Lajme

E hëne 21 korrik 2003

Përmbajtja:

• Presidenti Rugova dënon shpërthimet e mbrëmshme në Prishtinë

• Qeveria e Kosovës i dënon incidentet e mbrëmshme

• Ende nuk dihen motivet e shpërthimeve të mbëmshme në Prishtinë

• Sipas policisë së UNMIK-ut, në afërsi të shtëpisë së Nexhat Dacit ka pasur të shtëna armësh

• Mbrëmë në Prishtinë kanë ndodhur dy shpërthime të fuqishme

• Pjesëtarët e KFOR-ut dhe të policisë dje kanë deaktivizuar një granatë dorë e vendosur në Tregun e gjelbërt të Prishtinës

• Bashkimi Evropian propozon sot kandidatët për postin e shefit të UNMIK-ut në Kosovë

• Sipas agjencisë suedeze të lajmeve, Hari Holkeri do të jetë kryeadministrator i ri i Kosovës

• Xh. Xhonson: "Privatizimi është vetëm një pjesë e reformës ekonomike në Kosovë"

• Ndërkombëtarët nuk konfirmojnë blerjen e pronave të shqiptarëve në veri të Mitrovicës

• Për shkak të një defekti në TC e Kosovës - reduktime të energjisë elektrike

• Oda Ekonomike dhe "Riinvesti" e vlerësojnë pozitivisht fillimin e procesit të privatizimit

• PVD i vlerëson të ngadalshme proceset politike në Luginën e Preshevës

• Policia malazeze merr sot mbikëqyrjen e kufirit mes Kosovës dhe Malit të Zi

• Sali Berisha kërkon dorëheqjen e kryeministrit Nano

• Nano dhe Moisiu kanë biseduar për zëvendësimin e Metës dhe Nakos

• Opozita kërkon dorëheqjen e Fatos Nanos

• Kryeministri serb thotë se shkatërrimi i unionit Serbi - Mali i Zi do të thotë krijim i Kosovës së pavarur

• Një aeroplan me 12 turistë amerikanë dhe 2 afrikanojugorë është rrëzuar në malet e Kenisë

• Paul Bremer: Sadam Huseini mund të jetë gjallë

• Dy ushtarë amerikanë janë vrarë në Irakun verior

• SHBA: 24 të dyshuar si talebanë vriten në Afganistan

• Takim Sharon-Abaz për ta çuar përpara planin ndërkombëtar të paqes

• Të paktën 11 vetë e kanë humbur jetën nga rrëshqitja e dheut në Japoninë jugore

• Fotoreporterja iraniano-kanadeze Zahra Kazemi ka vdekur në burgun e Teheranit

• Toni Bler gjendet për vizitë dyditëshe në Kinë

• Zgjerohen hetimet kundër fermerit kanadez, të akuzuar për vrasjen e 15 grave

• Në veri të Bagdadit janë vrarë një ushtar amerikan dhe një përkthyes irakian

• Në Bregun Perëndimor operojnë grupe terroriste izraelite

Presidenti Rugova dënon shpërthimet e mbrëmshme në Prishtinë

 

Prishtinë, 21 korrik 2003 - Presidenti i Kosovës, dr Ibrahim Rugova, dënon ashpër shpërthimet e mbrëmshme në Prishtinë, duke u kërkuar qytetarëve që të jenë vigjilentë.

"I dënojmë ashpër shpërthimet që u bënë mbrëmë në Prishtinë ku pati dëme materiale.

Këto shpërthime kanë për qëllim shqetësimin e qytetarëve dhe prishjen e imazhit pozitiv të Kryeqytetit dhe të Kosovës si vend i sigurtë, në kohën kur siguria dhe progresi i Kosovës ngriten gjithnjë e më shumë.

Këta kriminelë duhet të ndiqen nga organet e policisë dhe të dalin para drejtësisë së Kosovës.

 

Kërkojmë nga qytetarët e Kosovës dhe të Kryeqytetit të jenë vigjilentë në këto ditë vere, që është stina e pushimeve", thuhet në reagimin e Presidentit të Kosovës, dr Ibrahim Rurgova.

