Lajme

E marte 15 korrik 2003 2003

Përmbajtja:

• Presidenti Rugova ia dorëzoi "Medaljen e artë Lidhjes së Prizrenit" bashkëshortes së Azem Hajdarit

• Qeveria serbe blen pronat e joshqiptarëve në veri të Mitrovicës

• Pas 20 ditësh përfundoi greva e 94 punëtorëve të fabrikës së blloqeve në Podujevë

• Francezët edhe në Kosovë kremtuan 14 Korrikun, festën e tyre nacionale

• Kryeparlamentari Daci priti shefin e Zyrës britanike në Prishtinë, Mark Dikinson

• U promovuan 22 doktorë shkence të fushave të ndryshme

• Vlerësimet e punës së drejtorive nuk duhet të kuptohen si "gjyq i drejtorëve"

• Në Gjilan - ftesa anonime për protestë qytetare

• Një ekspozitë rreth renovimit të sheshit "Nëna Tereze" në Prishtinë

• Sot fillon Universiteti Veror i Prishtinës

• Ilir Meta thotë se Kosova nuk është më një realitet i shkëputur ballkanik, por pjesë proceseve integruese

• Rreth 30 kryefamiljarë serbë janë kthyer në fshatin Bjellopojë të Pejës

• Shoqata e Pensionistëve të Kosovës ka kërkuar nga Serbia 916 milionë euro

• Janë shitur pesë ndërmarrjet e para shoqërore në Kosovë

• Tirana zyrtare reagon për çështjen e vendosjes së bustit të Nënë Terezës në Romë, me emrin e propozuar nga Maqedonia

• Reagim i Akademisë së Shkencave të Shqipërisë në lidhje me vënien në dyshim të origjinës së Nënës Tereze

• Kundërshtohet ideja e PDSH-së për vetëvendosje nga BE dhe nga Koalicioni qeveritar i Maqedonisë

• Çoviq thotë se nevojitet hapja e bisedimeve shqiptaro-serbe të cilat janë gozhduar tash e 20 vjet

• Thjeshtohet procedura e vizave britanike në Tiranë

• Të paktën 4 veta janë vrarë e disa të tjerë janë plagosur në një shpërthim në Irakun Verior

• Nga rrëshqitja e dheut në Siçuan të Kinës, drohet se kanë humbur jetën 51 njerëz

• Forcat amerikane kanë vrarë sot pesë irakianë

• Në një sulm në një stacion policie në Afganistan, talibanët kanë kanë vrarë 5 policë

• "Brigadat e martirëve Al Aksa" marrin përgjegjësinë për therjen e një izraeliti sot në mëngjes

• Trupat amerikane deri në "pakufi" në Irak

• Annan i bën thirrje botës për të ndihmuar në Irak

• Abas zgjidh dallimet me Arafatin

• Takim i zyrtarëve kinezë dhe koreanoveriorë

• Një palestinez vret një izraelit në Tel Aviv

• Presidenti amerikan e sheh të munshëm një mision në Liberi

• Politikanë majtistë shprehen kundër shtypjes

Presidenti Rugova ia dorëzoi "Medaljen e artë Lidhjes së Prizrenit" bashkëshortes së Azem Hajdarit

 

Prishtinë, 15 korrik 2003 - Presidenti i Kosovës Ibrahim Rugova në një ceremoni rasti ia dorëzoi sot "Medaljen e artë të Lidhjes së Prizrenit", familjes së Hajdari, me të cilën e ka dekoruar Azem Hajdarin, veprimtarin dhe dëshmorin e demokracisë në Shqipëri.    Dekoratën e mori Fatmire Hajdari, bashkëshorte e Azem Hajdarit, e cila në Prishtinë kishte ardhur bashkë me të birin e saj. Në arsyetimin e shkruar të Presidentit Rugova për ta dekoruar Azem Hajdarin thuhet:

  

"Nga Presidenti i Kosovës dekorohet me Medaljen e artë të Lidhjes së Prizrenit, veprimtari Azem Hajdari, për kontributin e dhënë për vendosjen dhe zhvillimin demokracisë në Shqipëri, si dhe për përkrahjen e Lëvizjes demokratike të Kosovës për liri e pavarësi, në vitet '90".

Zonja Hajdari, duke u falendruar për dekoratën e Presidentit Rugova, tha se kjo medalje është një nder i madh për veprimtarinë politike të bashkëshortit të saj. "Bashkëshorti im ka qenë gjithmonë pranë jush. Ka qenë gjithmonë me mendje dhe me shpirt në Kosovë dhe shpirti i tij është në mesin e atyre trimave që dhanë jetën për çlirimin e Kosovës", tha Fatmire Hajdari.

Në fillim të viteve '90, Azem Hajdari ka qenë një ndër liderët kryesorë të lëvizjes studentore në Shqipëri për demokraci dhe pastaj deputet në parlamentin shqiptar, i cili është angazhuar vazhdimisht për çështjen e Kosovës. Ai u vra pabesisht në një atentat në Tiranë në vitin 1998.

