E premte 11 korrik 2003


	11.07.2003 - Trepca.net
	Lajme
	E premte 11 korrik 2003

	Përmbajtja: Rekomandimet e Kuvendit të Kosovës për kthimin e të zhvendosurve Rugova, Harnish e Thaçi kanë bërë thirrje për kthimin e personave të zhvendosur Robin Kuk - kandidat për postin e kryeadministratorit të Kosovës? Kuvendi i Kosovës përmbylli punimet para pushimeve verore OKB: Në Kosovë ka 500,000 armë të paligjshme KFOR-i çeko-sllovak e vlerëson të qetë situatën e sigurisë në komunën e Podujevës Më 14 korrik në në Prishtinë i fillon punimet Konferenca treditore ndërkombëtare për planifikimin hapësinor Gjilan: Duhen më shumë se 4 vite për ta ndryshuar një të kaluar që ishte e keqe KFOR-i parashikon se gjatë verës do të rritet kriminaliteti dhe aktiviteti ilegal në Kosovë U mbajtën provimet pranuese për grupin e dytë të fakulteteve dhe shkollave të larta për vitin akademik 2003/2004 Fabio Mini thotë se trupat e KFOR-it do të vazhdojnë misionin në Kosovë së paku edhe për pesë vite të tjera Vdiq i riu 16-vjeçar Luan Bajrami nga plagët e marra në incidentin e armatosur që ndodhi Shkup Prej 1 tetorit e deri më 15 nëntor në Maqedoni do të zhvillohet aksioni për grumbullimin e armëve Eduard Selamit i është afruar kandidatura e kryetarit të bashkisë së Tiranës I akuzuari për krime lufte në Kosovë kërkon azil politik në Kanada Nga një shpërthim në Karaçi kanë vdekur dy persona dhe janë plagosur shumë të tjerë Kryeministri i Serbisë thotë se dialogu ndërmjet Beogradit e Prishtinës do të fillojë në shtator A ka pasur marrëveshje Shirak-Mladiq? Nga shirat dhe vërshimet në Azi kanë humbur jetën 218 njerëz Ndërprehet prodhimi i "Breshkës" Presidenti Bush viziton Ugandën Pauell: Shtetet e Bashkuara rol mbështetës në Liberi Nga vershimet në Kinë, kanë vdekur 569 njerëz dhe janë evakuar 2.29 milionë njerëz Dy irakianë janë plagosur gjatë një shkëmbimi zjarri në Bagdad Fushatë e Prisidentit Bush kundër Sidës në Afrikë Franks: Amerikanët do të qëndrojnë në Irak Zbulimi i një planeti të vjetër 13 miliardë vjetësh mund të ndryshojë teoritë rreth formimit të planeteve Dy termete në Iran kanë shkaktuar vdekjen e një personi dhe lëndimin e 20 të tjerëve Kryengritësit kurdë kanë varë katër banorë vendës Gjatë ditës së djeshme u vranë 4 ushtarë amerikan në Irak Ramsfeld: Në Irak, herët apo vonë do të zbulohen armë të shkatërrimit në masë Tërmet i rëndë në Iran Senati amerikan pro dërgimit të trupave të NATO-s në Irak Konventa e reformës së BE e pranoi projektin për kushtetutën e Bashkimit Evropian Format i ri i Kupës UEFA

	Rekomandimet e Kuvendit të Kosovës për kthimin e të zhvendosurve Prishtinë, 11 korrik 2003 - Pas debatit parlamentar dhe harmonizimit të qëndrimeve të të gjitha grupeve parlamentare, Kuvendi i Kosovës, në mbledhjen e mbajtur dje, më 11 korrik 2003 2003, ka miratuar, me shumicë votash, rekomandimet në mbështetje të kthimit të personave të zhvendosur nga Kosova. 1. Kuvendi rikonfirmon mbështetjen e atij për rezolutën për të drejtat dhe kushtet e kthimit të të zhvendosurve dhe të refugjatëve të datës 7 qershor 2002 dhe e njeh mesazhin e udhëheqësve të institucioneve të Kosovës lidhur me kthimin e të zhvendosurve. 2. Kuvendi konsideron se kthimi i të zhvendosurve paraqet një çështje humanitare dhe respektim të lirive dhe të të drejtave të njeriut dhe kërkon që ky proces të mbrohet nga implikimet dhe keqpërdorimet politike. 3. Kuvendi rikonfirmon përcaktimin që Kosova të ndërtohet si shoqëri demokratike që ofron kushte për barazi të plotë të të gjithë qytetarëve të saj pa dallime dhe privilegje. 4. Kuvendi angazhohet që procesi i kthimit të të zhvendosurve të jetë në baza vullnetare në pronat dhe shtëpitë e tyre. 5. Kuvendi konsideron se integrimi i të gjithë qytetarëve në kuadrin e të gjitha institucioneve dhe strukturave të shoqërisë së Kosovës do të ndihmojë procesin e kthimit të të zhvendosurve. 6. Kuvendi angazhohet për krijimin e një klime tolerante të mirëbesimit e të sigurisë, për të ndihmuar procesin e kthimit dhe fton qytetarët e Kosovës që të ndihmojnë këtë proces. 