dhe partitë e tyre, derisa këta i prinin popullit të Kosovës mu në kohërat më të rrezikshme për secilin aktivist politik që angazhohej për çështjen e Kosovës, për pavarësimin e saj nga Serbia?

Mos nuk gaboi rëndë Qosja kur i shpalli luftë politike, deri në armiqësi të paparë, udhëheqësit demokrat dr.Sali Berishës, vetëm e vetëm pse ky ishte antikomunist dhe luftonte politikisht për një Shqipëri demokratike?

Nuk ishte gabim i madh kur Qosja e quajti "Revolucion i vonuar demokratik" veprimtarinë e forcave destruktive majtiste në krye me Fatos Nanon në rrezikimin e kufijve dhe të pavarësisë së shtetit shqiptar, respektivisht u doli krah atyre që morën pushtetin në mënyrë gangstere në Shqipëri?

Nuk ishte gabim nga ana e Qosjes, këtij "babai të kombit" kur i futi satelitët e tij (Hysenin, Hajrizin, Krasniqin, Bujën, Musmuratin etj.), në LDK për ta "marrë kalanë nga brenda" apo për t'a shkatërruar tërësisht LDK-në?

Apo nuk ishte gabim i madh i Qosjes, kur ky i cili kritikonte partitë ekzistuese politike të Kosovës dhe i cilësonte ato si "dekorim i Serbisë", themeloi partinë e tij të vogël majtiste (LBDK e më vonë LBD) mu në kohën kur shqiptarëve iu duhej uniteti politik përball Serbisë?

A nuk ishte Qosja ai i cili kritikoi vazhdimisht referendumin e shqiptarëve të Kosovës për pavarësi të organizuar nga LDK-ja dhe partitë tjera me orientim demokratik?

Nuk qenka gabim i madh kur letrari Qosja popullin shqiptar të Kosovës në librin e tij "I ringjalluri i penduar" e quan "popull qen" apo "fermë qenësh"?

Nuk e konsideron Qosja gabim të vetin kur në vitin 2002 popullit shqiptar në Shqipëri i "sygjeron" që për president të Shqipërisë të rizgjedhet adashi i tij ideologjik, socialisti Rexhep Mejdani?

Nuk konisderohen gabime të mëdha intervistat dhe artikujt e Qosjes në mediat majtiste të Kosovës, të cilat krijonin përçarje brenda subjekteve politike si dhe brenda vetë qytetarëve shqiptarë të Kosovës? Ku do gjejmë gabim më të madh se sa të injorohet publikisht disa herë vullneti i lirë i një populli të tërë, sidomos kur injoruesi Qosja ka grada shkencore dhe i takon shtresës intelektuale të po atij populli?

Vargu i gabimeve të mëdha të këtij politikani të "pensionuar" nga skena politike vazhdon të jetë edhe më i gjatë, por mendojmë se gabimet e lartëpërmendura mjaftojnë për një pasqyrim të saktë të personalitetit i cili për më shumë autoritetit, më tepër famë dhe për karrierë politike kritikon dhe zhvlerëson figura të çmuara politike, dhe në veçanti figurën madhështore të presidentit të Kosovës dr.Rugovën.

Për më tepër habit fakti, se edhe pas të gjitha katrahurave që i përjetoi Kosova dhe populli shqiptar i Kosovës dhe pas katër vitesh lirie të merituar, Qosja nuk gjen forcë morale apo intelektuale që për gabimet e veta të mëdha në sferën e politikës kombëtare t'i kërkojë falje publike popullit shqiptar dhe para së gjithash presidentit të Kosovës dr.Ibrahim Rugovës, të cilit i ka borgj të madh moral, kur kihet parasysh e gjithë propaganda demagogjike e dhjetë viteve të fundit në adresë të dr.Rugovës.

Me këtë gjest Qosja do të tregonte se ky e ka kuptuar (sado me vonesë) se vullneti i popullit duhet respektuar çdoherë, qoftë edhe kur është fjala për kundërshtarin e vet politik, në të kundërtën, do të na jep të kuptojmë se inatet me motive personale dhe karrieriste vazhdojnë të jetojnë në shpirtin e "babait" të asaj pjese të popullit, të cilën ky nuk e konsideron si "popull qen".

Copyright©2000-2003 Trepca.net - Të gjitha të  drejtat e rezervuara.