Lajme

E mërkure 9 korrik 2003

Përmbajtja:

• Komisioni Evropian vlerëson pozitivisht marrëveshjen e tregtisë së lirë të nënshkruar mes Shqipërisë dhe Kosovës

• Deri në emërimin e kryeadministratorit të ri për Kosovën këtë detyrë do ta ushtrojë amerikani Çarls Brajshou

• Tre evropianë janë kandidatë për postin e kryeadministratorit të Kosovës, thotë zëdhënësi i KB

• Departamenti amerikan i Shtetit mirëpret letrën e udhëheqësve kosovarë drejtuar personave të zhvendosur

• Në duart e civilëve në Kosovë ka qindra mijëra armë

• Qeveria e Kosovës u bën thirrje banorëve të fshatit Debellde të mos tensionojnë situatën

• Viti: UNMIK-u heq dorë nga hapja e pikës kufitare, banorët zhbllokojnë rrugën që çon në Debëllde

• Tre vetë janë vrarë dhe disa të tjerë janë plagosur në një sulm të armatosur në Shkup

• Katër fëmijë shqiptarë dëshmojnë në gjykatën e Beogradit për një masakër në Podujevë

• Misioni i UNMIK-ut në Kosovë as dje nuk arriti të hapë vendkalimin e ri kufitar me Maqedoninë

• Brajshou thotë se UNMIK-u është në fazën e gjetjes së një zgjidhje për bujqit e brezit kufitar me Maqedoninë

• KFOR-i ia ka dorëzuar policisë së UNMIK-ut ish-udhëheqësin e UÇPMB-së, Shefket Musliun

• UNMIK-u ka hedhur poshtë kritikat serbe në adresë të kodit penal dhe të procedurës penale në Kosovë

• Policia po gjurmon vrasësin e një familjeje pesëanëtarëshe në Kaliforni

• Është arrestuar ish-ministri i brendshëm i Sadam Hyseinit dhe një anëtar i lartë i partisë së tij Baath

• Podujevë: Sindikata e Mjekëve të Egjiptit i dhuron aparaturë moderne Shtëpisë së Shëndetit

• Një burri nga Arkanzasi i SHBA-ve i është kthyer vetëdija pasi kishte kaluar 19 vjet në komë

• Kryengritësit çeçenë vranë pesë ushtarë rusë

• Një person i armatosur vrau pesë veta dhe plagosi tetë të tjerë në Misisipi

• Akuza për blerje uraniumi nuk qëndron

• Ushtarët izraelitë kanë vrarë një burrë palestinez në Bregun Perendimor

• Parlamentarët e BE mbështesin anulimin e vizës për qytetarët në Zvicër që nuk janë nga vendet e Bashkimit Evropian

• Përmbytet në Bangladesh një feribot dhe zhduken 600 udhëtarë

• Kryeministri palestinez ofroi dorëheqjen si kryetar i qeverisë

• SHBA: Shpenzimet për mbrojtjen rreth 369 miliardë dollarësh për vitin 2004

Komisioni Evropian vlerëson pozitivisht marrëveshjen e tregtisë së lirë të nënshkruar mes Shqipërisë dhe Kosovës

 

Bruksel, 9 korrik 2003 - Komisioni Evropian e vlerëson pozitivisht Marrëveshjen e tregtisë së lirë të nënshkruar mes Shqipërisë dhe Kosovës ngase kjo marrëveshje mund të ketë vetëm efekte pozitive në forcimin e paqes dhe shtimin e begatisë në rajonin e Ballkanit.

 

Zëdhënësja e Komisionit Evropian Ema Aduin deklaroi për "Dojçe velen" se është e rëndësishme që në poltikën e liberalizimit të shkëmbimeve tregtare që vendet ballkanike po zhvillojnë me njëra tjetrën të përfshihet edhe Kosova me qëllim që ajo të mos kthehet në një njollë të zezë në rajon.

