E marte 8 korrik 2003

8.07.2003 - Trepca.net

Lajme

E marte 8 korrik 2003

Përmbajtja:

Presidenti Rugova priti gjeneral Agim Çekun
Presidenti Rugova priti shefin e Zyrës italiane në Prishtinë
Shtajner: Kosova është afër zemrës dhe ajo është bërë pjesë e imja
Zëdhënësi i OKB-së thotë se Marrëveshja për tregti të lirë ndërmjet Kosovës dhe Shqipërisë është në pajtim me Rezolutën 1244
Shtajner i ka dërguar një mesazh Ilir Metës
Në komunën e Gjilanit shfaqet bruceloza - 9 qytetarë të infektuar
Shqiptarët në rrethinën e Nju Jorkur shënuan 2 dhe 4 Korrikun
Policia e UNMIK-ut dhe KFOR-i kanë konfiskuar katër vetura pa targa
Banorët e fshatit Debellde nuk lejuan hapjen e pikës kufitare mes Kosovës dhe Maqedonisë
Në Prishtinë u përurua objekti i Qendrës rehabilituese për persona me aftësi të kufizuara
Serbët kundërshtojnë kodin e ri penal të Kosovës
Zyrtarë të lartë të Beogradit reagojnë ashpër ndaj nënshkrimit të Marrëveshjes ndërmjet Kosovës dhe Shqipërisë
Tiranë: Hetimet mbi mënyrën se si u administruan pasuritë e firmave piramidale
Në Beograd u zhvillua një tribunë kushtuar dialogut ndërmjet Kosovës dhe Serbisë
Italia do të organizojë një takim të përbashkët të BE-së me 5 vendet e Ballkanit Perëndimor në nivel ministrash
Shkupi zyrtar thotë se prej sot edhe zyrtarisht do të fillojë të funksionojë vendkalimi kufitar në Tanushë
Presidenti amerikan Bush takohet me udhëheqësit afrikano-perëndimorë
Audiokasetë e re e Sadam Huseinit?
Në aksidentin e aeroplanit sudanez humbën jetë 116 udhëtarë - shpëtoi vetëm një djalosh 12-vjeçar
Dy ushtarë amerikanë janë plagosur lehtë nga një shpërthim në automjetin e tyre
Ka vdekur nga gjakderdhja e madhe njëra binjake pas operacionit të ndarjes
Vershimet në Kinë kanë shkaktuar vdekjen e 13 persona dhe kanë zhvendosur mbi një milion njërëz
Presidenti Bush fillon sot vizitën e tij të parë në Afrikë
Shpërthimi i djeshëm, që shkaktoi vdekjen e një gruaje izraelite, është kryer nga një vetëvrasës me bombë
Përfundoi operacioni i motrave binjake
Përpjekja historike për ndarjen e dy motrave binjake, përfundoi tragjikisht me vdekjen e tyre
Në një aksident ajror në Sudan kanë humbur jetën 115 vetë
Një valutë e re për Irakun

Presidenti Rugova priti gjeneral Agim Çekun


Presidenti Rugova i dha mbështetje zhvillimit dhe profesionalizimit të mëtejshëm të TMK-së, e cila do të jetë në gjendje t'i kryejë detyrat që janë para saj.

Aktualisht TMK-ja kryen detyra të aftësimit, të mbrojtjes, pra detyra civle, ndërkaq në fazën e ardhshme TMK-ja do të jetë një forcë e aftësuar mbrojtëse e Kosovës, nënvizoi Presidenti Rugova pas takimit me gjeneral Çekun.

Por, tha ai, asaj duhet krijuar kushte e mundësi që të zhvillohet edhe më tutje, përmes donacioneve të ndryshme nga bota, sidomos evropiane dhe amerikane që edhe deri më tash kanë ndihmuar zhvillimin e saj.


Ai theksoi se ka hasur në mirëkuptim dhe në përkrahje të plotë të Presidentit Rugova për përpjekjet që bëjnë pjesëtarët e TMK-së dhe shpreson që TMK-ja përherë do ta gëzojë pëkrahjen e Presidentit dhe të institucioneve të Kosovës.

