Lajme

E shtune 19 korrik 2003

Përmbajtja:

• Brajshou thotë se Mitrovica ka shënuar përparim të dukshëm në muajt e fundit

• Inga-Britt Ahlenius është zgjedhur kryerevizore e Kosovës

• Katër kosovarë marrin bursa amerikane

• KMDLNJ: Dënimet drakonike ndaj katër ish-eprorëve të UÇK-së paraqet një nga dështimet e gjykatave të UNMIK-ut

• Asambleja komunale e Prishtinë ka përcaktuar lokacionin për ndërtimin e një fshati ndërkombëtar në afërsi të kryeqendrës

• Në një konflikt që ka ndodhur në fshatin Tërnac të Skënderajt janë lënduar tre policë

• Zyrtarët e UNMIK-ut nuk mund të pohojnë dhe as të mohojnë se Shtajner ka marrë një kërkesë nga Haga për rastin Limaj

• Në Prishtinë u hap zyrtarisht Universiteti amerikan në Kosovë

• Rino Harnish e ka përshëndetur rezultatin e fazës së parë të privatizimit

• AKM-ja shpalli emrat e fituesve të tenderëve të parë për privatizimin e ndërmarrjeve shoqërore në Kosovë

• Tiranë: Edhe një ministër shqiptar jep dorëheqje

• Parlamenti i Maqedonisë miratoi ligjin për amnistinë e personave që i kanë ikur shërbimit ushtarak

• Në Shkup po mbahet konferenca mbi ndriçimin e fatit të të burgosurve, të rrëmbyerve dhe të zhdukurve

• Ilir Meta jep dorëheqje të parevokueshme

• Bler: Vdekja e Dejvid Kellit është "një tragjedi e jashtëzakonshme"

• Në Irak është vrarë sot nga guerilët një ushtar amerikan

• Në Afganistan janë plagosur 3 ushtarë të koalicionit amerikan

• Anan kërkon që irakianëve t'u kthehet sovraniteti

• Ekspertët: zyrtarët duhet të vendosin rregull në Irak

Brajshou thotë se Mitrovica ka shënuar përparim të dukshëm në muajt e fundit

 

Mitrovicë, 19 korrik 2003 - Mitrovica po bëhet një qytet normal evropian, ka thënë ushtruesi i detyrës së kryadministratorit të Kosovës Çarlls Brajshou në fund të një vizite në këtë qytet, ku është takuar me zyrtarë rajonalë të UNMIK-ut, me përfaqësues të Universitetit serb në veri dhe me biznesmenë shqiptarë e serbë.

 

Brajshou theksoi se Mitrovica ka shënuar përparim të dukshëm në muajt e fundit, por ka shtuar se kanë mbetur ende shumë gjëra për t'u bërë. Duke folur për një afat që UNMIK-u u ka dhënë pronarëve serbë të veturave që t'i regjistrojnë ato me targa të Kosovës, z. Brajshou tha se nuk ka vend në botë që lejon qarkullimin e veturave pa tabela regjistrimi, ndërkaq porosia e tij për të gjithë që jetojnë në Kosovë është se duhet të përdorim tabela regjistrimi të Kosovës.

 

Ai ka nënvizuar se rezistenca e qytetarëve serbë ndaj këtyre tabelave ka të bëjë me faktin se me tabelat e Kosovës nuk mund të kalojnë në Serbi, por shprehu bindjen se Serbia do të njohë së shpejti këto targa dhe problemi më nuk do të ekzistojë.

 

 

Inga-Britt Ahlenius është zgjedhur kryerevizore e Kosovës

 

Stokholm, 19 korrik 2003 - Suedezja Inga-Britt Ahlenius është zgjedhur në detyrën e kryerevizores së pavarur të Kosovës. Zonja Ahlenius deklaroi për TT (Byron telegrafike të gazetave të Suedisë) se është e lumtur që është zgjedhur në këtë post dhe është një detyrë nderi për të.

Më parë ajo ishte shefe në Entin për revizionim të Mbretërisë së Suedisë (Riksrevisionverket). Para disa javësh zonja Inga-Britt Ahlenius kishte vizituar Kosovën, ndërkaq pritet që punën në Kosovë ta fillojë më 1 nëntor.

