Lajme

E shtune 5 korrik 2003

Përmbajtja:

• Në Zyrën amerikane në Prishtinë mbrëmë me një solemnitet rasti u shënua Dita e pavarësisë së SHBA-ve

• Presidenti Rugova: 4 Korrikun e përjetojmë edhe si festë tonën nacionale

• Rreth 2500 paqeruajtës amerikanë në Bondstill kremtuan mbrëmë Ditën e Pavarësisë së SHBA-ve

• Sali Berisha thotë se nisma për kthimin e të zhvendosurve është një hap drejt pavarësisë së Kosovës

• Në Ulqin është arrestuar Dilaver Bojku, i njohur si "makro i Ballkanit"

• Autoritetet serbe kanë dëbuar nga Beogradi drejtorin e Grupit Ndërkombëtar të Krizës për Serbinë

• Sipas Çoviqit, dialogu mes Beogradit dhe Prishtinës mund të fillojë pas emërimit të shefit të UNMIK-ut

• Shqipëria ka miratuar strategjinë 10-vjeçare për turizmin

• Nga një shpërthim në Rripin e Gazës është vrarë një palestinez dhe janë plagosur edhe dy të tjerë

• Në Afganistan janë plagosur tre paqeruajtës holandezë

• Numri i të vrarëve në shpërthimin e djeshëm në xhaminë shite në Kueta, është ngritur në 48 sish

• Bush tha se SHBA-të janë në luftë me terrorizmin

• Trupat amerikane kanë vrarë dje 11 sulmues irakianë

• Ekspertët analizojnë një kasetë që thuhet se është zëri i Sadam Huseinit

• Trupat amerikane kanë ndaluar mbi 11 pjesëtarë të forcave speciale turke në veri të Irakut

• Të pakten 4 veta janë vrarë në një shpërthim në Irakun Verior

Në Zyrën amerikane në Prishtinë mbrëmë me një solemnitet rasti u shënua Dita e pavarësisë së SHBA-ve

 

Rino Harnish

Prishtinë, 5 korrik 2003 - Në Kosovë me manifestime të shumta u shënua 4 Korriku - Dita e pavarësisë së Shteteve të Bashkuara të Amerikës. Manifestimi qendror për këtë datë të rëndësishme të historisë së SHBA-ve u mbajt në Zyrën amerikane.   Në solemnitet morën pjesë edhe shumë përfaqësues të lartë të jetës politike, shtetërore e kulturore të Kosovës, si dhe diplomatë ndërkombëtarë që veprojnë në Kosovë dhe miq të shumtë të SHBA-ve. Shefi i Zyrës amerikane në Prishtinë Rino Harnish, duke folur për këtë datë historike të popullit amerikan, në mesazhin e tij drejtuar liderëve dhe qytetarëve të Kosovës, tha se ata mund të nxjerrin mësime të rëndësishme nga përvojat e themeluesve të shtetit amerikan për bashkëpunimin, tolerancën dhe zhvillimin ekonomik.   Ai shtoi se ardhmëria e Kosovës nuk është përcaktuar ende dhe mbeten shumë çështje të rëndësishme për ardhmërinë demokratike të Kosovës.

 

Harnish ka theksuar se mësimi për Kosovën sot është i qartë: "veproni shpejt dhe veproni në bazë të diturive të mbledhura për ekonominë e Kosovës", tha Harnish dhe theksoi:

"Së pari biznesi dhe qeveria duhet të konsultojnë njëra tjetrën në formulimin e politikave që do të përshpejtojnë zhvillimin ekonomik. Së dyti Banka Botërore dhe Fondi Monetar Ndërkombëtar rekomanduan të zhvillohet një strategji e fokusuar ekonomike.

 

A është kabineti qeveritar duke konsideruar një qasje të harmonizuar për problemet e Kosovës. Së treti privatizimi agresiv i ndërmarrjeve shoqërore dhe shtetërore duhet të ishte prioriteti më i lartë për ju. Ju keni forca dhe autoritete ta bëni këtë me disa kufizime. Nuk duhet humbur më kohë nëse dëshironi të zbuloni potencialet tuaja ekonomike", tha Harnish.