 

 

Qeveria serbe blen pronat e joshqiptarëve në veri të Mitrovicës

 

Mitrovicë, 15 korrik 2003 - Subjektet politike dhe jopolitike të Mitrovicës nëpërmjet një letre të hapur u kanë bërë thirrje qytetarëve që të mos i shesin pronat e tyre në veri të qytetit, tani kur qeveria serbe është duke blerë pronat e joserbëve atje.

 

Këto subjekte vlerësojnë se Beogradi në këtë mënyrë synon një rikolonizim të ri për të ndryshuar strukturën nacionale të veri të qytetit të Mitrovicës dhe kjo po ndodh në kohën kur udheqësit shqiptarë bëjnë thirrje për kthimin e të gjithë të zhvendosurve në shtëpitë e tyre, theksohet në një letër drejtuar të gjihë qytetarëve të Mitrovicës. Njëherit kjo letër paralajmëron qytetarët dhe u bën thirrje atyre që kurrsesi të mos pranojnë ofertat e qeverisë serbe për të shitur pronat e tyre.

Këto subjekte kërkojnë nga Gjykata komunale e Mitrovicës të mos i vërtetojë kontratat e shitblerjes, ndërkaq nga administrata ndërkombëtare, nga Bordi drejtues në pjesën veriore të qytetit dhe nga kryetari i komunës kërkojnë që të ndërmarrin hapat e domosdoshëm për të ndërprerë shitblerjen në atë pjesë të qytetit. Kohëve të fundit janë evidentuar 11 raste të shitblerjeve të tilla në veri të Mitrovicës.

 

 

Pas 20 ditësh përfundoi greva e 94 punëtorëve të fabrikës së blloqeve në Podujevë

 

Podujevë,15 korrik 2003 – Pas 20 ditë greve, 94 punëtorët e fabrikës së materialit ndërtimor "19 Qershori", sot i dhanë fund grevës në saje të një marrëveshjeje që është arritur ndërmjet punëtorëve grevistë, stafit menaxhues të fabrikës si dhe BSPK-së në Prishtinë, njoftoi Muhamet Murati, kryetari i Këshillit organizativ të protestës dhe kryetar i Tubimit të punëtorëve në këtë fabrikë.

 

Ai tha se marrëveshjen e arritur e kanë garantuar kryetari i BSPK-së z.Bahri Shabani dhe anëtari i kësaj kryesie Avni Hajdini pas një sërë vizitash që i kanë bërë fabrikës dhe bisedave që ata kanë zhvilluar me stafin menaxhues.

Stafi drejtues i fabrikës duhet fillimisht të paguajë shumën prej 70 eurosh për të gjithë 94 punëtorët grevistë. Atyre u janë paguar nga 50 euro, ndërkohë që shumën tjetër prej 20 eurosh do ta marrin të enjten, ka shpjeguar Murati.

Ai njoftoi se ndërprerja e grevës është mirëpritur nga stafi drejtues i fabrikës ndërkohë që me prodhimin pritet që të fillohet ditën e mërkurë.

 

 

Francezët edhe në Kosovë kremtuan 14 Korrikun, festën e tyre nacionale

 

Prishtinë, 15 korrik 2003 - Zyra franceze në Prishtinë, me një solemnitet rasti ka shënuar mbrëmë 14 Korrikun, festën nacionale të Francës, ku merrnin pjesë përfaqësues të lartë vendorë dhe ndërkombëtarë, në mesin e tyre dhe Presidenti i Kosovës Ibrahim Rugova.

 

Në këtë solemnitet u tha se 14 Korriku është një ngjarje historike për francezët, por kjo ngjarje i përket të gjithë popujve të botës, pra edhe Kosovës, e cila është dakord me vlerat e lirisë, barazisë dhe vëllazërisë. Këto janë vlera të cilat secili popull duhet t'i përaqafojë dhe t'i bëjë pronë të veta, ka thënë shefi i Zyrës franceze në Prishtinë, Bernar Garanshe.

Edhe ushtarët francezë i kanë bërë nderime flamurit të shtetit të tyre dhe janë shprehur se vendosja e paqes së plotë në Kosovë do të shënojë edhe fundin e misionit të tyre këtu si ushtarë të huaj.

"Tani është momenti që të mblidhemi të gjithë francezët së bashku, ta kremtojmë këtë festë. Është një rast të mendojmë edhe për familjet tona të cilat janë në Francë, por është një rast që të mendojmë edhe për misionin që e kryejmë në Kosovë dhe për vlerat të cilat i jep Franca gjatë misionit të saj këtu", ka thënë Iv dë Kerambon, përfaqësues ushtarak i Francës në Kosovë.

"Ne jemi mjaft të prekur nga përgëzimi që Presidenti i Kosovës, z.Rugova, i ka dërguar Presidentit të Francës, Zhak Shirak, me rastin e 14 Korrikut", ka thënë ai. Iv de Kerambon ka theksuar angazhimin e vazhdueshëm të Francës në Kosovë, për të gjithë qytetarët e saj, duke përfunduar fjalën e tij me: "Rroftë Franca, rroftë Kosova"!

