Lajme

E hëne 7 korrik 2003

Përmbajtja:

• Presidenti Rugova vlerësoi se Shtajner ka avancuar progresin e Kosovës në të gjitha fushat

• Presidenti Rugova priti Zëvendësministrin e Punëve të Jashtme të Kinës

• Shtajner e Malaj nënshkruan marëveshjen për tregti të lirë ndërmjet Kosovës dhe Shqipërisë

• U zgjodh Kryesia e re e Forumit të Rinisë së LDK-së

• Shtajner nënshkroi kodin penal dhe atë të procedurës penale

• Shtajner thotë se përgjegjësinë më të madhe për gjendjen në Kosovë e mbajnë qendrat kryesore evropiane

• Përfaqësuesit e dy OJQ nga Kosova monitorojnë në Beograd një proces gjyqësor për krime lufte

• Drejtoresha e Fondit për të Drejtën Humanitare në Beograd thotë se Kosova tash katër vjet është e pavarur

• Një delegacion nga Kosova mori pjesë në Konferencën ndërkombëtare njerëzve me aftësi të kufizuara në Boston

• Në pjesën veriore të Mitrovicës ka ndodhur në incident i armatosur

• Në Prishtinë sot nënshkruhet Marrëveshja për tregti të lirë mes Shqipërisë dhe Kosovës

• Presidenti maqedonas ka kërkuar nga BE zgjatjen e misionit paqeruajtës në Maqedoni

• Dilaver Bojku i është ekstraduar Shkupit

• Në një aksident trafiku në Egjipt 10 veta kanë humbur jetën

• Janë gjetur trupat e pa jetë të 6 notuesve të zhdukur nga stuhia në ujërat e Liqenit të Miçigenit

• Forcat e sigurimit palestinez kanë arrestuar një grua që planifikonte një sulm vetëvrasës në Izrael

• Në sulmet më të reja vriten tre ushtarë ameriknë në Bagdad

• Trupat amerikane kanë vrarë dy civilë itrakianë gjatë përleshjeve me guerilët irakianë në Ramadi

• Korsikë: jo referendumit për autonomi

• Kabineti izraelit voton për lirimin e qindra palestinezëve

• Vritet një gazetar britanik dhe 7 rekrutë irakainë

Presidenti Rugova vlerësoi se Shtajner ka avancuar progresin e Kosovës në të gjitha fushat

 

Prishtinë, 7 korrik 2003 - Presidenti i Kosovës Ibrahim Rugova priti sot në një takim lamtumirës kryeadministratorin e Kosovës Mihael Shtajner, i cili për një vit e gjysmë ka qenë edhe Përfaqësues Special i Sekretarit të Përgjithshëm të OKB-së në Kosovë.   Presidenti Rugova vlerësoi pas takimit se zoti Shtajner ka avancuar progresin e Kosovës në të gjitha fushat e jetës dhe njëherit e falënderoi për punën që ka bërë dhe për gjithë atë që është angazhuar.

 

- Presim që edhe në të ardhmen zoti Shjtajner nga detyra që do ta marrë ta ndihmojë Kosovën si dhe vendi i tij Gjermania - tha zoti Rugova, duke shtuar se "perspektiva e Kosovës është një vend i pavarur, i integruar në NATO e në Bashimin Evropian dhe në miqësi të përhershme me SHBA-të". Tashmë kanë filluar disa procese me BE gjatë mandatit të zotit Shatjner, theksoi zoti Rugova.

Presidenti Rugova bëri të ditur se së shpejti do ta ftojë zotin Shtajner për t'ia dorëzuar një medalje të meritave për shërbim civil në Kosovë dhe do të jetë ky një rast i veçantë për këtë ceromoni. Presidenti Rugova zotit Shtajner i uroi gjitha të mirat dhe suksese në punën të ardhshme dhe në karrierën diplomatike.

 

Shtajner psi falenderoi Presidentin Rugova, tha se po të shikohet progresi puna dhe progresi që është arritur gjatë një vit e gjysmë në Kosovë atëherë mund thuhet se rezultatet janë evidente.   Gjithashtu Shtajner falenderoi institucionet e Kosovës për bashkëpuinim të suksesshëm me të, bashkëpunim ky i cili ka bërë që Kosova sot të jetë ndryshe nga siç ishte më parë, theksoi Shtajner.

 

Ai tha se qytetarët duhet të besojnë se Kosova ka një të ardhme të ndritshme, e kjo është që Kosova të jetë në Bashkimin Evropian, theksoi Mihael Shtajner, i cili i jep fund sot detyrës së tij në Kosovë.

