Presidenti Rugova dhe kryeministri Rexhepi përuruan bazën e asfaltit në Gërlicë të Ferizajit

Ferizaj, 12 korrik 2003 - Presidenti i Kosovës Ibrahim Rugova dhe kryeministri Bajram Rexhepi qëndruan sot në fshatin Gërlicë të Ferizajit. Me këtë rast ata përuruan një objekt të rëndësishëm ekonomik - bazën e asfaltit në këtë lokalitet, të vëllezërve Isë e Hazir Rysha, të cilët janë pronarë të firmës "Ekskavatori". Duke folur në këtë solemnitet Presidenti Rugova tha se përurimi i kësaj linje prodhuese është një ngjarje e shënuar për ekonominë e Ferizajit e të Kosovës, e cila të forcojë ekonominë dhe do të shtojë numrin e të punësuarve në këtë komunë.

 

Presidenti Rugova vlerësoi se sektori privat gjatë këtyre katër viteve në liri është forcuar dhe gjithnjë e më shumë po bëhet më i fuqishëm, duke premtuar se ky sektor do të ketë përkrahjen e tij dhe të institucioneve të Kosovës. "Objektet e tilla ekonomike dhe forcimi i ekonomisë do të përshpejtojnë përkrahjen e njohjes formale të pavarësisë së vendit tonë", theksoi Presidenti Rugova dhe u angazhua për një ekonomi të qëndrueshme të Kosovës.

Ndërkaq, duke folur për procesin e privatizimit, ai tha se ky proces duhet të jetë produktiv, me forma të ndryshme, e jo vetëm me plasman. "Shembulli juaj tregon aftësinë e shpirtit ndërmarrës të popullit të Kosovës dhe të njerëzve të biznesit, prandaj çdo investim në Kosovë do të jetë fitimprurës", theksoi Presidenti Rugova, duke uruar që kjo kompani një ditë të marrë pjesë në ndërtimin e rrugës Prishtinë-Durrës.

 

Ndërkaq në fjalën e tij, kryeministri i Kosovës Bajram Rexhepi tha se kishte ardhur me kënaqësinë më të madhe për t'u përuruar këtë objekt. Aty ku ndërtohen kompani prodhuese do të gjejë kohë t'i vizitojë, tha ai, duke shtuar se kjo kompani ka disa vlera kryesore: është kompani private dhe e cila do të jetë perspektiva e ekonomisë së Kosovës, është kompani prodhuese dhe është shërbyese ndërtuese që është aq e domosdosshme për ndërtimin e infrastrukturës rrugore, tha zoti Rexhepi. Fakti se Kosova ndodhet në fazën e rindërtimit dhe po hyn në fazën e investimeve do të garantohet edhe plasmani i prodhimeve të kësaj kompanie, sepse Kosova ka shumë nevojë të bëjë rikonstruktimin e rrugëve, tha ai. Rexhepi si element të rëndësishëm vlerësoi edhe faktin se kjo kompani do të punësojë 60 punëtorë dhe kjo do të thotë se 60 familje e sigurojnë ekzistencën e vet.

 

Kryeministri Rexhepi premtoi se qeveria do të inkurajojë me infrastruturën ligjore të krijohen kushte të volitishme që të ketë sa më shumë investime prodhuese, sepse vetëm ajo krijon një zhvillim stabil dhe krijon vende të reja të punës, nënvizoi ai.

Ndryshe kompania "Ekskavatori" merret me ndërtimin e ulët dhe të lartë dhe në veçanti në ndërtimin e rrugëve. Dikur kishte 15 punëtorë, e sot ka 60 punëtorë.

Kjo ndërmarrje brenda ditës do të prodhojë 120 metra kub asfalt, falë teknologjisë moderne që posedon ajo dhe e cila është importuar nga Italia. Në këtë ndërmarrje janë investuar mbi 1 milion e 200 mijë euro. Ndryshe kjo firmë ka realizuar deri më tash disa projekte në Kosovë, si në aeroportin e Prishtinës, bazën e KFOR-it "Film siti" në Prishtinë etj.

Copyright©2000-2003 Trepca.net - Të gjitha të  drejtat e rezervuara.