7. Kuvendi konsideron se mbështetja financiare ndërkombëtare për rregullimin e infrastrukturës së nevojshme, zhvillimin ekonomik, hapjen e vendeve të reja të punës, paraqet një hap të rëndësishëm në procesin e kthimit të të zhvendosurve. 8. Kuvendi i Kosovës kërkon që kthimi i të zhvendosurve të mos kufizohet në baza etnike por t’i përfshijë të gjithë qytetarët e Kosovës të zhvendosur gjatë luftës brenda dhe jashtë territorit të Kosovës. 9. Kuvendi i Kosovës do të përcjellë zbatimin e këtyre rekomandimeve dhe kërkon nga institucionet e Kosovës të të gjitha niveleve që të punojnë për realizimin e këtyre rekomandimeve. Rugova, Harnish e Thaçi kanë bërë thirrje për kthimin e personave të zhvendosur Ferizaj, 11 korrik 2003 - Presidenti i Kosovës Ibrahim Rugova, shefi i Zyrës amerikane në Prishtinë, Rino Harnish dhe kryetari i PDK-së Hashim Thaçi vizituan dje pasdite Komunën e Ferizajt. Në takimet me autoritetet lokale dhe me përfaqësuesit e serbëve të zhvendosur, ata sollën mesazhin e krijimit të një shoqërie tolerante, në të cilën çdo bashkësi etnike do të ndiehej e sigurt dhe të jetojë e lirë e në paqe. Me këtë rast u kanë bërë thirrje shqiptarëve që të pranojnë në mjedisin e tyre pjesëtarët e komunitetit serb, që duan të kthehen në shtëpitë e tyre. Presidenti Rugova ka thënë me këtë rast se procesi i integrimit të Kosovës në Evropë nuk mund të realizohet pa integrime të plota të komuniteteve që jetojnë në Kosovë. Presidenti shtoi se ky është një proces që kërkon kohë dhe përpjekje të të gjtiha komuniteteve që të punojnë për integrimin e tyre në shoqërinë e Kosovës. Pasi përkujtoi se deri më tash në Kosovë janë kthyer mbi 7000 persona, ai tha se po vazhdojnë përpjekjet për kthimin edhe të të tjerëve. Presidenti theksoi se e kaluara s'mund të harrohet, por duhet të shikuar nga e ardhmja të gjithë qytetarët e Kosovës dhe duhet të krijohen garanca për minoritetet në Kosovë, duke shtuar se Kosova është vendi i të gjithë atyre që dëshirojnë të jetojnë në Kosovë, për të pasur një shoqëri të integruar e një shtet të integruar. Shefi i Zyrës amerikane në Prishtinë, ambasadori Rino Harnish ka vlerësuar këtë takim shumë pozitiv, duke e quajtur atë edhe historik, pasi sipas tij kjo është një hap konkret në përmbushjen e njërit ndër standardet kryesore që ka vendosur administrata ndërkombëtare në Kosovë. Ai tha se udhëheqësit politikë shqiptarë kanë inkurajuar fuqishëm pjesëtarët e komunitetit serb që të kthehen në Kosovë dhe një qëndrim i tillë është shprehur edhe më herët nga udhëheqësit shqiptarë drejtuar personave të zhvendosur, që është vlerësuar lartë nga bashkësia ndërkombëtare dhe Shtetet e Bashkuara të Amerikës. Kryetari i PDK-së Hashim Thaçi ka thënë se është arritur një koncensus ndërmjet udhëheqësve politikë për çështjen e kthimit, duke theksuar se të kthyerve do t'u ofrohet edhe fqinjësi e mirë, mirëkuptim dhe respekt i ndërsjellë. Ai tha së të gjithë duhet të punojnë së bashku për të krijuar kushte sa më të mira për jetë të përbashkët, duke shtuar se Kosova është atdhe i të gjithëve që jetojnë këtu. Perspektiva e Kosovës është jeta e përbashkët, ku do t'i gëzonin të drejtat e barabarta të gjithë qytetarët pa dallim përkatësie etnike, tha Hashim Thaçi. Robin Kuk - kandidat për postin e kryeadministratorit të Kosovës? Edinburg, 11 korrik 2003 - Ish-ministri i jashtëm britanik Robin Kuk është kandidati më i ri në postin e kryeadministratorit të Kosovës. Kështu shkruan një gazetë lokale e Skocisë, në zonën zgjedhore ku Robin Kuk është zgjedhur deputet në Parlamentin britanik. Me titullin "Një britanik propozohet të udhëheqë UNMIK-un", thuhet se Robin Kuk (Robin Cook) ish-minister i jashtëm britanik është propozuar nga Ministria e Jashtme e këtij vendi që të marrë detyrën e shefit të UNMIK-ut. Emri i tij, vazhdon gazeta, është i pëlqyeshëm nga të gjitha vendet e BE-së, ndërkohë që ka