Franca aktualisht kontribuon në kuadër të KFOR-it me rreth 3.500 ushtarë dhe ka nën kontroll zonën më të ndieshme të Kosovës – atë të veriut, ku ndarjet etnike janë më të theksuarat.

 

 

Kryeparlamentari Daci priti shefin e Zyrës britanike në Prishtinë, Mark Dikinson

 

Prishtinë, 15 korrik 2003 - Kryetari i Kuvendit të Kosovës, Nexhat Daci priti sot shefin e Zyrës britanike në Prishtinë, z. Mark Dikinson. Pas këtij takimi zoti Daci tha se gjatë kësaj bisede është bërë një përmbledhje e asaj që është arritur dhe nuk është arritur këtë vit. "Takimet tona janë gjithmonë shumë të sinqerta dhe unë shpreha synimet tona, duke kërkuar përkrahjen e Qeverisë britanike, që e kemi pasur gjithmonë", tha kryeparlamentari Daci.

 

Gjatë këtij takim të dy bashkëbiseduesit kanë pasur një qasje krejtësisht të përafërt dhe po një gjejnë gjuhë të përbashkët për punët që duhet kryer bashkarisht.

Ndërkaq, z. Dikinson pasi theksoi se u bisedua për çështje që pritet për t'u diskutuar, përgëzoi institucionet e Kosovës për kahjet dhe zhvillimin pozitiv që kanë marrë. "Diskutuam për progresin që kanë bërë institucionet, në mënyrë të veçantë për progresin që shpresojmë të bëhet lidhur me bashkëpunimin ndërmjet institucioneve, sidomos me UNMIK-un, pasi të mbërrijë PSSP i ri", theksoi Dikinson.

Duke folur rreth prioriteteve të përbashkëta në të ardhmen, profesor Daci theksoi se kishte shprehur vullnetin që Përfaqësuesi i ardhshëm Special duhet të jetë një personalitet i fuqishëm, të ketë një mbështetje të mirë dhe të jetë nga njëra prej vendeve të fuqishme të Evropës.

 

"Kemi koncepte shumë të përbashkëta për ardhmërinë. Unë kam deklaruar vazhdimisht se Londra, Berlini e Parisi për Evropën janë qendra kryesore të influencës në Bruksel, që bashkarisht me Uashingtonin nga ana tjetër, po punojmë në këto koncepte dhe mund të them se çdo ditë e më shumë jemi më afër njëri tjetrit", tha kryetari i Kuvendit të Kosovës, Nexhat Daci, njofton Zyra e Kuvendit të Kosovës.

 

 

U promovuan 22 doktorë shkence të fushave të ndryshme

 

Prishtinë, 15 korrik 2003 - Me një ceremoni rasti të organizuar nga Universiteti i Prishtinë, dje u promovuan 22 doktorë shkence të fushave të ndryshme. Me këtë rast u vlerësua se ky është një kontribut i madh për të ardhmen e Kosovës.

Kandidatët e promovuar kanë doktoruar kryesisht në vitet 1997/1998. Prej 22 të doktoruarve 11 janë nga shkencat mjekësore, ndërkaq 7 nga shkencat teknike.

 

 

Vlerësimet e punës së drejtorive nuk duhet të kuptohen si "gjyq i drejtorëve"

 

Gjilan, 15 korrik 2003 - Në bazë të vendimit të Kuvendit të Komunës në Gjilan, së shpejti duhet të fillojë vlerësimi i punës së drejtorëve në të gjitha drejtoritë e këtushme. Lutfi Haziri, kryetar i komunës së Gjilanit tha të martën në takimin me Bordin e drejtorëve se vlerësimi do të bëhet mbi baza të rregulloreve dhe garantoi se nuk do të lejojë që ky proces të shndërrohet në "gjyq të drejtorëve".

 

Duke sqaruar se një gjë e tillë është e nevojshme të bëhet për të rritur efiaksitetin e punës, ai kërkoi që vlerësimi të bëhet pa tensione politike, të cilat janë manifestuar kohëve të fundit dhe, gjithsesi të jetë i paanshëm e korrekt.

Haziri e ka vlerësuar pozitive punën e përgjithshme të drejtorive, por ka thenë se duhet të jemi të sinqertë dhe të pranojmë se kishte edhe dobësi. "Në shërbimin civil nuk do të lejoj të bëhet politikë as për kushtin më të rëndë", ka qenë këmbëngulës ai, duke paralajmëruar masa rigoroze ndaj atyre që sillen ndryshe gjatë kohës së punës.

Edhe kryeshefi ekzekutiv Enver Muja ishte dakord se mund të rritet efikasiteti në shërbimin civil. "Ka rezultate, por ka edhe probleme nëpër drejtori" . Unë mendoj se mund të jemi edhe më të mirë, ka thenë Muja.

Për nga sistemi i qeverisjes lokale, Gjilani është komuna më specifike në Kosovës, për faktin se ka 11 Komitete, tek të cilat Kuvendi ka deleguar disa nga përgjegjësitë e veta. Por ndonjëherë ka edhe vërejtje në raportet Komitet - Drejtori.

