Lajme

E shtune 12 korrik 2003

Përmbajtja:

• Hollbruk: I vetmi rezultat që t'i sjellë paqe të përhershme rajonit është pavarësia e Kosovës

• Udhëheqësit kosovarë duhet të çajnë rrethimin e UNMIK-ut dhe Brukselit, thotë eurodeputeti Dypui

• UNMIK-u refuzoi kërkesën e Beogradit për dorëzimin e Shefket Musliut

• Në Prishtinë po mbahet një simpozium ndërkombëtar për pozitën juridiko-politike të Kosovës

• Autoritetet e Shkupit dhe ato të UNMIK-ut do të gjejnë gjuhë të përbashkët për hapjen e vendkalimit Tanushë – Debëllde

• Presidentët e Bullgarisë, Shqipërisë dhe Maqedonisë u takuan në Sofje për të konfirmuar vullnetin për ndërtimin e Korridorit 8

• Intelektualët shqiptarë reagojnë ndaj synimit të Maqedonisë për ta përvetësuar Nënën Tereze

• Banka Botërore miraton një kredi të re prej 18 milionë dollarësh për Shqipërinë

• Rreth 170 njerëz janë vrarë që nga 7 korriku kur kryengritësit filluan sulmet në Burundi

• Kryengritësit maoistë në Peru kanë vrarë 7 persona të patrullës policore

• Një gjykatë në Maroko ua ka vërtetuar dënimet me vdekje 10 pjesëtarëve të një grupi radikal islamik

• Paqeruajtësit freng kanë vrarë të pakten 3 luftëtarë të milicisë etnike në RD të Kongos

• Rajs: Presidenti nuk e dinte që informacioni për Irakun ishte i pasaktë

Hollbruk: I vetmi rezultat që t'i sjellë paqe të përhershme rajonit është pavarësia e Kosovës

 

Prishtinë, 12 korrik 2003 - Duke komentuar nismën e kohëve të fundit për bisedime direkte ndërmjet Prishtinës dhe Beogradit, diplomati i njohur amerikan dhe ndërmjetësi i dikurshëm për çështjen e Kosovës, Riçard Hollbruk, tha se ky është një fillim i mirë.   "SHBA-të duhet të marrin udhëheqjen dhe të inkurarojnë një zgjidhje për çështjen e Kosovës, që do të çojë tek i vetmi rezultat që, sipas meje, do t'i sjellë paqe të përhershme rajonit, dhe kjo është pavarësia e Kosovës, një shtet i pavarur i Kosovës, në shoqërim të afërt ekonomik me Beogradin, me Serbinë, Malin e Zi, Maqedoninë dhe Bosjën, mirëpo një shtet i pavaraur me anëtarësi të veten në OKB, me identitetin e vet ndërkombëtar", nënvizoi në një intervistë për "Kohën ditore" Riçard Hollbruk. I pyetur nëse pavarësia e Kosovës mund të fitohet në Këshillin e Sigurimit, Hollbruk thotë se "Këshilli i Sigurimit nuk do të vendosë statusin final të Kosovës".

  

Sipas Hollbrukut statusi final i Kosovës duhet të vendoset në një ndërmjetësim ndërkombëtar që do të zhvillohet ndërmjet Prishtinës dhe Beogradit me përkrahjen dhe asistencën e SHBA-ve, BE-së dhe OKB-së".

 

Ndërkaq rusët poashtu do të mund të marrin pjesë. Këshilli i Sigurimit, thotë Hollbruk, thjesht do të ratifikojë ose aprovojë statusin, duke shtuar se në Nju Jork nuk mund të marrin vendim.

 

"Dhe po përsëris, rezultati adekuat është i qartë pë mua - është pavarësia e plotë për Kosovën", saktësoi Hollbruk në këtë intervistë.

 

 

Udhëheqësit kosovarë duhet të çajnë rrethimin e UNMIK-ut dhe Brukselit, thotë eurodeputeti Dypui

 

Bruksel, 12 korrik 2003 - "Udhëheqësit kosovarë duhet të çajnë rrethimin në të cilin i ka vënë sa UNMIK-u aq edhe disa personalitete në Bruksel, duke forcuar lidhjet, njohjet dhe kontaktet me partnerët e tyre ndërkombëtarë".

