Kryetari Veliu priti familjarët Bogujevci dhe z. Pam Dawes nga “Manchester Aid Committee”

Podujevë, 13 korrik 2003 (TN) – Kryetari i komunës së Podujevës Agim Veliu priti sot në një takim miqësor Selatin dhe Saranda Bogujevcin, zonjën Pam Dawes nga Komiteti i Mançesterit për Ndihmë - MaK dhe producentin e BBC-së z. Paresh Patel.

 

z. Bogujevci e njoftoi kryetarin Veliu me zhvillimet e procesit gjyqësor që u zhvillua javën e kaluar në Beograd si dhe dëshminë e fëmijëve që mbijetuan masakrën e 28 marsit 1999 në Podujevë kur u vranë anëtarë të familjes Bogujevci dhe Duriqi. “Fëmijët njohën vrasësin dhe bashkërisht treguam të vërtetën e asaj dite të hidhur”, deklaroi Selatin Bogujevci.

 

Kryetari Veliu ndërkaq falënderoi autoritetet angleze që krijuan mundësinë për të dëshmuar për një masakër të madhe që ndodhi, por edhe z. Pam Daous për vizitën dhe angazhimet e saj rreth ndihmës për fëmijët e familjes Bogujevci që jetojnë në Mançester.

 

Në kuadër të kësaj vizite u bisedua edhe për Parkun e Paqes të Mançesterit që do të ndërtohet në Podujevë dhe që është ide e fëmijëve Bogujevci. Zonja Dous e njoftoi kryetarin Veliu që MaK po zhvillon aktivitete të shumta për të rritur Fondin për ngritjen e këtij parku.

 

“Po presim ndihmë nga Fondi i Princesësh Dajana por edhe nga biznesmenë dhe individë të shumtë”, pohoi z. Daous duke shpresuar se fondi prej 90 mijë funtash sa planifikohet do të arrihet.

 

MaK pritet që këtë verë të sjell në Kosovë libra të shumtë nga Biblioteka Universitare e Mançesterit si dhe një dhomë fizioterapeutike në Podujevë.

Copyright©2000-2003 Trepca.net - Të gjitha të  drejtat e rezervuara.