 

 

Qeveria e Kosovës i dënon incidentet e mbrëmshme

 

Prishtinë, 21 korrik 2003 - Qeveria e Kosovës i dënoi fuqimisht shpërthimet e mbrëmshme në Prishtinë.
"Qeveria e Kosovës, ndonëse nuk ka ende informacione zyrtare, rreth shpërthimeve të mbrëmshme në Prishtinë, dënon çdo formë të dhunës që e rrezikon rendin dhe sigurinë në Kosovë.

 

Elementë dhe struktura kriminale tentojnë ta destabilizojnë situatën politike dhe të sigurisë, të dëmtojnë imazhin e Kosovës në planin ndërkombëtar dhe të mbjellin opasiguri permanente.

Ngjarjet e tilla u shkojnë për shtati vetëm qarqeve politike dhe shtetërore serbe, të cilat janë të interesuar për krijimin e kaosit dhe stagnimit politik e ekonomik në Kosovë.

Qeveria e Kosovës i bën thirrje policisë së UNMIK-ut që të marrë të gjitha masat për ndriçimin e këtyre ngjarjeve dhe ngjarjeve të tjera që kanë ndodhur në Kosovë kohët e fundit.

Gjithashtu, Qeveria e Kosovës i fton të gjitha qytetarët që të jenë në shërbim të sigurisë dhe zhvillimeve pozitive në Kosovë.

Qeveria e Kosovës është vendosur që në Kosovë të mbretërojë rendi dhe ligji për të gjithë qytetarët pa dallim përkatësie, sepse vetëm kështu mund të krijohet një prosperim e një klimë pozitive, si dhe një e ardhme demokratike sipas standardeve evropiane", thuhet në komunikatën e Qeverisë së Kosovës lidhur me shpërthimet e mbrëmshme në Prishtinë.

 

 

Ende nuk dihen motivet e shpërthimeve të mbëmshme në Prishtinë

 

Prishtinë, 21 korrrik - Policia ndërkombëtare në Kosovë tha se ende nuk dihen autorët apo motivet e sulmeve të mbrëmshme në Prishtinë. Komisioneri i policisë së UNMIK-ut, Shtefan Feller, i cilësoi këto shpërthime si "sulme qyqare ndaj policisë dhe institucioneve gjyqësore" të Kosovës dhe shtoi se këto shperthime mund të kenë lidhje me incidentet tjera që kanë ndodhur kohët e fundit në Kosovë.

"Të dhënat e deritashme japin indikacione të qarta se ekziston një lidhje midis disa prej këtyre incidenteve. Ka spekulime se këto incidente mund të lidhen me vendimin e para disa ditëve të Gjykatës së Qarkut në Prishtinë për grupin e Llapit", deklaroi Feller.

Zëdhënësi i policisë së UNMIK-ut, Beri Fle]ër, tha se ende nuk është identifikuar asnjë i dyshuar lidhur me shpërthimet e mbrëmshme. Por, ai nuk e përjashtoi mundësinë që këto shpërthime të jenë reagim ndaj dënimit të 4 pjesëtarëve të ish-UÇK-së në Zonën e Llapit.

Beri Flleçër tha se tash për tash policia nuk ka asnjë të dyshuar apo dëshmitar lidhur me këto dy shpërthime. Ai shprehu bindjen se qytetarët i dënojnë këto shpërthime.

"Ne besojmë se incidentet e mbrëmshme janë raste të izoluara dhe nuk e kanë përkrahjen e qytetarëve", theksoi Fleçër.

Hetimet lidhur me shpërthimet e mbrëmshme do t'i bëjnë njësitet për hetimin krimeve serioze në rajonin e Prishtinës.

 

 

Sipas policisë së UNMIK-ut, në afërsi të shtëpisë së Nexhat Dacit ka pasur të shtëna armësh

 

Prishtinë, 21 korrik 2003 - Sipas policisë së UNMIK-ut mbrëmë në afërsi të shtëpisë së Kryetarit të Kuvendit të Kosovës janë dëgjuar të shtëna armësh.

Komisioneri i policisë së UNMIK-ut, Shtefan Feller, ka deklaruar sot para gazetarëve se rreth orës 3 të mëngjesit ka pasur të shtëna armësh në afërsi të shtëpisë së z. Daci.

