Mbremje artistike e familjes së madhe shqiptaro-amerikane në 5 vjetorin e ditëlindjes “Albanian Culture TV”

(Një televizor shqiptar në gjuhen shqipe që ruan lidhjen shpirtërore me vendlindjen)

 

Nju Jork (ShBA), 17 KORRIK 2003 / Nga Klajd KAPINOVA

 

    

BROOKLYN. Në Debal Gardens në Brooklyn, në orën 6 pm u organizua mbrëmja artistike për nder të 5 vjetorit të kanalit të vetëm televiziv shqiptar në New York “Albanian Culture TV” (NYCTV) me producent dhe regjizor Adem Belliu.

 

Shumë shqiptaro-amerikanë, morën pjesë në gëzimin e përbashkët të komunitetit tonë. Prej 5 vjetësh, një rreze drite përhapë kulturën shqiptare dhe jetën e përditshme të shqiptarëve, gëzimet e festat nacionale, aktivitetet kulturore, promovime librash të autorëve të komunitetit, intervista me njerëz të ftuar nga vendlindja dhe intelektualë, që kanë lindur, rritur dhe janë integruar me dinjitet në jetën intensive amerikane.

 

Emisioni “Albanian Culture TV”, u shfaq për herë të parë më 28 nëntor 1997, në përkujtim të 85-vjetorit të Shpalljes së Pavarësisë, të cilën e ka si festë të ditëlindjes, që e përkujton përherë mes shqiptarëve dhe këngëve e valleve të bukura popullore. Në ditët e vështira, të mbushur plot emocione, ngarkesë psikologjike dhe doza dramaciteti, për t’u paraqitur sa më mirë përpara komunitetit shqiptar në SHBA, ka qenë preokupimi i regjizorit dhe producentit Adem Balliu. Artistët gjithnjë e në çdo kohë mbartin mbresa e përjetime, për orët dhe ditën e parë të shfaqjes në monitorin e TV në gjuhën e bukur shqipe. Emetimi i programit të parë, është shënuar në analet e arkivave dhe ka qenë shfaqja e filmit “Nënëtori i Dytë”, që i përkushtohet figurave kryesore të Rilindjes Kombëtare dhe në veçanti patriotit mjekërbardhë Ismail Bej Qemalit.

 

Programi televiziv, është prodhim i organizatës pa përfitim “Albanian TV Inc-”, organizatë kjo e njohur dhe e mbështetur nga shteti amerikan, e cila në këto 5 vjet i ka shtuar orët e transmetimit në Bronx nga 1-5 orë. Ajo transmeton emisionin “Albanian Culture”, në Manhattan e Brooklyn. Në projekt, është menduar, që së shpejti të fillojë transmetimi në Yonkers e Staten Island.  “Kryedasmori” i festës së sotme, regjizori i palodhur Adem Balliu, i pyetur se si ju lindi idea për të hapur këtë televizion, shprehet: “Pas një vakumi të krijuar, me kohë, në mendjen time qendronte ideja, për të hapur këtë televizion mbasi u mbyll emisioni “Victoria” i përgatitur dhe sponsorizuar nga vëllezërit Osmani”.

 

Vitet kalojnë dhe regjizori, tashmë ka se çfarë të tregojë. Përvoja e aktiviteti pasqyrues i programeve është rritur shumë. Në 5 vite pune “TV Albanian Culture”, ka prodhuar e transmetuar 257 emisione. Shkolla shqipe “Naim Frashëri” në Bronx, ishte mbështetja e parë e këtij televizioni. Më pas filluan artikujt kurajozë në gazetën e njohur “Illyria” në New York,  “Bota sot”, mediat e vendlindjes dhe u përgatiten disa emisione nga kanalet televizive shtetërore e private në vendlindje. Një ndihmesë të madhe, kanë dhënë organizatat, që veprojnë në komunitet. I rëndësishëm mbetet kontributi i AAWO “Motrat Qiriazi”, e cila edhe sot vijon të jetë zedhënëse e NYACTV. Këshilli Kombëtar Shqiptaro-Amerikan (NAAC), është një tjetër suportuese pozitive, që po jep ndihmesë për kanalin televiziv.

 

 

Gëzimi i të gjithë shqiptarëve në ditëlindjen “TV Albanian Cultura”

 

Në spektaklin e organizuar, projektuesit e mbrëmjes ishin Matilda Rustemi dhe regjizori, dramaturgu dhe aktori i njohur Xhevat Limani. Ata hapën festën e përbashkët, duke falënderuar bashkëatdhetarët shqiptaro-amerikanë, që kanë ardhur, sikurse  telespektatorët, që ndjekin emisionet përmes ekranit të vogël në shtëpitë e tyre.

 

Tashmë shqiptarët, nuk kanë fatin të dëgjojnë në këtë mbrëmje artistike fjalime e kumtesa kilometrike, por vetëm muzikë dhe këngëtaret e grupit muzikor “Kastrioti” e talentuara Aurela Gaçe (fituese e shumë çmimeve në Shqipëri), i mirëprituri Gëzim Nika, Mimoza Gjinkola dhe të ftuarin Arben Krasniqi. Humosristët Astrit Sula, Uk Kompiri dhe Xhevahiri Zeneli ish-aktor i humorit të Estrades Profesioniste të Tiranës, me grimca humoristike të kohës, thyen monotoninë e atmosferës, duke argëtuar pjesëmarrësit në festën e përbashkët. Një falënderim u përcoll nga preamtuesit e mbrëmjes Matilda Rustemi dhe Xhevat Limani për sponsorizuesit, që e bënë të mundur organizimin e festimit të 5 vjetorit të “NYACTV”, si: Këshilli Kombëtar Shqiptaro-Amerikan (NAAC), z.Harry Bajraktari, z. Gjon Dedvukaj, “Albanian American Cultural Center Michigan” (Qendra Kulturore Shqiptaro-Amerikane), me president z.Gjok Martini, familja Osman Kalaba, “Bromson College” Queens, AAWO “Motrat Qiriazi”. Prej shumë vitesh komuniteti shqiptar në Amerikë, ka pasur në vatrën e vet një këngëtaren Dila Gecaj, (pjesëtare e grupit “Bashkimi Kombëtar”), e cila me vokalin e saj tepër karakteristik, ka sjellë të gjallë në mes nesh Gjakoven e hershme dhe trimeritë e Shote Galices, Isa Boletinit, atë motiv që e ka inçizuar në disa CD të muzikës popullore me temë patriotike.