 

 

Presidenti Rugova priti Zëvendësministrin e Punëve të Jashtme të Kinës

 

Prishtinë, 7 korrik 2003 - Presidenti i Kosovës Ibrahim Rugova priti zëvendësministrin e Punëve të Jashtme të Kinës Liu Gushang, i cili në krye të një delegacioni të jashtëm kinez po viziton sot Kosovën. Në bisedë me delegacionin kinez, Presidenti Rugova foli për progresin e arritur në Kosovë gjatë katër viteve të fundit në liri, për objektivat e qeverisë në zhvillimin ekonomik, si dhe për procesin e privatizimit dhe investimet e huaja.   Poashtu ai i njoftoi mysafirët me sigurinë gjithnjë e më të mirë, rreth integrimit të grupeve etnike në shoqërinë kosovare dhe barazinë e tyre në Kosovë.

  

Në këtë takim gjithashtu u bisedua për bashkëpunimin ndërmjet Kosovës dhe Kinës në fushën ekonomike e diplomatike. Presidenti Rugova kërkoi ndihmën e Kinës si anëtare e përhershme e Këshillit të Sigurimit të OKB-së dhe me këtë rast falenderoi Kinën për ndihmën që ka dhënë në nivel të OKB-së për çështjen e Kosovës.

Duke folur për perspektivën e Kosovës, Presidenti Rugova theksoi se një Kosovë e pavarur, demokratike e paqësore për të gjithë qytetarët e saj, të integruar në Evropë, në NATO dhe me marrëdhënie të mira me vendet fqinje do të qetësonte rajonin, duke u angazhuar njëherit për marrëdhënie të mira ekonomike me Kinën. Kjo është vizita e parë e një delegacioni të lartë kinez në Kosovë.

Zv.ministri kinez tha pas takimit tha se ka pasur një bisedë shumë të mirë me Presidentin e Kosovës. Ai shtoi se Kina zë një vend të rëndësishëm në Këshillin e Sigurimit të Organizatës së Kombeve të Bashkuara. Diplomati kinez tha se Kina e mbështet Rezolutën 1244, e cila mbron interesat e të gjitha grupeve etnike në rajon, dhe e njeh sovranitetin e Serbisë e Malit të Zi në Kosovë.

 

"Ne shpresojmë se Serbia dhe Kosova do ta respektojnë këtë Rezolutë dhe do të fillojnë bisedimet për bashkëpunim midis tyre. Kina do të mbështesë çdo nismë të tillë dhe do të respektojë çdo marrëveshje midis Kosovës e Serbisë", tha Zv.ministri kinez, duke shtuar se ka bindjen se situata e përgjithshme në Kosovë është përmirësuar, gjendja e sigurisë është më e mirë dhe marrëdhëniet midis grupeve etnike janë përmirësuar dukshëm.

 

Janë ndërmarrë edhe hapat e parë për kthimin e refugjatëve dhe të personave të zhvendosur në shtëpitë dhe në pronat e tyre në Kosovë, theksoi në fund Liu Gushang.

Por Presidenti Rugova ndërhyri duke thënë se Rezoluta 1244 e lë të hapur statusin përfundimtar të Kosovës, pra edhe çështjen e pavarësisë.

 

 

Shtajner e Malaj nënshkruan marëveshjen për tregti të lirë ndërmjet Kosovës dhe Shqipërisë

 

Prishtinë, 7 korrik 2003 2003 - Ndërmjet Kosovës dhe Shqipërisë sot në Prishtinë u nënshkrua një marrëveshje për tregti të lirë. Në emër të Shqipërisë marrëveshjen e nënshkroi ministri shqiptar i Tregtisë Arben Mala, ndërkaq në emër të Kosovës shefi i UNMIK-ut Mihael Shtajner dhe ministri i Tregtisë dhe Industrisë së Kosovës Ali Jakupi.

 

Kjo marrëveshje u mundëson të dyja vendeve të bëjnë shkëmbimin tegtar pa paguar doganë.

Pas aktit të nënshkrimit, Shtajner këtë marrëveshje e vlerësoi shumë të rëndësishme për Kosovën dhe njëherit ai shpreson që marrëveshje të tilla të nënshkruhen edhe me vendet e tjera.