Këto njoftime i ka përgënjeshtruar Ramush Tahiri, këshilltar i kryeparlamentarit Daci. Ai ka thënë se z. Daci dhe familja e tij nuk kanë pasur asnjë shqetësim dhe asnjë njoftim nga policia për ndonjë të shtënë në afërsi të shtëpisë.

 

 

Mbrëmë në Prishtinë kanë ndodhur dy shpërthime të fuqishme

 

Prishtinë, 21 korrik 2003 - Mrëmë rreth orës 21:00 në Prishtinë kanë ndodhur dy shpërthime të fuqishme. Shpërthimi i parë ka ndodhur afër Gjykatës së Qarkut, ndësa i dyti - në afërsi të stacionit policor numër 2, ku gjendet njësiti rajonal për krime serioze.

Zëdhënësi i policisë së UNMIK-ut, Derek Çapell, ka bëtë të ditur se shpërthimet lanë shkaktuar vetëm dëme materiale, ndërsa viktima në njerësxz nuk ka pasur.

 

Ai ka thënë se sipas hetimeve të para para Gjykatës së Qarkut ka shpërthyer një bombë dore, ndërsa te stacioni i policisë dyshohet se bëhet fjalë për granataheshës.

 

Dy vendet në të cilat kanë ndodhur shpërthimet janë mbajtur të bllokuara deri vonë nga ppjesëtarët e policisë së UNMIK-ut dhe të SHPK-së si dhe nga pjesëtarët e KFOR-it.

Tash për tash nuk ka asnjë informacion lidhur me autorët e këtyre incidenteve. Njësiti i specializuar antikrim po i zhvillon hetimet.

 

 

Pjesëtarët e KFOR-ut dhe të policisë dje kanë deaktivizuar një granatë dorë e vendosur në Tregun e gjelbërt të Prishtinës

 

Prishtinë, 21 korrik 2003 - Pjesëtarët e KFOR-ut, të policisë së UNMIK-ut dhe të Shërbimit Policor të Kosovës e kanë deaktivizuar dje një granatë dore, e cila ishte vendosur në Tregun e Gjelbërt të Prishtinës, në afërsi të RTK-së.

Që nga ora 7:00 e deri në orën 9:00, kur granata është larguar, kjo pjesë e qytetit ishte e bllokuar. Organet policore nuk kanë dhënë informacione se kush dhe kur është vendosur ky mjet shpërthyes.

Zëdhënësi i policisë së UNMIK-ut, Beri Fleçër, ka bërë të ditur se njoftimi ishte bërë rreth orës 7 të mëngjesit nga një qytetar. Ai ka thënë se shumë shpesh ndodh që qytetarët t'i lënë granatat e dorës në rrugë, nga frika se gjatë bastisjeve mund t'u gjenden në shtëpi.

 

 

Bashkimi Evropian propozon sot kandidatët për postin e shefit të UNMIK-ut në Kosovë

 

Bruksel, 21 korrik 2003 - Bashkimi Evropian do të propozojë sot kandidatë të rinj për postin e shefit të Misionit të OKB-së në Kosovë, njofton Rojeters, duke u mbështetur në burime diplomatike.

Sipas këtyre burimeve, kandidat për këtë post janë politikani portugez Hoze Kutiliero, ambasadori suedez në OKB, Rals Ekhaus, dhe përfaqësuesi norvegjez në NATO, Kaj Ajde.

Për këto kandidatura do të debatojnë sot ministrat e jashtëm të BE-së dhe më pas do t'ia dërgojnë për shqyrtim sekretarit të përgjithshëm të OKB-së.

BE është më se i interesuar që sa më shpejt të vijë deri te emërimi i kryeadministratorit të ri të Kosovës. Zyrtarët e BE-së e cilësojnë këtë si çështje urgjente, duke nënvizuar se administratori i Kosovës është i domosdoshëm për shkak të proceseve që kanë filluar, sidomos me ato që kanë të bëjnë me fillimin e dialogut ndërmjet Prishtinës e Beogradit.