Pjesëtarëve të TMK-së u mbetet që të justifikojnë besimin që kanë institucionet e Kosovës ndaj TMK-së dhe në bashkëpunim me institucionet dhe qytetarët, tha Çeku, do t'ia arrijnë qëllimeve të përbashkta.


Presidenti Rugova priti shefin e Zyrës italiane në Prishtinë


Zoti Rugova ripërsëriti qëndrimin e tij të njohur që Kosova të integrohet sa më parë nërrjedhat evropiane dhe pavarësia e saj të njihet sa më parë, sepse do të ndikonte në stabilizimin e situatës në Kosovë dhe rajon dhe do ta qetësonte këtë pejsë të Evropës.
Me këtë rast Presidenti shprehu bindjen që nën udhëheqjen italiane BE do të përshpejtojë proceset e integrimit të Kosovës dhe të kësaj pjese të Evropës në BE, dhe falenderoi Italinë për ndihmat që ka dhënë për Kosovën.
Nga ana e tij shefi i Zyrës italiane vlerësoi përpjekjet që po bëjnë institucionet e Kosovës për kthimin e të shpërngulurve, si dhe integrimin e pjesëtarëve të pakicave.

Në këtë aspekt ai çmoi letrën e liderëve kosovarë drejtuar të zhvendusurve për kthimin e tyre në shtëpitë e veta. Kjo është ajo që duhet bërë për integrimin e minoriteteve në shoqërinë kosovare, tha ai.
Zoti Salcano premtoi se gjatë presidencës së Italisë në krye të BE Ballkani Perëndimor do të jetë në krye të axhendës.


Shtajner: Kosova është afër zemrës dhe ajo është bërë pjesë e imja

Prishtinë, 8 korrik 2003 - Në përfundim të misionit të tij në Kosovë, kryeadministratori Mihael Shtajner tha se e ka gjithnjë e më vështirë të largohet nga Kosova, por do të arrijë ta bëjë këtë sot në mëngjes.

"Por kur u thua lamtumirë liderëve të institucioneve dhe partive të këtushme e sheh se sa afër zemrës është Kosova dhe sa ajo është bërë pjesë imja", tha kryeadministratori i derisotëm i Kosovës, Mihael Shtajner i cili për 18 muaj ishte në krye të Misionit të OKB-së në Kosovë.

Ai shkon në detyrën e ambasadorit të Gjermanisë në selinë e OKB-së në Gjenevë.


Zëdhënësi i OKB-së thotë se Marrëveshja për tregti të lirë ndërmjet Kosovës dhe Shqipërisë është në pajtim me Rezolutën 1244

Nju Jork, 8 korrik 2003 - Zëdhënësi i Kombeve të Bashkuara Farhan Hak thotë se Marrëveshja për tregti të lirë ndërmjet Kosovës dhe Shqipërisë është në pajtim me Rezolutën 1244 të Këshillit të Sigurimit.

Fak citohet të ketë thënë se nënshkrimit të marrëvshjes i kanë paraprirë konsultimet e gjera të cilat UNMIK-u i ka pasur me Komisionin Evropian në Bruksel dhe me shërbimin juridik të Kombeve të Bashkuara.


Shtajner i ka dërguar një mesazh Ilir Metës

Tiranë, 8 korrik 2003 - Zv/Kryeministri dhe ministër i Punëve të Jashtme, Ilir Meta, ka marë një letër falendërimi nga kryeadministratori i Kosovës, Mihael Shtajner.

Shtajne në këtë letër ka çmuar lart angazhimin e ministrit shqiptar, i cili e ka frymëzuar dhe inkurajuar gjatë gjithë kohës së misionit të tij në Kosovë.