 

 

Katër kosovarë marrin bursa amerikane

 

Prishtinë, 19 korrik 2003 – Z. Allek Melli, ushtrues detyre i shefit të misionit të Zyrës së SHBA-ve në Prishtinë, shpalli zgjedhjen e katër kosovarëve për të marrë pjesë në programin e bursave "Ron Braun" për vitin 2003-2004.

Këto bursa do t'u mundësojnë katër studentëve me kualifikime të larta që të studiojnë në Shtetet e Bashkuara dhe të kryejnë magjistraturën një apo dyvjeçare në ndonjë universitet amerikan.

 

Katër studentët e zgjedhur sivjet janë: Vlera Kastrati, Agon Vrenezi, Fatime Qosaj – Arënliu dhe Lindita Camaj.

Sipas Z. Melli, zgjedhja e universiteteve për bursistët Ron Braun nga Kosova flet për cilësitë e larta të tyre.

 

 

KMDLNJ: Dënimet drakonike ndaj katër ish-eprorëve të UÇK-së paraqet një nga dështimet e gjykatave të UNMIK-ut

 

Prishtinë, 19 korrik 2003 - Dënimet drakonike ndaj katër ish-eprorëve dhe ushtarëve të UÇK-së: Rrustem Mustafës - Remit, Latif Gashit, Nazif Mehmetit dhe Naim Kadriut pa u mbështetur në fakte dhe dëshmi relevante paraqet edhe një nga dështimet në radhën e dështimeve të gjykatave të UNMIK-ut, thuhet në një pronocim të KMDLNJ. Dënimi i shqiptuar prej 17 vjet burg ndaj Rrustem Mustafës është dënim që nuk parashihet me ligjet e aplikueshme penale në Kosovë.

KMDLNJ thekson se me gjithë arsyetimet e ndërkombëtarëve se nuk po gjykohet UÇK, por vetëm disa ish-eprorë dhe ish-ushtarë të saj, të cilët, sipas aktakuzave të ngritura nga prokurorë ndërkombëtarë, kanë qenë të involvuar në krime (madje, sipas tyre, edhe në krime lufte?!) arrestimi, gjykimi dhe dënimi i tyre dëshmon pikërisht të kundërtën - përpjekjen për kriminalizimin e luftës së UÇK-së (të ndihmuar edhe nga NATO) dhe barazimin e kësaj lufte me karakter çlirimtar dhe mbrojtës me luftën e Serbisë që ishte luftë e karakterit pushtues, shfarosës dhe gjenocidial ndaj një populli.

Ndërkohë në proceset gjyqësore të udhëhequra gjithashtu nga gjykatësit ndërkombëtarë, ndaj disa policëve a paramilitarëve serbë të akuzuar për krime lufte dhe krime kundër njerëzimit në periudhën e luftës në Kosovë, për të cilët është dëshmuar fajësia, janë dënuar po nga gjykatësit ndërkombëtarë kryesisht me dënime jo më të mëdha se 7 vjet (Veselin Beshoviq), apo edhe janë liruar tërësisht.

Këta janë shembuj tipikë të gjykimeve dhe dënimeve me dy kute të prokurorëve dhe gjykatësve të UNMIK-ut. Me këtë padyshim se nuk i kontribuohet gjyqësisë profesionale, korrekte dhe të pavarur; por as ndërtimit të shoqërisë demokratike në Kosovë. Përkundrazi, thuhet në këtë pronocim të KMDLNJ.

 

 

Asambleja komunale e Prishtinë ka përcaktuar lokacionin për ndërtimin e një fshati ndërkombëtar në afërsi të kryeqendrës

 

Prishtinë, 19 korrik 2003 - Këshilltarët e Asamblesë komunale të Prishtinës në seancën e djeshme kanë përcaktuar lokacionin për ndërtimin e një fshati ndërkombëtar në afërsi të Prishtinës në një sipërfaqe prej 9.5 hektarësh. Të gjithë ndërkombëtarët të cilët vijnë për të punuar në Kosovë me familjet e tyre të mund të banojnë në objektet që do të ndërtohen në atë fshat.