 

 

Sipas agjencisë suedeze të lajmeve, Hari Holkeri do të jetë kryeadministrator i ri i Kosovës

 

Nju-Jork, 21 korrik 2003 - Sipas agjencisë suedeze të lajmeve TT, ish-kryeministri finlandez Hari Holkeri do të jetë kryeadministrator i ri i Kosovës. Kjo agjenci, duke iu referuar një burimi të sigurtë në OKB në Nju-Jork, ka bërë të ditur se sekretari i përgjithshëm i OKB-së, Kofi Anan, ia ka propozuar këtë post ish-kryeministrit finlandez Hari Holkeri, dhe ai e ka pranuar.

Hari Holkeri ka lindur në vitin 1937. Ka qenë kryetar i Qeverisë së Finlandës në vitet 1987-1991. Ai ishte kryesues i Asamblesë së Përgjithshme të OKB-së në vitin 2000-2001.

 

 

Xh. Xhonson: "Privatizimi është vetëm një pjesë e reformës ekonomike në Kosovë"

 

Prishtinë, 21 korrik 2003 - Drejtori i privatizimit në Agjencinë Kosovare të Mirëbesimit, Xhon Xhonson, vlerëson se privatizimi është vetëm një pjesë e reformës ekonomike në Kosovë. Ai thotë se është me rëndësi që Qeveria e Kosovës të hartojë një rregullore dhe të krijojë një ambient ligjor që do të nxiste interesimin e investitorëve.

Z. Xhonson i ka deklaruar radios "Evropa e lirë" se gjatë përvojës së tij dhjetëvjeçare në shumë vende të botës, është ballafaquar me kundërshtime të procesit të privatizimit, posaçërisht nga ana e punëtorëve, të cilët kanë frikë se do t'i humbasin vendet e tyre të punës.

 

Për këtë arsye, ai thotë se duhet theksuar se privatizimi nuk do të thotë shuarje e ndërmarrjeve, por vendosje e një menaxhimi më të fortë.

Xhonson shpreh bindjen se procesi i privatizimit në Kosovë do të vazhdojë me sukses, ndërsa ofertuesit e tenderëve të parë i ka cilësuar seropzë.

"Ne e dimë se ofertuesit fitues janë njerëz me përgjegjësi. Kemi pasur 22 oferta, më shumë se sa unë kam pritur, kështuqë programi ka një fillim shumë të suksesshëm". ka thënë z. Xhonson.

 

 

Ndërkombëtarët nuk konfirmojnë blerjen e pronave të shqiptarëve në veri të Mitrovicës

 

Mitrovicë, 21 korrik 2003 - Zyrtarët ndërkombëtarë në Mitrovicë thonë se nuk mund t'i konfirmojnë pohimet se Qeveria e Serbisë ka filluar t'i blejë pronat e shqiptarëve në pjesën veriore tëqytetit.

Zëdhënësi i UNMIK-ut, Xhorxhi Kakuk, thotë se për këtë problem ka dëgjuar vetëm në media.

"Ne nuk jemi njoftuar zyrtarisht për këto kontrata, pasi ato janë private, janë kontrata dypalëshe, dhe UNMIK-u nuk e kontrollon secilin aspekt të jetës", ka thënë Kakuk.

Por, Faruk Korenica, anëtar i vetëm shqiptar i Bordit Këshilldhënës të UNMIK-ut në veri të Mitrovicës, thotë se çështjen e shitblerjes së pronës së shqiptarëve në veri të qytetit e ka shtruar te UNMIK-u dhe të institucionet kosovare.

 

Ai mendon se bëhet fjalë për një mënyrë dinake të spastrimit etnik të kësaj pjese të Kosovës.

 

 

Për shkak të një defekti në TC e Kosovës - reduktime të energjisë elektrike

 

Prishtinë, 21 korrik 2003 - Nga Korporata Energjetike e Kosovës bëhet e ditur se furnizimi me energji elektrike po bëhet sipas orarit

katër orë me rrymë, dy pa të. Ky reduktim ka filluar të zbatohet prej ditë së djeshme, për shkak të defekteve në termocentralet e Kosovës. Në njoftim nuk saktësohet natyre e defekteve dhe kohëzgjatja e riparimit të tyre.