"Marrëdhëniet e qëndrueshme rajonale që ne arritëm të krijojmë së bashku, do të sjellin në të ardhmen që Kosova të bëjë pjesë në Evropë", shkruan më tutje Shtajner në këtë letër, duke uruar z.Meta në përballimin e sfidave të tjera për forcimin e bashkëpunimit rajonal, në të mirë të Shqipërisë dhe vendeve fqinje.


Në komunën e Gjilanit shfaqet bruceloza - 9 qytetarë të infektuar

Gjilan, 8 korrik 2003 - Në rajonin e Gjilanit, përsëri është shfaqur sëmundja e brucelozës. Drejtori i bujqësisë, pylltarisë dhe shërbimeve veterinere, Nehat Ramadani, deklaroi se kësaj here sëmundja është paraqitur në shatin Livoç i Epërm dhe është shprehur i shqetësuar për mundësinë e bartjes së bucelozës edhe të njerëzit, përmes përdorimit të qumështit ose mishit dhe prodhimeve të tyre.
Drejtoria i udhëzon pronarët e furrave të bukës, mishtoret, qumështoret, ëmbëltoret dhe të gjitha lokalet tjera që përdorin mishin dhe qumështin, që të mos funizohen kurrsesi me këto prodhime nga ky fshat, përderisa të mos konstatohet nga ekspertët zhdukja e plotë e sëmundjes. Përndryshe, shkelësit e kësaj urdhërese mund të gjobiten në bazë të dispozitave në fuqi.
Ndërkaq, nga terreni mësohet se sëmundja e brucelozës, e cila është paraqitur para më shumë se dy javësh, ka atakuar deri tani edhe 9 banorë të kësaj lagje, 5 nga të cilët kanë përfunduar në spital, ndërsa për katër të tjerët, testimi i parë ka rezultuar pozitiv.
Shërbimet e veterinës nga Drejtoria për bujqësi i kanë ndërmarrë të gjitha masat e duhura për të penguar përhapjen e sëmundjes dhe po bëjnë gjithçka që është e mundur për ta zhdukur sa më parë këtë infeksion, i cili i sulmon kafshët dhe përmes mishit e qumështit mund të bartet edhe të njerëzit.


Shqiptarët në rrethinën e Nju Jorkur shënuan 2 dhe 4 Korrikun

Nju-Jork 8 korrik 2003 - Të dielën, më 6 korrik, sipas traditës në parkun e bukur "Anthony Wayne Recration Area" të Nju-Jorkut, dega e LDK-së, për treshtetshin Nju Jork, Nju Xhersi e Kenektiket, për nder të 2 Korrikut - Ditës së shpalljes se Deklaratës Kushtetuese të pavarësisë së Kosovës, 4-vjetorit të çlirimit të Kosovës, dhe, 4 Korrikut, 227-vjetorit të Ditës së pavarësisë dhe shpalljes së Kushtetutës së Sheteve të Bashkuara të Amerikës, organizoi piknikun tradicional.

Në këtë piknik, sipas zotit Marijan Cubi, rreth shtatë mijë shqiptaro-amerikanë nga Nju Jork-u, Kenektikët, Pensillvenia e Nju Xhersi, të udhëhequr nga liderit e degës së LDK-s, për treshtetshin, kryesia e saj, me sukses zhvilluan këtë aktivitet tradicional.
Dega e Lidhjes Demokratike të Kosovës, me këtë piknik shënoi edhe një nga ngjarjet më të rëndësishme të shqiptarëve të Amerikës. LDK-ja, i ka vënë si detyrë vetes, që me një synim më të madh, të përgjithshëm kombëtar, për ta kthyer piknikun e 2 dhe 4 korrikut, në një manifestim mbarkombëtar në SHBA.
Kështu, në një atmosferë festive, në njërën prej ambienteve më të mrekullueshme natyrore të këtij shteti, gëzimi festiv i kaloi ndoshta parashikimet.
Pikniku i 2 dhe 4 korrikut u zhvillua me një aktivitet të larmishëm: kulturor-sportiv e muzikor, shoqëruar gjatë gjithë ditës deri në orët e mbrëmjes. Gjatë këtij pikniku, pati dhe konkurrime të vallëzimeve më të bukura, të, të gjitha moshave, ushqime tradicionale me specilalitete shqiptare, lojëra zbavitëse, muzikë popullore, mini volejboll, mini futboll, bejzboll dhe aktivitete të larmishme e zbavitëse.


