Podujevë: Sindikata e mjekëve të Egjiptit dhuron aparaturë moderne Shtëpisë së Shëndetit

Podujevë, 9 korrik 2003 / TN – Në kuadër të ndihmës me mjete mjekësore për Kosovën, Sindikatat e mjekëve të Egjiptit – HSAC sot i dhuruan Shtëpisë së Shëndetit në Podujevë një aparaturë moderne e cila sipas drejtorit dr. Bahri Thaçi nuk mund të sigurohej me mjete vetanake.

 

Në këtë eveniment pos sekretarit të përgjithshëm të Sindikatës së mjekëve të Egjiptit mori pjesë edhe zv. kryetari i komunës së Podujevës z. Agim Kikaj, Shahzad Khan Bangash dhe personeli i shtëpisë së shëndetit, drejtori i Shtëpisë së Shëndetit Primar dr. Bahri Thaçi, dr. Muhamet Mustafa nga Shoqata Palestineze që vepron në Podujevë që nga 1999, drejtorri i Komitetit Botëror Islamik (IWC) z. Ayman, mengjeri i Lagjes së Kuvajtit z. Rashid Djaroun,  “Merita i takon popullit të Egjiptit i cili që nga fillimi i luftës në Kosovë bëri përpjekje që të gjejë forma dhe mënyra për ta ndihmuar popullin e Kosovës”, tha sekretari gjeneral i Sindikatës së mjekëve të Egjiptit z. Abdl El Kader Hegazy.

 

Z. Hegazy kishte vizituar Kosovën më 1999 dhe kishte parë të gjitha shkatërrimet nga lufta kështu që në kuadër të ndihmës disa komunave të Kosovës ai vizitoi edhe komunën e Podujevës të cilës i janë dhuruar 3 aparate të EKG-së, 1 ultrazë, 1 defribilator, 1 inhalator, 3 mikroskopë, peshore për fëmijë dhe të rritur për pediatrinë dhe pajisje tjera të nevojshme. Sipas administratorit të HSAC z. Bekim Mehmetaj ndihma dhuruar dia komunave si” Podujeva, Prishtina, Skënderaji, Vushtrria, etj arrinë vlerën e mbi 450 mijë euro.

 

Duke falënderuar në emër të qytetarëve të komunës së Podujevës zv. kryetari Agim Kikaj tha se dhurata e popullit mik të Egjiptit dhe e Sindikatës së Mjekëve është ndihmë e madhe për popullatën e Podujevës e cila ka nevojë për trajtim mjekësor në kushtet e rënda që gjendemi. Fjalë përshëndetëse dhe mirënjohje për bashkëpunim dhe ndihmë tha edhe përfaqësuesi i UNMIK-ut i Podujevës z. Shahzad Khan Bangash i cili ndër të jera pohoi se ky është një gjest human i ppullit të Egjiptit që mëson se kush shpëton një jetë ka shpëtuar njerëzimin.

 

Drejtori i Shtëpisë së shëndetit primar dr. Bahri Thaçi në fund u dhuroi mirënjohje Sindikatave të mjekëve të Egjiptit, Sekretarit Hegazy, dr. Muhamet Mustafës dhe përfaqësuesit të UNMIK-ut z. Bangash.

Copyright©2000-2003 Trepca.net - Të gjitha të  drejtat e rezervuara.