Ismet Beqiri, kryetar i Kuvendit të Komunës tha se duke ditur se Prishtina pretendon të jetë qendër diplomatike është i nevojshëm ndërtimi i këtij fshati ndërkombëtar për nevojat e banimit të përfaqësuesve të tyre.

Këshilltarët e Asamblesë komunale po ashtu kanë marrë vendim për zbritjen e tarifave dhe ngarkesave të qytetarëve për 50 për qind, si dhe kanë bërë emërimin e drejtorëve të tre drejtorateve: për ekonomi,për kadastër e gjeodezi dhe avokatin publik, duke kompletuar kështu qeverinë komunale të Prishtinës.

 

 

Në një konflikt që ka ndodhur në fshatin Tërnac të Skënderajt janë lënduar tre policë

 

Skënderaj, 19 korrik 2003 - Në një konflikt që ka ndodhur dje në fshatin Tërnac të Skënderajt mes familjes Sinani dhe policisë së UNMIK-ut dhe asaj të SHPK-së, është lënduar një polic i UNMIK-u dhe dy policë të SHPK-së, të cilët janë transferuar në qendrën spitalore të Prishtinës.

 

Sipas zëdhënësit të SHPK-së për rajonin e Mitrovicës Besim Hoti ngjarja ka ndodhur kur policët e UNMIK-ut dhe SHPK-së me një kërkesë të gjykatës shkuan për ta arrestuar një të dyshuar në fshatin Tërnac për vjedhje.

 

Me atë rast policia ka hasur në rezistencë nga i dyshuari dhe anëtarët e tjerë të familjes së tij të cilët i kanë sulmuar policët me shufra të metalta. Në vendin e ngjarjes kanë arritur përforcime të policisë dhe gjatë aksionit kanë kanë arrestuar të dyshuarin dhe disa anëtarë të tij të cilët i kanë arrestuar dhe ata po mbahen në paraburgim në stacionin e policisë në Skenderaj.

 

Njoftohet se gjatë këtij aksioni njësiti i policisë antikrim dhe njësiti për deminim i KFOR-it kanë konfiskuar nga i dyshimti në shtëpinë e tij një pushkë automatike dhe dy granata dore, por kanë gjetur edhe një bankënotë prej 100 eurosh që besohet të jetë e falsifkuar, ka bërë të ditur zëdhënësi i policisë për rajonin e Mitrovicës Besim Hoti.

 

 

Zyrtarët e UNMIK-ut nuk mund të pohojnë dhe as të mohojnë se Shtajner ka marrë një kërkesë nga Haga për rastin Limaj

 

Prishtinë, 19 korrik 2003 - Zyrtarët e UNMIK-ut thanë se nuk mund të konfirmojnë dhe as të mohojnë se shefi i deritashëm i këtij Misioni Mihael Shtajner ka marrë një kërkesë nga Gjykata e Hagës në lidhje me të akuzuarin nga Kosova Fatmir Limaj. Letra e Tribunalit të Hagës pason kërkesën e avokatëve të Limajt për mbrojtjen e tij në liri dhe kundërshtimin e kësaj kërkese nga Prokuroria e Hagës. Pas 25 korrikut pritet që Gjykata e Hagës të marrë një vendim për këtë çështje.

Zëdhënësja e UNMIK-ut Leonor Bretsli thotë se kjo është pjesë e procedurës gjyqësore dhe vetëm gjykatësit në Hagë mund të japin ndonjë përgjigje.

 

 

Në Prishtinë u hap zyrtarisht Universiteti amerikan në Kosovë

 

Prishtinë, 19 korrik 2003 - Edhe zyrtarisht dje u hap Universiteti amerikan në Kosovë, në të cilin mësimet do të fillojnë më 6 tetor, ndërkaq do të pranohen 120 studentë, të cilët do të paguajnë 5500 dollarë për një vit akademik.