Policia e UNMIK-ut dhe KFOR-i kanë konfiskuar katër vetura pa targa

Mitrovicë, 8 korrik 2003 - Policia e UNMIK-ut në bashkëpunim me KFOR-in dje në pjesën veriore të Mitrovicës kanë ndërmarrë një aksion për konfiskimin e veturave pa targa. Janë konfiskuar katër vetura pa targa dhe të pasiguruara, ndërkohë që pjesëtarët e pakicës serbe kanë shprehur pakënaqësinë e tyre, duke bllokuar rrugën Mitrovicë -Zveçan.
Një zëdhënës i UNMIK-ut tha se policia e UNMIK-ut me këtë aksion dëshiron t'i përkujtojë qytetarët për rëndësinë e regjistrimit dhe të sigurimit të veturave të tyre.


Banorët e fshatit Debellde nuk lejuan hapjen e pikës kufitare mes Kosovës dhe Maqedonisë

Viti, 8 korrik 2003 - Banorët e fshatit Debellde të Vitisë gjatë tërë ditës së djeshme kanë bllokuar rrugën për të penguar UNMIK-un që të bëjë hapjen e pikës kufitare mes Kosovës dhe Maqedonisë.

Policia e UNMIK-ut ka tentuar të depërtojë në fshatin Debellde, ku parashihet të vendoset një pikë kufitare mes Kosovës e Maqedonisë, por banorët kanë lejuar të kalojnë vetëm automjetet e KFOR-it.
Vendosjen e kësaj pike kufitare e kundërshtojnë banorët e Debelldesë, për shkak se ajo katër kilometra hyn në territorin e Kosovës. Banorët gjithashtu kërkojnë që t'u kthehen pronat e tyre, të cilat u janë marrë në bazë të një marrëveshjeje midis Maqedonisë dhe Serbisë.

Kosovës iu morën në mënyrë arbitrare mbi 2500 hektarë tokë të cilat tani kontrollohen nga autoritetet maqedonase.
Burimet e administratës së UNMIK-ut kanë bërë të ditur se vendosja e një postblloku kufitar ndërmjet Kosovës e Maqedonisë do të bëhet sot.


Në Prishtinë u përurua objekti i Qendrës rehabilituese për persona me aftësi të kufizuara

Prishtinë, 8 korrik 2003 - Në Prishtinë u përurua objekti i Qendrës rehabilituese për persona me aftësi të kufizuara. Donator kryesor për ndërtimin e këtij objekti është familja Strak nga Shtetet e Bashkuara të Amerikës në bashkëpunim me Organizatën joqeveritare "Uorld vizhën" dhe Kuvendi komunal i Prishtinës, i cili ndau një pjesë të tokës për këtë qendër.

Ky objekt do të shërbejë për iniciativa dhe koordinim të aktiviteteve të ndryshme që kanë të bëjnë me personat me aftësi të kufizuara nga të gjitha komunitetet.


Serbët kundërshtojnë kodin e ri penal të Kosovës

Mitrovicë, 8 korrik 2003 - Përfaqësuesit e pakicës serbe në Kosovë kanë kritikuar kodin e ri penal dhe të procedurës penale, të cilat u nënshkruan dje nga shefi i UNMIK-ut Mihael Shtajner.
"Kodi i ri penal vendos një sistem, i cili mbështet plotësisht një Kosovë të pavarur sepse e shkëput sistemin ligjor të Kosovës nga ai i Serbisë", citohet të ketë thënë deputeti serb Oliver Ivanoviq. Po kështu edhe zëvendëskryeministri serb Nebojsha Çoviq ka kritikuar ligjet në fjalë.


