E enjte 17 korrik 2003

17.07.2003 - Trepca.net

Lajme

E enjte 17 korrik 2003

Përmbajtja:

Presidenti Rugova tha se Rino Harnish gjatë mandatit të tij në ishte pjesë e progresit të arritur në Kosovë
Presidenti Rugova i ka kontribuar dukshëm përmirësimit ndërkombëtar të imazhit për Kosovën
Mbrëmë afër stacionit të policisë në Podujevë ka shpërthyer një bombë
Prokuroria e Gjykatës së Hagës kundërshton mbrojtjen në liri të Fatmir Limajt
Robertson i quan si të pabaza deklaratat e Minit se trupat e KFOR-it mund të zëvendësohen nga ato ballkanike
Përfaqësuesit e "Kuintit" bënë thirrje që sa më shpejt të fillojnë bisedimet mes Prishtinës dhe Beogradit
Javën e ardhshme Beogradi do t'i dorëzojë UNMIK-ut edhe 40 kufoma të gjetura në Serbi
Afër stacionit të policisë në Podujevë janë gjetur edhe dy granata të pashpërthyera
Dje në Podujevë u protestua kundër dënimit të katër ish-pjesëtarëve të UÇK-së të zonës së Llapit
Avokatët e grupit të Llapit thonë se me këto dënime të rënda ka dështuar drejtësia ndërkombëtare
Rruga Durrës - Prishtinë përveç tri varianteve të projektimit nga Banka Botërore, ka edhe një variant të katërt
Robertson i ka bërë thirrje Shqipërisë që të përforcojë kontrollin e kufirit dhe të luftojë krimin e organizuar
Një grup i punëtorëve është përleshur me policinë para Parlamentit të Maqedonisë
Spartak Ngjela shpall kandidaturën për kryetar bashkie në Tiranë
Në luftimet e ripërtrira ndërfisnore në Kongo janë vrarë të pakten 54 persona
Nga një përplasje e një automjeti në një treg të Los Angjelosit kanë humbur jetën rreth 8 persona
Në një aksident ajror të një heloiikopteri amerikan në Sicili kanë humbur jetën 4 anëtarë të ekuipazhit
Irak: Vritet Kryetari i Bashkisë
Amerikanët përballen me "luftën guerile" në Irak
Raport kritik vjetor i Kryqit të Kuq
Mbi 45 fëmijë të rrëmbyer nga kryengritësit në Ugandë janë mbytur në lumë
Evropianët vënë në dispozicion miliarda në luftën kundër Sidës
Shkëmbim zjarri ndërmjet ushtarëve të Koresë së veriut dhe asaj të jugut

Presidenti Rugova tha se Rino Harnish gjatë mandatit të tij në ishte pjesë e progresit të arritur në Kosovë


"Unë premtova se SHBA-të do të jenë të vullnetshme dhe të afta për të qenë partnerë në bisedimet e drejtëpërdrejta dhe për të qenë pikërisht aty përkrah institucioneve të Kosovës dhe UNMIK-ut me rastin e bisedimeve për çështje teknike me Beogradin", tha ambasadori Harnish.
Presidenti Rugova tha se z. Harnish gjatë mandatit të tij në Kosovë ishte pjesë e progresi të arritur këtu. "Biseduam për perspektivën e Kosovës, për një zhvillim ekonomik të Kosovës, privatizimin, integrimin e grupeve etnike në shoqërinë kosovare, krijimin e vendeve të reja të punës.

Unë që insistoj për një Kosovë të pavarur, të integruar në Bashkimin Evropian, në NATO dhe në miqësi të përhershme me Shtetet e Bashkuara të Amerikës, që është vullneti i popullit të Kosovës", tha presidenti Rugova.

Ai shtoi se edhe në të ardhmen pret përkrahjen e Shteteve të Bashkuara të Amerikës, por edhe të ambasadorit Harnish.
Ambasadori Harnish tha se një ndër çështjet kryesore të diskutuara në këtë takim lamtumirës dhe pune me presidentin Rugova ishte qëndrimi ndaj procesit të kthimit.
"Unë e falënderoj presidentin Rugova për qëndrimin e fuqishëm dhe të guximshëm në mbështetje të kthimit me rastin e vizitës Ferizajt që është një demonstrim i lidershipit presidencial që edhe pritet nga presidenti Rugova", tha ambasadori Harnish, duke shtuar se me presidentin Rugova kishin ritheksuar nevojën e bërjes së një liste operative për finalizimin e përmbushjes së standardeve që bashkësia ndërkombëtare kërkon nga Kosova për ç'gjë tha Harnish kemi pasur një pajtushmëri të plotë, ashtu si edhe më parë.