 

Kjo është marrëveshja e parë me Shqipëriën, tha Shatjner, ndërkaq janë duke u zhvilluar bisedimet edhe me Bosnjën e Hercegovinën dhe kjo ka për qëllim që Kosova të përfshihet në tërë rrjetin e Paktit të Stabilitetit me të gjitha vendet e rajonit.

 

Nga ana e tij, ministri shqiptar Arben Malaj tha se kjo marrëveshje ndërmjet Kosovës dhe Shqipërisë është pjesë e nismës së vendeve të rajonit për një zhvillim më të shpejtë me të gjitha vendet e rajonit.

 

"Thelbi i këtyre politikave është një zhvillim më i shpejtë, më i qëndrueshëm i vendeve tona dhe i rajonit.

 

Ne jemi të bindur se rezultatet përfundimtare të këtyre poltitikave ekonomike do të jenë në favor të konsumatorëve, të zhvillimit ekonmik, i cili do të krijojë premisa më të mira edhe për zhvillimet e ardhshme në rajon", theksoi z. Malaj.

Edhe ministri kosovar Ali Jakupi shprehu kënaqësinë për nënshkrimin e kësaj marrëveshjeje, duke e cilsuar atë si historike për Kosovën. Ai shtoi se edhe Kosova do të jetë një entitet i cili do t'i ketë të gjithë mundësitë e bashkëpunimit me vendet e rajonit.

Ndryshe kjo marrëveshje për tregti të lirë liron nga taksat doganore 98 për qind të mallave industriale ndërmjet dy vendeve dhe 50 për qind të prodhimeve bujqësore.

 

 

U zgjodh Kryesia e re e Forumit të Rinisë së LDK-së

 

Prishtinë, 7 korrik 2003 - Këshilli i Përgjithshëm i Forumit të Rinisë së LDK-së në një mbledhje të mbajtur të shtunën, ka zgjedhur kryesinë e saj të re.

 

Në përbërjen e re të Kryesisë së FR të LDK-së janë zgjedhur tre nënkryetarë: Sejdë Tolaj, Anita Morina dhe Fadil Hoti, sekretar i përgjithshëm Avni Gashi. Anëtarë të Kryesisë së re janë: Arian Krasniqi, Arben Mehmeti, Nderim Gashi, Ilir Fetahu, Galdim Krasniqi, Florian Dushi, Malësore Gashi, Salih Morina, Demush Bajraktari dhe Arben Geci.

Ndërkaq kryetar i FR të LDK-së, siç dihet, është rizgjedhur Lulzim Zeneli në Kuvendin V të FR, të mbajtur para njëzet ditësh.

 

 

Shtajner nënshkroi kodin penal dhe atë të procedurës penale

 

Prishtinë, 7 korrik 2003 - Shefi i Misionit të OKB-së në Kosovë Mihael Shtajner ka nënshkruar dje rregulloret e kodit penal dhe atë të procedurës penale, duke vlerësuar këtë si një ngjarje shumë të rëndësishme për të ardhmen e Kosovës.

Në hartimin e tyre kanë marrë pjesë rreth 40 ekspertë nga Misioni i OKB-së, Këshilli i Evropës, OSBE, UNICEF-i, avokatë amerikanë dhe dy ekspertë të Kosovës. Miratimi i këtij kodi do t'i japë fund zbatimit të ligjeve të vjetra jugosllave në Kosovë.

Kryeadministratori Shtajner thotë se në kodet e reja janë përfshirë parimet moderne të së drejtës ndërkombëtare si dhe ligji për të drejtat e njeriut.

 

Në hartimin e këtyre kodeve janë përfshirë edhe veprat e përcaktuara me konventat ndërkombëtare, përfshirë këtu edhe statusin e Gjykatës Ndërkombëtare, Konventën kundër torturës dhe konventat ndërkombëtare rajonale lidhur me terrorizmin, krimin e organizuar dhe korrupsionin.

Ndryshimet më të mëdha janë bërë në përfshirjen e veprave penale të përcaktuara sipas rregulloreve të UNMIK-ut, siç janë ato mbi terrorizmin dhe trafikimin e qenieve njerëzore.

Kosova tashmë ka dy kode të kësaj natyre më të përparuara në rajon thotë Shtajner, ndërkohë që u shpreh shumë i kënaqur me nënshkrimin e tyre pak para largimit nga Kosova.

 

 

Shtajner thotë se përgjegjësinë më të madhe për gjendjen në Kosovë e mbajnë qendrat kryesore evropiane

 

Prishtinë, 7 korrik 2003 - Kryeadministratori i Kosovës Mihael Shtajner ka kërkuar nga bashkësia ndërkombëtare që ta rishikojë detyrimin e saj në prag të fillimit të negociatave për statusin e ardhshëm të Kosovës.