mbështetje të fuqishme në SHBA sepse administratori i katërt konsiderohet që të jetë edhe i fundit në Kosovë, duke konsideruar se gjatë mandatit të tij do të zgjidhet edhe statusi përfundimtar i Kosovës! Gazeta përfundon se edhe sekretari i përgjithshëm i OKB-së Kofi Anan është pajtuar me këtë propozim, por ka pasur reagime të ashpra kundër kandidaturës së z.Kuk nga ambasadori serbo-malazez në OKB. Kuvendi i Kosovës përmbylli punimet para pushimeve verore Prishtinë, 11 korrik 2003 - Deputetët e Kuvendit të Kosovës në seancën e sotme me shumicë votash miratuan Ligjin për skemat e ndihmës sociale dhe Ligjin për regjistrimin e popullsisë, ekonomive familjare dhe banesave. Ndërkaq deputetët në parim miratuan edhe Projektligjin për shërbimet postare dhe Projektrregulloren për kodin doganor të Kosovës. Gjithashtu deputeti Arsim Bajrami nga radhët e PDK-së u emërua anëtar i Komisionit për bashkëpunim me Tribunalin e Hagës dhe u përkrahën rekomandimet e Këshillit gjyqësor për emërimin e gjykatësve. Me këtë seancë u përmbyllën punimet e Kuvendit të Kosovës para pushimeve vjetore të deputetëve që do ta zgjasin dy muaj për shkak të renovimit të ndërtesës së Kuvendit. OKB: Në Kosovë ka 500,000 armë të paligjshme Nju Jork, 11 korrik 2003 - Një raport i ri i Kombeve të Bashkuara thotë se në Kosovë ka afro gjysmë milioni armë të paligjshme. Këtu përfshihen pistoleta dhe pushkë automatike. Raporti u përgatit nga Programi i Kombeve të Bashkuara për Zhvillimin dhe nga Organizata për Vëzhgimin e Armëve të Vogla me qendër në Zvicër. Në të theksohet se numri i madh i armëve të paligjshme është bërë pengesë për zhvillimin e Kosovës. Sipas llogaritjeve, 72 për qind e të gjitha vrasjeve që u raportuan vitin e kaluar në Kosovë u kryen me armë të vogla. Ekspertët e Kombeve të Bashkuara thonë se në 70 për qind të shtëpive në Kosovë ka nga një pistoletë ose një pushkë automatike dhe se biznesmenët dhe ish-luftëtarët janë veçanërisht të armatosur mirë. Raporti i Kombeve të Bashkuara thotë se pjesa më e madhe e armëve sillen përmes trafikut të paligjshëm nga Shqipëria dhe Serbia. KFOR-i çeko-sllovak e vlerëson të qetë situatën e sigurisë në komunën e Podujevës Podujevë, 11 korrik 2003 – Java e kaluar ishte e qetë përkundër disa incidenteve joserioze, deklaroi sot në konferencën për media, zëdhënësi i Batalionit të tretë çeko-sllovak mbitogeri Mihal Prejzek. "Kemi qenë të njoftuar nga policia e UNMIK-ut se disa persona të armatosur e kanë kaluar kufirin në rajonin e Dumnicës, por pas verifikimit doli që kjo të ishte vetëm një dezinformatë e cila po përsëritet nga i njëjti njeri", tha Prejzek. Ai pohoi se me këtë njeri merret policia e UNMIK-ut meqë kjo po përsëritet qe disa herë dhe sidomos kohët e fundit. Ndërkaq zv.komandanti i KFOR-it majori Vojteh Mojzes njoftoi për disa raste të mjeteve të pashpërthyera – UXO-ve për çka ekipet e EOD-së kanë reaguar menjëherë, për disa persona të arrestuar në gjendje të dehur dhe pa dokumente identifikimi. Zv.komandanti Mojzes në fund pohoi se situata e sigurisë në rajonin e komunës së Podujevës është e qetë. Më 14 korrik në në Prishtinë i fillon punimet Konferenca treditore ndërkombëtare për planifikimin hapësinor Prishtinë, 11 korrik 2003 - Të hënën më 14 korrik në mjediset e hotelit "Grand", në Prishtinë i fillon punimet Konferenca treditore ndërkombëtare për planifikimin hapësinor. Në këtë konferencë janë ftuar të marrin pjesë përfaqësues të shumë shteteve ku do të përkrahet bashkëpunimi dhe këmbimi i informatave dhe përvojave në fushën e planifikimit hapësinor ndërmjet shteteve të rajonit të gjerë. Pjesëmarrës në konferencë do të jenë përfaqësues nga Shqipëria, Bashkimi Evropian, Kroacia, Sllovenia, Moldavia, Çekia, Belgjika, Turqia, Franca si dhe shtete tjera dhe përfaqësues të institucioneve të Kosovës. Gjilan: Duhen më shumë se 4 vite për ta ndryshuar një të kaluar që ishte e keqe Gjilan, 11 korrik 2003 - Do të ishte iluzion sikur të mendohej se mund të bëhen