Presidenti Rugova i ka kontribuar dukshëm përmirësimit ndërkombëtar të imazhit për Kosovën


KKH ka bërë një punë të madhe para luftës, gjatë luftës dhe tash në Kosovën e lirë bën punën e vet në monitorimin e të drejtave të njeriut në Kosovë, tha Presidenti Rugova, duke përkujtuar se kjo organizatë është me të drejta të plota anëtare e Komitetit Ndërkombëtar të Helsinkit me seli në Vjenë. Ai tha se shpreson që edhe Kosova do të jetë anëtare me të drejta të plota e OSBE-së.
Presidenti falënderoi Gazmend Pulën për raportin dhe i uroi që të vazhdojë për t'i monitoruar të drejtat e njeriut në Kosovë, si të pushtetit vendor ashtu edhe të UNMIK-ut. Me këtë rast Presidenti Rugova theksoi se ka pasur një progres edhe në këtë lëmë, qoftë nëpërmes kritikës, qoftë përmes afirmimit të të drejtave të njeriut në Kosovë për të cilën duhet të përkujdesen të gjithë qytetarët e saj, tha ai.
Gazmend Pula, pasi shprehu kënaqësinë për takimin me Presidentin Kosovës, vlerësoi se gjendja e të drejtave të njeriut në Kosovë është përmirësuar dukshëm, në krahasim me vitin e kaluar dhe ato janë dukshëm më të favorshme. Tani shkalla e dhunës, qoftë e motivuar politikisht, qoftë ndëretnikisht ka rënë dhe është përgjysmuar, prandaj ky është një përparim i dukshëm, tha zoti Pula.

Kjo përmirëson dukshëm imazhin ndërkombëtar për Kosovën, tha ai, duke konsideruar se përmirësimit ndërkombëtar të imazhit për Kosovën dukshëm i ka kontribuar edhe Presidenti Rugova, me qasjen e tij tolerante, demokratike dhe me përkrahjen për kulturën e respektimit të ndërsjellë, me kulturën e respektimit të drejtave të njeriut e të minoriteteve.
"Ne edhe nga presidenti Rugova kemi marrë përkrahjen për propozimin tonë, që të drejtat e njeriut të kyçen në programet shkollore nga niveli i shkollave fillore e deri në atë universitar", bëri të ditur një ide Gazmend Pula, sepse sipas tij, historia e Kosovës, d.m.th. e shqiptarëve ka qenë e shënuar me abuzime të të drejtave të njeriut nga ato individuale deri në ato kolektive, përfshirë ato politike.

"Mirëpo, falë politikës së Presidentit, rezistencës së armatosur dhe falë intervenimit të bashkësisë ndërkombëtare kemi arritur në rruëgn e përcaktimit të statusit përfundimtar për Kosovën", tha kryetari i KKH.
Ndryshe, raporti i Komitetit Kosovar të Helsinkit përshkruan realitetin aktual në Kosovë, aspekte të theksuara politike, mënyrën e përgjithshme që ka të bëjë me kornizën e përgjithshme shoqërore politike në Kosovë, ndërtimin e institucioneve, përparimin në ndërtimin institucional të Kosovës.

Gjithashtu në raport janë të përfshira edhe çështjet më delikate që rëndojnë sot Kosovën. Të drejatat e shqiptarëve, të minoriteteve, janë të përfshira në një kapitull të veçantë që kanë të bëjnë me sistemin juridik në Kosovë si dhe me segmentin e sigurisë, tha Gazmend Pula pas takimit me Presidentin Rugova.


Mbrëmë afër stacionit të policisë në Podujevë ka shpërthyer një bombë

Podujevë, 17 korrik 2003 - Mbrëmë në Podujevë rreth orës dy pas mesnatës afër stacionit të policisë ka shpërthyer një bombë. Nuk njoftohet për të lënduar, por vetëm për dëme materaile. Thuhet se bomba ka shpërthyer në një servis elektronik që ndodhet afër stacionit të policisë.