 

 

Oda Ekonomike dhe "Riinvesti" e vlerësojnë pozitivisht fillimin e procesit të privatizimit

 

Prishtinë, 21 korrik 2003 - Zyrtarët e Odës Ekonomike të Kosovës dhe të Institutit për hulumtime zhvillimore "Riinvest" e vlerësojnë pozitivisht emërimin e blerësve të pesë ndërmarrjeve të para shoqërore, që shënon fillimin e procesit të privatizimit në Kosovë. Ata thonë se ky proces është vonuar, prandaj ka ndikuar në zhvlerësimin e ndërmarrjeve shoqërore dhe uljen e çmimit të tyre në treg.

 

 

PVD i vlerëson të ngadalshme proceset politike në Luginën e Preshevës

 

Preshevë, 21 korrik 2003 - Kryesia e Partisë për Veprim Demokratik vlerësoi se përkundër rezultateve fillestare, në Luginën e Preshevës dy vitet e kaluara u zhvillua një proces shumë i ngadalshëm politik, rezultatet e të cilit janë dukshëm nën planin dhe programin e dy qeverive të Beogradit të vitit 2001 për zgjidhjen paqësore të krizës në këtë rajon.

Kryesia e kësaj partie vlerëson se Qeveria e Serbusë po e vë në pikpyetje përcaktimin për zgjidhje politike të krizës me paralajmërimin zyrtar të ndërtimit të bazës militare për forcat e veprimit special në rajon.

 

Ajo u bën ftesë strukturave shtetërore që ta rishqyrtojnë këtë vendim dhe t'i bashkangjiten iniciativave ndërkombëtare për zhvillim ekonomik dhe për nxitjen e bashkëpunimit ndërkufitar, duke e shpallur këtë rajon zonë të lirë tregtare dhe doganore.

Kryesia e PVD-së vlerëson se riaktivizimi i Këshillit Koordinues të Shqiptarëve në Luginën e Preshevës nuk guxon të bllokohet për shkak shumicës që e ka kjo parti në Kuvendet e Preshevës, Bujanovcit dhe Medvegjës. Njëkohësisht ajo gjykon fushatën e egër kundër PVD-së si dhe strukturave të vetadministrimit lokal në Preshevë dhe Bujanovc.

Kryesia e PVD-së rithekson domosdoshmërinë e unifikimit të qëndrimeve të subjekteve politike rreth çështjeve strategjike.

"Vetëm me koordinim të mirëfilltë të veprimit politik në kuadër të një procesi të këtillë të demokratizimit, që do t'i përfillë specifikat etnike, gjuhësore, kulturore, konfesionale, politike dhe ekonomike të Luginës, shqiptarët do të arrijnë t'i realizojnë të drejtat individuale dhe kolektive sipas normave më të avansuara ndërkombëtare", theksohet në reagimin e kryesisë së Partisë për Veprim Demokratik.

 

 

Policia malazeze merr sot mbikëqyrjen e kufirit mes Kosovës dhe Malit të Zi

 

Podgoricë, 21 korrik 2003 - Policia e Malit të Zi do të marrë sot nën mbikëqyrje kufirin me Kosovë, në gjatësi prej 75 kilometrash, të cilin aktualisht e kontrollon ushtria serbo-malazeze.

Autoritetet malazeze thonë se me KFOR-in dhe UNMIK-un i kanë bashkërenduar veprimet lidhur me mbikëqyrjen e kufirit, me qëllim që të vendoset një bashkëpunim i dyanshëm për sigurinë në rajon.

Marrja përsipër e ruajtjes së kufirit mes Malit të Zi dhe Kosovës nga ana e policisë malazeze bëhet në përputhje me vendimin e Këshillit Suprem të Mbrojtjes, sipas të cilit sigurimi i kufirit me Kosovën dhe kontrolli i zonës tokësore të sigurisë, kalon në kompetencë të Ministrisë së Punëve të Brendshme të Malit të Zi.