 

Kështu tha europarlamentari radikal belg, Olivier Dypui, i cili ditë më parë mori pjesë në konferencën ndërkombëtare të organizuar në Kosovë. Në një intervistë për "Dojçe velen" eurodeputeti Dypui tha se edhe organizimi i kësaj konference si dhe apeli që udhëheqësit e Kosovës bënë për kthimin e të gjithë të shpërngulurve në shtëpitë e tyre në Kosovë, tingëllojnë mirë në Bruksel.

 

Këto iniciativa dëshmojnë pjekurinë e klasës politike kosovare, thotë ai, duke sugjeruar që udhëheqësit e Kosovës nuk duhet të presin zgjidhjen e statusit final për të ndërmarrë nismat e nevojshme për hapjen me botën, shtimin e tregtisë me vendet fqinje etj.

 

 

UNMIK-u refuzoi kërkesën e Beogradit për dorëzimin e Shefket Musliut

 

Prishtinë, 12 korrik 2003 - Autoritetet ndërkombëtare në Kosovë sërish kanë refuzuar kërkesën e Beogradit për dorëzimin e Shefket Musliut, ish-komandant i UÇPMB-së, i cili po mbahet i burgosur në Kosovë.

 

Kështu u tha në një takim që u zhvillua dje në rrethinën Therandës (Suharekës) ndërmjet ushtruesit të detyrës së shefit të UNMIK-ut Çarls Brajshou dhe zëvendëskryeministrit të Qeverisë së Serbisë Nebojsha Çoviq. Brajshou i ka bërë të ditur Çoviqit se rasti Musliu është para gjykatës në Kosovë dhe administrata ndërkombëtare nuk do të cënojë pavarësinë e gjykatës.

 

Zëdhënësi i UNMIK-ut në Prishtinë, Sunil Narula tha se z. Brajshou i kanë bërë të ditur Çoviqit se administrata e UNMIK-ut nuk do të përzihet në punët që i përkasin gjykatës. Narula bëri të qartë se Shefket Musliu nuk do t'i dorëzohet autoriteteve të Beogradit dhe se ai së shpejti do të dalë para gjykatës në Kosovë.

 

 

Në Prishtinë po mbahet një simpozium ndërkombëtar për pozitën juridiko-politike të Kosovës

 

Prishtinë, 12 korrik 2003 - Në Prishtinë po i zhvillon punimet simpoziumi dyditor shkencor ndërkombëtar me temën: "Pozita juridiko-politike e Kosovës sipas Rezolutës 1244 - gjendja dhe përspektiva".

 

Këtë simpozium e kanë organizuar Fakulteti Juridik i Prishtinë dhe Fakulteti Juridik i Gracit të Austrisë. Në këtë simpozium po marrin pjesë ekspertë nga Austria, Shqipëria, Australia, Shtetet e Bashkuara të Amerikës dhe nga Kosova.

Ministri i Arsimit, Shkencës dhe Teknologjisë Rexhep Osmani, duke folur për pozitën juridike të Kosovës tha se zgjidhja e statusit përfundimtar do ta përshpejtonte integrimin e Kosovës në Evropë.

 

 

Autoritetet e Shkupit dhe ato të UNMIK-ut do të gjejnë gjuhë të përbashkët për hapjen e vendkalimit Tanushë – Debëllde

 

Shkup, 12 korrik 2003 - Zëvendëskryeministri i Qeverisë së Maqedonisë Musa Xhaferi shprehu bindjen se autoritetet maqedonase dhe ato të UNMIK-ut do të gjejnë gjuhë të përbashkët me banorët e zonës kufitare për hapjen e vendkalimit kufitar mes Kosovës dhe Maqedonisë në pikën kufitare Tanushë - Debëllde. Ai i bëri këtë prononcim për BBC-në, duke komentuar protestat e banorëve shqiptarë në të dy anët e kufirit për moslejimin e hapjes së kësaj pike kufitare.

Z.Xhaferi tha se duhet të harmonizohen punët me organet komunale të Vitisë, të UNMIK-ut dhe të Qeverisë së Kosovës në mënyrë që të gjendet një zgjidhje për hapjen e këtij vendkalimi. Sipas
ai vendkalim do të jetë në shërbim të qytetarëve e jo në shërbim të pushtetit.