Pjesëtarët e KFOR-it, policia e UNMIK-ut dhe e SHPK-së kanë bllokuar vendin e ngjarjes dhe po i zhvillojnë hetimet.


Prokuroria e Gjykatës së Hagës kundërshton mbrojtjen në liri të Fatmir Limajt

Hagë, 17 korrik 2003 - Kërkesa e paraqitur Gjykatës së Hagës nga mbrojtja e të akuzuarit Fatmir Limaj lidhur me hetimin në liri. duket se nuk do të marrë përgjigje pozitive. Prokuroria e Gjykatës së Hagës e cila do ta bëjë publike vendimin në një seancë të ardhshme ka përgatitur dosjen përkatëse.

Njoftohet se Prokuroria e Tribunalit të Hagës tashmë ka bërë të qartë se do të kundërshtojë lirimin e përkohshëm të akuzuarit kryesor me këtë aktakuzë Fatmir Limajn.

Në arsyetimin prej 120 faqesh që ka dhënë prokuroria, pohohet se Fatmir Limaj së pari nuk është dorëzuar kur ka marrë vesh se është në aktakuzë, por ka lejuar që të arrestohet nga policia sllovene, tri orë pasi që kishte kuptuar se është i akuzuar.

Në anën tjetër Prokuroria e Tribunalit të Hagës gjithashtu nënvizon se lirimi eventual i Fatmir Limajt dhe mundësia që të mbrohet në liri do të mund të paraqiste rrezik potencialë për dëshmitarët potencial që do të mund të mund të paraqiten në këtë proces.

Po ashtu thuhet se gjatë kërkimit që i është bërë shtëpisë së Fatmir Limajt nga ana e hetuesve të Tribunalit të Hagës dhe policisë së UNMIK-ut është gjetur një pasaportë false e Republikës së Shqipërisë me data të gabuara të lindjes, që po ashtu sipas prokurorisë do të jetë një arsye që Fatmir Limaj ka planifikuar ndoshta të ikë.

Mirëpo, për lirimin e Limajt që të mbrohet në liri megjithatë do të vendosë Gjykata e Hagës, thuhet në një raport nga Brukseli të radios "Evropa e lirë".


Robertson i quan si të pabaza deklaratat e Minit se trupat e KFOR-it mund të zëvendësohen nga ato ballkanike

Bruksel, 17 korrik 2003 - Sekretari i përgjithshëm i NATO-s, Xhorxh Robertson i ka hedhur poshtë si të pabaza deklaratat e komandantit të KFOR-it, Fabio Mini. Ditë më parë, komandanti i KFOR-it ka thënë se pas pesë vjetësh trupat ndërkombëtare të KFOR-it në Kosovë mund të zëvendësohen nga ato ballkanike.
Mendimi i gjeneralit Mini është personal, prandaj ai meriton të injorohet tërësisht dhe krejtësisht, është shprehur Robertson.
Ai ka shtuar se nuk i mbështet ato deklarata të komandantit të KFOR-it Fabio Mini. Robertson i ka deklaruar programi shqip të "Dojçe veles" se politikën e NATO-s dhe kohëzgjatjen e qëndrimit të trupave të saj në Kosovë e përcakton ai, ndërkaq deklarata e Minit mund të konsiderohet si personale.
"Së pari duhet të bëjë të ditur se deklaratat politike të Aleancës i bën Sekretari i saj i Përgjithshëm dhe jo çfarëdo gjenerali i NATO-s", tha Robertson.

Ai theksoi se gjeneral Mini e ka shprehur mendimin e tij personal, dhe se ky mendim i tij, duhet të injorohet thelbësisht dhe krejtësisht. Robertson ka theksuar se deklaratat e gjeneral Minit nuk përfaqësojnë as qëndrimin zyrtar të NATO-s dhe as të sekretarit të përgjithshëm të Aleancës.
Ndërkaq, sa i përket statusit final të Kosovës, Robertson ka përsëritur qëndrimin e tij se ky status do të përcaktohet nga KS i OKB-së, duke nënvizuar se NATO do të mbetet e angazhuar për të siguruar stabilitetin dhe paqen në Kosovë, si dhe për të garantuar sigurinë e rajonit dhe integrimin e tij të ardhshëm në strukturat evroatlantike.