 

Kjo është njëra nga arsyet që Komisioni Evropian ka hartuar për Kosovën një instrument krejt të posaçëm i njohur si mekanizmi udhëzues që do të ndihmojë përshtatjen e ligjeve të Kosovës, deklaron Aduin.

 

Ajo ka theksuar se BE nuk dëshiron që Kosova të kthehet në një vend të izoluar dhe ka nënvizuar se Kosova do të ndihmohet në rrugën e saj drejt përparimit pa pritur dhe paparagjykuar statusin e saj të ardhshëm. Kosovës i nevojitet që të përshtatë ligjet e saj si me fqinjët, por po ashtu edhe me ato të BE-së, ka deklaruar kjo zyrtare e Komisionit Evropian.

Zëdhënësja e komesionerit Paten thotë se Komisioni Evropian e ka mbështetur politikën dhe vendimet që Shtajner i ka marrë në Kosovë, të cilat përmblidhen në devizën: standardet para statusit, duke nënvizuar se Komisioni Evropian do të jetë pjesëmarrës në dialogun e ardhshëm ndërmjet Prishtinës dhe Beogradit.

 

  

Deri në emërimin e kryeadministratorit të ri për Kosovën këtë detyrë do ta ushtrojë amerikani Çarls Brajshou

 

Prishtinë, 9 korrik 2003 - Deri në emërimin e kryeadministratorit të ri për Kosovën, këtë detyrë do të ushtrojë zëvendësi i tij Çarll Brajshou. Njëherit ai ushtron edhe detyrën e shefit të sektorit të UNMIK-ut për ekonomi në Kosovë.

Brajshou tha se ndiehet shumë i kënaqur për faktin se ai në Kosovë ka raporte shumë të mira me liderët vendorë, prandaj bashkëpunimi i tij me lidershipin e Kosovës do të bëjë që vakuumi i krijuar në postin më të lartë të UNMIK-ut të mos hetohet.

 

 

Tre evropianë janë kandidatë për postin e kryeadministratorit të Kosovës, thotë zëdhënësi i KB

 

Nju Jork, 9 korrik 2003 - Zëdhënësi i Kombeve të Baskuara Farhan Hak ka deklaruar se për postin e shefit të UNMIK-ut tri personalitete janë në zgjedhje të ngushtë. Ai ka mohuar njoftimet se Zhak Klajn është emëruar administrator i ri në Kosovë.

"Emri i ri ende nuk dihet, por mund të them se në zgjedhje të ngushtë janë tre vetë dhe që të tri janë nga Evropa", ka thënë zëdhënësi i KB Farhan Hak.

 

 

Departamenti amerikan i Shtetit mirëpret letrën e udhëheqësve kosovarë drejtuar personave të zhvendosur

 

Prishtinë, 9 korrik 2003 - Shtetet e Bashkuara mirëpresin ftesën e nënshkruar nga qeveria e përkohshme dhe udhëheqësit politikë në Kosovë, të cilët u bënë thirrje serbëve të zhvendosur dhe pakicave tjera që të kthehen në shtëpitë e tyre dhe të punojnë me misionin e KB-ve dhe me institucionet e përkohshme në ndërtimin e një shoqërie demokratike dhe tolerante, thuhet në një njoftim të Departamentin amerikan të Shtetit që e transmeton Zyra amerikane në Prishtinë.

"Ne kërkojmë nga të gjitha palët që të punojnë së bashku në mënyrë konstruktrive, për të siguruar që secili që dëshiron të kthehet ta ketë mundësinë e vërtetë për ta bërë këtë, dhe për t'i dhënë secilit mjetet dhe mundësinë që të marrë një vendim të bazuar në informata reale lidhur me ardhmërinë e tyre", thuhet në këtë njoftim.

 

 

Në duart e civilëve në Kosovë ka qindra mijëra armë

 

Prishtinë, 9 korrik 2003 - Me moton "Mos ma mbytni lirinë", Zyra e për zhvillim e OKB-së - UNDP, sot e fillon një fushatë e cila ka për qëllim vetëdijësimin e popullsisë nga rreziku që paraqesin armët e vogla.