Zyrtarë të lartë të Beogradit reagojnë ashpër ndaj nënshkrimit të Marrëveshjes ndërmjet Kosovës dhe Shqipërisë

Beograd, 8 korrik 2003 - Zyrtarë të lartë të Beogradit kanë reaguar ashpër ndaj nënshkrimit të djeshëm të Marrëveshjes për tregti të lirë ndërmjet Kosovës dhe Shqipërisë. Kështu ministri i Tregtisë në Qeverinë e Serbisë, Slobodan Milosavleviq, ka vlerësuar se me nënshkrimin e Marrëveshjes për tregtinë e lirë midis Shqipërisë dhe Kosovës është shkaktuar incident i cili në këtë moment askujt nuk i nevojitet.

Sipas Milosavleviqit "marrëveshjen për tregtinë e lirë të cilën do të duhej ta nënshkruajë Bashkësia shtetërore e SMZ dhe Republika e Shqipërisë dhe do të vlente për tërë territorin e Bashkësisë shtetërore, duke përfshirë edhe Kosovën".

Nënkryetari i Qeverisë serbe Nebojsha Çoviq ka thënë se Mihael Shtajner me nënshkrimin e Marrëveshjes për tregtinë e lirë midis Shqipërisë dhe Kosovës drejpërsëdrejti e ka shkelur Rezolutën 1244 të OKB.
Ndërkaq, ministri i Punëve të Jashtme Serbi-Mali i Zi, Goran Svilanoviq ka thënë se Marrëveshja për tregtinë e lirë midis Kosovës dhe Shqipërisë është një akt në kundërshtim me dokumentet ndërkombëtare të cilat në Kosovë e garantojnë integritetin e SMZ.

E gjithë kjo është vazhdim i praktikës e cila ka filluar para më shumë se gjashtë muajsh, që disa shtete me Kosovën të nënshkruajnë kontrata të veçanta, ka thënë Svilanoviq, duke paralajmëruar ankesë pranë shërbimit juridik të KB, sepse sipas tij, kjo është jashtë kompetencave të organeve të Kosovës.


Tiranë: Hetimet mbi mënyrën se si u administruan pasuritë e firmave piramidale

Tiranë, 8 korrik 2003 - Një komisioni posaçëm i parlametitet shqiptar është duke mbyllur hetimet mbi mënyrën se si u administruan pasuritë e firmave piramidale vitet e fundit. Në një mbledhje deri pas mesnate komisioni dëgjoi mbrëmë dëshmitë e shumë zyrtarëve, mes tyre zëvëndës-kryeministrit Ilir Meta dhe kryetarit të Partisë Demokratike, Sali Berisha.


Në Beograd u zhvillua një tribunë kushtuar dialogut ndërmjet Kosovës dhe Serbisë

Beograd, 8 korrik 2003 - Përfaqësuesit e mediave dhe të organizatave joqeveritare në Beograd kanë disktutuar rreth dialogut mes Kosovës dhe Serbisë. Analistët serbë janë shprehur se njëra prej çështjeve më të rëndësishme është ajo e sigurisë në Kosovë.
"Në Kosovë duhet biseduar me kundërshtarët e jo me bashkëmendimtarët, ndryshe bisedimet mund të dështojnë ende pa filluar", ka theksuar analisti ushtarako-politik Zoran Dragishiq.

Sipas tij nuk duhet pasur iluzione se dialogu do të përfundojë shpejt, por dialogu është ai i cili çon drejt zgjidhjes, përkatësisht është rruga për përfundimin e luftës në Kosovë, sepse sipas tij, kjo luftë ende nuk ka përfunduar.
Në anën tjetër përfaqësuesit e organizatës "Rezistenca", e cila ka luajtur një rol të madh në rrëzimin e ish-diktatorit Sllobodan Millosheviq, kanë nënvizuat se organizatat joqeveritare janë ato të cilat në vitin 2001 kanë nisur procesin e dialogut mes Prishtinës dhe Beogradit.