Hapjen e Universitetit amerikan e bëri ministri i Arsimit, Shkencës dhe Teknologjisë Rexhep Osmani, i cili bëri të ditur se ky universitet është licencuar për një vit me mundësinë e licencimit të mëtejmë.

 

Ministri Osmani nënvizoi se hapja e Universitetit amerikan në Kosovë do të jetë një urë lidhëse e fillimit të miqësisë së sinqertë të Kosovës dhe të Shteteve të Bashkuara të Amerikës. Ai shtoi se Universiteti amerikan do të jetë një krenari për kryeqytetin e Kosovës dhe për Kosovën.

Drejtor i Këshillit drejtues të Universitetit amerikan në Kosovë Uiliam Voker, ndërkaq drejtor ekzekutiv i Fondacionit të këtij Universiteti Luis Sell, foli për rëndësinë e hapjes së këtij Universiteti në Kosovë dhe përparësitë që i ofron. Ai theksoi se Universiteti amerikan në Kosovë do të sigurojë mësim kualitativ, të pavarur dhe privat për kosovarët pa marrë parasysh përkatësinë kombëtare apo gjinore.

 

Aplikimi në këtë universitet nis menjeherë. Provimi pranues do të mbahet me 9 dhe 23 gusht, ndërkaq mësimi do të fillojë më 6 tetor. Ligjëruesit do të jenë kryesisht amerikanë, por edhe ndonjë kosovar, që do të paraqitet në ndërkohë.

 

 

Rino Harnish e ka përshëndetur rezultatin e fazës së parë të privatizimit

 

Pirshtinë, 19 korrik 2003 - Shefi i deritashëm i Zyrës amerikane në Prishtinë Rino Harnish, para se të largohej nga Kosova, e ka përshëndetur rezultatin e valës së parë të privatizimit të ndërmarrjeve në pronësi shoqërore, të cilat i shpalli AKM-ja me 14 korrik.

 

Harnish ka vlerësuar se shtatë tenderët e parë me çmim total prej 4.6 milionë euro, përbëjnë një hap të rëndësishëm drejt hapjes së ekonomisë së Kosovës ndaj investimeve investuesve. Ai ka shprehur kënaqësinë që rrethi i parë i tenderëve ka tërhequr investues potencialë prej pesë shteteve dhe nga vetë Kosova.

 

 

AKM-ja shpalli emrat e fituesve të tenderëve të parë për privatizimin e ndërmarrjeve shoqërore në Kosovë

 

Prishtinë, 19 korrik 2003 - Agjencia Kosovare e Mirëbesimit shpalli dje zyrtarisht emrat e fituesve të tenderëve të parë për privatizimin e ndërmarrjeve shoqërore në Kosovë. Fituese e tenderit për ndërmarrjen "Përparimi" në Skënderaj është kompania "Adi Commpany" nga Tirana, për ndërmarrjen "Energoinvesti" në Prishtinë, kompania "Meridian" nga Prishtina, ndërkaq kompania "Arda Rei" është fituese e tenderit për "Energoinvestin" - prodhimi i siguresave, fabrika "Termosistem" është blerë nga vetë menaxhmenti dhe punëtorët e kësaj fabrike, ndërkaq fabrikën "Lepenci" e ka blerë biznesmeni nga Maqedonia Qenan Idrizi.

 

 

Tiranë: Edhe një ministër shqiptar jep dorëheqje

 

Tiranë, 19 korrik 2003 - Pas dorëheqjes së zv.ministrit e ministër i punëve të jashtme, Ilir Meta, sot ka dhënë dorëheqje edhe një ministër në Qeverinë shqiptare. Eshtë ky Sokol Nako, ministër i Shtetit për Integrim. Njoftohet se kryeministri Nano e ka pranuar këtë dorëheqje.

 

 

Parlamenti i Maqedonisë miratoi ligjin për amnistinë e personave që i kanë ikur shërbimit ushtarak

 

Shkup, 19 korrik 2003 - Parlamenti i Maqedonisë ka miratuar ligjin për amnistinë që parashikon faljen e mbi 12 mijë qytetarëve të moshës prej 27 deri në 30 vjeç, të cilët nuk u janë përgjigjur thirrjeve për shërbimin ushtarak nga viti 1992 e deri më tash.