 

Kjo fushatë do të zgjasë tre muaj dhe do të shtrihet në tërë Kosovën.

Një i raport i publikuar me titull "Kosova dhe armët" vlerëson se në duart e civilëve gjenden prej 330 mijë deri në 460 mijë armë të ndryshme zjarri.

 

 

Qeveria e Kosovës u bën thirrje banorëve të fshatit Debellde të mos tensionojnë situatën

 

Prishtinë, 9 korrik 2003 - Në mbledhjen e sotme të Qeverisë së Kosovës janë miratuar pesë nisma për projektligje për t'u shqyrtuar në Kuvendin e Kosovës: Projektiligji për shpalljen park nacional të Bjeshkëve të Nemuna, ai për kinematografi, për fidane, për punën kërkimore-shkencore dhe për katastër.

Me këtë rast Qeveria u bën thirrje banorëve të fshatit Debellde të mos shkaktojnë ndonjë konflikt dhe të mos tensiojnë situatën ndërmjet autoriteteve vendore dhe UNMIK-ut, pas gjendjes së krijuar në atë lokalitetet në lidhje me nismën për hapjen e pikës kufitare.

 

Kryeministri Bajram Rexhepi tha se përkrah qasjen e lirë të banorëve në pronat e tyre dhe rikonformon qëndrimin e qeverisë për mosnjohjen marrëveshjes për kufirin ndërmjet Maqedonisë dhe Serbisë në vitin 2001. "Qeveria e Kosovës nuk hyn atje ku nuk është kompetencë e saj.

 

Kjo është një marrëveshje mes UNMIK-ut dhe qeverisë maqedonase. Ne jemi që qytetarëve të Kosovës të atij rajoni t'u mundësohet një qasje e lirë në pronat e tyre. Se a do t'i shfrytëzojnë ata pronat e tyre apo jo, kjo është çështje e tyre", tha Rexhepi duke komentuar një pyetje nëse qeveria e tij mbështet hapjen e pikës kufitare në Debëllde.

 

 

Viti: UNMIK-u heq dorë nga hapja e pikës kufitare, banorët zhbllokojnë rrugën që çon në Debëllde

 

Viti, 9 korrik 2003 - UNMIK-u ka hequr dorë nga insistimi i tij për hapjen e pikës kufitare ndërmjet Kosovës dhe Maqedonisë në fshatin Debëllde. Shefi i operacioneve policore të UNMIK-ut Robert Pedllou u tha sot banorëve të kësaj ane se UNMIK-u nuk dëshiron të ndërmarrë hapa kundër vullnetit të qytetarëve të këtueshëm. Ai tha se pa pëlqimin e banorëve të kësaj zone UNMIK-u nuk do të hapë ndonjë pikë kufitare.

Ndërkaq sot paradite, në organizim të Kuvendit komunal të Vitisë u mbajt një protestë gjithëpopullore kundër hapjes së një pike kufitare ndërmjet Kosovës dhe Maqedonisë. Pas këtij tubimi qytetarët shkuan në fshatin Debëllde.

Ndërkohë, kryetari i komunës së Vitisë Musa Misini tha se pas tërheqjes së UNMIK-ut do të tërhiqen edhe banorët nga bllokimi i rrugëve. "Këshilli organizativ e pezullon vendimin për protesta, pushon së vepruari, por nuk shuhet dhe porosit qytetarët e fshatit Debëllde që të jenë vigjilentë përderisa është në zbatim kjo marrëveshje të lirojnë rrugën, të krijojnë kushte për qarkullim dhe të kthehen në shtëpitë e tyre", tha z.Misini, duke shtuar se po qe se shkilet marrëveshja Këshilli i protestave do të riaktivizohet.