të gjitha për një kohë kaq të shkurtër, ka thënë Lutfi Haziri, kryetar i komunës së Gjilanit, në seancën publike me qytetarë. Të gjitha ato që i duhen komunës dhe qytetarëve të saj, me siguri se nuk do të mund të bëhen as për katër vitet tjera, por ai tha se beson në një të ardhme shumë më të mirë. "Nuk është për mburrje, por si komunë kemi përfituar deri tani mbi 350 projekte, 30 nga të cilat i përkasin gjashtëmujorit të parë të këtij viti", tha Haziri. Sipas tij, integrimi i komuniteteve dhe përmirësimi i sigurisë së përgjithshme, ka ndikuar që donatorët të orientohen më tepër nga komuna e Gjilanit, ndërkaq edhe vetë KFOR-i amerikan, që këtu ka një mision tjetër, ka ndihmuar në projektet e infrastrukturës civile. Shumë të rëndësishëm për komunën e Gjilanit, Haziri e ka vlerësuar edhe projektin e komunitetit ndërkombëtar për integrimin e rajonit, proces ky që do të hapë mundësi të reja zhvillimi për Gjilanin, por edhe për Kumanovën e Preshevën, komuna këto të banuara kryesisht me shqiptarë dhe të cilat, pos lidhjeve familjare e farefisnore, i bashkojnë edhe interesa të tjera. Në kuadër të këtij procesi shihet i realizueshmëm edhe projekti kapital të rrugës Gjilan-Kumanovë, e cila do të ishte një portë e rëndësishme për integrimin e Kosovës në koridorin e 8-të ndërkombëtar të komunikacionit rrugor, tha Haziri. Ndërkaq, qytetarët i kanë shpalosur para udhëheqjes komunale, problemet dhe hallet e përditshme me të cilat ballafaqohen ata, kryesisht nga infrastruktura, papunësia, taksën komunale në pronë, shqetësimet e banorëve të zonës kufitare me Serbinë e të tjera dhe kanë kërkuar zgjidhje për to dhe kanë marrë përgjegje nga kryetari Lutfi Haziri si dhe kryshefi Enver Muja. KFOR-i parashikon se gjatë verës do të rritet kriminaliteti dhe aktiviteti ilegal në Kosovë Prishtinë, 11 korrik 2003 - KFOR-i parashikon se gjatë muajve të verës do të rritet kriminaliteti dhe aktivitetet e tjera ilegale në Kosovë, para së gjithash konrabanda, tentimet për kalim ilegal të kufirit, dukuritë e narkotikëve dhe i parava të falsifikuara, thuhet në një raport të KFOR-it dorëzuar Këshillit të Sigurimit të OKB-së. Në këtë raport thuhet se në muajin maj në Kosovë janë shënuar disa incidente të motivuara politikisht, por përgjithësisht situata ka qenë kryesisht stabile. U mbajtën provimet pranuese për grupin e dytë të fakulteteve dhe shkollave të larta për vitin akademik 2003/2004 Prishtinë, 11 korrik 2003 - Dje u mbajtën provimet pranuese për grupin e dytë të fakulteteve dhe shkollave të larta për regjistrim në vitin e parë të vitit akademik 2003/2004. Rezultatet pritet të shpallen më 14 korrik. Provimet pranuese u mban në Fakultetin Filozofik, të Shkencave Matematiko-Natyrore, Filologjisë, Ndërtimtarisë dhe Arkitetkturës, Eelktroteknikës, Makinerisë, Bujqësisë, Zejtarisë, Metalurgjisë, Edukimit, si dhe në disa shkolla të larta. "Ky ishte rast edhe për studentët të cilët nuk kanë pasur sukses të pranohen në grupin e parë të fakulteteve, tha sekretari në Rektoratin e UP, Destan Halimi. Fabio Mini thotë se trupat e KFOR-it do të vazhdojnë misionin në Kosovë së paku edhe për pesë vite të tjera Prishtinë, 11 korrik 2003 - Komandanti i trupave të KFOR-it, gjenerali italian Fabio Mini thotë se operacioni aktual paqeruajtës i NATO-s do të vazhdojë misionin në Kosovë së paku edhe pesë vite të tjera. Ai bëri këto komente në një intervistë dhënë agjencisë Asoishted Press. Ai ka thënë se detyrat paqeruajtëse, eventualisht mund t'i dorëzohen trupave nga Maqedonia, Bosnja, Serbia e Mali i Zi, Shqipëria dhe vetë Kosova, që do të operonin në ombrellën dhe udhëheqjen e NATO-së. Gjeneral Mini pastaj ka theksuar se deri tash e gjithë siguria në Ballkan është identifikuar si luftim, si identifikim i armikut dhe pastaj të luftuarit e tij, por me paqen, kjo qasje duhet të ndryshohet plotësisht, ngase siguria do të thotë bashkëpunim, ka thënë ai. Gjenerali Fabio Mini nuk ka thënë se çfarë roli parasheh ai për forcat