Xhemajl Hyseni, zëvendëskryetar i komunës, ndërkaq tha se është i dukshëm një konflikt që ai e qujati të heshtur, ndërmjet Komiteteve dhe Drejtorive përkatëse. E keqja është se disa nga Komitetet duan të jenë edhe drejtori dhe kërkojnë llogari edhe për çështje operative.

 

 

Në Gjilan - ftesa anonime për protestë qytetare

 

Gjilan, 15 korrik 2003 - Që nga dita e djeshme, në Gjilan mund të shihen dhjetra ftesa për protestë qytetare, por nuk dihet ende se kush qëndron prapa tyre. Apeli iu është drejtuar qytetarëve, të cilët ndiejnë se iu kanë shkelur të drejtat e tyre, nga, siç thuhet, ana e pushtetarëve.

Motoja e protestës, që duhet të mbahet të mërkurën pasdite, para Kuvendit të komunës, sipas këshillit organizativ "anonim" është "Duam bukë - duam punë - duam drejtësi", ndërkaq qëllimi i saj është ndalja e familjarizmit, korrupcionit dhe të gjitha dukurive të tjera negative, të cilat e dëmtojnë qytetarin e Gjilanit dhe shoqërinë në përgjithësi.

Lufi Haziri, kryetar i komunës, thotë se një protestë e tillë nuk është lajmëruar as në organet e komunës dhe as të policisë, dhe si të tillë ai e cilëson një thirrje manipuluese. Haziri tha se Komiteti për siguri dhe emergjencë do ta diskutojë sot këtë çështje, përderisa kërkesat e theksuara si arsye për mbajtjen e protestës i vlerëson të paqëndrueshme dhe të cilat kanë për qëllim njollosjen e autoritetit komunal.

Ndonëse organizatori i protestës nuk dihet tash për tash, të paktën një nga personat që i kanë shpërndarë traktet, është i njohur.

 

 

Një ekspozitë rreth renovimit të sheshit "Nëna Tereze" në Prishtinë

 

Prishtinë, 15 korrik 2003 - Në Fakultetin e Ndërtimtarisë dhe Arkitekturës të Universitetit të Prishtinës u hap ekspozita rreth renovimit të sheshit "Nëna Tereze" në Prishtinë, organizuar nga Drejtorati për Urbanizëm i Kuvendit komunal të Prishtinës në bashkëpunim me studentët e këtyre fakulteteve.

Grupi themelor për realizimin e këtij projekti pritet të fillojë punën brenda gjashtë muajve me donacione, të cilat i ka siguruar Kuevendi komunal i Prishtinës dhe UNDP-ja, të cilat kanë ndarë nga 100 mijë euro.

 

Pas hapjes së kësaj ekspozite organizatorët presin që do të paraqiten edhe donatorë të tjerë në mënyrë që ky projekt të realizohet me sukses. Ekspozita do të jetë e hapur deri më 17 të këtij muaji.

 

 

Sot fillon Universiteti Veror i Prishtinës

 

Prishtinë, 15 korrik 2003 - Sot fillon punën Universiteti Veror i Prishtinës, në të cilin mësimet do t'i ndjekin 600 studentë. Prej tyre 450 janë nga Kosova, 100 nga rajoni i Evropës Juglindore dhe 50 nga vende të ndryshme, të cilët vetëfinancohen. Universiteti Veror edhe këtë vit është organizuar nga Universiteti i Prishtinës dhe Asociacioni për trajnime akademike nga Holanda.

Të gjithë profesorët dhe studentët e huaj tashmë kanë arritur në Prishtinë dhe janë bërë të gjitha përgatitjet e nevojshme për ecurinë në Universitet.

Interesimi i studentëve është kryesisht për shkenca shoqërore, duke përfshirë edhe të drejtën ndërkombëtare, por asnjë fakultet nuk ka mbetur pa u përfshirë.

 

 

Ilir Meta thotë se Kosova nuk është më një realitet i shkëputur ballkanik, por pjesë proceseve integruese

 

Tiranë, 15 korrik 2003 - Duke i bërë një analizë periudhës gjashtë mujore të politikës së jashtme në Shqipëri, ministri i jashtë Ilir Meta ka prekur edhe proceset demokratike në Kosovë.

 

Ai ka theksuar me këtë rast se zhvillimet e fundit në Kosovë janë tregues i një mjedisi ndëretnik në përmirësim dhe ka përshëndetur hapat e udhëheqësve të Kosovës për iniciativat që ata kanë ndërmarrë drejt serbëve të Kosovës me qëllim që të inkurajojnë kthimin në shtëpitë e tyre në Kosovë, për të qenë pjesë e zhvillimeve të këtushme.

Ministri i jashtëm i Shqipërisë u shpreh se Kosova nuk është më një realitet i shkëputur ballkanik, por pjesë e proceseve integruese drejt Evropës, që kanë përfshirë rajonin.