 

 

Tre vetë janë vrarë dhe disa të tjerë janë plagosur në një sulm të armatosur në Shkup

 

Shkup, 9 korrik 2003 - Tre vetë janë vrarë dhe katër të tjerë janë plagosur, kur disa persona të maskuar kanë hapur zjarr ndaj mysafirëve të një kafiterie në lagjen Çair të Shkupit, afër xhamisë Jahja Pasha, lagje kjo e banuar kryesisht me shqiptarë.

 

Njoftohet se në mesin e të vrarërve është edhe një fëmijë. Policia ende nuk ka bërë identifikimin e viktimave dhe është duke i bërë hetimet.

 

Autorët e këtij sulmi sot rreth mesditës nga vetura BMW kanë hapur zjarr ndaj mysafirëve që rrinin ulur në kafiteri. Dëshmitarët okularë së pari kanë dëgjuar breshëri plumbash e pastaj para kafiterisë ka shpërthyer edhe një bombë. Sulmuesit ndodhen në arrati.

Sipas agjencisë maqedonase të lajmeve MIA bëhet fjalë për qërim hesapesh ndërmjet dy grupeve rivale shqiptarësh.

 

 

Katër fëmijë shqiptarë dëshmojnë në gjykatën e Beogradit për një masakër në Podujevë

 

Londër, korrik - Katër fëmijë, që tash jetojnë në Angli dhe që i kanë shpëtuar një masakre, kur pothuaj se krejt familja e tyre qe vrarë, do të dëshmojnë në gjykatë kundër atyre që akuzohen për këto vrasje, njofton BBCnews.

 

Që të katër fëmijët, shqiptarë nga Kosova, thuhet në njoftim, kanë qenë ndër 24 personat e rrethuar nga paramilitarët serbë, të cilët kanë shtënë me armë zjarri në ta më 1999, në një nga aktet më të llahtarshme në gjithë konfliktin në Kosovë dhe gjatë paraqitjes së tyre në gjykatë në Beograd, do të ketë një sigurim të fuqishëm.

 

Masakra ka ndodhur në një lagje të Podujevës, më 28 mars 1999. Paramilitarët serbë kishin urdhëruar anëtarët e tri familjeve të mblidhen në kopsht, pastaj i kanë pushkatuar 19 syresh, më të riun vetëm dy vjeç.

 

Përkundër plagëve të rënda, të pesë fëmijët mbijetuan dhe tash janë të vetmit dëshmitarë të masakrës.

 

Ata kanë kaluar katër vjetët e fundit në qytetin verior anglez, Mançester, por në fillim të kësaj jave, ata kanë fluturuar në Beograd për t’u ballafaquar me njërin nga vrasësit.

 

 

Misioni i UNMIK-ut në Kosovë as dje nuk arriti të hapë vendkalimin e ri kufitar me Maqedoninë

 

Prishtinë, 9 korrik 2003 - Misioni i UNMIK-ut në Kosovë as dje nuk arriti të hapë vendkalimin e ri kufitar ndërmjet Kosovës dhe Maqedonisë, pasi banorët e fshatit Debelldesë të Vitisë, kanë refuzuar të heqin nga rruga barrikadat që i kanë vendosur aty tash tri ditë.

 

Banorët vazhdojnë ta mbajnë të bllokuar rrugën, duke thënë se hapja e këtij vendkalimi nënkupton njohjen e Marrëveshjes së arritur ndërmjet Shkupit dhe Beogradit për vijën kufitare midis Maqedonisë dhe Serbisë, ku është përfshirë edhe kufiri i Kosovës.

Përfaqësuesi i policisë së UNMIK-ut ka biseduar gjatë ditës së djeshme me përfaqësuesit e fshatit, por nuk është arritur kurrfarë pajtimi.

Edhe Kuvendi komunal i Vitisë ka mbajtur një mbledhje të jashtëzakonshme dhe ka kërkuar nga të gjitha instancat që nga KS e poshtë të përkrahin kërkesat e drejta të banorëve të Debelldesë, tha kryetari i komunës Musa Misini.