 

 

Sali Berisha kërkon dorëheqjen e kryeministrit Nano

 

Tiranë, 21 korrik 2003 - Kryetari i Partisë Demokratike të Shqipërisë, Sali Berisha, kritikoi ashpër kryeministrin Fatos Nano dhe ish-ministrin e Jashtëm Ilir Meta. Ai e cilësoi Nanon "të falimentuar", ndërsa Metën "demagog". Vlerësim pozitiv ai pati vetëm për ish-ministrin e Integrimit, Sokol Nako.

Duke folur për situatën e krijuar pas dorëheqjes së Ilir Metës dhe Sokol Nakos, Berisha tha se opozita ka si objektiv kryesor largimin e kryeministrit Nano.

"Ne kërkojmë largimin e kryeministrit, sepse ky njeri është shkatërrimtari i qeverisjes së këtij vendi", tha Berisha.

 

 

Nano dhe Moisiu kanë biseduar për zëvendësimin e Metës dhe Nakos

 

Tiranë, 21 korrik 2003 - Kryeministri Fatos Nano është konsultuar dje me presidentin Alfred Moisiu rreth zbatimit të afateve kushtetuese për dekretimin e miratimin e ministrave të rinj, në rrugë institucionale.

Sipas njoftimeve nga Tirana, në takimin e tyre në vilën qeveritare në plazhin e Durrësit, Nano i ka kërkuar Moisiut të mos pengohen procedurat për emërimin e dy ministrave të rinj, duke respektuar të gjitha afatet që përcakton Kushtetuta. Në njoftim thuhet se Nano ka bërë thënë se plotësimi i vendeve të lira në qeveri duhet të bëhet para mbylljes së punimeve të kuvendit, brenda muajit korrik.

 

 

Opozita kërkon dorëheqjen e Fatos Nanos

 

Tiranë, 21 korrik 2003 - Kryeministri i Shqipërisë Fatos Nano, po vazhdon konsultimet me drejtues të Partisë Socialiste për emrat e ministrave të rinj që do të zëvendësojnë Ilir Metën dhe Sokol Nakon, të cilat dhanë dorëheqje. Kjo çështje pritet të diskutohet nesër në Kryesinë e PS-së.

Ndërkohë, opozita ka kërkuar dorëheqjen e kryeministrit Nano. Nënkryetarja e Partisë Demokratike, Jozefina Topalli, i ka bërë thirrje presidentit Moisiu të fillojë konsultimet e partive politike për krijimin e një qeverie me një bazë të gjerë.

Vetë Nano ka premtuar se çështja e zëvendësimit të dy ministrave do të përfundojë brenda muajit korrik, kur përfundon sezoni i punimeve të Parlamentit të Shqipërisë.

 

 

Kryeministri serb thotë se shkatërrimi i unionit Serbi - Mali i Zi do të thotë krijim i Kosovës së pavarur

 

Beograd, 21 korrik 2003 - Në një intervistë dhënë mediave të Beogradit, kryeministri i Serbisë Zoran Zhivkoviq ka shprehur bindjen se Serbia do të hyjë në BE në vitin 2007. Me këtë rast, ai ka kritikuar forcat e brendshme, të cilat dëshirojnë shkatërrimin e unionit Serbi-Mali i Zi, sepse, sipas tij "përfitimin më të madh nga kjo do ta kishin ekstremistët shqiptarë".

Zhivkoviq ka theksuar se shkatërrimi i bashkësisë Serbi - Mali i Zi do të thotë krijimi i Kosovës së pavarur. Duke folur lidhur me vizitën e tij të planifikuar në Shtetet e Bashkuara, Zhivkoviq ka thënë se njëra nga temat kryesore në bisedimet me zyrtarët amerikanë do të jetë çështja e Kosovës.

 

 

Një aeroplan me 12 turistë amerikanë dhe 2 afrikanojugorë është rrëzuar në malet e Kenisë

 

Keni, 21 korrik 2003 – Një aeroplan i lehtë, i cili barte 12 turistë amerikanë dhe dy afrikanojugorë, anëtarë të ekuipazhit, është rrëzuar në malet keniane të Kenisë qendrore, njofton BBCWorld. Mendohet se askush nuk ka shpëtuar. Aeroplani kishte cak një rezervat gjuetie në veri të Kenisë.