 

Vlerësohet se nga numri i përgjithshëm i personave të amnistuar mbi 60 për qind janë qytetarë të përkatësisë shqiptare, të cilët edhe është dashur t'i braktisin vatrat e tyre për t'i ikur shërbimit ushtarak në Maqedoni. Ata tash mund të kthehen në vend pa asnjë problem se do të përndjeken nga autoritetet maqedonase.

Deputetët e partive në pushtet i dhanë mbështetje ligjit për amnistinë, ndërkaq ata të opozitës maqedonase thanë se duhet miratuar një ligj më rigoroz i mbrojtjes që në të ardhmen nuk do t'i amnistonte personat të cilët i shmangen shërbimit ushtarak.

 

Organet gjyqësore të Maqedonisë kanë proceduar mbi 1.500 akpadi ndaj shqiptarëve të moshës 30 vjeçare, që i kanë ikur detyrimit ushtarak.

 

 

Në Shkup po mbahet konferenca mbi ndriçimin e fatit të të burgosurve, të rrëmbyerve dhe të zhdukurve

 

Shkup, 19 korrik 2003 - Në Shkup po mbahet konferenca me karakter ndërkombëtar mbi ndriçimin e fatit të të burgosurëve, të rrëmbyerve.

 

Ky takim u organizua nga Komisioni Ndërkombëtar për Persona të Zhdukur, ndërkaq në këtë konfrencë po marrin pjesë përveç ndërkombëtarëve edhe zyrtarë qeveritarë maqedonas, anëtarët e familjeve të të zhdukurve në konfliktin e vitit 2001 në Maqedoni, për të dëgjuar nga përfaqësuesit e pushtetit dhe nga përfaqësuesit ndërkombëtarë se çfarë është bërë deri më tash për personat e zhdukur nga ky konflikt.

 

Konferenca ka për qëllim gjetjen e mënyrave të veprimit dhe autoriteteve maqedonase për gjetjen e këtyre personave meqë mandati i Komisionit Ndërkombëtar për këtë çështje në Maqedoni ka mbaruar. Në Maqedoni numri i të zhdukurve është 12 maqedonas dhe 6 shqiptarë.

 

 

Ilir Meta jep dorëheqje të parevokueshme

 

Tiranë, 19 korrik 2003 - Zëvendëskryeministri dhe ministri i Jashtëm i Shqipërisë, Ilir Meta ka dhënë mbrëmë dorëheqjen në mënyrë të parevokueshme. Në tekstin e dorëheqjes, z. Meta flet për vazhdim të luftës personale ndaj tij nga ana e kryeministrit Fatos Nano.

Kritikat për punën e ministrisë së Jashtme, z. Meta i quan nihiliste dhe denigruese.

Dorëheqja e z. Meta është e papritur, sidomos po të kihet parasysh rezoluta e para pak javëve e kryesisë së Partisë Socialiste.

Rezoluta u duk se i vuri kapakun, të paktën deri në zgjedhjet e tetorit, grindjes së madhe që u riçel mes Nanos dhe Metës para një muaji.

Kryeministri Nano e ka quajtur dorëheqjen e zëvendësit të tij "akt të papërgjegjshëm". Ai shtoi se ky qëndrim është vazhdë e mosbashkëpunimit dhe shmangies së përgjegjësive që zëvendës-kryeministri Meta ka shfaqur sipas tij gjatë gjithë 11 mujave në qeveri.

 

 

Bler: Vdekja e Dejvid Kellit është "një tragjedi e jashtëzakonshme"

 

Londër, 19 korrik 2003 – Vdekja e ekspertit të armëve të Irakut, Dejvid Kelli, është "një tragjedi absolutisht e jashtëzakonshme", ka thënë kryeministri britanik, Toni Bler, në një deklaratë të sotme, njofton BBCnews.