 

Por ai ka shtuar se mund të jetë edhe një konflikt interesash mes grupeve të njerëzve, apo të individëve përkatës të cilëve ndoshta nuk u konvenon të këtë një vendkalim zyrtar publik të verifikueshëm, për arsye apo për interesa që mund të merren me mend, ka thënë ndër të tjera, Musa Xhafer, zëvendëskryeministri i Qeverisë së Maqedonisë.

 

 

Presidentët e Bullgarisë, Shqipërisë dhe Maqedonisë u takuan në Sofje për të konfirmuar vullnetin për ndërtimin e Korridorit 8

 

Sofje, 12 korrik 2003 - Presidentët e Bullgarisë, Shqipërisë dhe Maqedonisë u takuan në Sofje për të konfirmuar vullnetin politik për ndërtimin e Korridorit 8, lidhjes më të rëndësishme rrugore në rajinin e Ballkanit që niset nga bregdeti i Adriatikut në Shqipëri nëpërmjet Maqedonisë deri në bregdetin e zi bullgar.

 

Siç njoftohet nga Sofja presidentët Georgi Parvanov, Alfred Moisiu dhe Boris Trajkovski pritet t'i bëjnë apel Bashkimit Evropian, NATO-s, Paktit të Stabilitetit për Evropën Juglindore dhe institutcioneve financiare ndërkombëtare për mbështetje financiare. Presidentët e vazhdojnë samitin tripalësh sot në Maqedoni dhe nesër në Shqipëri.

 

 

Intelektualët shqiptarë reagojnë ndaj synimit të Maqedonisë për ta përvetësuar Nënën Tereze

 

Romë, 12 korrik 2003 - Një grup i intelektualëve shqiptarë, i kryesuar nga shkrimtari i shquar Ismail Kadare, kanë reaguar ndaj synimit të bashkisë së Romës, që pranë bustit të ngritur për nder të Nënës Tereze, të vihet mbishkrimi me të cilin shmanget prejardhja e saj e vërtetë.

 

Ata i kanë drejtuar një peticion kreut të bashkisë së Romës me të cilin kërkojnë që bashkia e këtij qyteti të mos marrë një hap ofendues për kombin shqiptar, duke i gdhendur monumentit të shenjëtores Nënës Tereze që do të vendoset në një prej shesheve të Romës mbishkrimin: "Bijës së kombit maqedonas".

 

Shkak për këtë reagim të intelektualëve shqiptarë është bërë kërkesa e Qeverisë maqedonase drejtuar bashkisë së Romës për të vendosur në monumentin e Nënës Tereze fjalinë me germa cirilike "Nënë Terezës -bijës së kombit maqedonas"!

 

Nënshkruesit e peticionit thonë se autoritetet e Shkupit me këtë akt synojnë të mohojnë origjinën etnike dhe të fshehin identitetin e vërtetë të Nënës Tereze.

 

 

Banka Botërore miraton një kredi të re prej 18 milionë dollarësh për Shqipërinë

 

Tiranë, 12 korrik 2003 - Qeveria shqiptare njoftoi se Banka Botërore sapo ka miratuar një kredi prej 18 milionë USD për të mbështetur uljen e varfërisë dhe zhvillimin ekonomik e social të Shqipërisë.

 

Drejtues të larë të financave shqiptare pohuan se kjo kredi e re e Bankës Botërore është një vlerësim për përpjekjet e Shqipërisë në reformat ekonomike. Një vit më parë Shqipëria mori nga BankaBotërore edhe një kredi tjetër prej 20 milionë dollarësh për përmirësimin e shërbimeve sociale.

Ministri i financave, Kastriot Islami, deklaroi në një konferencë shtypi për statistikat gjashtëmujore se shpenzimet buxhetore janë të ulta, ku kanë ndikuar niveli i ulët i investimeve, rreth 63%, për shkak të veprimeve të administratës.

Ministri shqiptar i financave tha se ashtu si Banka Botërore, Fondi Monetar Ndërkombëtar edhe organizata të tjera financiare ndërkombëtare po japin vazhdimisht vlerësime pozitive për ecjen përpara të reformave dhe ekonomisë në vend.

Kredia e sapomarrë nga Banka Botërore pritet të shlyhet për 20 vjet. Vetëm nga Banka Botërore që nga viti 1991, Shqipëria ka marrë rreth 720 milionë USD për 51 projekte.