Ndërkaq duke folur për bashkëpunimin ekonomik mes Shqipërisë dhe Kosovës, z. Meta u shpreh se shtimi i dukshëm i shkëmbimeve dhe realizimi i marrëveshjeve ku spikatë ajo për tregti të lirë, i kanë hapur rrugë bashkëpunimit dhe hartimit të strategjive të përbashkëta si ato të energjisë dhe infrastrukturës.

 

 

Rreth 30 kryefamiljarë serbë janë kthyer në fshatin Bjellopojë të Pejës

 

Prishtinë, 15 korrik 2003 - Rreth 30 kryefamiljarë serbë janë kthyer dje në fshatin Bjellopojë të Pejës. Ata janë vendosur në kontejnerë të improvizuar, ndërkaq më vonë do t'u ndërtohen shtëpitë. Ky fshat një nga fshatrat më të mëdha i banuar me serbë para luftës.

 

Kthimi i serbëve është bërë në baza vullnetare dhe pasoi pas thirrjes së udhëheqësve të Kosovës javën e kaluar për t'u kthyer në shtëpitë e tyre në Kosovë.

 

 

Shoqata e Pensionistëve të Kosovës ka kërkuar nga Serbia 916 milionë euro

 

Prishtinë, 15 korrik 2003 - Shoqata e Pensionistëve të Kosovës edhe njëherë ka kërkuar nga Serbia 916 milionë euro, të cilat ajo ua ka borxh pensionistëve të Kosovës.

 

Zyrtarët e kësaj shoqate kanë theksuar se është e pakontestueshme që Serbia u ka borxh pensionistëve dhe invalidëve nga 5300 euro për person, që konsiston në shënimet dhe në parametrat e vitit 1989.

Serbia u ka borxh edhe 60 mijë personave të tjerë të cilët kanë stazh të konsideruar pune dhe kanë paguar kontribute me vite të tëra, thotë Riza Shala, nënkryetar i kësaj shoqate.

 

 

Janë shitur pesë ndërmarrjet e para shoqërore në Kosovë

 

Prishtinë, 15 korrik 2003 - Agjencia Kosovare e Mirëbesimit ka shënuar mbrëmë fillimin zyrtar të procesit të privatizimit, duke publikuar të gjitha ofertat për gjashtë ndërmarrjet e para shoqërore, që pritet të privatizohen.

 

Kjo shënon procesin e shitjes së ndërmarrjeve shoqërore në Kosovë dhe kalimin e tyre në pronësi private. Njoftohet se mbrëmë në selinë e UNMIK-ut në Prishtinë u bënë publike të gjitha ofertat për këto gjashtë ndërmarrje.

Kështu,

"Energoinvesti", fabrika për prodhimin pajisjeve është shitur 750 mijë euro,

"Energoinvesti", fabrika për prodhimin e siguresave - 525.125 euro,

"Lepenci" i Kaçanikut - 650 mijë euro,

"Përparimi" i Skënderajt - 2.298.744 euro,

"Montazhi" i Prishtinës - 210 mijë euro,

"Termosistemi" i Rahovecit - 200 mijë euro.

 

Për ndëmarrjen "Ringov" të Pejës nuk kishte asnjë ofertë.

 

 

Tirana zyrtare reagon për çështjen e vendosjes së bustit të Nënë Terezës në Romë, me emrin e propozuar nga Maqedonia

 

Tiranë, 15 korrik 2003 - Diplomacia dhe autoritetet shqiptare kanë ndërmarrë disa masa lidhur me diskutimet e fundit mbi një kërkesë të hershme të qeverisë maqedonase për vendosjen e bustit të Nënës Tereze në një nga sheshet e Romës me emrin e propozuar Maqedonia.

 

Burime zyrtare të Ministrisë së Jashtme bënë të ditur se me marrjen e këtij lajmi, ambasadori shqiptar në Itali, Pëllumb Xhufi, është interesuar pranë Kryetarit të Bashkisë së Romës, Valter Veltroni, ku është informuar se një gjë e tillë "nuk ka gjasa të ndodhë".

Po kështu edhe nga Selia e Shenjtë janë marrë garancitë për shmangien e një veprimi të tillë.

Kjo çështje është ngritur edhe në takimin mes Presidentit shqiptar Alfred Moisiu me kryetarin e Dhomës së Deputetëve të Parlamentit italian, Pier Ferdinando Kazini.

Ndërkohë, po vazhdojnë të merren kontakte në nivele të larta me autoritetet përgjegjëse italiane, si dhe janë në proces peticione të intelektualëve të shquar shqiptarë, bëjnë të ditur burimet e Ministrisë së Jashtme.

Hapa të tillë kanë marrë shkas nga disa zhvillime të diskutuara së fundi, ku qeveria e Maqedonisë, përmes ambasadorit të mëparshëm të saj në Romë, Viktor Gaber, i ka parashttuar një kërkesë ministrit të dikurshëm të Punëve të Jashtme të Italisë, për ngritjen e monumentit dedikuar përkujtimit të 90 vjetorit të lindjes së Nënë Terezës me përkushtimin që vijon: “Maqedonia për nder të bijës së vet Gonxhe Bojaxhiut-Nëna Terezë ( Shkup 1910-Kalkuta 1997)”.