 

Nata e 3 nëtorit ishte prelud i hapjes së muajit të festës së madhe të Pavarësisë e Ditës së Flamurit. Me një tonalitet muzikor artistik dhe ndjeshmëri të bjeshkëve kreshnike të Alpeve shqiptare e solli me përshëndetje për 90-vjetorin e Ditës së Pavarësisë këngëtari Gëzim Nika. Ai dhuroi mesazhin urues përmes këngën “Ismail Qemali lëshon kushtrimin”. Intrepretuesi në intervistën improvizuese, paraqiti punën përgatitore që po bën stafi i tij për CD me këngët popullore. Më pas përshëndetën me këngë Muharrem Borova, dueti i kitaristeve Nagi Shkololli dhe Pranvera Cobo, të cilat luajtën pjesët pjesët “Flamengo” dhe “Popullore” përpunuar nga Pranvera Cobo.

 

  

Çmime për kontribute artistike dhe veprimtari integruese multinacionale në SHBA

 

Një surprizë e kwndshme ishte menduar nga organizatorët dhe Tv shqiptar në New York, ku, Gëzim Nika, pas këngëve të reja që këndoi u nderua nga televizioni “NYACTV” me trofenë si këngëtari më i mirë i vitit 2002. Mw pas u nderuan, për fitoret në fushën e sportit të boksit shqiptaro-amerikani Elvir Muriqi, Shoqata AAWO “Motrat Qiriazi” me presidente zj. Anna Kohen, të cilat kanë bërë një punë të shkëlqyer jo vetëm për gratë e vajzat shqiptare, por njëkohsisht edhe për lidhjen e komunitetit tonë me komunitetet e tjera për një integrim të plotë në jetën amerikane.

 

Televizioni “NYACTV” prodhon tre emisione të ndryshme, që janë: “Albanian Cultura”, “Jeta Shqiptare” dhe “Albanian TV Inc”, të cilat Bronx-i i transmeton rregullisht të dielen e të merkuren, 5 orë emision në javë. Në zona të ndryshme të New York-ut, transmetohet vetëm “Alnanain Cultura”. Kurse kronika speciale transmetohen edhe në TV shqiptar të Detroitit me producent Vat Dedgjonaj, ashtu dhe në Mal të Zi, disa stacione private në Shqipëri. “Bronxnet”, i ka dhënë mundësinë komunitetit shqiptar të ketë “TV Albanian Cultura”. Për ketë mirësi, të gjithë pjesëmarrësit e mbrëmjes magjike, dhuruan duartrokitje për “Bronxnet Television”  dhe drejtorin e menaxherin e saj z.David Jenkins, i cili në mesazhin e tij falenderoj stafin e “TV Albanian Cultura”, për punën cilësore në emetimin e emisioneve për komunitetin shqiptaro-amerikan. Z.David Jenkins u nderua me trofenë e ndarë nga “NYACTV”.

 

 

Stafi televiziv dhe ambiciet për një cilësi e shtrirje më të madhe transmetimi

 

Pas disa minuta pushim, u shfaqen sekuenca nga puna e përditshme e televizionit shqiptar që nga fillimi deri në 5 vjetorin e saj. “NYACTV’ gjatë biografisë 5-vjeçare, ka filmuar të gjitha aktivitetet kulturore-artistike, fetare, politike apo gëzimet familjare. Në ekranin e televizionit nëpërmjet punës së palodhur të stafit të “ACTV” komuniteti shqiptari-amerikan, ka ndjekur aktivitet patriotike të të gjitha organizatave e grupeve politike shqiptare në Diasporë apo në trojet e tjera shqiptare përtej oqeanit, duke mbajtur asnjanësinë.  Ky është qëllimi i “NYACTV”, që t’i shërbejë shqiptarëve pa dallim feje, krahine e ideje.

 

Grupi realizues, përbëhet nga profesionistë të diplomuar në Universitetin Shtetëror të Tiranës dhe të kualifikuar në kurset speciale të televizione amerikane. Stafi i saj nga dita në ditë po zgjerohet me bashkëpunëtorë, duke zgjeruar idetë për programe më të mira në emisionet e tyre televizive dhe integruar kulturën shqiptare në atë multinacionale amerikane. Në të ardhmen, ky televizion, është duke përgatitur prodhimin e një filmi dokumentar për emigracionin shqiptar në SHBA me skenar të Nasho Jorgaqit dhe në bashkëpunim me regjizorin e mirënjohur Viktor Gjika. Gjithashtu do të fillojë së shpejti puna për një festival vjetor të këngës për fëmijë. Kjo do të jetë një punë e përbashkët me AAWO “Motrat Qiriazi”, si dhe realizimin e një filmi të parë artistik shqiptaro-amerikan në Diasporë.

Copyright©2000-2003 Trepca.net - Të gjitha të  drejtat e rezervuara.