"Kjo është politika jonë dhe askush tjetër nuk mund ta ndryshojë dotë dhe këtë politikë e caktoi unë dhe askush tjetër", ka thënë qartë lordi Roberston.


Përfaqësuesit e "Kuintit" bënë thirrje që sa më shpejt të fillojnë bisedimet mes Prishtinës dhe Beogradit

Prishtinë, 17 korrik 2003 - Shefi i Zyrës amerikane në Prishtinë, bashkë me përfaqësuesit e tjerë të "Kuintit" (pesëshes) diplomatike të akredituar në Kosovë u bënë thirrje institucioneve dhe liderëve të Kosovës që sa më shpejt të fillojnë bisedimet mes Prishtinës dhe Beogradit në mënyrë që të përshpejtohet procesi i integrimit të Kosovës në Evropë.
Harnish, Rondorf, Dikinson, Salcano apeluan për përmbushjen e tetë standardeve të përcaktuara nga bashkësia ndërkombëtare dhe që të ketë marrëdhënie të mira me të gjithë vendet e rajonti në mënyrë që Kosova të integrohet sa më shpejt në institucionet evropiane.
Harnish kërkoi që institucionet e Kosovës t'i përmbushin sa më shpejt këto standarde. Harnish theksoi se është e nevojshme që liderët e Kosovës të përgatiten sa më shpejt për bisedime dhe jo të presin fundin e verës, duke nënvizuar se standardet i ka përcaktuar bashkësia ndërkombëtare.
Përfaqësuesi italian Salcano tha se gjatë presidencës së Italisë me BE prioritet kryesor do të jetë Ballkani dhe në këtë aspekt bisedimet mes Prishtinës dhe Beogradit, sepse Evropa është e e ardhme e rajonit.

"Bisedimet do të zhvillohen për çështje praktike, me interes të përbashkët dhe ne kërkojmë që ato të fillojnë sa më parë, madje edhe para muajit gusht", tha Salcano, sepse shtoi ai, bisedimet janë të një rëndësie të veçantë edhe për BE-në.
Shefi i Zyrës britanike Mark Dikinson tha se biseidmet midis Prishtinës dhe Beogradit janë shumë të rëndësishme dhe ato duhet të fillojnë sa më shpejt. Ai shpreson që progresi i arritur ën Kosovë do të vazhdojë dhe qytetarët do të shohin rezultate konkrete në të ardhmen.
Ndërkaq përfaqësuesi gjerman Peter Rondorf tha e kusht kryesor për integrimin e vendeve të Ballkanit në Evropë është demokratizimi, ekonimia e tregut, marrëdhëniet e mira me fqinjët dhe respektimi i të drejave të pakicave.

"Kosova nuk mund të jetë në Evropë nëse ka probeleme me Serbinë", tha Rondorf, duke nënvizuar se përkundër progresit të brendshëm është e rëndësishme edhe ekzisimi i marrëdhënive të mira me fqinjët.
Përfaqësuesit e "Kuintit" vlerësuan me këtë rast se gjendja e sigurisë në Kosovë është përmirësuar, se ka përparim në vendosjen e rendit dhe të ligjit dhe përkrahën apelin e liderëve të Kosovës për kthimin e të zhvendosurve.


Javën e ardhshme Beogradi do t'i dorëzojë UNMIK-ut edhe 40 kufoma të gjetura në Serbi

Beograd, 17 korrik 2003 - Autoritetet serbe kanë njoftuar se në lokalitetet Batajnicë, Peruçac dhe Petrovosello në Serbi janë zbuluar edhe 40 kufoma të shqiptarëve që regjimi i Millosheviqit i kishte varrosur atje gjatë vitit 1999.

Trupat e ekshumuara do t'u dorëzohen autoriteteve të UNMIK-ut në pikën kufitare Merdar gjatë javës së ardhshme. Në tri varreza masive janë ekshumuar 130 kufoma të shqiptarëve.