 

Ai thotë se UNMIK-u ka vepruar në kundërshtim me Rezolutën 1244 kur ka përkrahur Marrëveshjen ndërmjet Maqedonisë dhe Serbisë për caktimin e vijës kufitare, ku është përfshirë edhe një pjesë e Kosovës, pa pëlqimin e institucioneve të Kosovës.

 

 

Brajshou thotë se UNMIK-u është në fazën e gjetjes së një zgjidhje për bujqit e brezit kufitar me Maqedoninë

 

Prishtinë, 9 korrik 2003 - Ushtruesi i detyrës së kreut të UNMIK-ut, Çarlls Brajshou thotë se problemi në Debellde është çështje shumë e ndieshme për njerëzit e Kosovës, por të gjithë janë të obliguar të respektojnë vendimet e KS të OKB-së. Ai bëri këto komente pas takimit të djeshëm me kryeparlamentarin Nexhat Daci dhe kryeministrin Bajram Rexhepi.

 

Brajshou shtoi se UNMIK-u është në fazën e gjetjes së një zgjidhjeje për bujqit e brezit kufitar me Maqedoninë, në mënyrë që ata të kenë mudnësi të punojnë në tokat e tyre në të dy anët e kufirit. Por Brajshou bëri thirrje që kufiri Kosovë-Maqedoni të respektohet.

 

 

KFOR-i ia ka dorëzuar policisë së UNMIK-ut ish-udhëheqësin e UÇPMB-së, Shefket Musliun

 

Prishtinë, 9 korrik 2003 - Zyrtarët e Misionit të OKB-së konfirmuan njoftimet se forcat paqeruajtëse u kanë dorëzuar organeve të policisë së UNMIK-ut ish-udhëheqësin e Ushtrisë Çlirimtare të Preshevës, Medvegjës dhe Bujanocit Shefket Musliu.

 

Musliu tani po merret në pyetje nga policia në pritje të vendimit rreth vazhdimit të paraburgimit të tij. Ndërkaq autoritetet mohuan që z. Musliu do t'u dorëzohet organeve serbe të drejtësisë, të cilat kanë lëshuar një fletarresti për Shefket Musliun nën akuzat për kërcënim të sigurisë së qytetarëve në rajon.

Musli është arrestuar më 22 prill të këtij viti nga paqeruajtësit amerikanë. Deri më tash ai mbahej në burgun e kampit ushtarak amerikan Bondstill afër Ferizajt.

 

 

UNMIK-u ka hedhur poshtë kritikat serbe në adresë të kodit penal dhe të procedurës penale në Kosovë

 

Prishtinë, 9 korrik 2003 - UNMIK-u ka hedhur poshtë si të baza kritikat e mediave serbe drejtuar shpalljes së kodit penal dhe të procedurës penale para dy dite në Prishtinë. Këto kode nuk janë shpallur që të përcaktojnë statusin final të Kosovës, ashtu siç thuhet në mediat serbe.

 

Ato synojnë zbatimin e ligjit në Kosovë. Kështu tha ndër të tjera në takimin e djeshëm me gazetarë në Prishtinë Aleksandar Borg Olivie, këshilltar ligjor i UNMIK-ut. Ai ka shtuar se shpallja e këtyre dy kodeve është bërë pas lejimit nga ana e KS të OKB-së.

 

 

Policia po gjurmon vrasësin e një familjeje pesëanëtarëshe në Kaliforni

 

Los Angjelos, 9 korrik 2003 – Policia po gjurmon një administrator shkolle, i cili është zhdukur pasi kishte vrarë me armë zjarri një familje pesanëtarëshe në qytetin Bejkersfild të Kalifornisë qendrore, njofton Rojter. Policia ka thënë se Vinsent Bradhers konsiderohet “i dyshimti i mundshëm” për vrasjen makabër të një nëne, gjysheje, një vajze, një djali dhe të një foshnjeje dymuajëshe.