 

Shtajner u shpreh kështu në një konferencë me gazetarë në Prishtinë, duke nënvizuar se përgjegjësinë më të madhe për gjendjen në Kosovë e mbajnë qendrat kryesore evropiane.

Shtajner ka theksuar se vendet kryesore të botës duhet t'i japin përparësi zgjidhjes së statusit, duke nënvizuar se kjo çështje nuk mund të shtyhet pafund.

 

Sipas tij, sivjet nuk janë pjekur kushtet, por për pesë vite do të jetë tepër e vonuar, ka thënë Shtajner, duke shtuar se ajo që nevojitet është inkuadrimi politik dhe përkushtimi i kryeqendrave evropiane dhe i Uashingtonit.

 

 

Përfaqësuesit e dy OJQ nga Kosova monitorojnë në Beograd një proces gjyqësor për krime lufte

 

Prishtinë, 7 korrik 2003 - Vazhdimin e procesit gjyqësor, më 9 korrik në Beograd, kundër Sasha Cvijetanit, ish-pjesëtar i njësive speciale të policisë serbe, i akuzuar për vrasjen e 19 civilëve shqiptarë në Besianë (Podujevë) gjatë luftës në Kosovë, do ta përcjellin edhe përfaqësuesit e dy OJQ nga Kosova.

 

Konkretisht, këtë proces gjyqësor do ta monitorojnë Behxhet Shala, drejtor ekzekutiv i Këshillit për Mbrojtjen e të Drejtave e të Lirive të Njeriut (KMDLNJ-së), Gazmend Pula, drejtor ekzekutiv i Komitetit Kosovar të Helsinkut (KKH-së) dhe Driton Bilalli nga KMDLNJ.

KMDLNJ deri më tani ka monitoruar disa procese gjyqësore në Kosovë kundër të akuzuarve për gjenocid, krime lufte dhe krime kundër njerëzimit, si dhe disa procese gjyqësore ndaj të akuzuarve për vepra penale pas lufte.

 

 

Drejtoresha e Fondit për të Drejtën Humanitare në Beograd thotë se Kosova tash katër vjet është e pavarur

 

Novi Sad, 7 korrik 2003 - Drejtoresha e Fondit për të Drejtën Humanitare me seli në Beograd Natasha Kandiq, vlerëson se Kosova do të jetë e pavarur nga Serbia, duke shtuar se kjo është fakt, sepse ka katër vjet pas luftës që ajo funksionon plotësisht e pavarur.

Në një intervistë për gazetën "Dnevnik" të Novi Sadit, Kandiq ka thënë se nuk do të ketë polici, as ushtri dhe as pushtet serb në Kosovë, por do të ketë pjesëmarrje të serbëve në atë pushtet për aq sa popullata serbe në Kosovë do të dëshironte këtë.

 

Tash është e pamundur të paramendohet ndonjë lloj bashkimi me Serbinë, ka thënë Kandiq, duke akuzuar qeverinë e Serbisë për stimulimin e vazhdueshëm të marrëdhënieve armiqësore me shqiptarët.

 

 

Një delegacion nga Kosova mori pjesë në Konferencën ndërkombëtare njerëzve me aftësi të kufizuara në Boston

 

Boston, 7 korrik 2003 - Në Boston i përfundoi punimet Konferenca e 46-të, me radhë e njerëzve me aftësi të kufizuara (Littel People of America). Kjo konferencë për 6 ditë me radhë është shoqëruar me një sërë aktivitetesh të tjera që u mbajt në SHBA nga data 28 qershor e deri më 5 korrik.

Në këtë konferencë mori pjesë edhe një delegacion nga Kosova, i kryesuar nga kryetari i Shoqatës së personave me aftësi të kufizuara nga Kosova Agim Vatovci dhe znj. Hilmnijeta Apuk.

Siç mësohet në këtë konferencë delegacioni nga Kosova prezentoi gjendjen aktuale të njerëzve me aftësi të kufizuara me anë të mini filmave dokumentarë e slajdeve.

 

Në këtë kontekst mund të përmendet dhe fakti se në këtë konferencë u ndanë edhe shumë shpërblime e certifikata delegacioneve të ndryshme, për kontributin e dhënë në ndihmën e ofruar për njerëzit e vegjël, nga oganizata amerikane "Littel People of America".