e Shteteve të Bashkuara në Kosovë, nëse detyrat paqeruajtëse do të zhvendoseshin tek armatat ballkanike. Vdiq i riu 16-vjeçar Luan Bajrami nga plagët e marra në incidentin e armatosur që ndodhi Shkup Shkup, 11 korrik 2003 - Në spitalin e Shkupit nga plagët e marra në incidentin e armtosur që ka ndodhur të mërkurën ka vdekur dje edhe personi i pestë. Policia ka thënë se i ri 16-vjeçar është Luan Bajrami. Kështu epilogu i sulmit është pesë të vrarë dhe katër të plagosur. Tre persona tjerë të plagosur që ishin të shtrirë në spital janë jashtë rrezikut të jetës. Lidhur me incidentin e armatosur në Shkup Ministria e Punëve të Brendshme e Maqedonisë ka ftuar në bisedë informative dy persona. Prej 1 tetorit e deri më 15 nëntor në Maqedoni do të zhvillohet aksioni për grumbullimin e armëve Shkup, 11 korrik 2003 - Prej 1 tetorit e deri më 15 nëntor në Maqedoni do të zhvillohet aksioni për grumbullimin e armëve nga popullsia civile. Kështu bëri të ditur sot në Kuvendin e Maqedonisë ministri maqedonas i Punëve të Brendshme Hari Kostov. Gjatë këtij aksioni pritet të mblidhen rreth 20 deri më 30 për qind e armëve ilegale që i posedojnë qytetarët, tha Kostov. Supozohet se në Maqedoni ka të paktën 60 deri më 80 mijë armë ilegale. Pas 15 nëntorit nuk do të ketë aksion të ri për dorëzimin vullnetar të armëve dhe secili që kapet në vend publik me armë do të ndiqet penalisht. Ndryshimi i ligjit penal do të përgatitet deri në fillimin e këtij aksioni. Eduard Selamit i është afruar kandidatura e kryetarit të bashkisë së Tiranës Tiranë, 11 korrik 2003 - Njëri nga ish-drejtuesit kryesor të Partisë Demokratike të Shqipërisë Eduard Selamit i është afruar nga kreu aktual i kësaj partie Salih Berisha, kandidatura e kryetarit të bashkisë së Tiranës. Selami i cili prej shumë kohësh jeton në Nju-Jork nuk e ka konfirmuar se do të hyjë në gara për kryetar bashkie të kryqytetit shqiptar. Kandidaturat e tjera të opozitës janë shpallur deri më tash prej Genc Pollos e Dashamir Shehit. Socialistët dhe të majtët të tjerë janë paraqitur në garë vetëm me një kandidaturë, atë të kryetari aktual të bashkisë së Tiranës Edi Rama. I akuzuari për krime lufte në Kosovë kërkon azil politik në Kanada Beograd, 11 korrik 2003 - Dejan Demiroviq, i cili bashkë me Sasha Cvjetanin, është akuzuar për krime lufte në Kosovë për vrasjen e 19 civilëve shqiptarë në Podujevë më 1999, do të paraqitet më 17 shtator para një gjykate të imigracionit në Kanada, ku do të vendoset nëse ai do të mund të mbetet në atë vend, ka deklaruar avokati i tij për agjencinë Frans pres. Demiroviq ka tentuar të marrë statusin e emigrantit politik në Kanada. Për momentin në Beograd po zhvillohet një proces gjyqësor kundër Cvjetanit dhe Demiroviqit. Ky i fundit po gjykohet në mungesë, meqenëse autoritetet kanadaze kanë refuzuar t'ia dorëzojnë Beogradit Demiroviqin kinse në mungesë të provave. Nga një shpërthim në Karaçi kanë vdekur dy persona dhe janë plagosur shumë të tjerë Karaçi, 11 korrik 2003 – Sot (e premte) në hyrje të një ndërtese të zyreve në qendrën tregtare të Karaçit, ka shpërthyer fuqishëm një bombë, e cila ka shkaktuar vdekjen e dy personave dhe plagosjen e disa të tjerëve, kanë bërë të ditur policia dhe personeli mjekësor, njofton Rojter. Për këtë shpërthim ende s’e ka marrë kush përgjegjësinë. Policia e ka quajtur “akt të terrorizmit” dhe ka thënë se shumë njerëz do të ishin vrarë po të kishte ndodhur shpërthimi më vonë. Kryeministri i Serbisë thotë se dialogu ndërmjet Beogradit e Prishtinës do të fillojë në shtator Beograd, 11 korrik 2003 - Kryeministri i Serbisë Zoran Zhivkoviq ka deklaruar se dialogu ndërmjet Beogradit e Prishtinës do të fillojë në muajin shtator. Zhivkoviq ka shtuar se Beogradi do të kërkojë që të pezullohet marrëveshja e Shtajnerit për tregti të lirë mes Kosovës dhe Shqipërisë posa të arrijë shefi i ri i UNMIK-ut. "Askush nuk paralajmëron bisedime për statusin përfundimtar. Për bisedime me shqioptarët jemi përgatitur