 

 

Është arrestuar ish-ministri i brendshëm i Sadam Hyseinit dhe një anëtar i lartë i partisë së tij Baath

 

Bagdad, 9 korrik 2003 – Ish-ministri i brendshëm i Sadam Hyseinit, Mahmud Dijab Al-Ahmed dhe anëtari i lartë i partisë së tij Baath, Mizban Kadër Al Hadi, janë arrestuar dhe janë dërguar në burg, ka bërë të ditur sot (e merkurë) Komanda qendrore amerikane, njofton AP. Të arrestuarit gjendeshin në listën e 55 të ikurve irakianë më të kërkuar.

 

Al Hadi, që kishte numrin 23 të listës, ishte kthyer vetë në kryeqytet, kurse Al Ahmed, që kishte numrin 29 të kësaj liste, ishte zënë gjitashtu në Bagdad. Deri tash 34 veta nga lista e 55 më të kërkuarve gjenden në burg, por jo edhe Sadami dhe dy djemtë e tij Kusai dhe Odai.

 

 

Podujevë: Sindikata e Mjekëve të Egjiptit i dhuron aparaturë moderne Shtëpisë së Shëndetit

 

Podujevë, 9 korrik 2003 – Në kuadër të ndihmës me mjete mjekësore për Kosovën, Sindikatat e mjekëve të Egjiptit – HSAC - sot i dhuruan Shtëpisë së Shëndetit në Podujevë një aparaturë moderne e cila sipas drejtorit dr. Bahri Thaçi nuk mund të sigurohej me mjete vetjake.

 

"Merita i takon popullit të Egjiptit i cili që nga fillimi i luftës në Kosovë bëri përpjekje që të gjejë forma dhe mënyra për ta ndihmuar popullin e Kosovës", tha sekretari gjeneral i Sindikatës së Mjekëve të Egjiptit z. Abdl El Kader Hegazy.

 

Z. Hegazy kishte vizituar Kosovën më 1999 dhe kishte parë të gjitha shkatërrimet nga lufta kështu që në kuadër të ndihmës disa komunave të Kosovës ai vizitoi edhe komunën e Podujevës të cilës i janë dhuruar 3 aparate të EKG-së, 1 ultrazë, 1 defribilator, 1 inhalator, 3 mikroskopë, peshore për fëmijë dhe të rritur për pediatrinë dhe pajisje tjera të nevojshme.

Sipas administratorit të HSAC z. Bekim Mehmetaj ndihma dhuruar dia komunave si” Podujeva, Prishtina, Skënderaji, Vushtrria, etj arrinë vlerën e mbi 450 mijë euro.

Duke falënderuar në emër të qytetarëve të komunës së Podujevës zv.kryetari Agim Kikaj tha se dhurata e popullit mik të Egjiptit dhe e Sindikatës së Mjekëve është ndihmë e madhe për popullatën e Podujevës e cila ka nevojë për trajtim mjekësor në kushtet e rënda në të cilën gjendet.

Drejtori i Shtëpisë së shëndetit primar dr. Bahri Thaçi në fund u dorëzoi mirënjohje Sindikatave të mjekëve të Egjiptit, sekretarit Hegazy, dr. Muhamet Mustafës dhe përfaqësuesit të UNMIK-ut z. Bangash.

                                       

 

Një burri nga Arkanzasi i SHBA-ve i është kthyer vetëdija pasi kishte kaluar 19 vjet në komë

 

Arkanzas, SHBA, 9 korrik 2003 – Një burri nga Arkanzasi i SHBA-ve i është kthyer vetëdija pasi kishte kaluar 19 vjet në komë, njofton BBCnews. Teri Uallis, 39 vjeçar, kishte pësuar aksident trafiku në korrik të vitit 1984, kur vetura, me të cilën udhëtonte me një mik të tij, kishte rënë në një përrua.

 

Në këtë aksident kishte humbur jetën miku i z. Uallis, i cili kishte qenë shofer i makinës, kurse ai vetë ishte gjetur një ditë më vonë, por kishte rënë në komë. Shumë ngjarje historike, që janë zhvilluar ndërkohë, për të janë të panjohura, përfshirë edhe zgjedhjet e presidentëve, Bill Kliinton dhe Xhorxh Bush.