Delegacioni kosovar është njëri prej të shpërblyerve nga kjo konferencë. Krytari i shoqatës "Handicapped and Disabled of Kosova" Agim Vatovci, në një konferencë shtypi u shpreh se këtë shpërblim ia dedikon vendit të tij Kosovës dhe se shpërblimin do ta ndajë bashkë me anëtarët e tjerë të Shoqatës.

Delegacioni i njerëzve të vegjël nga Kosova, pati shumë takime miqësore me shoqatat e tjera analoge.
Përfaqësuesja e Bankës Botërore, me seli në Washington, zonja Xhudi Tojman i premtoi delegacionit të Kosovës se së shpejti Banka Botërore do të ndihmojë një projekt të ndërtimit të një qendre rehabilitimi të njerëzve të vegjël në Kosovë, njofton bashkëpunëtori ynë nga Amerika.

 

 

Në pjesën veriore të Mitrovicës ka ndodhur në incident i armatosur

 

Mitrovicë, 7 korrik 2003 - Në pjesën veriore të Mitrovicës dje pasdite ka ndodhur në incident i armatosur. Zëdhënësja e policisë së UNMIK-ut Trejsi Beker tha se incidenti ndodhi kur policët kishin intervenuar për të penguar disa aktivitete kriminale të një grupi. Gjatë shkëmbimit të zjarrit nuk ka pasur të lënduar, ndërkaq dy shqiptarë janë arrestuar nga policia e UNMIK-ut.

 

 

Në Prishtinë sot nënshkruhet Marrëveshja për tregti të lirë mes Shqipërisë dhe Kosovës

 

Prishtinë, 7 korrik 2003 - Në Prishtinë sot do të nënshkruhet Marrëveshja për tregti të lirë mes Shqipërisë dhe Kosovës. Në emër të Tiranës zyrtare këtë marrëveshje do ta nënshkruajë ministri i Ekonomisë Arben Malaj, ndërkaq në emër të Kosovës kryeadministratori Mihael Shtajner dhe ministri i Tregtisë dhe Industrisë Ali Jakupi.

 

 

Presidenti maqedonas ka kërkuar nga BE zgjatjen e misionit paqeruajtës në Maqedoni

 

Shkup, 7 korrik 2003 - Presidenti maqedonas Boris Trajkovski ka kërkuar nga BE që ta zgjasë msionin e tij paqeruajtës në Maqedoni.

 

Në një letër dërguar shefit të Politikës së Jashtme dhe Sigurisë së Bashkimit Evropian Havier Solana, Trajkovski shkruan se gjendja e sigurisë është përmirësuar dukshëm që nga përfundimi i konfliktit më 2001, por prania ndërkombëtare është edhe mëtej e nevojshme.

 

Ai propozon që misioni të zgjatet deri në mes të tetorit për t'u pasuar nga një mision tjetër.

Qeveria maqedonase, ndërkaq ka kërkuar më herët që misioni paqeruajtës të vazhdojë deri më 31 dhjetor të këtij viti.

 

 

Dilaver Bojku i është ekstraduar Shkupit

 

Podgoricë, 7 korrik 2003 - Dilaver Bojku, i njohur me nofkën "Leku", është ekstraduar dje nga Mali i Zi në Shkup, me kërkesën e autoriteteve maqedonase. Ai ishte person shumë i kërkuar për prostitucion dhe trafikim të qenieve njerëzore dhe të premtën është arrestuar në në Mal të Zi. Kundër Bojkut, 13 shtete të botës kishin ngritur fletarrest ndaj tij.

 

 

Në një aksident trafiku në Egjipt 10 veta kanë humbur jetën

 

Kairo, 7 korrik 2003 - Të paktën 10 veta kanë humbur jetën e 6 të tjerë janë lënduar të dielën kur një tren është përplasur me një kamion në një vendkalim hekurudhor, 30 km në jug të Aleksandrisë në Mesdhe. Me atë rast në vend kanë vdekur shoferi i kamionit dhe nëntë pasagjerë, ka konfirmuar policia. Aksidenti ka ndodhur në vendin e quajtur Abu el-Matamer.

 

 

Janë gjetur trupat e pa jetë të 6 notuesve të zhdukur nga stuhia në ujërat e Liqenit të Miçigenit

 

Miçigen, SHBA, 7 korrik 2003 – Trupat e pajetë të gjashtë notuesve, të cilët janë mbytur në ujërat e trazuara nga shtrengata përgjatë plazheve prej tri milash të Liqenit të Miçigenit, janë gjetur, ndërsa notuesi i shtatë ende mbetet i zhdukur, njofton AP.