Nenad Gjurgjeviq, i kësaj organizate, citohet të ketë thënë se elita politike e Beogradit dhe Prishtinës ende nuk kanë sqaruar pozicionet e tyre dhe idetë politike për Kosovën.

"Shqiptarët, nuk kanë përgjigje në pyetjen çfarë do të ndodhë pas pavarësisë, ndërkaq serbët, nuk kanë ndonjë strategji, si të zgjidhet ky problem", thotë Gjorgjeviq.
Ndërkaq Aleksandar Popov, i Qendrës për rajonalizim nga Vojvodina kritikoi palën serbe për qëndrimet e saj ndaj kryeadministratorëve të deritashëm të Kosovës. Ai ka theksuar se po përsëriten gabimet nga koha e Millosheviqit.


Italia do të organizojë një takim të përbashkët të BE-së me 5 vendet e Ballkanit Perëndimor në nivel ministrash

Bruksel, 8 korrik 2003 - Ministri i jashtëm italian Franko Fratini ka deklaruar se gjatë gjashtë muajve të ardhshëm, Italia do të organizojë një takim të përbashkët të ministrave të drejtësisë dhe të punëve të brendshme të Bashkimit Evropian me 5 vendet e Ballkanit Perëndimor - Kroacisë, Bosnjës e Hercegovinës, Serbisë, Maqedonisë dhe Shqipërisë.
Sipas fjalëve të tij, takimi do t'i kushtohet luftës kundër kriminaitetit të organizuar dhe emigrantëve ilegalë.
Shefi i diplomacisë italiane nënvizoi se BE patjetër do të kërkojë nga vendet ballkanike që më shpejt të modernizojnë ekonomitë dhe administratën e tyre, si dhe të kundërshtojnë më me vendosmëri kriminlitetin e organizuar.
"Kjo do të thotë që edhe shteteve të Ballkanit Perndimor duhet t'u ofrojmë perspektivën evropiane dhe të konfirmojmë premtimin që ua kemi dhënë muajin e kaluar në samitin e BE-së në Selanik", tha ministri italian Fratini para deputetëve të Parlamentit Evropian.


Shkupi zyrtar thotë se prej sot edhe zyrtarisht do të fillojë të funksionojë vendkalimi kufitar në Tanushë

Shkup, 8 korrik 2003 - Prej sot edhe zyrtarisht do të fillojë të funksionojë vendkalimi i përkohshëm kufitar në Tanushë, kanë njoftuar përfaqësusit e Ministrisë së Punëve të Jashtme të Maqedonisë. Sipas tyre hapja e vendkalimit kufitar bëhet me qëllim që të lehtësohet komunikimi midis banorëve të fshatrave kufitare të Maqedonisë: Tanushë, Brezë dhe Goshincë me ata të Kosovës.


Presidenti amerikan Bush takohet me udhëheqësit afrikano-perëndimorë

Dakar, 8 korrik 2003 - Presidenti Bush u takua në Senegal me udhëheqësit afrikano-perëndimorë, duke filluar turneun e tij pesë ditësh në Afrikë.
Menjëherë pas arritjes në kryeqytetin Dakar, Presidenti Bush zhvilloi bisedime me presidentin e Senegalit, Abdoulaye Wade dhe me udhëheqës nga 7 demokraci të tjera të Afrikës Perëndimore.
Udhëheqësit e këtyre vendeve i kanë bërë thirrje Uashingtonit të dërgojë trupa për të marrë pjesë në një forcë të propozuar paqeruajtëse në Liberi.

Presidenti Bush u tha sot gazetarëve se ai ende nuk ka vendosur se cili do të jetë roli i Shteteve të Bashkuara në Liberinë e përfshirë nga konflikti, por ai premtoi se do të bashkëpunojë me udhëheqësit afrikanoperëndimorë dhe me Kombet e Bashkuara për këtë çështje.


Audiokasetë e re e Sadam Huseinit?

Doha, 8 korrik 2003 - Dy stacione televizive të Lindjes së Mesme transmetuan një audiokasetë të re që ato thonë se është me zërin e Saddam Husseinit.