Përfundimisht biznismenët kosovarë, tha ai ai në vazhdim, si ata në Kosovë, ashtu edhe ata në diasporë duhet të investojnë në Kosovë. Duhet treguar komunitetit botëror të biznesit se Kosova është një investim i mirë dhe do të mund të tërhiqen investime edhe para se të përcaktohet statusi përfundimtar i Kosovës, theksoi Harnish.

Shefi i Zyrës amerikane në Prishtinë në mesazhin e tij tha se mësimi i drejtë nga themeltarët e shtetit amerikan për Kosovën është ndërtimi i besimit midis të gjitha komuniteteve dhe kthimi i të zhvendosurve.

Me këtë rast ai përshëndeti letrën e përbashkët të presidentit të Kosovës, kryetarit të Kuvendit, kryeministrit dhe të liderëve politikë drejtuar të zhvendosurve kosovarë që jetojnë jashtë Kosovës. Liderët politikë, tha Harnish, e nënshkruan këtë letër me guxim, duke e bërë këtë me nismën e tyre vetjake, sepse ata e dinin se është një gjë që duhet ta bëjnë.

 

"Baballarët themeltarë të Amerikës do të ishin shumë krenarë dhe unë nuk dyshoj se ata do t'ju përgëzonin për mësimin tuaj nga gabimet e tyre", tha z. Harnish, duke shtuar se kthimi i të zhvendosurve dhe integrimi i tyre në shoqërinë e Kosovës nuk është vetëm përgjegjësi e shumicës.

 

Ai mbështeti fillimin e bisedimeve për çështje praktike midis Prishtinës dhe Beogradit. Sipas tij ka ardhur koha për bisedime serioze në lidhje me çështjet konkrete dhe çështjet teknike që ndikojnë në përditëshmërinë e qytetarëve anembanë Kosovës.

 

"Kjo është një çështje shumë e ndërlikuar politike, por zgjidhjet që bëni ju tash do të vështirësohen edhe më shumë nëse i leni për më vonë", theksoi Harnish dhe rikonfirmoi edhe mbështetjen e Qeverisë amerikane për përmbushjen e standardeve para statusit.

Gjithashtu në këtë solemnitet u shfaq një program muzikor kushtuar 4 Korrikut - Ditës së Pavarësisë së SHBA-ve.

Ndërkaq, në qendër të Prishtinës yjtë e estradës së Kososvës mbajtën një koncert madhështor, me pjesëmarrjen e mijëra të rinjve të Prishtinës dhe Kosovës.

 

 

Presidenti Rugova: 4 Korrikun e përjetojmë edhe si festë tonën nacionale

 

Prishtinë, 5 korrik 2003 - Në përfundim të solemnitetit kushtuar 4 Korrikut - Ditës së Pavarësisë së SHBA-ve, presidenti i Kosovës Ibrahim Rugova, i cili mori pjesë në këtë kremte tha: "4 Korrikun, e përjetojmë edhe si festë tonë nacionale, sepse është dita e pavarësisë së një vendi të madh, të një vendi mik që populli i Kosovës e çmon.

 

Ka dashuri, respekt dhe një miqësi permanente me Shtetet e Bashkuara të Amerikës. Pra ky është një gëzim", duke uruar edhe njëherë presidentin Bush dhe popullin amerikan, deklaroi për TV21 presidenti i Kosovës Ibrahim Rugova.

 

 

Rreth 2500 paqeruajtës amerikanë në Bondstill kremtuan mbrëmë Ditën e Pavarësisë së SHBA-ve

 

Bondstill, 5 korrik 2003 - Rreth 2500 paqeruajtës nga Shtetet e Bashkuara të Amerikës në kampin Bondstill kremtuan mbrëmë festën më të madhe të atdheut të vet - 4 Korrikin - Ditën e Pavarësisë, në një ambient solemn. Uashtarët dhe oficerët amerikanë thanë se ndiehen krenarë që vendi i tyre i ka dërguar në një vend, sikurse që është Kosova, ku mund të ndihmojnë në ruatjen e paqes dhe stabilitetit.

