OPINIONE

PRESIDENTI I KOSOVËS DR.IBRAHIM RUGOVA NDEROHET ME ÇMIME KOMBËTARE DHE NDËRKOMBËTARE

DR. IBRAHIM RUGOVA PO E ÇON KOSOVËN DREJT INTEGRIMEVE EUROATLANTIKE

I tërë aktiviteti politik e diplomatik kombëtar dhe ndërkombëtar i dr.Rugovës dhe kabinetit të tij presidencial u përqëndrua dhe po përqëndrohet në senzibilizimin e domosdoshmërisë së njohjes edhe formale të Pavarësisë së Kosovës, gjë që e argumentojnë takimet e tij gjatë periudhës së paraluftës dhe tani të pasluftës me personalitetet më me ndikim në diplomacinë ndërkombëtare, ndërsa falë kontributit të tij, ne shqiptarët sot krenohemi të kemi miq të tillë sikurse SHBA-në, Britaninë e Madhe, Gjermaninë etj. 7 korrik 2003 / Shkruan: Besim KRASNIQI

Këto ditë "Qendra Shqiptare e Studimeve Amerikane e Britanike" me seli në Tiranë ka nderuar Presidentin e Kosovës Ibrahim Rugova me Çmimin "Konica", Çmim ky i cili i është dhënë Presidentit Rugova për "kontribute të veçanta në marrëdhëniet me SHBA-të dhe Britaninë e Madhe", ndërsa Dega e LDK-së në Suedi propozoi që Presidenti i Kosovës dr.Ibrahim Rugova të emërohet për Çmimin Nobel të Paqes. Janë këto Çmime në vazhdimësinë e Çmimeve tjera kombëtare dhe ndërkombëtare (më 1995, Dr. Rugovës iu dha Çmimi për paqe i Fondacionit Paul Litzer në Danimarkë; më 1996, Ibrahim Rugova u shpall Doktor Nderi (Honoris Causa) i Universitetit të Parisit VIII Sorbonë, Francë; më 1998, Rugova iu nda Çmimi Saharov i Parlamentit Evropian; në vitin 1999, Rugova mori Çmimin për paqe të qytetit Mynster (Münster), Gjermani, ndërsa u shpall qytetar nderi i qyteteve italiane: Venedikut, Milanos dhe Breshias (Brecscia); në vitin 2000, Dr. Rugova mori Çmimin për paqe të Unionit Demokratik të Katalonisë "Manuel Carrasco i Formiguera", në Barcelonë, Spanjë.) të cilat tregojnë qartë mbi meritat e personalitetit më të shquar shqiptar dr.Ibrahim Rugova, i cili i priu dhe po i prinë me sukses popullit shqiptar të Kosovës drejt demokracisë, lirisë, mëvetësisë së shqiptarëve dhe drejt integrimit euroatlantik të shtetit të Kosovës.

Padyshim se nderimi i dr.Rugovës me Çmime të cilat i meritojnë njerëzit më meritorë të një shoqërie janë njëkohësisht edhe nderim për mbarë popullit shqiptar të Kosovës dhe trojeve tjera etnike, si dhe për të gjithë qytetarët e Kosovës që veprimtarinë e tyre politike dhe liridashëse e mbështetën tek filosofia largpamëse politike e dr.Rugovës, i cili që nga fillimi i karrierës së tij politike predikoi dhe i dha përparësi respektimit dhe realizimit të vullnetit politik të popullit të Kosovës, mesazhin e të cilit e kanë kuptuar me kohë shumica e aktivistëve të së djathtës shqiptare në Kosovë dhe diasporë. I tërë aktiviteti politik e diplomatik kombëtar dhe ndërkombëtar i dr.Rugovës dhe kabinetit të tij presidencial u përqëndrua dhe po përqëndrohet në senzibilizimin e domosdoshmërisë së njohjes edhe formale të Pavarësisë së Kosovës, gjë që e argumentojnë takimet e tij gjatë periudhës së paraluftës dhe tani të pasluftës me personalitetet më me ndikim në diplomacinë ndërkombëtare, ndërsa falë kontributit të tij, ne shqiptarët sot krenohemi të kemi miq të tillë sikurse SHBA-në, Britaninë e Madhe, Gjermaninë etj.

Çdo ditë e më tepër jemi dëshmitarë të faktit se bashkësia ndërkombëtare po gjen mirëkuptim për statusin e ardhshëm të Kosovës, që nënkupton se nuk do të shkojë shumë larg kur populli shqiptar i Kosovës do t'i gëzojë frytet e një politike largpamëse të dr.Rugovës, e cila ishte mjaft e vështirë dhe me shumë sakrifica. Nuk do mend se një personalitet i tillë, i suksesshëm në politikën shumëvjeçare kundrejt politikës së egër serbosllaviste siç është dr.Ibrahim Rugova, ka edhe kundërshtarët e tij politik brenda taborrit shqiptar. Këta kundërshtarët të pakët politik nuk kanë lënë raste dhe momente pa provuar për t'a zhvlerësuar dhe denigruar skajshmërisht figurën e dr.Rugovës, pa zgjedhur fjalë nga kuadri i i fjalëve banale, nënçmuese dhe patologjike kundër tij. Megjithatë, dr.Rugova asnjëherë nuk u mor me kundërshtarët e tij politik, sepse para vetes kishte dhe ka detyra më të mëdha se sa të merrej me propagandën antishqiptare, propagandë kjo e ndihmuar padyshim nga propaganda serbo-rusofile e Tiranës zyrtare nanoiste.

Dr.Ibrahim Rugova me veprën e tij politike, si udhëheqës shpirtëror dhe ideor i shqiptarëve të Kosovës, është duke u pranuar edhe nga bashkësia ndërkombëtare në vetë analet e rradhës së figurave më të shquara të kombit shqiptar që i njeh mbarë opinioni botëror sikurse janë Gjergj Kastrioti- Skanderbeu, Nënë Tereza, Aleksandër Moisiu etj., të cilët me emrat dhe veprat e tyre si shqiptarë i shërbyen në forma të ndryshme qytetërimit botëror.

Prandaj, edhe rrespektimi që rrjedh nga shqiptarët ndaj figurës kombëtare të dr.Ibrahim Rugovës është në përputhje të plotë me kontributin e deritanishëm intelektual e kombëtar të Presidentit të Kosovës, andaj edhe mendojmë se çmimet e lartëpërmendura sikurse edhe propozimi për emërimin e dr.Rugovës për Çmimin Nobel të Paqes janë mirënjohje e veçantë e bashkësisë ndërkombëtare ndaj popullit shqiptar, i cili popull edhe përkundër vuajtjeve të mëdha nën thundrën serbosllave, i tregoi botës e demokratike se shqiptarët dhe Kosova e meritojnë të jenë në kuadrin e familjeve të civilizuara të Europës dhe në kuadrin e organizimeve në nivel euroatlantik. Deri ku do ta shpie dr.Rugova shtetin e Kosovës, tregon qartë edhe një deklaratë e tij, kur shprehet: "Me Amerikën ne jemi të vegjël, por miq të mëdhenj që mund të bëjmë edhe punë të mëdha".

Copyright©2000-2003 Trepca.net - Të gjitha të  drejtat e rezervuara.