Në audiokasetën e transmetuar sot, zëri që thuhet se është i Saddam Husseinit, u bën thirrje irakianëve, arabëve, kurdëve dhe turqve, të dëbojnë nga Iraku pushtuesit e huaj agresorë, siç i quan ai.
Javën e kaluar stacioni televiziv Al-Xhazira transmetoi një kasetë për të cilën analistët amerikanë thonë se përmbante ndoshta zërin e vërtetë të Saddam Husseinit.
Por një producent i Al-Xhazirës, i cituar nga agjencia e lajmeve Associated Press, tha se kaseta e sotme është e re.
Producenti nuk tha se në ç’mënyrë apo kur ishte marrë audiokaseta.


Në aksidentin e aeroplanit sudanez humbën jetë 116 udhëtarë - shpëtoi vetëm një djalosh 12-vjeçar

Kartum, 8 korrik 2003 – Një aeroplan sudanez menjëherë pas nisjes është rrëzuar sot (e martë) në një aeroport në bregdetin verilindor të Detit të Kuq dhe kështu kanë humbur jetën 116 udhëtarë dhe ekuipazhi, njofton AP. Vetëm një djalosh dyvjeçar ka shpëtuar, kanë thënë zyrtarët.

Aeroplani Boing 737 sapo është nisur para agimit nga aeroporti Port Sudan për të fluturuar në kryeqytetin Kartum ka pasur probleme teknike, ndaj ka dashur të kthehet prapa, por është rrëzuar rreth tri mila e gjysmë nga aeroporti në një vend të pabanuar.

Fëmija i shpëtuar është dërguar në spital në gjendeje të mirë. Trupat e të vdekurve janë djegur. Viktimat kanë qenë kryesisht malezianë dhe francezë.


Dy ushtarë amerikanë janë plagosur lehtë nga një shpërthim në automjetin e tyre

Bagdad, 8 korrik 2003 – Dy ushtarë amerikanë janë plagosur lehtë sot (e martë) kur një mjet shpërthyes ka goditur automjetin e tyre në autostradën ndërmjet Bagdadit dhe aeroportit ndërkombëtar të Bagdadit, ka bërë të ditur një zyrtar ushtark amerikan, njofton Rojter.


Ka vdekur nga gjakderdhja e madhe njëra binjake pas operacionit të ndarjes

Singapor, 8 korrik 2003 – Njëra binjake iraniane ka vdekur sot (e martë) pas dy ditësh operacioni të paprecedent tejet të rrezikshëm kirugjjikal të ndarjes së kafkës dhe të trurit të dy motrave binjake, njofton Rojter. Pas operacionit, binjakja e dytë ka luftuar për të mbetur gjallë.

Operacioni i 29-vjeçareve Laleh dhe Ladan Bixhani ka hyrë në "fazën kritikë" pasi ekipi prej 28 specialistësh dhe 100 asistentësh kishte arritur të ndante indet dhe kapilarët e gjakut në spitalin e Singapurit.


Vershimet në Kinë kanë shkaktuar vdekjen e 13 persona dhe kanë zhvendosur mbi një milion njërëz

Pekin, 8 korrik 2003 – Vershimet e mëdha në Kinën lindore kanë shkaktuar vdekjen e 13 persona dhe kanë detyruar të zhvendosen mbi një milion njërëz, njofton BBCWorld.

Vershimet kanë qenë më të dëmshme në tri provinca kineze anës lumit Huai, prej nga janë evakuar rreth 380 mijë njerëz, kurse rreth 1.15 milonë banorë kanë mbetur të shkëputur dhe të izoluar për shkak të ngritjes së nivelit të ujërave. Thuhet se këto janë vershimet më të mëdha që nga viti 1991.