 

 

Reagim i Akademisë së Shkencave të Shqipërisë në lidhje me vënien në dyshim të origjinës së Nënës Tereze

 

Tiranë, 15 korrik 2003 – "Fakti që Nëna Tereze ka prejardhje shqiptare është i pamohueshmëm. Ajo e ka deklaruar vetë në ceremoninë e marrjes së Çmimit Nobel me plot gojën: 'Atdheu im është Shqipëria'", thuhet në një reagim të Akademis së Shkencave të Shqipërisë.

 

Në lidhje me vënien në dyshim të origjinës së Nënës Tereze pikërisht para shenjtërimit të pritshëm të saj në Romë, Akademai e Shkencës së Shqipërisë ka dalë me një deklaratë në të cilën shprehet se nuk ka asnjë dyshim se humanistja e madhe është bijë e kombit shqiptar, se varret e të parëve dhe të të afërmve të saj gjenden në Shqipëri dhe se ajo vetë ka deklaruar me rastin e marrjes së Çmimit Nobel se atdheu i saj është Shqipëria.

 

"Kryesia e Akademisë së Shkencave të Shqipërisë ka ndjekur me vëmendje dhe me shqetësim të madh lajmet e përhapura përmes medias për përpjekjet për të mohuar origjinën shqiptare të Nënë Terezës.

 

Asnjë përpjekje e frymëzuar nga motive të mbrapshta nuk mund të verë në dyshim një të vërtetë të njohur botërisht. Kryesia e Akademisë ka besim në përpjekjet e shtetit shqiptar për ta mbrojtur këtë të vërtetë pranë autoriteteve të huaja kompetente", - thuhet në deklaratën për shtyp të Kryesisë së Akademisë së Shkencave të Shqipërisë që e boton shtypi i Tiranës.

 

Ndërkaq, në lidhje me debatin që po zhvillohet në Shqipëri për ngritjen e një shtatoreje të Nënës Tereze në Tiranë, Kryesia e Akademisë shprehet se në kuadrin e programit qeveritar për kremtimin e shenjtërimit të Nënës Tereze është parashikuar pikërisht ngritja e përmendores së saj në Tiranë.

 

Është shpallur edhe një konkurs për këtë qëllim, si edhe është parashikuar mbajtja e një konference shkencore ndërkombëtare që si temë do të kishte "Nëna Tereze dhe vepra e saj", që do të organizohet nga Akademia e Shkencave dhe do të mbahet në muajin tetor në Tiranë.

 

 

Kundërshtohet ideja e PDSH-së për vetëvendosje nga BE dhe nga Koalicioni qeveritar i Maqedonisë

 

Shkup, 15 korrik 2003 - Idenë për vetëvendosje që e plasoi në Kongresin e saj Partia Demokratike Shqiptare e kanë kundërshtuar Bashkimi Evropian dhe partitë e koalicioni aktual qeveritar në Maqedoni.

Përfaqësuesi i BDI-së Agron Buxhaku tha se kjo ide është e parealizueshme pasi kërkesat e shqiptarëve janë përfshirë në Marrëveshjen e Ohrit.

Në anën tjetër zëdhënësja e BE-së Irena Gjuzelova ka thënë se moszbatimi i Marrëveshjes së Ohrit do të çonte në krijimin e shteteve etnike. Partia opozitare VMRO-DPMN nuk e ka komentuar këtë qëndrim të PDSH-së, ndërkaq LSDM-ja e ka dënuar ashpër idenë e PDSH-së, duke thënë se kjo parti po humb elektoratin dhe po ndryshon kursin politik.

 

 

Çoviq thotë se nevojitet hapja e bisedimeve shqiptaro-serbe të cilat janë gozhduar tash e 20 vjet

 

Beograd, 15 korrik 2003 - Zëvendëskryeministri i Serbisë Nebojsha Çoviq thotë se problemi i Kosovës është i asaj natyre që për të nuk duhet kërkuar zgjidhje vetëm në Kosovë, ose vetëm në Serbi dhe Mal të Zi, por me gjerë në mbarë rajonin. Çoviq ka shfaqur bindjen e tij se së shpejti do të arrihet deri te dialogu fillestat i Beogradit dhe Prishtinës, por ka thënë se bisedimet për çdo rast duhet të përgatiten mirë.

"Nuk na nevojitet marketing apo dialog për hir të dialogut por hapja e bisedimeve të palëve shqiptare e serbe të cilat janë gozhduar tash e 20 vite me kulminim të padurueshmërisë së madhe", ka deklaruar Çoviq.

 

 

Thjeshtohet procedura e vizave britanike në Tiranë

 

Tiranë, 15 korrik 2003 - Britania e Madhe ka vendosur të thjeshtojë procedurën për marrjen e vizave në Tiranë. Qytetarët e Shqipërisë që edhe më parë kanë udhëtuar për në Mbretërinë e Bashkuar, prej të hënës do ta kenë më të lehtë marrjen e vizës britanike.