qëmoti, vetëm po presim që për këtë të krijohen kushtet minimale, veç tjerash edhe emërimi i shefit të ri të UNMIK-ut", ka thënë Zhivkoviq. A ka pasur marrëveshje Shirak-Mladiq? Londër, 11 korrik 2003 - Gazeta londineze "Dejli telegraf" shkruan se presidenti francez ka lidhur marrëveshje sekrete me të cilën është mbrojtur i akuzuari i Hagës Ratko Mladiq. Zhak Shirak, sipas dokumenteve të prokurorisë së gjykatës së Hagës të marra nga një shërbim i paidentifikuar sekret, në vitin 1995 ka pranuar të sabotojë ekstradimin e gjeneralit të serbëve të Bosnjës Mladiq pas nënshkrimit të Marrëveshjes së Dejtonit, në mënyrë që si kompensim të sigurojë lirimin e dy pilotëve francezë që mbaheshin si pengje pasi që avioni i tyre ishte rrëzuar afër Sarajevës. Zëdhënësi i Presidentit francez kategorikisht ka hedhur poshtë këto akuza, por ish-presidenti jugosllav Zoran Liliq, dëshmitar i në gjykimin e Millosheviqit në Hagë, ka konfirmuar se transkripti i bisedës së tij telefonike me Zhak Shirakun është i saktë. Liliq nuk ka dhënë detaje, duke refuzuar që në pyetjen se a ka pasur marrëveshje ndërmjet Shirakut e Mladiqit, të përgjigjet me po ose jo. Nga shirat dhe vërshimet në Azi kanë humbur jetën 218 njerëz Nju Delhi, 11 korrik 2003 - Gjatë monsuneve dhe vërshimeve që kanë përfshirë Azinë Juglindore deri më tash kanë humbur jetën mbi 200 vetë, ndërkaq mbi tre milionë njerëz janë rrezikuar ngja përkeqësimi i përditshëm i motit që po merr viktima të reja. Sipas njoftimeve të agjencive të lajmeve në Indi, Bangladesh dhe Nepal, nga gjysma e qershorit, kur filluan monsunet, me vdekje e kanë pësuar 218 vetë. Ndërprehet prodhimi i "Breshkës" Pueblo, 11 korrik 2003 - Prodhuesi gjerman i automjeteve VW (Folksvagen) ka ndërprerë pas 70 vjetësh definitivisht prodhimin e markës VW-Käfer, në viset shqiptare i njohur me emrin "Breshkë". Sipas përfaqësuesve të VW, deri tani, në botë janë shitur mbi 21,5 milionë "breshka". Presidenti Bush viziton Ugandën Kampala, 11 korrik 2003 - Presidenti Bush ndodhet në Ugandë, ndalesa e katërt në turneun e tij në 5 vende të Afrikës. Në takimin me Presidentin e Ugandës, Yoweri Museveni Presidenti do ta vërë theksin tek nisma e tij prej 15 miliardë dollarësh gjatë pesë vjetëve për të luftuar Sidën. Presidenti do të vizitojë një klinikë për sidën në Entebbe ku çdo vit, rreth 30 mijë pacientë marrin këshilla mjeksore bazë për të luftuar sëmundjen. Sipas njoftimeve, disa udhëheqës të opozitës në Ugandë shpresojnë që Presidenti Bush të shfrytëzojë vizitën e tij për të dhënë një mesazh të fortë lidhur me nevojën për liri civile në vend. Presidenti Museveini po kritikohet ashpër brenda vendit lidhur me përpjekjet e tij për të ndryshuar kushtetutën në mënyrë që të verë kandidaturën për një mandat të tretë në vitin 2006. Ai është në fuqi qysh nga viti 1986. Sonte, Presidenti Bush do të shkojë në Nigeri dhe pritet të kthehet në Uashington të dielën pasdite. Pauell: Shtetet e Bashkuara rol mbështetës në Liberi Uashington, 11 korrik 2003 - Sekretari amerikan i Shtetit, Kolin Pauell, tha se trupat paqeruajtëse nga vendet e Afrikës Perëndimore duhet të shkojnë të parat në Liberi, ku Shtetet e Bashkuara duhet të luajnë një rol mbështetës. Sekretari Pauell tha se çdo rol ushtarak i Shteteve të Bashkuara në Liberi, do të jetë “i kufizuar në kohë dhe në shtrirje”, dhe do të përqendrohet vetëm në ndihmën për paqeruajtësit afrikano-perëndimorë. Komuniteti Ekonomik i Shteteve të Afrikës Perëndimore, i përbërë nga 15 vende, ka ofruar të dërgojë 1,000 trupa për forcën paqeruajtëse. Zoti Pauell u tha gazetarëve se Presidenti Bush nuk ka vendosur ende se cili do të jetë niveli i mbështetjes nga ana e Shteteve të Bashkuara, por do ta bëjë këtë së shpjeti. Nga vershimet në Kinë, kanë vdekur 569 njerëz dhe janë evakuar 2.29 milionë njerëz Pekin, 11 korrik 2003 – Vershimet e këtoditshme në Kinë, që ishin ndër më të mëdhatë në këto vjet të fundit, kanë shkaktuar vdekjen e 569 njerëzve dhe kanë