Presidenti Bush fillon sot vizitën e tij të parë në Afrikë

Uashington, 8 korrik 2003 - Presidenti amerikan Xhorxh Bush u nis dje për në Afrikë, turneu i tij i parë në këtë kontinent, që kur filloi detyrën e presidentit. Zoti Bush u nis dje vonë për në Senegal, ku do të takohet me presidentin e atij vendi, Abdoulaye Wade. Ai ka në plan gjithashtu të vizitojë Afrikën e Jugut, Botsvanën, Ugandën dhe Nigerinë.
Bush pritet të flasë në turneun e tij për çështje që kanë të bëjnë me zhvillimin e demokracisë dhe të ekonomisë si dhe mbi një paketë prej 15 miliard dollarësh për luftën kundër sidës.


Shpërthimi i djeshëm, që shkaktoi vdekjen e një gruaje izraelite, është kryer nga një vetëvrasës me bombë

Jerusalem, 8 korrik 2003 – Policia izraelite ka njoftuar sot (e martë) se një shpërthim i djeshëm, që shkaktoi vdekjen e një gruaje, është kryer nga një vetëvrasës me bombë dhe ky është rasti i parë që kur fraksionet më të mëdha palestineze e kanë shpallur armëpushimin para 10 ditëve, njofton Rojter.

Bëhet e ditur gjithashtu se një qelulë e Xhihadit Islamik në Bregun Perendimor e ka marrë përgjegjësinë për këtë incident, por udhëheqja e këtij fraksioni me seli në Gaza ka thënë se njeh armëpushimin dhe nuk di asgjë për deklaratën e dërguar me faks nga Xhenini.

Shpërthimi ka rrafshuar për tokë një shtëpi në qendër të qytetit izraelit Jabec dhe ka shkaktuar vdekjen e një gruaje 65-vjeçare. Fillimisht policia kishte thënë se shpërthimin e kishte shkaktuar rrjedhja e gazit.


Përfundoi operacioni i motrave binjake

Singapur, 8 korrik 2003 - Zyrtarë në spitalin e Singaporit ku u bë operacioni për ndarjen e dy motrave të bashkuara në kokë thonë se tani operacioni ka përfunduar.
Megjithatë, dy motrat 29-vjeçare - Ladan dhe Laleh Bijani- janë në gjendje kritike ndërsa neurokirurgët vazhdojnë të punojnë.
Binjaket kanë humbur shumë gjak dhe mjekët po mundohen t'i stabilizojnë. Motrat Bijani ishin të bashkuara në kokë kur lindën.


Përpjekja historike për ndarjen e dy motrave binjake, përfundoi tragjikisht me vdekjen e tyre

Singapur, 8 korrik 2003 – Përpjekja historike për ndarjen e dy motrave binjake të rritura, të bashkuara në kokë, ka përfunduar tragjikisht, kur binjaket 29-vjeçare Ladan dhe Laleh Bixhani kanë vdekur brenda 90 minutash njëra pas tjetrës pas një operacioni maratonik, njoftojnë AFP dhe agjencitë e tjera botërore të lajmeve.


Në një aksident ajror në Sudan kanë humbur jetën 115 vetë

Kartun, 8 korrik 2003 - Nga rrëzimi i një avioni pasagjerësh në Sudan kanë humbur jetën 115 vetë. Avioni sudanez ra menjëherë pas startit prej aeroportit Port Sudan, bën të ditur radioja shtetërore sudaneze.


Një valutë e re për Irakun

Bagdad, 8 korrik 2003 - Administrata amerikane ka bërë të ditur futjen e një valute të re për Irakun. Popullata mund të shkëmbejë dinarin e vjetër irakian deri në 15 tetor të këtij viti.

Valuta e re do të jetë një variant i të ashtuquajturit dinar zviveran, valutë qe përdoret në zonat e kontrolluara nga kurdët, bëri të ditur Adminsitruesi civil amerikan për Irakun, Pol Bremer.

Ndërkohë në Uashington, shefi i CIA-s bëri të ditur se kaseta e transmentuar nga televzioni arab Al Xhazira ka shumë mundësi të jetë inçizim i vërtetë i presidentit të rrëzuar Sadam Husein.