 

 

Paul Bremer: Sadam Huseini mund të jetë gjallë

 

Bagdad, 21 korrik 2003 - Administratori civil amerikan në Irak, Paul Bremer, thotë se ka mundësi që ish-presidenti irakian, Sadam Husein, të jetë gjallë dhe i fshehur në Irak.

Ai tha gjithashtu se amerikanët duhet të përgatiten për një proces të gjatë në Irakun e pasluftës, por shtoi se nuk e di se sa vjet do të duhen për ta përfunduar misionin e udhëhequr nga Shtetet e Bashkuara në këtë vend.

 

 

Dy ushtarë amerikanë janë vrarë në Irakun verior

 

Bagdad, 21 korrik 2003 - Dy shtarë amerikanë janë vrarë dje në Irakun verior, kur u sulmua autokolona e tyre.

Po dje, në pjesën jugore të Bagdadit është plagosur një punonjës i Kombeve të Bashkuara, gjatë një sulmi në dy automjete. Ky është sulmi i parë në punonjës të ndihmave në Irak.

 

 

SHBA: 24 të dyshuar si talebanë vriten në Afganistan

 

Kabul, 21 korrik 2003 - Zyrtarë ushtarakë amerikanë thonë se gjatë luftimeve në afërsi të kufirit me Pakistanin, forcat e koalicionit në Afganistanin jugor kanë vrarë rreth 24 persona të dyshuar si ekstremistë talebanë.

Një zëdhënës ushtarak në kryqytetin afgan, Kabul, tha se luftimet ndodhën të shtunën, pas sulmit kundër një autokolone amerikane afër qytetit Spin Boldak.

Nënkoloneli Dauglas Leforxh tha se 5 prej sulmuesve u vranë nga trupat tokësore të koalicionit, kurse 19 të tjerë, të cilët u përpoqën të iknin nëpër kodrat përrreth, u vranë nga helikopterë sulmues amerikanë.

Ndërkohë, zyrtarë afganë thanë se avionët amerikanë sulmuan të shtunën zona të dyshuara si pozicione të luftëtarëve talebanë pranë Spin Boldakut, pasi guerilët sulmuan një postbllok qeveritar. Rreth humbjeve të shkaktuara gjatë këtij operacioni ka njoftime kundërthënëse.

 

 

Takim Sharon-Abaz për ta çuar përpara planin ndërkombëtar të paqes

 

Jerusalem, 21 korrik 2003 - Kryeministri izraelit Ariel Sharon dhe homologu i tij palestinez, Mahmud Abaz, u takuan në Jeruzalem për të çuar përpara planin ndërkombëtar për paqe në Lindjen e Mesme.

Lajmet bëjnë të ditur se zoti Abaz kërkoi lirimin e palestinezëve të burgosur, tërheqjen e trupave izarelite nga zonat palestineze të Bregut Perëndimor dhe heqjen e rrethimit të selisë së udhëheqësit palestinez, Jaser Arafat, në Ramallah.

Zyrtarët izraelitë thanë se lidhur me lirimin e të burgosurve nuk do të merret asnjë vendim para takimit të së mërkurës së një komisioni të kabinetit izraelit, që merret me çështjen e të burgosurve.

 

 

Të paktën 11 vetë e kanë humbur jetën nga rrëshqitja e dheut në Japoninë jugore

 

Tokio, 21 korrik 2003 – Rrëshqitja e dheut, e shkaktuar nga rrebeshi i shirave gjatë vikendit, ka shkaktuar vdekjen e të paktën 11 vetave dhe zhdukjen e 11 të tjerëve, në Japoninë jugore, kanë bërë të ditur zyrtarët sot (e hënë), njofton Rojter.

Qindra ushtarë, policë dhe zjarrfikës kanë filluar heret në agim operacionet e shpëtimit të njerëzve të zhdukur.

 

 

Fotoreporterja iraniano-kanadeze Zahra Kazemi ka vdekur në burgun e Teheranit

 

Teheran, 21 korrik 2003 – Fotoreporterja iraniano-kanadeze ka vdekur nga gjakderdhja në tru, si rrjedhojë e goditjes në kokë që ka shkaktuar thyerjen e kafkës, ka bërë të ditur një zyrtar hetusie, njofton BBCnews. Në njoftim thuhet se Zahra Kazemi ka vdekur "ose nga goditja e një objekti të fortë në kokë ose nga goditja e kokës së saj në një objekt të fortë".