Ndërkaq UNMIK-ut deri më tash i janë dorëzuar 70 prej tyre. Me dyzet trupat e pajetë të ekshumuara dhe të identifikuara numri i shqiptarëve të zhvarrosur në varrezat masive në Serbi arrin në 110. Edhe më tej presin për t'u identifikuar 820 kufoma të tjera të zhvarrosura.


Afër stacionit të policisë në Podujevë janë gjetur edhe dy granata të pashpërthyera

Podujevë, 17 korrik 2003 - Mbrëmë në Podujevë rreth orës dy pas mesnatës afër stacionit të policisë ka shpërthyer një bombë. Njoftohet se nuk ka pasur të lënduar, por vetëm për dëme materaile.

Sipas zëdhënësit të policisë së UNMIK-ut në Prishtinë, Derek Çapell, janë gjetur edhe dy granata të tjera të pashpërthyera afër stacionit të policisë, të cilat sot janë shkatërruar nga pjesëtarët e KFOR-it.

Çapell thotë se nuk ka të arrestuar dhe nuk dihet se kush qëndron prapa këtij sulmi. Gjithashtu ai ka theksuar se nuk dëshiron të spekulojë nëse shpërthimi i mbrëmshëm ka lidhje me vendimin e djeshëm të një gjykate të Prishtinës për dënimin e katër eprorëve të lartë të ish-UÇK-së nga zona e Llapit.


Dje në Podujevë u protestua kundër dënimit të katër ish-pjesëtarëve të UÇK-së të zonës së Llapit

Podujevë, 17 korrik 2003 - Mijëra qytetarë të Podujevës protestuan dje në qendër të qytetit kundër vendimit të dënimin të katër ish- pjesëtarëve të UÇK-së të Zonës Operative të Llapit, të cilët u dënuan me gjithësej 45 vjet burgim. Protestat kanë qenë të qeta dhe nuk është shënuar asnjë incident.

Protestusit e kanë cilësuar këtë proces gjyqësor si politikisht të motivuar, duke kërkuar lirimin e të dënuarve.


Avokatët e grupit të Llapit thonë se me këto dënime të rënda ka dështuar drejtësia ndërkombëtare

Prishtinë, 17 korrik 2003 - Shtatë avokatëmbrojtës të grupit të Llapit, vendimin e djeshëm të Gjykatës së Qarkut në Prishtinë, përkatësisht dënimin e katër ish- pjesëtarëve të UÇK-së të zonës së Llapit me gjithsej 45 vjet burgim, e kanë cilësuar jo të drejtë. Ata kanë theksuar se në këtë rast ka dështuar drejtësia ndërkombëtare.
Nekibe Kelmendi ka theksuar se me asnjë provë nuk është vërtetuar se këta të akuzuar, apo UÇK-ja në përgjithësi, ka qenë organizatë kriminale, apo të ketë pasur një plan kriminal për të kryer vepra penale të krimit të luftës. Zonja Kelmendi tha se është e habitur, por edhe e shokuar se si ka mundur kjo gjykatë t'i shpallë fajtorë për këtë vepër.
Zonja Kelmeni përmendi edhe një shembull të vendimeve jo të drejta të drejtësisë në Kosovë e aplikuar nga rregulloret e UNMIK-ut. Këta të akuzuar nuk mund të krahasohen me kriminelët e luftës nga komuniteti serb, duke përmendur në këtë kontekst rastin e fundit në Pejë që për 41 viktima është dënuar me vetëm 7 vjet heqje lirie, ndërkaq në rastin e këtij grupi të Llapit janë dhënë 45 vjet burgim për vepra penale, të cilat në mënyrë të sigurtë nuk janë vërtetuar gjatë procesit gjyqësor.
Po kështu edhe mbrojtësi tjetër i këtij grupi, Fazli Bala ka thënë se ky gjykim nuk është i drejt as sa i përket dënimeve, ngase ato janë tepër të rënda, nuk janë në harmoni me ato që praktikohen në Tribunalin e Hagës.


Rruga Durrës - Prishtinë përveç tri varianteve të projektimit nga Banka Botërore, ka edhe një variant të katërt

Kukës, 17 korrik 2003 - Magjistralja Durrës - Kukës - Morinë, që do të lidhë Shqipërinë me Kosovën përveç tri varianteve të projektimit të saj nga Banka Botërore, ka edhe një variant të katërt, i cili po përgatitet me një ekipë inixhinierësh shqiptarë.