detyruar evakuimin emergjent të 2.29 milionë njerëzve, ka bërë të ditur në raportin më të ri të sotëm (e premte) Ministria për çëshjte civile, njofton AFP. Në këtë njoftim po kështu thuhet se deri më 10 korrik mbi 505 mijë shtëpi janë shembur dhe 1.33 milionë shtëpi janë dëmtuar nga vershimet, që ndodhen që nga fundi i majit në Kinën qendrore, lindore dhe jugore. Dy irakianë janë plagosur gjatë një shkëmbimi zjarri në Bagdad Bagdad, 11 korrik 2003 – Dy irakianë janë plagosur kur vetura e tyre u ndodh në mes të një shkëmbimi zjarri pas një sulmi granatash raketore në një patrullë ushtarake amerikane afër aeroportit të Bagdadit, bën të ditur sot (e premte) ushtria amerikane, njofton Rojter. Viktima amerikane s'ka pasur në këtë indcident. Të plagosurit janë dërguar në spital. Bëhet e ditur se njëri irakian është qëlluar në qafë, kurse tjetri në abdomen (bark), por nuk tregohet gjendja e tyre momentale. Fushatë e Prisidentit Bush kundër Sidës në Afrikë Entebe, 11 korrik 2003 - Presidenti amerikan Bush shkon sot në Ugandë, ndalesa e tij e katërt në turneun e vizitave të tij në 5 vende të Afrikës. Ky turne i zotit Bush në këtë vend të Afrikës ka për qëllim t'i vërë theksin nismës së tij prej 15 miliardë dollarësh për pesë vjet për të luftuar Sidën. Pas takimit me Presidentin e Ugandës, Yoweri Museveni, zoti Bush do të vizitojë organizatën më të madhe indigjene të Afrikës që merret me luftën kundër Sidës, në qytetin Entebbe, ku këshilltarët ofrojnë shërbime bazë mjeksore për më shumë se 30 mijë pacientë në vit. Më vonë, po sot, Presidenti Bush do të shkojë në Nigeri, që është edhe ndalesa e tij e fundit para se të kthehet në Uashington nesër. Franks: Amerikanët do të qëndrojnë në Irak Uashington, 11 korrik 2003 - Komandanti ushtarak që drejtoi luftën kundër Irakut, gjenerali Tomi Frenks, ka thënë se forcave amerikane mund t'u duhet të mbeten në këtë vend për disa vjet. Në dëshminë e tij para një komisioni të Kongresit, gjenerali Frenks nënvizoi se operacionet luftarake në Irak nuk kishin përfunduar ende dhe se sulmet ndaj forcave të udhëhequra nga amerikanët nuk kishin ndonjë gjasë të ndalonin në të ardhmen e afërt. "Ne duam të qëndrojmë atje për aq kohë sa do t'u duhet irakianëve të vendosin një formë qeverisjeje që respekton të drejtat e njeriut si dhe fqinjët, por ne nuk duam të qëndrojmë atje më shumë se kaq," tha gjenerali Frenks. Zbulimi i një planeti të vjetër 13 miliardë vjetësh mund të ndryshojë teoritë rreth formimit të planeteve Uashington, 11 korrik 2003 – Zbulimi i një planeti të vjetër 13 miliardë vjetësh dhe 5,600 vjet drite larg mund të ndryshojë teoritë rreth formimit të planeteve dhe evolucionit të jetës, kanë bërë të ditur sot (e premte) astronomët, njofton AP. Planeti është dy herë më i madh se Jupiteri, është objekti më i vjetër dhe më i largti, që është zbuluar deri tash, kanë thënë astronomët. Dy termete në Iran kanë shkaktuar vdekjen e një personi dhe lëndimin e 20 të tjerëve Teheran, 11 korrik 2003 – Dy termete të shkallës 5.6 dhe 5.8 e kanë goditur sot (e premte) Iranin jugor, të cilat kanë shkaktuar vdekjen e një personi dhe lëndimin e 20 të tjerëve, njofton BBCnews. Dridhjet kanë goditur disa fshatra dhe një qytet të provincës Fars, rreth 20 km në juglindje të Shirazit. Termeti i parë ka zgjatur 12 sekonda dhe ka këputur energjinë elektrike, lidhjet telefonike dhe të ujësjellësit. Kryengritësit kurdë kanë varë katër banorë vendës Ankara, 11 korrik 2003 - Kryengritësit kurdë kanë varë katër banorë vendës dhe kanë ushtruar turturë mbi ta në një fshat në provincën Bingol në lindje të Turqisë, kanë bërë të ditur autoritetet lokale. Një grup "terroristësh", si janë quajtur ata përt'i dalluar nga kryengritësit separatistë të Partisë Punëtore të Kurdistanit (PKK), kishin rrëmbyer pesë njerëz në një fshat, njofton AFP duke cituar guvernatorin e Bingolit Husein Kos. Gjatë ditës së djeshme u vranë 4 ushtarë amerikan në Irak Bagdad, 11 korrik 2003 - Gjatë