 

 

Rreth 170 njerëz janë vrarë që nga 7 korriku kur kryengritësit filluan sulmet në Burundi

 

Buxhumbura, Burundi, 12 korrik 2003 – Rreth 170 njerëz janë vrarë që nga 7 korriku kur kryengritësit filluan sulmet në kryeqytetin e Burundit, kanë bërë të ditur sot (e shtunë) Kombet e Bashkuara, njofton BBCnews.

 

Kryengritësit e fisit Hutu kanë granatuar Forcat për Demokraci Nacionale (FNL) dhe ky është sulmi më i egër deri tash në Buxhumbura. Zyra e Kombeve të Bashkuara në Buxhumbura, gjithshtu ka thënë se ndërmjet 6 mijë dhe 7 mijë civilë, që janë zhvendosur, kanë kërkuar strehim në shkolla dhe në ndërtesat e qytetit.

 

 

Kryengritësit maoistë në Peru kanë vrarë 7 persona të patrullës policore

 

Lima, Peru, 12 korrik 2003 - Kryengritësit në Peru kanë vrarë 7 persona të patrullës policore, ka bërë të ditur ministrri i Mrojtjes së Perusë, njofton Rojter. Njoftohet se kryengritësit maoistë të “Rrugës së ndritshme” kishin sulmuar tri patrulla në një fshat të largët të Perusë juglindore dhe në këto sulme kishin vrarë pesë pjesëtarë të forcave të sigurimit dhe dy civilë.

 

 

Një gjykatë në Maroko ua ka vërtetuar dënimet me vdekje 10 pjesëtarëve të një grupi radikal islamik

 

Kazablankë, 12 korrik 2003 – Një gjykatë në Maroko ua ka vërtetuar dënimet me vdekje 10 pjesëtarëve të një grupi radikal islamik, i cili dyshohet të ketë qenë i përzier në sulmet vetëvrasëse në Kazablanka, njofton BBCworld.

 

Gjykata e apelit në Kazablankë gjithashtu ua ka vërtetuar dënimet prej 12 muajsh deri në dënimet me burg të përjetshëm edhe 21 anëtarëve të këtij grupi islamik. Asnjëri nga të akuzuarit nuk ishte përzier në bombardimet e majit, kur qenë vrarë 40 njerëz.

 

 

Paqeruajtësit freng kanë vrarë të pakten 3 luftëtarë të milicisë etnike në RD të Kongos

 

Bunia, Kongo, 12 korrik 2003 – Paqeruajtësit francezë kanë vrarë tre luftëtarë të milicisë etnike në qytetin verilindor Bunia të Republikës Demokratike të Kongos, ka bërë të ditur një zëdhënës i forcave franceze, njofton Frans pres.

 

Një tjetër zëdhëns kishte deklaruar më herët se të pakten pesë veta janë vrarë në një shkëmbim zjarri me luftëtarët e milicisë së Unionit të Patriotëve Kongolezë në periferi të qytetit Bunia.

 

 

Rajs: Presidenti nuk e dinte që informacioni për Irakun ishte i pasaktë

 

Uashington, 12 korrik 2003 - Drejtori i Agjencisë Qendrore të Zbulimit amerikan, Xhorxh Tenet, tha se CIA miratoi gabimisht një fjalim të Presidentit Bush që pëmbante të dhëna të pasakta zbulimi mbi Irakun.

 

Drejtori i CIA-s pranoi gabimin, duke thënë dje pasdite se ai ishte përgjegjës për procesin e miratimit nga agjencia që ai drejton. Në një deklaratë publike, zoti Tenet tha se "ishte bërë një gabim" kur u lejua gjuha e përdorur në fjalimin e Presidentit Bush për gjendjen e vendit, ku akuzohej Iraku se përpiqej të blinte në Afrikë uranium të pasuruar që përdoret për prodhimin e armëve bërthamore.

 

Duke iu referuar asaj pjese të fjalimit, zoti Tenet tha se "ato 16 fjalë nuk duhet të ishin përfshirë kurrë në tekstin e fjalimit të Presidentit".

Presidenti Bush citoi këtë të dhënë të gabuar të zbulimit për të justifikuar luftën kundër Irakut, pasi ky i fundit e kishte të ndaluar në bazë të rezolutave të Kombeve të Bashkuara për të shtënë në dorë material për prodhimin e armëve të shkatërrimit në masë.

Copyright©2000-2003 Trepca.net - Të gjitha të  drejtat e rezervuara.