Ky ekip ka kontaktuar me deputetët Durrës - Kukës - Morinë që ky projekt të mos jetë një rrugë e thjeshtë, por një autostradë me katër trasa, për vetë rolin strategjik që ka komunikimi mes Shqipërisë dhe Kosovës.
Në bazë të llogaritjes së ekspertëve të Bankës Botërore, tri variantet e deritashme të magjistrales Durrës- Kukës - Morinë kanë një kosto që sillet prej 163 deri në 260 milionë dollarë.

Tri variantet kanë gjatësi të ndryshme, por gjatësia më e vogël kërkon edhe volum më të madh pune, pasi kërkon ndërtimin e tuneleve për të bërë të dobishëm terrenin gjeografik të kësaj zone.

Paralelisht me grupet projektuese të rrugës Durrës- Kukës - Morinë, po punon edhe një grup i inxhinierëve shqiptarë të ndërtimtarisë, të cilët ka vite që merren me studimin e kësaj rruge, madje që para viteve të 90-ta.
Në bazë të llogarive që bëjnë inxhinierët shqiptarë, kostoja e autostradës Durrës - Kukës - Morinë do të kushtonte 526 milionë dollarë, ndërkohë që po të ndërtohej vetëm si rrugë e cilësisë së parë ajo do të kushtonte më pak se gjysma e variantit të parë.


Robertson i ka bërë thirrje Shqipërisë që të përforcojë kontrollin e kufirit dhe të luftojë krimin e organizuar

Tiranë, 17 korrik 2003 - Sekretari i përgjithshëm të NATO-s, Xhorxh Robertson bashkë me ambasadorët e Këshillit të Atlantikut të Veriut kanë arritur mbrëmë në Tiranë.

Me të arritur në kryeqytetin shqiptar, Robertson i ka bërë thirrje Shqipërisë që të përforcojë kontrollin e kufirit të saj dhe të luftojë korrupsionin dhe krimin e organizuar, duke thënë se vendet së synojnë për anëtarësim në Aleancë, duhet t'i kontribuojnë sigurisë dhe stabilitetit të vetë e jo të jenë vetëm konsumues të sigurisë së ofruar nga NATO.

Ndërkaq, në një intervistë për mediat vendore Robertson ka thënë se bashkësia ndërkombëtare dhe NATO duan kontroll në të mirë të kufijve nga Shqipëria, si dhe luftë më të vendosur kundër korrupsionit ilegal dhe krimit të organizuar, duke theksuar se këto aksione janë pjesë e luftës globale kundër rrjeteve terroriste në botë.

Por, Xhorxh Robertson e ka lavdëruar rolin e rëndësishëm të Tiranës siç e ka vlerësuar në luftën globale kundër terrorizmit, veçanërisht pjesëmarjen e saj në forcën paqeruajtëse ne Irak.


Një grup i punëtorëve është përleshur me policinë para Parlamentit të Maqedonisë

Shkup, 17 korrik 2003 - Policia e Maqedonisë ka arrestuar një person, ndërkaq disa të tjerë janë lënduar kur një grup i punëtorëve nga kompania energjetike shtetërore ishte përleshur me policinë para Parlamentit të Maqedonisë. Rreth 300 punëtorë protestonin për shkak të vendimit të qeverisë për largimin nga puna të 1000 punëtorëve të kësaj kompanie.


Spartak Ngjela shpall kandidaturën për kryetar bashkie në Tiranë

Tiranë, 17 korrik 2003 - Sekretari për marrëdhëniet me publikun i Partisë Demokratike, Spartak Ngjela shpalli të mërkurën kandidaturën për kryetar të bashkisë së Tiranës. Ngjela tha se ka marrë mbështetjen e plotë të strukturavwe dhe udhëheqjes së partisë. Nëse kandidatura e tij miratohet nga forumet drejtuese të PD-së, zoti Ngjela do të konkurrojë me kryetarin.