sulmeve të djeshme ndaj konvojeve ushtarake amerikane janë vrarë katër ushtarë amerikan. Sipas njoftimeve të një zëdhënësi të Komandës Qendrore të forcave amerikane, aksidentet ndodhën në Bakuta, afët qytetit Tikrit dhe në jug të Bagdadit, afër qytezës El Mahmudija. Sipas raportimeve të stacionit arab El Xhazira, përgjegjësinë për disa sulme të mëhershme mbi trupat amerikane në Irak e ka marrë grupi deri tani i panjohur "Rezistenca Islamike-Kombëtare e Irakut". Sipas të dhënave të ish komandantit të trupave amerikane në Irak, Frenks, ndaj ushtarëve amerikanë të stacionuar në Irak, për çdo ditë ushtrohen 10-15 sulme të armatosura. Ramsfeld: Në Irak, herët apo vonë do të zbulohen armë të shkatërrimit në masë Uashington, 11 korrik 2003 - Sekretari amerikan i Mbrojtjes, Donald Ramsfeld është shprehur optimist, se në Irak, herët apo vonë do të zbulohen armë të shkatërrimit në masë, edhe pse sipas tij, ky nuk ka qenë shkaku kryesor i intervenimit të forcave aleate në Irak: "Trupat aleate nuk kanë intervenuar në Irak për shkak të zbulimit të njohurive të reja dramatike për prodhimin e armëve të shkatërrimit në masë. Jemi detyruar të veprojmë, sepse ne, dëshmitë ekzistuese, pas përvojës së 11 shtatorit, i kemi shikuar nga një këndvështrim tjetër", ka thënë Ramsfeld. Tërmet i rëndë në Iran Teheran, 11 korrik 2003 - Disa persona janë vrarë dje nga pasojat e një tërmeti të rëndë në Iran. Numri i saktë i viktimave akoma nuk dihet, ndërkohë që Ministria e Brendshme Iraniane ka raportuar për disa fshatra të shkatërruara tërësisht në distriktin Cahrindasht të provincës Fars, 80 km larg kryeqytetit Teheran. Që nga viti 1991 në Iran janë regjistruar afër 1000 tërmete, nga pasojat e të cilave kanë humbur jetën mbi 17.600 persona. Senati amerikan pro dërgimit të trupave të NATO-s në Irak Uashington, 11 korrik 2003 - Pas qeverisë amerikane, edhe Senati amerikan është shprehur për dërgimin e trupave të NATO-s në Irak. Për shkak të shpenzimeve të mëdha të trupave amerikane në Irak, Senati miratoi unanimisht rezolutën, e cila nga predidenti Bush kërkon që t`i lusë shtetet anëtare të NATO-s dhe të KB për dërgimin e forcave ushtarake dhe policore në Irak. Konventa e reformës së BE e pranoi projektin për kushtetutën e Bashkimit Evropian Bruksel, 11 korrik 2003 - Konventa e reformës së BE e pranoi projektin për kushtetutën e Bashkimit Evropian. Presidenti i Konventës, Valeri Zhiskar d'Esten tha në mbledhjen e fundit plenare të Konventës në Bruksel se projekti i kushtetutës nuk është emëruersi më i vogël i përbashkët, por një rezultat që shkon aq larg sa mund të shkohet. Ai i kujtoi konferencës qeveritare, e cila do të vendosë përfundimisht për projektkushtetutën që ta ndryshojnë sa më pak që të jetë e mundur projektin. Ministri i jashtëm gjerman, Joshka Fisher e quajti projektin e kushtetutës një kompromis historik, i cili e bën Evropën e 25 shteteve anëtare të aftë për veprim dhe transparente. Shefat e qeverive dhe ministrat e jashtëm do të diskutojnë për projektin duke filluar nga tetori. Në fuqi kushtetuta mund të hyjë vetëm pas ratifikimit nga të 25 shtetet. Format i ri i Kupës UEFA Gjenevë, 11 korrik 2003 - UEFA ka bërë publik një format të ri të Kupës UEFA, që do të zbatohet gjatë sezonit 2004-2005. Gara do të fillojë me 80 ekipe, gjysma e të cilave do të eleminohen në raundin e parë. Pastaj, 40 ekipet që mbeten do të ndahen në pesë grupe, dhe ekipet do të luajnë më pak ndeshje sesa luajnë me formatin e tanishëm të kupës. Në bazë të një sistemi pikavarazhi, çdo ekip do të luajë dy ndeshje brenda dhe dy jashtë, dhe jo si gjatë formës ekzistuese ku ekipet ndeshen dy herë me njëri-tjetrin. Në fazën finale, ekipet e kualifikuara do të bashkohen me tetë ekipet nga Liga e Kampionaëve për një fazë eleminatore ku do të përfshihen 32 klube. Presidenti i UEFA-s, Lennart Johansson, tha se ndryshimet do ta bëjnë më tërheqëse Kupën UEFA.

	Copyright©2000-2003 Trepca.net - Të gjitha të drejtat e rezervuara.