Znj. Kazemi, 54-vjeçare, është rrahur deri në vdekje pas arrestimit të saj më 23 qershor, duke dhënë kështu pamjen e realitetit të burgut të Teheranit. Ajo është shpallur e vdekur pasi kishte rënë në komë.

 

Presidenti i Iranit, Muhamed Katami, i ka urdhëruar katër ministra për të hetuar rastin e vdekjes së fotoreporteres së pavarur. Ky rast ka tensionuar marrëdhëniet ndërmjet Teheranit dhe Otavës.

 

 

Toni Bler gjendet për vizitë dyditëshe në Kinë

 

Pekin, 21 korrik 2003 - Kryeministri britanik Toni Bler ka mbërritur mbrëmë në Pekin, për një vizitë 2 ditëshe. Në bisedimet e tij me autoritetet shtetërore të Kinës pritet të diskutohet rreth programeve bërthamorë të Koresë Veriore.

Kjo ka qenë temë qendrore edhe në takimin e djeshëm të kryeministrit britanik, Toni Bler, me presidentin e Koresë Jugore, Roh Moo-Hyun, në të cilin është rënë dakort se dialogu është mënyra më e mirë për zgjidhjen e krizës bërthamore të Koresë së Veriut.

Pas bisedimeve në Seul, kryeministri Bler ka thënë se kjo krizë duhet të zgjidhet me ndjeshmëri të veçantë. Ai ka theksuar se për zgjidhjen e krizës duhet të angazhohen edhe Japonia dhe Koreja e Jugut.

 

 

Zgjerohen hetimet kundër fermerit kanadez, të akuzuar për vrasjen e 15 grave

 

Vankuver, 21 korrik 2003 – Hetimet për fermerin kanadez, i cili është akuzuar për vrasjen e 15 grave, janë zgjeruar, njofton BBCWorld.

Policia e qytetit Vankuver ka hetuar fermën e Robert Piktonit lidhur me rreth 60 femra të zhdukura.

 

Hetimet në këtë fermë kanë filluar vitin e kaluar. Më vonë ndaj pronarit të saj, z. Pikton, u ngritën akuza për vrasje.

Deri më tash, ai akuzohej për vrasjen e 15 grave të zhdukura, por tash pritet zgjerimi i akuzës edhe për vrasjen e të pakten 5-6 grave të tjera të zhdukura.

Mbi një dekadë, kryesisht në qytetet ku ushtrohej prostitucion, gratë thjesht janë zhdukur nga rrugët.

 

 

Në veri të Bagdadit janë vrarë një ushtar amerikan dhe një përkthyes irakian

 

Bagdad, 21 korrik 2003 – Një ushtar amerikan dhe një përkthyes irakian janë vrarë sot (e hënë) në një sulm në veri të Bagdadit, njofton BBCWorld.

 

Ata e kanë humbur jetën kur automjeti i tyre është goditur me një bombë dhe me zjarr nga armët e vogla, në zonën Al-Sulajak, ka bërë të ditur një zëdhënës ushtarak amerikan.

Ky incident ka ndodhur një ditë pasi vrasjes së dy ushtarëve amerikanë në një sulm raketor në zonën e kontrolluar nga kurdët, në veri të Irakut.

 

 

Në Bregun Perëndimor operojnë grupe terroriste izraelite

 

Tel Aviv, 21 korrik 2003 - Në territotret palestineze në Bregun Perëndimor veprojnë se paku dy grupe terroriste ebreite, të cilat kryejnë sulme të armatosura dhe vendosin bomba, kanë pohuar zyrtarë izraelitë të mbrojtjes.

 

Sipas tyre, secila nga këto grupe që dyshohen për sulme kundër palestinezëve kanë nga së paku tre anëtarë, të përgatitur për operacione terroriste.

Tri javët e fundit në këto territore janë vrarë tetë palestinezë dhe janë plagosur disa të tjerë.

Copyright©2000-2003 Trepca.net - Të gjitha të  drejtat e rezervuara.