Në luftimet e ripërtrira ndërfisnore në Kongo janë vrarë të pakten 54 persona

Kampala, Ugandë, 17 korrik 2003 – Kryengritësit e fisit Hema kanë bërë të ditur sot (e enjte) se janë vrarë të pakten 54 persona në luftimet e ripërtrira ndërfisnore në verilindje të Kongos, afër qytetit Bunia ku janë vendosur forcat ndërkombëtare paqësore, njofton CNN.

Zëdhënësi i kryengritësve të këtij fisi ka thënë gjithashtu se milicia në bashkëpunim me fisin Lendu kishte sulmuar ditë më parë edhe qytetin Komia, rreth 50 km në lindje të qytetit Bunia, që ndodhet në brigjet e Liqenit Albert.

“Sulmuesit ua kanë dhënë flakën tri shtëpive, por ne kemi vrarë 32 syresh para se të iknin në male”, ka thënë ai. Burimet e Kombeve të Bashkuara në Bunia kanë konfirmuar se kanë njoftime për luftime në qytetin Komia dhe kanë shtuar se në luftimet rreth këtij qyteti në muajin e kaluar supozohet të jenë vrarë mbi 350 njerëz.


Nga një përplasje e një automjeti në një treg të Los Angjelosit kanë humbur jetën rreth 8 persona

Los Angjelos, 17 korrik 2003 – Një automjet është përplasur në një treg përplot shitblerës në Los Angjelos të Kalifornisë dhe aksidentalisht ka shkatuar vdekjen e rreth 8 personave dhe plagosjen e mbi 35 të tjerëve, 14 syresh rëndë, ka bërë të ditur policia vendore, njofton BBCWorld.

Ndër të vrarët është edhe një fëmijë. Ishte kohë dreke kur në tregun Santa Monika automjeti i drjetuar nga një plak mbi moshën 70-vjeçare, u përplas në turmën e tubuar pranë tezgave të tregut.


Në një aksident ajror të një heloiikopteri amerikan në Sicili kanë humbur jetën 4 anëtarë të ekuipazhit

Palermo, Sicili, 17 korrik 2003 – Një helikopter i ushtrisë amerikane është rrëzuar dhe ka shpërthyer flakë mbi ujëdhesën mesdhetare të Sicilisë, duke shkaktuar kështu vdekjen e 4 anëtarëve të ekuipazhit, ka bërë të ditur një zëdhënës i policisë italiane, njofton Rojter.

Zëdhënësi i Marinës amerikane në bazën ushtarake në Sigonella të Sicilisë ka konfirmuar se helikopteri MH-53E “Dragoi i detit”, me katër anëtarë të ekuipazhit, është rrëzuar rreth 10 mila në juglindje të bazës. Emrat e anëtarëve të ekuipazhit të aksidentuar nuk janë treguar derisa të informohen të afërmit e tyre. Shkaqet e aksidentit nuk janë të qarta.


Irak: Vritet Kryetari i Bashkisë

Haditah, Irak, 17 korrik 2003 - Kryetari i Bashkisë së qyteteti Hadithah në Irak, është vrarë pasi disa qytetarë e kishin akuzuar atë se po bashkëpunonte me amerikanët.
Autoritetet ushtarake amerikane konfirmojnë se kryetari i Bashkisë u qëllua ndërsa po ecte me makinë nëpër qytet.
Hadithah gjendet në një rajon të populluar kryesisht me myslimanë të sektit suni, rajon ky që ka qenë shumë armiqësor ndaj trupave amerikane.


Amerikanët përballen me "luftën guerile" në Irak

Bagdad, 17 korrik 2003 - Shtetet e Bashkuara të Amerikës kanë pranuar për herë të parë se po ndeshën në Irak me një luftë guerrile klasike, ndërkohe që trupat në terren po tregojnë shenja të hapura padurimi.

Komandanti ri i forcave amerikane në Irak, gjenerali Xhon Abizaid tha se mbështetës të Sadam Huseinit duke përfshirë këtu edhe anëtarë të ish-shërbimit sekret dhe Gardës Speciale të Republikës janë organizuar në celula rajonale.
"Është e sigurt se jemi duke luftuar me elementë bathiste të mbetur anembanë Irakut. Mendoj se pjesëarë të shëbimit sekret të Partisë së Sadamit, Baath, dhe njerëz të gardes speciale republikane janë organizuar në nivel rajonal dhe janë duke ndërmarrë atë që do ta përshkruaja si fushatë klasike guerrilase kundër nesh.