 

 

Kryengritësit çeçenë vranë pesë ushtarë rusë

 

Vladikaukaz, 9 korrik 2003 - Sipas njoftimeve nga Çeçenia, separatistët çeçenë janë konfrontuar dje me ushtarët rusë në atë republikë kryengritëse të Rusisë, duke vrarë së paku pesë trupa federale dhe plagosur së paku nëntë të tjerë.

Zyrtarët e Kremlinit thonë se jeta në Çeçeni po "normalizohet" pas referendumit të marsit në të cilin ata që votuan kishin zgjedhur që republika të mbesë pjesë e Rusisë.

 

 

Një person i armatosur vrau pesë veta dhe plagosi tetë të tjerë në Misisipi

 

Meridian, Misisipi, 9 korrik 2003 - Në shtetin federal amerikan, Misisipi një person i armatosur vrau pesë veta dhe plagosi tetë të tjerë repartet e Lokid Martin, kontraktuesit më të madh të Pentagonit për prodhimin e pjesëve të avionëve ushtarakë.

Sipas zyrtarëve të Lokid Martin personi që kreu vrasjet, para se të vrasë veten, ishte punëtor i fabrikës, por thanë se nuk janë të qarta motivet e vrasjes.

 

 

Akuza për blerje uraniumi nuk qëndron

 

Uashington, 9 korrik 2003 - BBC-ja ka mësuar se para fillimit të luftës në Irak, Presidenti Bush bëri një akuzë specifike ndaj programit të armëve bërthamore të Bagdadit, megjithëse CIA kishte ngritur dyshimet për këtë çështje.

Si Toni Bler ashtu dhe Xhorxh Bush publikisht akuzuan Irakun se po përpiqej të blente uranium në Afrikë, por dokumentet mbi të cilat u bazuan akuzat dolën të ishin të fallsifikuara dhe tashmë Shtëpia e Bardhë ka pranuar se referimi bërë uraniumit nuk duhej të ishte përfshirë në fjalimin e presidentit në Janar.

 

 

Ushtarët izraelitë kanë vrarë një burrë palestinez në Bregun Perendimor

 

Xhenin, Bregu Perendimor, 9 korrik 2003 – Ushtarët izraelitë kanë vrarë sot (e merkurë) një burrë palestinez në Bregun Perendimor në një kohë që premieri palestinez po lufton me opozitën e brendshme në proceset paqësore me Izraelin, e cila mund ta detyrojë atë të jepë dorëheqje, njofton Rojter.

 

Burimet ushtarake kanë thënë se palestinezi është vrarë pasi ai kishte hapur zjarr në ushtarët, që po arrestonin një person të kërkuar në një zonë të Bregut Perendimor, prej nga militantët islamistë dërguan të hënën vetëvrasësin me bombë, që prishi armëpushimin 10-ditësh.

 

Burimet e sigurimit palestinez kanë thënë se forcat iztraelite kanë hyrë para agimit në fshatin Burqin, afër Xheninit, kanë hyrë dhunshëm në një shtëpi palestineze dhe e kanë arrestuar një militant 22-vjeçar. Disa momente më vonë, ata kanë hapur zjarr në shtëpinë fqinje të vëllaut 27-vjeçar të militantit dhe e kanë vrarë tek po shikonte në dritare.

 

 

Parlamentarët e BE mbështesin anulimin e vizës për qytetarët në Zvicër që nuk janë nga vendet e Bashkimit Evropian

 

Bruksel, 9 korrik 2003 - Një delegacion i Sindikatës së Ndërtimtarisë dhe Industrisë dhe Forumit për Integrimin e Emigrantëve në Zvicër (SNI dhe FIM) ka qëndruar dje vëmendjen në Bruksel.

 

Kërkesat e këtij delegacioni për anulimin e shpejtë të detyrimit të vizës për shtetasit që jetojnë në Zvicër e që nuk vijnë nga shtetet e Bashkimit Evropian do të tematizohen në BE.