 

Policia pritet të kofirmojë sot (e shtunë) se trupi i gjetur dje në vendin e bukur Oksfordshër është ai i Kellit. Z. Bler i ka shprehur familjes pikëllimin e thellë për zotin Kelli dhe u ka bërë thirrje politikanëve dhe mediave të tregojnë "respekt dhe vetëpërmbajtje".

 

 

Në Irak është vrarë sot nga guerilët një ushtar amerikan

 

Bagdad, 19 korrik 2003 – Një ushtar amerikan është vrarë sot (e shtunë) nga guerilët në Irak, i cili ka qenë ndër arkitektët kryesorë të luftës për përmbysjen e Sadam Hyseinit, njofton Rojter.

 

Një zëdhënës ushtarak ka thënë në Bagdad se ushtari është sulmuar me armë të vogla dhe një granatë raketore derisa ai po ruante bankën në distriktin Mansur të Bagdadit.

 

Ai ka thënë gjithashtu se një ushtar tjetër është plagosur në një sulm të djeshëm të guerilëve me pushkë dhe granata në qytetin Mikdadija, në veri të Bagdadit. Ndërsa po dje është vrarë një ushtar tjetër amerikan kur automjeti i tij “Hamvi” ka rënë në mjete shpërthyese në Falluxha, 32 mila në perendim të Bagdadit.

 

 

Në Afganistan janë plagosur 3 ushtarë të koalicionit amerikan

 

Bagram, Afganistan, 19 korrik 2003 – Tre ushtarë të koalicionit amerikan në Afganistan janë plagosur në një sulm me bomba në një autokolonë në lindje të vendit, ka bërë të ditur sot (e shtunë) një zëdhënës ushtarak amerikan, njofton Rojter.

 

Bomba ka goditur në mes të konvojit rreth pesë mila në jug të qytetit Asadabad, ka thënë ai në konferencën e sotme të shtypit. Ushtarët e plagosur janë dërguar në spitalin e Bagramit dhe janë në gjendje stabile. Nacionaliteti i të plagosurve nuk u dha në këtë konferencë.

 

 

Anan kërkon që irakianëve t'u kthehet sovraniteti

 

Nju Jork, 19 korrik 2003 - Sekretari i përgjithshëm i OKB-së, Kofi Annan kërkon që irakjanëve t'u rikthehet shpejt sovraniteti, në mënyrë që ata të jenë në gjendje ta kontrollojnë vetë të ardhmen e tyre. Pikëpamjet e z. Anann pasqyrohen në një raport që pritet t'i paraqitet javën a ardhshme Këshillit të Sigurimit të OKB-së.

Dokumenti thotë se irakjanëve duhet t'u jepet një plan i qartë dhe i specifikuar i zhvillimeve që do të çonin drejt fundit pushtimin ushtarak të vendit të drejtuar nga Amerika.

Një zëdhënës i Shtëpisë së Bardhë në Uashington tha se Shtetet e Bashkuara janë të gatshme t'i ofrojnë një rol më të madh Kombeve të Bashkuara në Irak, veçanërisht nëse qeveritë e vendeve të tjera do të ofronin më shumë ndihmë për rindërtimin e vendit dhe në paqeruajtje.

 

 

Ekspertët: zyrtarët duhet të vendosin rregull në Irak

 

Uashington, 19 korrik 2003 - Një raport i ri i hartuar me porosi të Pentagonit thotë se nëse zyrtarët amerikanë nuk do të marrin masa për të vendosur rregull në Irak, së shpejti do të humbin përkrahjen e të gjithë qytetarëve të këtij vendi.

Ekipi i përbërë nga pesë ekspertë të pavarur thotë se tre muajt e ardhshëm janë vendimtarë për autoritetet amerikane që të vendosin sigurinë dhe shërbimet bazë në Irak. Ekspertët thonë se përpjekjeve për rindërtimin e Irakut u duhet dhënë një shtytje e fortë me investime më të mëdha në para dhe në njerëz.
 

Ndërkohë autoritetet amerikane në Irak thonë se një ushtar u vra të premtën në qytetin Falluxh kur një bombë shpërtheu nën makinën e tij.

Copyright©2000-2003 Trepca.net - Të gjitha të  drejtat e rezervuara.