Kemi të bëjmë me një konflikt të intensitetit të ulët por sido që të përshkruash ajo megjithatë është lufte", tha gjenerali amerikan Abizaid.


Raport kritik vjetor i Kryqit të Kuq

Gjenevë, 17 korrik 2003 - Kryqi i Kuq ka kritikuar përqëndrimin e vëmendjes dhe ndihmën në vendet si Iraku dhe Afganistani. Ndihma ndjek më shumë interesa strategjike dhe politike, thuhet në raportin e sivjetëm të komitetit ndërkombëtar të Kryqit të Kuq.

Kështu ndihma për Afganistanin që prej 11 shtatorit 2001 është trefishuar, megjithëse nevoja ka mbetur e pandryshuar. Ndërsa vende si Angola, Somalia dhe Kongo pothuajse injorohen. Kryqi i Kuq kritikon edhe tendencën, që palët në luftime lënë ushtarët që të shpërndajnë ndihmat në popullsi.

Kjo fshin kufirin me organizatat e ndihmës dhe mund të rrezikojë punonjësit e tyre. Sipas raportit vitin e kaluar 24.500 vetë vdiqën nga katastrofat natyrore apo nga fatkeqësitë e shkaktuara nga njerëzit.


Mbi 45 fëmijë të rrëmbyer nga kryengritësit në Ugandë janë mbytur në lumë

Kitgum, 17 korrik 2003 – Mbi 45 fëmijë të rrëmbyer nga Armata e Rezistencës së Lordëve të Ugandës (LRA) janë mbytur duke i detyruar ata që të kalojnë lumin e vershuar në rajonin Teso, njofton BBCnews.

Në njoftim thuhet se fëmijët janë përmbytur duke e kaluar lumin Moroto përgjatë kufirit ndërmjet rretheve Katakvi dhe Lira. Fëmijët janë detyruar të hyjnë në lumë dhe të masin thellësinë e tij, por ata s'kanë ditur të notojnë dhe kështu janë mbytur.

Të hënën rreth 20 mijë nxënës shkolle kanë protestuar në qytetin verior Kitgum, duke kërkuar t'i jepet fund rrëmbimeve të fëmijëve nga ana e kryengritësve.


Evropianët vënë në dispozicion miliarda në luftën kundër Sidës

Paris, 17 korrik 2003 - Në luftën kundër sidës evropianët janë angazhuar të investojnë miliarda. Deri në vitin 2007 ata do të paguajnë 2,3 miliardë euro në fondet globale të shëndetësisë, tha ministrja gjermane e ndihmës për zhvillim, Heidemarie Wiezorek Zeul, në kuader të konferencës donatore për sidën në Paris. Kontributi gjerman do të rritet me 100 milionë në gjithsej 300 milionë euro.

Kryeministri francez, Zhak Shirak, ka premtuar trefishimin e kontributit në 150 milionë euro dhe do të bindë evropianët, që të paguajnë së bashku çdo vit një miliardë euro në fondet e shëndetesisë. Organizata e ndihmës mjekë pa kufi është e zhgënjyer.

Vetëm këtë vit fondi kishte mungese prej 1,4 miliardë eurosh. Nderkohë në mbarë botën 42 milionë njerëz janë të sëmurë nga Sida, e prekur është sidomos Afrika, në jug të Saharës.


Shkëmbim zjarri ndërmjet ushtarëve të Koresë së veriut dhe asaj të jugut

Seul, 17 korrik 2003 - Ushtarët koreanoveriorë dhe koreanojugorë kanë shkëmbyer zjarr në kufirin midis dy vendeve. Sipas të dhënave të shtabit të përgjithshëm në Seul ushtaret koreanoveriore qëlluan me mitralozë mbi një postë kufitare koreanojugore në zonën e çmilitarizuar.

Zjarri u përgjigj menjehere. Në palën koreanojugore nuk ka patur të plagosur. Në të kaluarën ka patur shpesh incidente të ngjashme në zonën e demilitarizuar. Të dyja shtetet ndodhen formalisht në gjendje lufte, sepse që prej përfundimit të luftës në Kore 1953 nuk është nënshkruar marrëveshje paqeje.