 

 

Sali Berisha thotë se nisma për kthimin e të zhvendosurve është një hap drejt pavarësisë së Kosovës

 

Tiranë, 5 korrik 2003 - Ish-presidenti i Shqipërisë Sali Berisha e ka përshëndetur nismën e lidershipit politik në Kosovë për kthimin e të zhvendosurve në shtëpitë e tyre. Sipas z.Berisha kjo nismë duhet tash të shoqërohet edhe me një pako masash të cilat duhet të kenë për qëllim pajtimin në shoqërinë e Kosovës.

 

Kjo nismë, sipas kreut të opozitës shqiptare, është në favor të stabilitetit të kërkuar, hap drejt pavarësisë së Kosovës.

 

 

Në Ulqin është arrestuar Dilaver Bojku, i njohur si "makro i Ballkanit"

 

Shkup, 5 korrik 2003 - Policia malazeze ka arrestuar mbrëmë në Ulqin Dilaver Bojkun, i njohur si "makro i Ballkanit", njoftuan sot radiot e huaja duke u mbështetur në burimet e policisë maqedonase. Siç dihet, Bojku kohë më parë është arratisur nga një burg i Strugës, ku po vuante dënimin me burgim për shkak të trafikimit me qenie njerëzore.

Dje Departamenti amerikan i Shtetit ofroi një shpërblim prej 10 mijë dollarësh për kapjen e Bojkut.

 

 

Autoritetet serbe kanë dëbuar nga Beogradi drejtorin e Grupit Ndërkombëtar të Krizës për Serbinë

 

Beograd, 5 korrik 2003 - Autoritetet serbe kanë dëbuar nga Beogradi drejtorin e Grupit Ndërkombëtar të Krizave (ICG) për Serbinë dhe Malin e Zi, Xhejms Lajon. Ai tha se do ta respektojë vendimin e pushtetit të Serbisë dhe deri të dielen do ta braktisë Beogradin, meqë organet kompetente nuk ia kanë vazhduar vizën dhe qëndrimin, dhe i kanë urdhëruar që ta braktisë shtetin.

 

Lajon para gazetarëve ka thënë se policia e Serbisë të enjten ka refuzuar t'ia vazhdojë vizën dhe lejeneqëndrimin. "Kjo do të thotë se jam përndjekur nga Serbia", ka deklaruar Lajon.

Kryetari i ICG-së Garet Evans është i shprehur i shqetësuar me këtë hap të Beogradit, duke kërkuar nga autoritetet serbe të ryshqyrtojnë vendimin. Evert ka paralajmëruar se së shpejti do të publikojë një raport për Serbinë, në të cilin analizohet eliminimi jo i plotë i mbeturinave të regjimit të Millosheviqit nga jeta publike në Serbi.

 

 

Sipas Çoviqit, dialogu mes Beogradit dhe Prishtinës mund të fillojë pas emërimit të shefit të UNMIK-ut

 

Beograd, 5 korrik 2003 - Zëvendëskryeminstri serb Nebojsha Çoviq është shprehur se dialogu mes Beogradit dhe Prishtinës mund të fillojë menjëherë pasi të emërohet shefi i adminstratës ndërkombëtare në Kosovë. Nëse ky emërim bëhet së shpejti atëherë bisedimet mund të fillojnë brenda këtij muaji, citohet të ketë thënë Çoviq.

Ndërkaq, duke komentuar apelin e nënshkruar nga disa udhëheqës të Kosovës për kthimin e të zhvendosurve serbë në Kosovë, Çoviq ka thënë se kjo është një ofertë e "dobët dhe e lirë". Sipas tij disa nga ata që kanë vënë nënshkrimin e kanë bërë këtë vetëm për të krijuar përshtypje pozitive në Uashington dhe Bruksel, ka spekuluar Nebojsha Çoviq.

