OPINIONE

PAS PARALAJMËRIMEVE RRETH BISEDIMEVE SHQIPTARO-SERBE MBI STATUSIN E ARDSHËM POLITIK TË KOSOVËS

CILI DO TË JETË ÇMIMI I PAVARËSISË SË KOSOVËS

Nga disa segmente politike shqiptare (pa asnjë kompetencë adekuate) në Prishtinë janë rritur zërat mbi "domosdoshmërinë" e bisedimeve me Serbinë mbi statusin e ardhshëm politik të Kosovës, pa precizuar (publikisht) se për çfarë do të duhej biseduar me Serbinë kur marrim parasysh atributet e lartëpërmendura të Kosovës, pastaj kush do të duhej të hyjë në këto bisedime të "domosdoshme", me çfarë platforme politike dhe se ku bazohet ajo platformë (nëse ajo ekziston diku)?

22 korrik 2003 / Shkruan: Besim KRASNIQI

Që nga çlirimi e deri më sot, Kosova me ndihmën e bashkësisë ndërkombëtare, edhe përkundër Rezolutës 1244, e cila i ka dhënë disa kompetenca më shumë administratorëve ndërkombëtarë, megjithatë ka arritur t'i krijojë të gjitha atributet e një shteti të pavarur, siç janë Presidenti, Qeveria, Kryeministr, Parlamenti, Policia, TMK-ja (si ushtri e ardhshme e Kosovës) si dhe Ligjet e pavarura nga ato të Sërbisë, të nënshkruara kohë më parë nga ish-administratori gjerman Michael Steiner, gjë që nënkupton se nga e ashtuquajtura "krahina autonome" e Kosovës nuk ka mbetur asgjë, përveq se emri "krahinë" të cilin vazhdojnë ta shpërdorojnë akoma politikanët serb për interesa të veta politike si dhe disa nga aletatet e Serbisë në nivel ndërkombëtar.

Nga disa segmente politike shqiptare (pa asnjë kompetencë adekuate) në Prishtinë janë rritur zërat mbi "domosdoshmërinë" e bisedimeve me Serbinë mbi statusin e ardhshëm politik të Kosovës, pa precizuar (publikisht) se për çfarë do të duhej biseduar me Serbinë kur marrim parasysh atributet e lartëpërmendura të Kosovës, pastaj kush do të duhej të hyjë në këto bisedime të "domosdoshme", me çfarë platforme politike dhe se ku bazohet ajo platformë (nëse ajo ekziston diku)? Nëse dikush nga këto segmente politike në Prishtinë mendon se këto çështje duhet fshehur nga qytetarët e Kosovës, nga të cilët janë kërkuar votat nga secila parti politike shqiptare, dhe nëse dikush mendon se zgjidhja e çështjes politike të Kosovës mund të zgjidhet drejtë edhe pa e njoftuar opinion shqiptar me kohë mbi arsyet e "domosdoshmërisë" së këtyre bisedimeve, pastaj mbi palën që do ta përfaqsojë Kosovën si dhe mbi platformën e palës shqiptare (për një platformë të tillë shqiptare nuk dihet asgjë publikisht!?) në këto bisedime, atëherë ata gabohen rëndë.

Pastaj, do të duhej ta dinim se sa do të jenë të përgaditur përfaqsuesit e palës shqiptare në këto bisedime?A janë të vetëdijshëm ata për seriozitetin e këtyre bisedimeve? A janë kristalizuar të gjitha pikat e bisedimeve në mënyrë të drejtë dhe në dobi të çështjes së Kosovës? Pra, siç shihet, mbeten shumë çështje që kërkojnë përgjigje publike para elektoratit, i cili elektorat për momentin ka mbetur krejtësisht jashtë rrjedhave politike rreth statusit të Kosovës. Dihet vetëm ajo që shkruhet në media dhe çfarë thuhet në analizat e analistëve tanë dhe të huaj, por asgjë konkrete nuk dëgjohet nga ata që pretendojnë të hyjnë "patjetër" në bisedime me palën serbe!?

Eshtë e drejtë e qytetarëve të Kosovës të njihen me të gjitha veprimet e të gjitha segmenteve politike të Kosovës që mendojnë të angazhohen për zgjidhjen e statusit politik të Kosovës në bisedimet e "domosdoshme" me palën serbe, edhe përkundër faktit se këto segmente politike flasin vazhdimisht për praninë e palës së tretë në këto bisedime, pasiqë palë e tretë mund të jetë edhe Franca, Greqia apo Rusia!? Ato segmente politike që ndërmarin "ekskurzione politike" drejt Francës dhe drejt figurave të dyshimta ndërkombëtare për anti-pavarësinë e Kosovës, për të kërkuar mbështetjen e tyre në bisedimet me Serbinë, pa e parë të arsyeshme që për këto "eksurzione politike" dhe për qëllimet e tyre të njoftohet opinioni i brendshëm i Kosovës, drejtëpërdrejtë e humbasin të drejtën morale tek qytetarët e Kosovës, për çfarëdo iniciative "të domosdoshme" rreth çështjes së Kosovës.

Shqiptarët e Kosovës e kanë paguar mjaft shtrenjt çmimin e pavarësisë së Kosovës; ata i kanë zgjedhur me votën e tyre të lirë (të larë shumë herë edhe me gjak) përfaqsuesit e tyre politik që duhet ta përfaqsojnë Kosovën, në të gjitha proceset politike që kanë të bëjnë me zgjidhjen e çështjes politike të Kosovës, prandaj është plotësisht e papranueshme që pavarësimi politiko-administrativ i Kosovës të vie me territore të ndara në dëm të Kosovës, me përndjekje, emigrime të dhunshme dhe me  vrasje të reja të shqiptarëve buzë kufijve të Kosovës, ashtu siç e paramendojnë shumë pushtetarë të Serbisë që na qenkan të gatshëm të bisedojnë mbi statusin politik të Kosovës, bashkë me disa segmente politike shqiptare në Prishtinë, të cilat mezi presin takime të këtij niveli.

Copyright©2000-2003 Trepca.net - Të gjitha të  drejtat e rezervuara.