Në ambasadën Britanike në Tiranë tani mund ta dorëzosh formularin e plotësuar për vizë, pa patur nevojë që të presësh për të folur me ndonjë person të zyrës së vizave.

Ambasada e Mbretërisë së Bashkuar njofton se kjo proçedure e re nuk garanton domosdo marrjen e vizës, por në qoftë se qytetari që bën kërkesë, i ka plotësuar të gjitha kriteret, atëherë viza do të jetë gati për t'u marrë brenda ditës.

Sistemi i ri i dhënies së vizave nuk është i vlefshëm për të gjithë qytetarët. Përveç stafit diplomatik shqiptar dhe punonjësve të qeverisë në vizita zyrtare, prej sistemit të ri përfitojnë të gjithë ata që kanë udhëtuar më parë në UK ose në SHBA, po ashtu studentët që ndjekin shkollat britanike si dhe të moshuarit mbi 65 vjeç që kanë familjarë në Mbretërinë e Bashkuar.

 

 

Të paktën 4 veta janë vrarë e disa të tjerë janë plagosur në një shpërthim në Irakun Verior

 

Bagdad, 5 korrik – Të paktën katër veta janë vrarë dhe disa të tjerë janë plagosur në një shpërthim afër stacionit të policisë në Irakun verior, ka bërë të ditur televizioni arab al-Xhazira, njofton BBCWorld. Shpërthimi ka ndodhur në qytetin Al-Ramadi rreth 100 km në perendim të Bagdadit.

 

Njoftohet se përforcime ushtarake amerikane kanë shkuar në vendngjarje. Nuk dihet nëse ka ndër amerikanë të plagosur.

 

 

Nga rrëshqitja e dheut në Siçuan të Kinës, drohet se kanë humbur jetën 51 njerëz

 

Pekin, 15 korrik 2003 - Nga rrëshqitja e dheut drohet se kanë humbur jetën 51 njerëz në provincën jugperendimore të Kinës, Seçuan, kanë bërë të ditur sot (e martë) mediat shtetërore vendore, njofton Rojter. Ekipet e shpëtimit kanë zbuluar vetëm një trup dhe ky i një femre turiste nga Shangai, që ishte zhvendosur në një luginë lumi pas vershimit të tij.

 

Njoftohet se këto ekipe kanë shpëtuar 71 persona, të cilët kanë ikur në malin e fshatit, nga frika e rrëshqitjes së dheut. Vershimet stinore të këtoditshme në Kinë kanë shkaktuar vdekjen e 570 njerëzve dhe kanë detyruar evakuimin e 2.3 milionë njerëzve nga rajonet e vershuara.

 

 

Forcat amerikane kanë vrarë sot pesë irakianë

 

Bagdad, 15 korrik 2003 - Forcat amerikane kanë vrarë sot pesë irakianë dhe kanë arrestuar një tjetër pasi kundër tyre ishte vënë një pritë, ndërsa po shkonin në perëndim të Bagdadit, ka thënë një komandant i trupave amerikane, njofton Rojter.

Përleshja ka ndodhur ndërmjet qyteteve Ramadi dhe Habania, rreth 60 mila në perëndim të Bagdadit, rajon i kontrolluar nga trupat amerikane.

 

 

Në një sulm në një stacion policie në Afganistan, talibanët kanë kanë vrarë 5 policë

 

Kandahar, Afganistan, 15 korrik 2003 – Luftëtarë të dyshimtë talibanë kanë sulmuar një stacion të policisë në Afganistanin jugor dhe kanë vrarë shefin e policisë dhë katër policë të tjerë, ka bërë të ditur sot (e martë) një zyrtar policie, njofton AP. Njoftohet se në këtë sulm kanë marrë pjesë rreth 12 talibanë.

 

Po në këtë njoftim thuhet se dy policë të tjerë janë plagosur në një sulm të djeshëm në rrethin Ghorak, 72 mila në veriperndim të Kandaharit. Përgjegjësinë ende s’e ka marrë askush, por për këtë zyratarët fajësojnë talibanët.

 

 

"Brigadat e martirëve Al Aksa" marrin përgjegjësinë për therjen e një izraeliti sot në mëngjes

 

Bejrut, 15 korrik 2003 – Një grup palestinez i lidhur me presidentin Jaser Arafat, ka bërë të ditur sot (e martë) se qëndron pas therjes me thikë të një izraeliti, vrasje kjo që kërcënon armëpushimin sipas planit amerikan për paqen izraelito-palestineze, njofton Rojter.

 

"Një luftëtar i njësitit martir të Ali Xhulanit sot në mëngjes është përpjekur të hyjë në një restoran në Xhafa dhe është përleshur me rojën dhe kështu ka ndodhur vrasja e një koloni dhe plagosja e të tjerëve", thuhet në një kumtesë të faksuar nga "Brigadat e martirëve Al Aksa", duke përdorur një eufemizëm për thikën.