 

Një delegacion i Komisionit Europian dhe nënpresidenti i Parlamentit Evropian Renco Imbeni si dhe parlametarë të tjerë të Bashkimit Evropian dëshirojnë anulimin e këtij maltretimi të njëanshëm.

Mbi pesëqindmijë shtetas me vendbanim në Zvicër janë të detyruar për marrjen e një vize nëse udhëtojnë në nëpër shtetet e Shengenit për në vendlindje.

Për këtë burokraci të panevojshme duhet shumë kohë dhe mjete financiare. Ka një vit që vizat lëshohen me një afat më të gjatë mirëpo problemi ende nuk është zgjidhur.

Sindikata e Ndërtimtarisë & Industrisë SNI dhe Forumi për integrimin e Emigrantëve në Zvicër FIM qartësuan edhe njëherë kërkesën për anulimin e detyrimit për viza.

Rregulloret e BE-së mbi lirinë e udhëtimit të qytetarëve nga vendet e treta e të cilët qëndrojnë me lejeqëndrim në shtetet e Bashkimit Evropian duhet të vlejnë edhe për bashkëkombasit e tyre në Zvicër me logjikën e masave reciproke.

Zvicra ka anuluar qysh në gusht të vitit 2000 detyrimin e vizave për qytetarëve nga shtetet e treta të cilët jetojnë legalisht në shtetet e Bashkimit Evropian.

Tani zgjidhja e këtij problemi qëndron tek Bashkimi Evropian (KE) që sa më shpejt dhe më qartë të përgjigjet në kërkesat e SNI-së dhe FIM-it.

Delegacioni i Komisionit Evropian do ta shqyrtojë këtë kërkesë në muajin shtator të këtij viti.

 

 

Përmbytet në Bangladesh një feribot dhe zhduken 600 udhëtarë

 

Daka, Bangladesh, 9 korrik 2003 – Një feribot i stërngrkuar me njerëz është përmbytur në ujërat e tërbuara nga stuhia në Bangladeshin jugor dhe kështu janë zhdukur rreth 600 njerëz, për fatin e të cilëve ende nuk dihet, kanë bërë të ditur sot (e merkurë) zyrtarët e shpëtimit, njofton AP.

 

Feriboti, që barte 750 njerëz është përmbytur mbrëmë vonë në vendbashkimin e lumenjve Padma, Meghna dhe Dakatia, rreth 40 mila në jug të kryeqytetit, Daka.

 

 

Kryeministri palestinez ofroi dorëheqjen si kryetar i qeverisë

 

Gazë, 9 korrik 2003 - Kryeministri palestinez Mahmud Abaz ofroi dorëheqjen e tij si kryetar i qeverisë. Abaz e bëri këtë deklaratë kundrejt komitetit qendror të lëvizjes Fatah të presidentit palestinez Jaser Arafat. Megjithatë ky i fundit e refuzoi kërkesën për dorëheqje.

 

Abaz ishte kritikuar ashpër brenda radhëve të veta, pasi nuk kishte arritur lirimin e të gjithë të burgosurve palestinezë nga burgjet izraelite.

 

 

SHBA: Shpenzimet për mbrojtjen rreth 369 miliardë dollarësh për vitin 2004

 

Uashington, 9 korrik 2003 - Dhoma e deputetëve në SHBA miratoi me shumicë të madhe shpenzimet për mbrojtjen prej rreth 369 miliardë dollarësh për vitin 2004. Në to nuk përmbahen shpenzimet për veprimet ushtarake në Afganistan dhe në Irak.

 

Shuma e miratuar është tre miliardë dollarë më e ulët sesa ajo e kërkuar nga presidenti amerikan George Bush. Buxheti i mbrojtjes përbën rreth një të gjashtën e krejt buxhetit të SHBA-ës.

Copyright©2000-2003 Trepca.net - Të gjitha të  drejtat e rezervuara.