 

Notuesit ishin zhdukur gjatë stuhisë triorëshe, që kishte përfshirë të premten rajonin e Liqenit të Miçigenit dhe roja bregdetare s'kishte mundur t'u ndihmonte për shkak të stuhisë së madhe.

 

 

Forcat e sigurimit palestinez kanë arrestuar një grua që planifikonte një sulm vetëvrasës në Izrael

 

Gaza, 7 korrik 2003 – Forcat e sigurimit palestinez kanë njoftuar sot (e hënë) se kanë arrestuar në Rripin e Gazës një grua, e cila planifikonte të kryente një sulm vetëvrasës me bombë në Izrael, sulm ky që do të prishte armëpushimin e mbështetur të paqes në Lindjen e Mesme, njofton Rojter.

 

Zëdhënësi i policisë ka thënë se gruaja 18-vjeçare është arrestuar afër zonës, të cilën e përdorin palestinezët për të hyrë në shtetin hebraik. Policia kishte filluar kërkimin e saj pasi ajo ia kishte lënë familjes një letër se shkonte të kryente një aksion vetëvrasës në Izrael.

 

 

Në sulmet më të reja vriten tre ushtarë ameriknë në Bagdad

 

Bagdad, 7 korrik 2003 – Dy ushtarë amerikanë janë vrarë sot (e hënë) në dy sulme të veçanta në autokolonat e tyre në kryeqytetin irakian, ndërsa ushtari i tretë amerikan është vrarë derisa po priste të blente një pije freskuese në Universitetin e Bagdadit, njofton AP. Po kështu, njoftohet se katër ushtarë amerikanë janë plagosur pas sulmeve me granata raketore në autokolonat e tyre në qytetin e pashtruar Ramadi, 60 mila në veri të Bagdadit.

 

 

Trupat amerikane kanë vrarë dy civilë itrakianë gjatë përleshjeve me guerilët irakianë në Ramadi

 

Ramadi, 7 korrik 2003 – Trupat amerikane kanë vrarë sot (e hënë) dy civilë irakianë gjatë përleshjeve me guerilët irakianë në qytetin Ramadi, në përendim të Bagdadit, kanë deklaruar dëshmitarët, njofton Rojter. Dëshmitarët kanë thënë se trupat amerikane kanë hapur zjarr gjatë natës në automjetin, që barte dy civilë, pasi një autokolonë amerikane ishte sulmuar në pritë nga guerilët.

 

 

Korsikë: jo referendumit për autonomi

 

Paris, 7 korrik 2003 - Rezultatet e para të referendumit në Korsikë, ishull ky francez në Mesdhe, flasin se me një shumicë të vogël populli i atjeshëm ka hedhur poshtë propozimin e Qeverisë në Paris për më shumë autonomi. Ministri francez i Punëve të Brendshme, Nikola Sarkozi, njoftoi se rreth 51 për qind e votuesve në referendum u deklarua kundër masave të propozuara.

Propozimet përfshinin edhe formimin e asamblesë së re si dhe të drejtën e rritjes së taksave.

 

 

Kabineti izraelit voton për lirimin e qindra palestinezëve

 

Tel Aviv, 7 korrik 2003 - Kabineti izraelit votoi në favor të lirimit të një numri të burgosurish palestinezë. Anëtarët e kabinetit fillimisht nuk po bienin dakord mbi propozimin, por e miratuan atë pasi njëri prej ministrave paralajmëroi se dështimi për ta bërë një gjë të tillë do të shkaktonte dështimin e planit ndërkombëtar të paqes për Lindjen e Mesme.

Kabineti ra dakord për krijimin e një komisioni, i cili do të përcaktojë hollësitë e lirimit të të burgosurve.

 

 

Vritet një gazetar britanik dhe 7 rekrutë irakainë

 

Bagdad, 7 korrik 2003 - Në kryeqytetin e Irakut është vrarë një gazetar britanik. Sipas të dhënave të ushtrisë amerikane reporteri është qëlluar përpara godinës së muzeut kombëtar. Ndërsa gjatë një sulmi me bombë në qytetin Ramadi gjetën vdekjen shtatë rekrutë irakianë të policisë dhe mbi 40 të tjerë u plagosën. Qyteti Ramadi konsiderohet si një nga epiqendrat e regjimit të rëzuar të Sadam Huseinit.

Copyright©2000-2003 Trepca.net - Të gjitha të  drejtat e rezervuara.