 

 

Shqipëria ka miratuar strategjinë 10-vjeçare për turizmin

 

Tiranë, 5 korrik 2003 - Shqipëria ka miratuar strategjinë 10-vjeçare që ka për qëllim të shndërrojë sektorin e turizmit në burim kryesor të të ardhurave për vendin, njoftojnë zyrtarët e Tiranës. Stategjia e quajtur ''Shqipëria- sekreti i fundit i Evropës'', është zhvilluar me ndihmën e qeverisë gjermane.

''Me bregdetin e saj dhe vendet pitoreske malore, Shqipëria mund të bëhet element shumë i rëndësishëm në industrinë turistike Mesdhetare'', ka thënë zyrtari i lartë i qeverisë, Artan Lame.

 

 

Nga një shpërthim në Rripin e Gazës është vrarë një palestinez dhe janë plagosur edhe dy të tjerë

 

Gaza, 5 korrik 2003 – Një mjet shpërthyes, i vënë afër pikës së kontrollit të armatës izraelite në Rripin e Gazës, ka shkaktuar sot (e shtunë) vdekjen e të pakten një palestinezi, ndërsa nga ana e izrelitëve s'ka pasur viktima dhe, siç thuhet në njoftim, ky është edhe një grusht kundër amëpushimit vital për planin amerikan të paqes, njofton Rojter.

 

Sigurimi palestinez ka thënë se edhe dy palestinezë të tjerë janë plagosur. Nuk dihet nëse të plagosurit janë vënësit e bombave apo vetëm kalimtarë të rastit. Përgjegjësinë për këtë shpërthim ende s’e ka marrë askush.

 

 

Në Afganistan janë plagosur tre paqeruajtës holandezë

 

Kabul, 5 korrik 2003 – Tre paqeruajtës hoplandezë janë plagosur në Afganistan kur automjeti i tyre është goditur nga një shpërthim derisa po patrullonin në veri të Kabulit, ka bërë të ditur sot (e shtunë) një zëdhënës ushtarak, njofton Rojter. Të tre të plagosurit janë në gjendje stabile, por njëri syresh, që është plagosur më rëndë, do të dërgohet për shërim mjekësor në Evropë.

 

 

Numri i të vrarëve në shpërthimin e djeshëm në xhaminë shite në Kueta, është ngritur në 48 sish

 

Kueta, 5 korrik 2003 – Tre terroristë, ndër të cilët dy bombëhedhës vetëvrasës, kanë kryer, siç kemi njoftuar në edicionin e djeshëm, një sulm në xhaminë muslimane shite në jugperendim të qytetit Kueta, por në njoftimin e sotëm (e shtunë) të qeverisë thuhet se numri i të vrarëve është ngritur në gjithsej 48 sish, njofton Rojter.

 

Dy sulmues e kanë hedhur edhe veten në erë me bombat e mbshtjella për brezi, ndërsa sulmuesi i tretë ka vdekur në spital nga plagët e marra, ka thënë zyrtari i provincës së Beluçistanit, ku ka ndodhur shpërthimi.

 

 

Bush tha se SHBA-të janë në luftë me terrorizmin

 

Uashington, 5 korrik 2003 - Presidenti amerikan Xhorxh Bush, në një fjalim drejtuar kombit amerikan në Ditën e pavarësisë, ka thënë se Shtetet e Bashkuara janë ende në luftë me terrorizmin ndërkombëtar.

 

Megjithëse nuk e përmendi Irakun me emër, ai tha se amerikanët ende po e mbrojnë lirinë dhe do të vazhdojnë të bëjnë një gjë të tillë. Amerikanët, tha Bush, po e paguanin çmimin e vet për çështjen e drejtësisë gjithandej botës.

Duke folur në bazën ajrore Wright-Patterson, Bush ka theksuar se Shtetet e Bashkuara ''do të veprojnë kurdo që të jetë e domosdoshme për të mbrojtur jetët dhe lirinë e popullit amerikan''.