 

 

Trupat amerikane deri në "pakufi" në Irak

 

Bagdad, 15 korrik 2003 - Mijëra trupa amerikane që ndodhen në Irak janë njoftuar se afati i shërbimit të tyre në këtë vend është zgjatur në pakufi. Lajmi erdhi vetëm një javë pasi rreth nëntë mijë trupave nga Divizioni i Tretë i Këmbësorisë, iu tha se do të mund të kthehen në shtëpitë e tyre nga fillimi i shtatorit.

Divizioni i mekanizuar, i cili i pari hyri në Bagdad, pas kalimit të shkretëtirës nga Kuvajti, ka humbur numrin më të madh të ushtarëve që nga fillimi i invazionit.

Vendimi për zgjatje të afatit thuhet të jetë marrë për shkak të problemeve të sigurisë në Irak.

 

 

Annan i bën thirrje botës për të ndihmuar në Irak

 

Nju Jork, 15 korrik 2003 - Sekretari i përgjithshëm i OKB-së, Kofi Annan i ka bërë thirrje gjithë komunitetit ndërkombëtar që të ndihmojë në arritjen e një qëndrueshmërie në Irak.

Ai e bëri këtë thirrje pas takimit të parë me presidentin Bush që kur Shtetet e Bashkuara dështuan që të marrin mbështetjen e OKB-së për invadimin e Irakut.

Zoti Bush tha se operacioni i udhëhequr nga amerikanët për të stabilizuar vendin po bënte një përparim të mirë.

 

 

Abas zgjidh dallimet me Arafatin

 

Ramallah, 15 korrik 2003 - Kryeministri palestinez, Mahmud Abas, tha se ka tejkaluar dallimet me Jaser Arafatin, pas bisedimeve që kishte zhvilluar me udhëheqësin palestinez në selinë e tij në qytetin Ramallah të Bregut Perëndimor.

Ata u takuan për herë të parë që kur zoti Abass ofroi dorëheqje nga Komiteti Qendror i Lëvizjes Fatah të zotit Jaser Arafat, javën e kaluar.

Disa mbështetës të zotit Arafat kanë theksuar se zoti Abas ishte shumë i butë në bisedimet paqësore me Izraelin, veçanërisht në çështjen e lirimit të të burgosurve palestinezë.

 

 

Takim i zyrtarëve kinezë dhe koreanoveriorë

 

Penian, 15 korrik 2003 - Të dërguarit kinezë kanë zhvilluar bisedime me udhëheqësin koreano-verior, Kim Jong Il, në atë që vëzhguesit rajonal e përshkruan si një intervenim shumë të pritur për gjetjen e një zgjidhjeje diplomatike për konfrontimin rreth programeve të diskutueshme bërthamore të Koresë Veriore.

Delegacioni kinez në Phenian i dorëzoi një letër nga presidenti kinez, Hu Jintao.

 

 

Një palestinez vret një izraelit në Tel Aviv

 

Tel Aviv, 15 korrik 2003 - Para një restorani në Tel Aviv një palestinez sulmoi me thikën e tij tre izraelitë. Njoftohet se si pasojë e plagëve të marra jetën ka humbur njëri nga izraelitët e sulmuar. Keqbërsi, për të cilin dyshohet se është pjesëtar i të ashtuquajturave "Brigada të El Aksës" është qëlluar dhe arritur të arrestohet nga policia.

 

Ky ishte sulmi i parë i armatosur i një palestinezi në një qytet izraelit prej se organizatat më të rëndësishme ilegale palestineze para dy javësh bën thirrje për një armëpushim të përkohshëm me Izraelin.

 

 

Presidenti amerikan e sheh të munshëm një mision në Liberi

 

Uashington, 15 korrik 2003 - Presidenti amerikan Xhorxh Bush ka aluduar për një mision të kufizuar të trupave amerikane në Liberinë afrikanoperëndimore.

 

Njësi amerikane mund të jenë të domosdoshme për të ndihmuar bashkësinë ekonomike afrikanoperëndimore në zbatimin e armëpushimit në vendin e përfshirë nga lufta qytetare, tha Bush gjatë një takimi me sekretarin e përgjithshëm të Kombeve të Bashkuara Kofi Anan, në Uashington.

 

Kusht për këtë është që të presidenti Çarls Tejlor të jap dorqheqjen dhe të largohet nga vendi, sqaroi Bush.

 

 

Politikanë majtistë shprehen kundër shtypjes

 

Londër, 15 korrik 2003 - Një takim i 14 presidentëve dhe kryeministrave majtistë dhe reformatorë përfundoi në Britani të madhe me një deklaratë për mbrojtje më të madhe të popujve nga shtypja. Nikoqiri, kryeministri britanik Toni Bler siguroi se dokumenti përfundimtar i konferencës "qeverisja përparimtare" nuk ka për qëllim arsyetimin e luftës së Irakut. Bëhet fjalë se si mund t`i ofrohet mbrojtja dhe mbështetja popujve të goditur dhe çfarë rregullash duhet të vlejnë për sulm, tha Bler.

Copyright©2000-2003 Trepca.net - Të gjitha të  drejtat e rezervuara.