Ndërkaq sekretari amerikan i Mbrojtjes, Donald Ramsfeld në mesazhin dejtuar forcave të armatosura e ka krahasuar luftën e sotme kundër terrorizmit me luftën e zhvilluar për pavarësi në vitin 1776.

''Lufta globale kundër terrorit është largë nga përfundimi. Derisa është rivendosur liria për popujt e Afganistanit dhe Irakut, kërcënime të rrezikëshme mbesin në këto vende dhe anembanë globit'', ka thënë sekretari amerikan i Mbrojtjes.

 

 

Trupat amerikane kanë vrarë dje 11 sulmues irakianë

 

Bagdad, 5 korrik 2003 - Trupat amerikane kanë vrarë dje 11 sulmues irakianë të cilët i kishin vënë pritën një konvoji ushtarësh amerikanë afër Bagdadit.

Gjatë dy ditëve të fundit në Irak është vrarë një ushtar amerikan dhe janë plagosur mbi 12 të tjerë.

Këshilltarja amerikane për sigurinë kombëtare, Kondoliza Rais tha dje në Uashington se priten rreziqe të tjera.
Forcat amerikane në Irak gjatë javëve të fundit janë gjendur nën sulme të përditëshme.

 

 

Ekspertët analizojnë një kasetë që thuhet se është zëri i Sadam Huseinit

 

Bagdad, 5 korrik 2003 - Një person i regjistruar në kasetë, i cili pretendon se është Sadam Huseini, thotë se së shpejti do të ketë sulme të reja kundër ushtarëve amerikanë në Irak. Regjistrimi u transmetua dje nga televizioni Al-Jazeera dhe përkoi me luftime nga të cilat gjeti vdekjen një ushtar amerikan dhe u plagosën 18 të tjerë, si dhe mbetën të vrarë 18 sulmues irakianë.

Personi i regjistruar në kasetë thotë se gjatë ditëve të ardhshme, celulat e reja të luftës së shenjtë do të shkallëzojnë sulmet kundër atyre që i cilëson si pushtues të pafe. Ai u bën thirje irakianëve të mbrojnë ata që luftojnë kundër pushtimit amerikan.

 

 

Trupat amerikane kanë ndaluar mbi 11 pjesëtarë të forcave speciale turke në veri të Irakut

 

Ankara, 5 korrrik – Kryeministri turk, Taip Erdogan, ka deklaruar sot (e shtunë) se trupat amerikane kanë ndaluar forcat speciale turke në veri të Irakut dhe këtë akt ai e ka quajtur "një incident i keq", kurse njëherësh ka kërkuar lirimin e tyre të menjëhershëm, njofton Rojter.

 

Një burim qeveritar ka thënë se mbi 11 ushtarë turq, të vendosur në Irakun verior, janë mbajtur nga forcat amerikane dje, ndërsa Ankaraja i ka bërë Uashingtonit "një notë energjike".

 

Lidhur me këtë incident po zhvillohen bisedime në komunën e Kirkukut. Thuhet se ushtarët turq janë akuzuar se kanë planifikuar një sulm në guvernatorin provincial kurd, por burimet qeveritare kanë mohuar këtë.

 

 

Të pakten 4 veta janë vrarë në një shpërthim në Irakun Verior

 

Bagdad, 5 korrik 2003 – Të pakten katër veta janë vrarë dhe disa të tjerë janë plagosur në një shpërthim afër stacionit të policisë në Irakun Verior, ka bërë të ditur televizioni arab al-Xhazira, njofton BBCWorld.

 

Shpërthimi ka ndodhur në qytetin al-Ramadi rreth 100 km në perendim të Bagdadit. Njoftohet se përforcime ushtarake amerikane kanë shkuar në vendngjarje. Nuk dihet në ka ndër amerikanë të plagosur.

Copyright©2000-2003 Trepca.net - Të gjitha të  drejtat e rezervuara.